Makititaanissamik neriuut ilinnut qanoq isumaqarpa?

„Assatit ammartarpatit pinngortitallu tamaasa kissaatigisaannik qaarsillartittarlugit.“ — TUSSIAAT 145:16.

1-3.  Inuit ilaat siunissamut qanoq neriuuteqarpat? Assersuuteqarit.

CHRISTOPHER qulingiluanik ukiulik angajunilu ajartik, angartik illortaatillu marluk ilagalugit Manchesterip eqqaani Tuluit Nunaanniittumi ullaap tungaani illumiit illumut oqaluussisimapput. Tamatuma kingorna qanoq pisoqarnersoq atuagassiami Vågn op!-imi oqaluttuarineqarpoq: „Ualikkut tamarmik illoqarfimmut umiarsualivittalimmut Blackpoolimut takornariarniarput, aqqutaanili biilimik ajutoorlutik tamarmik ajunaarput. Politiit oqaluttuarput ajutoormata biilit ’innerinnarsuanngorlutik ikuallassuaarsimasut’.“

² Alianartup tamatuma pinissaa aqaguttoq ilaqutariit taakku ilagiit atuakkamik atuaqqissaarnerannut peqataasimapput, toqulu eqqartorneqartut ilagisimavaat. Christopherip ataataa, David, ima oqaluttuarpoq: „Christopher nukappiaraavoq eqqarsaqqissaartuaannartoq. Unnuk taanna silarsuassaq nutaaq siunissamullu neriuuterput oqaluuserai, eqqartuinitsinnilu ima oqariartaarpoq: ’Jehovamut nalunaajaasuunerup nuannersortaasa ilaat, tassa toqu alianaraluartoq nalunnginnatsigu ullut ilaanni takoqqittussaalluta.’ Soorunami arlaannattaluunniit ilisimanngilaa arlaannik pisoqangajalersoq oqaasiinik puiuikkiussisitsisussamik.“ *

³ Ukiorpassuit tamatuma siorna, 1940-mi, Jehovamut nalunaajaasoq Østrigimiu Franzimik  atilik Jehovamut ilumuunngitsuliorumannginnini pissutigalugu niaquiissummik pillagaalluni toqutaanissani utaqqivaa. Berlinimi parnaarussivimmiit Franzip anaanani ima allaffigaa: „Sakkutuunngorsimasuuguma ilisimasakka naapertorlugit toqumik pillaateqartussaasumik ajortuliorsimassagaluarpunga. Tamannalu uannut ajortorujussuussaaq. Taamaalioruma makititaanavianngilanga. . . . Asasara anaana, qatanngutikkalu tamassi, ullumi eqqartuussaavunga, annilaaqinasilu, toqumut eqqartuussaavunga; aqagu ullaakkut toqutaassaanga. Guutimit nakussatsinneqarpunga, soorlu siornatigut kristumiut ilumoortut tamarmik nakussatsinneqartarsimasut. . . . Toqu tikillugu aalajaakkussi tamatta makititaanissami naapeqqikkumaarpugut. . . . Takoqqikkumaarpugut.“ *

4. Oqaluttuarineqartut qanoq killinneqaatigaagit, maannalu suna misissussavarput?

⁴ Makititaanissamik neriuut Christopherimullu Franzimullu pingaaruteqartorujussuuvoq. Taakkununnga piviusuuvoq. Qularnanngilaq oqaluttuarineqartut taakku killinneqaatigigivut! Jehovamut qujamasunnerulerniarluta makititaanissamillu neriuuterput nakussatsinniarlugu, misissoriartigu sooq makititaasoqarumaarnersoq tamannalu tamatta immikkut iliuuseqarnissamut qanoq killinneqaatigisariaqarneripput.

Nunarsuarmi makititaanermik takorruugaq

5, 6. Takorruukkami apustili Johannesimit Saqqummersitat 20:12, 13-imi allanneqartumi suna saqqummerpa?

⁵ Jiisusi Kristusip ukiuni tusindini naalakkersuinerani pisussanik takorruukkamini apustili Johannesip nunarsuarmi makititaasoqarnera takuaa. Ima oqaluttuarpoq: „Takuakkalu toqusimasut, angisuut mikisullu. . . . Immallu toqusimasut imminiittut utertippai, taamatuttaaq toqup toqusullu inaata toqusimasortatik.“ (Saqqummersitat 20:12, 13) Toqusut inaanni, inuiaat ataatsimut iliveqarfianni, ’tigusaaqqasut’ tamarmik inuiaqatigiinni qanorluunniit inissisimaffeqaraluarunik — ’angisuujugaluarunik mikisuugaluarunilluunniit’ — iperagaassapput. Aamma imaani toqusimasut taamanikkussamut inuuleqqikkumaarput. Pisussat nuanningaartut tamakku Jehovap siunertaata ilagai.

⁶ Kristusip ukiuni tusindini naalakkersuinera Saatanip qilersugaaneranik itinersuarmullu iginneqarneranik aallarnerneqassaaq. Naalagaaffiup tamatuma aqutsinerani Saatani susinnaajunnaaqqasussaagami, makititaasut annikilliornartussarsuarmilu aniguisut tammartissinnaanavianngilai. (Saqqummersitat 20:1-3) Ukiut tusindit ilinnut sivisoorujussuartut issinnaapput, Jehovamulli ’ullortut ataasiinnartut ipput’. — 2 Petrusi 3:8.

7. Kristusip ukiuni tusindini naalakkersuinerani eqqartuussummut suna tunngaviussava?

⁷ Johannesip takorruugaa naapertorlugu Kristusip ukiuni tusindini naalakkersuinera eqqartuussiffiussaaq. Apustili ima allappoq: „Takuakka toqusimasut, angisuut mikisullu, issiavissaarsuup sioraani qeqartut, mappersakkallu mapperneqarput. Mappersagarlu alla mapperneqarpoq, tassaalluni inuunerup mappersagaa, toqusimasullu eqqartuunneqarput suliatik naapertorlugit, mappersakkani allassimasut malillugit. . . . Tamarmillu eqqartuunneqarput suliatik naapertorlugit.“ (Saqqummersitat 20:12, 13) Malugiuk inuit ataasiakkaat toqunnginnerminni iliuuserisimasaat iliuuserisimanngisaalluunniit eqqartuussummut tamatumunnga tunngaviunngimmata. (Romamiut 6:7, 23) Eqqartuussulli ’mappersakkanut’ nutaanut mapperneqartunut attuumassuteqarpoq. Inuup mappersakkat taakkua imarisaat ilinniareerlugit suliai imaluunniit iliuusii, atiata ’inuunerup mappersagaani’ allanneqarnissaanut allanneqannginnissaanulluunniit aalajangiisuupput.

„Inuunissamut“ makititaaneq imaluunniit „eqqartuunneqarnissamut“ makititaaneq

8. Makititaasunut marlunnik sunik periarfissaqassava?

⁸ Johannesip takorruugaani siusinnerusukkut Jiisusi ’toqumut toqusullu inaannut matuersaatinik’ piginnittutut takutinneqarpoq. (Saqqummersitat 1:18) Jehovap taanna toqqarsimavaa ’Inuunerup naalagaaneratut’, ’inuusunik toqusimasunillu eqqartuussinissamut’ pissaaneqartitaasutut. (Apustilit Suliaat 3:15; 2 Timotheusi 4:1) Jiisusi taakkuninnga qanoq eqqartuussissava? Sinippaartunik  inuulersitseqqinnermigut. Jiisusip inuppassuit oqaluussiffigisani ima oqarfigai: „Tamanna tupigusuutigissanngilarsi; piffissarmi nalliukkumaarpoq ilivermiittut tamarmik taassuma nipaanik tusarumaarfissaat ilivernillu aniumaarfissaat.“ Imalu nangippoq: „Ajunngitsumik iliorsimasut makillutik inuunissamut ajortumilli iliorsimasut makillutik eqqartuunneqarnissamut.“ (Johannesi 5:28-30) Taavami itsaq angutit arnallu aalajaatsut qanoq siunissaqarpat?

9. (a) Makititaasut ilarpassui qularnanngitsumik sunik paasitinneqassappat? (b) Ilinniartitsinissarsuaq suna ingerlanneqassava?

⁹ Itsaq aalajaatsut taakkua makititaagunik erniinnaq paasissavaat neriorsuutit upperisimasatik piviusunngoreersimasut. Qularnanngilaq arnap Guutip piata kinguaavata, kinguaap Biibilimi siulittuummi siullermi Mosesimik allakkat siulliit 3:15-imi eqqaaneqartup, kinaanera paaserusuttorujussuussagaat. Qanorlu nuannaarutigitigissavaat tusarunikku Missiarsi neriorsuutigisaasoq, Jiisusi, toqussi tikillugu aalajaassimasoq inuunerminillu utertitsissutitut pilliutiginnissimasoq. (Matthæusi 20:28) Taakkuninnga inuunermut tikilluaqqusisut Jehovap ajunngissusianut pisassarinngisaraluatsinnut nallittuineranullu utertitsissutip ersiutaaneranik paasinninnissaannik ikiuinertik nuannaarutigingaassavaat. Makititaasimasut Jehovap nunarsuarmik siunertaata taassuma naalagaaffia iluaqutigalugu naammassineqalernera paasiartortillugu, qularnanngitsumik qamannga pisumik qujamasungaassapput Jehovalu unnersiutigalugu. Ataataminnut qilammiusumut asannittumut taassumalu erneranut tunniusimanerminnik ersersitsinissaminnut periarfissaqarluassapput. Taamanikkussamut inuusut tamarmik ilinniartitsinersuarmut — ilivernit makittut milliardillit, allatulli Guutip utertitsissutitut akiliutaanik ilassinnittariaqartut, ilinniartinniarlugit pisariaqartumut — peqataanertik nuannaarutigissavaat.

10, 11. (a) Kristusip ukiuni tusindini naalakkersuinerani nunamiittut tamarmik sunik periarfissaqassappat? (b) Tamakkua qanoq killinneqaatigisariaqarpavut?

¹⁰ Aaperaap makititaaguni ’illoqarfiup’ qilanaarisimasami naalakkersuinerani inuunini nuannaarutigilluinnarsinnaassavaa. (Hebræerit 11:10) Aamma eqqarsaatigeriaruk itsaq Jobip aalajaatsup qanoq killitsissutigitigissagaa paasiguniuk inuunini Jehovap kiffaasa aalajaatsut allat ilumoorfiginninnermikkut misilinneqartut tuppallersaatigalugulu qiimmassaatigisimagaat! Qularnanngitsumillu Danielip siulittuutit isumassarsisitaalluni allakkami qanoq eqquussimanerat paaserusuttorujussuussavaa!

¹¹ Silarsuassami nutaami naapertuilluarfiusumi inuunermik angusisut tamarmik, makititaanikkut inuuleqqissimagaluarunik annikilliornartussarsuarmiluunniit aniguisimagaluarunik, Jehovap nunarsuarmik tassanilu najugaqartunik siunertaa pillugu ilinniagassarpassuaqassapput. Naassaanngitsumik inuusinnaaneq Jehovamillu qaqugumulluunniit unnersiutiginnissinnaaneq pissutigalugit Kristusip ukiuni tusindini naalakkersuinerani ilinniartitsineq nuannerluinnassaaq. Pingaarnerpaassaarli mappersakkat imarisai ilinniareerlugit tamatta immikkut qanoq aalajangernersugut. Ilikkakkavut inuunitsinni atussavavut? Ilitsersuussutit pingaarutillit, Saatanip naggammik sallusuissummit uagutsinnik qimagutititseriaraluarneranik itigartitsinissamut nakussatsissutigisinnaasavut, eqqarsaatigeqqissaarlugillu maleruassavavut?

12. Inuit ataasiakkaat tamarmik tamakkiisumik ilinniartitseqataanissamut nunarsuarmillu paratiisinngortitseqataanissamut suna iluaqutigissavaat?

¹² Pilluaqqussutit nuanningaartut Kristusip utertitsissutitut pilliutaa pissutigalugu iluaqutigisinnaasavut puiunngisaannartariaqarpavut. Makititaasut ullumikkut atugaasartunik sanngiissuteqarnaviarnatillu ajuuteqarnavianngillat. (Esaja 33:24) Silarsuassami nutaami inuit tamarmik timikkut peqqissuullutillu peqqilluinnalersussaagamik makititaasimasunik milliardilinnik tamakkiisumik ilinniartitseqataanissamut periarfissaqassapput. Aamma nunarsuarmi suliarineqarsimasut annerpaartaat taamanikkussamut suleqataaffigissavaat — tassa Jehovamut ataqqinaataasumik nunarsuarmik tamarmik paratiisinngortitseqataassapput.

13, 14. Saatanip naggataarutaasumik misilinneqarnerup nalaani iperagaanissaanut suna siunertaava, tamannalu uagutsinnut inunnut ataasiakkaanut qanoq kinguneqarsinnaava?

¹³ Saatanip itinersuarmit iperagaaguni inuit  tammartinniarsareqqinnerisigut naggammik misilissavai. Saqqummersitat 20:7-9 naapertorlugu ’inuiaqatigiit tammartinneqartut’, imaluunniit inuit eqimattakkuutaat Saatanimit ajortumik sunnertittut tamarmik suujunnaarsinneqarnissamut eqqartuussaassapput: ’Inneq qilammit nakkarumaarpoq nungutillugillu.’ Kristusip ukiuni tusindini naalakkersuinerani makititaareerlutik pikitsitsisunngortut suujunnaarsinneqarmata, makititaanerat tassaalerpoq eqqartuunneqarnissamut makititaaneq. Makititaasimasulli assuarnaattuartut inuunermik naassaanngitsumik tunineqarumaarput. Aap, makititaanerat tassaassaaq „inuunissamut“ makititaaneq. — Johannesi 5:29.

¹⁴ Makititaanissamik neriuut maannangaaq qanoq tuppallersaatigisinnaavarput? Siunissamilu makititaanissamut attuumassutilinnik pilluaqqussutisinissarput qulakkeerniarlugu qanoq iliortariaqarpugut?

Eqqarsaatigineqartariaqartut

15. Makititaanissamik upperinninneq maanna qanoq iluaqutaasinnaava?

¹⁵ Immaqa qanittukkut asasannik toqusoorputit maannakkullu annaasaqangaareerlutit pisariaqartumik naleqqussarniarsaralutit. Makititaanissamik neriuut iluaqutigalugu, sallusuissummik ilisimanninngitsut piginngisaannik, qamuuna eqqissisimasinnaallutillu nukittusinnaavutit. Paulusip Thessalonikamiut ima tuppallersarpai: „Nalorneqqunngilassi sinippaartut pillugit, aliasussannginnassi inuttut neriuutissaqanngitsutut.“ (1 Thessalonikamiut 4:13) Silarsuassami nutaamiillutit, makititsinermik takunnittuullutit, takorloorsinnaaviuk? Asasat takoqqissinnaanerannik eqqarsaatiginneqqissaarneq tuppallersaataangaarsinnaavoq.

16. Makititsinerup nalaani qanoq misigissanerlutit takorloorsinnaaviuk?

¹⁶ Imaassinnaavoq Adamip pikitsitsinerata kingunipilui maannakkut timikkut atoritit, immaqa perulunnartumik napparsimallutit. Tamanna isumakuluutigivallaarlugu illit nammineq makititaasinnaanissannut silarsuassamilu nutaami peqqissuullutillu nukissaqaqqilerlutit inuuleqqissinnaanissannut nuanningaartumik periarfissaqarnerit puigorniaqinagu. Uikkuit takullugulu inunnit makititaasimaninnik nuannaarutiginnissuataartunit najorneqarlutit, taava qularnanngilluinnarpoq Guuti ilumoorfiginnilluni tunniusimanera pillugu qutsavigissagit.

17, 18. Pingaarutillit marluk suut uummammiuliuttariaqarpavut?

¹⁷ Tamatumali tungaanut pingaarutillit marluk eqqaamatigik. Aappaa tassaavoq maannakkut uummatikkut iluunngarluni Jehovamut kiffartornerup pingaaruteqassusia. Naalakkatta Jiisusi Kristusip imminut pilliutigeriaannaaneranik ilaarsinitsigut Jehovamik tullitsinnillu asanninnerput ersersipparput. Akerlilersorneqarneq malersugaanerluunniit pissutigalugu inuussutissarsiutaarullutaluunniit kiffaanngissuseqarunnaarutta, aalajangiusimasariaqarparput qanorluunniit pisoqaraluarpat uppernikkut aalajaattuarniarluta. Akerlilersuisullu toqunniarluta sioorasaassagaluarpatigut, makititaanissamik neriuut tuppallersaatigisinnaavarput Jehovamullu taassumalu naalagaaffianut ilumoorfiginnittuarnissatsinnut nakussatsissutigisinnaallutigu. Aap, Guutip naalagaaffianik oqaluussissutiginninnermi ajoqersuganngortitsiortornermilu aallussilluarnerput pissutigalugu Jehovap naapertuilluartunut naassaanngitsumik pilluaqqussutigiumaagaanik pilluaqqusaasinnaanissamut periarfissaqalerpugut.

¹⁸ Eqqarsaatigineqartariaqartoq alla tassaavoq naammalluinnanngitsuunerput pissutigalugu eqqunngitsuliornissamut ussernartorsioraangatta qanoq iliortarnersugut. Makititaanissamik neriuummik ilisimanninnerput Jehovallu ajunngissusianik pisassarinngisaraluatsinnik pingaartitsinerput uppernikkut aalajaattuarnissamut aalajangiusimanninnerulissutigaavut. Apustili Johannesi ima mianersoqqusivoq: „Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa; silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput. Silarsuarlu piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Johannesi 2:15-17) Silarsuarmi pigisalerituneq napitinnartoq ’inuunivimmut’ sanilliukkutsigu kajuminnarpiarnavianngilaq.  (1 Timotheusi 6:17-19) Kinguaassiuutitigut inuunerlunnissamut ussernartorsiortinneqarutta, tamatuma itigartinnissaa aalajangiusimalluinnassavarput. Nalunngilarput Harmagedoni sioqqullugu toqussagaluarutta, makititaanissamut periarfissaqanngitsutut makititaanissamut periarfissaarussinnaalluta Jehovap iluarinngisaanik iliuuseqartuarutta.

19. Immikkut pisinnaatitaaffik nalissaqanngitsoq suna puiussanngilarput?

¹⁹ Pingaarnerpaamik Jehovap uummataanik maanna naassaanngitsumillu nuannaartitsinerup nalissaqanngitsumik immikkut pisinnaatitaaffiunera puiunngisaannartariaqarparput. (Ussatit 27:11) Toqumut aalajaakkutta imaluunniit pissutsit aaqqissuussaanerata ajortup matuma naggaserneqarnissaata tungaanut assuarnaattuarutta, Jehovap eqqortumik kisimi oqartussaaneranik qilammi nunamilu akerleriissummi sumi inissisimanerluta taassumunnga ersersissavarput. Annikilliornartussarsuarmi aniguisut ilaattut tupinnartuliornikkulluunniit makititaasut ilaattut nunami paratiisimi inuunissaq qanoq nuannertigissanersoq eqqarsaatigeriaruk!

Kissaatigisatsinnik qaarsillartinneqarpugut

20, 21. Makititaanissaq pillugu apeqqutitta ilaat akineqanngikkaluartut, aalajaattuarnissatsinnut suna iluaqutigissavarput? Nassuiaruk.

²⁰ Makititaanissaq pillugu misissuereeraluarluta apeqqutigisinnaasavut tamarmik suli akineqanngillat. Inunnut aappaqarlutik toqusunut Jehova qanoq aaqqiissutissiissava? (Lukasi 20:34, 35) Inuit toquffimmik eqqaani makititaassappat? Ilaquttamik eqqaanni makititaassappat? Makititaanissap qanoq ingerlajumaarneranik apeqqutit taakku allarpassuillu suli akineqanngillat. Taamaakkaluartoq Jeremiap oqaasii uku eqqaamasariaqarpavut: „[Jehova] ajunngitsuliortarpoq neriuffiginnitsiminut imminillu ujarlersunut. Pilluaataasarpoq [Jehovap] annaassinissaa nipangersimalluni utaqqigaanni.“ (Upputit 3:25, 26) Jehovap piffissarititaani nalerisimaalluinnassutigisatsinnik suut tamarmik akineqarumaarput. Sooq tamanna qularinngissinnaavarput?

²¹ Tussiaasiortup erinarsorluni Jehovamut oqaasii isumassarsiarititaasut uku eqqarsaatigikkit: „Assatit ammartarpatit pinngortitallu tamaasa kissaatigisaannik qaarsillartittarlugit.“ (Tussiaat 145:16) Ukiut ingerlanerini kissaatigisavut allanngortarput. Meeraagallaratta kissaatigisavut ullumikkut kissaatiginngilavut. Inuunermut isiginnittaaserput nalaatatsinnit neriuutigisatsinnillu sunnerneqartarpoq. Silarsuassamili nutaami Jehovap kissaatigisatsinnik qaarsillartikkumaaraatigut qularnanngivippoq, piumasaanut naapertuuttumik qanorluunniit kissaateqaraluarutta.

22. Sooq Jehovamik unnersiutiginninnissamut pissutissaqarpugut?

²² Aalajaattuarnissarput maannakkut uagutsinnut pingaarnerpaavoq. „Pilittaasunit piumasarineqartarpoq ilumoortuussasut.“ (1 Korinthimiut 4:2) Guutip naalagaaffia pillugu nutaarsiassamut nuannersumut pilittaavugut. Inuunerup aqqutaaniittuarnissamut iluaqutigisatta ilaat tassaavoq naapitatsinnut tamanut nutaarsiassamik nuannersumik aallussilluarluta oqaluussissutiginninnerput. „Piffissaq nalaatsornikkullu pisut“ tamatta sunnerneqaatigisarivut puiunngisaannaruk. (Oqaluussisartup oqaasii 9:11, NV) Makititaanissamik neriuut nuanningaartoq upperiuarutsigu isumakuluutinik inuunerup nalorninartuinik pissuteqartunik pisariaqanngitsumik isumakuluuteqarpallaarunnaarnissatsinnut  iluaqutigissavarput. Aamma Kristusip ukiuni tusindini naalakkersuinerata aallartinnginnerani toqussagaluaruit, makititsisoqarumaarneranik qularutiginninnginnerit tuppallersaatigingaassavat. Jehovap piffissarititaa nalliuppat Jobip Pinngortitsisumut oqaasii uku uteqqissinnaassavatit: „Torlorfigiumaarparma, uangalu akiumaarpakkit.“ Jehova, eqqaamasaminik tamanik inuulersitseqqinnissaminut qilanaartoq, unnersiutigineqarli! — Jobi 14:15, NV. (wE 5/1 05)

[Quppernerup ataani ilanngussat]

Eqqaamavigit?

• Kristusip ukiuni tusindini naalakkersuinerani suna tunngavigalugu inuit eqqartuunneqassappat?

• Sooq inuit ilaat „inuunissamut“ allallu „eqqartuunneqarnissamut“ makititaassappat?

• Makititaanissamik neriuut maanna qanoq tuppallersaatigisinnaavarput?

• Makititaanissaq pillugu apeqqutit akineqanngitsut naammagiinnaarnissaat eqqarsaatigalugu Tussiaat 145:16-imi oqaatsit qanoq iluaqutigisinnaavavut?

[Atuaqqissaarnermi apeqqutit]