’Pitsaanerusut pillugit nutaarsiassat nuannersut’

„Qaqqani takusap ila takorannissusia: pisuinnarluni aggerpoq . . . pitsaanerusut pillugit nutaarsiassanik nuannersunik tusarliisoq.“ — ESAJA 52:7.

1, 2. (a) Ajortunik sunik ullut tamaasa pisoqartarpa? (b) Inuppassuit nutaarsiassanik nuanniitsunik tusagaqartuarnertik qanoq sunnerneqaatigisarpaat?

SILARSUARMI tamarmi inuit nutaarsiassanit nuanniitsunit sapersisilluinnarneqartutut misigipput. Radio ikikkaangamikku nappaatit toqoraataasut nunarsuaq tamakkerlugu siaruaattut pillugit nutaarsiassanik annilaarnartunik tusagaqartarput. Fjernsyni ikikkaangamikku meeqqanik perlilersunik ikioqqusunik assilisat amiilaarnartut takusarpaat. Aviisi qupperaraangamikku qaartartumeerinerit illut qaartinneqarnerannik inuppassuillu pisuussuteqanngitsut toqutaanerannik kinguneqartut pillugit atuartarput.

² Ullut tamaviisa ajortunik pisoqartarpoq. Qularutissaanngilaq ’silarsuup matuma pissusia nikittartoq’ — ajortikkaluttuinnarpoq. (1 Korinthimiut 7:31, NV) Europap kitaani atuagassiami nutaarsiassanut tunnganerusumi allassimavoq silarsuaq tamarmi ilaannikkut „suujunnaarluinnalersutut“ ittartoq. Taamaammat tupinnanngilaq inuit amerliartuinnartut ernumammata. Angut tv-mi nutaarsiassanik isiginnaartarnerluni aperineqartoq ima oqarmat qularnanngitsumik inuppassuit isumaqatigissavaat: „Nutaarsiassat takoreeraangakkit assut nikallungasarpunga. Nutaarsiassat tamarmik nuanniitsuusarput, tamannalu artornaqaaq.“

Nutaarsiassaq inuit tamarmik tusartariaqagaat

3. (a) Nutaarsiassamik nuannersumik sumik Biibili imaqarpa? (b) Sooq nutaarsiassaq taanna pisariaqartipparput?

³ Silarsuarmi matumani nuannersunik nutaarsiassaqanngivippa? Naamik, taamaattoqanngilaq! Nutaarsiassamik nuannersumik Biibilimiittoqarnera nalunagu tuppallernarpoq. Biibili naapertorlugu nappaatit, kaanneq, pinerluttuliorneq, sorsunneq naqisimanninnerillu tamarmik Guutip naalagaaffianit peerneqassapput. (Tussiaat 46:10; 72:12) Nutaarsiassap tamatuma tusarnissaa inuit tamarmik pisariaqartippaat, ilaa? Uagut taamatorluinnaq isumaqarpugut. Taamaammat Jehovap Nalunaajaasui Guutip naalagaaffia pillugu nutaarsiassaq nuannersoq inunnut inuiannit tamaneersunut oqaluussissutiginiarlugu ilungersornitik pillugit sumi tamaani ilisimaneqarput. — Matthæusi 24:14.

4. Oqaluussinitsinnut tunngasut suut allaaserisami matumani misissussavavut, allaaserisamilu tulliuttumi sorleq misissussavarput?

⁴ Uagulli oqaluussisartutut qanoq iliorsinnaavugut nutaarsiassaq nuannersoq pillugu nalerisimaarnartumik isumaqarluartumillu oqaluusseqataajuarniarluta — allaat sumiiffinni tusarusuttoqarpallaanngitsuni? (Lukasi 8:15) Oqaluussinitsinnut tunngasunik pingaarutilinnik pingasunik misissuilaarneq uagutsinnut iluaqutaasinnaavoq. Uku misissussavavut: (1) Pissutiginiagarput, imaluunniit sooq oqaluussisarnersugut; (2) tusarliussarput, imaluunniit suna oqaluussissutigisarneripput; kiisalu (3) periaaserput, imaluunniit qanoq oqaluussisarnersugut. Minguitsumik pissuteqarutta, paasiuminartumik tusarliussaqarutta sunniuteqarluartumillu periaaseqarutta inuit assigiinngitsorpassuit nutaarsiassap tamanit pitsaanerpaap — Guutip naalagaaffianik nutaarsiassap nuannersup — tusarnissaanut periarfississinnaavavut. *

 Sooq nutaarsiassaq nuannersoq oqaluussissutigineripput

5. (a) Pingaarnerpaamik suna oqaluussinissamut kajumississutigisarparput? (b) Sooq oqartoqarsinnaava oqaluussinissamik peqqussutip Biibilimeersup maleruarneratigut Guutimut asanninneq ersersikkipput?

⁵ Siullermik pissutiginiagarput misissoriartigu. Sooq nutaarsiassaq nuannersoq oqaluussissutigaarput? Jiisusip oqaluussinerminut pissutiginiagaatut ittumik pissutiginiagaqarpugut. Taanna ima oqarpoq: ’Ataataq asavara.’ (Johannesi 14:31; Tussiaat 40:9) Pingaarnerpaamik Guutimut asanninnerput pissutigalugu taamaaliortarpugut. (Matthæusi 22:37, 38) Biibilimi Guutimut asanninneq oqaluussinitsinnut tunngatinneqarpoq, imami allassimavoq: „Guutimut asanninneq tassaavoq inassutai maleruaratsigit.“ (1 Johannesi 5:3; Johannesi 14:21) ’Ajoqersuganngortitsiortornissaq’ Guutip inassutaanut ilaava? (Matthæusi 28:19) Aap. Ilumoorpoq oqaatsit taakku Jiisusimit oqaatigineqartut, Jehovaminngaanneersuuppulli. Tassa qanoq? Jiisusi ima nassuiaavoq: „Uanga . . . isumannik iliorneq [ajorpunga]; Ataatalli uannut ajoqersuutaa malillugu oqaluppunga.“ (Johannesi 8:28; Matthæusi 17:5) Tassa oqaluussinissamik peqqussummik maleruaanitsigut Jehova asanninnermik ersersitsivigisarparput.

6. Suut allat pissutigalugit Guutimut asanninneq oqaluussinissamut kajumississutigaarput?

⁶ Aammattaaq Guutimut asanninneq oqaluussinissamut kajumississutigaarput, Saatanip Guuti pillugu salluliuutaasa akiornissaat kissaatigigatsigu. (2 Korinthimiut 4:4) Guutip naalakkersuisinnaatitaanera Saatanip apeqquserpaa. (1 Mosesi 3:1-5) Jehovamut nalunaajaasutut inuit tamarmik takkuanni tusaatillugilluunniit Saatanip salluliuutaanik qulaarsinissaq Guutillu aqqanik illernarsisitsinissaq kissaatigingaarparput. (Esaja 43:10-12) Aamma oqaluussisarpugut Guutip pissusii qanoq ittuunersut aqqutaalu suunersut paasinikuugatsigu. Misigivugut taassumunnga qanittumik attaveqarluta, aamma inuit allat Guuti pillugu oqaluttuukkusungaarpavut. Aap, Jehovap ajunngissusia naapertuilluarneralu nuannaarutigingaaratsigik taanna oqaluuserinngitsoorsinnaanngilarput. (Tussiaat 145:7-12) Jehovamik unnersiutiginninnissamut tusarusuttunullu tamanut ’ajunngingaarutaanik nalunaarutiginninnissamut’ kajumissisinneqangaarpugut. — 1 Petrusi 2:9, 1900/1961; Esaja 43:21.

7. Guutimut asanninnerup saniatigut suna alla pingaarutilik pissutigalugu oqaluusseqataasarpugut?

⁷ Suli allamik pingaarutilimmik oqaluussinissamut pissutissaqarpugut: Nutaarsiassanit nuanniitsunit sapersisilluinnarneqartutut misigisunut tamanut arlaannillu sumilluunniit naalliuuteqartunut tamanut nutaarsiassamik nuannersumik tusarliussinissarput ilumoorluta kissaatigaarput. Taamaaliornikkut Jiisusi ilaarniartarparput. Assersuutigalugu Markusip iivangkiiliuani kapitali 6-imi allassimasut misissoriakkit.

8. Markusip iivangkiiliuani kapitali 6-imi oqaluttuarineqartumi Jiisusip inuppassuarnut misigissusii pillugit suna erserpa?

⁸ Apustilit oqaluussiartorlutik angalareerlutik uteqqammerput suliarisimasatillu inunnullu ilinniartitsissutigisimasatik pillugit Jiisusi oqaluttuullugu. Jiisusip malugaa apustilini qasusut, oqarfigaalu arlaannut ’qasuersaatsiarfigisinnaasaminnut ilagissagaanni’. Taamaattumik umiatsiamut ikipput qasuersaarfissaminnukarniarlutik. Inuppassuilli tatsip sinaatigoorlutik malippaat angullugillu. Jiisusi qanoq piva? Oqaluttuaq ima nangippoq: „Jiisusi niugami inuppassuit takuai, nalligingaalerpaalu savatut paarsisoqanngitsutut immata; amerlasuunillu ajoqersulerpai.“ (Markusi 6:31-34) Inuppassuit misiginneqatigigamigit Jiisusi  qasugaluarluni oqaluussiuarpoq. Erseqqippoq Jiisusip inuit taakku misiginneqatigingaarai.

9. Oqaluussinermut pissutiginiagaq eqqortoq pillugu Markusip iivangkiiliuani kapitali 6-imi oqaluttuaq qanoq ilinniarfigaarput?

⁹ Oqaluttuaq taanna qanoq ilinniarfigaarput? Kristumiusut misigivugut nutaarsiassap nuannersup oqaluussissutiginissaa ajoqersuganngortitsiortornissarpullu pisussaaffigalugit. Nalunngilarput nutaarsiassap nuannersup oqaluussissutiginissaa akisussaaffigalugu, Guutimmi piumasaraa „inuit tamalaat annaanneqassasut sallusuissummillu eqqorluartumik ilisarsilissallutik“. (1 Timotheusi 2:4, NV) Oqaluussisarpugulli pisussaasutut misiginerput pissutigiinnarnagu, aammali Jiisusitut oqaluussiffigisatsinnik qamannga pisumik misiginneqatiginninnerput pissutigalugu. Inoqatitsinnik misiginneqatiginningaarutta, nutaarsiassamik nuannersumik oqaluttuunniarlugit sapinngisarput tamaat iliuuseqassaagut. (Matthæusi 22:39) Pissutigisavut taakku oqaluussiuarnissamut kajumississutigissavarput.

Tusarliussarput — Guutip naalagaaffia pillugu nutaarsiassaq nuannersoq

10, 11. (a) Tusarliussaq oqaluussissutigisarput Esajap qanoq allaatigaa, qanorlu ersersippaa tusarliussaq isumalluarnartuusoq? (b) Jiisusi qanoq ililluni „pitsaanerusut pillugit nutaarsiassanik nuannersunik“ oqaluussissutiginnippa, taassumalu maligassiaa nalitsinni Guutip kiffaasa qanoq malippaat?

¹⁰ Oqaluussinitsinnummi tunngasut aappaat — tusarliussarput? Suna oqaluussissutigaarput? Pruffiiti Esajap tusarliussarput nuannersumik ima allaatigaa: „Qaqqani takusap ila takorannissusia: pisuinnarluni aggerpoq nutaarsiassanik nuannersunik tusarliisoq, eqqissinissamik oqaluussisoq, pitsaanerusut pillugit nutaarsiassanik nuannersunik tusarliisoq, annassummik oqaluussissutiginnittoq, Zionimut oqartoq: ’Guutit kunnginngorpoq!’“ — Esaja 52:7, NV.

¹¹ Maluginiakkit oqaatsit „Guutit kunnginngorpoq“. Oqaatsini taakkunani paasitinneqarpugut tusarliussatsinni pingaarnerpaaq suussanersoq, tassa Guutip naalagaaffia pillugu nutaarsiassaq nuannersoq. (Markusi 13:10) Aamma maluginiaruk tusarliussaq isumalluarnartoq pineqartoq, Esajammi oqaatsit soorlu ’annassut’, ’nutaarsiassat nuannersut’, ’eqqissinissaq’ ’pitsaanerusut’-lu atorpai. Esajap toquneranit ukiut hundredellit arlallit qaangiuttut, ukiuni hundredelinni siullerni u.n.k., Jiisusi Kristusip siulittuut taanna maluginiarnartumik eqquutitippaa pitsaanerusut pillugit — tassa Guutip naalagaaffissaa pillugu — nutaarsiassat nuannersut aallussilluarluni oqaluussissutigalugit, taamaalillunilu kingusinnerusukkut kristumiunngortussanut maligassiuilluni. (Lukasi 4:43) Nalitsinni, pingaartumik 1919-imiilli, Jehovap Nalunaajaasuisa Jiisusip maligassiuinera malippaat Guutip naalagaaffianik pilersinneqartumik tamatumalu pilluaqqussutissartaanik aallussilluarlutik oqaluussissutiginninnermikkut.

12. Guutip naalagaaffia pillugu nutaarsiassaq nuannersoq tamatuminnga ilassinnittunut qanoq sunniuteqarpa?

¹² Guutip naalagaaffia pillugu tusarliussaq tamatuminnga ilassinnittunut qanoq sunniuteqarpa? Nutaarsiassaq nuannersoq Jiisusip nalaanisulli neriuutissiillunilu tuppallersaataavoq. (Romamiut 12:12; 15:4) Inunnik eqqortuliorusuttunik neriuutissiivoq, taakkumi paasitinneqartarput pitsaanerusumik  siunissaqarnissap upperinissaanut pissutissaqarluarlutik. (Matthæusi 6:9, 10; 2 Petrusi 3:13) Taamatullu neriuuteqarneq iluaqutigalugu Guutimik mianerinnittut siunissamut isumalluartuarsinnaapput. Tussiaasiortoq allappoq taakkua allaat ’ajunaarnermik nalunaarut’, tassa nutaarsiassat nuanniitsut, ’annilaarutiginngikkaat’. — Tussiaat 112:1, 7.

Tusarliussaq ’aserorsimasumik uummatilinnut nakorsaataasoq’

13. Nutaarsiassamik nuannersumik ilassinnittut maannakkorpiaq tamatuminnga iluaqutiginninnerat Esajap qanoq allaatigaa?

¹³ Nutaarsiassamik nuannersumik ilassinnittut tamatuma saniatigut taanna maannakkorpiaq iluaqutigaat. Qanoq? Pruffiiti Esajap tamanna uparuarpaa ima siulittuigami: „Guutip [Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq oqaatigeqqullugu piitsunut, nakorsarneqarnissarlu aserorsimasumik uummatilinnut, torlulaatigeqqullugu parnaarussat iperagaanissaat kalunnernillu qilersugaasimasut aniguisitaanissaat, torlulaatigeqqullugit [Jehovap] ukiua saammaassivik ullorlu Guutitta akiniaaffia, aliasuttut tamaasa tuppallersaqqullugit.“ — Esaja 61:1, 2; Lukasi 4:16-21.

14. (a) Oqaatsini „nakorsarneqarnissaq aserorsimasumik uummatilinnut“-ni Guutip naalagaaffianik tusarliussaq pillugu suna ersersinneqarpa? (b) Qanoq ililluta Jehovatulli isumassuisarpugut?

¹⁴ Siulittuut taanna naapertorlugu Jiisusip nutaarsiassaq nuannersoq oqaluussissutigigaangamiuk ’aserorsimasumik uummatillit nakorsartassavai’. Esajap tassani assersuusiaa takorlooruminartupilussuuvoq. Biibilimi oqaatsinik qinerlerfissiaq naapertorlugu hebræerit oqaasiat uani ’nakorsarneqarnissamik’ nutserneqartoq „’nimiinermut’, taamaattumillu ikilerneqarsimasunik paaqqinninnermut katsorsaanermullu, atorneqarajuppoq“. Peqqissaasup isumassuisup immaqa timip ilaa ajoqusersimasoq pisariaqartumik iluaquserneqarniassammat nimissavaa. Taamatulli oqaluussisartut isumassuisut tusarliussinermikkut ikiorneqarnissamik pisariaqartitsisut tusarliussamik ilassinnilluartut tamaasa ikiussallugillu tapersersussavaat. Oqaluussisartut taamaalillutik Jehovatulli isumassuisarput. (Ezekieli 34:15, 16) Tussiaasiortoq Jehova pillugu ima allappoq: „Katsorsarpai sequmissimasumik uummatillit, ikiilu mattuserlugit.“ — Tussiaat 147:3.

Guutip naalagaaffianik tusarliussaq qanoq sunniuteqarsinnaasoq

15, 16. Pisimasuni suni ersersinneqarpa ikiorneqarnissamik pisariaqartitsisut Guutip naalagaaffianik tusarliussaq nakussatsissutigisinnaagaat?

¹⁵ Inuppassuit aserorsimasumik uummatillit Guutip naalagaaffianik tusarliussaq iluaqutigisimavaat. Amerikami Kujallermi arnaq utoqqaq Oreannamik atilik inoorusukkunnaarsimavoq. Jehovap Nalunaajaasuisa ilaata pulaartalerpaa Biibilimik aamma Biibilimik oqaluttuaatikka-mik atuffattalerlugu. * Aallaqqaammut arnap nikallungasup siniffimmi innangalluni anersaarulullattaallunilu sequnngerluni atuffassinera tusarnaartarpaa. Sivitsunngitsorli atuffanneqartilluni siniffimmini issiasalerpoq. Kingusinnerusukkut inimi issiavimmut ingilluni atuffassisimi takkunnissaa utaqqisalerpaa. Taava naalagaaffilersaarfimmut ataatsimiigiartalerpoq. Ataatsimiinnerni tusartakkani kajumississutigalugit illumi silataagut saneqquttut tamaasa atuagassianik atuakkanillu Biibililersaarutinik neqeroorfigisalerpai. Naggataatigut Oreanna 93-inik ukioqarluni Jehovap Nalunaajaasuisa ilaattut kuisippoq. Guutip naalagaaffianik tusarliussaq pissutigalugu inoorusussuseqaleqqippoq. — Ussatit 15:30; 16:24.

¹⁶ Allaat toqqutigisassaminnik nappaatilinnut Guutip naalagaaffianik tusarliussaq pingaarutilerujussuusinnaavoq. Arnaq Mariamik atilik katsorsarneqarsinnaanngitsumik nappaateqarpoq neriuutaarutivissimallunilu. Jehovap Nalunaajaasuinit pulaarneqarami isumatsassimangaarpoq. Guutilli siunertai pillugit ilinnialerami inuunera siunertaqarluaqqilerpoq. Kuisippoq oqaluussinermilu suliniuteqartorujussuanngorluni. Ukiuni inuuffigisaani kingullerni marlunni neriuuteqarpasissupilussuullunilu nuannaarpasissupilussuuvoq. Makititaaffimmi makititaanissaminik qularnaatsumik neriuuteqarluni toquvoq. — Romamiut 8:38, 39.

17. (a) Guutip naalagaaffianik tusarliussaq tamatuminnga ilassinnittunut qanoq sunniuteqartarpa? (b) Jehovap ’taaqqungasunik tamanik massitsitsisarneranut’ tunngatillugu illit nammineq qanoq misigisaqarnikuuit?

¹⁷ Oqaluttuani taamaattuni ersersinneqarpoq  Guutip naalagaaffianik tusarliussaq sallusuissummik Biibilimeersumik paasisaqarusuttunut sunniuteqarsinnaasoq. Inuit asasamik annaasaqarsimanerminnik aliasuutillit nukissaqaleqqittarput makititaanissamik neriuut paasileraangamikku. (1 Thessalonikamiut 4:13) Inuit piitsut ilaquttaminnik pilersuiniarlutik ilungersortut isumallualertarlutillu imminut nalilittut isigeqqilertarput paasigaangamikku Jehovamut ilumoorfiginnikkunik taassuma ilaginnanngisaannassagaatik. (Tussiaat 37:28) Inuppassuit isumatsassimangaarsimallutillu nikallungasimasut Jehovap ikiuineratigut nikallunganertik naammagalugu atorsinnaaleriartuaarsimavaat, ilaallu nikallungajunnaavissimapput. (Tussiaat 40:2, 3) Aap, Jehovap nukik oqaatsini aqqutigalugu tunniuttakkani iluaqutigalugu ’taaqqungasut tamaasa massitsittarpai’. (Tussiaat 145:14) Guutip naalagaaffia pillugu nutaarsiassap nuannersup ilagiinni oqaluussiffigisartakkatsinnilu aserorsimasumik uummatilinnut tuppallersaataanera takugaangatsigu, eqqaasinneqaqqittarpugut nutaarsiassamik pitsaanerpaamik peqartugut. — Tussiaat 51:19.

’Taakku pillugit Guutimut qinnutiga’

18. Juutit nutaarsiassamik nuannersumik itigartitsinerat Paulusimut qanoq sunniuteqarpa, aamma sooq?

¹⁸ Tusarliussarput nutaarsiassanit tamanit pitsaanerpaajugaluartoq inuppassuarnit itigartinneqartarpoq. Tamanna uagutsinnut qanoq sunniuteqartarpa? Juutit Paulusip tusarliussaanik itigartitsinerata Paulusimut sunniuteqarneratulli sunniuteqartarpoq. Taassuma juutit oqaluussiffigigajuppai, amerlanersaasali tusarliussaq itigartittarpaat, tamannalu ajuusaarutigeqaa. Taanna allappoq ’uummatikkut naalliuutigiuakkaminik angisuumik aliasuuteqarluni’. (Romamiut 9:2) Paulusip juutit oqaluussiffigisani misiginneqatigai, nutaarsiassamillu nuannersumik itigartitsinerat aliasuutigaa.

19. (a) Inuit taama amerlatigisut tusarliussamik itigartitsigaangata sooq ilaannikkut nikalluallaatigisinnaasarparput? (b) Paulusip oqaluussiinnarnissaminut suna iluaqutigaa?

¹⁹ Uaguttaaq inuit oqaluussiffigisavut misiginneqatigaavut, taamaattumillu inuppassuit Guutip naalagaaffianik tusarliussamik itigartitsigaangata nikalluallaatigisinnaasarparput. Pulaakkavummi ilumoorluta soqutigaavut. Taavami qanoq iliussaagut? Paulusi qanoq iliorpa? Oqaluussiinnarnissaminut suna iluaqutigaa? Juutit nutaarsiassamik nuannersumik ilassinninnginnerat aliasuutigingaaraluarlugulu naalliuutigingaaraluarlugu imminiiginnanngilai. Kristusimik ilassinnittoqarnissaa neriuutigiuarpaa. Taamaattumik inunnut ataasiakkaanut taakkununnga misigissutsini ima allaatigai: ’Uummamma taakku pillugit Guutimut kissaatigisaa qinnutigalu tassa annaanneqaqqullugit.’ — Romamiut 10:1, 1900/1961.

20, 21. (a) Oqaluussinitsinnut tunngatillugu Paulusi qanoq ilinniarfigisinnaavarput? (b) Oqaluussinitsinnut tunngasoq sorleq allaaserisami tulliuttumi sammissavarput?

²⁰ Paulusip eqqaasai marluk maluginiariakkit. Siullermik, annaanneqarnissamik tusarliussamik  ilassinnittoqarnissaa uummammit pisumik kissaatigaa. Aappassaanik, taakkua tamatuminnga ilassinninnissaat Guutimut qinnutigaa. Ullumikkut Paulusip maligassiaa malittarparput. Uaguttaaq uummammit pisumik kissaatigaarput nutaarsiassamik nuannersumik eqqortumik isumaqarfiginnittut naninissaat, aamma aqqummik annaanneqarnissamut sammisumik malinnilernissaannut ikiorsinnaaniassagatsigit taakkuninnga naninisinissarput Guutimut qinnutigiuartarparput. — Ussatit 11:30; Ezekieli 33:11; Johannesi 6:44.

²¹ Sapinngisamilli amerlanerpaat Guutip naalagaaffianik tusarliussamik angussagutsigit, sooq oqaluussisarnersugut sunalu oqaluussissutigisarneripput eqqumaffigiinnarnagu aammattaarli qanoq oqaluussisarnersugut eqqumaffigisariaqarparput. Allaaserisami tulliuttumi tamanna sammissavarput.

[Quppernerup ataani ilanngussat]

Suna ilikkarpiuk?

• Suut pissutigalugit oqaluussisarpugut?

• Tusarliussaq oqaluussissutigisarput pingaarnerpaaq suua?

• Guutip naalagaaffianik tusarliussamik ilassinnittut tamanna qanoq iluaqutigisarpaat?

• Oqaluussiinnarnissamut suna iluaqutigissavarput?

[Atuaqqissaarnermi apeqqutit]

[Qupp. 10-mi assiliartaq]

Guutip naalagaaffianik tusarliussaq aserorsimasumik uummatilinnut tuppallersaataavoq

[Qupp. 12-mi assiliartaq]

Qinuneq oqaluussiinnarnissamut iluaqutigisarparput