Alianartumik pisoqartillugu

OWEN, nukappiaraq pingajussaat qiteqqullugu ukiulik, angerlarsimaffimminni uffarfimmi pinnguarpoq. Sikaavik nakorsaataasivik angajoqqaavisa angusinnaanngisorisaat angullugu qallorterpoq. Sikaavimmiittut ilaat puiaasaq malugaa. Ammarpaa imerlugulu. Alianartumik kinguneqarpoq.

Puiaasap imaraa syre neriuisartoq, Oweninnguullu inuunini annaavaa. Angajoqqaavi artorsangaarput. Owenip angutaata, Percyp, palasi tuppallersaatissarsiorfigaa ima aperalugu: „Sooq taama pisoqarpa?“ Palasip ima akivaa: „Guutiuna qilammi inngilinnguamik allamik pisariaqartitsisoq.“ Angajoqqaajusut aliasungaartut misigipput tamanna naapertuilluanngitsuliornerungaartoq. Ilumoorpa alianartup tamatuma pinissaa Guutip siunertarisimagaa? Percy pakatsilluni oqaluffimmut attaveqartarunnaarniarluni aalajangerpoq.

Percyp pisimasoq eqqarsaatigigaangamiuk imminut ima aperisarpoq: ’Erninnguara suli anniarnerluni? Qaqugumulluunniit takoqqissanerlutigu?’

Immaqa aamma illit eqqarsaatigisarpat toqusut qanoq pisarnersut, asasallu toqumi annaasimasat najoqqinneqalersinnaanersut. Guutip oqaasiani, Biibilimi, apeqqutit taakku akineqarput. Aap, tamatumunnga assingusumik alianartumik nalaataqarsimasut tamarmik Biibilimi erseqqissunik tuppallernartunillu akissutissarsisinnaapput. Pingaarnerusumillu: Biibilimi saqqummersinneqarpoq Guutip inuit neriorsorsimagai toqusunit makititaanikkut uummaqqikkumaartut — siunissamut neriuut nuanningaartoq.

Allaaserisap tulliuttup atuarneratigut neriuut nuanningaartoq tamanna ilikkagaqarfiginerusinnaavat.