’Guuti naalaffinni assannik sanaani najugaqanngilaq’

APUSTILI Paulusip qularnanngitsumik Athenamut naalaffiit ilisimalluarpai, illoqarfinni amerlasuuni ajoqersuiartorluni angalanermini tikittagaani nassaassaammata. Encyclopædia Britannica-mi nalunaarutigineqarpoq Athena sorsunnermut ilisimassutsimullu guutiuinnaanngitsutut ilisimaneqartoq, aammali „assassornermut allanullu pikkoriffinnut eqqissinerup nalaanut atasut“.

Athenamut naalaffik tusaamasaanerpaaq tassaavoq naalaffik Parthenon Athenimiittoq, illoqarfik guutip arnap ateqaatigisaa. Naalaffiuvoq itsaq naalaffiit annersaasa ilagigunagaat, tassaniipporlu Athenamik inuusaliaq 12 meterisut portutigisoq kuultimik nagguaatsullu tuugaavanik sanaaq. Paulusi Athenimiimmat naalaffik maarmoriusoq qaqortoq taanna ukiut 500-t missaanni illoqarfiup ilisarnaatigereersimavaa.

Naalaffik Parthenon eqqarsaatigalugu Paulusip Athenimiut eqimattat Guuti pillugu oqaluttuuppai ’naalaffinni assannik sanaani najugaqanngitsoq’. (Apustilit Suliaat 17:23, 24) Athenamut naalaffissuit taassuminngalu inuusaliat alutornartut Paulusip tusarnaartaasa ilaannut Guutimit nalusamit ersinngitsumit alutorsaatigineqarnerupput. Paulusilli tikkuaaneratut takorloorneqarsinnaanngilaq inunnik Pinngortitsisoq ’inunnit kuultimik sølvimik ujaqqamilluunniit ilusilersugaasoq’. — Apustilit Suliaat 17:29.

Guutit guutillu arnat Athenatut ittut — pingaartorsuussusaat alutornassusaallu naalaffinnut inuusalianullu atasut — takkuttarlutillu tammartarput. Ukiut 500-ssaanni naalaffimmi Parthenonimi Athenamik inuusaliaq peerutereersimavoq, naalaffiilu illukuinnanngorsimasut arlaqanngitsut kiserngorussimapput. Kia ullumikkut Athena saaffigisarpaa ilisimassummik siulersuineranillu piumalluni?

Jehovali ’naassaanngitsumik Guutiusoq’ allatorluinnaq ippoq, inummit kimilluunniit takuneqarsimanngisaannartoq. (Romamiut 16:26; 1 Johannesi 4:12) Korap erneri allapput: „Guuti taama ittoq, naassaanngitsumik Guuterput, taanna siulersortigissavarput!“ (Tussiaat 48:15) Jehovap siulersuinera ullumikkut iluaqutigisinnaavarput oqaasiata Biibilip atuaqqissaarneratigut, inuunitsinnilu malittarisassatut atorneratigut. (wE 1/15 04)