Jiisusi silarsuarmut qanoq sunniuteqarsimasoq

„IIVANGKIILIUT naapertorlugit Jiisusip oqaaserisai tamarmik nalunaaquttap-akunnerisa marluk ingerlaneranni oqaatigineqarsinnaapput,“ Biibilimik nutserisoq Edgar Goodspeed allappoq. „Oqaasiili amerlagisassaanngikkaluarlutik killitsinnangaarmata, tiguartinnangaarmata paasilertornangaarmatalu oqaatigineqaannarsinnaavoq inummik allamik silarsuarmut taama sunniuteqartigisumik inoqanngitsoq.“

Ukiumi 33-mi Jiisusi Kristusip nunami kiffartornini naammassimmagu, angutit arnallu 120-nit ikinnerunngitsut Jiisusimut ajoqersugaapput. (Apustilit Suliaat 1:15) Ullumikkut kristumiuunerartut 2 milliardinit amerlanerupput. Taakkualu saniatigut hundrede millionit arlallit Jiisusi pruffiititut akueraat. Ajoqersuutai inuiannut maluginiarnartumik sunniuteqarput.

Allaat kristumiuunngitsut siuttuisa Jiisusip silarsuarmut tamarmut sunniuteqarnera miserratiginngilaat. Juuteq rabbineri Hyman Enelow ima allappoq: „Upperisarsiornerup oqaluttuarisaanerani Jiisusi tassaalersimavoq inuk nuannarineqarnerpaaq, paasiniarneqarnerpaaq sunniuteqarnerpaarlu.“ Ima aamma allappoq: „Kia Jiisusip inuiannut sunniutai tamaasa taagorsinnaavai? Asannittuliornissamut kajumissisitsisimanera, tuppallersaasimanera, ajunngitsuliorusulersitsisimanera, neriuuteqalersitsinera nuannaalersitsineralu — tamakkorpassuit inuiaat oqaluttuarisaaneranni nallerneqarsimanngillat. Inunnit pingaarutilinnit pitsaasunillu kikkunilluunniit silarsuaq tamakkerlugu kajungerineqarnikkut sunniuteqarnikkullu Jiisusi nallerneqarsimanngilaq. Oqaluttuarisaanermi inuttut  soqutiginarnerpaanngorsimavoq.“ Hindullu siuttuat Mohandas Gandhi ima oqarsimavoq: „Inuiannut Jiisusitulli iliuuseqarsimatigisumik ilisimasaqanngilanga. Kristumiussuseq ajoquteqanngilaq.“ Imali nangilluni: „Ilissi-una kristumiut ajornartorsiutaasusi. Nammineq ajoqersuutisi maleruanngilluaasarpasi.“

Kristumiuunerartut oqaluttuarisaanerat tassaavoq Jiisusip ajoqersuutaanik maleruaaniarsarinerigaluit iluatsinngitsut pillugit oqaluttuaq takisooq. Kristumiussutsip oqaluttuarisaaneranik ilisimatooq Cecil John Cadoux oqarpoq ’140-miilli u.n.k. kristumiut siuttuisa maluginiarsimagaat ilagiit ileqqorissaarunnaariartortut’. Imalu nangippoq: „Aallaqqaammut ileqqussatigut sukangasuujunerup qasukkartinneqarnera allaqquttussaanngitsumik silamiorpalulersitsivoq.“

Qasukkariartupiloorneq pivoq ukiut hundredellit pingajussaasa ingerlaneranni Romamiut kaasariat Konstantin kristumiunngormat. „Oqaluffeqarfiit Konstantinimik peqateqalernermikkut isumaqatiginngisaminnik akuersiinnarnerat, oqaluttuarisaanermik ilisimatuunit malugineqanngitsoorsimanngilaq ilaasalu ajuusaarutigaat,“ Cadoux allappoq. Ukiut hundredellit tulliuttut kristumiuunerartut Kristusip aqqanik nikanarsaasunik kanngunartuliarpassuaqarput.

Una apeqqutaalerpoq: Jiisusip ajoqersukkani qanorpiaruna ilinniartikkai? Ajoqersuutaanillu qanoq sunnerneqartariaqarpugut?

[Qupp. 3-mi assiliartaq]

„Inuiannut Jiisusitulli iliuuseqarsimatigisumik ilisimasaqanngilanga.“ — Mohandas Gandhi

[Qupp. 3-mi assiliartaq]

’Inummik allamik silarsuarmut taama sunniuteqartigisumik inoqanngilaq’ — Edgar Goodspeed

[Suminngaanneernera]

Culver Pictures