Ilissi angajoqqaajususi, meeqqassi pisariaqartitaat isumagisigit

„Eqqarliminik, pingaartumik inoqutiminik, isumaginninngitsoq uppernerminik tunussisuuvoq.“ — 1 TIMOTHEUSI 5:8.

1, 2. (a) Ilaqutariit tamarmiullutik kristumiut ataatsimiinnerini najuuttut takullugit sooq qiimmaallannarpa? (b) Ilaqutariit piffissaq eqqorlugu ataatsimiigiarniarlutik unamminiarnartitaasa ilaannik eqqaasaqarit.

ATAATSIMIINNERUP aallartinnginnerani ilagiinni kristumiuniittut qimerlooraangakkit immaqa malugisassavatit meeqqat ipiillutillu atisarissaartut angajoqqaamik saniannut ingittut. Ilaqutariit taamaattut asanninnerat — Jehovamut asanninnerat asaqatigiinnerallu — takullugu nuanningaarami, ilaa? Puiorneqariaannaavorli ilaqutariit piffissaq eqqorlugu ataatsimiigiarnissaat qanoq ilungersunartigisoq.

² Amerlanertigut angajoqqaajusut ulloq naallugu ulapittarput, unnunnilu ataatsimiiffiusuni ilaqutariit suli ulapinnerusarput. Nerisassiortoqartariaqarpoq, illumi suliassat suliarineqartariaqarput ilinniagassallu naammassineqartariaqarlutik. Angajoqqaat pisussaaffeqarnerpaapput, tassami tamarmik nerinissaat, ipiitsuullutillu torersuunissaat piffissarlu eqqorlugu piareernissaat isumagisussaagamikku. Aammami meeraqaraanni piffissaanngitsukkut ilimaginngisanik pisoqarsinnaavoq. Angajulliup pinnguartilluni qarlini alittoorsinnaavai. Nukarliup nerisani kuisoorsinnaavai meeqqallu oqqatilersinnaallutik. (Ussatit 22:15) Tamakku qanoq kinguneqarsinnaappat? Angajoqqaat pilersaarusioqqissaarnerigaluat maangaannarsinnaavoq. Taamaakkaluartorli ilaqutariit tamatigungajak siusinaarlutik naalagaaffilersaarfimmut ataatsimiigiartarput. Qiimmaallannangaarami ilaqutariit, meeqqat peroriartorneranni namminnerlu Jehovamut kiffartulerneranni, sapaatip-akunneri tamaasa ukiullu tamaasa naalagaaffilersaarfimmi takusarlugit.

3. Qanoq nalunngilarput Jehova ilaqutariinnik pingaartitsingaartoq?

³ Angajoqqaatut suliarsi ilaannikkut ajornakusoortaraluartoq, immaqalu allaat qasunartaraluartoq, qularutigissanngilarsi Jehovap iliuuserisasi pingaartingaarai. Jehova ilaqutariinnik aaqqissuussaanermik pilersitsisuuvoq, taamaattumik oqaasiani allassimavoq ’ilaqutariit tamarmik taanna aterminnik qutsavigisassarigaat’ — tassa piunerminnik qutsavigisassarigaat. (Efesosimiut 3:14, 15, NV) Ilissi angajoqqaajususi pisussaaffissinnik sapinngisassinnik naammassinninniaraangassi qilammi nunamilu kisimi oqartussaalluni Naalagaasoq ataqqisarparsi. (1 Korinthimiut 10:31) Qularutissaanngilaq tamatuma immikkut pisinnaatitaafferujussuunera. Jehovap angajoqqaanut suliassiissutaa misissorluariartigu. Allaaserisami matumani ilaquttanik isumaginninnerup qanoq paasisariaqarnera aamma Guutip angajoqqaat meeqqaminnik isumaginninnissaannik naatsoorsuutiginniffigisai pingasut sammissavavut.

Timikkut pisariaqartitanik isumaginnittuusariaqarput

4. Meeqqat pisariaqartitaat isumagineqarniassammata ilaqutariinnut tunngatillugu Jehova qanoq aaqqissuussisimava?

⁴ Apustili Paulusi ima allappoq: „Eqqarliminik, pingaartumik inoqutiminik, isumaginninngitsoq uppernerminik tunussisuuvoq uppinngitsumillu ajornerulluni.“ (1 Timotheusi 5:8) Allassimaffimmi matumani Paulusip kina eqqarsaatigaa? Ilaqutariinni ittuusoq, amerlanertigut ataataasoq. Guutip aamma arnaq uiminut ikiortaasutut pingaarutilimmik inissisimaffeqartippaa. (1 Mosesi 2:18) Biibilip nalaani arnat uitik ilaquttamik pisariaqartitaannik isumaginninniarneranni ikiorajuttarpaat. (Ussatit  31:13, 14, 16) Ullumikkut ilaqutariit kisimiittunik pilersuisullit nalinginnaaleraluttuinnarput. * Angajoqqaarpassuit kristumiut kisimiittut inoqutitik nersornartumik isumaginiartarpaat. Kisianni soorunami angajoqqaat tamarmiunerat ataataasullu siuttuunera ilaqutariinnut pitsaanerpaavoq.

5, 6. (a) Ilaquttanik timikkut isumaginninniarnermi unamminiarnartut ilaannik eqqaasaqarit. (b) Suliffimmut isiginnittaaseq qanoq ittoq pilersuisuusut kristumiut pinertusaarnissaminnut iluaqutigissavaat?

⁵ Timotheusimut allakkat siulliit 5:8-mi Paulusip inoqutinik ’isumaginninneq’ eqqartoramiuk suna pivaa? Versit ataqatigiinnerini erserpoq ilaqutariit timikkut pisariaqartitaat pigai. Ullumikkut ilaqutariinni ittuusup pisariaqartitanik tamakkuninnga isumaginninniarnera sorpassuit pissutigalugit ajornakusuulersinnaavoq. Silarsuarmi tamarmi aningaasatigut ajornartorsiuteqartarneq nalinginnaavoq, aamma soraarsitaasarneq, suliffissaaruttarneq inuuniarnerullu akitsoraluttuinnarnera nalinginnaapput. Pilersuisup unamminiarnartut taamaattut anigornissaannut suut iluaqutigisinnaavai?

⁶ Pilersuisuusup Jehovamit suliakkerneqarsimanini eqqaamasariaqarpaa. Paulusip isumassarsisitaalluni oqaasiini erserpoq inuup peqqussummik tamatuminnga maleruaasinnaagaluarluni maleruaanngitsup, ’uppernerminik tunussisoq’ assigigaa. Kristumiu Guutimut attaveqarnerminik taamatut navianartorsiortitsiumanani sapinngisani tamaat iliuuseqassaaq. Taamaakkaluartorli ullumikkut silarsuatsinni inuppassuit ’asanniuitsuupput’. (2 Timotheusi 3:1, 3) Aap, ataataasorpassuit akisussaaffimminnik sumiginnaasarput ilaquttatillu isumakkiiginnartarlugit. Uiusut kristumiut inoqutiminnik isumaginninnermut taakkunatut misigittaatsumik soqutigisaqanngitsumillu isiginnittaaseqanngillat. Suleqatimik ilarpassui assiginagit pilersuisut kristumiut allaat suliaq nikagineqarnerpaasoq qutsissutut, pingaaruteqartutut Jehovamillu nuannaartitsissutitut isigisarpaat, suliaq tamanna pissutigalugu ilaquttaminnik isumaginnissinnaanngoramik.

7. Sooq angajoqqaat Jiisusip maligassiaa eqqarsaatigilluartariaqarpaat?

⁷ Ilaqutariinni ittuusut iluaqutigisinnaasaat alla tassaavoq Jiisusip maligassiaanik naammalluinnartumik eqqarsaatiginninneq. Eqqaamajuk Jiisusi Biibilimi siulittuutaasumik „Naassaanngitsumik Ataataq“-tut eqqaaneqarmat. (Esaja 9:5, 6) Jiisusi ’Adamitut kingullertut’ uppertunut ataataasutut ’inummut siullermut, tassa Adamimut’, tamakkiisumik taartaavoq. (1 Korinthimiut 15:45) Adami namminissarsiorlunilu imminuinnaq eqqarsaatigisoq assiginagu, Jiisusi ataataalluarnerpaavoq. Biibilimi taanna pillugu ima allassimasoqarpoq: „Matumuuna asanninneq ilisaraarput: Inuunini tunniuppaa uagut pilluta.“ (1 Johannesi 3:16) Aap, Jiisusip kajumilluni allat pillugit inuunini pilliutigaa. Ulluinnarnili allat pisariaqartitaat nammineq pisariaqartitaminit annikitsutiguttaaq pingaarnerutittarpai. Ilissi angajoqqaajususi imminut pilliutigeriaannaaneq taamaattoq ilaarussiuk, tamanna ilaqutariinnissinnut iluaqutaassaaq.

8, 9. (a) Timmissat piaqqaminnik namminissarsiunngitsumik isumaginninnerat angajoqqaat qanoq ilinniarfigisinnaavaat? (b) Angajoqqaarpassuit kristumiut qanoq imminut pilliutigeriaannaanermik ersersitsisarpat?

⁸ Angajoqqaat namminissarsiunngitsumik asanninneq pillugu Jiisusip Guutip innuttaanut uteriitsunut oqaasii ilinniarfigilluarsinnaavaat: „Qasseriarlungamitaava qitornatit katersorniartaraluarpakka, soorlu kukkukuup piaqqani sulummi ataannut katersortarai.“ (Matthæusi 23:37) Tassani Jiisusip takorlooruminartumik oqaluttuaraa kukkukuup arnavissap piaqqani sulummi ataannut pisillugit sernissorai. Angajoqqaat timmissat sernissuiumatussusiat ilumut ilinniarfigilluarsinnaavaat. Timmissap piaqqani ajoquserneqannginniassammata nangaanani imminut navianartorsiortissaaq. Timmissalli ulluinnarni piaqqatik pillugit qanoq iliortarnersut aamma maluginiarnarpoq. Nerisassarsiorniarlutik ulluminnit ulluminnullu timmisaqattaartuarput. Qasunermit nukillaarluinnangajakkaluaraangamilluunniit piaqqatik perlilersut, nerisatik iiginnariarlugit nerlersoqqujuaannartut, nerlersortuartarpaat. Jehovap pinngortitaasa ilarpassui ’sianiginagu silatuujupput’, tamannalu ilaatigut piaqqaminnik isumaginneriaasiisigut ersertarpoq. — Ussatit 30:24, NV.

⁹ Ilissi angajoqqaajususi kristumiut imminut pilliutigeriaannaanermik nersornartumik tamatumunnga assingusumik ersersitsivusi.  Qularnanngilaq meeqqassi ajoquserneqarnissaanninngarnit nammineq naalliukkusunnerususi. Aammattaaq inoqutisi isumaginiarlugit ullut tamaasa pilliuteqartarpusi. Ilarpassuasi ullaakkut makiaartarput qasunartumik assigiiaaginnarmilluunniit suliaqariartorniarlutik. Suleruloortarpusi peqqinnartunik nerisassaqartitsisinnaajumallusi. Meeqqassi ipiitsunik atisaqartinnissaat, pitsaasumik angerlarsimaffeqartinnissaat aamma naammattumik ilinniartinneqarnissaat ilungersuutigaarsi. Taamaaliortuarpusilu ullut tamaasa ukiullu tamaasa. Qularnanngivippoq imminut pilliutigeriaannaaneq pinertusaarnerlu taamaattoq Jehovap nuannaarutigigaa. (Hebræerit 13:16) Aammali inoqutinik isumaginninneq eqqarsaatigalugu allanik suli pingaaruteqarnerusoqarnera eqqaamasariaqarparsi.

Anersaakkut pisariaqartitanik isumaginnittuusariaqarput

10, 11. Inuit pisariaqartitaat pingaarnerpaaq suua, angajoqqaallu meeqqamik pisariaqartitaat tamanna isumaginiarlugu qanoq ilioqqaartariaqarpat?

¹⁰ Meeqqat timikkut pisariaqartitaannik isumaginninnermit alla suli pingaaruteqarnerusoq tassaavoq anersaakkut pisariaqartitaannik isumaginninneq. Jiisusi ima oqarpoq: „Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.“ (Matthæusi 4:4; 5:3) Ilissi angajoqqaajususi meeqqassi anersaakkut pisariaqartitaat qanoq isumagisinnaavisiuk?

¹¹ Tamatumunnga atatillugu allassimaffik issuarneqakulanerusoq tassaavoq Mosesimik allakkat tallimaat 6:5-7. Biibili qupperiarlugu versit taakku atuariartigik. Malugiuk angajoqqaat namminneq anersaakkut ittunik pingaartitsinertik nakussatseqqaartariaqaraat, Jehovamut asanninnertik ineriartorteqqaartariaqaraat taassumalu oqaasii pigiliuteqqaartariaqaraat. Aap, Biibili peqqissaartumik atuaqqissaartariaqarparsi, Guutip oqaasia aalajangersimasumik atuartariaqarlugulu eqqarsaatigeqqissaartariaqarparsi Jehovap aqqutigeqqusai, najoqqutassiai inatsisaalu paasilluarlugillu nuannaringaalerniassagassigit. Taava uummatersi sallusuissutinik nuanningaartunik Biibilimeersunik, ilissinnik nuannaalersitsisunik, Jehovamik mianerinnilersitsisunik taassumunngalu asannilersitsisunik, ulikkaassaaq. Meeqqasi ajunngitsorpassuarnik puiuikkiussassaqartissinnaassavasi. — Lukasi 6:45.

12. Angajoqqaat meeqqaminnut sallusuissutinik Biibilimeersunik puiuikkiussisitsigaangamik Jiisusip maligassiaa qanoq ilaarsinnaavaat?

¹² Angajoqqaat anersaakkut nukittuut Mosesimik allakkat tallimaat 6:7-imi meeqqaminnut Jehovap oqaasiinik qaqugukkulluunniit ’nangeqqiiuarnissamik’ imaluunniit ’puiuikkiussisitsinissamik’ (NV) siunnersuut malissinnaavaat. ’Puiuikkiussisitsineq’ tassaavoq „eqqaasitseqattaarnikkut oqaaqqissaareqqattaarnikkullu ilinniartitsineq pigiliussisitsiniarnerlu“. Jehovap nalunngilaa tamatta — minnerunngitsumik meeqqat — ilinniarniarluta uteqqiineq pisariaqartikkipput. Taamaattumik Jiisusi ilinniartitsigaangami uteqqiisarpoq. Assersuutigalugu ajoqersukkani makitasuujoqqunagit unammillerumatuujoqqunagillu maniguuttuunissamik ilinniartikkamigit, assigiinngitsunik  uteqqeeriaaseqarpoq. Eqqarsaatissiinermigut, assersuusiornermigut allaallu suliamigut ilinniartitsisarpoq. (Matthæusi 18:1-4; 20:25-27; Johannesi 13:12-15) Jiisusilli naammagittarunnaanngisaannarnera maluginiarnarpoq. Aamma angajoqqaat meeqqatik sallusuissutinik tunngaviusunik ilinniartikkaangamikkit assigiinngitsunik ilinniartitseriaaseqartariaqarput, Jehovallu najoqqutassiaanik naammagittarlutik uteqqiisariaqarput meeqqat paasinninnissaata inuunerminnilu taakkuninnga maleruaanissaata tungaanut.

13, 14. Angajoqqaat meeqqaminnut sallusuissutinik Biibilimeersunik puiuikkiussisitsinissamut qanoq periarfissaqarpat, aamma suut iluaqutigisinnaavaat?

¹³ Ilaqutariittut atuaqqissaaqatigiinneq taamatut ilinniartitsinissamut periarfissatsialaavoq. Aap, ineriartornartumik nuannersumillu ilaqutariittut atuaqqissaaqatigiittuarneq ilaqutariit anersaakkut ittunik pingaartitsinerannut pingaaruteqartupilussuuvoq. Silarsuaq tamakkerlugu ilaqutariit kristumiut atuagassiat atuakkallu, Jehovap peqatigiissortaasa pilersittagaat, atorlugit atuaqqissaaqatigiinnerit taamaattut nuannaarutigisarpaat, atuaqqissaaqatigiinnertillu meeqqat pisariaqartitaannut naleqqussartarpaat. Tamatumunnga atatillugu atuagaq Lyt til den store Lærer tunissutaavoq immikkut ittoq, taamatuttaaq atuagaq Unge spørger — Svar der duer. * Ilaqutariittulli atuaqqissaaqatigiinneq meeqqanik ilinniartitsinermut periarfissatuaanngilaq.

¹⁴ Soorlu Mosesimik allakkat tallimaat 6:7-imi ersersinneqartoq, ilissi angajoqqaajususi meeqqassi anersaakkut ittunik oqaloqatiginissaannut periarfissarpassuaqarpusi. Angalagaluarussi, illumi suliassat ikioqatigiillusi suliarigaluarussigit eqqissisimaaraluarussiluunniit meeqqassi anersaakkut pisariaqartitaannik isumaginninnissamut periarfissaqassaasi. Soorunami meeqqasi sallusuissutinik Biibilimeersunik ajoqersuinnavittariaqanngilasi. Ilaqutariittut oqaloqatigiittarnisi ineriartornartuutinniarsaralugillu anersaakkut ittuutinniarsarisigit. Assersuutigalugu atuagassiami Vågn op!-imi assigiinngitsorpassuarnik allaaserisaqarpoq. Allaaserisat taamaattut uumasorpassuit Jehovap pinngortitaasa, pinngortitarsuarmi sumiiffiit alianaatsut inuillu kulturiisa inooriaasiisalu assigiinngissusiisa oqaloqatigiissutiginissaannut periarfissiisinnaapput. Tamakkuninnga oqaloqatigiissuteqartarneq inuusuttut atuagassianik atuakkanillu inussiamit aalajaallunilu silatuumit pilersinneqartartunik atuarnerunissamut kajumississutigisinnaavaat. — Matthæusi 24:45-47.

15. Kristumiut oqaluussinerannik soqutiginartutut nalerisimaarnartutullu isiginnilersinniarlugit angajoqqaat meeqqatik qanoq ikiorsinnaavaat?

¹⁵ Meeqqassinnik ineriartornartumik oqaloqateqartarnersi anersaakkut pisariaqartitaasa ilaannik allanik isumaginninnissamut iluaqutigissavarsi. Meeqqat kristumiut upperisaminnik allanut oqaluttuarluartarnissaq ilinniartariaqarpaat. Soqutiginartunik Napasuliaq Alapernaarsuiffik-meersunik Vågn op!-imeersunilluunniit oqaloqatigiissuteqaraangassi, ilissi angajoqqaajususi sammineqartut  oqaluussinermut atassusersinnaanerlugit eqqumaffiginiarsinnaavarsi. Assersuutigalugu ima aperisinnaavusi: „Inuit amerlanerusut Jehova pillugu tamanna nalunngittuuppassuk qanoq nuannertigissagaluarpa, ilaa? Inuit amerlanerusut tamatuminnga soqutiginnilersinniarlugit qanoq iliorsinnaasorivisigut?“ Oqaloqatigiinnerit taamaattut pissutigalugit meeqqat inuusuttullu ilikkakkatik pillugit allanut oqaluttuarusunnerulersinnaapput. Taava meeqqat oqaluusseqatigigaangamisi takusinnaavaat inuit tamakku pillugit qanoq oqaloqatigineqarsinnaanersut. Aamma paasisinnaavaat oqaluusseqataaneq soqutiginarlunilu nuannersuusoq, aamma nalerisimaarnangaartoq. — Apustilit Suliaat 20:35.

16. Meeqqat angajoqqaamik qinnutaannik tusarnaartarnermikkut suut ilinniarsinnaavaat?

¹⁶ Angajoqqaat aamma Jehovamut qinugaangamik meeqqamik anersaakkut pisariaqartitaasa ilaannik isumaginnittarput. Jiisusip ajoqersukkani qinunermik ilinniartittarpai, assigiinngitsorpassuartigullu qinoqatigisarpai. (Lukasi 11:1-13) Eqqarsaatigeriaruk Jehovap nammineq erneranik qinoqateqarneq qanoq ilinniarfigitigisimassagaat! Meeqqassi aamma qinnutisi ilinniarfigingaarsinnaavaat. Assersuutigalugu ilinniarsinnaavaat Jehovap kissaatigigaa uummammiugisatsinnik aniatitsivigissagitsinni isumakuluutitsinnillu tamanik saaffigissagitsinni. Aap, qinnutisi pissutigalugit meeqqat sallusuissut anersaakkut ittoq pingaarutilik ilinniarsinnaavaat, tassa paasissavaat Ataataminnut qilammiusumut qanittumik attaveqalersinnaallutik. — 1 Petrusi 5:7.

Misigissutsikkut pisariaqartitanik isumaginnittuusariaqarput

17, 18. (a) Meeqqanik asannittuliorfiginninnerup pingaaruteqassusia Biibilimi qanoq erseqqissarneqarpa? (b) Ataataasut meeqqaminnut asanninnerminnik oqaatiginninnissaq eqqarsaatigalugu qanoq Jehova ilaartariaqarpaat?

¹⁷ Meeqqat soorunami aamma misigissutsikkut assut pisariaqartitsipput. Angajoqqaat tamatuminnga isumaginninnissap qanoq pingaaruteqartiginera Guutip oqaasianik atuartarnermikkut paasisarpaat. Assersuutigalugu arnat inuusunnerusut ’qitornaminnik asanninnissamut’ kajumissaarneqarput. Kajumissaarut tamanna anaanaasut inuusuttut ’silattortinneqarnerannut’, imaluunniit isumakkut peqqissuunerannut, tunngassuteqarpoq. (Titusi 2:4, 1900/1961) Meeqqamik asannittuliorfiginninneq silatusaarnerulluinnarlunilu eqqortuliornerulluinnarpoq. Taamaalilluni meeraq allanik asannissinnaanngussaaq tamannalu inuunini tamaat iluaqutigissallugu. Paarlattuanilli meeqqamik asannittuliorfiginninngitsoorneq naalliuutaangaartarpoq, tamannalu Jehovamik, naammalluinnanngitsuugaluartugut uagutsinnut killeqanngitsumik asannittuliorfiginningaartumik, ilaarsinnginnermut ersiutaassaaq. — Tussiaat 103:8-14.

¹⁸ Jehova allaat siulliulluni meeqqaminik nunamiusunik asannittuliorfiginnippoq. Soorlu Johannesip allagai siulliit 4:19-imi allassimasoq, ’taassuma asaqqaarpaatigut’. Ingammik ilissi ataataasusi siulliullusi iliuuseqarlusi meeqqassinnut asannittumik attaveqalerniarnissigut Jehovap maligassiaa ilaartariaqarparsi. Ataataasut meeqqatik nikallunnginniassammata taakkua narraatigisinnaasaannik iliortannginnissaminnik Biibilimi oqaaqqissaarneqarput. (Kolossemiut 3:21) Meeqqat angajoqqaamik arlaanit asaneqanngitsutut pingaartinneqanngitsutulluunniit misigisimanermit narraatiginerusinnaasaat isumatsassutiginerusinnaasaalluunniit arlaqanngillat. Ataataasut misigissutsiminnik ersersitsinissamut tunuarsimaartut Jehovap maligassiaa eqqaamasariaqarpaat. Jehova allaat qilammit oqaluppoq, ernerminik akuerinninnini asanninninilu oqaatiginiarlugu. (Matthæusi 3:17; 17:5) Jiisusimut tamanna qiimmaallannarsimassaqaaq! Aamma angajoqqaat unneqqarillutik ilumoorlutillu asanninnerminnik akuerinninnerminnillu oqaatiginnittarnerat meeqqat nakussatsissutigisarlugulu sapiillissutigisarpaat.

19. Ilitsersuineq sooq taama pingaaruteqartigaa, sumullu tunngatillugu angajoqqaat kristumiut oqimaaqatigiissaariniarsarisarpat?

¹⁹ Soorunami angajoqqaat asanninnerat oqaasiinnaasussaanngilaq. Asanninneq pingaarnerpaamik iliuutsikkut ersersinneqartussaavoq. Angajoqqaat meeqqaminnik timikkut anersaakkullu isumaginninnerat taakkununnga asanninnerannut ersiutaasinnaavoq, ingammik isumaginninneratigut paasinarsippat asanninneq kajumississutiginerpaagaat. Aammattaaq angajoqqaat ilitsersuinerat siunnersuinerallu meeqqaminnik asanninnerannut ersiutaapput pingaarutillit. Aap, Jehova pillugu allassimasoqarpoq ’asasani perorsartarai’.  (Hebræerit 12:6, 1900/1961) Angajoqqaalli meeqqaminnik perorsaanngitsoorpata, tamanna uumissuinermut ersiutaavoq. (Ussatit 13:24) Jehova oqimaaqatigiissaariuaannarpoq ’ingasaassaanngitsumillu’ perorsaatissiiuaannarluni. (Jeremia 46:28) Taamatut oqimaaqatigiissaarinissaq angajoqqaanut naammalluinnanngitsunut ajornaatsuujuaannanngilaq. Tamatumunngali tunngatillugu tamaviaarutigisasi imminut akilersinnaapput. Aalajangersimasumik asannittumillu perorsarneqarneq meeqqap pilluarluni siunertaqarluartumillu inuulernissaminut iluaqutigissavaa. (Ussatit 22:6) Angajoqqaat kristumiut tamarmik meeqqatik eqqarsaatigalugit tamanna kissaatigaat, ilaa?

20. Angajoqqaat qanoq meeqqaminnik ’inuunermik qinersinissamut’ pitsaanerpaamik periarfissiisinnaappat?

²⁰ Ilissi angajoqqaajususi Jehovap ilissinnut suliassiissutaa pingaarutilik suliarigussiuk — meeqqassi timikkut, anersaakkut misigissutsikkullu pisariaqartitaat isumagalugit — tamanna pilluaqqussuterpassuarnik kinguneqassaaq. Taamaalillusi meeqqasi ’inuunermik qinersinissamut’ ’inuuginnarnissamullu’ pitsaanerpaamik periarfissittarpasi. (5 Mosesi 30:19) Meeqqat peroriartornerminni Jehovamut kiffartorniarlutik inuunerullu aqqutaaniiginnarniarlutik aalajangertut, angajoqqaaminnik nuannaarutissiingaartarput. (Tussiaat 127:3-5) Nuannaarutiginninnerlu taamaattoq naassaanngitsumut nuannaarutaassaaq! Ullumikkut meeqqat inuusuttullu Jehovamik qanoq unnersiutiginnissinnaappat? Allaaserisami tulliuttumi tamanna sammineqassaaq.

[Quppernerup ataani ilanngussat]

Qanoq akissavit?

• Angajoqqaat qanoq iliorsinnaappat meeqqamik

• timikkut pisariaqartitaat isumaginiarlugit?

• anersaakkut pisariaqartitaat isumaginiarlugit?

• misigissutsikkut pisariaqartitaat isumaginiarlugit?

[Atuaqqissaarnermi apeqqutit]

[Qupp. 20-mi assiliartaq]

Angajoqqaat namminneq anersaakkut ittunik pingaartitsinertik nakussatseqqaartariaqarpaat

[Qupp. 21-mi assiliartaq]

Angajoqqaat meeqqaminnik Pinngortitsisoq pillugu ilinniartitsinissaminnut periarfissarpassuaqarput