Jiisusi Kristusi inuuninnut qanoq sunniuteqarpa?

SOORLU allaaserisap matuma siuliani ersersinneqartoq, qularutissaanngilaq Jiisusip ajoqersuutaanit silarsuaq sunnerneqarsimasoq. Apeqqutaalerpoq uaguttaaq sunnerneqarnersugut.

Jiisusi assigiinngitsorpassuit pillugit ilinniartitsivoq. Ilinniartitsissut naleqarluartoq inuunermut tunngasunut tamanut sunniuteqarsinnaavoq. Misissoriartigik inuunermi pingaarnersiuineq, Guutimut ikinngutaalerneq, allanut ajunngitsumik attaveqarneq, ajornartorsiutinik aaqqiineq, nakuusernaveersaarneq nakuusernermillu sammisaqarnaveersaarneq pillugit Jiisusip ilinniartitsissutai.

Eqqortumik pingaarnersiuigit

Nalitsinni silarsuarmi ulapaarfioqisumi piffissamik nukinnillu atuinangaarmat anersaakkut ittunik eqqarsaateqarnissaq piffissaqarfigineqartanngilaq. Assersuutigeriartigu angut 20-t sinnerlugit  ukiulik Johnimik taasinnaasarput. Anersaakkut ittunik eqqartuinissaq nuannaraa pingaartillugulu. Taamaattoq ajuusaarluni ima oqarpoq: „Iliuusererusutattut iliuuseqartiginissannut iluamik piffissaqanngilanga. Sapaatip-akunneranut ulluni arfinilinni sulisarpunga. Sapaat sulinngiffituaraara. Suliassakkalu naammassereeraangakkit qasuallaartarpunga.“ Illit aamma taamatut misigisimaguit, Qaqqami oqaluutsimini Jiisusip ilinniartitsissutai iluaqutigisinnaavatit.

Jiisusi inunnut tusarnaarniarlutik katersuussimasunut ima oqarpoq: „Inuunersi isumakuluutigeqinasiuk, suna nerissagissi, suna imissagissi imaluunniit timissigut suna atissagissi. Inuuneq nerisassaqarnermit pingaarnerunnginnerpa timilu atisassaqarnermit? Qilaap timmiai isigeriarsigit; siaruarterinatillu katersuinngillat quinullu qimatulinatik, Ataatassilu qilammiittup nerisittarpai. Ilissili taakkunannga pingaarnerujussuunnginnerpisi? . . . Taamaattumik isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi. Guutilli naalagaaffia iluarneralu ujaqqaarsigit, taava tamakku tamarmik ilanngullugit ilissinnut tunniunneqarumaarput.“ (Matthæusi 6:25-33) Tamanna qanoq ilinniarfigisinnaavarput?

Jiisusi isumaqanngilaq nammineq timikkut pisariaqartitavut ilaquttattalu timikkut pisariaqartitaat isumaginngitsuussagivut. „Eqqarliminik, pingaartumik inoqutiminik, isumaginninngitsoq uppernerminik tunussisuuvoq uppinngitsumillu ajornerulluni,“ Biibilimi allassimavoq. (1 Timotheusi 5:8) Aap, Jiisusi neriorsuivoq eqqortunik salliutitsigutta anersaakkullu ittut pingaarnerutikkutsigik, Guutip pisariaqartitavut allat matussuserumaarai. Jiisusip uani ilinniartippaatigut qanoq pingaarnersiusoqartarnersoq. Siunnersuut taanna malikkutsigu pillualissaagut, tassami „pilluarput anersaakkut pisariaqartitsinerminnik miserratiginninngitsut“. — Matthæusi 5:3, NV.

Guutimik ikinnguteqarneq ineriartortiguk

Anersaakkut pisariaqartitsinerminnik miserratiginninngitsut aamma nassuerutigaat Guutimut ajunngitsumik attaveqarnerup ineriartortinnissaata pisariaqassusia. Qanoq allamut ajunngitsumik attaveqartoqalersinnaava? Imaannginnerpa taassuma ilisarisimallualerneratigut? Qanoq isiginnittaaseqarneranik, susinnaaneranik, sunik naammassisaqarsimaneranik, sunik nuannarisaqarneranik sunillu nuannarinngisaqarneranik paasinninnissamut piffissaqartariaqarpugut. Aamma taamaaliortariaqarpugut Guutimik ikinnguteqarneq ineriartortikkumagutsigu. Ilisarisimallualertariaqarparput. Guutimut qinunermini ajoqersukkani pillugit Jiisusi ima oqarpoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Tassa Guuti qanimut attavigilerniarutsigu ilisarisimasariaqarparput. Ilisarisimalernissaanut periarfissatuaraarput oqaasia isumassarsiarititaasoq. (2 Timotheusi 3:16) Biibilimik atuaqqissaarnissamut piffissamik immikkoortitsisariaqarpugut.

Ilisimasaqarnerli immini naammanngilaq. Qinnummi tassani Jiisusi ima oqarpoq: „Taakkua [ajoqersukkat] oqaatsitit aalajangiuppaat.“ (Johannesi 17:6) Guuti ilisarisimaliinnassanngilarput, aammattaaq ilisimasaqarnerput naapertorlugu iliuuseqartariaqarpugut. Qanormi allatut taassumunnga ikinngutaalersinnaagatta? Ilimagisinnaavarput allamut ikinngutaaneq ineriartussasoq piaaraluta najoqqutaasa isumaasalu  akerlerluinnaannik iliuuseqarutta? Taamaattumik iliuutsivut tamarmik Guutip najoqqutassiaanit pissutsinullu isiginnittaasianit siulersorneqartariaqarput. Misissoriartigik najoqqutassiaasa ilaat marluk inunnut allanut attaveqarnermut qanoq attuumassuteqarnersut.

Allanut ajunngitsumik attaveqalerit

Ilaanni Jiisusip oqaluttuannguaq inuit imminnut attaveqatigiinnerat pillugu pingaarutilimmik ilinniutissartalik oqaluttuaraa. Oqaluttuaraa kunngi kiffaminik naatsorsuiffiginnikkusuttoq. Kiffaq ataaseq akiitsugarpassuaqarpoq utertinnissaannullu aningaasaateqarani. Naalagaq peqqusivoq angut, nulia meeraalu tunineqassasut akiitsui akilerneqarsinnaaniassammata. Akiitsulik pallorpoq imalu qinulluni: „Kamagittarlutit pinnga, tamaasa ilinnut akilerumaarpakka.“ Taava naalagaata kiffaq taanna nalligingaalerpaa akiitsuilu isumakkeerlugit. Kiffalli taassuma anigami naapippaa kiffaqatimi ilaat imminut annikitsunnguamik akiitsugalik, piumasaralugulu akiitsukkaminik akiliissasoq. Naak kiffaqatini naakkigeqqugaluartoq, kiffap siulliup akiitsukkaminik akiliinissaata tungaanut parnaarussaatippaa. Kunngip tamanna tusaramiuk kamangaalerpoq imalu oqarluni: „Illittaaq kiffaqatit naakkigisariaqanngiliuk, soorlu uanga illit naakkigigikkit?“ Parnaarussaatippaalu akiligassaminik tamanik akileereerserlugu. Taava Jiisusip pingaarutilik ilinniartitsissutigaa ima oqarluni: „Taamatuttaaq Ataatama qilammiusup ilarsi kinaluunniit pissavaa qatanngutini uummatimigut isumakkeerfiginngippagu.“ — Matthæusi 18:23-35.

Inuugatta naammalluinnanngitsut kukkussuterpassuaqarlutalu, unioqqutitsinivut pissutigalugit Guutimut akiitsugarpassuavut taarsersinnaanngisaannassavavut. Isumakkeerfigeqqulluta qinnuiginissaa iliuuserisinnaasatuaraarput. Jehova Guutillu kukkunitsinnik tamanik isumakkeerfigerusuppaatigut, qatanngutitta ajortuliorfigigaangatigut isumakkeerfigisarutsigik. Ilinniartitsineq sunniuteqarluartoq. Jiisusip ajoqersukkani ima qinoqqullugit ilinniartippai: „Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.“ — Matthæusi 6:12.

Ajornartorsiummut pissutaasoq aaqqiguk

Jiisusip inuup qanoq ittuunera ilisimaarilluarpaa. Siunnersuutaata siunertaraa ajornartorsiutinut pissutaasunik aaqqiinissaq. Marlunnik assersuuteqariarta.

Jiisusi ima oqarpoq: „Tusarparsi siulisi ima oqarfigineqarsimasut: ’Inuassanngilatit’ aamma: ’Inuartoq eqqartuussisunit pisuutinneqassaaq.’ Uangali oqarfigaassi: Kinaluunniit qatanngutiminut kamattoq eqqartuussisunit pisuutinneqassaaq.“ (Matthæusi 5:21, 22) Jiisusip uani takutippaa inuarnermut pissutiviusoq iliuutsimit sorlaqarnerungaartoq. Tamanna tassaavoq toqutsisup uummataani isuma inerikkiartortoq. Inuit iluarinninngittanngitsuuppata kamassimasanngitsuuppataluunniit, piaaraluni nakuusertoqartassanngikkaluarpoq. Ajoqersuut taanna malinneqartuuppat aammik kuisinerpassuit pinngitsoortinneqarsimassagaluarput.

Malugiuk Jiisusip ajornartorsiut alla aliasutaangaartartoq qanoq itisilertigineraa. Katersorsimasut ima oqarfigai: „Tusarparsi oqartoqarsimasoq: ’Allasiussanngilatit.’ Uangali oqarfigaassi: Kialuunniit allap nulia pilerigalugu isigiguniuk taanna uummatimigut allasiorfigereerpaa. Isivit talerpiup tammartippatit, peeruk igillugulu.“ (Matthæusi 5:27-29) Tassani Jiisusip oqaluttuaraa ajornartorsiut inuunerluttuliornermit itinerusumik pissuteqartoq. Tamanna pilertarpoq iliuuseqarneq sioqqullugu — tassa inuunerluttuliorusulluni kissaateqarnermit. Kipitsavigisat naleqqutinngitsut eqqarsaatigeruusaarnissaat itigartikkaanni isummamillu ’peeraanni’, inuunerluttuliornissamut ussernartorsiortitaassanngilagut.

’Panalersoqinak!’

Unnuaq taanna Jiisusi killuutigineqarlunilu tigusaammat, ajoqersugaasa ilaata illersorniarlugu pana amuaa. Jiisusip ima peqquaa: „Panat puuanut manguguk. Panalersortummi tamarmik pannamik toqunneqassapput.“ (Matthæusi  26:52) Aqaguani Jiisusi Pontiusi Pilatusimut ima oqarpoq: „Uanga naalagaaffiga silarsuarmit matumannga pisuugaluarpat kiffama akiuullutik illersussagaluarpaannga juutinut pisinneqaqqunanga; kisiannili naalagaaffiga silarsuarmit matumannga pinngilaq.“ (Johannesi 18:36) Oqaatsit taakkua maleruarneqarsinnaappat?

Ukiuni hundredelinni siullerni kristumiut Jiisusip nakuusinnginnissamik ajoqersuutaa qanoq isigaat? Atuakkami The Early Christian Attitude to War ima allassimavoq: „Allanut nakuusernerup eqqunngitsuliornerullu suulluunniit inerteqqutaanera [Jiisusip ajoqersuutaanut] ilaammat, oqaatigineqanngikkaluarluni erseqqippoq sorsunneq peqataaffigineqarsinnaanngilluinnartoq . . . Kristumiut siulliit Jiisusip oqaasii maleruarpaat aamma qajassuusseqqusilluni akiuuteqqusinanilu ajoqersuutaa pimooruppaat. Taakkua upperisartik eqqissinermut atassuteqarluinnartippaat; sorsunneq tamatumalu kingunerisartagaanik aammik kuisineq akerlerilluinnarpaat.“ Oqaluttuarisaaneq qanormita issimassagaluarpa kristumiuunerartut tamarmik Jiisusip ajoqersuutaanik malinnissimasuuppata!

Jiisusip ajoqersuutai tamaasa iluaqutigisinnaavatit

Soorlu misissoreeripput Jiisusip ajoqersuutai tusarnerlutillu paasiuminarlutillu kimittupput. Ajoqersuutaanik ilisimanninneq maleruaanerlu tamatta iluaqutigisinnaavarput. *

Jehovap Nalunaajaasuisa ilinniartitsissutigineqartut pitsaanersaannik iluaquteqalernissannik ikiorusuppaatsit. Piumaguit attavigisinnaavatit imaluunniit adressimut qupperneq 2-miittumut allassinnaavutit. (wE 3/15 05)

[Quppernerup ataani ilanngussaq]

[Qupp. 5-mi assiliartaq]

„Ataatassi qilammiittup nerisittarpai“

[Qupp. 7-mi assiliartaq]

Jiisusip ajoqersuutaa inuuninnut ajunngitsumik sunniuteqarsinnaavoq