Qanoq ajunngitsumik attaveqatigiittoqaqqilersinnaasoq

BILL-IP Ed, toqulersoq, uumigaa. Ukiut 20-t tamatuma siorna Edip aalajangiinerata kingunerisaanik Bill-ip suliffini annaavaa, tamannalu ikinngutigiilluartut avissaarutigaat. Maanna Ed eqqissilluni toquniassagami utoqqatserniaraluarpoq. Bill-illi tusaajumanngilaa.

Tamatuma kingorna ukiut 30-ngajaat qaangiuttut Bill toqunissi qanillisoq nassuiaavoq sooq taamani ikinngunni isumakkeerfiginngikkini. „Edip ikinngutiginerpaasani taamatut iliorfigisariaqanngikkaluarpaa. Ukiut 20-t qaangiuttut saammaakkusunngiinnarpara. Immaqa kukkuvunga, taamanili taama isumaqarpunga.“ *

Inuttut isumaqatigiinngissutit taama alianartigisumik kinguneqartuaannanngillat, akuliussimasulli aliatsatsinneqarajupput narrujuummisinneqarajullutilluunniit. Takorlooruk illit Edip misigisaatut misigalutit. Paasereerlugu aalajangiinerit ajoquseerujussuartoq, ilerasuuteqarlutit annaasaqangaartutullu  misigalutit inuusariaqarsinnaavutit. Taamaattorli ajuallattup ikinngutitut piluarigaatit eqqarsaatigalugu narrujuummivutit.

Bill-illi misigisaatut misigisaqarsimaguit, immaqa misigivutit pisuussuteqarnak ajoqusigaasutut ajuallaqqangaarlutillu. Isumaqarputit ikinngutigisaraluit ilisimasaqarnerusoq immaqalu piaaraluni ajoquseraatit. Inuit marluk saqitsaassuteqaraangamik marluullutik isumaqavittarput nammineq eqqortuliorlutik, arlartillu sunut tamanut pisuusoq. Tamatuma kingunerisinnaavaa ikinngutigiissimagaluartut marluk imminnut sorsuuttutullusooq iliulernerat.

Sakkoq nipaatsoq sakkugalugu sorsuttarput — soorlu arlartik sanioqqutileraangat tunuttarlugu inuillu arlallit ilagalugit naapikkaangamik imminnut takunngitsuusaartarlutik. Ungasianiit imminnut nakkutigisarput imminnulluunniit uumissuerpasissumik isikkorluttarlutik. Imminnut oqarfigituaraangamik oqaatsit sakkortuut ajuallannartullu panatut kapisisutut ittut anittarpaat.

Saammaateqatigiinnissaq ajornarpasikkaluartoq, qularnanngitsumik arlaannik isumaqatigiissinnaassapput. Immaqa nassuerutigaat ilungersunartumik ajornartorsiuteqarlutik, ikinngutigiikkunnaarnertillu ajuusaarnartuusoq. Qularnanngitsumik ikinngutigiikkunnaarnertik marluullutik aliasuutigaat, nalunngilaallu tamanna aaqqinniarlugu iliuuseqartoqartariaqartoq. Kinali siulliulluni iliuuseqarusuppa attaveqatigiileqqinnissaq eqqisseqatigiinnissarlu anguniarlugu? Arlaannaalluunniit siulliujumanngilaq.

Ukiut 2000-it matuma siorna Jiisusi Kristusip apustilii ilaannikkut oqqattarput. (Markusi 10:35-41; Lukasi 9:46; 22:24) Ilaanni oqqaterujussuareersut Jiisusip ima aperai: „Sunaana aqqutaani oqaluuserigissi?“ Kanngutsillutik nillinngillat akinagulu. (Markusi 9:33, 34) Jiisusip ajoqersuutaa iluaqutigalugu isumaqatigiileqqipput. Taassuma siunnersuutaa iluaqutigalugu ajoqersugaasalu ilaannit ikiorneqarlutik aamma ullumikkut inuit saqitsaassutigisatik aaqqittarpaat ikinngutigeeqqilertarlutillu. Misissoriartigu qanoq iliortartut.

Eqqisseqatigiinnissaq noqqaassutigiuk

„Inuk taanna oqaluuteqqinnianngilara. Takoqqinnianngilara.“ Taamatut oqarnikuuguit iliuuseqartariaqarnerit oqaatsinit Biibilimeersunit tulliuttunit erserpoq.

Jiisusi ima oqarpoq: „Taamaattumik tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak.“ (Matthæusi 5:23, 24) Aamma ima oqarpoq: „Qatanngutivit ajortuliorfigippatit orniguk marluinnaatillusilu naqqissorlugu oqaloqatigiuk.“ (Matthæusi 18:15) Illit ajuallatsitsisuuguit illilluunniit ajuallatsinneqarsimaguit, Jiisusip erseqqissarpaa illit piaartumik pineqartoq oqaloqatigisariaqarit. Taamaaliortariaqarputit ’qanilaarlutit’. (Galatiamiut 6:1) Oqaloqatigiinnerup siunertaa tassaanngilaq illit imminut illersornissat saqitsaateqatigisavilluunniit utoqqatsertinnissaa, naagga, siunertaavoq eqqisseqatigiinnissaq. Siunnersuut Biibilimeersoq tamanna atorsinnaava?

Ernest allaffeqarfimmi angisuumi qaffasissumik atorfeqarpoq. * Ukiorpassuarni suliaminut atatillugu mianernartut pillugit inuit tamalaat oqaloqatigisarpai, suliffimmi taakkununnga ajunngitsumik attaveqartuaatigalugu. Takusimavaa qanoq saqitsaattoqariaannaatigisoq, imalu oqarpoq: „Allat isumaqatigiinngissuteqarfiginikuuakka. Taamaattoqaraangalli ingilluta ajornartorsiut oqaloqatigiissutigisarparput. Pineqartoq eqqisseqatiginiarlugu toqqaannartumik saaffigalugu iluaqutaajuaannarpoq.“

Alicia, assigiinngitsunik kulturilinnik ikinnguterpassuaqartoq, ima oqarpoq: „Ilaannikkut malugisarpara oqaatsikka ajuallaataasimasut. Taava utoqqatserfigiartortarpara. Pisariaqartumit amerlanerusumik utoqqatsertarunarpunga;  utoqqatserfigisarami ajuallassimanngikkaluarpalluunniit taamaaliorneq pitsaanerutippara. Taava nalusanngilara paatsuuisimasoqanngitsoq.“

Akornutaasinnaasut qanoq ajugaaffigineqarsinnaasut

Allamut ajunngitsumik attaveqaqqilerniarneq ajornakusoorsinnaavoq. Ima eqqarsarnikuuit: ’Eqqisseqatigiilernissaq anguniarlugu sooq uanga siulliullunga iliuuseqassaanga? Taannaana pisuusoq.’ Imaluunniit ajornartorsiut aaqqinniarlugu inummut saaffiginninnikuuit, imatulli akineqaannarlutit: „Oqaloqatigiissutissaqanngilagut.“ Ilaat taama qisuariartarput misigissutsikkut anniaateqaramik. Ussatit 18:19-imi ima allassimavoq: „Qatanngutaasup ajuallatsinneqartup assigaa illoqarfik pallittaalisalik; saqitsaannerit assigaat pallittaalisap matorsuisa sannerutaat.“ Taamaattumik allat misigissusaat mianersuuttakkit. Saaffigisappit oqaluukkusunngippatit, utaqqigit misileeqqillutillu. Imaassinnaavoq ’illoqarfik pallittaalisalik’ ammarsimasoq ’matorsuillu sannerutaat’ peerneqarsimasut saammaateqatigiinnissamut matu ammarneqarsinnaalerluni.

Eqqisseqatigeeqqilernissamut akornutaasoq alla tassaasinnaavoq imminut ataqqiunnaarnissap annilaangatiginera. Ilaasa utoqqatserneq imaluunniit akerlilersuisumik oqaloqateqarneq nikanarsaataasutut isigisarpaat. Imminut ataqqiunnaarnissap isumakuluutiginera ajortuunngilaq, eqqisseqatiginnikkumannginnerli imminut ataqqinermut ineriartuutaava ajoqutaavaluunniit? Imaassinnaava imminut ataqqiunnaarnissap isumakuluutiginera pingaarniartuunermut utoqqatsissutaasoq?

Biibilimik allattup, Jaakup, ersersippaa saqitsaassiumatuneq pingaarniartuunerlu imminnut attuumassuteqartut. Kristumiut ilaasa akornanni ’sorsunneqartarnera’ aamma ’saqitsaanneqartarnera’ qulaareerlugu ima nangippoq: „Guutip makitasuut akerartorpai, qanilaartulli saammaattarpai.“ (Jaaku 4:1-3, 6) Makitasuujuneq, imaluunniit pingaarniartuuneq, eqqisseqatigiinnissamut qanoq ajoqutaasinnaava?

Pingaarniartuuneq uukapaatitsisarpoq, isumaqalersitsisarpoq nammineq inunnit allanit pitsaanerulluni. Makitasuullu isumaqartarput inoqatiminnik eqqartuussisinnaatitaallutik. Tassa qanoq? Saqitsaattoqaleraangat, isumaqatiginngisartik pitsanngoriarfissaqanngitsutut isigigajuppaat. Aap, pingaarniartuusut ilaat isumaqarput inuit isumaqatiginngisatik soqutigineqartariaqanngitsulluunniit — ilumoorluniluunniit utoqqatserfigineqartariaqanngilluinnartut. Inuit imminut pingaartittut ilaasa isumaqatigiinngissutit aaqqinniarsarinagit ilaginnaannartarpaat.

Soorlu aqqusinermi assiaqut biilertut unissutigisaraat, taamatulli pingaarniartuuneq eqqissilluni aaqqiinissamut unissutaagajuppoq. Inuup allap eqqisseqatiginissaa tunuarsimaarutigigukku, pingaarniartuuneq ajornartorsiutaasinnaavoq. Pingaarniartuuneq qanoq ajugaaffigineqarsinnaava? Pissutsip tamatuma akerliata, maniguunnerup, ineriartortinneratigut.

Maniguunneq ersersiguk

Biibilimi maniguunnissaq, imaluunniit qanilaarnissaq, kajumissaarutigineqarpoq. „Qanilaarnerup Guutimillu mianerinninnerup akissarsiarititaat tassaapput pisuussutit ataqqinaallu inuunerlu.“ (Ussatit 22:4) Tussiaat 138:6-imi allassimavoq Guutip maniguuttut pingaarniartullu qanoq isigigai: „[Jehova] qutsinnermiippoq, nikanartulli [maniguuttulli, NV] isigai, imminut angisuutittoq nalunngilaa ungasissumit.“

Inuppassuit isumaqarput maniguunnermik ersersitsinermikkut nammineq nikanarsagaallutik. Silarsuarmi aqutsisut taama isumaqarunarput. Naak inuiaakkuutaat taakku piumasaannut naalatsigitikkaluartut, politikkikkut aqutsisut maniguullutik kukkunerminnik nassuerutiginninnissartik ajornakusoortittarpaat. Naalagaaffimmi qullersaasoq ima oqartoq: ’Tamanna ajuusaarutigaara,’ nutaarsiassatsialaavoq. Naalagaaffimmi atorfeqartuusimasup ukiualuit matuma siorna ajunaarnersuarmut tunngatillugu kukkusimanini utoqqatsissutigimmagu, oqaasii tusagassiuutini eqqartorneqangaatsiarput.

Oqaatsinik qinerlerfissiami maniguunneq qanoq nassuiarneqarnersoq malugiuk: „Maniguunneq imaluunniit imminut angisuutinnginneq pissusiuvoq . . . pingaarniartuunerup imaluunniit makitasuunerup akerlia.“ Tassa maniguunneq imminut qanoq isiginermut attuumassuteqarpoq, allanit qanoq isigineqarnermut pinnani. Nammineq kukkussutigisanik nassuerutiginninneq ilumoorlunilu  isumakkeerfigeqquneq inuttaanut nikanarsaataanngilaq; akerlianilli inuk taamaattoq nuannarineqarnerulersarpoq. Biibilimi ima allassimavoq: „Inuup uummataa makitasuujusoq ajunaarnerup siulerisarpaa; makitajuitsuuneq ataqqinarsinerup siulerisarpaa.“ — Ussatit 18:12.

Politikerit kukkussutigisaminnik utoqqatsissuteqarneq ajortut pillugit maluginiagaqarsimasoq ima oqarsimavoq: „Ajoraluartumik isumaqannguatsiarput taamatut nassuerneq sanngiinnermut ersiutaasoq. Inuit sanngiitsut nalornisullu qaqutiguinnaq utoqqatsertarput. Inuilli sapiitsut pissuserissullu misigineq ajorput imminut ataqqinninnerminnut ajoqutaasoq ima oqarunik: ’Kukkuvunga.’“ Politikerit kisimik taamaanneq ajorput. Pingaarniartuujunnaarluni maniguunnissaq ilungersuutigigaanni isumaqatigiinngissutit aaqqinneqarsinnaanerat ilimanarneruvoq. Tamatuma ilumoornera ilaqutariit qanoq misigigaat malugiuk.

Isumaqatigiinngissuteqarneq Juliep qatanngunnilu Williamip akunnerminni nuanniilliuutigilerpaat. Williamip Julie uialu Josef kamaatingaaramigit attaveqarfigiunnaavippai. Allaat Juliep Josefillu ukiut ingerlaneranni tunissutigisarsimasaat utertippai. Qaammatit ingerlaneranni qatanngutigiit qanimut attaveqatigittuugaluit narrutsassimaartunngorput.

Josefili aalajangerpoq najoqqutassaq Matthæusi 5:22, 23-mi allassimasoq malinniarlugu. Saamalluni sakiatsiani qanillattorniarlugu allaffigaa ajuallatsissimagamiuk utoqqatserfigalugu. Nulianilu kajumissaarpaa qatanngunni isumakkeerfigeqqullugu. Williamip paasiartulerpaa Julie Josefilu ilumoorlutik eqqisseqatiginninniartut, saammariartulerporlu. Williamip nuliatalu Julie Josefilu naapeqatigaat; tamarmik utoqqatserput, eqitaarput, ikinngutigeeqqilerlutillu.

Isumaqatigiinngissutit aaqqinnissaat erinisuutigigukkit, taava Biibilimi najoqqutassiaq maliguk pineqartorlu eqqisseqatigalugu. Jehovap ikiussavaatit. Taava Guutip itsaq Israelimut oqaasii illit aamma misigissavatit: „Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ — Esaja 48:18.  (wE 1/3 05)

[Quppernerup ataani ilanngussat]

[Qupp. 7-mi assiliartaq]

Utoqqatserneq ajunngitsumik attaveqatigiittoqaqqilissutaagajuppoq