Eqqumagitsi

ITSAQ isaaffinnik paarsisoqartarpoq illoqarfiup naalaffiullu isaaffiini angerlarsimaffiillu ilaasa isaariaanni kiffartuussisunik. Isaaffimmik paarsisut isaaffiit unnuami matoqqanissaat isumagiitigalugu pigaartuusussaapput. Suliassaq akisussaassuseqarnangaarpoq, illoqarfiummi isumannaatsuunissaanut navianartunut tamanut mianersoqqusinerat aalajangiisuuvoq.

Isaaffimmik paarsisup, aamma matumik paarsisumik taaneqartartup, suliassai Jiisusi Kristusip nalunngilai. Ilaanni ajoqersukkani matumik paarsisunut assersuuppai kajumissaarlugillu juutit aaqqissuussaanerata naggatissaanut atatillugu eqqumaqqullugit. Ima oqarpoq: „Mianersoritsi! Eqqumagitsi! Naluarsimi taamaaliffissaa qaqugu nalliukkumaartoq. Assigaa inuup nunamut allamut aallartussap illuni qimassagamiuk . . . isertarfiup paarsisaa peqqugaa eqqumassasoq. Taamaattumik eqqumagitsi nalugassiuk illup naalagaa qaqugu tikiukkumaarnersoq.“ — Markusi 13:33-35.

Taamatuttaaq ukiuni 125-nit amerlanerusuni atuagassiami matumani, Napasuliaq Alapernaarsuiffik-mi, Jiisusip eqqumaqqusilluni kajumissaarutaa ingerlateqqinneqartarpoq. Qanoq? Atuagassiami matumani qupperneq 2-mi ima allassimavoq: „Silarsuarmi pisartut Biibilimi siulittuutinik eqquutitsisut eqqumaffigilluarpai. Inuit tamaasa tuppallersartarpai tusagassamik nuannersumik tusarlerlugit Guutip naalagaaffiata inoqatiminnik qunutitsisut ungasinngitsukkut suujunnaarsikkumaarai nunalu paratiisinngortikkumaaraa.“ Napasuliaq Alapernaarsuiffik oqaatsini 150-ini 26.000.000-init amerlanerusunngorlugu naqiterneqartarpoq, taamaalillunilu silarsuarmi upperisarsiornikkut atuagassiani siammarsimanerpaalluni. Atuagassiaq taanna atorlugu Jehovap Nalunaajaasui, itsaq matumik paarsisutulli, inunnik sumi tamaaniittunik kajumissaaripput anersaakkut eqqumaqqullugit Naalagaq, Jiisusi Kristusi, ungasinngitsukkut tikiuteqqittussaammat pissutsillu aaqqissuussaanerat manna eqqartuuttussaammagu. — Markusi 13:26, 37.  (wE 2/1 05)