Inunnut inuiannit tamaneersunut nutaarsiassaq nuannersoq

„Nalunaajaasigissavassi . . . nunarsuup isua tikillugu allaat.“ — APUSTILIT SULIAAT 1:8.

1. Inuit allat Biibilimi ajoqersuutigineqartunik ilinniartikkaangatsigik suna eqqumaffigisarparput, aamma sooq?

ILINNIARTITSISUT pikkorissut ilinniartitatik sunik ilinniartinnerlugit eqqumaffigiinnarnagu, aammali ilinniartitseriaasertik eqqumaffigisarpaat. Uaguttaaq tamanna eqqumaffigisarparput allat sallusuissut Biibilimeersoq pillugu ilinniartikkaangatsigik. Tusarliussaq kisiat eqqarsaatiginagu, aammali periaaserput eqqarsaatigisarparput. Tusarliussaq, Guutip naalagaaffia pillugu nutaarsiassaq nuannersoq, allanngorneq ajorpoq, oqaluusseriaaserpulli ilinniartitseriaaserpullu naleqqussartarpavut. Sooq? Sapinngisamik inuit amerlanerpaat anguniarlugit.

2. Oqaluusseriaaserput oqaluussiffigisatsinnut naleqqussaraangatsigu kina ilaartarparput?

² Oqaluusseriaaserput pissutsinut naleqqussaraangatsigu, itsaq Guutip kiffai ilaartarpavut. Assersuutigalugu apustili Paulusi ima allappoq: „Juutinut juutiusutut ilerpunga . . . Inatsiseqanngitsunut inatsiseqanngitsutut ilerpunga . . . Sanngiitsunut sanngiitsunngorpunga sanngiitsut ilataariumallugit. Kikkut tamaasa peqatiginiartarsimavakka ilaannaannilluunniit annaassaqarumagaluarlunga.“ (1 Korinthimiut 9:19-23) Paulusip taamatut naleqqussartarnera kinguneqarluartarpoq. Aamma uagut oqaluussiffigisavut soqutigigutsigit saqqummiusseriaaserpullu taakkununnga naleqqussartarutsigu tamanna kinguneqarluassaaq.

’Nunarsuup isui’ tikillugit

3. (a) Oqaluussinitsinni sumik unamminiagassaqarpugut? (b) Esaja 45:22 ullumikkut qanoq eqquutitinneqarpa?

³ Nutaarsiassamik nuannersumik oqaluussissutiginnittunut oqaluussiffigisartakkap angissusia — tassa ’silarsuaq tamaat’ — unamminiarnangaarpoq. (Matthæusi 24:14) 1900-kkunni Jehovamut kiffaasorpassuit nutaarsiassap nuannersup nunanut amerlanerusunut anngunnissaa ilungersuutigisimavaat. Tamanna qanoq kinguneqarpa? Tusarliussaq nunarsuaq tamakkerlugu tupinnartumik siaruariartorpoq. 1900-kkut aallartilaarneranni nunani ikittuinnarni oqaluussinermik nalunaarusiortoqartarpoq, ullumikkulli Jehovap Nalunaajaasui nunani 235-ni oqaluussisarput! Aap, nutaarsiassaq nuannersoq ilumut ’nunarsuup isui’ tikillugit oqaluussissutigineqarpoq. — Esaja 45:22, NV.

4, 5. (a) Nutaarsiassamik nuannersumik siammarterinerup ilarujussua kikkut suliaraat? (b) Immikkoortortaqarfiit ilaannit oqaluussisartut taakkua oqaluussiffigisartagaanni oqaluussiniarlutik nunanit allanit nuussimasut qanoq allaatigineqarpat?

⁴ Sooq taamatut siumukartoqarpa? Tamatumunnga  pissutaasut arlaliupput. Ajoqersuiartortitat Napasuliaq Alapernaarsuiffiup Biibilimik Atuarfia Gilead-imi ilinniarnikut, maannalu ukiuni kingulliunerusuni qatanngutit angutit 20.000-ingajaat Kiffartortut Toqqakkat Atuarfiat-ni naammassisimasut, siumukarnermut pissutaaqataalluinnarput. Aamma Jehovamut nalunaajaasorpassuit namminneq akiliillutik nunanut oqaluussisartunik pisariaqartitsingaarfiusunut nuussimapput. Kristumiut imminnut pilliutigeriaannaasut taakkua — angutit arnallu, inuusuttut utoqqaallu, aappaqanngitsut aappallillu — nunarsuaq tamakkerlugu Guutip naalagaaffianik tusarliussamik oqaluussissutiginninnerup ilarujussua suliaraat. (Tussiaat 110:3; Romamiut 10:18) Suleqataanerat pingaartinneqaqaaq. Maluginiaruk immikkoortortaqarfiit ilaannit oqaluussisartut oqaluussiffigisartakkani immikkoortortaqarfinnut taakkununnga atasuni oqaluussiniarlutik nunanit allanit nunanut pisariaqartitsiffiunerusunut nuussimasut qanoq allaatigineqarsimanersut.

⁵ „Oqaluussisartut eqiasuitsut taakku sumiiffinni avinngarusimasuni oqaluussinermi siuttuupput; ilagiinnik pilersitsisarput qatanngutillu tassaniittut anersaakkut ineriartornissaannik ikiortarlugit.“ (Ecuadori) „Nunami allamiut hundredellit maani kiffartortut taakku angerlaraluarpata ilagiit ingerlalluarpiarunnaassagaluarput. Tamaaniinnerat pilluaqqussutaavoq.“ (Dominikanske Republiki) „Ilagiitta ilarpassuini qatanngutit arnat amerlanerussuteqarput, ilaannikkut ilagiinniittut 70 procentii arnaasarput. (Tussiaat 68:12) Taakkua amerlanersaat sallusuissummi nutaajupput, qatanngutilli arnat pioneriusut nunanit allaninngaanneersut nutaanik taakkuninnga ilinniartitsinermikkut ikiuutaangaarput. Qatanngutit arnat nunami allamiut taakku uagutsinnut ilumut tunissutaapput!“ (Nuna Europap Kangisissuaniittoq) Nunami allami kiffartornissat eqqarsaatiginikuuiuk? * — Apustilit Suliaat 16:9, 10.

’Immikkut oqaasillit tamalaat angutitaasa ilaat qulit’

6. Oqaluussinitsinni oqaatsit tungaasigut unamminiagassaqarnera Zakaria 8:23-mi qanoq ersersinneqarpa?

⁶ Unamminiagassaq alla tassaavoq nunarsuarmi  assigiinngitsorpassuarnik oqaaseqarnera. Guutip oqaasiani ima siulittuuteqarpoq: „Taamaalisukkut inuiaat assigiinngitsut tamarmik [Immikkut oqaasillit tamalaat, 1900/1961] angutitaasa ilaasa quliullutik angut Judakkuusoq ataaseq atisaata nuuagut tigullugu oqarumaarput: ’Ingerlaqatigissavassi tusaratsigu Guutip najoraasi.’“ (Zakaria 8:23) Siulittuutip tamatuma ullumikkut eqquunnerani angutit qulit taakku amerlangaartunut Saqqummersitat 7:9-mi eqqaaneqartunut assersuutaapput. Malugiulli taakku inuiaqatigiinnit tamaneersuuginnaratik, Zakarialli siulittuutaa naapertorlugu aamma ’immikkut oqaasilinnit tamalaaneersuusussaasut’. Siulittuutip immikkoortuata pingaarutillip tamatuma eqquunnera takoreerparput? Aap.

7. Kisitsisit suut takutippaat inuit ’immikkut oqaasillit tamalaat’ nutaarsiassamik nuannersumik tusarlerneqartartut?

⁷ Kisitsisitigut naatsorsueqqissaarnerit makku eqqarsaatigeriakkit. Ukiut 50-it matuma siorna atuagassiaativut atuagaativullu oqaatsinut 90-inut saqqummersinneqartarput. Ullumikkut oqaatsinut 400-nit amerlanerusunut saqqummersinneqartarput. „Kiffaq ilumoortoq silatoorlu“ atuagassianik atuakkanillu pilersuiniarluni — allaat oqaatsit ikittuinnarnit atorneqartut atorlugit saqqummersitsiniarluni — sapinngisaminik iliortarsimavoq. (Matthæusi 24:45) Assersuutigalugu maanna Biibililersaarutinik atuagassiaateqarlutalu atuagaateqarpugut kalaallisut (oqaatsit inunnit 47.000-init oqaaserineqartut), Palaumiutut (oqaatsit inunnit 15.000-init oqaaserineqartut) Yapimiutullu (oqaatsit inunnit 7000-init ikinnerusunit oqaaserineqartut).

„Matu angisooq“ periarfissanut nutaanut ammasoq

8, 9. Silarsuarmi qanoq pisoqarnera pissutigalugu „matu angisooq“ uagutsinnut ammarneqarpa, tamannalu pissutigalugu Jehovap Nalunaajaasui tusindillit qanoq iliuuseqarpat?

⁸ Ullumikkulli inunnut immikkut oqaasilinnut tamalaaneersunut oqaluussiniarluta nunanut allanukartariaqanngilagut. Ukiuni kingulliunerusuni nunanut aningaasatigut atugarissaarfiusunut millionilinnik nunasisoqartalerneratigut qimaasoqartalerneratigullu tamaani inunnik allamiutut oqaasilippassuaqalersimavoq. Assersuutigalugu Parisimi oqaatsit assigiinngitsut 100-t missaat oqaaserineqarput. Torontomi Canadamiittumi oqaatsit assigiinngitsut 125-t oqaaserineqarput, Londonimilu oqaatsit assigiinngitsut 300-nit amerlanerusut oqaaserineqarlutik. Ilagiit oqaluussiffigisartagaanni nunami allamiorpassuaqarnera pissutigalugu „matu angisooq“ ammarneqarpoq taamaalillunilu nutaarsiassap nuannersup inunnut inuiannit tamaneersunut oqaluussissutiginissaanut nutaanik periarfissaqalerluni. — 1 Korinthimiut 16:9, NV.

⁹ Jehovap Nalunaajaasui tusindillit unamminiarnartoq tamanna pissutigalugu allamiut oqaasiinik ilinnialerput. Taakkua amerlanersaannut tamanna imaannaanngitsuuvoq, ilungersorneralli nunasisunik qimaasunillu sallusuissummik Biibilimeersumik paasinninnissaannik ikiuinerminnik nuannaarutiginninnerannit akimorneqangaartarpoq. Ukiualuit qaangiuttut Europap Kippasissuani ataatsimeersuarnermi kuisittut 40 procentingajaat nunanit allaneersuupput.

10. Atuagassiaaraq Godt nyt til folk af alle nationer illit qanoq atornikuuiuk? (Atuagassiaaqqap sumik imaqarnera pillugu ungalusaq qupperneq 18-imiittoq takuuk).

¹⁰ Ilumoorpoq amerlanersavut allamiut oqaasiinik ilinniarnissamut periarfissaqanngitsut. Taamaakkaluartorli nunasisut oqaluussiffigisinnaavavut  atuagassiaaraq nutaaq Godt nyt til folk af alle nationer * atorlugu, taannami oqaatsini assigiinngitsorpassuarni tusarliussamik Biibilimeersumik kajumissinartumik imaqarpoq. (Johannesi 4:37) Atuagassiaaraq taanna oqaluussinermi atortarpiuk?

Inuit tusarliussamik ilassinninngikkaangata

11. Oqaluussiffigisartakkat ilaanni unamminiagassaq alla suna nalaattarparput?

¹¹ Saatani nunarsuarmut sunniuteqarnerujartuinnartillugu unamminiagassamik suli allamik nalaataqartarnerput nalinginnaagaluttuinnarpoq — tassa oqaluussiffigisartakkat ilaanni ikittuinnarnik tusaarusuttoqartarnera. Soorunami tamanna tupaallaatiginngilarput, Jiisusimmi taamaakkumaarnera siulittuutigaa. Nalerput pillugu ima oqarpoq: „Asanninneq amerlanerni nillertunngorumaarpoq.“ (Matthæusi 24:12) Aap, inuppassuit Guuti upperiunnaarpaat Biibililu ataqqiunnaarlugu. (2 Petrusi 3:3, 4) Taamaammat nunat ilaanni ikittuinnarnik Kristusimut ajoqersuganngortoqartarpoq. Imaanngilarli qatanngutitta aalajaatsut oqaluussiffigisartakkani taamaattuni oqaluussiniarlutik ilungersornerat asuliinnartoq. (Hebræerit 6:10) Sooq? Makku eqqarsaatigeriakkit:

12. Oqaluussinitsinnut siunertaasut marluk suuppat?

¹² Matthæusip iivangkiiliuani oqaluussinitsinnut siunertaasut marluk erseqqissarneqarput. Aappaa tassaavoq ’inunnik inuiannit tamaneersunik ajoqersuganngortitsissasugut’. (Matthæusi 28:19, NV) Aappaa tassaavoq Guutip naalagaaffianik tusarliussaq ’nalunaajaataassasoq’. (Matthæusi 24:14, NV) Siunertaasut marluk taakku tamarmik pingaaruteqarput, kingullerli immikkut ittumik isumaqarpoq. Sooq?

13, 14. (a) Kristusip najuunneranut nalunaaqqutip ilaa maluginiarnartoq suussava? (b) Suna eqqaamasassavarput, ingammik ikittuinnarnik tusaarusuttoqarfiusuni oqaluussigaangatta?

¹³ Matthæusi iivangkiiliumini allappoq apustilit Jiisusi ima aperigaat: „Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqqutaassava?“ (Matthæusi 24:3, NV) Akissummini Jiisusi oqarpoq silarsuaq tamakkerlugu oqaluussineq nalunaaqqutip ilagissagaa maluginiarnartoq. Ajoqersuganngortitsiortornissaq pivaa? Naagga. Ima oqarpoq: „Naalagaaffimmik nutaarsiassaq nuannersoq tamanna nunarsuarmi inuit najugarisaanni tamarsuarmi oqaluussissutigineqassaaq inuiannut tamanut nalunaajaatitut.“ (Matthæusi 24:14, NV) Jiisusip taamaalilluni ersersippaa Guutip naalagaaffianik oqaluussissutiginninneq nalunaaqqutip ilagissagaa pingaarutilik.

¹⁴ Nutaarsiassaq nuannersoq oqaluussissutigigaangatsigu manna eqqaamassavarput: Ajoqersuganngortitsiortorniarnerput iluatsittuaannanngikkaluartoq ’nalunaajaasarpugut’. Taamaammat inuit uagutsinnik qanorluunniit ilassinnikkaluarunik tusarliussamik tusarnissamut periarfissinneqarput, taamaalillutalu Jiisusip siulittuutaanik eqquutititseqataavugut. (Esaja 52:7; Saqqummersitat 14:6, 7) Jordy, Europap Kippasissuani oqaluussisartoq inuusuttoq, ima oqarpoq: „Matthæusi 24:14-imik eqquutititseqataanermut Jehovamit atorneqarnera nuannaarutigeqaara.“ (2 Korinthimiut 2:15-17) Qularnanngilaq illit aamma taamatut misigisutit.

Akerlilersorneqaraangatta

15. (a) Jiisusip ajoqersukkani qanoq mianersoqquai? (b) Akerlilersorneqaraluarluta suna iluaqutigalugu oqaluussisinnaavugut?

¹⁵ Aamma akerlilersorneqarneq oqaluussinermi unamminiagassaraarput. Jiisusip ajoqersukkani tamanna pillugu ima mianersoqquai: „Atera pillugu inuiannit tamanit uumissorneqassaasi.“ (Matthæusi 24:9) Ullumikkut Jiisusip ajoqersugai kristumiut siulliit pineqarsimanerattut uumissorneqarlutillu  akerlilersorneqarlutillu malersorneqarput. (Apustilit Suliaat 5:17, 18, 40; 2 Timotheusi 3:12; Saqqummersitat 12:12, 17) Maannakkut nunat ilaanni taakku naalakkersuisunit inerteqqutigineqarput. Taamaakkaluartorli Guutip naalagaaffia pillugu nutaarsiassaq nuannersoq oqaluussissutigiuarpaat — aamma nunani taakkunani. (Amosi 3:8; Apustilit Suliaat 5:29; 1 Petrusi 2:21) Suna pissutigalugu taakku — aamma silarsuaq tamakkerlugu Jehovap Nalunaajaasui allat tamarmik — taamaaliorsinnaappat? Jehovap anersaani illernartoq atorlugu nukissaqalersittarpai. — Zakaria 4:6; Efesosimiut 3:16; 2 Timotheusi 4:17.

16. Oqaluussinerup Guutillu anersaavata imminnut ataqatigiilluinnarnerat Jiisusip qanoq erseqqissarpaa?

¹⁶ Guutip anersaavata oqaluussinerullu imminnut ataqatigiilluinnarnerat Jiisusip erseqqissarpaa ajoqersukkani ima oqarfigalugit: „Anersaap Illernartup tikippasi pissatsitaajumaarpusi, nalunaajaasigissavassilu . . . nunarsuup isua tikillugu allaat.“ (Apustilit Suliaat 1:8; Saqqummersitat 22:17) Versimi matumani pisussat tulleriiaarneqarnerat pingaaruteqarpoq. Siullermik ajoqersukkat anersaaq illernartumik tunineqarput, taavalu silarsuaq tamakkerlugu oqaluussilerput. Aatsaat Guutip anersaavanit ikiorneqarunik inuiannut tamanut nalunaajaajuarnissamut nukissaqassapput. (Matthæusi 24:13, 14, NV; Esaja 61:1, 2) Taamaammat Jiisusip anersaaq illernartoq ’ikiuisutut’ naleqqulluartumik eqqaavaa. (Johannesi 14:26, NV) Jiisusi oqarpoq Guutip anersaavata ajoqersukkat ilinniartissallugillu siulersussagai. — Johannesi 14:16; 15:26; 16:13.

17. Akerlilersorneqaraangatta anersaaq illernartumit qanoq ikiorneqartarpugut?

¹⁷ Nutaarsiassamik nuannersumik oqaluussissutiginninnitsinni sakkortuumik akerlilersorneqaraangatta Guutip anersaavanit qanoq ikiorneqartarpugut? Guutip anersaava uagutsinnik nakussatsitsisarpoq uagutsinnillu malersuisunik akiuisarluni. Kunngi Saulip inuunerani pisimasut ilaat assersuutigeriartigu.

Guutip anersaavanit akiorneqarneq

18. (a) Sauli qanoq allanngorujussuarpa? (b) Saulip qanoq ililluni Daavi toqoriaraluarpaa?

¹⁸ Sauli Israelikkut kunngiattut siullertut aallartilluarpoq, kingusinnerusukkulli Jehovamut naalakkunnaarpoq peqquneqarnermisullu iliornani. (1 Samueli 10:1, 24; 11:14, 15; 15:17-23) Tamatuma kingunerisaanik Guutip anersaavanit ikiorneqarunnaarpoq. Saulip Daavi kunngitut, tassa Saulip kingoraartissaatut, taninneqarsimasoq maannalu Guutip anersaavanit annertoqqusersorneqartoq kamaattorujussuanngorpaa. (1 Samueli 16:1, 13, 14) Taamaattumik Saulip Daavip kukkilattariarsorfigigaani toqoriaraluarpaa, ullullu ilaanni qalugiusani Daavip tungaanut naakkiuppaa ima oqarluni: „Iikkamut paagutissavara!“ Oqaluttuarineqarporli Daavi marloriarluni qimaariartarami eqqortinneq ajortoq. (1 Samueli 18:10, 11) Kingusinnerusukkulli Sauli ernerminit Jonatanimit, Daavip ikinngutaanit, saammartinneqarpoq imalu uppernarsaalluni: „Ilumut uumammat [Jehova], Daavi toqunneqassanngilaq!“ Kingusinnerusukkulli Saulip Daavi ’iikkamut  paaguteqqeriaraluarpaa’. Daavili „nigoriarmat Saulip naaligaataa iikkamut kapputiinnarpoq“. Taava Daavi qimaavoq, Saulilli malersulerpaa. Taamanimiilli Sauli Guutip anersaavanit akiorneqalerpoq. Qanoq ililluni? — 1 Samueli 19:6, 10.

19. Daavi qanoq ililluni Guutip anersaavanit illersorneqarpa?

¹⁹ Daavi pruffiiti Samuelimut qimaavoq, Saulilli angutitani aallartippai Daavi tigusareqqullugu. Daavip toqqorsimaffianut tikiukkamik, ’Guutip anersaavanit tikinneqarput, taakkulu pruffiitisut qamuuna tiguartipput’. Guutip anersaava sunnerneqaatigingaaramikku sooq aallartitaasimanerlutik puiorluinnarpaat. Sauli angutinik allanik marloriarluni aallartitseqqippoq Daavi tigusariartortillugu, siullermitulli pisoqartuaannarpoq. Naggataatigut Saulip Daavi tigusariniarlugu nammineq aallarpoq, Saulittaarli Guutip anersaava akiorsinnaanngilaa. Anersaap illernartup sunniineratigut uppippoq „ulloq unnuarlu tamaat“ nalaannalerluni, taamaalillunilu Daavi qimaasinnaanngorpoq. — 1 Samueli 19:20-24.

20. Saulip Daavimik malersuineranik oqaluttuaq qanoq ilinniarfigisinnaavarput?

²⁰ Saulimik Daavimillu oqaluttuaq taanna pingaarutilimmik ilinniarfigisinnaavarput: Guutip kiffaanik malersuisut Guutip anersaavanit akiorneqaraangamik iluatsinneq ajorput. (Tussiaat 46:12; 125:2) Jehovap siunertaraa Daavip Israelikkunnut kunngiunissaa. Kialuunniit tamanna allanngortissinnaanngilaa. Jehova aalajangereerpoq ullumikkut ’Naalagaaffimmik nutaarsiassaq nuannersoq oqaluussissutigineqassasoq’, kialuunniillu tamanna pinngitsoortissinnaanngilaa. — Apustilit Suliaat 5:40, 42.

21. (a) Ullumikkut akerlilersuisut ilaat qanoq iliortarpat? (b) Suna qularinngilarput?

²¹ Upperisarsiornikkut siuttut ilaat politikkikkullu aqutsisut ilaat akornuserniarluta salluliortarput ilaannikkullu nakuusertarlutik. Jehovalli anersaani atorlugu Daavimik illersuisimanermisut ullumikkut innuttani illersorumaarpai. (Malaki 3:6) Taamaattumik Daavitut qularata ima oqarpugut: „Guuti tatigigakku siooranngilanga. Inuit soriarsinnaanngilaannga.“ (Tussiaat 56:12; 121:1-8; Romamiut 8:31) Qanortoq Guutip naalagaaffia pillugu nutaarsiassap nuannersup inunnut inuiannit tamaneersunut oqaluussissutiginerani, tassa suliassatta Guutimeersup suliarinerani, Jehovap ikiuineratigut unamminiarnartut tamaasa iliuuseqarfigisartigit. (wE 7/1 05)

[Quppernerup ataani ilanngussat]

Eqqaamavigit?

• Oqaluussinerput qanoq naleqqussartarparput, aamma sooq?

• Oqaluussineq eqqarsaatigalugu periarfissat nutaat suuppat?

• Oqaluussinitsigut suna angusarparput, allaat ikittuinnarnik tusaarusuttoqarfiusuni?

• Guutip naalagaaffia pillugu nutaarsiassamik nuannersumik oqaluussissutiginninneq sooq akerlilersuisut kikkuugaluartulluunniit unitsissinnaanngilaat?

[Atuaqqissaarnermi apeqqutit]

[Qupp. 14-mi ungalusaq]

Nalerisimaangaarneq

„Jehovamut kiffartoqatigiikkamik pilluartut.“ Ilaqutariit Spaniamiit Boliviamut nuuttut taamatut allaatigineqarluarsinnaapput. Ilaqutariit ernerisa ilaat gruppe avinngarusimasumiittoq tapersersorniarlugu Boliviamukarpoq. Taassuma tassani kiffartornerminik nuannaarutiginninnera angajoqqaavisa killinneqaatigingaaramikku, sivitsunngitsoq ilaqutariit tamakkerlutik — ernitik sisamat 14-iniit 25-t tikillugit ukiullit ilagalugit — malinnaapput. Ernerisa taakkua ilaat pingasut maanna pioneriupput, taannalu siulliulluni aallartoq Kiffartortut Toqqakkat Atuarfiat-ni naammasseqqammerpoq.

Angelica, 30-nik ukiulik Canadameersoq Europap Kangisissuani kiffartortoq, ima oqarpoq: „Unamminiagassat amerlaqaat, oqaluussinermili inunnik ikiuisarnera nalerisimaarutigaara. Aamma qamuuna attortissutigisarpara oqaluussisartorpassuit maaniittut qujamasunnerminnik ersersitsivigisarmannga ikiorniarlugillu tikissimanera pillugu qutsavigisarlunga.“

Arnat qatanngutigiit USA-meersut 30-t pallillugit ukiullit maannalu Dominikanske Republikimi kiffartortut ima oqarput: „Sorpassuit sungiusimasatsinnit allaanerupput, tamakkulu sungiunniartariaqarpavut. Pinertusaarpugulli, Biibilimillu atuaqqissaaqatigisartakkatta ilaat arfineq-marluk maanna ataatsimiigiartarput.“ Qatanngutigiit taakku oqaluussisartunik illoqarfimmi ilageeqanngitsumiittunik gruppemik pilersitseqataapput.

Laura, qatanngut 30-t pallillugit ukiulik, nunami allami ukiut sisamat sinnerlugit kiffartorsimavoq. Ima oqaluttuarpoq: „Pilimanianngitsumik inuuniarlunga aalajangerpunga taamaaliorlungalu. Tamanna oqaluussisartut allat pilimanianngitsumik inuunerup piitsuunermik pissuteqannginneranik, inuttulli nammineq aalajangernermik isumakkullu peqqissuunermik pissuteqarneranik paasinninnissamut iluaqutigaat. Allanik, ingammik inuusuttunik, ikiuisinnaaneq uannut nuannaarutaavoq, tamannalu pissutigalugu nunami allami kiffartornerup artornartui artornarunnaartutut ilisarput. Maani kiffartornera inooriaatsimik allamik sumilluunniit taarserusunngilara, maaniittuassaangalu tamanna Jehovamit kissaatigineqartuartillugu.“

[Qupp. 18-mi assiliartaq]

Atuagassiaaraq Godt nyt til folk af alle nationer

Atuagassiaaqqami Godt nyt til folk af alle nationer-imi tusarliunneqartoq quppernermi ataatsimiippoq oqaaserpassuarnullu nutserneqarsimalluni. (Qallunaatuumi oqaatsinut 60-inut. Oqaatsinut allanut nutsikkat ilaanni oqaatsinut 92-inut). Tusarliussaq kinaassusersiutit siulliat atorlugu allagaavoq, taamaammat pulaarneqartup tusarliussaq atuaraangagu soorlu illit taanna oqaluukkit.

Ungaluata iluatungaaniippoq nunarsuup assinga. Pulaagaq attaviginiarlugu nunarsuup assinga taanna atorneqarsinnaavoq. Assersuutigalugu nunap illit nammineq najukkavit sumiinnera tikkuarsinnaavat, ussersorlutillu paasitissinnaavat pulaakkavit suminngaannernera paaserusullugu. Taamaalillutit immaqa pulaakkat ittoorunnaarsissinnaavat nuannersumillu eqqissisimasumillu attaveqarfigisinnaallugu.

Atuagassiaaqqap siulequtaani uagut paasisinnaanngisatsinnik oqaluttut ikiorniarlugit qanoq iliortoqarsinnaaneranik siunnersuuteqarpoq. Taanna atuarluaruk siunnersuutigineqartorlu maleqqissaarlugu. Tamanna allat inuunerannut aalajangiisuuvoq.

Atuagassiaaqqap ujarliutaani oqaatsit kingornanni oqaatsinut ilisarnaateqarpoq. Ilisarnaatit taakku atuagassiap atuakkalluunniit sumiutut naqiterneqarsimaneranik paasissutissatut atuagassiaatitsinni atuagaatitsinnilu atorneqartarput. Naqitaaqqamik, atuagassiaaqqamik, atuagassiamik atuakkamilluunniit allamiutuumik ujaasigaanni, oqaatsinut ilisarnaat iluaqutigalugu ujagaq nanineqarsinnaavoq.

[assiliartaq]

Atuagassiaaraq una oqaluussinermi atortarpiuk?

[Qupp. 15-mi assiliartat]

Atuagassiaativut atuagaativullu Biibililersaarutit maanna oqaatsinut 400-nit amerlanerusunut nutserneqarsimapput

GHANA

SAAMIT NUNAAT (SVERIGE)

FILIPPINERIT REPUBLIKI

[Qupp. 15-mi assiliartaq]

Nunami oqaluussisartunik pisariaqartitsiffiungaartumi kiffartorsinnaavit?

ECUADORI

DOMINIKANSKE REPUBLIKI