Jehovap imminik neriuffiginnittut sernissortarpai

„Ilumoorfiginnillutit tunniusimanerit sallusuissutsillu uannik illersuiuartikkit.“ — TUSSIAAT 40:12, NV.

1. Kunngi Daavip Jehova sumik qinnuigaa, qinnutaalu taanna maanna qanoq naammassineqarallarpa?

ISRAELIKKUT kunngiata Daavip ’Jehova neriuffigaa iluunngarluni’ imalu oqarnissaminut killinneqarluni: „[Jehovap] peqiffigaanga ikioqqullunga nillianera tusarlugu.“ (Tussiaat 40:2) Nammineq arlaleriarluni takusarpaa Jehovap imminik asannittunik sernissuisarnera. Taamaattumik Daavip Jehovamit sernissorneqartuarnissani qinnutigisinnaasimavaa. (Tussiaat 40:12) Daavi angutinut arnanullu aalajaatsunut ’toqusunit makititaanissamik ajunnginnerusumik’ neriorsorneqarsimasunut ilaagami, maanna Guutimit eqqaamaneqarpoq siunissamilu akilerneqarumaarluni. (Hebræerit 11:32-35) Taamaalilluni siunissaa pitsaanerpaamik isumannaarneqarpoq. Aqqa ’mappersakkami’ Jehovap „[Jehovamik] mianerinnittut . . . eqqaamaneqaqqullugit“ allanneqartitaani allanneqarsimavoq. — Malaki 3:16.

2. Jehovamit sernissorneqarnerup illersorneqarnerullu qanoq isumaqarneranik paasinninnissamut Biibili qanoq iluaqutigaarput?

² Naak inuit aalajaatsut, Hebræerinut allakkani kapitali 11-mi eqqaaneqartut, Jiisusi Kristusip nunarsuarmukarnissaa sioqqullugu inuusimagaluarlutik, Jiisusip oqaasii uku naapertorlugit inuupput: „Inuunerminik asannittup inuunini annaassavaa, silarsuarmilu maani inuunerminik uumiginnittup inuunini pigiinnassavaa naassaanngitsumik.“ (Johannesi 12:25) Taamaattumik Jehovamit sernissorneqarnerput illersorneqarnerpullu isumaqartariaqanngilaq anniaateqarnatalu malersorneqassanngitsugut. Isumaqarporli anersaakkut ittumik sernissorneqartugut Guutimut attaveqarluartuarsinnaaniassagatta taassumanngalu akuerineqartuarsinnaaniassagatta.

3. Jiisusi Kristusip Jehovamit sernissorneqarsimaneranut sumik uppernarsaatissaqarpugut, tamannalu qanoq kinguneqarpa?

³ Jiisusi nammineq naakkittaatsumik malersorneqarlunilu nikanarsarneqarpoq, naggataatigullu imminut akeraasunit kanngunarsaataanerpaamik naalliunnarnerpaamillu toqutaalluni. Imaanngilarli Jehovap Missiarsimik sernissuinissaminik neriorsuutini unioqqutikkaa. (Esaja 42:1-6, 1900/1961) Nikanarsaataasumik toqunermi kingorna ullut pingajuanni Jiisusip makititaaneragut uppernarsarneqarpoq Jehovap Jiisusip ikioqqunera tusarsimagaa — soorluttaaq Daavip ikioqqunera tusarsimagaa. Qinnutaanut akissutitut Jehovap Jiisusi assuarnaattuarnissaanut nakussatsippaa. (Matthæusi 26:39) Jiisusi taamatut sernissorneqarluni qilammi toqujuitsunngortinneqarpoq, inuillu millionillit utertitsissummik upperinninnerminnik uppernarsaasimasut, naassaanngitsumik inuulernissaq maanna neriuutigilersimavaat.

4. Kristumiut tanitat aamma ’savat allat’ qanoq neriorsoqqissaarneqarpat?

 ⁴ Qularutigissanngilarput Daavip Jiisusillu nalaanni iliorsimanermisut aamma ullumikkut Jehova kiffaminik sernissuisinnaallunilu sernissuiumasoq. (Jaaku 1:17) Jiisusip qatanngutaasa tanitat suli nunamiittut ikittuinnaat Jehovap neriorsuutaa manna upperisinnaavaat: ’Kingornussassaq aserortussaanngitsoq, mingutsinneqartussaanngitsoq toquliortussaanngitsorlu qilanni paarineqartoq pisassarititaalluni ilissinnut Guutip pissaaneranit uppernikkut sernigineqartunut annannissamut ullussani kingullerni saqqummissalluni piareersimasoq.’ (1 Petrusi 1:4, 5) ’Savat allat’, nunarsuarmi inuunissamik neriuuteqartut, aamma Guuti taassumalu tussiaasiortoq aqqutigalugu neriorsuutaa manna tunaarisinnaavaat: „[Jehova] asasiuk taassumunnga upperluartusi! [Jehovap] sernigai unneqqarissut.“ — Johannesi 10:16; Tussiaat 31:24.

Anersaakkut sernissorneqarneq

5, 6. (a) Guutip innuttai ullumikkut qanoq sernissorneqartarpat? (b) Tanitat Jehovamut qanoq ittumik attaveqarpat, taakkumi nunarsuarmi inuunissamik neriugisallit?

⁵ Ullumikkut Jehovap innuttami anersaakkut sernissorneqarnissaat isumagisarpaa. Malersorneqatsaalinngikkaluarlugit inuunermilu matumani ajornartorsiutinut aliasuutinullu sernissunngikkaluarlugit, ilumoorfiginnilluni pisariaqartumik ikiortarlugillu kajumissaartarpai imminut qanittumik attaveqartuarsinnaaqqullugit. Attaveqarnerup tamatuma tunngavia tassaavoq Guutip asannilluni annaassinissamik aaqqissuussaanik, utertitsissummik, upperinninnerat. Kristumiut aalajaatsut taakkua ilaat Kristusimik qilammi naalakkersueqateqarnissamut Guutip anersaavanik taninneqarsimapput. Guutimit anersaakkut ernerineqartutut naapertuilluartuutitaapput, taakkulu uani pineqarput: „Taassuma taartup pissaaneranit aniguisippaatigut ernermilu asasami naalagaaffianut nuutsilluta. Taassumuuna utertitaavugut, tassa ajortit isumakkiigaanerisigut.“ — Kolossemiut 1:13, 14.

⁶ Kristumiut aalajaatsut allat millionillit aamma neriorsoqqissaarneqarput utertitsissummik iluaqutiginnilersinnaanerannik. Imami allassimasoqarpoq: „Inuup Ernera tikiutinngilaq kiffartorfigeqqulluni namminerli kiffartussalluni inuuninilu akissatut tunniutissallugu amerlasuut utertinneqaatissaattut.“ (Markusi 10:45) Piffissap ingerlanerani ’kiffaanngissutsip Guutip qitornaasa naalannarsiffissami pisassaata’ pigilernissaa qilanaaraat. (Romamiut 8:21) Namminneq Guutimik ikinnguteqarnertik pingaartingaarpaat ikinngutigiinnerlu tamanna nakussatsinniarlugu sapinngisaminnik iliuuseqartarlutik.

7. Jehovap innuttami anersaakkut peqqissusiat ullumikkut qanoq sernissortarpaa?

⁷ Jehovap innuttami anersaakkut peqqissusiat sernissortarpaa ilaatigut siumukartumik ilinniartinneqarnissaat isumagalugu. Taamaalillutik innuttai sallusuissummik ilisimasaqarluarnerujartuinnartarput. Aamma oqaatsini, peqatigiissortani anersaanilu illernartoq aqqutigalugit siunnersuiuarpoq. Nunarsuarmi tamarmi Guutip innuttai ’kiffamit ilumoortumit silatuumillu’ siulersorneqarlutik ilaqutariissuartut ipput. Kiffaqatigiit ’ilaqutariit’ taakkua anersaakkut pisariaqartitaat, pisariaqaraangallu  aamma timikkut pisariaqartitaat, isumagisarpaat — inuiaassuseq inuiaqatigiinnilu inissisimaffik apeqqutaatinnagit. — Matthæusi 24:45.

8. Jehovap imminik ilumoorfiginnittut eqqarsaatigalugit suna qularutiginngilaa, sumillu neriorsoqqissaarpai?

⁸ Soorlu Jehovap Jiisusi akeqqat saassussinerinut timikkut sernissorsimanngikkaa, taamatulli ullumikkut kristumiut timikkut sernissunngilai. Tamannali Jehovap iluarinninnginneranut ersiutaanngilluinnarpoq. Akerleriissummili pingaarutilerujussuarmi taakkunannga tapersersorneqartuarnissaminik qularutiginninnginneranut ersiutaavoq. (Jobi 1:8-12; Ussatit 27:11) Jehovap imminik ilumoorfiginnittut ilaginnaannanngisaannassavai, „[Jehovammi] eqqortoq iluaraa imminullu ilumoortut imminiiginnarnagit. Taakku sernissorneqartuartarput.“ — Tussiaat 37:28.

Jehovap ilumoorfiginnilluni tunniusimanera sallusuissusialu illersuutigalugit

9, 10. (a) Jehovap sallusuissutsini iluaqutigalugu kiffani qanoq sernissortarpai? (b) Biibilimi qanoq ersersinneqarpa Jehovap ilumoorfiginnilluni tunniusimanini iluaqutigalugu kiffani sernissortarai?

⁹ Qinnummi Tussiaat 40-mi allanneqarsimasumi Daavip Jehovap ilumoorfiginnilluni tunniusimaneranit sallusuissusianillu illersorneqarnissani qinnutigaa. Sallusuissutsini naapertuilluarnermullu asanninnini pissutigalugit Jehovap najoqqutassiani suunersut erseqqissartarpai. Najoqqutassianik taakkuninnga maleruaasut maleruaanertik isumakuluutinut, ajornartorsiutinut annikilliuutinullu najoqqutassianik maleruaanngitsunit atorneqartartunut illersuutigingaartarpaat. Assersuutigalugu ikiaroornaveersaarutta, imigassamillu atornerluinaveersaarutta, kinguaassiuutitigut kanngunartuliornaveersaarutta aamma nakuusernaveersaarutta tamanna aliasuuterpassuarnut ajornartorsiuterpassuarnullu imminut ilaquttatsinnullu illersuutaassaaq. Aamma allaat Jehovap sallusuissusiata aqqutaanit nigortut — soorlu Daavi ilaannikkut nigortarsimasoq — neriorsoqqissaarneqarput peqqissimillutillu allamik isumataarunik Jehovami ’isertorfissarsiortuarsinnaallutik’. Taakku nuannaarlutik ima suaarsinnaapput: „Annikilliornermut sernissorparma.“ (Tussiaat 32:7) Tamanna Guutip ilumoorfiginnilluni tunniusimaneranut ersiutaalluinnarpoq!

¹⁰ Guutip ilumoorfiginnilluni tunniusimaneranut ersiutaasoq alla tassaavoq kiffani silarsuarmit ajortumit aserorniakkaminit avissaaqqullugit kajumissaarinera. Ima allassimasoqarpoq: „Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa; silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput.“ Kajumissaarut tamanna maleruarutsigu inuunerput allaat naassaanngitsumik sernissorsinnaassavarput, nangillunimi ima allassimavoq: „Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq.“ — 1 Johannesi 2:15-17.

Eqqarsarsinnaaneq, naliliisinnaaneq ilisimassuserlu illersuutigalugit

11, 12. Nassuiaruk eqqarsarsinnaaneq, naliliisinnaaneq ilisimassuserlu qanoq illersuutiginerivut.

¹¹ Daavip ernerata Salomop Guutimit akuerineqarnissamik noqqaassutiginnittut isumassarsisitaalluni ima allaffigai: „Isumatusaarnerup [Eqqarsarsinnaanerup,  NV] paarissavaatit, siuneqarnerullu [naliliisinnaanerullu, NV] sernigissavaatit.“ Aamma ilungersorluni ima kajumissaarivoq: „Ilisimassusermik pissarsiniarit . . . Ilisimassut iperarniaqinagu paarsisigissagakku, asajuk sernissortigissagakku.“ — Ussatit 2:11; 4:5, 6.

¹² Ilikkakkavut Guutip oqaasianeersut eqqarsaatigeqqissaaraangatsigik eqqarsarsinnaanerput atortarparput. Tamanna naliliilluarsinnaanerujartornissamut iluaqutigissavarput eqqortumik pingaarnersiuisinnaaniassagatta. Tamanna pingaaruteqarpoq, amerlanersattami — immaqa nammineq misigisaminnit — paasisimavaat ajornartorsiuteqalertartoq piaaraluni piaarinaniluunniit sianiilliorluni pingaarnersiuigaanni. Saatanip silarsuaata nunap piisigut pisuunngornissaq, pissaaneqarnissaq ataqqisaanissarlu uagutsinnut ussiiniutigisarpai, Jehovalli pingaarutillit anersaakkut ittut pingaaruteqarnerusut pingaartippai. Pingaarutillit anersaakkut ittut salliutinngikkaanni, ilaquttat avissaartuutilersinnaapput, ikinngutit annaaneqarsinnaapput anersaakkullu anguniagaarulluni. Naggataatigut suut tamaasa annaareerlugit immaqa Jiisusip oqaasii ilumoorneraannartariaqalissapput: „Inummut sumut iluaqutaassava silarsuaq tamaat pigileraluaruniuk inuuninili akigalugu?“ (Markusi 8:36) Jiisusip oqaasiisa ukua eqqumaffiginissaat silatusaarnerussaaq: „Guutip naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ — Matthæusi 6:33.

Imminuinnaq eqqarsaatigisunngornerup navianaataa

13, 14. Imminuinnaq eqqarsaatigineq qanoq paasisariaqarpa, taamaattuunerlu sooq silatusaarnerunngila?

¹³ Inuttut imminut soqutiginerput pissusissamisoorpoq. Namminerli kissaatigisat soqutigisallu tamanit pingaarnerpaanngoraangata ajornartorsiuteqalertarpoq. Taamaattumik Jehovamut ikinngutaajuassagutta, taassuma siunnersorpaatigut imminuinnaq eqqarsaatigeqqunata. Imminuinnaq eqqarsaatigineq ’nammineq kissaatigisaannavinnik, pisariaqartitaannavinnik soqutigisaannavinnillu sammisaqartarnermik’ isumaqarpoq. Ullumikkut inuppassuit taamaapput, ilaa? Maluginiarnarpoq Biibilimi siulittuutigineqartoq Saatanip pissutsinik aaqqissuussinerata ajortup ’ulluini kingullerni’ inuit ’namminissarsiortuujumaartut’, tassa imminuinnaq eqqarsaatigisuujumaartut. — 2 Timotheusi 3:1, 2.

¹⁴ Allanik soqutiginninnissamik, allanik immisut asanninnissamik, peqqussutip Biibilimeersup silatusaarnerussusia kristumiut paasivaat. (Lukasi 10:27; Filippimiut 2:4) Inuit amerlanerit immaqa isumaqassapput tamanna maleruarneqarsinnaanngitsoq, aappariittulli ingerlalluassagaanni, ilaqutariittut pilluassagaanni pitsaasunillu ikinnguteqassagaanni inatsisip tamatuma maleruarnissaa pingaaruteqarpoq. Jehovamut kiffaasoq ilumoortoq imminut ima  soqutigitigilinngisaannartariaqarpoq soqutigisat allat pingaarnerusut, pingaartumik soqutigisat Jehovamut taassuminngalu pallorfiginninnermut tunngassuteqartut, tunulliutilerlugit.

15, 16. (a) Imminuinnaq eqqarsaatigineq qanoq kinguneqarsinnaava? Assersuuteqarit. (b) Allanik eqqartuussipallattaraanni ilumoortumik qanoq iliortoqartarpa?

¹⁵ Imminuinnaq eqqarsaatigineq imminut iluartuutilernermik kinguneqarsinnaavoq tamannalu uungaannaq isigilernermik makitasuunngornermillu kinguneqarsinnaalluni. Biibilimi naleqqulluartumik ima allassimasoqarpoq: „Taamaattumik, illit inuk eqqartuussisartutit, kinaagaluaruilluunniit patsisiginiagassaqanngilatit. Allat eqqartuukkaangakkit imminuttaaq eqqartuuttarputit, illit eqqartuussattut iliortaravit.“ (Romamiut 2:1; 14:4, 10) Jiisusip nalaani upperisarsiornikkut siuttut imminnut iluartuutingaaramik isumaqarput Jiisusi ajoqersugaalu isornartorsiorsinnaallugit. Taamaalillutik taakkununnga imminnut eqqartuussisunngortipput. Namminneq kukkunitik takusinnaanagit imminnut eqqartuuppullusooq.

¹⁶ Judasi, ajoqersugaq Jiisusimik killuutiginnittoq, allanut imminut eqqartuussisunngortippoq. Betaniami nereqatigiissitsinermi Lazarusip qatanngutaata Mariap Jiisusi uuliamik tipigissumik tanimmagu, Judasi taamaaliorneranut akerliusupilussuuvoq. Mamiatsangaarluni ima oqarpoq: „Sooq uulia taanna tunineqarsimanngila akilersillugu denarinik 300-nik piitsunut tunniussassanik?“ Oqaluttuarli ima nangippoq: „Taama oqanngilaq piitsunik soqutigisaqarami, tillituujugamili; Judasimi aningaasivilisartuuvoq aningaasallu tassunga ikineqartut ilaannik tillittarluni.“ (Johannesi 12:1-6) Judasitut upperisarsiornikkulluunniit siuttutut, allanik eqqartuussipallattartutut taamaalillutillu imminnut eqqartuuttutut, ilinngisaannarta.

17. Makitasuunerup imminullu tatigivallaartunngornerup qanoq navianartigineranik assersuuteqarit.

¹⁷ Kristumiut siulliit ilaat Judasitut peqquserluttuunngikkaluarlutik, pingaarniartunngorlutillu makitasuunngorput usorsitsaartalerlutillu. Ajoqersugaq Jaaku taakku pillugit ima allappoq: „Usorsitsaarpusi oqarataarlusilu.“ Nangillunilu ima allappoq: „Kisianni usorsitsaarneq taamaattoq ajortuuvoq.“ (Jaaku 4:16) Jehovamut kiffartornermi suliarisimasanik immikkulluunniit pisinnaatitaaffigisanik usorsitsaaruteqarneq imminut aserorsaataavoq. (Ussatit 14:16) Eqqaamavarput apustili Petrusimut qanoq pisoqarsimasoq, taanna imminut tatigivallaatsiarnermini ima oqarissaarmat: „Tamarmilluunniit tunukkaluarpatsit uanga tununngisaannassavakkit. . . . Toqoqatigissagaluarukkilluunniit miserratiginngisaannassavakkit.“ Imminut pilluta oqarissaarutissaqanngivippugut. Naammassisatsinnut sunut tamanut Jehovap ilumoorfiginnilluni tunniusimanera kisimi pissutaasarpoq. Tamanna eqqarsaatigisarutsigu pingaarniartunngornaveersaarlutalu oqarissaartunngornaveersaassaagut. — Matthæusi 26:33-35, 69-75.

18. Jehovap makitasaarneq imaluunniit pingaarniartuuneq qanoq isigaa?

¹⁸ Ussatit-ni ima allassimavoq: „Imminut pingaartinneq ajunaarnerup siulerisarpaa makitasaarnerlu naakkiunnerup.“ Sooq taamaappa? Jehova ima akivoq: „Uumigaakka makitasaarneq usorsisimaarnerlu.“ (Ussatit 8:13; 16:18) Taamaattumik Jehovap Assyriap kunngia „uummammigut makitanerata inerititai isaasalu anneruniartumik usorsitsaarnerat pillugit“ akisussaatippaa. (Esaja 10:12) Qanittukkut Saatanip silarsuaa, tassani siuttuusut, takussaasut takussaanngitsullu, pingaarniartut imminnut tatigivallaartut ilanngullugit, akisussaatinneqartussaavortaaq. Qanortoq Jehovamik akerlilersuisut oqaatseriitsuunerattut oqaatseriitsuulinngisaannarisa!

19. Guutip kiffaasa maniguuttuujutigalutik suna tulluusimaarutigaat?

¹⁹ Kristumiut ilumoortut Jehovamut kiffaanerminnik tulluusimaarutiginninnissamut pissutissaqarluarput. (Jeremia 9:23) Aammali maniguuttuunissamut pissutissaqarluarput. Sooq? „Tamarmimmi  ajortuliorput Guutimit naalannassuseq pigiunnaarlugu.“ (Romamiut 3:23) Jehovamut kiffaajuarsinnaajumalluta apustili Paulusitut isiginnittaaseqartariaqarpugut, taanna ima oqarmat: „Kristusi-Jiisusi silarsuarmut tikiussimavoq ajortillit annaatissallugit.“ Imalu nangippoq: „Uanga taakkunannga ajorteqarnersaavunga.“ — 1 Timotheusi 1:15.

20. Jehova maanna kiffaminik qanoq sernissuisarpa, siunissamilu taakku qanoq sernissorumaarpai?

²⁰ Qularutigissanngilarput Jehovap kiffani anersaakkut ittumik sernissortuarumaarai, Guutip soqutigisaanik salliutitsiniarlutik nuannaarlutik nammineq soqutigisaminnik tunulliussigaangata. Aamma qularutigissanngilarput annikilliornartussarsuaq nalliuppat, Jehova kiffaminik anersaakkuinnaanngitsoq aammali timikkut sernissuiumaartoq. Guutip silarsuassaanut nutaamut iserunik ima suaarsinnaassapput: „Taannaavoq Guuterput, neriuffigigatsinni annaappaatigut. Taannaavoq [Jehova], neriuffigisarput, annaassinera qiimmattaatigalugulu tipaatsuutigisigu.“ — Esaja 25:9.

Eqqaamavigit?

• Kunngi Daavi Jiisusi Kristusilu qanoq sernissorneqarpat?

• Ullumikkut Jehovap kiffai qanoq sernissorneqartarpat?

• Sooq imminuinnaq eqqarsaatiginaveersaartariaqarpugut?

• Sooq tulluusimaarsinnaavugut maniguuttuullutali?

[Atuaqqissaarnermi apeqqutit]

[Qupp. 8-mi assiliartaq]

Jehovap Daavi Jiisusilu qanoq sernissorpai?

[Qupp. 10-mi assiliartaq]

Ullumikkut Guutip innuttai anersaakkut ittumik qanoq sernissorneqartarpat?

[Qupp. 11-mi assiliartat]

Jehovamut kiffartornerput tulluusimaarutigigaluarlutigu maniguuttuujuartariaqarpugut