Meeqqat inuusuttullu, Jehova unnersiutigisiuk!

„Unnersiutigisiuk [Jehova] nunarsuarmi, . . . nukappiaqqat niviarsiaqqallu.“ — TUSSIAAT 148:7, 12.

1, 2. (a) Inuusuttorpassuit suna nalunngilluinnartarpaat? (b) Sooq meeqqat inuusuttullu angajoqqaaminnit killilersorneqarnertik aliasuutigisariaqanngilaat?

MEEQQAT inuusuttullu nalunngilluinnartarpaat soqqusaannginnerlutik. Ilarpassuisa oqaluttuuteriaannaassavaatsit aqqusineq kisimiillutik ikaassagunikku, unnukkut kingusinnerulaartukkut innassagunik biilissagunilluunniit qassinik ukioqalereersimasariaqarnerlutik. Inuusuttuulluni immaqa ilaannikkut misiginartarpoq arlaannik sorusutaqaraanni ima akineqartuaannangajalluni: „Suli meeraavallaarputit.“

² Ilissi meeraasusi inuusuttuususilu nalunngilarsi angajoqqaassi ilaatigut illersorniarlusi taamatut killilersortaraasi. Aamma nalunngilarsi angajoqqaasi naalakkaangassigik Jehovap tamanna nuannaarutigisaraa. (Kolossemiut 3:20) Ilaannikkulli misigisarpisi soorlu inuunivissi aallartissanngitsoq? Pingaarutillit tamarmik inersimanerulernissassi tungaanut ilissinnut inerteqqutaappat? Naamik, taamaanngivippoq! Ullumikkut suliassaq  suliarineqarpoq pisinnaatitaaffinnit noqqaassutigisinnaasassinnit allanit tamanit pingaaruteqarnerungaartoq. Ilissi inuusuttuususi suliassap tamatuma suliarineqarnerani suleqataaqqusaavisi? Aap, suleqataaqqusaaginnanngilasi — allaat Guutimit qutsinnerussaartumit suleqatigiumaneqarpusi!

3. Immikkut pisinnaatitaaffik suna Jehovap inuusuttunut neqeroorutigaa, apeqqutillu suut maannakkut sammissavavut?

³ Suliassaruna suna pigipput? Allaaserisami matumani allassimaffik najoqqutarineqartoq una malugiuk: „Unnersiutigisiuk [Jehova] nunarsuarmi, . . . nukappiaqqat niviarsiaqqallu, utoqqaat inuusuttullu.“ (Tussiaat 148:7, 12) Illit immikkut pisinnaatitaaffiit tassani eqqartorneqarpoq: Jehova unnersiutigisinnaavat. Illit inuusuttuusutit suliassami tamatumani suleqataanerit nuannaraajuk? Inuusuttorpassuit nuannaraat. Suleqataanerup qanoq nuannaarutaalersinnaanera paasiniarlugu apeqqutit pingasut sammissavavut. Siullermik: Sooq Jehova unnersiutigisariaqarpiuk? Aappassaanik: Qanoq sunniuteqarluartumik unnersiutigisinnaaviuk? Pingajussaanillu: Qaqugu Jehovamik unnersiutiginnittalernissamut piffissaalluassava?

Sooq Jehova unnersiutigineqassava?

4, 5. (a) Tussiaat 148 naapertorlugu nuanningaartumi sumi inissisimasutut ippugut? (b) Pinngortitat eqqarsarsinnaanngikkaluarlutillu oqalussinnaanngikkaluartut qanoq ilillutik Jehovamik unnersiutiginnissinnaagamik?

⁴ Jehovamik unnersiutiginninnissamut pissutaasut pingaarutillit ilaat tassaavoq Pinngortitsisuunera. Ilumoortumik tamatuminnga pingaarnerutitsinissamut Tussiaat 148 iluaqutigissavarput. Takorluulaariaruk inuppassuit erinarsuummik nuanneqisumik killitsinnartumillu isumaqatigiillutik erinarsortut qanilliartoritit. Qanoq misigivit? Taavami nalunngikkukku erinarsuutip taallaata imarisai ilumoortuusut, pingaaruteqartut, nuannersuusut ineriartornartuusullu? Erinarsoqataaniarlutit taallaa ilinniarusussaviuk? Amerlanersavut taamaaliorusussapput. Tussiaat 148-mi paasinarsivoq illit tamatumunnga assingusumik inissisimasutut ittutit, alutornarnerungaartumilli. Tussiaammi inuppassuit isumaqatigiillutik Jehovamik unnersiutiginnittut allaatigineqarput. Tussiaalli atuarakku immaqa eqqumiiginartumik maluginiagaqarputit. Suna?

⁵ Unnersiutiginnittut Tussiaat 148-mi allaatigineqartut ilarpassui eqqarsarsinnaanatillu oqalussinnaanngillat. Assersuutigalugu atuarparput seqineq, qaammat, ullorissat, qaniit, anori, qaqqat qaqqannguillu Jehovamik unnersiutiginnittut. Pinngortitat uumassuseqanngitsut qanoq ilillutik taamaaliorsinnaagamik? (Tuss 148 Versit 3, 8, 9) Orpiit, immap uumasuisa uumasullu allat unnersiutiginninnerattut. (Tuss 148 Versit 7, 9, 10) Seqernup tarrilernera kusanartoq qaammatilluunniit imissisimasup qilammi ulloriarpassualimmi ingerlaarnera isiginnaarnikuuiuk, uumasut pinnguartut quiasuutiginikuuigit, imaluunniit nuna alianaatsoq alutorsaatigingaarnikuuiuk? Taamaappat pinngortitarsuup unnersiutiginninnera „tusarsimassavat“. Jehovap pinngortitaasa tamarmik eqqaasittarpaatigut taanna Pinngortitsisuusoq ajugaqanngitsoq aamma qilammi nunamilu taassumatut pissaaneqartigisoqanngitsoq, ilisimassuseqartigisoqanngitsoq asannitsigisoqanngitsorlu. — Romamiut 1:20; Saqqummersitat 4:11.

6, 7. (a) Pinngortitat silassorissut suut Tussiaat 148-mi Jehovamik unnersiutiginnittutut allaatigineqarpat? (b) Jehovamik unnersiutiginninnissamut suna killinneqaatigisinnaavarput? Assersuuteqarit.

⁶ Tussiaat 148-mi aamma allassimavoq pinngortitat silassorissut Jehova unnersiutigigaat. Tuss 148 Versi 2-mi eqqaaneqarpoq Jehovap „katersai“ qilammiittut, inngilit, Guutimik unnersiutiginnittut. Tuss 148 Versi 11-mi inuit pissaaneqangaartut sunniuteqangaartullu, soorlu kunngit eqqartuussisullu, unnersiutiginneqataanissamut kajumissaarneqarput. Inngilit pissaaneqangaartut Jehovamik unnersiutiginninneq nuannaarutigingaarpassuk, taava inuk pissutissaqarluarluni Jehovamik unnersiutiginninnissamut imminut pingaaruteqarpallaarnerarsinnaava? Taava versi 12-imi 13-imilu ilissi inuusuttuususi Jehovamik unnersiutiginneqataanissamut kajumissaarneqarpusi. Taamaaliorusuppit?

⁷ Assersuut una eqqarsaatigeriaruk. Timersornikkut, eqqumiitsuliornikkut nipilersornikkulluunniit pikkorissorujussuarmik ikinnguteqaruit, ilaquttatit ikinngutitillu allat taanna pillugu oqaluttuukkumassavigit? Tamanna qularnanngilaq.  Jehovap iliuuserisimasarpassui pillugit ilinniaraangatta immaqa aamma uagut taamaaliorusulersarpugut. Assersuutigalugu Tussiaat 19:2, 3-mi allassimavoq qilak ullorialik ’oqaluttuussisoq’ (1900/1961). Jehovap iliuuserisimasai tupinnartut eqqarsaatigigaangatsigik taanna pillugu allanik oqaloqateqanngitsoorsinnaanngilagut.

8, 9. Suut pissutigalugit Jehovap kissaatigaa unnersiutigissagitsinni?

⁸ Jehovamik unnersiutiginninnissamut pissutaasoq pingaarutilik alla tassaavoq taassuma taamaaliornissarput kissaatigigaa. Sooq? Unnersiutiginninnissarput taassuma pisariaqartikkamiuk? Naamik. Uagut inuit nersualaarneqarnissarput ilaannikkut pisariaqartittarparput, Jehovali uagutsinnit qutsinnerungaarpoq. (Esaja 55:8) Taanna imminut tatigiuaannarpoq namminerlu piginnaanini qularutiginngisaannarlugit. (Esaja 45:5) Taamaakkaluartoq kissaatigaa unnersiutigissagitsinni, taamaalioraangattalu nuannaarutigisarpaa. Sooq? Tamatumunnga pissutaasut marluk misissoriartigik. Siullermik, nalunngilaa imminik unnersiutiginninnissarput pisariaqartikkipput. Anersaakkut pisariaqartitalittut, pallorfigisaqarnissamik pisariaqartitalittut, pinngortippaatigut. (Matthæusi 5:3) Jehovap nuannaarutigisarpaa takugaangamitigut pisariaqartitatsinnik tamatuminnga isumaginnittugut, soorlu angajoqqaavit nuannaarutigisaraat takugaangamikku nerisassanik peqqinnartunik nerisutit. — Johannesi 4:34.

⁹ Aappassaanik, Jehovap nalunngilaa inuit allat imminik unnersiutiginninnerput tusassallugu pisariaqartikkaat. Apustili Paulusip angut inuusuttoq Timotheusi ima allaffigaa: „Imminut nakkutiginiarit, aamma ajoqersuisutut suliat nakkutiginiaruk aalajangiullugulu, tassami taamaalioruit imminut annaatissagavit tusartitillu annatsillugit.“ (1 Timotheusi 4:16) Aap, allanik Jehova Guuti pillugu ilinniartitsinikkut taanna unnersiutigigukku, immaqa taakkuattaaq Jehova ilisarisimalissavaat. Ilisimasaqarneq taamaattoq naassaanngitsumik annaanneqarnissaannik kinguneqarsinnaavoq! — Johannesi 17:3.

10. Sooq Guutimik unnersiutiginninnissamut kajumissisinneqangaarpugut?

¹⁰ Jehovamik unnersiutiginninnissamut suli allamik pissutissaqarpoq. Ikinngutit pikkorissoq pillugu assersuut eqqarsaatigeqqilaaruk. Allat taassuminnga salluliuutiginnillutillu mamarliisut tusarukkit taassuma ajunngitsumik oqaluuserinissaa suli aalajangiusimanerussannginnerpiuk? Silarsuarmi matumani Jehova inuppassuarnit mamarlerneqartarpoq. (Johannesi 8:44; Saqqummersitat 12:9) Taamaattumik taassuminnga asannittut taanna pillugu ilumoortumik allanik oqaluttuussinissamut paatsuuinernillu tamanik aaqqiinissamut kajumissisinneqangaarput. Illittaaq pingaartitsinerit asanninnerillu ersersikkusuppiuk, Guutimillu akerlilersuisut pingaarnersaat, Saatani, pinnagu Jehovali naalagarerusullugu taassumunnga takutikkusuppiuk? Tamakku tamaasa Jehovamik unnersiutiginninnikkut iliuuserisinnaavatit. Taava una apeqqutaalerpoq: Qanoq?

Inuusuttut ilaasa qanoq ilillutik Jehova unnersiutigigaat

11. Oqaluttuani Biibilimeersuni sorlerni ersersinneqarpa inuusuttut Jehovamik unnersiutiginninnerat kinguneqarluarsinnaasoq?

¹¹ Biibilimi erserpoq meeqqat inuusuttullu Jehovamik unnersiutiginninnerat ajunngitsumik kinguneqarajuttoq. Assersuutigalugu niviarsiaraqarpoq Israelikkuusumik Aramæerinit tigusarineqarsimasumik.  Taassuma kiffaaffini Jehovap pruffiitia Elisa pillugu nakimaalluni oqaluttuuppaa. Oqaasii pissutigalugit kingusinnerusukkut tupinnartuliortoqarpoq, aamma sunniuteqarluartumik nalunaajaasoqarpoq. (2 Kunngit 5:1-17) Jiisusittaaq inuusuttuulluni nakimaalluni Guuti pillugu nalunaajaavoq. Inuusuttuunerani pisimasorpassuarnit Allakkani eqqaaneqarsinnaagaluartunit Jehovap ataasiinnaq toqqarpaa, tassa Jerusalemimi naalaffimmi Jiisusip aqqaneq-marlunnik ukioqarluni upperisarsiornikkut siuttut sapiilluni apereqattaarai taakkualu Jehovap aqqutaanik paasisimasaqarnera tupigusuutigigaat. — Lukasi 2:46-49.

12, 13. (a) Jiisusi toqungajalerluni naalaffimmi sua, najuuttunullu tamanna qanoq sunniuteqarpa? (b) Meeqqat naalaffimmi unnersiutiginninnerat Jiisusip qanoq isumaqarfigaa?

¹² Jiisusip inersimasunngorluni suliai meeqqat Jehovamik unnersiutiginnerusulissutigaat. Jiisusi ullualuinnannguit qaangiuppata toqusussaalluni Jerusalemimi naalaffimmiippoq. Biibilimi allassimavoq tassani ’tupinnartuliortoq’. Inuit illernartuummik ujajaasunut inissanngortitsisut anisippai. Aamma tappiitsut tusiattullu ajorunnaarsippai. Najuuttut tamarmik, ingammillu upperisarsiornikkut siuttut, Jehovamik taassumalu erneranik Missiarsimik unnersiutiginninnissamut killinneqartariaqaraluarput. Ajoraluartumilli taamani inuppassuit taamaaliunngitsoorput. Nalunngilaat Jiisusi Guutimit aallartitaasoq, upperisarsiornikkulli siuttunut qunupput. Inuilli eqimattat ataatsit nakimaallutik oqaaseqarput. Nalunngiliuk kikkuunersut? Biibilimi ima allassimavoq: „Palasiunerit allakkanillu ilisimasut [Jiisusip] tupinnartuliai takugamikkit, meeqqallu naalaffiup silarliani torlulammata ima: ’Hosianna, Daavip ernera’, uumitsapput; [Jiisusilu] aperaat: ’Tusaavigit uku qanoq oqaluttut?’“ — Matthæusi 21:15, 16; Johannesi 12:42.

¹³ Palasit neriupput Jiisusip meeqqat imminik unnersiutiginnittut nipangersissagai. Taamaaliorpa? Naamerluinnaq! Jiisusip palasit ima akivai: „Aap. Imaattut atuanngisaannarpisigit: ’Naalungissat miluttullu qarninit erinalimmik unnersiutigineqarnissat piareersarpat’?“ Erseqqippoq Jiisusip taassumalu Ataataata meeqqat unnersiutiginninnerat nuannaarutigigaat. Meeqqat taakku inersimasut tamarmik iliuuserisariaqaraluagaannik iliuuseqarput. Meeqqat taakkua eqqarsartaasianni suut tamarmik paasiuminartuusimassapput. Takuaat angut taanna tupinnartuliortoq, sapiilluni upperlunilu oqaluttoq Guutimullu taassumalu innuttaanut qamannga pisumik asannittoq. Taanna tassaavoq „Daavip ernera“ neriorsuutigisaq, Missiarsi, soorlumi nammineq taama oqartoq. Meeqqat uppernertik pissutigalugu pilluaqquneqarput siulittuummik eqquutitsinissamik immikkut pisinnaatitaaffeqalernermikkut. — Tussiaat 8:3.

14. Meeqqat inuusuttullu piginnaassutsitik Guutimik unnersiutiginninnermut qanoq iluaqutigisinnaavaat?

¹⁴ Oqaluttuat taamaattut sumik ilinniarfigisinnaavavut? Meeqqat inuusuttullu Jehovamik unnersiutiginninneq pikkoriffigisinnaavaat. Taakku sallusuissummik paasinneriaannaasarlutillu paasinnillaqqissuusarput uppernerminnillu ilumoorlutik aallussilluarlutillu ersersitsillaqqissuusarlutik. Aamma tunissutisiaqarput Ussatit 20:29-mi ima eqqaaneqartumik: „Angutit inuusuttut nukitik pinnersaatigaat.“ Aap, ilissi meeraasusi inuusuttuususilu nukeqangaarlusilu kajumissuseqangaarpusi — piginnaassutsit Jehovamik unnersiutiginninnermut iluaqutaasut. Tunissutisiat taakku qanorpiaq atorsinnaavigit?

 Jehova illit qanoq ilillutit unnersiutigisinnaaviuk?

15. Jehova unnersiutigilluarsinnaassagaanni suna kajumississutaasariaqarpa?

¹⁵ Jehova unnersiutigilluassagaanni uummammit pisumik taamaaliortariaqarpoq. Allat piinnarlugit taamaaliussanngilatit. Eqqaamajuk inatsisit tamarmik pingaarnerpaartaat tassaammat: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ (Matthæusi 22:37) Illit nammineq Guutip oqaasianik atuaqqissaarnikkut Jehova ilisarisimallualersimaviuk? Kissaatiginaqaaq taamatut atuaqqissaarneq illit Jehovamut asannilerninnik kinguneqassasoq. Guutimullu asanninnermik ersersitseriaaseq pissusissamisoornerpaaq tassa taassuminnga unnersiutiginninneq. Jehovamut asanninnerit ilinnut kajumississutaassaaq ersarissoq kimittoorlu, aamma kajumillutit angorniorlutillu taassuminnga unnersiutiginninnissamut piareersimassaatit.

16, 17. Jehovamik unnersiutiginninnermut atatillugu pissusilersornerput qanoq pingaaruteqarpa? Assersuuteqarit.

¹⁶ Qanoq oqassanerlutit eqqarsaatigitinnagu qanoq pissusilersorniarnerlutit eqqarsaatigisariaqarpat. Elisap nalaani niviarsiaraq Israelikkuusoq sorraatsuusimasuuppat, ataqqinninngitsuusimasuuppat unneqqaserluttuusimasuuppalluunniit, taava isumaqarpit Aramæerit taassuma kiffaaffiisa Jehovap pruffiitia pillugu oqaluttuarmat tusarnaarumasimassagaat? Ilimananngilaq. Inuit aamma illit tusarnaarusunnerussavaatsit takusinnaagunikku ataqqinnittuunerit, unneqqarissuunerit pissuserissuunerillu. (Romamiut 2:21) Assersuummik sammisaqariarta.

¹⁷ Portugalimi ilinniartitsisup niviarsiaraq aqqanilinnik ukiulik nalunngeqatiginnissusianut Biibili tunngavigalugu ilinniartinneqarsimasumut akerliusumik nalliuttorsiornissamut kimigiiserfigaa. Niviarsiaqqap sooq peqataajumannginnerluni ilinniartitsisuni ataqqinnilluni nassuiaappaa, ilinniartitsisulli mitaatigaa. Piffissap ingerlanerani upperisaanik eqqartuinerlunnermigut ilinniartitsisup nikanarsarniaqattaarpaa. Taamaakkaluartoq niviarsiaraq ilinniartitsisuminik ataqqinnittuarpoq. Ukiut arlallit tamatuma kingorna qatanngut arnaq inuusuttoq taanna pionerinngorpoq, imaluunniit piffissaq tamaat oqaluussisartunngorpoq. Ataatsimeersuarnermi taassuma kuisittussat ilaat ilisaraa. Tassa ilinniartitsisorisimasani! Qullilillutik imminnut eqitaareeramik arnaq utoqqaq oqaluttuarpoq ilinniartitami ataqqinnittuunera puigunngisaannarsimallugu. Jehovamut nalunaajaasup ilinniartitsisoq pulaarsimavaa, ilinniartitsisullu taanna ilinniartitarisimasani pillugu oqaluttuuppaa. Biibilimik atuaqqissaaqatigineqartalerpoq, arnallu taassuma sallusuissut Biibilimeersoq ilassivaa. Aap, illit pissusilersornerit Jehovamik unnersiutiginneriaasiusinnaavoq sunniuteqarluartoq!

18. Inuusuttut qanoq iliorsinnaappat Biibili Jehova Guutilu pillugit oqaloqateqalernissaq sapernartikkunikku?

¹⁸ Ilaannikkut atuarfimmi upperisat pillugu oqaloqateqalernissat sapernartittarpiuk? Illit kisivit taama misigineq ajorputit. Upperisalli pillugu allanik apererusulersitsisinnaasunik iliuuseqarsinnaavutit. Assersuutigalugu atuagassianik atuakkanilluunniit Biibililersaarutinik atuarfimmut nassarsinnaavutit taakkulu atuarlugit anitsiarfinni imaluunniit piffissani allani tamanna ajorineqanngippat. Imaassinnaavoq atuaqativit suna atuarnerit aperigaatsit. Akigukkit oqaluttuukkukkillu atuagassiami atuakkamiluunniit tamatumani suna soqutiginartinnerlugu, taava immaqa oqaloqateqarlualereersimassaatit. Eqqaamajuk aperisarnissat atuaqatitit qanoq isumaqarnersut paasiniassagakku. Ataqqinnillutit tusarnaartarit, ilikkakkatillu Biibilimeersut oqaluttuarisakkit. Meerarpassuit inuusuttorpassuillu Jehova atuarfimmi unnersiutigisarpaat. Tamanna namminneq nuannaarutigingaartarpaat, inuppassuillu taakkua unnersiutiginninnerat Jehovamik ilisarisimannilernissamut iluaqutigaat.

19. Inuusuttut matumiit matumut oqaluussinermut qanoq pikkorinnerulersinnaappat?

¹⁹ Matumiit matumut oqaluussineq Jehovamik unnersiutiginneriaasiuvoq sunniuteqarluartoq. Kiffartornermi tamatumani suli peqataalersimanngikkuit, soormi anguniagarigukku? Oqaluusseqataasalereersimaguit taava suli allanik anguniagaqarsinnaavit? Assersuutigalugu oqaluussinermut pikkorinnerulerniarlutit iliuuseqarsinnaavutit matuni tamani oqaaserisartakkatit oqaasereqqeqattaaginnarnagit. Angajoqqaannut oqaluussisartunulluunniit  misilittagaqarluartunut allanut siunnersoqqusinnaavutit. Biibilimik atuinerulernissat, sunniuteqarluartumik pulaaqqiisarnissat Biibilimillu atuaqqissaaqateqalernissat ilinniakkit. (1 Timotheusi 4:15) Taamatut Jehovamik unnersiutiginninnerujartuinnartillutit kiffartornerit sunniuteqarluarnerujartuinnassaaq, oqaluussinerlu nuannarinerujartuinnassavat.

Illit qaqugu Jehovamik unnersiutiginnittalersinnaavit?

20. Sooq kinaluunniit misigissanngila Jehovamik unnersiutiginninnissamut inuusuppallaarluni?

²⁰ Apeqqutit pingasut allaaserisami matumani sammineqartut kingullersaat akiuminarnerpaavoq. Biibilimi akissut toqqaannartoq una malugiuk: „Pinngortitsisit eqqaamaniaruk inuusuttuunerpit ulluini.“ (Oqaluussisartup oqaasii 12:1) Aap, massakkut Jehovamik unnersiutiginnittalernissannut piffissaavoq. Imatut oqarnissaq ajornanngeqaaq: „Jehovamik unnersiutiginninnissamut inuusuppallaarpunga. Misilittagakippunga. Inersimanerulernissara utaqqisariaqarpara.“ Taamatut oqartoqarnikuuvoq. Assersuutigalugu Jeremia inuusuttoq Jehovamut ima oqarpoq: „Ila Guuti, [Jehova], inuusuttuuvunga; oqalunneq naluvunga!“ Jehovap oqarfigaa annilaangassutissaqanngitsoq. (Jeremia 1:6, 7) Uaguttaaq annilaangassutissaqanngilagut Jehova unnersiutigigaangatsigu. Ajortumik sumilluunniit pineqarsinnaanngilagut Jehovap aaqqilluinnarsinnaanngisaanik. — Tussiaat 118:6.

21, 22. Inuusuttut Jehovamik unnersiutiginnittut sooq kanernernut assersuunneqarpat, tamannalu sooq qiimmaallannarpa?

²¹ Ilissi inuusuttuususi kajumissaarpassi Jehovamik unnersiutiginninnissamut nangaaqqunasi! Nunarsuarmi suliap suliarineqartup pingaaruteqarnerpaap suleqataaffiginissaanut massakkut inuusuttuutillusi ilissinnut piffissaalluarnerpaavoq. Suliaq tamanna suleqataaffigisarussiuk ilaqutariinnut nuanningaartunut — Jehovap qilammi nunamilu ilaqutariissortaanut unnersiutiginnittunut — ilaalersimassaasi. Ilaqutariissortanut taakkununnga ilaanerit Jehovap nuannaarutigaa. Oqaatsit isumassarsiarititaasut tussiaasiortup Jehovamut oqaatigisai uku malugikkit: „Ullormi sakkutuussannik sorsuttussarsiffigisanni innuttatit kajumillutik sassarumaarput. Illernartumik assuarsimallutik, qaalersup erniaasut, innuttatit inuusuttut kanernertut issapput.“ — Tussiaat 110:3, NV.

²² Kanernerit ullaap qaamanerani qillaalaartut kusanartorujussuupput, ilaa? Kanernerit uisorilasut inuummarissinarput, imalu amerlatigalutik kisinneqarsinnaanatik. Jehovap ilissi inuusuttuususi ulluni makkunani artornartuni aalajaallusi taassuminnga unnersiutiginnittartusi taamatut isigaasi. Jehovamik unnersiutiginninniarlusi aalajangernissigut taassuma uummataa nuannaartittarparsi. (Ussatit 27:11) Taamaattumik Jehovamik unnersiutiginninnersi aalajangiusimalluinnarsiuk! (wE 15/6 05)

Qanoq akissavit?

• Jehovamik unnersiutiginninnissamut suut pissutissaalluarpat?

• Oqaluttuani Biibilimeersuni sorlerni ersersinneqarpa inuusuttut Jehovamik unnersiutiginnilluarsinnaasut?

• Inuusuttut ullumikkut Jehova qanoq ilillutik unnersiutigisinnaavaat?

• Meeqqat inuusuttullu qaqugu Jehovamik unnersiutiginnittalertariaqarpat, aamma sooq?

[Atuaqqissaarnermi apeqqutit]

[Qupp. 25-mi assiliartaq]

Ikinngutit arlaannut pikkorissorujussuuppat allanut oqaluttuarissavat, ilaa?

[Qupp. 28-mi assiliartaq]

Oqaluussinermut pikkorinnerulerusukkuit, taava oqaluussisartumut misilittagaqarluarnerusumut siunnersoqqugit