Illit Guutip naalannassusia ersersittarpiuk?

’Uagut Jehovap naalannassusianik ersersitsivugut.’ — 2 KORINTHIMIUT 3:18, NV.

1. Mosesip suna takuaa, tamatumalu kingorna qanoq pisoqarpa?

TAKORRUUGAAVOQ inuup kialuunniit takorruukkanit takusimasaanit tamanit mianernarnerpaat ilaat. Mosesi kisimi qutsissumi Qaqqami Sinajimiitilluni kissaatigisaa qaqutigoortoq piviusunngortinneqarpoq. Siornatigut inummit takuneqarsimanngisaannartumik — Jehovap naalannassusianik — takusaqartinneqarpoq. Soorunami Mosesip Jehova toqqaannartumik takunngilaa, Guutimmi taattua ima inngianartigaaq inuk kinaluunniit taassuminnga takunnittoq inuuginnarsinnaanani. Taamaattumik Jehovap, inngilimik sinniiseqarunarluni, Mosesi sarsukkamiuk ’assamminik’ assersimavaa. Taava Jehovap guutitut naalannassutsiminut takussutissap tamatuma akisunnera Mosesimut takutippaa. Aamma Jehovap Mosesi inngili aqqutigalugu oqaluuppaa. Tamatuma kingorna qanoq pisoqarnera Biibilimi ima allaatigineqarpoq: „Mosesi qaqqamit Sinajimit [aterami] . . . nammineq sianiginngilaa kiinnami amia qinngorneqalersimasoq [Jehovap] oqaloqatigisimammani.“ — 2 Mosesi 33:18–34:7, 29.

2. Naalannassuseq kristumiut ersersittagaat pillugu apustili Paulusi qanoq allappa?

² Takorlooriaruk illit nammineq Mosesi qaqqami tassaneeqatigalugu. Eqqarsaatigeriaruk Ajugaqanngitsup naalannangaassusianik takunninneq oqaasiinullu tusarnaarneq qanoq alutornartigisimassasoq! Mosesimik, Inatsisit tunngavigalugit angerutsimi akunnermiliuttumik, Qaqqamit Sinajimit ateqateqarneq immikkut pisinnaatitaafferujussuusimassagaluarpoq! Nalunngiliulli kristumiut ilumoortut allaat Mosesip Guutip naalannassusianik ersersitsinera akimorlugu tamatuminnga ersersitsisartut? Paasissutissaq eqqarsalersitsisoq taanna apustilip Paulusip allagaaniippoq. Allappoq kristumiut tanitat ’Jehovap naalannassusianik ersersitsisut’. (2 Korinthimiut 3:7, 8, 18, NV) Aamma kristumiut nunarsuarmi inuunissamik neriugisallit Guutip naalannassusianik ersersitsisarput.

Kristumiut Guutip naalannassusianik qanoq ersersitsisartut

3. Mosesimut periarfissaasimanngitsut atorlugit uagut qanoq ililluta Jehova ilisarisimalerparput?

³ Guutip naalannassusianik uagut qanoq ililluta ersersitsinnaagatta? Uagut Mosesip misigisaqarsimaneratut Jehova takunikuunaguluunniit oqaluttoq tusaanikuunngilarput. Taamaakkaluartoq Mosesimut periarfissaasimanngitsut atorlugit uagut Jehova ilisarisimalerparput. Mosesip toquneranit ukiut 1500-ngajaat qaangiuttut aatsaat Jiisusi Missiarsitut saqqummerpoq. Taamaattumik Mosesip ilisimasinnaanngilaa Inatsisit Jiisusimut, ajortip toqullu naalliunnartuinit inuit utertinniarlugit toqusumut, tunngatillugu qanoq ilillutik eqquukkumaarnersut. (Romamiut 5:20, 21; Galatiamiut 3:19) Aammattaaq Jehovap siunertaata, Guutip naalagaaffianut Missiarsikkoortumut paratiisimullu taanna aqqutigalugu pilersinneqartussamut tunngassuteqarluinnartup, angingaassusia Mosesip taamaallaat killilimmik paasisinnaasimavaa. Uagut Jehovap naalannassusia takugaangatsigu, isitsinniunngitsoq, uppernerulli isaanik takusarparput Biibilimi ajoqersuutigineqartut upperilernikuugatsigik. Aammattaaq uagut Jehovap nipaa inngili aqqutiginagu, Biibilili aqqutigalugu — pingaartumik iivangkiiliut, Jiisusip ilinniartitsineranik oqaluussineranillu allaaserisat nuannersut aqqutigalugit — tusartarparput.

4. (a) Kristumiut tanitat Guutip naalannassusianik qanoq ersersitsisarpat? (b) Nunarsuarmi inuunissamik neriugisallit Guutip naalannassusianik qanoq ersersitsisinnaappat?

⁴ Kristumiut Guutip naalannassusianik kiinnamikkut qinngorneqalernermikkut ersersitsisanngikkaluartut, Jehovap kinaassusia siunertaalu nuanningaartut oqaluttuarigaangamikkit nuannaarnerat  takuneqarsinnaasarpoq. Pruffiiti Esaja nalerput pillugu siulittuivoq Guutip innuttaasa Jehovap ’naalannassusia inuiannut oqaatigissagaat’. (Esaja 66:19) Aamma Korinthimiunut allakkat aappaat 4:1, 2-mi ima allassimavoq: ’Tamatuminnga kiffartuutigisaqaratta, . . . isertukkat kanngunartut asiginnarpavut peqqusersuutullu saqinata Guutillu oqaasia muminnagu; kisianni sallusuissut ersersillugu inuit tamarmik tarnaasa nalunngissusiannut ilasseqquniarpugut Guutip takkuani.’ (1900/1961) Tassani Paulusip pingaartumik kristumiut tanitat, ’angerutsimut nutaamut kiffartortuusut’, pivai. (2 Korinthimiut 3:6) Taakkuali kiffartornerat inuppassuit, nunarsuarmi inuunermik naassaanngitsumik neriuuteqalersimasut, iluaqutigisimavaat. Tanitat taakkualu tamarmik Jehovap naalannassusia ersersittarpaat ilinniartitsinermikkuinnaanngitsoq, aammali inooriaatsimikkut. Guutip qutsinnerpaap naalannassusianik ersersitsinissaq akisussaaffigalugulu immikkut pisinnaatitaaffigaarput!

5. Anersaakkut atugarissaarnerput sumut uppernarsaataava?

⁵ Jiisusip siulittuisimaneratut ullumikkut Guutip naalagaaffia pillugu nutaarsiassaq nuannersoq alutornartorlu nunarsuaq tamakkerlugu oqaluussissutigineqarpoq. (Matthæusi 24:14) Inuit inuiaqatigiinnit naggueqatigiinnillu inuiannillu immikkullu oqaasilinnit tamanit pisut inuttut ataasiakkaatut nutaarsiassaq nuannersoq nuannaangaarlutik ilassivaat Guutillu piumasaatut iliorniarlutik inuunerminni allannguillutik. (Romamiut 12:2; Saqqummersitat 7:9) Taakkua kristumiut siulliit pisimanerattut takusatik tusakkatillu oqaluttuarinngitsoorsinnaanngilaat. (Apustilit Suliaat 4:20) Ullumikkut inuit 6 millioninit amerlanerusut, oqaluttuarisaanermi inuit aatsaat taama amerlatigisut, Guutip naalannassusianik ersersitsisarput. Illit taakkua ilagaatsit? Guutip innuttaasa anersaakkut atugarissaarnerat Jehovap kiffaminik pilluaqqusineranut sernissuineranullu uppernarsaataalluinnarpoq. Jehovap anersaavanit najorneqarnerput erseqqinnerulertarpoq pissaaneqangaartunik akiugaqarnerput eqqarsaatigigaanni. Maanna misissoriartigu sooq taamaannersoq.

Guutip innuttai nipangersinneqassanngillat

6. Jehovamik pallorfiginnissagaanni sooq uppertuunissaq sapiitsuunissarlu pisariaqarpat?

⁶ Takorlooriaruk illit eqqartuussivimmut pinerluttumik peqqarniitsumik unnerluutiginnikkiartoqquneqarlutit. Nalunngilat pinerluttoq pissaaneqartupilussuarmik peqatigiiffeqartoq qulaarneqannginniassagamilu suut tamaasa atorlugit nipangersinniassagaatit. Pinerluttumik taamaattumik unnerluutiginnissaguit sapiitsuusariaqarlutillu oqartussaasunit illersorneqarnissat qularutigissanngilat. Uagut tamatumunnga assingusumik inissisimavugut. Jehova taassumalu siunertai nalunaajaatigigaangatsigit Saatani Diaavulu unnerluutigisarparput qulaartarlutigulu toqutsisutut sallutuutullu silarsuarmik tamarmik tammartitsiniartutut. (Johannesi 8:44; Saqqummersitat 12:9) Jehovamik pallorfiginnissaguit Diaavulumillu unnerluutiginnillutit uppertuusariaqarlutillu sapiitsuusariaqarputit.

7. Saatani qanoq sunniuteqartigaa, aamma suniarsariva?

⁷ Jehova soorunalimi Qutsinnerpaajuvoq. Saatanimit pissaaneqarnipilussuuvoq. Qularutigissanngilarput ilumoorfiginnilluta kiffartorfigigaangatsinni Jehovap sernissorsinnaaginnarnata, aammali sernissorusungaaraatigut. (2 Nalunaarsuutit 16:9) Taamaakkaluartoq Saatani anersaapilunnut silarsuarmullu Guutimit avissaarsimasumut naalagaavoq. (Matthæusi 12:24, 26; Johannesi 14:30) Saatanip sunniuteqarfigisinnaasaa nunarsuup eqqaanut killilerneqarpoq aamma kamattorsuuvoq,  taamaattumillu Jehovap kiffaanik akerlilersuersuataarpoq. Nutaarsiassamik nuannersumik oqaluussissutiginnittunik tamanik nipangersitsiniarsarinermini silarsuaq oqartussaaffigisani atortarpaa. (Saqqummersitat 12:7-9, 12, 17) Qanoq ililluni taamaaliortarpa? Periaatsit minnerpaamik pingasut atortarpai.

8, 9. Saatanip qanoq ililluni eqqunngitsunik asannitsinniarsaraatigut, aamma sooq ikinngutissatsinnik peqqissaartumik qinersisariaqarpugut?

⁸ Saatanip uagutsinnik allamut saasaariaasiisa ilaat ulluinnarni isumakuluutinut tunngassuteqarpoq. Ulluni kingullerni makkunani inuit aningaaserituujullutillu namminissarsiortuullutillu inuulluarniutinik pingaarnerutitsisuupput. Guutimik pingaartitsisuunngillat. (2 Timotheusi 3:1-4) Inuit amerlanersaasa ulluinnarni sammisassat nalinginnaasut ulapputigaat nutaarsiassarlu nuannersoq tusarliussarput eqqumaffiginagu. Sallusuissummik Biibilimeersumik ilinniarnissartik soqutiginngilaat. (Matthæusi 24:37-39) Taamatut isiginnittaaseqartoqarnera sunnertissutigisinnaavarput anersaakkullu sinilissutigisinnaallutigu. Pigisanik inuunermilu aliikkutassanik asanninneq ineriartortilerutsigu Guutimik asanninnerput nillertunngussaaq. — Matthæusi 24:12.

⁹ Taamaattumik kristumiut kikkut ilagisartagarissanerlugit mianersuutigeqqissaartarpaat. Kunngi Salomo ima allappoq: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ (Ussatit 13:20) Uagut Guutip naalannassusianik ersersitsisut ’peqatigisartigit’. Taamaaliorneq nuannaangaalersitsisarpoq! Ataatsimiinnerni pisunilu allani anersaakkut qatanngutivut peqatigigaangatsigit taakkua asanninnerat, nuannaarnerat, uppernerat ilisimassusiallu qiimmassaatigisarpavut. Taamatut ineriartornartumik peqatigiittarneq kiffartornermi pinertusaarnissatsinnik aalajangiusimanninnerulissutigaarput.

10. Guutip naalannassusianik ersersitsisartut Saatanip qanoq illaruaatigineqartittarsimavai?

¹⁰ Saatanip aamma illaruaatiginninneq atorlugu kristumiut Guutip naalannassusianik ersersitsiunnaarsinniarsarisarpai. Periaaseq taanna pakasartissutigisariaqanngilarput. Jiisusi nunamiinnermini illaruaatigineqarpoq — mitaatigineqarpoq, illaatigineqarpoq, ataqqinninngitsuliorfigineqarpoq allaallu qitserarneqarluni. (Markusi 5:40; Lukasi 16:14; 18:32) Aamma kristumiut siulliit mitaatigineqarlutillu illaruaatigineqarput. (Apustilit Suliaat 2:13; 17:32) Jehovap kiffai ullumikkut aamma taamatut pineqartarput. Apustili Petrusip allagai naapertorlugit pruffiitioqqusersutut isigineqassapput. Taanna ima siulittuivoq: ’Ullussani kingullerni tikiukkumaarput mitallersut pilerissusertik maliinnarlugu inuusut mitallerlutillu ima oqartut: „Tikiunnissaaninguna neriorsuut qanoq piniartoq? . . . Suut tamarmik pinngortinneqaqqaarnermissut ittuaannarsimapput.“’ (2 Petrusi 3:3, 4) Guutip kiffai piviusorsiortuunngitsutut mitaatigineqartarput. Biibilimi ileqqussatigut najoqqutassiat qanganisaavallaartutut isigineqartarput. Inuppassuit isaanni tusarliussaq oqaluussissutigisarput sianiitsuliorneruvoq. (1 Korinthimiut 1:18, 19) Kristumiutut immaqa atuarfimmi, suliffimmi ilaannikkullu allaat ilaquttatsinnit illaruaatigineqartarpugut. Tamanna qunulissutiginagu oqaluussinitsigut Guutip naalannassusianik ersersitsiuarpugut. Jiisusitut nalunngilarput Guutip oqaasia sallusuissutaasoq. — Johannesi 17:17.

11. Kristumiunik nipangersitsiniarsarinermini Saatanip malersuineq qanoq atorsimavaa?

¹¹ Diaavulup uagutsinnik nipangersitsiniarsarinermini  periaasiisa pingajuat tassaavoq akerlilersuineq malersuinerlu. Jiisusip ajoqersukkani ima oqarfigai: „Naalliutsikkumaarpaasi toqukkumaarlusilu, ateralu pillugu inuiannit tamanit uumissorneqassaasi.“ (Matthæusi 24:9) Ilumoorpoq Jehovap Nalunaajaasuisut nunarpassuarni peqqarniitsumik malersorneqarnikuusugut. Nalunngilarput Jehovap qangarsuarli siulittuutigisimagaa Guutimut kiffaasut Saatani Diaavulumullu kiffaasut akornanni uumissuinermik pilersoqarumaartoq, imaluunniit akeqqersimaartoqalerumaartoq. (1 Mosesi 3:15) Aamma nalunngilarput misilinneqarnerni assuarnaattuaraangatta Jehovap qilammi nunamilu eqqortumik kisimi oqartussaalluni naalagaanera nalunaajaatigisarlutigu. Tamatuminnga ilisimaarinninnerput allaat pissutsini ilungersunartupilussuarni pinertusaarnissamut nakussatsissutigisinnaavarput. Guutip naalannassusianik ersersitsinissarput aalajangiusimajuarutsigu qanorluunniit ittumik malersorneqaraluarutta nipangersilluinnarneqarnavianngilagut.

12. Saatanimit akerlilersorneqaraluarluta aalajaalluta pinertusaaraangatta sooq tipaatsunnissamut pissutissaqartarpugut?

¹² Illaruaatigineqaraluarlutit akerlilersorneqaraluarlutillu silarsuup pilerinartui itigartittarpigit aamma aalajaattuartarpit? Taamaappat tipaatsunnissamut pissutissaqarputit. Jiisusip imminik malinnikkumasut ima neriorsoqqissaarpai: „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat; taamatuttaarmi pruffiitit qinugisarpaat ilissi siunissigut.“ (Matthæusi 5:11, 12) Pinertusaarnerit Jehovap anersaavanit pissaaneqangaartumit najorneqarninnut Guutillu naalannassusianik ersersitsinissannut tamatumannga nakussatsinneqarninnut uppernarsaataavoq. — 2 Korinthimiut 12:9.

Jehova pinertusaarsinnaatitsivoq

13. Kristumiutut kiffartornitsinni pinertusaarnitsinnut pissutaasut pingaarnerpaat ilaat suua?

¹³ Jehovamut kiffartornitsinni pinertusaarnitsinnut pissutaasut pingaarnerpaat ilaat tassaavoq taassuminnga asanninnerput, tamannalu pissutigalugu taassuma naalannassusianik ersersitsinerput tipaatsuutigaarput. Inuit asasatik ataqqisatillu ilaaqqajaasarpaat, allamillu Jehova Guutimit maligassaalluarnerusoqanngilaq. Asanningaarnini pissutigalugu Jehovap ernini nunarsuarmut aallartippaa sallusuissut nalunaajaatiginiassammagu inuillu naalattut utertinniassammagit. (Johannesi 3:16; 18:37) Guutitut kissaatigaarput inuit tamalaat isumataarnissaat annaanneqarnissaallu; taamaattuminguna oqaluussiffigigivut. (2 Petrusi 3:9) Tamanna kissaatigigatsigu Guutillu maligassiaanik malinninnissaq aalajangiusimagatsigu oqaluussinitsigut taassuma naalannassusianik ersersitsiuarpugut.

14. Kiffartornitsinni pinertusaarnissamut Jehovap qanoq nakussatsittarpaatigut?

¹⁴ Pingaarnerpaamilli Jehovap kristumiutut kiffartornitsinni pinertusaarnissamut nakussatsittarpaatigut. Anersaani, peqatigiissortani oqaatsinilu Biibili aqqutigalugit annertoqqusersortarlutalu nakussatsittarpaatigut.  Jehovap naalannassutsiminik ersersitsiumasut ’nikallujuitsuutippai’. Taassuma qinnutivut akisarpai misilinneqarnerillu naammagalugit atornissaannut ilisimassuseqalersittarluta. (Romamiut 15:5; Jaaku 1:5) Aammattaaq Jehovap artukkatsinnik qanorluunniit ittumik misilinneqarnissarput akuerinavianngilaa. Jehova tatigigutsigu taassuma aniguiffissaq pilersissavaa naalannassutsiminik ersersitsiuarsinnaaniassagatta. — 1 Korinthimiut 10:13.

15. Suna pinertusaarnissamut iluaqutigaarput?

¹⁵ Kiffartornermi pinertusaarnerput Guutip anersaavanit najorneqarnitsinnut uppernarsaataavoq. Ima assersuusiortoqarsinnaavoq: Takorlooriaruk matumiit matumut angalaarlutit akiliisitsinak iffianik agguaaqquneqarlutit. Paasitinneqarputit sulinngiffinni taamaaliussasutit taamaaliorninnilu aningaasartuutit nammineq akilissagitit. Aammattaaq paasipallappat inuit ikittuinnaat iffiaatitit perusukkaat; allaat inuit ilaasa agguaaniarnerit akornusersorpaat. Taamatut suliuarsinnaassasorivit? Ilimananngilaq. Taamaakkaluartorli immaqa ukiorpassuarni, imaluunniit allaat ukiuni qulikkuutaani sulinngiffinni namminerlu aningaasartuutigalugu nutaarsiassamik nuannersumik oqaluussissutiginninnissat ilungersuutigisimavat. Sooq? Jehova asagakku taassumalu anersaaminik ilungersornitit pilluaqqusarmagit pinertusaarnissamullu ikiortarmatit taamaaliorputit, ilaa? Aap, tamanna qularnanngilaq!

Suliaq eqqaamaneqarumaartoq

16. Oqaluussinitsinni pinertusaarnerput uagutsinnut uagutsinnillu tusarnaartunut qanoq kinguneqarsinnaava?

¹⁶ Angerutsimut nutaamut kiffartorneq erlinnartuuvoq. (2 Korinthimiut 4:7) Taamatuttaaq kristumiutut oqaluussineq savanit allanit nunarsuaq tamakkerlugu ingerlanneqartoq erlinnartuuvoq. Kiffartornerni pinertusaaruit ’imminut annaassinnaavutit tusartitillu annatsissinnaallugit’, soorlu Paulusi Timotheusimut taama allattoq. (1 Timotheusi 4:16) Tamatuma qanoq isumaqarnera eqqarsaatigeriaruk. Nutaarsiassaq nuannersoq illit oqaluussissutigisat aqqutigalugu inuit allat naassaanngitsumik inuunissamut periarfissinneqartarput. Anersaakkut ikiukkatit ikinngutigillualersinnaavatit. Takorlooriaruk qanoq nuannertigissasoq Guuti pillugu ilinniartissimasatit Paratiisimi naassaanngitsumik inooqatigalugit! Ikiorniarlugit ilungersornitit puiunngisaannassavaat. Qanoq nalerisimaarnartigissava!

17. Inuiaat oqaluttuarisaaneranni piffissaq inuuffigisarput sooq immikkut ittuua?

¹⁷ Inuiaat oqaluttuarisaaneranni piffissami immikkut ittumi inuuvutit. Kingusinnerusukkut nutaarsiassaq nuannersoq silarsuarmi Guutimit ungasillisimasumi oqaluussissutigineqaqqinnavianngilaq. Noa silarsuarmi taama ittumi inuuvoq, tamatumalu peerunnera misigaa. Qanoq tipaatsutsigisimassava nalunagu umiarsualiornermigut Guutip piumasaatut iliortarluni, suliaq nammineq taassumalu ilaqutaasa aniguisinneqarnerannik kinguneqartoq. (Hebræerit 11:7) Illittaaq taamatut nuannaaruteqarsinnaavutit. Eqqarsaatigiuk silarsuassami nutaami qanoq misigissanerlutit ulluni kingullerni makkunani oqaluussinermi suliarisimasatit eqqarsaatigigukkit, nalunagu Guutip naalagaaffiata soqutigisai siuarsarniarlugit sapinngisannik iliorsimallutit.

18. Jehova kiffaminik qiimmaallannartumik qanoq neriorsueqqissaarpa?

¹⁸ Taamaattumik Guutip naalannassusianik ersersitsiuarta. Taamaaliorniarluta ilungersornivut naassaanngitsumut eqqaamasassaraavut. Aammattaaq Jehovap suliavut eqqaamassavai. Biibilimi ima qiimmassarneqarpugut: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu. Kissaatigisarpulli mannaavoq tamarluinnassi naggatissaq tikillugu pisarnissitut ilungersorlusi pissarsiariniassagissi pisuussut neriugisap imarisaa, eqeersimaarunnaaqqunasi, malinniaqqullugilli uppernikkut nikallujuinnikkullu Guutip neriorsuutigisaanik kingornussisussat.“ — Hebræerit 6:10-12.

Uku nassuiarsinnaavigit?

• Kristumiut Guutip naalannassusianik qanoq ersersitsisarpat?

• Guutip innuttaanik nipangersitsiniarsarinermini Saatanip periaatsit suut atortarpai?

• Guutip anersaavanit najorneqarnitsinnut sumik uppernarsaatissaqarpa?

[Atuaqqissaarnermi apeqqutit]

[Qupp. 19-mi assiliartaq]

Jehovap naalannassusia Mosesip kiinaatigut ersersinneqarpoq

[Qupp. 20, 21-mi assiliartaq]

Oqaluussinitsinni Guutip naalannassusianik ersersitsisarpugut