„Pisiarineqarpusi akisuumik“
„Pisiarineqarpusi akisuumik“
„Pisiarineqarpusi akisuumik. Taamaattumik Guuti timissigut naalannartinniarsiuk.“ — 1 KORINTHIMIUT 6:20.
1, 2. (a) Mosesip inatsisai naapertorlugit inussiat Israelikkuusut qanoq pineqartussaappat? (b) Inussiaq naalakkaminik asannittoq qanoq iliorsinnaava?
„ITSAQ inussiaateqarneq nalinginnaasorujussuullunilu akuerineqartarpoq,“ Holman Illustrated Bible Dictionary-mi allassimavoq, imalu nangilluni: „Egyptenimi, Grækenlandimi Romamilu aningaasarsiorneq inussiaatit sulinerannik tunngaveqarpoq. Ukiuni hundredelinni siullerni u.n.s. Italiami inuit pingasuugaangata ataaseq inussiaataasarpoq, nunanilu allani inuit tallimaagaangata ataaseq inussiaataasarluni.“
2 Israelitoqqami aamma inussiaateqartoqartaraluartoq, Mosesip inatsisai iluaqutigalugit inussiat hebræeriusut illersorneqartarput. Assersuutigalugu Israelikkuusoq Inatsisit naapertorlugit ukiut arfinillit sinnerlugit inussiaasinnaanngilaq. Ukiut arfineq-aappassaanni „akiliunneqarani inussiaajunnaarsitaassaaq“. Inussialli qanoq pineqartarnissaannik malittarisassat ima ingasaassinngitsigalutillu inuppalaartigimmata Mosesip inatsisaani ima aalajangersagaqarpoq: „Inussiarli taanna oqarpat: ’Naalagara nuliaralu qitornakkalu asagakkit inussiaajunnaarsitaarusunngilanga,’ taava piginnittaata Guutimut sassartissavaa, matumullu matserfimmulluunniit iigartillugu siutaata nuua puttummik putussavaa; taavalu inussiaatigiuassavaa.“ — 2 Mosesi 21:2-6; 3 Mosesi 25:42, 43; 5 Mosesi 15:12-18.
3. (a) Ukiuni hundredelinni siullerni kristumiut inussiaataaneq qanoq ittoq inussiaataaffigilerpaat? (b) Suna Guutimik kiffartorfiginnerusulissutigaarput?
3 Nammineq kajumissutsimik inussiatut sulinermik aaqqissuussineq kristumiut ilumoortut inussiaataanerannut assersuutaavoq. Assersuutigalugu Biibilimik allattut Paulusi, Jaaku, Petrusi Judasilu Guutimut Kristusimullu kiffaanerarput imaluunniit inussiaataanerarput. (Titusi 1:1; Jaaku 1:1; 2 Petrusi 1:1; Judasi 1) Paulusip kristumiut Thessalonikamiittut eqqaasippai guutipiluit tunullugit Guutimut saassimasut, ’Guutimut uumasumut ilumoortumullu inussiaataajumallutik’. (1 Thessalonikamiut 1:9, NV) Kristumiut taakkua suna Guutimut inussiaatinngorusulissutigaat? Aap, sunaana pillugu inussiaq Israelikkuusoq nammineq aalajangikkaminik inuttut kiffaanngissuseqarunnaartoq? Naalakkaminut asanninnera pissutaavoq, ilaa? Kristumiut inussiaataanerat Guutimut asanninnermik tunngaveqarpoq. Guuti uumasoq ilumoortorlu ilisarisimalerlugulu asaleraangatsigu ’uummatikkut iluunngarluta tarnikkullu iluunngarluta’ kiffartorfigerusulertarparput. (5 Mosesi 10:12, 13) Guutimulli Kristusimullu inussiaatinngorneq qanoq paasisariaqarpa? Ulluinnarni inuunitsinnut qanoq sunniuteqarpa?
„Qanorluunniit iliorlusi taamaaliussaasi Guutip ataqqinaatissaanik“
4. Qanoq ililluta Guutimut Kristusimullu inussiaatinngortarpugut?
4 Inussiaq ima nassuiarneqarpoq: „Inuk inatsisinut naapertuuttumik allamit allanilluunniit pigineqartoq, naalalluinnarnissamullu pisussaasoq“. Tamatta eqqortumik Jehovamit pigineqalertarpugut inuunerput taassumunnga tunniulluinnaraangatsigu kuisillutalu. „Immissinnik piginngilasi, pisiarineqarpusimi akisuumik,“ apustili Paulusi nassuiaavoq. (1 Korinthimiut 6:19, 20) Soorunami akiliutigineqartoq tamanna tassaavoq Jiisusi Kristusip utertitsissutitut pilliutaa, pilliummi tamanna tunngavigalugu Guutip kiffamisut, kristumiutut tanitaagutta taakkununngaluunniit suleqataagutta nunarsuarmi inuunissamik neriuutillit, akueraatigut. (Efesosimiut 1:7; 2:13; Saqqummersitat 5:9) Taamaattumik ullormit kuisiffitsinnit ’Jehovamit pigineqalerpugut’. (Romamiut 14:8) Jiisusi Kristusip aavanik erlinnartumik pisiarineqaratta taassumunngattaaq inussiaatinngorpugut inassutaanillu maleruaanissaq pisussaaffigalugu. — 1 Petrusi 1:18, 19.
5. Jehovamut inussiaataasutut pisussaaffipput pingaarnerpaaq suua, tamannalu qanoq ililluta eqqortissinnaavarput?
5 Inussiat naalagartik naalattussaavaat. Nammineq kajumissutsitsinnik Naalakkatsinnillu asanninnerput kajumississutigalugu kiffartorpugut. Johannesip allagai siulliit 5:3-mi allassimavoq: „Guutimut asanninneq tassaavoq inassutai maleruaratsigit, inassutaalu artornartuunngillat.“ Taamaattumik naalannerput Guutimik asanninnitsinnut taassumunngalu naalatsigitinnitsinnut uppernarsaataavoq. Tamannalu iliuutsitsinni tamani ersertarpoq. Paulusi ima allappoq: „Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.“ (1 Korinthimiut 10:31) Ulluinnarni allaat annikitsutigut ersersissinnaavarput ’Jehovamut kiffartorluta’ imaluunniit inussiaataalluta. — Romamiut 12:11.
6. Guutimut inussiaataanerput aalajangiiniarnitsinnut qanoq sunniuteqartarpa? Assersuuteqarit.
6 Assersuutigalugu aalajangiiniarnitsinni Naalakkatta qilammiusup, Jehovap, piumasaa suunersoq eqqarsaatigeqqissaartariaqarparput. (Malaki 1:6) Aalajangeruminaatsitat Guutimut naalannitsinnut misilinneqaataasinnaapput. Uummatitta ’tatigisassaanngitsup’ ’katsorsagassaanngitsullu’ kajumigisai malinnagit taassuma siunnersuutai malittarpavut? (Jeremia 17:9) Qatanngut arnaq ueqanngitsoq Melisamik atilik sivisunngitsumik kuisimareerluni angummit inuusuttumit soqutigineqalerpoq. Angut inuusuttoq taanna ileqqorippasikkaluarpoq, Jehovallu Nalunaajaasuinit Biibilimik atuaqqissaaqatigineqartalereersimalluni. Utoqqaanertalli ilaata Melisa oqaloqatigaa Jehovap inatsisaanik maleruaanissap taamaallaallu „Naalakkami“ katinnissap silatusaarnerussusiat pillugu. (1 Korinthimiut 7:39; 2 Korinthimiut 6:14) Melisa nassuerpoq: „Siunnersuutip tamatuma maleruarnissaa uannut imaannaasimanngilaq. Aalajangerpungali Guutip siunnersuutai ersarissut naalanniarlugit, piumasaanimmi iliorniarlunga taassumunnga tunniulluinnarnikuugama.“ Melisa pisimasut eqqaallugit ima oqarpoq: „Siunnersuut maleruarsimagakku nuannaaqaanga, angummi taanna sivitsunngitsoq atuaqqissaartarunnaarpoq. Attaveqarfigiuarsimasuugukku maanna uppinngitsumik ueqassagaluarpunga.“
7, 8. (a) Sooq inunnit iluarisaanissarput ingasaattariaqanngilarput? (b) Inunnut qununerup qanoq ililluni ajugaaffigineqarsinnaaneranik assersuuteqarit.
7 Guutimut inussiaataagatta, inunnut inussiaatinngornaveersaartariaqarpugut. (1 Korinthimiut 7:23) Ilumoorpoq arlatta kialuunniit nuannarineqannginnissaq nuannarinngikkaa, eqqaamasariaqarparpulli najoqqutassiat kristumiunit maleruarneqartut silamiut najoqqutarisaannit allaanerusut. Paulusi ima aperivoq: „Inunnut iluareqqusaarnerpunga?“ Ima isummerpoq: „Taamaaliortuarsimagaluaruma Kristusip kiffarissanngikkaluarpaanga!“ (Galatiamiut 1:10) Aap, inunnit iluarineqarniarluta tatineqarneq nakkaannarfigissanngilarput. Taavami qanoq iliortariaqarpugut inuttut allatulli pissusilersornissamut tatineqarutta?
8 Assersuutigisinnaavarput niviarsiaq Spaniamiu kristumiu Elenamik atilik. Atuaqataasa ilarpassui aaversittartuupput. Nalunngilaat Jehovap Nalunaajaasuisa ilaattut aammik tunisiumananilu aalersortikkumanngitsoq. Atuaqatiminut isummaminik nassuiaanissaminut periarfissaqalerami kajumilluni oqalugiarumavoq. „Ilumoortumik oqassaguma annilaangasupilussuuvunga,“ Elena oqaluttuarpoq. „Piareersarluarpungali, tamannalu tupaallannartumik kinguneqarpoq. Atuaqatinnit ataqqineqalerpunga, ilinniartitsisullu oqarfigaanga suliaq peqataaffigisara nersorlugu. Nuannaarutiginerpaavarali Jehovap aqqa illersorakku aalajangiusimasaralu Biibilimik tunngavilik paasinarluartumik nassuiarsinnaasimagakku.“ (1 Mosesi 9:3, 4; Apustilit Suliaat 15:28, 29) Aap, Guutimut Kristusimullu inussiaataagatta inunnit allanit allaaneruvugut. Upperisattali illersornissaa piareersimaffigigutsigu amerlanertigut allanit ataqqineqalersinnaavugut. — 1 Petrusi 3:15.
9. Inngili apustili Johannesimut saqqummersoq qanoq ilinniarfigisinnaavarput?
9 Guutimut inussiaataanerput eqqaamagutsigu maniguuttuarnissatsinnut iluaqutigisinnaavarput. Ilaanni apustili Johannesi Jerusalemimik qilammiittumik alutornangaartumik takorruukkani killinneqaatigingaaramiuk inngilip takorruukkamik Guutimeersumik tusarliisup isigaasa saavannut pallorpoq. „Mianersorit (1900/1961)“, inngili oqarpoq. „Taamaalioqinak! Uanga kiffaannaavunga ilittut illillu qatanngutittut pruffiititut oqaatsinillu mappersakkami uani allassimasunik aalajangiussisutut. Guuti pallorfigissavat.“ (Saqqummersitat 22:8, 9) Inngili taanna Guutimut inussiaataasunut tamanut maligassaalluarpoq! Kristumiut ilaat ilagiinni immikkut akisussaaffeqarput. Jiisusili oqarpoq: „Akornassinni angisuujumasoq ilissinnut kiffaassaaq, akornassinnilu nuimanerujumasoq ilissinnut inussiaataassaaq.“ (Matthæusi 20:26, 27) Jiisusimut ajoqersugaagatta tamatta inussiaataavugut.
„Pisussaassuserput malillugu iliuinnarpugut“
10. Guutip kiffaanik aalajaatsunik taassuma piumasaatut iliornissaminnik tamatigut ajornanngitsutut isiginninngitsunik Biibilimeersunik assersuuteqarit.
10 Inunnut naammalluinnanngitsunut Guutip piumasaatut iliorneq ajornaatsuujuaannanngilaq. Jehovap Israelikkunnik Egyptenimi inussiaataanerannit aniguisitsiartoqqummani pruffiiti Mosesi nangaavoq. (2 Mosesi 3:10, 11; 4:1, 10) Jona Ninevemiunut eqqartuussummik oqaluussiartoqquneqareerluni „[Jehovamit] qimaalluni Tarshishimukarnialerpoq“. (Jona 1:2, 3) Barukip, pruffiitimut Jeremiamut allattaasup, qasunini naammagittaalliutigaa. (Jeremia 45:2, 3) Nammineq kissaatigisavut piumanerusavulluunniit Guutip piumasaanut akerliuppata qanoq periaaseqartariaqarpugut? Tamanna Jiisusip assersuusiaasa ilaanni akineqarpoq.
11, 12. (a) Jiisusip assersuusiaa Lukasi 17:7-10-miittoq naatsumik oqaluttuarilaaruk. (b) Jiisusip assersuusiaa qanoq ilinniarfigisinnaavarput?
11 Jiisusip inussiaq ulloq naallugu narsaammi naalakkami nersutaataanik paarsisimasoq oqaluttuaraa. Inussiaq akunnerit 12-it sulerulooreerluni qasulluni angerlarmat naalagaata ingeqqullugu mamartunillu nereqqullugu oqarfiginngilaa. Naalagarli oqarpoq: „Nerisassiuutinnga, qiteruseriarlutillu saqissutinnga neritillunga imertillungalu. Taamaalioreeruit nammineq nerillutillu imerumaarputit.“ Inussiap naalakkani isumagereeruniuk aatsaat nammineq pisariaqartitani isumagisinnaavai. Jiisusip assersuusiaq ima naggaserpaa: „Taamattaaq ilissi ilissinnut suliareqqusat tamaasa suliarereerussigit ima oqassaasi: ’Kiffaavugut atunngitsut. Pisussaassuserput malillugu iliuinnarpugut.’“ — Lukasi 17:7-10.
12 Jiisusip assersuusiaq taanna oqaluttuarinngilaa Jehovap imminut kiffartornitsinni iliuutsitsinnik pingaartitsinnginnera ersersinniarlugu. Biibilimi paasinarluartumik ima allassimavoq: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi.“ (Hebræerit 6:10) Assersuusiami pingaarnerpaaq tassaavoq inussiap imminut iluarusutsinnginnissaa namminerluunniit ilorrisimaarnissaminik salliutitsinnginnissaa. Guutimut tunniulluinnaratta taassumunngalu inussiaatinngorniarluta aalajangeratta nammineq piumasavut tunulliullugit taassuma piumasaanik salliutitsinissarput akueraarput.
13, 14. (a) Pissutsini qanoq ittuni nammineq kissaatigisavut iliuusereqqajaasakkavullu tunulliuttariaqarpavut? (b) Sooq Guutip piumasaa salliutittariaqarparput?
13 Guutip oqaasianik Biibililersaarutinillu ’inussiap aalajaallunilu silatuup’ pilersitaanik atuaqqissaartassagaanni suliniuteqangaatsiarnissaq pisariaqarsinnaavoq. (Matthæusi 24:45, NV) Immaqa ingammik tamanna pisariaqassaaq atuarneq erloqinartittuaannarsimagutsigu, Biibililersaarutilluunniit ilaanni ’Guutip itissusii’ sammineqarpata. (1 Korinthimiut 2:10) Taamaakkaluartorli nammineq atuaqqissaarnissamut piffissaqartariaqarpugut, ilaa? Imaassinnaavoq atuaqqissaagassap misissornissaanut piffissamik atuinissamut imminut naalakkertariaqartugut. Taamaaliunngikkuttali qanoq ililluta ’nerisassat tamuasarissat inersimasunngorluarsimasunit nerineqartussat’ ueqqivigilersinnaagatsigik? — Hebræerit 5:14.
14 Taavami ulloq naallugu sulereerluta qasulluta angerlarsimagutta? Immaqa kristumiut ataatsimiinneri najuuffiginiarlugit imminut pinngitsaalisariaqarpugut. Aamma imaassinnaavoq takornartat oqaluussiffiginissaat nuannarinngikkipput. Paulusip nammineq nassuerutigaa ilaannikkut ’kajuminnata’ nutaarsiassaq nuannersoq oqaluussissutigisarsinnaagipput. (1 Korinthimiut 9:17, 1900/1961) Tamakkuli iliuuserisarpavut Jehovap — Naalakkatta qilammiusup asasatta — taamaalioqqummatigut. Aamma ilumoorpoq atuaqqissaarniarluta, ataatsimiigiarniarluta oqaluussiniarlutalu iliuuserisariaqakkatsinnik iliuuseqaraangatta tamatigut nuannaartarlutalu nakussatsinneqartartugut, ilaa? — Tussiaat 1:1, 2; 122:1; 145:10-13.
’Tunummut qiviarnak’
15. Guutimut naalatsigitinnermut tunngatillugu Jiisusi qanoq maligassaalluarpa?
15 Jiisusi Kristusip asseqanngilluinnartumik ersersissimavaa Ataataminut qilammiusumut naalatsigitilluni. Ajoqersukkani ima oqarfigai: „Qilammit aqqarpunga uanga nammineq piumasara pinnagu aallartitsisimali piumasaa naammassiniarlugu.“ (Johannesi 6:38) Naatsiivik Getsemanemi toqumut annilaangalerami ima qinuvoq: „Ataataga, ajornanngippat ermutsip uuma uanga qaangiinnarlinga. Uangali piumasara pinnani illit piumasat pili.“ — Matthæusi 26:39.
16, 17. (a) Taamaatissimasavut qanoq isigisariaqarpavut? (b) Sooq Paulusip silarsuarmi periarfissaminik ’igitassaannaatitsinera’ piviusorsiornerua?
16 Guutimut inussiaataaniarluta aalajangersimanitsinnik aalajangiusimanninnissarput Jiisusi Kristusip kissaatigaa. Ima oqarpoq: „Assallatserilerluni tunummut qiviartoq kinaluunniit Guutip naalagaaffianut naleqqutinngilaq.“ (Lukasi 9:62) Guutimut inussiaataasutut taamaatissimasatsinnik eqqarsaatiginninnissarput eqqortuliornerussanngilaq. Guutimulli inussiaataaniarluta aalajangernikuugatta ’pigilersimasavut’ pingaartingaartariaqarpavut. Paulusip kristumiut Filippimiittut ima allaffigai: „Ilumut suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq. Taanna pillugu tamakku tamaasa annaasimavakka, tamaasalu perlukutut igitassaannaatippakka Kristusi pigilerumallugu.“ — Filippimiut 3:8.
17 Paulusip igitassaannaatitai Guutimullu inussiaataanermigut anersaakkut pilluaqqussutissat pillugit qimassimasai eqqarsaatigikkit. Silarsuup ilorrisimaarnartui qimaannarnagit, aammattaarli juutiussutsimi siuttunut ilaalersinnaanini sussakkeerpaa. Paulusi juutiussutsimiiginnarsimasuuguni Gamalielip erneratut Simeonitut atorfeqalerluarsimasinnaagaluarpoq. (Apustilit Suliaat 22:3; Galatiamiut 1:14) Simeoni farisæerit siuttuinut ilaalerpoq ukiunilu 66-imiit 70-imut juutit Romamiunut pikitsitsineranni — naak tamatumani nangaassuteqaraluarluni — pingaartumik inissisimaffeqarluni. Pikitsitsinermi tamatumani toquvoq, juutinit ingasaassiniartunit imaluunniit Romamiunit toqutaalluni.
18. Jehovamut kiffartornerup nuannaarutaaneranik ersersitsisumik assersuuteqarit.
18 Jehovap Nalunaajaasuisa ilarpassuisa Paulusip maligassiaa malissimavaat. „Atuarunnaarama ukiualuit qaangiuttut Londonimi eqqartuussissuserisut nuimanerpaat ilaata qullersaqarfiani allatsinngorpunga,“ Jean oqaluttuarpoq. „Suliffiga nuannaraara akissarsilluartarlungalu, qamuunali nalunngilara Jehovamut kiffartorninni iliuuseqarnerusinnaagaluarlunga. Naggataatigut tassani suliunnaarlunga pionerinngorpunga. Nuannaarutigeqaara ukiut 20-ngajaat matuma siorna taamaaliorsimagama! Piffissaq tamaat kiffartornera allattaanerup pisuunerulersitsisinnaaneranit annerungaartumik inuuninnik pisuunerulersitsivoq. Jehovap oqaasiata inuup inuuneranik allanngortitsisinnaanera takullugu allamik nalerisimaarnarnerusoqanngilaq. Taamatut allannguisitseqataasinnaalluni nuanneqaaq. Jehovamut tunniussavut taassuma uagutsinnut tunniussaanut sanilliullugit suunngillat.“
19. Suna aalajangiusimasariaqarparput, aamma sooq?
19 Piffissap ingerlanerani pissutsit atukkavut immaqa allanngussapput. Jehovamulli tunniulluinnarsimanerput taannaajuaannassaaq. Suli Jehovap inussiaatigaatigut, taassumalu piffissatsinnik, nukitsinnik, piginnaanitsinnik pigisatsinnillu pitsaanerpaamik qanoq atuinissamut uagut nammineq aalajangiisussanngortippaatigut. Taamaattumik tamatumunnga tunngatillugu aalajangikkavut Guutimik qanoq asannitsiginitsinnik ersersitsisarput. Aamma inuttut qanoq pilliuteqarusutsiginitsinnik ersersitsisinnaapput. (Matthæusi 6:33) Pissutsit atukkavut qanorluunniit ikkaluarpata Jehovap pitsaanerpaanik tuninissaa aalajangiusimasariaqarparput, ilaa? Paulusi ima allappoq: „Kajumissuseqaraangat ajunngitsumik taanna qujarunneqartarpoq pisinnaasanut missiliuullugu pisinnaanngisanut pinnagu.“ — 2 Korinthimiut 8:12.
„Inerititaqarpusi“
20, 21. (a) Guutimut inussiaataasut sunik inerititaqartarpat? (b) Jehovap inuit pigisaminnik pitsaanerpaanik imminut tunniussisut qanoq akilissavai?
20 Guutimut inussiaataanikkut naqisimaneqartutut misigisoqartanngilaq. Inussiaataanermilli nuannaarunnaarsitsisumit inussiaataajunnaartoqartarpoq. Paulusi ima allappoq: „Ajortimut kiffaajunnaarlusi Guutimut inussiaataalerassi inerititaqarpusi illernarsagaassutissanik inuunermik naassaanngitsumik naggateqartussanik.“ (Romamiut 6:22) Guutimut kiffartornerput illernartunik inerititaqarpoq, illernartumik, tassa ileqqussatigut minguitsumik, ileqqoqarnerup inerititaanik inerititaqarnitsigut. Aammattaaq kiffartornerput siunissami inuunermik naassaanngitsumik kinguneqassaaq.
21 Jehova inussiaatiminut avaaginnittuuvoq. Taassumunnga kiffartornitsinni sapinngisatsinnik iliorutta, ’qilaap igalaavi ammassavai pilluaatissanillu killeqanngitsunik kueraaffigaluta’. (Malaki 3:10) Naassaanngitsumik Jehovamut inussiaatitut kiffartornissap nuanningaassusissaa eqqarsaatigeriaruk! (wE 3/15 05)
Eqqaamavigit?
• Sooq Guutimut inussiaatinngorpugut?
• Qanoq ersersissinnaavarput Guutip piumasaanut naalatsigitilluta?
• Sooq nammineq piumasatsinnit Guutip piumasaata salliutinnissaa piareersimaffigisariaqarparput?
• Sooq ’tunummut qiviassanngilagut’?
[Atuaqqissaarnermi apeqqutit]
[Qupp. 26, 27-mi assiliartaq]
Israelimi nammineq kajumissutsimit inussiaataasarnermik aaqqissuussineq kristumiutut kiffartornermut assersuutaavoq
[Qupp. 27-mi assiliartaq]
Kuisikkaangatta Guutimut inussiaatinngortarpugut
[Qupp. 27-mi assiliartat]
Kristumiut Guutip piumasaanik salliutitsisarput
[Qupp. 28-mi assiliartaq]
Mosesi suliassinneqarami nangaavoq