Ilissi angajoqqaajususi, kingornussarsiasi erlinnartut illersorsigik

„Ilisimassut illersuutaavoq . . . [Taanna] inuisa inuussuteqaatigisarmassuk.“ — OQALUUSSISARTUP OQAASII 7:12, NV.

1. Sooq angajoqqaat meeqqatik tunissutisiamittut isigisariaqarpaat?

ANGAJOQQAAT meerartaaraangata inuk nutaaq angajoqqaami isikkuinut inuttullu pissusiinut assingusoq silarsuarmut pisarpoq. Meeqqat Biibilimi taaneqarput ’Jehovamit kingornussarsiatut’. (Tussiaat 127:3, NV) Jehova Inuunermik Tunisisorpiaagami nammineq pigisaminik angajoqqaanut isumagisassanngortitsisarpoq. (Tussiaat 36:10) Ilissi angajoqqaajususi Guutimit tunissutisiarsi erlinnartoq qanoq isigaasiuk?

2. Manoa qanoq piva ataatanngortussanngorluni tusaramiuk?

² Tunissut taamaattoq maniguulluni qujamasullunilu ilumut tigusariaqarpoq. Israelikkuusoq Manoa taamaaliorpoq ukiut 3000-init amerlanerusut matuma siorna nuliani inngilimit ilisimatinneqarmat meerartaartussanngortoq. Nutaarsiassaq nuannersoq tamanna tusaramiuk Manoa ima qinuvoq: „[Jehova], tusannga! Guutip kiffaa aallartitat maannaqqilli ajoqersuullutalu nukappiaraq inunngortussaq qanoq iliuuseqarfigissagipput.“ (Eqqartuussisut 13:8) Manoap maligassiaa angajoqqaat qanoq ilinniarfigisinnaavaat?

Sooq ullumikkut Guutimit ikiorneqarnissaq pisariaqartikkipput

3. Sooq ullumikkut meeqqanik perorsaanermi Guutimit ikiorneqarnissarput aatsaat taama pisariaqartitsigaarput?

³ Ullumikkut angajoqqaat meeqqaminnik perorsaanissaminnut Jehovamit ikiorneqarnissaq aatsaat taama pisariaqartitsigaat. Tamatumunnga pissutaavoq Saatani Diaavulup inngiliisalu qilammiit  nunamut iginneqarsimanerat. „Eqqanarli nuna“, Biibilimi taama mianersoqqussuteqarpoq, „Diaavulu ilissinnut aqqarmat kamattorsuulluni, piffissakissutsi nalunnginnamiuk.“ (Saqqummersitat 12:7-9, 12) Biibilimi nassuiarneqarpoq Saatani ’løvitut uiannisaartutut angalasartoq iisassarsiorluni’. (1 Petrusi 5:8) Løvit piniaraangamik uumasunik sanngiinnersiorajupput, pingaartumik piaqqanik. Taamaattumik angajoqqaat kristumiut silatusaassapput meeqqaminnik illersuiniarnerminni Jehovamut saaffiginnittarunik siunnersoqqullutik. Meeqqatit illersorniarlugit illit qanoq iliuuseqartigaat?

4. (a) Angajoqqaat qanoq iliussagaluarpat najugarisamik eqqaani løvimik angalaartoqartuugaluarpat? (b) Meeqqanut suna illersuutaasinnaava?

⁴ Nalunngitsuugukku eqqassinni løvimik angalaartoqartoq soorunami sapinngisat tamaat iliuuseqassagaluarputit meeqqatit illersorniarlugit. Saatani uumasutut kiisortutut ippoq. Guutip kiffai aserorsarniartarpai Guutimit akuerisaanissaminnut naleqqukkunnaarsinniarlugit. (Jobi 2:1-7; 1 Johannesi 5:19) Meeqqat pisariuminartuupput. Diaavulup napiarniutaanit pisaritikkumanatik meeqqat Jehova ilisarisimalerniartariaqarpaat naalallugulu. Pingaaruteqartorujussuuvoq Biibilimeersunik ilisimasaqalernissaat. Jiisusi oqarpoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq [ilisarisimannilerniarnerat, NV].“ (Johannesi 17:3) Aammattaaq meeqqat inuusuttullu ilisimassuseq — paasinnissinnaaneq ilikkakkaminnillu atuisinnaaneq — pisariaqartippaat. ’Ilisimassut inuisa inuussuteqaatigisarpaat’, taamaattumik ilissi angajoqqaajususi meeqqasi ikiortariaqarpasi sallusuissummik asannilernissaannut. (Oqaluussisartup oqaasii 7:12, NV) Qanoq taamaaliorsinnaavisi?

5. (a) Meeqqat ilisimassuseqalersinniarlugit qanoq ikiorneqarsinnaappat? (b) Ilisimassutsip pingaaruteqassusia Ussatit-ni qanoq eqqartorneqarpa?

⁵ Meeqqasi Guutip oqaasianik atuffassinnaavasi, aamma atuffattariaqarpasi. Atuffassinerinnarli naammanngilaq Jehova asallugulu naalassinnaalissappassuk. Aamma tusakkatik paasisariaqarpaat. Assersuuteqariarta: Meerarpaaluit oqarfigineqarput aqqusinikkut ikaassanngitsut illua’tungaanut illua’tungaanullu qiviaqqaartinnatik, taamaalioqqaarnatilli ikaarput. Sooq? Immaqa biilimit aporneqaraanni qanoq pisoqartarnersoq nassuiaanneqakulasarsimanngillat, immaqaluunniit tamatuma qanoq navianartiginera taakkua paasisinnaasaannik nassuiarneqarsimanngilaq, ’sianiissutsip’ kingunipilui alianartut taakkununnga pinngitsoorsinnaaqqullugit. Meeqqat ilisimassuseqalernissaannik ikiussagaanni piffissaqartariaqarpoq naammagittangaartariaqarlunilu. Ilisimassuserli pingaaruteqaqaaq! „Ilisimassutsip aqqutai aqqutaapput alianaatsut, aqqusininngui tamarmik pilluarnermukartuupput,“ Biibilimi taama allassimavoq. „Aalajangiussisiminut tamanut orpiuvoq inuunartoq, pilluarput taassuminnga iperaanaveersaartut.“ — Ussatit 3:13-18; 22:15.

Ilinniartitsineq ilisimassuseqalersitsisoq

6. (a) Meeqqat inerteqqutaasunik iliuuseqartarnerannut suna pissutaagajuppa? (b) Diaavulup sorsunneq suna ingerlappaa?

⁶ Amerlanertigut meeqqat eqqunngitsumik iliuuseqartarnerannut suup eqqortuuneranik ilinniartinneqarsimannginnerat pissutaanani, ilinniartinneqarneratali uummataannut — qamunga ilorpiaannut — anngussimannginnera pissutaasarpoq. Diaavulu ilungersorpoq meeqqat inuusuttullu uummataat tiguarniarlugit. Taakkua silarsuarmit matumannga guutiitsumik sunnerneqarnissaat Diaavulup isumagaa. Inunnguuseralugulu ajortilittut eqqunngitsulioqqajaasarnerat atornerlunniartarpaa. (1 Mosesi 8:21; Tussiaat 51:7) Angajoqqaat paasisariaqarpaat meeqqamik uummataasa naalagaaffigilernissaat pillugu sorsuuttoqartoq.

7. Sooq naammanngila meeqqat oqarfigissallugit suna eqqortuunersoq sunalu eqqunngitsuunersoq?

⁷ Angajoqqaat meeqqatik suup eqqortuuneranik imaluunniit suup eqqunngitsuuneranik oqaluttuukkajuttarpaat, taavalu isumaqartarlutik meeqqatik ileqqussatigut najoqqutassiamik ilinniartissimallugit. Assersuutigalugu meeqqanut oqartarput sallusoqassanngitsoq, tillittoqassanngitsoq imaluunniit katissimanngisamik kinguaassiuutitigut atoqateqartoqassanngitsoq. Meeqqalli naalassagunik sakkortunerusumik kajumississuteqarnissartik pisariaqartippaat; angajoqqaat oqaasii naammanngillat. Meeqqat ilisimatinneqartariaqarput Jehovap tamakku inatsisigigai. Ilinniartariaqarpaallu Guutip inassutaanut naalannissaq  silatusaarnerusoq. — Ussatit 6:16-19; Hebræerit 13:4.

8. Ilinniartitsineq qanoq ittoq meeqqat ilisimassuseqarlutik iliuuseqarnissamut iluaqutigisinnaavaat?

⁸ Silarsuaq avataaniittullu paasiuminaatsut, uumasut naasullu assigiinngitsorpassuit, ukiup nikerarneri — tamakku tamaasa meeqqap ilisimasumik Pinngortitsisoqarneranik paasinninnissamut iluaqutigisinnaavai. (Romamiut 1:20; Hebræerit 3:4) Aammattaaq meeqqat ilinniassavaat Guutip asagaatik ernermilu pilliutaatigut naassaanngitsumik inuusinnaalersikkaatik, taassumunngalu naalannermikkut nuannaartissinnaallugu. Taava qularnanngitsumik meeqqat Diaavulumit akornusersorneqaraluarlutik Jehovap kiffartorfiginissaanut kajumississapput. — Ussatit 22:6; 27:11; Johannesi 3:16.

9. (a) Meeqqat inuunermik annaassissutaasumik ilinniartissagaanni suna pisariaqarpa? (b) Ataataasut qanoq ilioqqullugit kajumissaarneqarpat, tamannalu qanoq isumaqarpa?

⁹ Meeqqat taakkununnga illersuutaasumik eqqortumillu iliornissaannut kajumississutaasumik ilinniartissagaanni piffissaqarnissaq, soqutiginninnissaq pilersaarusiornissarlu pisariaqarput. Aammattaaq angajoqqaat taamaaliussagunik siunnersuutit Guutimeersut ilassisariaqarpaat. Biibilimi ima allassimavoq: „Ilissi ataataasusi, qitornasi . . . perorsartuarsigik Jehovap ileqqoreqqusai oqaaqqissaarutaalu malillugit.“ (Efesosimiut 6:4, NV) Qanoq isumaqarpa? Griikerit oqaasiat „oqaaqqissaarineq“-mik nutserneqartoq ilaatigut isumaqarpoq „isummamik tunniussineq“. Tassa ataataasut kristumiut kajumissaarneqarput Jehovap isumaanik meeqqaminnut tunniusseqqullugit. Tamanna meeqqanut illersuutaangaassaaq! Guutip eqqarsaatai, eqqarsariaasia, meeqqat isumaanni puiuikkiutitinneqarpata eqqunngitsuliornissamut illersuutigissavaat.

Asanninneq kajumississutigalugu

10. Qitornat sunniuteqarluartumik ilinniartissinnaassagukku suup ilisimanissaa pingaaruteqarpa?

¹⁰ Meeqqatit perorsarluarumallugit kissaateqarnerit eqquutissappat ilungersornitit asanninnermik aallaaveqartariaqarput. Attaveqaqatigiilluarnissaq tamatumani pingaaruteqarpoq. Ernerpit panippilluunniit inuunerani susoqartarnersoq aamma qanoq isiginnittaaseqarnersoq paasiniaruk. Ilorrisimaarnissinni periaaserissumik iliuuseqarit qitornat nangaanani oqalussinnaaqqullugu. Imaassinnaavoq oqaaserisai annilaarutigigitit. Ingasattumilli qisuariaqinak. Paasinnillutilli soqutiginnillutillu tusarnaaginnarit.

11. Angajoqqaat meeqqaminnut Guutip isumaanik qanoq tunniussisinnaappat?

¹¹ Immaqa meeqqatit Guutip inatsisaanik kinguaassiuutitigut inuunerlunnermut inerteqqutaasunik Biibilimit atuffattarsimassavatit, allaammi immaqa arlaleriaqalutit atuffattarsimassavatit. (1 Korinthimiut 6:18; Efesosimiut 5:5) Qularnanngilaq tamanna meeqqat iluaqutigisimassagaat Jehovap nuannaarutigisartagaanik aliatsaatigisartagaanillu paasinninnissamut. Meeqqanulli Jehovap isumaanik tunniussinissaq naammanngilaq. Meeqqat pisariaqartippaat Jehovap inatsisaasa pingaaruteqassusiannik tunngavilersuinissaminnut ikiorneqarnissartik. Qularunnaarsinneqartariaqarput inatsisaasa iluaqutaanerannik eqqortuunerannillu, aamma inatsisai malittariaqarivut  Jehova ataqqigatsigu asallugulu. Aatsaat meeqqatit Biibili aallaavigalugu eqqarsalersinniartarukkit, namminneq Guutip isiginnittaasiatut isiginnittaaseqalersillugit, oqartoqarsinnaanngussaaq Guutip isumaanik tunisimagitit.

12. Angajoqqaat qanoq ilillutik meeqqatik ikiorsinnaavaat kinguaassiuutitigut atoqatigiinnermut eqqortumik isiginnittaaseqalernissaannut?

¹² Atoqatigiinnermut tunngasut oqaluuserilerussigik ima aperisinnaavutit: „Isumaqarpit suli katissimanani kinguaassiuutitigut atoqateqannginnissamik Guutip inatsisaa naalakkutsigu pilluannginnerulissasugut?“ Qitornat akissutiminut tunngavilersuisiguk. Guuti qanoq meeqqamik inunngorsinnaanngortitsisimanersoq oqaloqatigiissutigereerussiuk ima aperisinnaavutit: „Isumaqarpit Guuterput asannittoq aliasutsikkumalluta inatsisiliorsimassasoq? Imaluunniit isumaqarpit inatsisiliorsimasoq nuannaartikkumalluta illersorumallutalu?“ (Tussiaat 119:1, 2; Esaja 48:17) Meeqqat qanoq isumaqarnersoq paasiniaruk. Taava assersuuteqarsinnaavutit kinguaassiuutitigut inuunerlunnerup qanoq aliasuutissiisimaneranik ajornartorsiutissiisimaneranillu. (2 Samueli 13:1-33) Meeqqatit eqqarsalersinniartarukkit, Guutip isumaanik paasinnissinnaalersillugit akuerinnissinnaalersillugillu, taava Guutip isumaanik tunniussiniarninni iliuuseqangaatsiarsimassaatit. Aammali allamik iliuuseqarsinnaavutit.

13. Meeqqat Jehovamut naalannissaminnut kajumissuseqassappata taakkununnga suup paasinissaa ingammik pingaaruteqarpa?

¹³ Silatusaassaatit Jehovamut naalannginnerup kingunerisartagaannaanik meeqqatit ajoqersunngikkukkit, aammali nassuiaakkukkit inuusaaserput qanoq Jehovamut namminermut attuisarnersoq. Biibili tunngavigalugu meeqqatit paasitikkit Jehova aliasutsissinnaagipput piumasaanik iliunngikkutta. (Tussiaat 78:41) Ima aperisinnaavutit: „Sooq Jehova aliatsatsikkusunngiliuk?“ taavalu ima nassuiaallutit: „Guutip akeraa Saatani oqarpoq Jehova kiffartorfigigipput nammineq pissarsiassaqarnissarput piinnarlugu, imaanngitsoq asagatsigu.“ Kingornatigut nassuiaassinnaavat qanoq Jobip aalajaannermigut Jehovap uummataa nuannaartissimagaa, taamaalillunilu Saatanip unnerluutigissutaanut eqqunngitsunut akissutinngorluni. (Jobi 1:9-11; 27:5) Meeqqavit paasisariaqarpaat qanoq ileqqulersornerat apeqqutaalluni Jehova aliatsatsilluguluunniit nuannaartissinnaallugu. (Ussatit 27:11) Tamakku allarpassuillu meeqqanut ajoqersuussutigineqarsinnaapput atuagaq Lyt til den store Lærer * atorlugu.

Sunniuteqarluartoq

14, 15. (a) Atuagaq Lyt til den store Lærer meeqqanut qanoq sunniuteqarsimava? (b) Atuagaq illit pitsaasunik qanoq angusaqaatigisimaviuk?

¹⁴ Aataa Kroatiamioq ernuttaminik arfineq-marlunnik ukiulimmik Lyt til den store Lærer atorlugu  atuaqatiginnittoq allappoq nukappiaqqap ima oqarfigisimagaani: „Anaanap oqarfigaanga iliuuseqaqqullunga, uangali piumanngilanga. Taava eqqaalerpara kapitali „Lydighed beskytter dig“ (’Naalannerup illersussavaatit’), taava uterpunga anaanalu oqarfigalugu naalakkumallugu.“ Kapitali „Hvorfor skal vi lade være med at lyve?“ (’Sooq sallunaveersaartariaqarpugut?’) pillugu aappariit Floridamiut oqarput: „Apeqqutit tassaniittut meeqqat uummatimikkut ammaatigisarpaat kukkunerillu nassuerutigiumanngisaraluatik nassuerutigisarlugit.“

¹⁵ Atuagaq 230-nit amerlanerusunik assiliartaqarpoq, assiliartaalu tamarmik imaluunniit assilissat arlalikkuutaartut tamarmik oqaasertaqarput. „Ernerma assiliaq aalajangersimasoq nakkutileriarlugu qupperaaqqujunnaartarpaanga,“ anaanaasoq qujamasuttoq oqaluttuarpoq. „Titartakkat kusanaannaratik ilinniutissaalluarputtaaq, imaluunniit titartakkat pillugit meeqqat apeqqutissaqalertuaannarput. Assiliartaasa ilaat, nukappiaraq inimi taartumi TV-mik isiginnaartoq, ernerma takugamiuk aperivoq: ’Anaana, nukappiaraq sulerisoq-una?’ Nipaanillu nalunanngilaq arlaannik ajortoqartoq nalunngikkaa.“ Titartagaq ima oqaasertaqarpoq: „Iliuutsivut tamaasa kia takusinnaavai?“

Ajornartorsiutaalersut oqaluuserineqartariaqarput

16. Ullumikkut meeqqat sumik ilinniartinneqarnissaat pingaaruteqarpa, aamma sooq?

¹⁶ Meeqqat pisariaqartippaat kinguaassiuutimik sumut atorneqarnissaat sumullu atorneqannginnissaat paasissallugu. Tamakkuli oqaluuserinissaat ajornaatsuinnaanngilaq. Tusagassiortoq arnaq oqaluttuarpoq kinguaassiuutit oqaluuserinissaat kanngunartutut isigineqarallarmat alliartorsimalluni. Maanna meeqqani ilinniartittussanngoramigit ima allappoq: „Peqqusiileqinera ajugaaffigisariaqarpara.“ Angajoqqaat peqqusiileqillutik kinguaassiuutitigut atoqatigiinnermut tunngasunik oqaluuserinnikkumanngitsut meeqqatik illersunngilaat. Meeqqanimmi atornerluisartut meeqqat ilisimasaqannginnerat atornerluttarpaat. Atuakkami Lyt til den store Lærer-imi tamanna sammineqarpoq peqqinnartumik naleqquttumillu. Meeqqat kinguaassiuutinut tunngasunik paasitinneqarnertik minguitsuujunnaassutiginavianngilaat, paasitinneqanngitsoorunilli minguitsuujunnaarsinnaapput.

17. Angajoqqaat meeqqaminnik atoqatigiinneq pillugu paasisitsiniaanerminni atuagaq qanoq iluaqutigissavaat?

 ¹⁷ Kapitali 10-mi, inngilit ajortut nunamukarlutik arnanik nunamiunik kinguaassioqateqarnerannut tunngasumi, apeqqut imaappoq: „Kinguaassiuutitigut atoqatigiinneq suusoq nalunngiliuk?“ Atuakkami paasiuminartumik naleqqulluartumillu akissutissaqarpoq. Atuakkami kapitali 32-mi nassuiarneqarpoq meeqqat kinguaassiuutitigut atornerlunneqarnissamut qanoq illersorneqarsinnaanersut. Ilinniartitsineq tamanna pisariaqarnerarlugu inuppassuit allassimapput. Anaanaasut ilaat ima allappoq: „Sapaatip-akunnerani kingullermi ernera Javan nakorsiaakkakku nakorsaq aperivoq kinguaassiuutit sumut atorneqartussaanerannik oqaloqatigisimaneripput. Nakorsap arnap taassuma ajasoorutigisorujussuuaa ernerput oqaloqatigisimagatsigu atuagaaterput nutaaq atorlugu.“

18. Inuiaassutsimi ilisarnaatinik pallorfiginninneq atuakkami qanoq sammineqarpa?

¹⁸ Kapitalimi allami sammineqarpoq hebræerit inuusuttut pingasut Sjadrakip, Mesjakip aamma Abed-Negop inuusaliamut Babylonimiut naalagaaffiannut assersuutaasumut pallorfiginnikkumannginnerannik Biibilimi oqaluttuaq. (Danieli 3:1-30) Immaqa inuit ilaasa inuusaliamut guutip assinganut pallorfiginninneq erfalasumut ilassinninnermut assersuukkumanavianngikkaluarpaat, soorlumi Lyt til den store Lærer-imi taama iliortoqarsimasoq. Malugiulli atuakkiortoq Edward Gaffney-mik atilik atuagassiami U.S. Catholic-imi apersorneqarluni qanoq oqarsimanersoq. Oqaluttuarpoq panini atualeqqaarami ulloq taanna angerlarami oqarsimasoq „atuarfimmi qinnummik nutaamik“ ilikkagaqarsimalluni, paninilu qinnuigisimallugu suna ilikkarsimanerlugu oqaatigilaaqqullugu. „Taava assani uummatimi nalaanut pisippaa,“ Edward Gaffney oqaluttuarpoq, „tulluusimaarlunilu aallartippoq: ’Uppernarsaavunga erfalasoq ilumoorfigiumallugu . . .’“ Atuakkiortoq nangippoq: „Taava paasileriataarpara. Jehovap Nalunaajaasui ilumoortumik oqalupput. Inuiaassutsimi upperisarsiornikkut pissutsit ilaat atuarfitsinni siusissorujussuakkut ineriartortinneqalertarpoq — tassa eqqarsarnani tamatigut ilumoorfiginninnissaq.“

Ilungersuanerit asuliinnassanngillat

19. Qitornanik ilinniartitsinikkut qanoq akissarsisoqartarpa?

¹⁹ Aap, qitornanik ilinniartitsinermi ilungersuanerit asuliinnassanngillat. Anaanaasoq USA-mi Kansas-imi najugalik killitsinnermit qullilivoq ernerminit allagarsigami. Ernera ima allappoq: „Iluatsitsisimasorujussuartut misigivunga perorsarneqarsimagama allarpassuarnit toqqissisimanerullunga inuunerissaarnerullungalu inuusinnaanngorlunga. Illit ataatalu nersualaagassaaqaasi.“ (Ussatit 31:28) Lyt til den store Lærer angajoqqaat suli amerlanerujussuit iluaqutigisinnaavaat meeqqaminnik ilinniartitsinerminni, kingornussarsiat erlinnartut taakku illersorneqarsinnaaqqullugit.

20. Suna angajoqqaat eqqaamajuartariaqarpaat, taamaattumillu qanoq iliortariaqarpat?

²⁰ Meeqqavut piffissaqarfigilluarlugillu sammilluagassaraavut, sapinngisatsinnillu tamanik iliuuseqarfigisassaraavut. Meeraanerammi sivikeqaaq. Periarfissasi tamaasa atorlugit ilagisigit ikiorlugillu. Tamanna peqqissimissutiginngisaannassavarsi. Tamanna pillugu asassavaasi. Eqqaamajuarsiuk meeqqat ilissinnut Guutimit tunissutaasut. Kingornussarsiaapput erlinnartut! (Tussiaat 127:3-5) Taamaattumik Guutimit tunissutaasutut pisigit, soorlumi tassa meeqqanik qanoq iliorfiginninnissinnik Guuti nassuerfigisussaallusiuk — taamaaliortussaavusimi! (wE 4/1 05)

[Quppernerup ataani ilanngussaq]

Uteqqiineq

• Angajoqqaat meeqqaminnik illersuinissaat sooq maannakkorpiaq taama pisariaqartigaa?

• Ilinniartitsineq qanoq ittoq ilisimassuseqalersitsisarpa?

• Sammisassat pingaaruteqartut suut angajoqqaat meeqqaminnik oqaloqatiginnissutigisariaqarpaat?

• Lyt til den store Lærer qanoq ililluni angajoqqaat meeqqaminnik ilinniartitsineranni iluaqutaasimava?

[Atuaqqissaarnermi apeqqutit]

[Qupp. 19-mi assiliartaq]

Manoap maligassiaa angajoqqaat sumik ilinniarfigisinnaavaat?

[Qupp. 20-mi assiliartaq]

Hebræerit pingasut iliuuserisaat meeqqat sumik ilinniarfigisinnaavaat?

[Qupp. 21-mi assiliartat]

„Lyt til den store Lærer“-ip assiliartai taakkualu oqaasertaat ilinniutissaalluarput

Anania Petrusimut salluvoq. Qanoq oqarpa?

Iliuutsivut tamaasa kia takusinnaavai?