Jehovap aqqutai pillugit ilisimasaqalerit

„Aqqutinnik nalunaarfiginnga ilisimaleqqullutit.“ — 2 MOSESI 33:13.

1, 2. (a) Egyptenimiup hebræereq pinerligaa takugamiuk Mosesi sooq akuliuppa? (b) Jehovamut kiffatut atorneqarsinnaaqqulluni Mosesip suna ilinniartariaqarpaa?

MOSESI Faraokkunni peroriartorsimavoq ilisimassutsimillu Egyptenimiut nuimanerusut pingaartitaannik ilinniartitaalluni. Nalunngilaali Egyptenimiuunani. Angajoqqaavi hebræeriupput. 40-nik ukioqarluni qatanngutini Israelip kinguaavi takusarpai. Egyptenimiut ilaata hebræerit ilaat pinerligaa takugamiuk isiginnaartuuinnarnani Egyptenimiu toquppaa. Mosesi Jehovap innuttai tapersersorniarlugit aalajangerpoq isumaqarlunilu qatanngutini aniguisinniarlugit Guutip atorniaraani. (Apustilit Suliaat 7:21-25; Hebræerit 11:24, 25) Pisimasoq tamanna paasineqarmat, Mosesi Egyptenimi kunngikkormiunit inatsisaatsutut isigineqalerpoq inuuinnarumallunilu qimaasariaqarluni. (2 Mosesi 2:11-15) Mosesi Guutimit atorneqassaguni Jehovap aqqutai pillugit ilisimasaqarnerusariaqarpoq. Ilinniartinneqarumava? — Tussiaat 25:9.

² Ukiut 40-t tulliuttut Mosesi qimaasutut savanillu paarsisutut inuuvoq. Mosesip qatanngutiminit hebræeriusunit pingaartinneqannginnini narrutsaatiginagu, pissutsit atukkani Guutip akuerisai naammagalugit atorpai. Ukiorpassuarni taakkunani tunuarsimaartuulluni Mosesi Jehovamit ilusilersorneqartippoq. Nammineq isummani ersersinniarnagu, Guutilli anersaavanit illernartumit siulersorneqarluni, kingusinnerusukkut allappoq ’Mosesi inuusoq anneruniajuitsoq, inunnit nunarsuarmiittunit tamanit anneruniajuinnerpaasoq’. (4 Mosesi 12:3) Jehovap Mosesi immikkut ittumik atorpaa. Taanna ilaarlugu anneruniajuissuseq imaluunniit maniguunneq noqqaassutigigutsigu, Jehovap pilluaqqussavaatigut. — Sefania 2:3.

Mosesi suliassinneqarpoq

3, 4. (a) Jehovap Mosesi sumik suliassippaa? (b) Mosesi qanoq ikiorneqarpa?

³ Ullut ilaanni Sinajip qeqertaasaani qaqqap Horebip eqqaani inngilip, Jehovamut sinniisuusup, Mosesi oqaluffigaa. Jehovap tusarliussaa imaappoq: „Innuttama Egyptenimi naalliunnerat takusimavara, inussianillu sulisitsisut pillugit nimaarlutik nillianerat tusarpara. Erloqissutaat nalunngilakka. Taamaattumik aqqarpunga Egyptenimiut assaannit aniguisikkumallugit nunamillu taassumannga majuartikkumallugit nunamut ajunngitsumut aallariarfittuumut, nunamut immummik tungusunnitsuummillu kuuttumut.“ (2 Mosesi 3:2, 7, 8) Tamatumunnga atatillugu Guutip Mosesi suliassaqartippaa, Jehovalli peqqusineratut naammassineqartussaavoq.

⁴ Jehovap inngilia ima nangippoq: „Maanna aallarit! Faraomut aallartinniarpagit innuttakka Israelikkut Egyptenimit anisikkiartortillugit.“ Mosesi nangaavoq. Suliassamut piukkunnarsorinngilaq, aamma piukkunnanngikkaluarpoq nammineq piginnaanini atorlugit kisimi tamanna suliarissasuuguniuk.  Jehovali ima neriorsuivoq: „Uanga najussavakkit.“ (2 Mosesi 3:10-12) Jehovap Mosesi ilumut Guutimit aallartitaaneranut uppernarsaataasunik tupinnartuliorsinnaanngortippaa. Mosesip qatanngutaa Aroni taassumunnga oqaluttuulluni ilaassaaq. Qanoq oqarnissaannik iliornissaannillu Jehovap nammineq ilinniartissavai. (2 Mosesi 4:1-17) Mosesip aalajaalluni suliassani naammassissavaa?

5. Sooq Israelikkut isiginnittaasiat Mosesimut unamminiarnartuusimava?

⁵ Aallaqqaammut Israelikkut utoqqaanertaasa Mosesi Aronilu upperaat. (2 Mosesi 4:29-31) Sivitsunngitsorli ’Israelikkut naalagaasaasa’ Mosesi qatanngutaalu Faraomut kiffaanullu Israelikkunnik ’uuminarsaaneralerpaat’. (2 Mosesi 5:19-21; 6:9) Israelikkut Egyptenimit anillutik takugamikku Egyptenimiunit qamutinik sorsuutinik malersorneqarlutik annilaangasorujussuanngorput. Imaq Aappalaartoq siunerminniimmat kingunerminniillutillu qamutit sorsuutit qimaariarfissaaruttutut misigipput, Mosesilu pisuutippaat. Illit susimassagaluarpit? Naak Israelikkut umiatsiaqanngikkaluartut Mosesip Jehovap peqqusineratut kajumissaarpai aallarnissaminnut piareersaqqullugit. Taava Guutip Imaq Aappalaartoq avissaartippaa, immallu naqqa nunanngorpoq panertoq Israelikkut ikaarsinnaaniassammata. — 2 Mosesi 14:1-22.

Aniguisitaanermit pingaaruteqarnerusoq

6. Jehovap Mosesi suliassamut piginnaatikkamiuk suna erseqqissarpaa?

⁶ Jehovap Mosesi suliassamut piginnaatikkamiuk, atermi pingaaruteqassusia erseqqissarpaa. Atermik tamatuminnga taamatullu atilimmik ataqqinninnissaq pingaaruteqarluinnarpoq. Jehovap atini pillugu aperineqarami Mosesi ima oqarfigaa: „Tassaavunga uangaasoq!“ Mosesip Israelikkut aamma ima oqarfigissavai: „Jahvep [imaluunniit Jehovap] siuaasassi Guutiata, Aaperaap Guutiata Iisaallu Guutiata Jaakullu Guutiata ilissinnut aallartippaanga.“ Jehova ima nangippoq: „Tassa atera naassaanngitsumik aterisara, tassa ateriumasara kinguaariikkuutaani.“ (2 Mosesi 3:13-15) Nunarsuaq tamakkerlugu Guutip kiffaasa taanna Jehovamik ateqartutut suli ilisimavaat. — Esaja 12:4, 5; 43:10-12.

7. Farao pingaakujukkaluartoq Guutip Mosesi qanoq iliornissaanik ilungersorluni kajumissaarpaa?

⁷ Mosesi Aronilu Faraomut sassaramik oqariartuutertik Jehovap aqqani saqqummiuppaat. Faraoli pingaakujulluni ima akivoq: „[Jehova] kinaammat naalassavara Israelikkullu aallarnissaat akueralugu? [Jehova] naluara, Israelikkullu aallarnissaat akuerissanngilara.“ (2 Mosesi 5:1, 2) Farao naakkittaallunilu tatiginanngilaq, taamaakkaluartorli Jehovap Mosesi ilungersorluni kajumissaarpaa taassumunnga tusarliussiartoqqeqattaaqqullugu. (2 Mosesi 7:14-16, 20-23; 7:26, 27; 8:16) Mosesip takusinnaavaa Faraop paamitsaakkaani. Orneqqinnissaa iluaqutaasinnaava? Israelikkut aniguisinneqarusoqaat. Faraolli aallaqqunngilluinnarpai. Illit qanoq iliorsimassagaluarpit?

8. Jehovap Faraomut periaasia qanoq kinguneqarluarpa, pisimasullu tamakku qanoq killinneqaatigisariaqarpavut?

⁸ Mosesip Farao suli allamik tusarleqqippaa. Ima oqarpoq: „Ima oqarpoq [Jehova] hebræerit Guutiat: ’Innuttama aallarnissaat akueriuk guutisiorfiginiassammannga.’“ Guuti aamma ima oqarpoq: „Assaga isatsillugu illit innuttatillu toqoraataasumik nappartissimagaluarussi qangali nunap qaavanit piiagaareersimassagaluarputit. Mannali pillugu atatippakkit: Pissaanera ilinnut takutikkumagakku ateralu nalunaarutigineqaqqugakku nunarsuarmi tamarmi.“ (2 Mosesi 9:13-16) Faraomut naakkittaatsumut pisussat aqqutigalugit Jehovap imminik assortuisunut tamanut mianersoqqussutitut pissaanini takutikkumavaa. Tamanna ilaatigut aamma Saatani Diaavulumut, Jiisusi Kristusip kingusinnerusukkut „silarsuup naalagaanera“-nik taasaanut, mianersoqqussutaavoq. (Johannesi 14:30; Romamiut 9:17-24) Siulittuutigineqartutut Jehovap aqqa taamani nunarsuarmi tamarmi nalunaajaatigineqarpoq. Kamaginninnera Israelikkut inuillu assigiinngitsorpassuit Jehovamik pallorfiginneqataasut annaanneqarnerannik kinguneqarpoq. (2 Mosesi 9:20, 21; 12:37, 38) Taamanimiilli inuit millionillit pallorfiginninnermut ilumoortumut ilannguttut Jehovap aqqanik oqaluussineq iluaqutigisarpaat.

Inuiaqatigiit piuminaatsut

9. Mosesip inuiaqatai qanoq ilillutik Jehovamut ataqqinninngitsuliorpat?

⁹ Hebræerit Guutip aqqa ilisimavaat. Mosesip  taakku oqaluffigigaangamigit ateq taanna atortarpaa, taamatulli atilimmut ataqqineqarnissaatut ataqqinnittuaannanngillat. Israelikkut Jehovamit tupinnartuliornikkut Egyptenimit aniguisinneqareernermik kingunitsianngua imermik imersinnaasaminnik nassaannginnamik suppat? Naammagittaalliorlutik Mosesi oqalorujuffigaat. Tamatuma kingorna nerisassat naammagittaalliutigaat. Mosesip mianersoqqusilluni oqarfigai nammineq Aronilu kisimik naammagittaalliorfiginngikkaatik, aammali Jehova naammagittaalliorfigigaat. (2 Mosesi 15:22-24; 16:2-12) Qaqqami Sinajimi Jehovap Inatsisit Israelikkunnut tunniuppai pissaanini angingaartoq tupinnartuliornikkut takutiitigalugu. Inuiaqatigiilli naalanngillutik nersuteeraasalialiorput kuultiusumik taannalu pallorfigilerlugu ’Jehovamullu nalliussivissiornerarlutik’. — 2 Mosesi 32:1-9.

10. Mosesip qinnutaa Mosesimik allakkat aappaat 33:13-imiittoq ullumikkut nakkutilliisunut kristumiunut sooq immikkut soqutiginaateqarpa?

¹⁰ Mosesip inuiaqatigiit Jehovap nammineq naalasseriitsutut oqaatigisai qanoq periaaseqarfigisussaavai? Mosesip Jehova ima qinnuigaa: „Ilumut isinnut saammaannarsiguma taava aqqutinnik nalunaarfiginnga ilisimaleqqullutit ilinnillu iluarisaajuaqqullunga.“ (2 Mosesi 33:13) Nakkutilliisut kristumiut ullumikkut Jehovap innuttaanik isumaginnittut savaatinik maniguunnerungaartunik paarsisuupput. Taamaakkaluartoq taakkuttaaq ima qinusarput: „Ingerlavigeqqusannik ilinniartinnga, [Jehova], aqqutigeqqusannik ajoqersunnga!“ (Tussiaat 25:4) Nakkutilliisut Jehovap aqqutaanik ilisimasaqarnertik iluaqutigalugu ajornartorsiutit assigiinngitsut Guutip oqaasianut taassumalu kinaassusianut naapertuuttumik aaqqissinnaavaat.

Jehovap innuttaminut piumasaqaatai

11. Najoqqutarineqartussat suut Jehovap Mosesimut tunniuppai, aamma sooq soqutigaavut?

¹¹ Qaqqami Sinajimi Jehovap innuttaminut piumasaqaatini oqaatigai. Kingusinnerusukkut Mosesimut Inatsisit Qulit allaffissianut ujaraasunut marlunnut allanneqarsimasut tunniunneqarput. Qaqqamit aterluni Israelikkut nersuteeraasaliamik pallorfiginnittut takugamigit, kamaangaarami allaffissiat qaarsumut naloriuppai sequmillugit. Jehovap Inatsisit Qulit allaffissianut ujaraasunut Mosesip qussagaanut allaqqippai. (2 Mosesi 32:19; 34:1) Inatsisit taakku aallaqqaammut Mosesimut tunniussaasa assigaat. Mosesi taakkununnga naapertuuttumik iliuuseqartussaavoq. Aamma Guutip qanoq pissuseqarnerluni Mosesimut erseqqissarpaa, taamaalillunilu Mosesi paasitillugu Jehovamut sinniisuusutut qanoq pissuseqartussaasoq. Kristumiut Mosesip inatsisaanik maleruaasussaanngikkaluarput, Jehovalli Mosesimut oqaatigisai najoqqutassianik tunngaviusunik amerlasuunik allanngortinneqarsimanngitsunik, sulilu Jehovamut pallorfiginnittunut tamanut atortuusunik, imaqarput. (Romamiut 6:14; 13:8-10) Taakkua ilaat misissoriartigik.

12. Jehovap tunniusimaffigilluinnarneqarnissaminik piumasaqarnera Israelikkut qanoq sunnerneqaatigisussaagaluarpaat?

¹² Jehova tunniusimalluinnarfigisariaqarparput. Jehova tunniusimaffigilluinnarneqarnissaminik piumasaqarluni nalunaarmat Israelikkut najuupput. (2 Mosesi 20:2-5) Israelikkut Jehovap ilumoortumik Guutiunera pillugu uppernarsaaterpassuit takusimavaat. (5 Mosesi 4:33-35) Jehovap erseqqissarpaa inuiaqatigiit allat qanorluunniit ilioraluarpata, innuttami akornanni guutipilussiorneq anersaarsiornerluunniit akuerinaviarnagu. Taassumunnga tunniusimanerat qallikkuinnaasussaanngilaq. Israelikkut tamarluinnarmik Jehova asasussaavaat uummatikkut iluunngarlutik tarnikkullu iluunngarlutik nukitillu tamakkerlugit. (5 Mosesi 6:5, 6) Oqaluttarnerat, pissusilersornerat — aap, inuunerat tamarmi — pineqarpoq. (3 Mosesi 20:27; 24:15, 16; 26:1) Jehovap tunniusimaffigilluinnarneqarnissaminik piumasaqarnera aamma Jiisusi Kristusip erseqqissarpaa. — Markusi 12:28-30; Lukasi 4:8.

13. Sooq Israelikkut Guutimut naalalluinnartariaqarpat, taassumunngalu naalannissamut uagut suna pissutigisariaqarparput? (Oqaluussisartup oqaasii 12:13)

¹³ Jehovap inatsisai maleruaqqissaartariaqarpavut. Israelikkut eqqaasinneqartariaqarput Jehovamik angerfigeqatiginnikkamik naalalluinnarniarlugu neriorsuisimanerminnik. Inuttut kiffaanngissuseqangaatsiaraluarput, Jehovalli inatsisaanut tunngasut pineqaraangata naalalluinnartariaqarput. Naalalluinnarpata tamanna Guutimik asanninnerannut ersiutaassaaq, taakkualu namminneq meeraasalu iluaqutigissavaat, Jehovammi piumasaqaatai tamarmik taakkununnga iluaqutaapput.  — 2 Mosesi 19:5-8; 5 Mosesi 5:27-33; 11:22, 23.

14. Israelikkut anersaakkut ittunik salliutitsisariaqarnerat Guutip taakkununnga qanoq erseqqissarpaa?

¹⁴ Anersaakkut ittut salliutittariaqarpavut. Israelikkut timikkut pisariaqartitatik ima pingaartitsigisussaanngilaat anersaakkut sammisassanut piffissaarullutillu nukissaarullutik. Inuunerat pigisanik soqutiginninnerinnarmut tunngasussaanngilaq. Jehova siunertamut illernartumut, tassa sapaatit-akunneri tamaasa Guutimik ilumoortumik pallorfiginninnermut tunngasuinnarnik sammisaqarnermut, atorneqartussamik piffissamik immikkoortitsisimavoq. (2 Mosesi 35:1-3; 4 Mosesi 15:32-36) Aamma ukiut tamaasa ataatsimeersuarnerit illernartut immikkut ittut piffissaqarfigineqartussaapput. (3 Mosesi 23:4-44) Taamaalillutik Israelikkut Jehovap suliaanik angingaartunik oqaluuserinninnissamut, aqqutaanik eqqaasinneqarnissamut ajunngitsuliarpassuinillu qujamasuutiginninnerminnik ersersitsinissamut periarfissaqalertarput. Israelikkut Jehovamut tunniusimanerminnik ersersitsigaangamik Guutimik mianerinninnerulerlutillu asanninnerulertarput, aqqutigeqqusaasigullu ingerlanissamut ikiorneqartarlutik. (5 Mosesi 10:12, 13) Ullumikkuttaaq ilitsersuutini tamakkunani najoqqutassiat peqqinnartut Jehovap kiffaanut iluaqutaasarput. — Hebræerit 10:24, 25.

Jehovap pissusii paasisariaqarlugillu pingaartittariaqarpavut

15. (a) Sooq Jehovap pissusiinik paasinninneq pingaartitsinerlu Mosesimut iluaqutaassava? (b) Apeqqutit suut iluaqutigisinnaavavut Jehovap pissusiinik ataasiakkaanik eqqarsaatiginneqqissaarnissamut?

¹⁵ Mosesip Jehovap pissusii paasillugillu pingaartikkunigit, inuiaqatigiinnik isumaginninnissamut aamma tamanna iluaqutigissavaa. Mosesimik allakkat aappaat 34:5-7 naapertorlugu Jehovap Mosesi sarsuppaa imalu suaarluni: „[Jehova, Jehova] tassa Guuti nallittuisoq saammaasorlu, kamajaatsoq ilumoornermik sallusuissummillu peqangaartoq. Ilumoornermik atatitsisoq kinguaariissoqatigiinni tuusintini ataatsini pisuussusernik unioqqutitsinernillu, ajortulianillu isumakkiisoq, kisianni pisuusumik pillaanngitsoorneq ajortoq; siuaasat ajortuliaannik pillaasoq qitornaanni ernutaannilu ernutaqqiutaannilu kinguaavisalu sisamassaanni.“ Oqaatsinik taakkuninnga eqqarsaatiginninnissaq piffissaqarfigiuk. Imminut ima aperigit: ’Jehovap pissusii taakku tamarmik immikkut qanoq isumaqarpat? Jehovap pissuseq taanna qanoq ersersippaa? Pissuseq taanna nakkutilliisut kristumiut qanoq ersersissinnaavaat? Pissuseq taanna tamatta immikkut iliuutsitsinnut qanoq sunniuteqartariaqarpa?’ Assersuuteqariarta.

16. Guutip naakkinninnera nallittuineralu pillugit qanoq ililluta ilisimasaqarnerulersinnaavugut, aamma sooq tamanna pingaaruteqarpa?

¹⁶ Jehova ’Guutiuvoq nallittuisoq saammaasorlu’. Qinerlerfissiaq Indsigt i Den Hellige Skrift pigigukku oqaaseq „Barmhjertighed“ (naakkinninneq, nallittuineq) pillugu qanoq allassimasoqarnersoq atuarsinnaavat. Aamma Register til Vagttårnets publikationer imaluunniit qarasaasiamut programmi Watchtower Library cd-rommimiittoq atorlugu misissuisinnaavutit. Naakkinninneq imaluunniit nallittuineq pillugu allassimaffiit naniniarlugit Bibelordbog atoruk. * Paasissavat  Jehova naakkinninnini pissutigalugu pillaammik ilaannikkut sakkukillisitsiinnarnani aammali qamannga pisumik misiginneqatiginnittartoq. Naakkinninnini pissutigalugu Guuti innuttani ikiorniarlugit akuliuttarpoq. Tamatumunnga uppernarsaataavoq nunamut neriorsuutigisamut ingerlaarneranni Guutip Israelikkunnik timikkut anersaakkullu isumassuinera. (5 Mosesi 1:30-33; 8:4) Kukkugaangata Jehovap nallittuilluni isumakkeerfigisarpai. Itsaq innuttani naakkinnittuliorfigisarpai. Taamaattumik ullumikkut Jehovamut kiffaasut imminnut naakkinnittuliorfiginerusariaqarput, ilaa? — Matthæusi 9:13; 18:21-35.

17. Jehovap saammaanneranik ilisimasaqarnerput qanoq pallorfiginninnermut ilumoortumut siuarsaataasinnaava?

¹⁷ Jehovap naakkinninnera nallittuineralu saammaanneranut attuumassuteqarpoq. Ordbogimi „saammaanneq“ pillugu qanoq allassimasoqarnersoq misissoriaruk. Nassuiaatit allassimaffinnut Jehovap saammaasutut eqqartorneqarfigisaanut sanilliutikkit. Biibilimi ersersinneqarpoq Jehova ilaatigut innuttaminik pissakilliortunik asannittumik isumassuisarnermigut saammaasuusoq. (2 Mosesi 22:25, 26) Nunani tamani nunami allamiut, inuillu allat, pissakilliorsinnaapput. Jehovap kiffani pissakilliortunut kinaassusersiortuunnginnissaannik inussiarnisaartuunissaannillu ilinniartikkamigit, eqqaasippai namminneq nunami allamiuusimanerannik, tassa Egyptenimi. (5 Mosesi 24:17-22) Ullumikkut Guutip innuttaasa tamanna qanoq ilinniutigisinnaavaat? Saammaasuugutta tamanna ataasiussuseqarnissamut allanillu Jehovamik pallorfiginninnermut kajungilersitsinissamut iluaqutigissavarput. — Apustilit Suliaat 10:34, 35; Saqqummersitat 7:9, 10.

18. Inuiaqatigiit allat ileqquinut tunngatillugu Jehovap Israelikkunnik killilersuinera qanoq ilinniarfigaarput?

¹⁸ Israelikkulli nunami allamiunik inussiarnisaarfiginninnertik Jehovamik taassumalu ileqqussatigut najoqqutassiaanik asanninnerminnit pingaarnerutilertussaanngilaat. Taamaalillutik Israelikkut paasitinneqarput inuiaqatigiit eqqaminniittut inooriaasiannik ilaarsisussaanatik — upperisarsiornikkut ileqqui ileqquliuttussaanagit taakkunatullu kinguaasiuutitigut inuunerluttussaanatik. (2 Mosesi 34:11-16; 5 Mosesi 7:1-4) Ullumikkut uagutsinnut aamma taamaappoq. Inuiaasussaavugut illernartut soorlu Guuterput Jehova illernartuusoq. — 1 Petrusi 1:15, 16.

19. Jehovap unioqqutitsinernut isiginnittaasianik ilisimasaqarneq taassuma innuttaanut qanoq illersuutaasinnaava?

¹⁹ Jehovap Mosesi aqqutiminik paasinnissimanersoq qulakkeerniarlugu erseqqissarpaa ajortuliornermik akuerinninngikkaluarluni kamajaatsuulluni. Inuit piumasaqaatiminik ilinniarnissaannut maleruaalersinnaanissaannullu piffissaqartittarpai. Ajortuliortoq allamik isumataaraangat Jehovap ajortuliaanik isumakkeerfigisarpaa, pillarneqaatissaminilli sualuttumik unioqqutitsisimasoq  pillanngitsoorneq ajorpaa. Jehovap Mosesi mianersoqqusilluni oqarfigaa Israelikkut iliuusii kinguaariinngortussanut ajunngitsumik ajortumilluunniit sunniuteqarsinnaasut. Jehovap aqqutaanik ilisimasaqarluarutta, tamanna arlaannut nammineq pisuussutigisatsinnut Guutimik pisuutitsinissamut taassuminngalu mullusorinninnissamut illersuutigisinnaavarput.

20. Uppeqatitta inuillu oqaluussinitsinni naapittakkatta eqqortumik iliorfiginissaannut suna iluaqutigisinnaavarput? (Tussiaat 86:11)

²⁰ Jehova taassumalu aqqutai pillugit paasisaqarnerorusukkuit, atuaqqissaartuartariaqarlutillu Biibilimi atuakkatit eqqarsaatigeqqissaartuartariaqarpatit. Jehovap pissusii tupinnarluinnartut misissoqqissaartakkit. Qinunikkut eqqarsaatigiuk qanoq Guuti ilaarsinnaanerlugu inuunerillu taassuma siunertaanut qanoq naapertuunnerulersissinnaanerlugu. Tamanna iluaqutigissavat napiaaniutinik ingalassimanninnissamut, uppeqatinnik eqqortumik iliorfiginninnissamut allallu Guutitsinnik asseqanngitsumik ilisarisimannilernissaannik asannilernissaannillu ikiuinissamut.

[Quppernerup ataani ilanngussaq]

Suna ilikkarpiuk?

• Sooq Mosesip anneruniajuitsuunera pingaaruteqangaarpa, aamma sooq uagut anneruniajuitsuunissarput pingaaruteqarpa?

• Mosesip Faraomut Jehovap oqaasianik tusarliussiartoqqeqattaarnera qanoq kinguneqarpa?

• Najoqqutassiat pingaaruteqartut Mosesip ilinniarsimasai suut aamma uagutsinnut atuuppat?

• Jehovap pissusii pillugit qanoq ililluta ilisimasaqarluarnerulersinnaavugut?

[Atuaqqissaarnermi apeqqutit]

 

 

[Qupp. 25-mi assiliartaq]

Jehovap piumasaqaatini Mosesimut saqqummiuppai

[Qupp. 26, 27-mi assiliartaq]

Jehovap pissusii eqqarsaatigeqqissaakkit