Suliat kisiisa pissutiginagit, aammali ajunngissuseq pisassarinngisaraluaq pissutigalugu annaanneqarneq

„Annatsitaavusi uppernikkut. . . . Suliat tamatumunnga pissutaanngillat suliaminik usorsitsaaruteqartoqassanngimmat.“ — EFESOSIMIUT 2:8, 9.

1. Kristumiut inuttut namminneq suliarisimasatik eqqarsaatigalugit inunnit amerlanerusunit qanoq allaaneruppat, sunalu pissutaava?

ULLUMIKKUT inuppassuit angusimasatik tulluusimaarutigisarpaat, tamakkulu usorsitsaarutigiumasarpaat. Kristumiut taamaannaveersaartariaqarput. Namminneq suliarisimasatik, aamma pallorfiginninnermut ilumoortumut tunngasut, nittarsaannaveersaartariaqarpaat. Jehovalli innuttaasa ataatsimut isigalugit suliarisimasaat nuannaarutigisarpaat, namminnerli suliarisimasaminnik nittarsaassineq ajorput. Nalunngilaat Jehovamut kiffartornermi eqqortumik pissutiginiagaqarneq inuttut nammineq angusimasanit pingaaruteqarnerusoq. Inuup naggataatigut inuunermik naassaanngitsumik tunissutisiumaartup suliani pissutiginagit, upperninili Guutillu ajunngissusia pisassarinngisaraluaq pissutigalugit, tamanna angussavaa. — Lukasi 17:10; Johannesi 3:16.

2, 3. Paulusip suna usorsisimaarutigaa, aamma sooq taamaaliorpa?

² Apustili Paulusip tamanna paasisimalluarpaa. ’Kapinartup timiminut kappusimasup’ peerneqarnissaa pingasoriarluni qinnutigereermagu Jehovap ima akivaa: „Saammaannera [Ajunngissusera pisassarineqanngikkaluartoq, NV] naammagissavat, pissaanera sanngiissutsimi naammatsittarmat.“ Maniguulluni Jehovap aalajangigaa akueraa imalu allalluni: „Tassami sanngiissusera usorsisimaarutigiumanerugaluarpara Kristusip pissaaneranut inigeqqullunga.“ Taassuma maniguunnera ilaarusuttariaqarparput. — 2 Korinthimiut 12:7-9.

³ Paulusi kristumiutut kiffartornermi asseqanngitsunik angusaqarsimagaluarluni, nalunngilaa nammineq immikkut ittunik piginnaaneqarnini tamatumunnga pissutaanngitsoq. Anneruniajuilluni ima allappoq: „Uanga illernartunit tamanit nikanarnersaasunga saammaanneq [ajunngissuseq pisassarinngisaraluaq, NV] manna pivara  Kristusip peqangaassusia siunersissaanngitsoq Guutimik nalusunut nalunaajaatigeqqullugu.“ (Efesosimiut 3:8) Imminut nersunngilaq imminullu iluartuutilluni makitasuujunani! „Guutip makitasuut akerartorpai, qanilaartulli saammaattarpai [ajunngissusermik pisassarinngisaraluamik tunisarpai, NV].“ (Jaaku 4:6; 1 Petrusi 5:5) Paulusip maligassiaa malittarparput maniguullutalu qatanngutitsinnit tamanit nikanarnerpaasutut imminut isigaluta?

„Allat ilissinnit annerutissigit“

4. Sooq allanik imminit annerutitsinissaq ilaannikkut sapernarsinnaasarpa?

⁴ Apustili Paulusip kristumiut Filippimiittut ima allaffigai: „Namminissarsiorneq imminulluunniit angisuutinneq tunngavigalugit iliuuseqartaqinasi, makitajuitsuunissigulli allat ilissinnit annerutissigit.“ (Filippimiut 2:3) Siunnersuutip tamatuma maleruarnissaa sapernarsinnaavoq, ingammik suliaqarutta akisussaaffittalimmik. Taamatut sapernartitsineq pissuteqarsinnaavoq unammillernerup anersaavanit ullumikkut silarsuup ilisarnaatigisaanit sunnerneqarsimanitsinnik. Immaqa meeraanitsinniilli unammisaqarneq sungiusimavarput, qatanngutitsinnik atuaqatitsinnilluunniit. Imaassinnaavoq timersoqatitsinni atuaqatitsinniluunniit pikkorinnerpaanngorniarnissamut kajumissaarneqartuartarsimasugut. Soorunami sapinngisamik iliuuseqarneq nersornartuuvoq. Kristumiulli sapinngisaminnik ilioraangamik allanit malugineqarumallutik taamaaliorneq ajorput, namminnerli tamakkiisumik iluaqutiginiarlugu immaqalu allanut iluaqutaatinniaatigalugu taamaaliortarput. Pikkorinnerpaanngorniartuarnerli navianarpoq. Sooq?

5. Unammillerpalaartuuneq killilersimaanngikkaanni qanoq kinguneqarsinnaava?

⁵ Unammillerpalaartuuneq namminissarsiortuunerlu killilersimaanngikkaanni soqutigittaatsunngortoqarsinnaallunilu pingaakujuttunngortoqarsinnaavoq. Assersuutigalugu allat piginnaanerinik immikkullu pisinnaatitaaffiinik sinngaginnittoqalersinnaavoq. Ussatit 28:22-mi ima allassimavoq: „Tigumatooq pisuunngorniapallattaqaaq, ilisimasanngilaa ajorsaleratarsinnaagami.“ Allaat innimiilliorluni pisinnaatitaaffiginngisamik suliaqarniartoqalersinnaavoq. Iliuutsini eqqortutut isigineqalersinniarlugit isornartorsiuisoqalersinnaallunilu naammagittaalliortoqalersinnaavoq — kristumiulli taamaaliornaveersaartariaqarput. (Jaaku 3:14-16) Aamma isumaqartoqalersinnaavoq isummani kisimi atorsinnaasoq.

6. Unammillerpalaartunngornissamut Biibilimi qanoq mianersoqquneqarpugut?

⁶ Taamaattumik Biibilimi ima allassimavoq: „Immitsinnut angisuusoreqinata, kamassaaqinata sinngaateqinatalu.“ (Galatiamiut 5:26) Apustili Johannesip kristumiu taamatut isiginnittaaseqalersimagunartoq eqqaavaa. Ima allappoq: „Ilagiinnut allagaqarpunga, Diotrefesillu taakkunani tamatigut salliujumasartup akuersaanngilaatigut. Taamaattumik tikiukkuma eqqaasikkumaarpara qanoq iliornerinik, tassa mamarlerluta ajortumik oqallisigisarsimammatigut.“ Taama pisoqaraangat alianartaqaaq! — 3 Johannesi 9, 10.

7. Ullumikkut silarsuarmi unammillerfiusumi kristumiu qanoq iliornaveersaassava?

⁷ Kristumiuugaluarluni unammillernermik sumilluunniit pinngitsuuisinnaasorineq piviusorsiornerunngilaq. Assersuutigalugu niuernermut tunngatillugu, inuit suliffiilluunniit allat immisut nioqqutissiallit kiffartuutillilluunniit aningaasaqarnikkut unammillerneqartariaqalersinnaapput. Allaalli pissutsini taamaattuni kristumiup niuertut allat inussiarnisaarfigissallugillu ataqqissallugillu soqutigissavai. Peqquserluttuliussanngilaq kristumiorpalunngitsumillu iliuuseqassanani niuernermilu naakkittaatsutut ilisimaneqalerumassanani. Ima isumaqassanngilaq sunaluunniit pineqaraluarpat inuunermi pingaaruteqarnerpaaq tassaasoq tamanit pitsaanerpaaneq. Silarsuarmut tunngasut eqqarsaatigalugit kristumiu taamaattussaappat, tamanna guutisiorneq eqqarsaatigalugu pingaaruteqarnerungaassaaq!

„Allanut naleqqiunnagit“

8, 9. (a) Sooq utoqqaanertat kristumiut imminnut unamminissamut pissutissaqanngillat? (b) Petrusip allagai siulliit 4:10 sooq Jehovap kiffaanut tamanut tunngatinneqarsinnaava?

⁸ Kristumiut guutisiornerminnut isiginnittaaserisariaqagaat oqaatsini isumassarsiarititaasuni ima allaatigineqarpoq: „Kialuunniit nammineq suliani misilissavaa, sulianilu namminiinnaq  usorsisimaarutigissavai allanut naleqqiunnagit.“ (Galatiamiut 6:4) Ilagiinni utoqqaanertat nalunngilaat ataasiussuseqarlutik qanittumik suleqatigiittussaallutik imminnullu unammisussaanatik. Tamarmik immikkut ilagiit ingerlalluarnissaannut iluaqutaasinnaanertik nuannaarutigaat. Taamaalillutik unammillerneq ajoqutaasoq sunaluunniit pinngitsoortittarpaat suleqatigiilluarnermikkullu ilagiinniittunut tamanut maligassaalluarlutik.

⁹ Utoqqaanertat ilaat utoqqaassusertik, misilittagaqarnertik piginnaanitilluunniit pissutigalugit allanit iliuuseqarnerusinnaapput. Ilaat aamma paasisimasaqarnerusinnaapput. Taamaattumik utoqqaanertat Jehovap peqatigiissortaani assigiinngitsunik akisussaaffeqarput. Imminnulli sanilliunnatik Petrusip siunnersuutaa una eqqaamavaat: „Guutip saammaanneranut [ajunngissusianut pisassarinngisaraluamut, NV] assigiinngeqisunik ersiuteqartartumut pilittaalluartutut kiffartuuteqatigiigitsi, tamassi immikkut saammaannermit tunissutisiarsi naapertorlugu.“ (1 Petrusi 4:10) Allassimaffik taanna Jehovap kiffaanut tamanut tunngatinneqarsinnaavoq, tamarmimmi eqqorluartumik ilisimasaqarneq annerusumik minnerusumilluunniit tunissutisiarisimavaat kristumiutullu oqaluusseqataanissaq immikkut pisinnaatitaaffigalugu.

10. Kiffartornerput illernartoq Jehovamit akuerineqassappat suna pisariaqarpa?

¹⁰ Kiffartornerput illernartoq Jehovamit iluarineqassaaq aatsaat asanninneq tunniusimanerlu pissutigalugit allanullu anneruniarnata kiffartorutta. Taamaattumik pallorfiginninneq ilumoortoq siuarsarniarlugu iliuutsitsinnut oqimaaqatigiissumik isiginnittaaseqarnissaq pingaaruteqarpoq. Kinaluunniit allap pissutiginiagaanik eqqorluinnartumik naliliisinnaanngilaq. Jehovalli „inuup uummataa isigisarpaa“. (1 Samueli 16:7; Ussatit 24:12) Taamaattumik ilaannikkut imminut ima aperisarnissaq pitsaassaaq: ’Uppernikkut suliaqarninnut suna pissutigaara?’ — Tussiaat 24:3, 4; Matthæusi 5:8.

Suliatsinnut eqqortumik isiginnittaaseqarneq

11. Kristumiutut oqaluussinermi iliuutsitsinnut tunngatillugu qanoq aperinissaq silatusaarnerua?

¹¹ Pissutiginiagaq Jehovamit akuerineqarnissamut pingaarnerpaajuppat, taava uppernikkut suliat qanoq pingaartitsigissavavut? Eqqortumik pissutiginiagaqarluta kiffartortuartilluta, qanoq iliuuseqarnitsinnik qanorlu iliuuseqartiginitsinnik nakkutiginninnissaq pisariaqarami? Taamatut aperineq silatusaarneruvoq, kissaatiginngilarpummi kisitsisit nalunaarusiallu uppernikkut sulianit pingaartinnerunissaat nalunaarusialluunniit pitsaasup kristumiutut kiffartornitsinni pingaarnerpaanngortinnissaa.

12, 13. (a) Oqaluussinitsinnik nalunaarusiortarnitsinnut pissutaasunik eqqaasaqarit. (b) Silarsuaq tamakkerlugu nalunaarusiaq takugaangatsigu suut nuannaarutigisarpavut?

¹² Malugiuk atuakkami Organiseret til at gøre Jehovas vilje-mi qanoq allassimasoqarnersoq: „Jiisusi Kristusip ajoqersugaasa siulliit oqaluussinermi siumukarneq pillugu nalunaarusiat soqutigisimavaat. (Mark 6:30) Biibilimi Apustilit Suliaat-ni oqaluttuarineqarpoq Piinsip ulluani anersaaq illernartoq ajoqersukkanut kuineqarmat 120-t missaat najuuttut. Sivitsunngitsoq ajoqersukkat 3000-inngorput kingusinnerusukkullu 5000-inngorlutik. . . . (ApS 1:15; 2:5-11, 41, 47; 4:4; 6:7)“ Amerliartornermik nalunaarusiaq tamanna ajoqersukkanut qiimmassaataangaarsimassaaq. Jehovap Nalunaajaasuisa taamatulli eqqortumik nalunaarsorniartarpaat suliaq, Jiisusip oqaasiisa ukua eqquunnerattut, silarsuaq tamakkerlugu suliarineqartoq: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14) Nalunaarsuinerni imaluunniit nalunaarusiani taamaattuni silarsuaq tamakkerlugu oqaluussinermi suliarineqartut pillugit pissutsit piviusut takuneqarsinnaalertarput. Takuneqarsinnaasarpoq sumi ikiorneqarnissamik pisariaqartitsisoqarnersoq Biibililersaarutillu sorliit qanorlu amerlatigisut oqaluussinermik siuarsaanissamut pisariaqartinneqarnersut.

¹³ Oqaluussinitsinnik nalunaarusiornikkut nutaarsiassamik nuannersumik oqaluussissutiginninnissamik peqqussut sunniuteqarluarnerusumik naammassisinnaalissavarput. Aammattaaq nunani allani oqaluussineq pillugu tusakkavut tamatsinnut qiimmassaataasarput. Amerliartortoqarnera  siumukartoqarneralu pillugit tusagaqaraangatta, tamanna nuannaarutigingaartarparput, suliniuteqarnerunissamut kajumississutigisarparput paasisarlutigulu suliarput Jehovap pilluaqqugaa. Aamma uagut nammineq nalunaarusiarput silarsuaq tamakkerlugu nalunaarusiamut ilaasoq nalunagu nalerisimaarnangaarami, ilaa? Soorunami uagut nammineq nalunaarusiarput silarsuaq tamakkerlugu nalunaarusiamut sanilliullugu suunngitsuararsuuvoq, Jehovalli iliuutsivut malugisarpai. (Markusi 12:42, 43) Aamma eqqaamajuk illit nalunaarusiat ilanngunnagu silarsuaq tamakkerlugu nalunaarusiaq ilaannakuussammat!

14. Oqaluussinerup ilinniartitsinerullu saniatigut suut aamma Jehovamik pallorfiginninnitsinnut ilaappat?

¹⁴ Jehovamulli kiffaasutut tunniulluinnarsimasutut akisussaaffitsinnik naammassinninniarluta tamatta immikkut iliuuserisartagarpassuavut nalunaarusiamiinngillat. Assersuutigalugu nammineq atuaqqissaarnermut, kristumiut ataatsimiinnerini najuunnermut peqataanermullu, ilagiinni suliassanut uppeqatinillu ikiuinermut qanoq piffissamik atuitigisarnersugut, silarsuarlu tamakkerlugu oqaluussinermik aningaasatigut qanoq tapersersuitigisarnersugut ilaallu ilanngullugit nalunaarusiamut ilaanngillat. Taamaattumik oqaluussinitsinnik nalunaarusiaq aallussilluartuarnissatsinnut eqiatsitaalinnginnissamullu iluaqutigaarput, kisianni aamma nalunaarusiamut eqqortumik isiginnittaaseqartariaqarpugut. Silarsuarmi nutaami inuunissamut isissutissatut isigisussaanngilarput.

’Inuiaat ajunngitsuliornissamik noqqaassuteqartut’

15. Suliaannaat annassutigisinnaanngikkaluarivut sooq pisariaqarpat?

¹⁵ Erseqqippoq suliaannaat annassutigisinnaanngikkaluarlutigik pisariaqartut. Taamaattuminguna kristumiut ’inuiannik ajunngitsuliornissamik noqqaassuteqartunik’ taaneqartut aamma ’imminnut isumageqatigiinnissamik asaqatigiinnermut ajunngitsuliornermullu kajumissaaqatigiinnissamik’ kajumissaarneqartut. (Titusi 2:14; Hebræerit 10:24) Biibilimik allattut ilaat alla, ajoqersugaq Jaaku, ima allappoq: „Soorlu timi anersaartunngitsoq toqungasoq, taamattaaq upperneq sulianik ilaqanngitsoq toqungavoq.“ — Jaaku 2:26.

16. Sulianit suli pingaaruteqarnerusoq suua, sunalu mianersuutigisariaqarparput?

¹⁶ Tassa ajunngitsuliornerit pingaaruteqarput, ajunngitsuliornernulli pissutiginiagaq suli pingaaruteqarneruvoq. Taamaattumik silatusaarnerussaaq pissutiginiakkatsinnik ilaannikkut misissuisarnissarput. Inuulli kialuunniit inuup allap pissutiginiagaanut tunngasut tamarluinnaasa ilisimanngimmagit eqqartuussinaveersaartariaqarpugut. Ima aperineqarpugut: „Kinaagavit allap kiffaa eqqartuunniarpiuk?“ Akissullu imaappoq: „Naalagaata nammineq aalajangigassaraa qeqassanersoq orlussanersorluunniit.“ (Romamiut 14:4) Jehovap, tamanut Naalagaasup, taassumalu eqqartuussisunngortitaata, Kristusi Jiisusip, eqqartuutissavaatigut, suliavut tunngavigiinnarnagit, aammali pissutiginiakkavut, periarfissavut, asanninnerput tunniusimanerpullu tunngavigalugit.  Jehovap Kristusi Jiisusillu kisimik eqqortumik nalilersinnaavaat kristumiutut iliuusereqquneqartoq, apustili Paulusip oqaatigisaa una, iliuuserisimaneripput: „Sapinngisannik iliorit iluarisatut, sulisutut kanngusuutissaqanngitsutut, oqaatsimik sallusuissutaasumik eqqortumik atuisutut, Guutimut sassarniarlutit.“ — 2 Timotheusi 2:15, NV; 2 Petrusi 1:10; 3:14.

17. Sapinngisatsinnik iliorniaatigaluta Jaaku 3:17-imi allassimasoq sooq eqqaamasariaqarparput?

¹⁷ Jehova uagutsinnik piumaffiginninnermini ingasaassinianngitsuuvoq. Jaaku 3:17-imi allassimavoq „ilisimassut pavannga pisoq“ ’ingasaassinianngitsuusoq’ (NV). Taamaattumik tamanna eqqarsaatigalugu Jehovamik ilaarsinissarput silatusaarnerussannginnerpa — aamma inoqatitsinnut ilumut ajunngitsuliornerussannginnerpa? Taamaammat naleqqutinngitsunik anguneqarsinnaanngitsunillu imminut piumaffigissanngilagut qatanngutivullu aamma taamatut piumaffigissanagit.

18. Suliatsinnut Jehovallu ajunngissusianut pisassarinngisaraluamut oqimaaqatigiissumik isiginnittaaseqarutta suna qilanaarisinnaavarput?

¹⁸ Uppernikkut nammineq suliavut Jehovallu ajunngissusia pisassarinngisaraluaq oqimaaqatigiissumik isigiuartillugit, nuannaarneq Jehovap kiffaasa ilumoortut ilisarnaatigisaat pigiuassavarput. (Esaja 65:13, 14) Nammineq qanoq suliaqarsinnaatiginerput apeqqutaatinnagu, Jehovap innuttaminik tamanik pilluaqqusingaartarnera nuannaarutigisinnaavarput. ’Qinulluta, torlulalluta qujallutalu’ Guuti qinnuigiuassavarput sapinngisatsinnik iliornissamut ikioqqulluta. Taava ’eqqissinerup Guutimit pisup siuneqassusernit tamanit annerungaartup uummativut eqqarsaativullu sernigissavai Kristusi-Jiisusimi’. (Filippimiut 4:4-7) Aap, suliatsiguinnaanngitsoq, Jehovalli ajunngissusiatigut pisassarinngisaraluakkut annaanneqarsinnaanitsinnik ilisimaarinninnerput tuppallersaatigisinnaallugulu qiimmassaatigisinnaavarput! (wE 1/6 05)

Nassuiarsinnaaviuk sooq kristumiut

• suliarisimasaminnik usorsisimaaruteqartannginnersut?

• unammillerpalaartunngornaveersaartarnersut?

• oqaluussinertik pillugu nalunaaruteqartarnersut?

• uppeqatiminnik eqqartuussinaveersaartarnersut?

[Atuaqqissaarnermi apeqqutit]

[Qupp. 16, 17-mi assiliartaq]

Utoqqaanertat tamarmik immikkut ilagiit iluaqutissaannut iliuuseqaqataasinnaanertik nuannaarutigaat