Meeqqavut kingornussarsiaapput erlinnartut

„Ernerit tassaapput [Jehovap] tunissutai [kingornussarsiarititai, NV], illissap inerittui tassaapput akissarsiarititaasut.“ — TUSSIAAT 127:3.

1. Meeraq siulleq qanoq pinngorpa?

EQQARSAATIGERIASSAGIT Jehova Guutip inunnik siullernik marlunnik pinngortitsinermigut tupinnangaartumik pisoqarsinnaanngortitsinera. Ataataasoq Adami anaanaasorlu Eva tamarmik timimik ilaannik tunniussaqarput, Evallu illiaani pinngorpoq inuk nutaaq — meeraq siulleq. (1 Mosesi 4:1) Suli ullumimut tupigusuttaraagut meeraq ilumiugineqaleraangat inunngoraangallu, amerlasuullu oqartarput tamanna tupinnartuliaasoq.

2. Sooq arnap naartusup illiaani pisut tupinnartuliaanerartariaqarpat?

² Celle ataaseq kinguaassisinneqareerluni anaanap illiaani ullut 270-it missaasa ingerlaneranni alliartortarpoq meeranngorluni cellinik billionilikkaanik katitigaasoq. Celle siullerpaaq cellinik assigiinngitsunik 200-nit amerlanerusunik titartakkanillusooq imaqarpoq. Pilersaarusiaq, cellip iluaneereersoq silaqassutsitta inugaa, meeqqap alliartorneranik aqutsisuuvoq cellit tupinnartut taakku eqqortumik tullereeqqissaartumillu pinngorsinnaaqqullugit, taamalu inuk nutaaq pinngorsinnaaqqullugu!

3. Sooq inuppassuit isumaqarpat inuup uumassuseqartup nutaap pinngornerani Guuti tupinnartuliortuusimassasoq?

³ Kina meerannguamik pinngortitsisorpiaava? Tassaassaaq inuunermik Pinngortitsisoq. Biibilimi tussiaasiortut ilaat ima erinarsorpoq: „Misiginiaritsi [Jehova] Guutiummat. Taassuma pinngortippaatigut, taassumalu pigaatigut.“ (Tussiaat 100:3) Ilissi meeraqartusi nalunngivipparsi ilissi taakku pinngortitarinngikkisi. Oqartoqartarneratut ilissi silarsuarmut pisippasi, kisianni Guuti ilisimassuseqarluinnartoq kisimi inuup uumassuseqartup nutaap pinngornerani tupinnartuliortuusinnaavoq. Ukiut tusindilikkuutaat ingerlaneranni meeqqap anaanami illiaani pinngornera pillugu inuppassuit Pinngortitsisorsuaq ataqqiniartarsimavaat. Aamma illit taamaaliorpit? — Tussiaat 139:13-16.

4. Inuup sanngiissutaa suna Jehovamut tunngatinneqanngisaannartariaqarpa?

⁴ Jehovali tassaanerpa Pinngortitsisoq misigittaatsoq inunnik kinguaassiorsinnaanngortitsiinnariarluni immineerisoq? Naagga. Inuit misigittaatsuusinnaapput, Jehovali taamaanngisaannarpoq. (Tussiaat 78:38-40) Tussiaat 127:3-mi ima allassimavoq: „Ernerit [paniillu] tassaapput [Jehovap] tunissutai [kingornussarsiarititai, NV] illissap inerittui tassaapput akissarsiarititaasut.“ Maanna misissoriartigu kingornussarsiaq qanoq paasisariaqarnersoq kingornussarsinerlu sumut takussutissaanersoq.

Kingornussarsiaq akissarsiarlu

5. Sooq meeqqat kingornussarsianik taaneqarsinnaappat?

⁵ Kingornussarsiaq tunissutitut ippoq. Angajoqqaaqarpoq meeqqaminnik kingornussarsiassaqartitsiumallutik ukiorpassuarni sulisartunik. Kingornussarsiassat tassaasinnaapput aningaasat, illu immaqaluunniit pigisat nalilissuit. Kingornussarsiaq suugaluaruniluunniit angajoqqaat meeqqaminnik asanninnerannut takussutissaavoq. Biibili naapertorlugu angajoqqaat meeqqatik Guutimit kingornussarsiaraat. Taassumannga asanninnikkut tunissutaapput. Meeraqaruit iliuutsivit ersersippaat sunik tamanik  Pinngortitsisup tunissutaasut ilinnut isumagisassanngortitaasut taakku isigigitit?

6. Sooq inuit meeqqiorsinnaasunngorlugit Guutip pinngortippai?

⁶ Jehovap inuit tunissummik tamatuminnga tunigamigit siunertaraa nunarsuaq tamakkerluni Adamip Evallu kinguaavinik inoqalissasoq. (1 Mosesi 1:27, 28; Esaja 45:18) Jehovap inuit tamaasa ataasiakkaarlugit pinngortissimanngilai inngilinik millionerpassuarnik pinngortitsisimanermisut. (Tussiaat 104:4; Saqqummersitat 4:11) Naamik, Guutip inuit pinngortippai meeqqiorsinnaasunngorlugit angajoqqaaminnut assingusunik. Arnap angutillu inummik nutaamik silarsuarmut pisitsisinnaanerat taassuminngalu isumassuisinnaanerat immikkut pisinnaatitaaffiuvoq tupinnartoq! Meeraqaruit, taava Jehova qutsavigisarpiuk kingornussarsiamik nuannersorsuarmik tamatuminnga ilangiisimmatit?

Jiisusi ilinniarfigisiuk

7. Angajoqqaat ilaasa pissuserinngisaannik Jiisusi qanoq ililluni inunnut soqutiginnillunilu isumassuisimava?

⁷ Ajuusaarnaraluartumik angajoqqaat tamarmiunngitsoq meeqqatik akissarsiarititaasutut isigaat. Ilarpassuisa meeqqamik qanoq innerat soqutigivallaanngilaat. Angajoqqaat taakkua Jehovap ernerataluunniit isiginnittaasiat ilaanngilaat. (Tussiaat 27:10; Esaja 49:15) Malugiuk Jiisusip meeqqanik soqutiginninnera. Biibilimi allassimavoq inuttut nunamukanngikkallarami — qilammi anersaajutilluni pissarsuaq — ’inuit erneri nuannaarutigigai’. (Ussatit 8:31, NV) Inunnut ima asannissimatigaaq allaat naassaanngitsumik inuusinnaalerniassagatta kajumilluni inuunini utertitsissutitut pilliutigisimallugu. — Matthæusi 20:28; Johannesi 10:18.

8. Jiisusi qanoq angajoqqaanut maligassaalluarpa?

⁸ Jiisusi nunarsuarmiitsilluni angajoqqaanut maligassiuilluarpoq. Qanoq iliornera maluginiariaruk. Meeqqat piffissaqarfigisarpai, aamma ulapittorujussuugaluarluni tatineqaraluarlunilu. Niueriartortarfimmi pinnguaraangata isiginnaartarpai, pinnguarnerminnilu pissuserisartagaasa ilaat ajoqersuinermini atortarlugit. (Matthæusi 11:16, 17) Jerusalemimukarluni angalanermini kingullermi Jiisusip nalunngilaa anniartitaassalluni toqussallunilu. Inuit meeqqanik mikisunik Jiisusimukaassimmata ajoqersugaasa meeqqat peersinniaraluarpaat, immaqa Jiisusimut pisarissersuutaaqqunagit. Jiisusilli ajoqersukkani naveerpai. Ajoqersukkaminut akissutaani erserpoq meeqqanik qanoq asannitsigisoq: „Meerannguit uannut qaaginnarlit, akornuseqinasigillu.“ — Markusi 10:13, 14.

9. Iliuutsivut sooq oqaatsitsinnit sunniuteqarnerusinnaappat?

⁹ Jiisusip maligassiaa ilinniarfigisinnaavarput. Meeqqat ornikkaangatigut — ulapputissaqaraluaraangattaluunniit — qanoq iliortarpugut? Jiisusitut iliortarnerpugut? Meeqqat pingaartumik angajoqqaaminnit pisariaqartitaat Jiisusip piareersimaffigisimavaa: Piffissaqarfigineqarnissaq maluginiarneqarnissarlu. Soorunami qitornat oqarfigisariaqarput asallugit. Iliuutsilli oqaatsinit malunnarnerusarput. Asanninnerit oqaatsikkut malunnaannarnani iliuutsikkulli suli malunnarnerusarpoq, tassa meeqqavit piffissaqarfiginerisigut, maluginiarnerisigut isumassornerisigullu. Asanninnerilli taamaaliornikkut takutittaraluarit malunnartumik sunniuteqanngeriataarsinnaavoq — immaqaluunniit neriuutigisattut sukkatigisumik sunniuteqarani. Naammagittartuusariaqarpoq. Tamanna ilikkarneqarsinnaavoq Jiisusip ajoqersukkaminik qanoq pinnissimanera ilaarlugu.

Jiisusip naammagittarnera asanninneralu

10. Jiisusip qanoq ililluni ajoqersukkani maniguunnermik ilinniartippai, tamannalu siullermik qanoq kinguneqarpa?

¹⁰ Jiisusip nalunngilaa ajoqersukkani pingaarnerpaaniullutik unammiinnavissut. Ullut ilaanni ajoqersukkanilu Kapernaumimut pigamik ima  aperai: „’Sunaana aqqutaani oqaluuserigissi?’ Nillinngillalli, aqqutaanimi oqaloqatigiissutigigamikku kina annerunersoq.“ Naveerujussuarnagit maniguunnermik ilinniartiinnarpai. (Markusi 9:33-37) Tamanna kissaatigisaatut sunniuteqarpa? Aap, tassuuguinnaanngitsorli. Tassami ukiup affaa qaangiuttoq Jaakup Johannesillu anaanaminnut Jiisusi qinnuigitippaat Naalagaaffimmi nuimasumik inissinneqaqqullutik. Jiisusip naammagittarluni oqaaqqissaaqqippai. — Matthæusi 20:20-28.

11. (a) Jiisusip apustiliisa Jerusalemimi ininnguamut katersuukkamik suliassaq suna isumaginngilaat? (b) Jiisusi qanoq iliorpa, tamannalu ajoqersukkat ilinniutigaat?

¹¹ Ukiumi 33-mi poorski nalliummat Jiisusi apustilinilu Jerusalemimi ininnguamut katersuupput nalliuttorsiorniarlutik. Tikikkamik apustilit aqqaniliusut ilaat ataaserluunniit ilamik isigaannik pujorallersimasunik asaaniarsimanngilaq, soorlumi ileqquusoq illumi kiffaasoq arnartaasorluunniit taamaaliortarluni. (1 Samueli 25:41; 1 Timotheusi 5:10) Ila Jiisusimut nikallornarsimassaqaaq takullugu ajoqersukkami nuimasumik inissinneqarnissartik qanoq pingaartitsigigaat! Taamaattumik Jiisusip ajoqersukkami isigaat asappai, taavalu ilungersorluni kajumissaarpai maligassiani maleqqullugu allallu kiffartuuteqqullugit. (Johannesi 13:4-17) Taamaaliorpat? Biibilimi oqaluttuarineqarpoq unnummi tassani kingusinnerusukkut „oqqassutigileraat kina arlartik ilaminit annerusutut naatsorsuunneqassanersoq“. — Lukasi 22:24.

12. Angajoqqaat meeqqaminnik ilinniartitsiniarnerminni qanoq ilillutik Jiisusi ilaarsinnaavaat?

¹² Meeqqatit oqarfigigaluarlugit iliuuseqanngikkaangata immaqa Jiisusi qanoq misigisimanersoq paasisarpat. Maluginiaruk Jiisusip apustilini qatsutinngikkai kukkusarnerminnik iluarsiiniaasaaraluartut. Naggataatigut naammagittarnera kinguneqarluarpoq. (1 Johannesi 3:14, 18) Ilissi angajoqqaajususi, Jiisusip asanninnera naammagittarneralu ilaartariaqarpasi qatsussinngisaannartariaqarlusilu meeqqassinnik ilinniartitsiniarnissinni.

13. Sooq angajoqqaat meeraq aperisoq inussiarniitsumik tunuartittariaqanngilaat?

¹³ Meeqqat angajoqqaamik asanninnerat soqutiginninnerallu malugissallugu pisariaqartippaat. Jiisusip paaserusuttarsimavaa ajoqersukkani qanoq eqqarsarnersut, taamaattumillu aperigaangata tusarnaaqqissaartarpoq. Aamma qanoq isumaqarnersut aperisarpai. (Matthæusi 17:25-27) Ilinniartitsilluarnermummi ilaavoq tusarnaaqqissaartarneq ilumoorlunilu soqutiginninneq. Meeraq apeqquteqaraangat tunuartinngisaannartariaqarpoq ima oqarfigipiloorlugu: „Massakkuunngitsoq, ulapittunga takusinnaannginnakku?“ Ilumut ulapikkaanni meeraq oqarfigisariaqarpoq kingusinnerusukkut oqaloqatigissallugu, taavalu soorunalimi neriorsuut eqqortinneqartariaqarpoq. Taava meeqqap soqutigineqarluni malugissavaa, tatiginnillunilu oqaluttuarnissani kajumiginerulissavaa.

14. Meeqqaminnut asanninnermik ersersitsinissaq eqqarsaatigalugu angajoqqaat Jiisusi sumik ilinniarfigisinnaavaat?

¹⁴ Aamma angajoqqaat meeqqatik pakkuttassavaat allatullu asanningaarnertik ersersittassallugu? Tamatumani aamma angajoqqaat Jiisusi ilinniarfigisinnaavaat. Biibilimi oqaluttuarineqarpoq taassuma meeqqat ’pakkullugit assamminik patikkai pilluaqqullugillu’. (Markusi 10:16) Tamanna qanormitaava meeqqanut sunniuteqarpa?  Nuannaajummersimassapput Jiisusilu ilagerusulerlugu! Ilissi angajoqqaajususi meeqqasi asanninnermik ilumoortumik ersersitsivigisarussigik, perorsaraangassigik ilinniartikkaangassigillu naalakkumanerusassapput.

Qanoq piffissaqarfigitigissavavut?

15, 16. Eqqarsaatersuut suna nuannarineqarlualersimava, sunalu eqqarsaatersuutip tunuliaqutarigunarpaa?

¹⁵ Oqartoqarsimavoq meeqqat angajoqqaaminnit sivisuumik sammineqarnissartik tamatigut pisariaqartinngikkaat. Eqqarsaatersuut tusaaniarneqarluarsimasoq tassaavoq „piffissaq pitsaassusilik“-mik taasaq. Eqqarsaammik taassuminnga tapersersuisut oqarput angajoqqaat meeqqaminnik ilaginninnerat sivisungaatsiartariaqanngitsoq, apeqqutaaginnartorli piffissaq atorneqartoq eqqarsaatigilluagaanersoq, pilersaarusiugaanersoq imaqarluartuunersorlu. Kisianni piffissamik pitsaassusilimmik eqqarsaat taanna qanoq pitsaatigaa, aamma meeqqanut ajunnginnerpaasussamik tunngaveqarluni eqqarsaataava?

¹⁶ Atuakkiortoq meerarpassuarnik oqaloqateqartarsimasoq oqarpoq meeqqat ’angajoqqaaminnit kissaatiginerpaasaat tassaasoq piffissaqarfigineqarnerunissartik sammineqarluarnissartillu’. Maluginiarnarpoq professorit ilaat oqarsimammat ’eqqarsaat taanna [piffissaq pitsaassusilik] angajoqqaat ilerasunnerisigut pinngorsimasoq. Eqqarsaatip tamatuma inuit meeqqaminnik sivikinnerusumik ilagisaqarnissaannut utoqqatsissutissaqarlualersissimavai’.

17. Meeqqat angajoqqaaminnit suut pisariaqartippaat?

¹⁷ Biibilimi allassimasoqanngilaq angajoqqaat qanoq sivisutigisumik meeqqatik ilagisassaneraat, angajoqqaalli Israelikkuusut kajumissaarneqarput meeqqatik oqaloqatigisaqqullugit angerlarsimagaangamik, angalaaraangamik, innaraangamik makikkaangamillu. (5 Mosesi 6:7) Erseqqippoq angajoqqaat ullup ingerlanerani meeqqatik attavigilluartariaqaraat ilinniartillugillu.

18. Jiisusip ajoqersukkani ilinniartinniarlugit qanoq ililluni periarfissani tamaasa atortarsimavai, tamannalu angajoqqaat qanoq ilinniarfigisinnaavaat?

¹⁸ Jiisusip ajoqersukkani ilinniartittarsimavai nereqatigitillugit, angalaqatigitillugit qasuersaaqatigitillugillu. Taamaalilluni periarfissani tamaasa atortarpai ilinniartinniarlugit. (Markusi 6:31, 32; Lukasi 8:1; 22:14) Taamatuttaaq angajoqqaat kristumiut periarfissatik tamaasa atorniarsinnaavaat meeqqatik attaveqarfigillualerniarlugit attaveqarluarnerminnillu attassiinnarniarlutik Jehovallu aqqutigeqqusaanik ilinniartitsiniarlutik.

Qitornat sunik qanorlu ilinniartittariaqartut

19. (a) Qitornat ilagisarnissaasa saniatigut suna pingaaruteqarpa? (b) Angajoqqaat suna pingaartumik meeqqaminnut ilinniartitsissutigisariaqarpaat?

¹⁹ Meeqqanik perorsaalluarneq tassaaginnanngilaq meeqqanik ilaginninneq ilinniartitsinerlu. Aamma pingaaruteqartorujussuuvoq sunik ilinniartinnerlugit. Malugiuk suut ilinniartitsissutaassanerannik Biibilimi erseqqissaaneq. Allassimavoq:  „Oqaatsit taakku peqqussutillu ullumi ilinnut tunniussakka . . . erninnut nangeqqittuartassavatit.“ „Oqaatsit taakku“ qitornanut nangeqqittuartaqquneqartut suuppat? Tassaassapput oqaatsit siuninnguatigut allassimasut, tassa: „Taamaattumik [Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit.“ (5 Mosesi 6:5-7) Jiisusi oqarpoq Guutip inassutaani tamani taanna pingaarnersaasoq. (Markusi 12:28-30) Tassa angajoqqaat meeqqatik pingaartumik Jehova pillugu oqaluttuuttariaqarpaat ilinniartillugillu sooq taanna kisimi tarnikkut iluunngarluta asallugulu pallorfigisariaqaripput.

20. Israelitoqqami angajoqqaat meeqqatik sumik ilinniartissagaat Guutip peqquai?

²⁰ Kisianni „oqaatsit taakku“, angajoqqaanut meeqqaminnut nangeqqittuartaqqullugit kajumissaarutigineqartut, tassaaginnanngillat uummat iluunngarlugu tarnerlu iluunngarlugu Guutimik asanninnissamik kajumissaarutit. Malugiuk Mosesimik allakkat tallimaat-ni kapitalip tamatuma siuliani Mosesip inatsisit qulit, tassa inatsisit Guutip allaffissianut ujaraasunut allatsitai, nangeqqikkai. Taakku inassutaapput sallunnginnissamik, tillinnginnissamik, inuannginnissamik, allasiunnginnissamik ilaalu ilanngullugit. (5 Mosesi 5:11-22) Tassa angajoqqaat meeqqaminnut ileqqussatigut najoqqutassianik pitsaasunik ingerlatitseqqinnissaata qanoq pingaaruteqartigineranik erseqqissaavigineqarput. Ullumikkuttaaq angajoqqaat kristumiut meeqqatik taamatut ilinniartittariaqarpaat toqqissisimanartumik pilluarnartumillu siunissaqalernissaannik ikiussagunikkik.

21. Angajoqqaanut Guutip oqaasianik meeqqaminnut ’nangeqqittuaqqusineq’ qanoq isumaqarpa?

²¹ Malugiuk angajoqqaat ilisimatinneqarmata „oqaatsit taakku“, imaluunniit inassutit taakku, qanoq meeqqaminnut ilinniartitsissutigissagaat. Allassimavoq: „Erninnut nangeqqittuartassavatit.“ Oqaatsimi tassani pineqarpoq sumik pingaaruteqartumik puiguikkiussisitsiniarluni isumakkullu aalajangiussisitsiniarluni ilinniartitsineq. Allatut oqaatigalugu Guutip angajoqqaat Biibilimik ilinniartitsinissamut aalajangersimasumik pilersaaruteqaqquai meeqqamik anersaakkut nalilinnik aalajangiussinissaat siunertaralugu.

22. Angajoqqaat Israelikkuusut meeqqaminnik ilinniartitsinissaat pillugu qanoq ilioqquneqarpat, tamannalu qanoq isumaqarpa?

 ²² Taamatut siuariartuutaasumik ilinniartitsissagaanni angajoqqaat iliuuseqartariaqarput. Biibilimi allassimavoq: „Assannut [„oqaatsit taakku“, Guutip inassutai] qilerutissavatit ilisarnaatitut qaannilu inissisimallugit eqqaasitsissutissatut. Allakkit illunni matserfinnut illoqarfiullu isaaffiinut.“ (5 Mosesi 6:8, 9) Imaanngikkaluarpoq angajoqqaat Guutip inatsisaanik matserfinnut isaaffinnullu allattuissasut, imaluunniit inassutit assilinerinik meeqqat assaannut qilerussissasut qaavinulluunniit ivertitsillutik. Eqqarsaatigineqartorli unaavoq, angajoqqaat meeqqaminnut Guutip ajoqersuutaanik eqqaasitsiuaannarnissaat. Meeqqaminnik ilinniartitsinertik ima aalajangiusimatigissavaat soorlumi tassa Guutip inassutai meeqqat isaasa saanniittuaannartut.

23. Allaaserisami tulliuttumi suut sammineqassappat?

²³ Angajoqqaat pingaartumik sunik meeqqatik ilinniartissavaat? Sooq ullumikkut meeqqap imminut paarinissaanut ilinniartinnissaa sungiusarnissaalu taama pingaaruteqartigaa? Angajoqqaat meeqqaminnut ilinniartitsilluarnissaminnut sumi iluaqutissarsisinnaappat? Apeqqutit taakku allallu angajoqqaarpassuit isumaliutigisartagaat allaaserisami tulliuttumi sammineqassapput.

Uteqqiineq

• Sooq angajoqqaat meeqqatik erlinnartutut isigisariaqarpaat?

• Angajoqqaat allallu Jiisusi qanoq ilinniarfigisinnaavaat?

• Qanoq sivisutigisumik angajoqqaat meeqqatik ilagisassavaat?

• Meeqqat suna ilinniartussaavaat, ilinniartitsinerlu qanoq ingerlanneqassava?

[Atuaqqissaarnermi apeqqutit]

[Qupp. 14-mi assiliartaq]

Jiisusip ilinniartitseriaasia angajoqqaat qanoq ilinniarfigisinnaavaat?

[Qupp. 15-mi assiliartat]

Qaqugukkut qanorlu Israelitoqqami angajoqqaat meeqqatik ilinniartittussaasimavaat?

[Qupp. 16-mi assiliartat]

Angajoqqaat isumagisassaraat meeqqaminnut Guutip ajoqersuutaanik eqqaasitsiuarnissaq