Jehovap oqaasia tatigiuk

’Oqaatsit tatigaara.’ — TUSSIAAT 119:42.

1. Tussiaat 119-imik allattoq taassumalu isiginnittaasia qanoq oqaatigineqarsinnaappat?

JEHOVAP oqaasia Tussiaat 119-imik allattumut pingaaruteqarluinnarpoq. Tussiaat taanna immaqa Hizkijap Judami kunngissaatilluni allassimavaa. Misigissutsit tussiaammi isumassarsiarititaasumi tamatumani oqaatigineqartut Hizkijap, kunngitut ’Jehovamik attaviginnittuartup’, isiginnittaasianik ersersitsipput. (2 Kunngit 18:3-7) Manna qularnanngilaq: Tussiaasiortup anersaakkut pisariaqartitaqarnini paasilluarpaa. — Matthæusi 5:3.

2. Tussiaat 119-imi suna sammineqarpa, taallioriaaserlu suna atorneqarsimava?

² Tussiaat 119-imi sammineqartoq tassaavoq Guutip oqaasiata tusarliussaataluunniit pingaaruteqassusia. * Versit 176-it alfabeti malillugu tulleriiaagaapput, qularnanngitsumik eqqaamajuminarneruniassammata. Tussiaammi immikkoortut 22-t tamarmik arfineq-pingasunik titarneqarput, tamarmillu hebræerit naqinnerisa ilaannik aalajangersimasumik pilerfeqarlutik. Tussiaammi Guutip oqaasia, inatsisai, oqaaqqissaarutai, aqqutigeqqusai, aalajangersagai, ileqqoreqqusai, peqqussutai, eqqartuussutai, malittarisassiai aamma oqaaserinikuusai neriorsuutiginikuusaalu eqqartorneqarput. Allaaserisami matumani tulliuttumilu Tussiaat 119 misissussavarput. Jehovap kiffaasa itsaq ullumikkullu misilittagaat eqqarsaatigigaangatsigit, erinarsuummik Guutimit isumassarsiarititaasumik tamatuminnga pingaartitsinerput nakussatsinneqartariaqarpoq Guutillu oqaasianik allanneqarsimasumik, Biibilimik, qujamasuutiginninnerulissutigisariaqarlutigik.

Guutip oqaasia maleruartaruk pilluarlutillu

3. Assuarnaatsuuneq qanoq paasisariaqarpa? Assersuuteqarit.

³ Guutip inatsisaanik maleruaanerput piviusumik pilluarnissatsinnut aalajangiisuuvoq. (Tussiaat 119:1-8) Inatsisiminik maleruaagutta Jehovap ’assuarnaalluni inuusutut’ isigissavaatigut. (Tussiaat 119:1) Assuarnaatsuugatta imaanngilaq naammalluinnartuusugut, Jehovalliuna piumasaatut iliorniarsuataarnitsinnut ersiutaasoq. Noa ’naligisami akornanni assuarnaatsumik inuuseqarpoq’, Guuti ilumoortoq saqeqatigigamiuk. Ataataanerpaaq aalajaatsoq taanna ilaqutaalu Ulersuarmat aniguipput Jehovap ilitsersuutai maleruarlugit inuugami. (1 Mosesi 6:9; 1 Petrusi 3:20) Taamatuttaaq uagut ’Guutip peqqussutaanik maleruaaqqissaartariaqarpugut,’ tassa taassuma piumasaatut iliorluta, silarsuup matuma naggatissaani aniguissagutta. — Tussiaat 119:4.

4. Pilluarlutalu iluatsitsilluassagutta qanoq iliortariaqarpugut?

⁴ Jehovap qimanngisaannassavaatigut ’uummatikkut ilumoorluta qutsavigigutsinni inatsisinilu maleruartuarutsigit’. (Tussiaat 119:7, 8) Guutip Israelikkut siulersuisuat Josva qimanngilaa, taassuma ’inatsisinik ullukkut unnuakkullu eqqarsaatiginnittuarnissamik tassanilu  allassimasunik tamanik maleruaaqqissaarnissamik’ siunnersuut malimmagu. Taamaattumik iluatsitsilluarpoq silatuumillu iliuuseqarsinnaalluni. (Josva 1:8) Toqungajalerluni Josvap suli Guuti unnersiutigisarpaa Israelikkullu ima eqqaasissinnaasimallugit: „Tamassi uummatissigut tarnissigullu ilisimassavarsi ajunngitsut [Jehovap] Guutissi ilissinnut oqaatigisaasa ilaat ataasinnguarluunniit qammuinnarsimanngitsoq.“ (Josva 23:14) Pilluarsinnaallutalu iluatsitsilluarsinnaavugut, Josvatut Tussiaat 119-imillu allattutut, Jehova unnersiutigigutsigu taassumalu oqaasia tatigigutsigu.

Jehovap oqaasiata minguitsuujuartippaatigut

5. (a) Nassuiaruk qanoq anersaakkut minguitsuusoqarsinnaanersoq. (b) Inuusuttoq kristumiu ajortulioruni sumut ikiortissarsiorsinnaava?

⁵ Anersaakkut minguitsuusinnaavugut eqqumanitsigut Guutillu oqaasianik maleruaanitsigut. (Tussiaat 119:9-16) Angajoqqaavut maligassaalluanngikkaluarpataluunniit aamma taamaappoq. Naak Hizkijap ataatani guutipilussiortuugaluartoq Hizkijap ’ingerlavini minguitsuutippaa’. Tamatumani eqqarsaatigineqarsimasinnaavoq Guutimik nalusunit sunnerneqarsinnaanera. Inuusuttoq kristumiu sualuttumik unioqqutitsiguni qanoq iliussava? Allamik isumataaruni, Guutimullu qinuguni, angajoqqaaminut utoqqaanertanullu kristumiunut ikiortissarsioruni, taanna Hizkijatut ’ingerlavimminik minguitsuutitsisinnaavoq’ eqqumasinnaallunilu. — Jaaku 5:13-15.

6. Arnat kikkut ’ingerlavimminnik minguitsuutitsillutillu’ eqqumallutillu Guutip ’oqaasianik maleruaappat’?

⁶ Rahabi Ruthilu, Tussiaat 119-ip allanneqarnera sioqquterujussuarlugu inuusut, ’ingerlavimminnik minguitsuutsitsisimapput’. Rahabi Kana’animiuuvoq atortittartuusimasoq, Jehovamilli pallorfiginnittutut uppernini pillugu ilisimaneqalerpoq. (Hebræerit 11:30, 31) Ruthip Moabikkuusup guutigisimasani qimappai, Jehova kiffartorfigalugu Israelikkunnullu inatsisai maleruarlugit. (Ruthi 1:4-17; 4:9-13) Arnat taakku Israelikkuunngitsut eqqumallutillu Guutip ’oqaasii maleruarpaat’. Jiisusi Kristusimut siuaasanngorneq immikkut pisinnaatitaaffigilerpaat. — Matthæusi 1:1, 4-6.

7. Danieli inuusuttullu allat pingasut hebræeriusut qanoq anersaakkut minguitsuujuarnermikkut maligassaalluarsimappat?

⁷ ’Inuit inuusunnerminniit ajortuinnarmik eqqarsaateqartarput’, inuusuttulli ’ingerlavimminnik minguitsuutitsisinnaapput’, allaat silarsuarmi ajortunngorsimasumi matumani Saatanimit naalakkersorneqartumi. (1 Mosesi 8:21; 1 Johannesi 5:19) Danieli inuusuttullu allat pingasut hebræeriusut Babylonimut aallarunneqarsimasut eqqumallutillu ’Guutip oqaasia maleruarpaat’. Assersuutigalugu ’kunngip nerisartagaanik minguttunnguutigisinnaasaminnik neriumanngillat’. (Danieli 1:6-10) Babylonimiut uumasunik Mosesip inatsisai naapertorlugit minguttuunik nerisarput. (3 Mosesi 11:1-31; 20:24-26) Uumasut toqutat aavertuaannanngilaat, Guutillu inatsisaani neqimik aattalimmik nerineq inerteqqutigineqarpoq. (1 Mosesi 9:3, 4) Taamaattumik tupinnanngilaq hebræerit taakku sisamat kunngip nerisartagaanik  neriumanngimmata! Inuusuttut Guutimik mianerinnittut taakku anersaakkut minguitsuujuarnermikkut maligassaalluarsimapput.

Guutip oqaasia — aalajaattuarnissamut iluaqutaasoq

8. Guutip inatsisai isumasillugillu maleruassagutsigik qanoq isiginnittaaseqarlutalu ilisimasaqartariaqarpugut?

⁸ Jehovamut aalajaattuassagutta Guutip oqaasianik nuannarinninnissarput pingaaruteqarpoq. (Tussiaat 119:17-24) Tussiaasiortutut isumassarsisitaasutut misigigutta ’tupinnartut’ Guutip inatsisaaniittut paaserusungaassavavut. ’Jehovap eqqartuussutai erinigiuassavavut’ ’oqaaqqissaarutaalu nuannariuarlugit’. (Tussiaat 119:18, 20, 24, NV) Aatsaat ungasinngitsukkut Jehovamut tunniulluinnarsimagutta, taava ’oqaatsip immua minguitsoq kajungeraarput’? (1 Petrusi 2:1, 2) Biibilimi ajoqersuutit tunngaviusut paasisariaqarpavut Guutip inatsisai isumasilluarlugillu maleruarluarsinnaaniassagatsigik.

9. Inuit piumasaqaataat Guutip piumasaanut akerliuppata qanoq iliortariaqarpugut?

⁹ Immaqa Guutip oqaaqqissaarutai nuannaraavut, ’Naalagartalli’ arlaannik pissuteqarlutik oqaluuserippatigut, imaluunniit assortorpatigut, qanoq iliussaagut? (Tussiaat 119:23, 24) Ullumikkut oqartussaasut inuit inatsisaannik Guutip inatsisaanit pingaartitsinerulersinniarsarisarpaatigut. Inuit piumasaqaataat Guutip piumasaanut akerliuppata qanoq iliussaagut? Jehovamut aalajaattuarnissamut Guutip oqaasianik nuannarinninneq nakussatsissutigissavarput. Jiisusip apustiliisut malersorneqartutut ima oqarumassaagut: „Guuti inunnit naalattariaqarneruvoq.“ — Apustilit Suliaat 5:29.

10, 11. Oqaluttuariuk misilinneqangaaraluarluta qanoq ililluta Jehovap isaani assuarnaattuarsinnaasugut.

¹⁰ Allaat misilinneqangaaraluarluta Jehovamut aalajaattuarsinnaavugut. (Tussiaat 119:25-32) Guutip isaani assuarnaattuassagutta ilinniarusussuseqartariaqarpugut qamanngalu pisumik qinnuigisariaqarlugu ajoqersoqqulluta. Aamma ’aalajaannerup aqqutaa’ qinertariaqarparput. — Tussiaat 119:26, 30, NV.

¹¹ Hizkijap, eqqaaneqareersutut immaqa Tussiaat 119-imik allattuusup, ’aalajaannerup aqqutaa’ qinerpaa, naak guutipilussiortut akornanniikkaluarluni immaqalu kunngikkormiunit mitallerneqartaraluarluni. Qularnanngitsumik ’tarnaa isumakuluuteqaqaaq’. (Tussiaat 119:28) Hizkijalli Guuti tatigaa, kunngiulluni pitsaasoq ’Jehovallu isaani ajunngitsumik iliorluni’. (2 Kunngit 18:1-5) Uaguttaaq Guuti tatigigutsigu annikilliuutit naammagalugit atorsinnaassavavut assuarnaattuarsinnaallutalu. — Jaaku 1:5-8.

Jehovap oqaasia sapiissuseqalersitsivoq

12. Inuttut nammineq Tussiaat 119:36, 37-mi siunnersuutit qanoq ililluta malissinnaavavut?

¹² Guutip oqaasiani siunnersuutit malikkutsigik  inuunermi misilinneqarnerit anigornissaannut sapiissuseqalissaagut. (Tussiaat 119:33-40) Maniguulluta Jehovamit ajoqersorneqarusuppugut inatsisai ’uummatikkut iluunngarluta’ naalassinnaaniassagatsigik. (Tussiaat 119:33, 34) Tussiaasiortutut Guuti ima qinnuigaarput: „Uummatiga saatsiguk oqaaqqissaarutinnut, iluanaarutissanut pinnagu!“, tassa peqquserlulluni iluanaarutissanut pinnagu. (Tussiaat 119:36) Paulusitut ’tamatigut eqqortumik iliortarpugut’. (Hebræerit 13:18) Sulisitsisutta peqquserluttuliortinniaraluarpatigut sapiisissaagut Guutillu siunnersuutai malillugit. Taamaaliortut Jehovap pilluaqqujuaannarpai. Aap, eqqunngitsulioqqajaasarnitta akiornissaannut ikiussavaatigut. Taamaattumik ima qinusariaqarpugut: „Isikka alartikkit sallunermit.“ (Tussiaat 119:37) Soorunami Guutip isaani naleqanngitsut pilerinartutut isiginavianngilavut. (Tussiaat 97:10) Samminaveersaakkatta ilagaat tiingasulersaarutit anersaarsiornerlu. — 1 Korinthimiut 6:9, 10; Saqqummersitat 21:8.

13. Jiisusip ajoqersugai malersorneqartut qanoq ilillutik nakimaallutik oqaluussinissamut sapiissuseqalerpat?

¹³ Guutip oqaasianik eqqorluartumik ilisimasaqarnerput isumallualissutigisarparput taamaalillutalu sapiilluta oqaluussisinnaalertarluta. (Tussiaat 119:41-48) ’Mitallersivut akisinnaassagutsigik’ sapiissuseqartariaqarpugut. (Tussiaat 119:42) Ilaannikkut immaqa Jiisusip ajoqersugaasa malersorneqartut atugaqarsimanerattut atugaqartarpugut, taakku ima qinupput: „[Jehova], . . . kiffatit pisinnaatikkit oqaatsit siooranngivillutik [nakimanngivillutik, NV] oqaatigeqqullugu.“ Qinoreermata qanoq pisoqarpa? „Tamarmik anersaamik illernartumik ilumioqangaalerput, Guutillu oqaasia nalunaajaatigaat siooranatik [nakimaallutik, NV].“ Naalakkap kisimi oqartussaasup aamma uagut oqaatsiminik nakimaalluta nalunaajaatiginninnissamut sapiissuseqalersittarpaatigut. — Apustilit Suliaat 4:24-31.

14. Suut iluaqutigalugit Paulusitut sapiilluta nalunaajaasinnaavugut?

¹⁴ Uaguttaaq qunusuilluta oqaluussinissamut sapiissuseqalissaagut ’oqaaseq sallusuitsoq’ pingaartikkutsigu Jehovallu ’inatsisai unioqqutinnaveersaartuarutsigik’. (Tussiaat 119:43, 44) Guutip oqaasia allanneqarsimasoq peqqissaartumik atuaqqissaartarutsigu taassuma ’oqaaqqissaarutai kunnginut eqqartorsinnaalissavavut’. (Tussiaat 119:46) Qinuneq Jehovallu anersaavanit ikiorneqarneq iluaqutigalutigit naleqqulluartumik eqqortumillu oqaaseqarsinnaassaagut. (Matthæusi 10:16-20; Kolossemiut 4:6) Ukiuni hundredelinni siullerni Paulusip Guutip oqaaqqissaarutai naalakkersuisunut sapiilluni eqqartorsimavai. Assersuutigalugu Romamiut naalagaatitaat Felixi nalunaajaaffigaa, taassumalu ’Kristusi-Jiisusimut upperneq pillugu oqaasii tusarnaarpai’. (Apustilit Suliaat 24:24, 25) Aamma Paulusip naalagaatitaq Festusi kunngilu Agrippa nalunaajaaffigai. (Apustilit Suliaat 25:22–26:32) Jehovamit annertoqqusersorneqarluta uaguttaaq nalunaajaasuusinnaavugut sapiitsut nutaarsiassamik nuannersumik ’kanngusuutiginninngisaannartut’. — Romamiut 1:16.

Guutip oqaasia tuppallersaataavoq

15. Mitallerneqaraangatta Guutip oqaasia qanoq tuppallersaatigisinnaavarput?

¹⁵ Jehovap oqaasia tamatigut tuppallersaatissarfigisinnaavarput. (Tussiaat 119:49-56) Ilaannikkut immikkut tuppallersarneqarnissarput pisariaqartittarparput. Jehovamut nalunaajaasuusutut sapiilluta oqalukkaangatta ilaannikkut „anneruniartut“ — anneruniarlutik Jehovamik assortuisut — ’asissortuinnartarpaatigut’. (Tussiaat 119:51) Jehovamulli qinunitsinni immaqa eqqarsaatinik ineriartornartunik oqaasianeersunik eqqaasaqartarpugut, tamannalu tuppallersaatigisarparput. (Tussiaat 119:52) Tatineqartillutalu Guuti torlorfigigaangatsigu, immaqa inatsisinik najoqqutassianilluunniit Biibilimeersunik tuppallersaatigisatsinnik sapiillissutigisatsinnillu eqqaasaqartarpugut.

16. Guutip kiffai malersorneqaraluarlutik qanoq iliunngillat?

¹⁶ Anneruniartut tussiaasiortumik mitalliisut Israelikkuupput, inuiaqatigiinnut Guutimut tunniulluinnarsimasunut ilaasut. Kanngunassusia! Uagulli taakkua assiginagit aalajangerniarta Guutip inatsisaanit nigunngisaannarniarluta. (Tussiaat 119:51) Ukiut ingerlaneranni nazistinit malersorneqartillutik allatigullu ajortumik pineqartillutik Guutip kiffaasa tusindilikkuutaat inatsisit najoqqutassiallu Guutip oqaasianiittut nigorumasimanngilaat.  (Johannesi 15:18-21) Aamma Jehovamut naalanneq artornartuunngilaq, taassumami ileqqoreqqusai uagutsinnut erinarsuutitut nuannersutut ipput. — Tussiaat 119:54; 1 Johannesi 5:3.

Jehovap oqaasia qujamasuutigiuk

17. Guutip oqaasianik pingaartitsinerput qanoq iliornissamut kajumississutigissavarput?

¹⁷ Guutip oqaasianik qujamasuutiginninnerput ersersittarparput tamatuminnga maleruaanitsigut. (Tussiaat 119:57-64) Tussiaasiortoq ’neriorsuivoq maleruarumallugit Jehovap oqaasii’, allaallu ’unnuap qeqqanut makittarpoq qujaniarfigalugulu inassutai [eqqartuussutai, NV] naapertuilluartut pillugit’. Unnuakkut sinissaarukkutta Guutip qinunikkut qutsaviginissaanut tamanna periarfissaalluarpoq. (Tussiaat 119:57, 62) Guutip oqaasianik pingaartitsinerput taassumannga ajoqersorneqarnissamut kajumississutigissavarput, pingaartitsinerullu tamatuma ’Jehovamik mianerinnittunut’, taassuminnga ataqqinningaartunut, ’ikinngutaalersissavaatigut’ nuannaartut. (Tussiaat 119:63, 64) Maani nunarsuarmi pitsaanerusunik ikinngutitaarsinnaanerpugut?

18. ’Iluaatsut qilersuutaannit nimersimaneqaraangatta’ Jehovap qanoq qinnutivut akisarpai?

¹⁸ Uummatikkut iluunngarluta maniguulluta Jehova ajoqersoqqulluta qinnuigigutsigu, taassuma ’saammaatissavaatigut’ imaluunniit iluarissavaatigut. Ingammik qinunissaq pisariaqartarpoq ’iluaatsut qilersuutaannit nimersimaneqaraangatta’. (Tussiaat 119:58, 61) Jehovap akeqqat qilersuutaat sukangasut kipisinnaavai taamaalillunilu oqaluussinissamut ajoqersuganngortitsinissamullu kiffaanngissuseqalersissinnaalluta. (Matthæusi 24:14; 28:19, 20) Nunani suliatta inerteqqutaaffigisimasaanni arlaleriarluni taama pisoqartarsimavoq.

Guutip oqaasia upperiuk

19, 20. Annikilliorneq qanoq ’iluanaarutaasinnaava’?

¹⁹ Guutimut oqaasianullu upperneq iluaqutigisarparput annikilliornerit naammagalugit atornissaannut piumasaatullu iliornissamut. (Tussiaat 119:65-72) Tussiaasiortoq ’anneruniartunit salluliuutigineqaraluarluni’ ima erinarsorpoq: „Iluanaarpunga makitanaveersarneqarama [annikilliorama, NV].“ (Tussiaat 119:66, 69, 71) Jehovap kiffaasa annikilliorneq qanoq iluanaarutigisinnaagamikku?

²⁰ Annikillioraangatta qularnanngitsumik Jehovamut qamannga pisumik qinusarpugut, tamannalu taassumunnga qanillissutigisarparput. Immaqa Guutip oqaasiata allanneqarsimasup atuaqqissaarnissaanut piffissaq annerusoq atortarparput, tassanilu ilitsersuutigineqartut maleruarniartarlugit. Tamannalu inuunermik pilluarnarnerulersitsisarpoq. Taavami iliuutsitsigut pissuserisavut ajortut, assersuutigalugu naammagittaassuseq pingaarniarnerlu, ersersittarutsigik? Taava ilumoorluta Guutimut qinusariaqarpugut. Oqaasia anersaavalu iluaqutigalugit sanngiissutit taamaattut ajugaaffigisinnaassavavut inuttullu pissuseq nutaaq ’atisinnaanerussallutigu’. (Kolossemiut 3:9-14) Aammattaaq uppernerput nakussatsinneqartarpoq misilinneqarnermi pinertusaaraangatta. (1 Petrusi 1:6, 7) Paulusip annikilliornerit naammagalugit atukkani iluaqutigai, taakkuami Jehovamik tatiginninnerulissutigigamigit. (2 Korinthimiut 1:8-10) Annikilliornivut naalliuutivullu iluaqutiginiartarpavut?

Jehova tatigiuaruk

21. Guutip anneruniartut kanngunarsarpagit qanoq pisoqassava?

²¹ Guutip oqaasiata Jehovamik tatiginninnissamut tunngavissaqarlualersippaatigut. (Tussiaat 119:73-80) Pinngortitsisoq tatigilluinnarutsigu kanngusunnissamut pissutissaqanngilagut. Allalli iliuusii sunnerneqaatigisinnaavavut taamaalilluta  tuppallersarneqartariaqalerluta imalu qinorusulerluta: „Anneruniartut pakatsilit [kanngusullit, NV].“ (Tussiaat 119:76-78) Jehovap anneruniartut kanngunarsarpagit, aqqutigisaat ajortut qulaarneqassapput, aqqalu angingaartoq illernarsisinneqassalluni. Qularisariaqanngilarput Guutip innuttaanik malersuisut iluatsinngilluinnarnissaat. Assersuutigalugu Jehovap Nalunaajaasui uummatikkut iluunngarlutik Guutimik tatiginnittut nungutissinnaasimanngilaat. Aamma nungutissinnaanngisaannassavaat. — Ussatit 3:5, 6.

22. Tussiaasiortup ’poorutsitut pujoorfigitittutut’ innera qanoq paasisariaqarpa?

²² Malersorneqaraangatta Jehovamik tatiginninnerput taassuma oqaasianit nakussatsinneqartarpoq. (Tussiaat 119:81-88) Tussiaasiortoq anneruniartunit malersorneqarami ’poorutsitut pujoorfigitittutut’ misigivoq. (Tussiaat 119:83, 86, NV) Biibilip nalaani uumasut amiinit poorusiliat imiisivittut, viinniisivittut imerpalasunullu allanut atorneqartarsimapput. Atorneqanngikkunik eqisinnaapput inimi silaannaluttumi innerup eqqaani nivingagunik. Illit annikillioraangavit malersorneqaraangavilluunniit ilaannikkut ’poorutsitut pujoorfigitittutut’ misigisarpit? Taama misigisaruit Jehova tatigisariaqarpat imalu qinullutit: „Ajunngitsuuninni inuutinnga, taava oqaaqqissaarutitit tunniussatit maleruassavakka.“ — Tussiaat 119:88.

23. Tussiaat 119:1-88 misissoreerlugit suna paasivarput, aamma Tussiaat 119:89-176 misissuinissarput qilanaaralugu imminut qanoq aperisinnaavugut?

²³ Tussiaat 119-ip affaata siulliup misissorneratigut paasivarput Jehovap kiffani ilumoorfiginnilluni tunniusimaffigigai oqaatsini tatigimmassuk aamma malittarisassiani, oqaaqqissaarutini, peqqussutini inatsisinilu nuannarimmatigik. (Tussiaat 119:16, 47, 64, 70, 77, 88) Kiffami imminut tunniusimasut eqqumanerat oqaatsiminillu maleruaanerat nuannaarutigaa. (Tussiaat 119:9, 17, 41, 42) Maanna tussiaatip nuannersup tamatuma sinnerata misissornissaa qilanaaralugu imminut ima aperisariaqarpugut: ’Ilumut Jehovap oqaasia aqqutinni qaammaqqutigaara?’

[Quppernerup ataani ilanngussaq]

Qanoq akissavit?

• Piviusumik pilluarnissamut suna aalajangiisuua?

• Guutip oqaasiata anersaakkut qanoq minguitsuujuartippaatigut?

• Guutip oqaasia qanoq sapiissuseqalissutigisarlutigulu tuppallersaatigisarparput?

• Sooq Jehova taassumalu oqaasia upperisariaqarpavut?

[Atuaqqissaarnermi apeqqutit]

[Qupp. 24-mi assiliartat]

Ruthi, Rahabi inuusuttullu hebræeriusut pingasut Babylonimiittut eqqumallutillu ’Guutip oqaasia maleruarpaat’

[Qupp. 25-mi assiliartaq]

Paulusip nakimaalluni ’Guutip oqaaqqissaarutai kunnginut eqqartorpai’