Asanninnerup inatsisaa uummatinut allanneqarsimasoq

„Inatsisinnik ilumiulissavakka uummataannullu allallugit.“ — JEREMIA 31:33.

1, 2. (a) Maanna suna misissussavarput? (b) Jehova Qaqqami Sinajimi qanoq ililluni takuneqarsinnaasut atorlugit imminut saqqummersippa?

ALLAASERISAP matuma siulii marluk misissoratsigit paasivarput Mosesip Qaqqamit Sinajimit aterami sooq kiinaa qinngorneqarnersoq, tassa Jehovap naalannassusia ersersikkamiuk. Aamma sammivarput Mosesip kiinnaminik ulissisarnera qanoq isumaqarnersoq. Maanna tamatumunnga attuumassuteqartumik ullumikkullu kristumiunut pingaaruteqartumik sammisaqariarta.

² Mosesi qaqqamiitilluni Jehovamit ilitsersuussutinik tunineqarpoq. Israelikkut Qaqqap Sinajip killingani katersorsimasut Guutip takuneqarsinnaasut atorlugit tupinnangaartumik imminut saqqummersinneranik takunnittuupput. „Kallilerpoq innaallattalerlunilu, nuiallu ussissup qaqqaq ulippaa. Sulluartaatip nipaa nipitoorujussuarmik tutsiummat inuit tammaarfimmiittut tamarmik annilaarnermit uulluserput. . . . Qaqqaq Sinaji tamavimmi putsumik poorsimavoq, [Jehovap] innermiilluni aqqarfigimmagu. Innerup pujua qummukarpoq aatsitsiviup pujuatut, qaqqarlu tamarmi annilaarnerujussuarmit sajulerpoq.“ — 2 Mosesi 19:16-18.

3. Jehovap qanoq ililluni Inatsisit Qulit Israelikkunnut tunniuppai, inuiaqatigiillu taakkua suna paasivaat?

³ Jehovap inngili aqqutigalugu inuit taakku oqaluffigai inatsisillu Inatsisitut Qulitut ilisimaneqalersut taakkununnga tunniullugit. (2 Mosesi 20:1-17) Taamaammat inatsisit taakkua Ajugaqanngitsumeersuunerat qularutissaanngilaq. Jehovap inatsisit taakku allaffissianut — Mosesip Israelikkut nersuteeraasaliamik kuultiusumik pallorfiginnittut takugamigit aserugaanut — allappai. Jehovap inatsisit ujaqqanut allaqqippai. Mosesip allaffissiat taakku aqqukkamigit kiinaa qinngorneqarpoq. Maanna tamarmik paasilerpaat inatsisit taakku pingaaruteqarluinnartuusut. — 2 Mosesi 32:15-19; 34:1, 4, 29, 30.

4. Sooq Inatsisit Qulit pingaaruteqarluinnarpat?

⁴ Allaffissiat taakku marluk Inatsisit Qulit allanneqarfigisaat Illernarnerpaami tupermi naapeqatigiittarfimmiittumi kingusinnerusukkullu naalaffimmiittumi angerutsip illerfianut inissinneqarput. Inatsisit allaffissiani allassimasut Mosesip inatsisaanik angerutsimi najoqqutassiat tunngaviusut imaraat inuiaqatigiinnullu tunngasunik teokratiskiusumik aqutsinermut tunngaviullutik. Taakku Jehovap inuiaqatigiinnik aalajangersimasunik toqqakkaminik isumassuineranut uppernarsaataapput.

5. Guutip Israelikkunnut inatsisaani innuttaminik asanninnera qanoq ersersinneqarpa?

⁵ Inatsisini taakkunani Jehova pillugu, pingaartumik taassuma innuttaminik asanninnera pillugu, paasissutissarpassuaqarpoq. Paasinarsivoq inatsisit taakku taakkuninnga maleruaasunut naleqangaartut. Ilisimatooq ima allappoq: „Ileqqussatigut najoqqutassiat tamatuma siornatigut kingornatigullu inunnit najoqqutassiarineqartut suulluunniit . . . inatsisinut qulinut taakkununnga Guutimeersunut assersuunneqarsinnaanatillu nallersuunneqarsinnaanngilluinnarlutillu taakkuninnga akimuisinnaanngilluinnarput.“ Mosesip inatsisai tamaasa pillugit Jehova ima oqarpoq: „Naalakkussinga angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi, nunarsuaq tamaat uanga pigigakku. Uannut tassaalissaasi kunngeqarfik palaseqatigiinnik innuttalik inuiaqatigiillu illernartut.“ — 2 Mosesi 19:5, 6.

Inatsit uummammut allanneqarsimasoq

6. Inatsisip suup inatsisinit ujaqqanut allanneqarsimasunit naleqarnerunera paasinarsisimava?

⁶ Aap, inatsisit Guutimeersut taakku naleqangaarput. Nalunngiliulli kristumiut tanitat inatsisinit  ujaqqanut allanneqarsimasunit naleqarnerungaartumik pigisaqartut? Inatsisit tunngavigalugit angerutsimit Israelikkunnik angeruserineqartumit allaanerusumik nutaamik angeruseqartoqarumaarnera Jehovap siulittuutigaa. Ima oqarpoq: „Inatsisinnik ilumiulissavakka uummataannullu allallugit.“ (Jeremia 31:31-34) Jiisusip, angerutsimi nutaami akunnermiliuttuusup, ajoqersukkani inatsisinik allanneqarsimasunik tuninngilai. Oqaatsimigut iliuutsimigullu Jehovap inatsisai ajoqersukkami isumaannut uummataannullu puiuikkiutitippai.

7. „Kristusip inatsisaa“ aallaqqaammut kikkunnut tunniunneqarpa, kingusinnerusukkullu kikkut aamma inatsimmik tamatuminnga maleruaalerpat?

⁷ Inatsisit taakku ataatsimut isigalugit „Kristusip inatsisaa“-nik taaneqartarput. Kristusip inatsisaa aallaqqaammut inuiannut anersaakkut ittunut ’Israeli Guutip pigisaanut’ tunniunneqarpoq, uinikkut Israelikkunnut Jaakumik siuaasaqartunut tunniunneqarnani. (Galatiamiut 6:2, 16; Romamiut 2:28, 29) Israeli Guutip pigisaa tassa kristumiut tanitat. Piffissap ingerlanerani ’amerlangaartut’ inuiannit tamaneersut taakkununnga ilaliupput, taakkuttaaq Jehovamik pallorfiginnikkusukkamik. (Saqqummersitat 7:9, 10; Zakaria 8:23) ’Savaatitut katersatut ataatsitut paarsisumit ataatsimit’ siulersorneqartutut „Kristusip inatsisaa“ maleruarpaat qanorlu iliornerminni tamani tamatumannga siulersortillutik. — Johannesi 10:16.

8. Mosesip inatsisaasa Kristusillu inatsisaata assigiinngissutaannik eqqaasaqarit.

⁸ Uinikkulli Israelikkutut inunnguuseralugu Mosesip inatsisaanik maleruaasussaatitaasutut innatik, kristumiut namminneq piumassutsiminnit Kristusip inatsisaanut naalatsigitittuarput, aamma naggueqatigiissuseq sumilu inunngorsimaneq taakkununnga pingaaruteqanngilaq. Jehova taassumalu aqqutai pillugit ilinniarput taassumalu piumasaatut iliorusungaarlutik. Kristumiut tanitat Guutip inatsisai ’ilumiugaat’, soorlulusooq „uummataannut“ allanneqarsimasut; taamaammat naalanngikkunik Guutimit pillarneqarsinnaanertik akisussaasutullu misiginertik pissutigiinnarnagit Guutimut naalattarput. Taakkua naalannerat sakkortunerungaartumik pingaaruteqarnerungaartumillu pissuteqarpoq, taamatuttaaq savanut allanut ilaasut naalattuupput Guutip inatsisai uummammiugigamikkik.

Inatsisit asanninnermik tunngaveqartut

9. Asanninnerup Jehovap inatsisaani pingaarnerpaanera Jiisusip qanoq ililluni takutippaa?

⁹ Jehovap inatsisaasa aalajangersagaasalu tamarmik pingaarnersaat oqaaseq ataasiinnaq atorlugu oqaatigineqarsinnaavoq: Asanninneq. Tamanna pallorfiginninnermi ilumoortumi pingaaruteqartorujussuujuaannarnikuullunilu pingaaruteqartorujussuujuaannassaaq. Jiisusi Inatsisini suna pingaarnerpaanersoq aperineqarami ima akivoq: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ Aappaat imaappoq: „Tullit ilittut asassavat.“ Taava ima nangippoq: „Inatsisit tamarmik pruffiitillu allagaasa inassutit taakkua marluk tunngavigaat.“ (Matthæusi 22:35-40) Taamaalilluni Jiisusip takutippaa Mosesip inatsisai Inatsisit Qulit ilanngullugit kisimik pinnatik, aammali Allakkat Hebræerisuut tamarmik asanninnermik tunngaveqartut.

10. Qanoq ililluta nalunngilarput Kristusip inatsisaani asanninneq tunngaviusoq?

 ¹⁰ Guutimik tullermillu asanninneq aamma inatsimmut kristumiut uummataanniittumut tunngaviua? Aap, taamaalluinnarpoq! Kristusip inatsisaanik maleruaanerup ilagaa qamannga pisumik Guutimut asanninneq aamma kristumiut imminnut pilliutigeriaannaallutik asaqatigiinnissaannik inassummik nutaamik maleruaaneq. Kristumiut asanninneq Jiisusip ersersissimasaatut ittoq ersersittussaavaat, taassumalu ikinngutini pillugit inuunini pilliutigiumasimavaa. Taassuma ajoqersukkani Guutimik asanninnissaannik namminerlu taakkuninnga asannissimanermisorluinnaq asaqatigiinnissaannik ilinniartippai. Taakkua asaqatigiinnerat maluginiarnartoq kristumiunut ilumoortunut ilisarnaataavoq pingaarnerpaaq. (Johannesi 13:34, 35; 15:12, 13) Jiisusip allaat imminnut akeraasunik asanninnissaannik ilinniartippai. — Matthæusi 5:44.

11. Jiisusi Guutimik inunnillu asanninnerminik qanoq ersersitsiva?

¹¹ Asannittuliorneq eqqarsaatigalugu Jiisusi uagutsinnut maligassaavoq naammalluinnartoq. Qilammi pinngortitatut anersaajusutut pissaanilittut nunarsuarmi Ataatami soqutigisaanik siuarsaanissamut periarfissaq nuannaarluni tiguaa. Inuit allat naassaanngitsumik inuusinnaalerniassammata inuttut inuunini pilliutigaa, aamma inunnut takutippaa qanoq inuussasut. Maniguuttuullunilu inussiarnersuullunilu soqutigittartuuvoq, aamma naqisimaneqartut nanertugaasullu ikiortarpai. Aammattaaq inuit allat „oqaatsinik naassaanngitsumik inuussutaasunik“ avitseqatigai Jehovamillu ilisarisimannilernissaannik qasusuilluni ikiorlugit. — Johannesi 6:68.

12. Sooq oqartoqarsinnaava Guutimik asanninneq tullermillu asanninneq imminnut atalluinnartut?

¹² Guutimik asanninneq tullermillu asanninneq imminnut atalluinnarput. Apustili Johannesi ima oqarpoq: ’Asanninneq Guutimit pivoq. Ima oqartoq: „Guuti asavara,“ qatanngunnili uumigalugu, taanna sallutuujuvoq; qatanngunnimi takusimasani asanngikkuniuk Guuti takusimanngisani asasinnaanngilaa.’ (1 Johannesi 4:7, 20) Jehova asanninnermut pilerfiuvoq namminerlu asannilluinnartuulluni.  Iliuusii tamarmik asanninnermik pissuteqarput. Uagut asannittuliortarpugut taanna assilillugu pinngortitaagatta. (1 Mosesi 1:27) Aamma tullitsinnik asannikkaangatta Guutimik asanninnitsinnut ersiutaasarpoq.

Asanninneq naalanneruvoq

13. Guutimik asannissagutta suna iliuusereqqaartariaqarparput?

¹³ Guuti takusinnaanngisarput qanoq ililluta asasinnaagatsigu? Iliuuserineqaqqaartussaq aalajangiisuulluinnartoq tassaavoq taassuminnga ilisarisimannilerniarneq. Ilisarisimanngisarput asavissinnaanagulu tatigilluinnarsinnaanngilarput. Taamaattumik Guutip oqaasiani kajumissaarneqarpugut Biibilimik atuartarnikkut, Guutimut qinusarnikkut taassuminngalu ilisarisimannereersunik asannittunillu peqateqartarnikkut Guutimik ilisarisimannilerniarnissamik. (Tussiaat 1:1, 2; Filippimiut 4:6; Hebræerit 10:25) Iivangkiiliut sisamat immikkut pingaaruteqarput Jehovap kinaassusia Jiisusi Kristusip inuunerani kiffartorneranilu ersersinneqartoq taakkunani saqqummersinneqarmat. Guutimut naalannissaq taassumalu kinaassusianik ilaarsinissaq kissaatigineruleraluttuinnartarparput taassuminnga ilisarisimanninnerujartortilluta taassumalu uagutsinnik asanninneranik qujamasuutiginninnerujartortilluta. Aap, Guutimik asanninnermut ilaavoq naalanneq.

14. Sooq oqartoqarsinnaava Guutip inatsisai artornanngitsut?

¹⁴ Inuit allat asagaangatsigit suna nuannarineraat sunalu nuannarinnginneraat eqqumaffigisarparput, tamannalu najoqqutaralugu pissusilersortarluta. Asasatta iluarinngisaannik iliorusunneq ajorpugut. Apustili Johannesi ima allappoq: „Guutimut asanninneq tassaavoq inassutai maleruaratsigit, inassutaalu artornartuunngillat.“ (1 Johannesi 5:3) Artornartuunatillu amerlasuujunngillat. Tassami asanninnerput pissutaavoq. Pissutsini qanorluunniit ittuni qanoq iliortariaqarnerluta paasiniarlugu najoqqutassiarpassuarnik alanngaarinissaq ilinniartariaqanngilarput; Guutimik asanninnerput pissutigalugu iliuuseqartarpugut. Guuti asagutsigu taassuma piumasaatut iliornissaq nuannaarutigissavarput. Taamaalilluta Guutimit iluarisaalertarpugut imminullu iluaqusertarluta, taassumami siunnersuutai uagutsinnut iluaqutaajuaannarput. — Esaja 48:17.

15. Jehovamik ilaarsinissamut suna kajumississutigissavarput? Nassuiaruk.

¹⁵ Guutimik asanninnerput taassuma pissusiinik ilaarsinissamut kajumississutigisarparput. Inummik asasaqaraangatta taassuma pissusii nuannarisarpavut ilaarniartarlutigulu. Eqqarsaatigeriaruk Jehovap Jiisusillu attaveqaqatigiinnerat. Taakku qilammeeqatigiipput, immaqa ukiuni milliardilinni. Qamannga pisumik ilumoortumillu asaqatigiipput. Jiisusillu Ataatani qilammiusoq ima assigitigaa ajoqersukkaminut ima oqarsinnaalluni: „Uannik takunnittup Ataataq takuaa.“ (Johannesi 14:9) Jehova erneralu pillugit ilisimasaqaleraangatta taakkununngalu qujamasunnerput ineriartortikkaangatsigu tamanna taakkuninnga ilaarsinissamut kajumississutigisarparput. Jehova asagatsigu anersaamillu illernartumit ikiorneqaratta ’inutoqaq iperarsinnaanngussavarput iliuusai ilanngullugit atisinnaanngussallugulu nutaaq’. — Kolossemiut 3:9, 10; Galatiamiut 5:22, 23.

Asanninneq iliuutsikkut ersersinneqartoq

16. Guutimik tullermillu asanninneq oqaluussinitsinni ajoqersuganngortitsiortornitsinnilu qanoq ersersinneqartarpa?

¹⁶ Guutimik tullermillu asanninnerput kristumiutut Guutip naalagaaffianik oqaluussissutiginneqataanissamut ajoqersuganngortitsiortoqataanissamullu kajumississutigisarparput. Taamaalioraangatta Jehova Guuti ’inuit tamalaat annaanneqarnissaannik sallusuissummillu eqqorluartumik ilisarsilernissaannik piumasaqartoq’ nuannaartittarparput. (1 Timotheusi 2:3, 4, NV) Kristusip inatsisaa inuit allat uummataannut allanneqarniassammat taakkuninnga ikiuinerput nuannaarutigissavarput. Aamma Jehovap pissusiinik ersersitsilerlutik inuttut allanngornerat takullugu tipaatsuutigissavarput. (2 Korinthimiut 3:18) Guutimik ilisarisimannilernissamut allanik ikiuineq tunissutaavoq taakkununnga tunissutigisinnaasatsinnit allanit tamanit naleqarnerpaaq. Jehovamik ikinnguteqalernissamut qaaqqusissummik ilassinnittut ikinngutigiinneq tamanna naassaanngitsumik nuannaarutigisinnaassavaat.

17. Sooq Guutimik tullermillu asanninnermik ineriartortitsinissaq pigisanik nuannarinninnermik ineriartortitsinissamit silatusaarnerungaarpa?

¹⁷ Silarsuarmi pigisanik pingaartitsiffiungaartumi  allaallu tamakkuninnga nuannarinningaarfiusumi inuuvugut. Pigisalli naassaanngitsumik piuneq ajorput. Tillinneqarsinnaallutillu aseroriartorsinnaapput. (Matthæusi 6:19) Biibilimi ima mianersoqqussuteqarpoq: „Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Johannesi 2:16, 17) Aap, Jehova naassaanngitsumik atassaaq, taassuminngalu asannittut taassumunngalu kiffartortut aamma naassaanngitsumik atassapput. Taamaattumik Guutimik inunnillu asanninnermik ineriartortitsinissaq silarsuarmiittunik atuukkallaannartunik noqqaassutiginninnissamit silatusaarnerungaassaaq, ilaa?

18. Qatanngut arnaq ajoqersuiartortitaq imminut pilliutigeriaannaalluni asanninnermik qanoq ersersitsiva?

¹⁸ Asanninnermik noqqaassutiginnittut Jehovamik ataqqinartitsisarput. Misissoriartigu Senegalimi ajoqersuiartortitamik arnamik Soniamik atilimmik pisimasoq. Taanna arnamik Heidimik atilimmik uiminit allamik upperisalimmit hivimik tunillatsissimasumik Biibilimik atuaqqissaaqateqartarpoq. Uimi toqunerata kingorna Heidi kuisippoq. Sivitsunngitsorli AIDS-ilerpoq napparsimmavimmullu unitsinneqarluni. Sonia ima oqaluttuarpoq: „Napparsimmavimmi sulisut sapinngisartik tamaat iliuuseqarput, ikittuinnaappulli. Ilagiinniittut aperineqarput napparsimmavimmi Heidimik isumaginnittoqarusunnersoq. Unitsinneqarmat aqaguani unnuakkut siniffiata saniani madrassimi sinippunga toqunissaatalu tungaanut isumaginneqataallunga. Nakorsaq akisussaasoq ima oqarpoq: ’Ajornartorsiutiginerpaasarput tassaavoq allaat ilaqutaasut ilaquttatik AIDS-ertut paasigaangamikkik isumakkiiginnartarmatigik. Sooq illit napparsimasoq ilaqutarinagu, nunaqqatiginagu naggueqatiginaguluunniit imminut navianartorsiortikkumavit?’ Nassuiaappara Heidi uannut qatanngutitorluinnaq ittoq, imalu qanitsigaagut soorlu qatanngutigiiviit. Arnamik qatanngutinngorlaamik ilisarisimalersimasannik isumassuinera nuannaarutigaara.“ Sonia asannilluni Heidimik isumassuigami kingunerlutsitsinngilaq.

19. Guutip inatsisai uummatitsinniittut qanoq iliorusulissutigisariaqarpavut?

¹⁹ Jehovap kiffaasa akornanni imminut pilliutigeriaannaalluni asannittuliortoqarsimaneranut takussutissarpassuaqarpoq. Ullumikkut Guutip innuttaasa inatsisit allanneqarsimasut ilisarnaatiginngilaat. Hebræerinut allakkat 8:10-mili allassimasut piviusunngornerannik takunnittuuvugut: „Angeruseq ullut nalliuppata Israelikkunnut angeruseriumaagara mannaavoq, oqarpoq [Jehova]: Inatsisinnik ilumiulissavakka uummataannullu allallugit, taakkualu Guutigissavaannga, uangalu innuttarissavakka.“ Qanortoq asanninnerup inatsisaa Jehovap uummatitsinnut allassimasaa nuannariuartigu asannittuliornissamullu periarfissat tamaasa atorluarlutigit.

20. Sooq Kristusip inatsisaa nalissaqanngilluinnarpa?

²⁰ Ila nuanningaarami silarsuaq tamakkerlugu qatanngutigiissuit taamatut asannittuliortartut Guutimut kiffartoqatigalugit! Inuit Kristusip inatsisaanik uummammiugisaqartut silarsuarmi matumani asannissuseqanngitsumi nalissaqanngilluinnartumik pigisaqarput. Jehovap asanninnera malugiinnarnagu aammali qatanngutigiissuit kristumiut asaqatigiingaarnerat nuannaarutigaat. „Ata! Iluarlunilu nuannillaraasoq qatanngutigiit ataasioqatigiillutik najugaqatigiikkaangata!“ (NV) Jehovap Nalunaajaasui inuiaqatigiinnit assigiinngitsorpassuarnit pisuugaluarlutik assigiinngitsorpassuarnillu oqaaseqarlutillu kultureqaraluarlutik uppernikkut asseqanngitsumik ataasioqatigiipput. Ataasioqatigiinneq tamanna Jehovamit iluarisaalernarpoq. Tussiaasiortoq ima allappoq: „Tassani [inuiaat asanninnikkut ataasioqatigiittut akornanni] [Jehovap] tunniuppaa pilluaqqussut, inuussutissaq soraajuitsoq.“ — Tussiaat 133:1-3.  (wE 8/15 05)

Uteqqiineq

• Inatsisit Qulit qanoq pingaaruteqartigisimappat?

• Inatsit suna uummatinut allanneqarsimava?

• ’Kristusip inatsisaanut’ tunngatillugu asanninneq qanoq pingaaruteqarpa?

• Guutimik tullermillu asanninnermik qanoq ililluta ersersitsisinnaavugut?

[Atuaqqissaarnermi apeqqutit]

[Qupp. 29-mi assiliartaq]

Israelikkut allaffissianut allanneqarsimasunik inatsiseqarput

[Qupp. 30-mi assiliartat]

Kristumiut Guutip inatsisai uummammiugaat