’Naalakkamut kiffaasoq atukkaminik ajortunik naammaginnittuusariaqarpoq’

„Naalakkamut kiffaasoq saqitsaassisussaanngilaq. Taanna tamanut inussiarnersuussaaq, . . . naammaginnillunilu atukkamini ajortumi.“ — 2 TIMOTHEUSI 2:24.

1. Sooq oqaluussigaangatta ilaannikkut inuit inussiarniitsut uagutsinnillu oqalorujuussisut naapittarpavut?

INUIT ilinnik pingaartitannilluunniit iluarinninngitsut naapikkaangakkit qanoq pisarpit? Ullunik kingullernik allaatiginninnermini apustili Paulusip siulittuutigaa inuit ’mitalliisuujumaartut, . . . mamarliisuujumaartut, naammatsiuitsuujumaartut [imminut naalakkersinnaanngitsuujumaartut, NV], qiningasuujujumaartullu’. (2 Timotheusi 3:1-5, 12) Oqaluussinermi pisuniluunniit allani inunnik taamaattunik naapitaqarsinnaavutit.

2. Uagutsinnik inussiarniiffiginnittunut oqalorujuussisunullu silatuumik pissusilersornissatsinnut allassimaffiit suut iluaqutigisinnaavavut?

² Inuit ilaat taamatut pissusilersortaraluartut, imaattariaqanngilaq eqqortunik soqutigisaqanngivissuusut. Inuit ilaat atugarliorunik pakatsisimagunilluunniit qanillisaminnik tamanik saassutarinnissinnaapput. (Oqaluussisartup oqaasii 7:7) Inuppassuit taamatut pissusilersortarput suliffimminni najugaqarfimminnilu taamatut oqalunneq nalinginnaammat. Soorunami uagut kristumiutut taamatut oqaloriaaseqarnissarput akuerineqarsinnaanngilaq, qulaanili eqqaaneqartut iluaqutigalugit paasisinnaavarput sooq inuit ilaat taamaattarnersut. Allanit inussiarniiffigineqaraangatta imaluunniit oqalorujuunneqaraangatta qanoq qisuariartarpugut? Ussatit 19:11-mi ima allassimavoq: „Inuk silatussusiata kamajaatsunngortittarpaa.“ Aamma Romamiut 12:17, 18-imi ima siunnersorneqarpugut: „Ajortoq akileqinasiuk ajortoqataanik. . . . Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit.“

3. Eqqissinermik nuannarinninneq tusarliussamut oqaluussissutigisatsinnut qanoq attuumassuteqarpa?

 ³ Eqqissinermik nuannarinnittuugutta tamanna allanit takuneqarsinnaallunilu malugineqarsinnaassaaq. Oqaatsitsigut iliuutsitsigullu malugineqarsinnaassaaq, immaqalu aamma kiinnatta isikkuatigut takuneqarsinnaassalluni nipitsigullu tusaaneqarsinnaassalluni. (Ussatit 17:27) Jiisusip apustilini oqaluussiartortikkamigit ima siunnersorpai: „Illumut iseraangassi eqqisseqqusisaritsi. Illup inui tamatumunnga naleqquppata eqqisseqqusissutissi tikissavai, naleqqutinngippatali eqqisseqqusissutissi uterfigissavaasi.“ (Matthæusi 10:12, 13) Tusarliussarput nutaarsiassaavoq nuannersoq. Biibilimi taaneqarpoq „eqqissinerup iivangkiiliuanik“, „Guutip saammaanneranik iivangkiiliumik“ aammalu „Naalagaaffimmik iivangkiiliu“-mik (imaluunniit Naalagaaffimmik nutaarsiassamik nuannersumik). (Efesosimiut 6:15; Apustilit Suliaat 20:24; Matthæusi 24:14) Allat upperisaat isornartorsiorniarlugu oqallinniarlutaluunniit pulaarneq ajorpugut, nutaarsiassarli nuannersoq Guutip oqaasianeersoq oqaluussissutiginiarlugu pulaartarpugut.

4. Suna pillugu aggernersugut tusarnaguluunniit pulaarneqartoq ima oqarpat: „Soqutiginninngilanga“, qanoq oqartoqarsinnaava?

⁴ Suna pillugu aggernersugut tusarnaguluunniit pulaarneqartoq ingerlaannaq immaqa ima oqassaaq: „Soqutiginninngilanga.“ Amerlanertigut ima oqartoqarsinnaavoq: „Neriukkaluarama allassimaffik Biibilimeersoq una naatsunnguaq ilinnut atuffassissutigisinnaassallugu.“ Immaqa pulaarneqartup tamanna ajorissanngilaa. Imaluunniit ima oqartoqarsinnaavoq: „Neriukkaluarama ullut naapertuilluanngitsoqarunnaarfiusussat inuillu tamarmik eqqisseqatigiillutik inuulerfissaat pillugit oqaluttuussinnaassallutit.“ Pulaarneqartoq paasisaqarnerorusuppasinngippat ima oqartoqarsinnaavoq: „Immaqa maannakkorpiaq piffissaalluanngeruttortoq.“ Pulaarneqartoq inussiarniitsumik akigaluarpalluunniit isumaqassaagut taanna ’tamatumunnga naleqqutinngitsoq’? Pulaarneqartoq qanorluunniit qisuariaraluarpat oqaaqqissaarut Biibilimeersoq una eqqaamasariaqarparput: „Naalakkamut kiffaasoq . . . tamanut inussianersuussaaq, . . . naammaginnillunilu atukkamini ajortumi.“ — 2 Timotheusi 2:24.

Sorraatsoq, eqqunngitsumilli paasitinneqarsimasoq

5, 6. Saulusip Jiisusip ajoqersugai qanoq pivai, sunalu pillugu taamaaliorpa?

⁵ Ukiuni hundredelinni siullerni angutip Saulusimik atillip ataqqinninngitsumik oqaluttarnini,  allaallu nakuuserniartarnini, ilisimaneqaatigaa. Biibilimi allassimavoq taassuma ’Naalakkap ajoqersugai sioorasaarai toqukkumallugit’. (Apustilit Suliaat 9:1, 2) Kingusinnerusukkut nammineq nassuerutigaa ’mitaatiginnittuusimanini qinuginnittuusimaninilu angutaasersorsuusimaninilu’. (1 Timotheusi 1:13) Naak eqqarlimi ilaat immaqa kristumiunngoreersimagaluartut, Kristusip ajoqersugai ’ima atsigisumik kamaappai illoqarfiit nunani allaniittut tikivillugit malersortarlugit’. (Apustilit Suliaat 23:16; 26:11; Romamiut 16:7, 11, 1900/1961) Saulusi taamatut pissuseqartillugu ajoqersukkat taassuminnga kikkut tamarmik tutsaanni oqalliseqateqarniarsimanerannik takussutissaqanngilaq.

⁶ Sooq Saulusi taamatut pissuseqarpa? Ukiorpassuit tamatuma kingorna ima allappoq: ’Uppinngissutsinni sianiginagu taamaaliorpunga.’ (1 Timotheusi 1:13) Farisiiariuvoq, ’siuaasat inatsisaannik peqqissaartumik ilinniartinneqarsimasoq’. (Apustilit Suliaat 22:3) Ilinniartitsisua Gamalieli assuarlerumatuujusimannginnguatsiarpoq, palasiuneq Kajfasi, Saulusip ilisarisimalluagaa, ingasaassiniartuusoq. Taanna perlulioqatigiinniat, Jiisusimik toqutaatitsisut, siuttuisa ilagaat. (Matthæusi 26:3, 4, 63-66; Apustilit Suliaat 5:34-39) Kingusinnerusukkut taassuma Jiisusip ajoqersugai iperartortippai Jiisusillu aqqa tunngavigalugu oqaluussiunnaaqqullugit. Kajfasi killisiuisoqatigiinni siuttuuvoq killisiuisoqatigiit misigissutsiminnit aqunneqarlutik eqqartuussimmata Stefanusip aallarussaaneranik ujaqqanillu milloorneqarluni toqutaaneranik kingunilimmik. (Apustilit Suliaat 5:27, 28, 40; 7:1-60) Saulusi ujaqqanik milluuilluni toqutsinermut tamatumunnga takunnittuuvoq, Kajfasillu taanna Jiisusip ajoqersugai unitsinniarlugit ilungersuutiminik ingerlatsiinnarnissaanut Damaskusimilu taakkuninnga parnaarussinissaanut piginnaatippaa. (Apustilit Suliaat 8:1; 9:1, 2) Taamaattumik Saulusi isumaqarpoq iliuutsini Guutimik ilungersuussinermut ersiutaasut, ilumoortorli unaavoq upperisamik ilumoortumik peqannginnera. (Apustilit Suliaat 22:3-5) Paasinngilaa Jiisusi Missiarsiviusoq. Damaskusiliartillunili Jiisusip makititaasimasup oqaluffigimmani silattuaqivoq. — Apustilit Suliaat 9:3-6.

7. Saulusip Damaskusiliartilluni Jiisusi naapereermagu qanoq pisoqarpa?

⁷ Tamatuma kinguninngua ajoqersugaq Ananiasi Saulusimut oqaluussiartortinneqarpoq. Illit taamaalioqquneqartuuguit qanoq isumaqassagaluarpit? Ananiasi nangaagaluarpoq, Saulusili inussiarnisaarfigaa. Saulusip Damaskusiliartilluni Jiisusi tupinnartuliornikkut naapereerlugu allamik isiginnittaaseqalersimavoq. (Apustilit Suliaat 9:10-22) Apustili Paulusitut, ajoqersuiartortitatut aallussilluartutut, kingorna ilisimaneqalerpoq.

Qanilaartoq, aammali sapiitsoq

8. Jiisusip Ataatami inunnut ajortuliorsimasunut isiginnittaasia qanoq ilaarpaa?

⁸ Jiisusi Guutip naalagaaffianik oqaluussissutiginnittutut aallussilluartuuvoq. Qanilaarpoq, aammali sapiilluni. (Matthæusi 11:29) Taanna Ataatami qilammiusup, tassa guutiitsunik guutiitsut aqqutaannik ajortunik qimatsinissamut kajumissaarisup, anersaavatut ittumik anersaaqarpoq. (Esaja 55:6, 7) Ajortuliorsimasut pitsanngoriaraangata Jiisusip tamanna malugisarpaa kajumissinartumillu oqaluuttarlugit. (Lukasi 7:37-50; 19:2-10) Allat qallikkut pissusiisigut nalilernagit, taakku allamik isumataartinniarlugit Ataatami inussiarnernera, kamaginninnera kamajuinneralu ilaartarpai. (Romamiut 2:4) Jehovap kissaatigaa inuit tamalaat peqqissimissallutillu allamik isumataassallutillu annaanneqassasut. — 1 Timotheusi 2:3, 4, NV.

9. Jiisusimut tunngatillugu Esaja 42:1-4-p eqquunnera qanoq ilinniarfigisinnaavarput?

⁹ Jehovap Jiisusi Kristusimik qanoq isiginnikkumaarneranik siulittuut manna Matthæusip iivangkiiliumini issuarpaa: „Aajuna kiffara qinigara, asasara, nuannarisara. Taassumunnga pisippara anersaara, iluarnerlu inuiannut nalunaajaatigissavaa. Saqitsaassissananilu suaartassanngilaq, nipaa tusarsaassanngilaq aqqusinerni. Sullortooq naffalik napivissanngilaa, iperarlu qamilersoq qamivissanagu iluarneq ajugaatereerserlugu; inuiaat aqqa neriuffigaat.“ (Matthæusi 12:17-21; Esaja 42:1-4) Siulittuummut tamatumunnga naapertuuttumik Jiisusi nipittuullugu oqalliseqataaneq ajorpoq. Tatineqaraluaraangamiluunniit sallusuissut inunnut eqqortuliorusuttunut kajuminnartunngorlugu oqaluussissutigisarpaa. — Johannesi 7:32, 40, 45, 46.

10, 11. (a) Sooq Jiisusip farisiiarit ilaat nalunaajaaffigai massa farisiiarit imminut akerlilersuinerpaat ilagigaluaraat? (b) Ilaannikkut Jiisusip akerlilersortini qanoq akisarpai, qanorli iliunngila?

 ¹⁰ Jiisusip kiffartornermini farisiiarerpassuit oqaloqatigisarsimavai. Naak ilaasa oqaatsitigut napitinniartaraluaraanni, Jiisusi isumaqanngilaq tamarmik ajortumik pissutiginiagaqartut. Farisiiarip Siimuumik atillip qulakujuttup Jiisusi ilisarisimanerulerusussimagunarlugu imminnut neriartoqquaa. Jiisusi akuersivoq najuuttunullu nalunaajaalluni. (Lukasi 7:36-50) Ilaanni farisiiarip nuimasup Nikodemusimik atillip unnuakkut, taarnera iluatsillugu, Jiisusi ornippaa. Taanna aatsaat taarsimmat aggernera pillugu Jiisusip appiutinngilaa. Piffissarli atorpaa Guutip uppertut annaanneqarnissamut periarfissaqalerniassammata ernerminik nunarsuarmut aallartitsinermigut asannittuliorneranik taassumunnga nalunaajaanissamut. Jiisusip aamma inussiarnersumik Guutip aaqqissuussineranut naalannerup pingaaruteqarnera ersersippaa. (Johannesi 3:1-21) Nikodemusip kingusinnerusukkut Jiisusi illersorpaa, naalaffimmi nakkutilliisut taanna pillugu nalunaarusiaat farisiiarinit allanit suusupagineqarmat. — Johannesi 7:46-51.

¹¹ Akerlilersortimi napitinniaraanganni Jiisusip ilumoortuusaarnerat takusinnaasarpaa. Asuliinnaq oqalliseqatigisanngilai. Naleqqussorigaangamiulli najoqqutassiamik, assersuusiamik imaluunniit allassimaffimmik eqqaasaqarluni naatsumik sunniuteqarluartumilli akisarpai. (Matthæusi 12:38-42; 15:1-9; 16:1-4) Ilaatigulli paasinarsigaangat akigaluaruni asuliinnaassasoq Jiisusi akinngilluinnartarpoq. — Markusi 15:2-5; Lukasi 22:67-70.

12. Jiisusi inuit imminut suaartaraluartut ilaannik qanoq ikiuisarpa?

¹² Ilaanni inuit ilaasa anersaanit minguttuunit sunnerneqarlutik Jiisusi suaartarpaat. Taamatut pisoqaraangat, Jiisusi imminut noqittarpoq anersaarlu oqalliseqatigiumanagu; piginnaaninili Guutimeersoq atorlugu anersaapiluk anisittarpaa. (Markusi 1:23-28; 5:2-8, 15) Oqaluussiartortilluta inuit ilaasa kamallutik suaartalerpatigut, uaguttaaq imminut noqittariaqarlutalu inussiarnersumik periaaserissumillu pissusilersorniartariaqarpugut. — Kolossemiut 4:6.

Ilaqutariinni

13. Inuit ilaasa ilaquttamik ilaata Jehovap Nalunaajaasuinik Biibilimik atuaqqissaaqateqartalernera sooq ilaannikkut akerlerisarpaat?

¹³ Jiisusip ajoqersugaasa imminut noqittariaqartarnerat atukkanillu ajortunik naammaginnittariaqartarnerat immaqa ilaqutariit iluanni malugineqarnerusarpoq. Sallusuissummit Biibilimeersumit uummatimigut killinneqangaartup ilaquttami immisulli misigilernissaat kissaatigisarpaa. Jiisusilli oqarneratut ilaquttat sallusuissummut akeqqersimaarsinnaapput. (Matthæusi 10:32-37; Johannesi 15:20, 21) Tamatumunnga pissutaasut arlaliupput. Assersuutigalugu Biibilimi ilinniarparput unneqqarissuussasugut akisussaassuseqassasugut ataqqinnittuussasugullu. Biibilimili aamma ilinniarparput pingaarnerpaamik Guutimut pisussaaffeqarluta. (Oqaluussisartup oqaasii 12:1, 13; Apustilit Suliaat 5:29) Uagut pingaarnerpaamik Guutimut ilumoorfiginnikkumagatta ilaqutatta ilaat ilaqutariinni siornatigornit sunniuteqannginnerulersoraluni ajuallassinnaavoq. Taamaattoqartillugu Jiisusip maligassiaanik malinninnissarput imminullu noqinnissarput pingaaruteqartupilussuuvoq. — 1 Petrusi 2:21-23; 3:1, 2.

14-16.  Ilaquttaminnik akerlilersuisuusimasut ilaasa isummaminnik allannguinerminnut suut pissutigisarsimavaat?

¹⁴ Jehovamut maannakkut kiffartortorpassuit  Biibilimik atuaqqissaartaleqqaaramik ilikkakkatik malillugit allannguinerat aappaasumit ilaquttaasumilluunniit allamit akerlerineqartorujussuusimavoq. Ilaquttaasut immaqa Jehovap Nalunaajaasui pillugit ajortunik tusagaqarsimapput isumakuluutigalugulu ilaquttamik ajortumik sunnerneqarnissaat. Kingornali isiginnittaasertik allanngortissimavaat. Sooq? Uppertup maligassiuilluarnera tamatumunnga pissutaagajuppoq. Taanna Biibilimi ilitsersuussutigineqartunik maleruaajuaraangat — kristumiut ataatsimiinnerinut orniguttuarlunilu oqaluusseqataajuaraangat, tamakkulu ilutigalugit angerlarsimaffimmi pisussaaffimminik isumaginnikkaangat — oqaatsikkullu akerlilersorneqarneq naammagalugu atoraangagu, pissutsit pitsaaneruleriartortarput. — 1 Petrusi 2:12.

¹⁵ Akerlilersuisut ilaat makitanertik paqumisunnertillu pissutigalugit Biibili tunngavigalugu nassuiaatinik sunilluunniit tusarumanngivittarput. Assersuutigalugu angut USA-mi nunaminik asannilluartuunerarlunilu pingaartitsingaartuunerartoq taamaassimavoq. Ilaanni nuliani ataatsimeersuaqataatillugu atisani tamaasa poortorpai nuullunilu. Ullu alla aallaat tigullugu anivoq imminorniarnerarluni. Sianiitsulioraangami nuliami upperisaa tamatigut pisuutittarpaa. Nuliatali Biibilimi siunnersuutigineqartut aalajaalluni maleruartarpai. Nuliami Jehovamut nalunaajaasunngorneranit ukiut 20-t qaangiuttut aamma nammineq nalunaajaasunngorpoq! Albaniami arnap kamaatigeqaa panimmi Jehovap Nalunaajaasuinit Biibilimik atuaqqissaaqatigineqartarnera kingusinnerusukkullu kuisinnera. Anaanaasoq aqqaneq-marloriarluni panimmi Biibiliutaanik aserorterisarsimavoq. Ullulli ilaanni Biibili nutaaq panimmi nerriviup qaanut ilisimasaa tigugamiuk Matthæusi 10:36 quppertoorpaa, paasillugulu tassani allassimasoq imminut tunngasuusoq. Taava panini Jehovap Nalunaajaasui allat ilagalugit Italiamut ataatsimeersuariarnialermat anaanaasup umiarsuarmut qanivaa, panimmimi inuttut ingerlalluarnissaa soqutigisarigamiuk. Malugigamiuk allat inussiarnernerat, takugamiuk qungujulaarnerat imminnullu eqitaartarnerat aamma tusaagamiuk nuannaarlutik illalaartarnerat allamik isumaqaleriartuaalerpoq. Tamatuma kingunitsianngua Biibilimik atuaqqissaaqatigineqarnissaminut akuersivoq. Ullumikkut allat immisut aallaqqaammut akeqqersimaarsimagaluartut ikiortarpai.

¹⁶ Pisimasumi allami angut naalagaaffilersaarfiliarpoq nuliani naammattooriarniarlugu. Nuliani qanillimmat savimmik qunusaarpaa narrutsassimaarlunilu sorpassuarnik unnerluutigalugu. Eqqissisimalluni uini ima oqarfigaa: „Naalagaaffilersaarfimmut iseriarlutit nammineq takuniaruk susoqarnersoq.“ Uiusoq taamaaliorpoq, piffissallu ingerlanerani nammineq Jehovamut nalunaajaasunngorpoq kingusinnerusukkullu ilagiinni utoqqaanertanngorluni.

17. Kristumiut angerlarsimaffianni pissutsit najummassimanarsippata siunnersuutit Biibilimeersut suut maleruarnissaat iluaqutaassava?

¹⁷ Ilaqutariit tamarmik kristumiuugaluartut, naammalluinnanngitsuuneq pissutigalugu ilaannikkut pissutsit najummassimanarsinnaasarput sakkortuumillu oqaluttoqarsinnaasarluni. Itsaq kristumiut Efesosimiittut ima oqaaqqissaarneqarput: „Narrutsatsitsinerit, puffajanerit, kamannerit, nipiliornerit mitalliinerillu, tassami ajorsutsit suulluunniit, eqqaasassanngilasiluunniit.“ (Efesosimiut 4:31) Pissutsit taamaattut pilertarnerannut pissutaasinnaapput kristumiut pissutsit avatanngiiserisaat, namminneq naammalluinnanngissusiat ilaannikkullu siornatigut inooriaaserisimasaata sunniuteqarnera. Suna iluaqutigalugu allannguisinnaappat? ’Isumamikkut  anersaamikkullu nutaanngortittariaqarput.’ (Efesosimiut 4:23) Qanoq ilillutik? Guutip oqaasianik atuartariaqarput imminullu tamatuma qanoq sunniuteqartariaqarnera eqqarsaatigeqqissaartariaqarlugu; ataatsimiinnerni uppeqatitik ilagisariaqarpaat, aamma Guutimut qamannga pisumik qinusariaqarput; taava Guutip anersaavata inerititaa inuuneranni erseqqinnerulissaaq. Ilinniassavaat ’ajunngitsuliorfigeqatigiinnissartik, nallittuinissartik isumakkeerfigeqatigiinnissartillu soorlu Guutip Kristusimi isumakkeerfigigaatik’. (Efesosimiut 4:32) Allat qanorluunniit ilioraluarpata, imminut noqittariaqarlutalu inussiarnersuusariaqarlutalu misiginneqataasariaqarlutalu isumakkeerfiginnittuusariaqarpugut. ’Ajortoq akilissanngilarput ajortoqataanik’. (Romamiut 12:17, 18) Ilumoortumik asannittuliorluni Guutimik ilaarsinissaq tamatigut eqqortuliornerussaaq. — 1 Johannesi 4:8.

Kristumiunut tamanut siunnersuut

18. Sooq Timotheusimut allakkat aappaat 2:24-mi siunnersuut itsaq Efesosimi utoqqaanertap atorfissaqartippaa, siunnersuullu taanna kristumiunut tamanut qanoq iluaqutaasinnaava?

¹⁸ ’Atukkanik ajortunik naammaginninnissamik’ siunnersuut kristumiunut tamanut atuuppoq. (2 Timotheusi 2:24) Siunnersuulli taanna siullermik Timotheusimut, Efesosimi ilagiinni utoqqaanertatut kiffartornermini pisariaqartitsisumut, siunnersuutigineqarpoq. Ilagiinniittut ilaat isummaminnik ammasumik saqqummiussisarput aammalu ajoqersuutinik eqqunngitsunik saqqummiussisarlutik. Mosesip Inatsisaasa siunertaat paasilluarsimannginnamikku, uppernerup, asanninnerup ilerasuuteqannginnerullu pingaaruteqarnerat paasinngilaat. Pingaarniartuugamik akerleriissuteqartarput oqaatsillu pillugit oqallittarlutik Guutimut tunniusimanerup pingaaruteqarnera Kristusillu ajoqersuutaata suunera paasinnginnamikkit. Pissutsit tamakku aaqqinniarlugit Timotheusip aalajangersimalluinnarluni, qatanngutiminilli saamasumik pinniitigaluni, sallusuissut Biibilimeersoq oqaluussissutigisariaqarpaa. Soorlu ullumikkut utoqqaanertat nalunngikkaat, taassuma nalunngilaa ’savaatit’ piginagit allanullu kristumiut asaqatigiinnerannut ataasiussuseqarnerannullu siuarsaataasumik pissusilersortussaalluni. — Efesosimiut 4:1-3; 1 Timotheusi 1:3-11; 5:1, 2; 6:3-5.

19. Qanilaarnermik noqqaassutiginninneq sooq tamatsinnut pingaaruteqarpa?

¹⁹ Guutip innuttani kajumissaarpai ’maniguunneq noqqaassutigeqqullugu’. (Sefania 2:3) Hebræerit qanilaarnermut oqaasiat, uani ’maniguunnermik’ nutserneqartoq, ima nassuiarneqarpoq: Pissuseq taanna tassaavoq isiginnittaaseq inummik, paamitsannani akiniaananilu, atukkanik ajortunik naammaginnissinnaalersitsisoq. Qanortoq Jehova ilumoorluta qinnuigisartigu ikioqqulluta atukkanik ajortunik naammaginnissinnaaniassagatta taassumunngalu eqqortumik sinniisuusinnaaniassagatta, artornartunik atugaqaluaruttaluunniit. (wE 5/15 05)

Suna ilikkarpiuk?

• Inummik sorraatsumik naapitaqaraanni allassimaffiit suut iluaqutaasinnaappat?

• Sooq Saulusi sorraatsuusimava?

• Inunnik tamalaanik eqqortumik periaaseqarfiginninnissamut Jiisusip maligassiaa qanoq iluaqutigisinnaavarput?

• Ilaqutariittut oqaloqatigiikkaangatta imminut noqissinnaaneq qanoq iluaqutaasinnaava?

[Atuaqqissaarnermi apeqqutit]

[Qupp. 28-mi assiliartaq]

Naak Saulusip kristumiunut pissusilersoriaatsini tusaamasaanerluutigigaluaraa, Ananiasip inussiarnisaarfigaa

[Qupp. 31-mi assiliartaq]

Kristumiu aalajaalluni pisussaaffimminik isumaginnippat, ilaqutaasut akerlilersuivallaarunnaarsinnaapput

[Qupp. 32-mi assiliartaq]

Kristumiut asanninneq ataasiussuseqarnerlu siuarsarniartarpaat