Oqaatsit atorlugit sorsunneq sooq ajuallannarpa?

„Sooq akornassinni sorsunneqalersarpa saqitsaanneqalersarlunilu?“ — JAAKU 4:1.

BIIBILIMIK allattup Jaakup taama aperisai tassaanngillat Romamiut sakkutuui sorsuuttut. Aamma paasiniagaa tassaanngilaq ukiuni hundredelinni siullerni juutit sicariit, tassa savilersortartut, qoqassiisarlutik sorsunnerannut suna patsisaanersoq. Jaakup eqqarsaatigisai tassaapput inuit ikittut, immaqaluunniit marluinnaat, akornanni akerleriissutit. Sunaana oqaatiginiaraa? Akerleriinnerit sorsunnertulli ajoqutaatigisinnaanerat. Oqaluttuat Biibilimeersut pingasut tulliuttut malugikkit.

Ataataanerpaap Jaakup ernerisa qatanngutertik Josefi uumigingaaramikku inussiatut tunivaat. (1 Mosesi 37:4-28) Kingusinnerusukkut Israelip kunngiata Saulip Daavi toqunniaraluarpaa. Sooq? Sinngagigamiuk. (1 Samueli 18:7-11; 23:14, 15) Ukiuni hundredelinni siullerni arnat kristumiut marluk, Euodiap Syntykillu, saqitsaannerat pissutaalluni ilageeqatigiivi tamarmik eqqissisimajunnaarput. — Filippimiut 4:2.

Ukiut ingerlaneranni akerleriissutaasut sakkuaannikkut aaqqinniarneqartarput, angutit akerleriittut marluk panamik illuinnarsuummilluunniit sakkulerlutik akersuuttarput. Tamatigungajak sakkuaattup aappaa toqutaasarpoq inuunermiluunniit sinnerani ajoqutigilikkaminik ikilerneqartarluni. Ullumikkut saqitsaattoqaraangat tassaagajunnerusarpoq oqaatsit ajuallannartut atorlugit sakkortuuliorneq. Toqutaasoqartanngikkaluartoq oqaatsit atorlugit saassussinerit ajuallannartuusarput allanillu tusaamanerlutsitsilersarlutik. ’Sorsunnerit’ taamaattut pisuussuteqanngitsunut ajoqutaagajupput.

Assersuutitut eqqaasinnaavarput siornaakkunni, palasip anglikaneriusup palaseqatini oqaluffiup aningaasaataanik nakkutilliinerluttutut  unnerluutigimmagu, pisimasoq. Isumaqatigiinnginnerat tamanit ilisimaneqalerpoq, ilagiillu avissaartuutilerput. Naalagiartartut ilaat naalagiarumajunnaarput palasi isumaqatiginngisartik naalagiartitsigaangat. Naalagiartartut imminnut asissungaaramik naalagiariartorlutik oqaluffimmiikkaangamik imminnut kimmaattarput. Palasi unnerluussisoq kinguaassiuutitigut kannguttaalliortutut unnerluutigineqarmat saqitsaanneq ilungersunarnerulerpoq.

Canterburymi biskoppiunerup palasit taakku marluk saaffigai saqitsaannerallu tassaanerarlugu „kræfti“ aamma „Naalakkatta aqqanik kanngunarsaataasumik assuarnartuliaq“. 1997-imi palasip aappaata soraarninngornissani akueraa. Aappaa ukioq soraarninngorfigisariaqakkani tikillugu atorfini najummatserfigaa. Sapinngisamilli sivisunerpaamik sulivoq, ullormilu 70-iliiffimmini, 2001-imi aggustip arfineq-aappaani, soraarninngorluni. Tuluit Nunaanni upperisarsiortut naalagaaffimmut atasut aviisianni The Church of England Newspaper-imi eqqaaneqarpoq ’Iluartup’ Victriciusip ulluani soraarninngortoq. ’Iluartoq’ Victricius kinaagami? Tassaavoq biskoppi 300-kkunni inuusoq, oqaatigineqartarporlu sorsunnermut peqataajumannginnini pissutigalugu iperartorneqartoq. Assigiinngissutaasut malugalugit aviisimi ilanngutassiisoq ima allappoq: „Oqartoqarsinnaanngilaq [palasi taanna soraarninngortoq] oqaluffimmi saqitsaannernut peqataajumasimanngitsoq.“

Palasit taakkua imminnut allanillu ajoqusiineq pinngitsoorsimasinnaagaluarpaat, Romamiunut allakkat 12:17, 18-imi siunnersuut una malissimasuugunikku: „Ajortoq akileqinasiuk ajortoqataanik, inunnullu tamanut ajunnginnerusoq eqqarsaatigisarsiuk. Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit.“

Illimmi qanoq periaaseqartarpit? Ajuallatsinneqaraangavit oqaatsit atorlugit sorsulertarpit? Imaluunniit oqaatsit sakkortuut atornaveersaartarpigit eqqisseqatigeeqqinnissarlu ammaffigalugu? Ajuallatsitsiguimmi ajuallatsitat ungasinniartarpiuk neriullutillu piffissap ingerlanerani ajuallatsitsineq puigorneqarumaartoq? Imaluunniit utoqqatserfigipallattarpiuk? Isumakkeerfigeqqullutit saaffiginnikkuit allanilluunniit isumakkeerfiginnikkuit eqqisseqatigiinneq tamassinnut ilorrisimaarutaassaaq. Allaat ukiorpassuarni aaqqiagiinngissutit aaqqinniarneranni Biibilimi siunnersuutit iluaqutigisinnaavavut, allaaserisami tulliuttumi tamanna ersersinneqarpoq.