Annikilliorfimmi ajunngitsuliat

„TAAMAATTUMIK . . . tamanut ajunngitsuliorniarta, pingaartumik uppeqatitsinnut,“ apustili Paulusi allappoq. (Galatiamiut 6:10) Silarsuarmi tamarmi Jehovap Nalunaajaasui najoqqutassiaq taanna malinniarlugu sapinngisaminnik iliuuseqartarput, ajunngitsuliorlutik tamanut, ingammik uppeqatiminnut. Tamanna annikilliortoqartillugu ersersinneqartuartarpoq. Taamaattoqartarneranik ersersitsisunik nunani assigiinngitsuni pingasuni pisimasunik eqqaasaqariarta.

2002-mi decembarimi anorersuarujussuaq, tyfoni nalunaaquttap-akunneranut 300 kilometerinit sukkanerusoq, Guamimi pitoraappoq. Illut amerlasuut ajoquserneqarput, ilaallu aserorluinnarlutik. Ilaqutariit Jehovap Nalunaajaasui eqqugaanerpaasut ikiorniarlugit taqqavani ilagiit saliisussanik aaqqissuussipallapput. Illunik ajoqusersimasunik iluarsaassisussat atortussallu Guamimi immikkoortortaqarfimmit pissarsiarineqarput, Hawaiimilu immikkoortortaqarfimmit ikiorneqarput. Sapaatip-akunnerisa arlaqanngitsut ingerlaneranni sanasut Hawaiiminngaaneersut sanaqqiinermi ikiuiartortut tikipput, qatanngutillu Guamimi najugallit ikiuussinnaajumallutik sulinngiffeqarput. Nuannaarlutik suleqatigiilluarnerat taqqavani najugalinnut tamanut nalunaajaataavoq.

Myanmarimi illoqarfiup Mandalayip avataa-tungaani naalagaaffilersaarfiup eqqaani ikuallattoqalerpoq. Tassannga ungasinngitsumi qatanngut arnaq unittooqqasoq ilaquttanilu najugaqarput. Taassuma illuata tungaanut ikuallattumiit anorlerpoq, taamaattumillu arpaannaq naalagaaffilersaarfimmut ikiortissarsiorpoq. Taamaalinerani naalagaaffilersaarfiup iluarsaanneqarnera pissutigalugu qatannguterpassuit tassaniipput. Qatanngutip arnap takkunnera tupaallaatigaat tamaanimi najugaqarnera sianiginngilaat. Ilaqutariit pigisaannik isumannaatsumukaassuinermi qatanngutit ikiuutipallapput. Qatanngutip arnap uiata, Jehovamut nalunaajaasuunngitsup, ikuallanneq tusaramiuk angerlapallappoq — takuaalu qatanngutit ilaquttani ikiulereersimagaat. Killitsingaarpoq qujamasoqalunilu, aamma eqqissiallappoq taamatummi pisoqartillugu tillinniartoqarajuttarmat. Qatanngutinit ajunngitsuliorfigineqarnertik inussiarnisaarfigineqarnertillu qatanngutip arnap erneratalu ilagiit kristumiut ataatsimiinnerinut tamanut najuuttaleqqinnissaminnut kajumississutigaat.

Ukioq kiffartorfiusoq kingulleq Mocambiquemi panernersuaqarnera karrinillu naatitsinerup iluatsinngitsoornera pissutigalugit inuppassuit kaannersuarmik eqqorneqariaannaapput. Taqqavani Jehovap Nalunaajaasuisa immikkoortortaqarfianniit ikiuiniapallattoqarpoq. Nerisassat naalagaaffilersaarfinniit agguaanneqartarput, ilaannikkut ilagiit ataatsimiinnerisa kingorna. Qatanngut arnaq kisimiittoq sisamanik meeralik ima oqarpoq: „Isumatsassimaqalunga ataatsimiigiarpunga,  nalulluinnarparami angerlarutta meeqqakka sutortissanerlugit.“ Qatanngutilli asannillutik isumassuimmata erniinnaq isumalluarnerulerpoq. „Soorlu makeqqitsitaallunga!“ oqarpoq.

Jehovap Nalunaajaasui aamma ’ajunngitsuliortarput’ Biibilimi tusarliussaq, neriulersitsillunilu isumallualersitsisoq, allanut oqaluttuarigaangamikku. Itsaq angutip silatuup oqaasii uku upperaat: „[Ilisimassusermut Guutimeersumut] naalattoq aarlerinaatsumik najugaqassaaq eqqissillunilu inuussalluni perlussanik aarlerigisaqarnani.“ — Ussatit 1:33.  (wE 6/1 04)

[Qupp. 31-mi assiliartat]

1, 2. Mocambiquemi kaattunut nerisassanik agguaaneq

3, 4. Guamimi illorpassuit tyfonimit aserorneqarput

[Suminngaanneernerat]

Meeraq, saamerleq: Andrea Booher/FEMA News Photo; arnaq, qulaani: AP Photo/Pacific Daily News, Masako Watanabe