Jehovap ’nutsatit tamaasa kisissimavai’

„[Qupaloraarsuit] ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput.“ — MATTHÆUSI 10:29, 30.

1, 2. (a) Sooq Jobi Guutimit qimanneqarsimasutut misigiva? (b) Jobip taamatut oqarnera ima paasisariaqarpa taassuma Jehova tunussimagaa? Nassuiaruk.

„SUAARALUARAKKIT akinngilatit; maani qeqaraluarpunga, soqutiginngilarmali. Naakkittaallutit saapiloorparma, peqqarniitsumillu saassullunga.“ Angut taama oqaaseqartoq isumatsassimaqaaq taamatullu misiginissaminut pissutissaqarluarluni! Inuussutissarsiutini annaasimavaa, meerai tamarmik ajunaarsimapput, maannalu perululluni napparsimavoq. Angut taanna Jobimik ateqarpoq, misigisimasaalu ajorluinnartut uagut iluaqutissatsitut Biibilimi allanneqarsimapput. — Jobi 30:20, 21.

² Jobip taamatut oqarnera isumaqarnarsinnaavoq taassuma Guuti tunussimagaa, taamaattoqanngilarli. Jobip uummammiuni aniatiinnarpai aliasungaarninilu oqaatigiinnarlugu. (Jobi 6:2, 3) Naluaa annikilliungaarnerminut Saatani pisuusoq, taamaattumillu kukkulluni isummerpoq Guutip qimassimagaani. Ilaanni Jobip Jehova allaat ima oqarfigaa: „Sooq kiinnat uannut isertorpiuk ilinnullu akeraasutut naatsorsuullunga?“ * — Jobi 13:24.

3. Atugarlioraangatta qanoq eqqarsalersinnaavugut?

³ Ullumikkut Jehovap kiffaasa ilarpassui kipisuitsumik atugarliortarput sorsunneq, politikkikkut innuttaaqatigiinnikkulluunniit allanngorujussuarnerit, pinngortitami ajunaarnersuit, utoqqalineq, nappaatit, piitsuungaarneq naalakkersuisunillu inerteqqutigineqarneq pissutigalugit. Qularnanngitsumik illittaaq arlaatigut misilinneqartarputit. Immaqa ilaannikkut misigisarputit Jehovap kiinnani ilinnut isertoraa. Johannesi 3:16-imi allassimasoq una nalunngilluinnarpat: „Guutip silarsuaq ima asatigaa ernituani tunniussimallugu.“ Taamaakkaluartorli anigorneqarsinnaanngitsutut ittunik aliasuuteqarlutillu ajornartorsiuteqaraangavit immaqa ima eqqarsalertarputit: ’Guutip ilumut asanerlunga? Pissutsit atukkakka malugisarnerlugit? Uanga immikkut isumassorpaanga?’

4. Paulusip suna naammagalugu atortuartariaqarpaa, tamatumunngalu assingusumik atugaqarutta tamanna qanoq sunnerneqaatigisinnaavarput?

⁴ Apustili Paulusip misigisimasaasa ilaat misissorneroriartigu. Taanna ima allappoq: „Kapinartumik timinnut kapputtumik pineqarpunga, tassa Saatanip inngilianit uannik anaalereqquneqartumit.“ Imalu nangippoq: „Pingasoriarlunga Naalagaq qinnuigaara taanna uannit peersitaaqqullugu.“ Jehovap taassuma qinnutai tusarpai. Taamaakkaluartorli Paulusi paasitippaa tupinnartuliornikkut akuliukkumanani. Paulusip tatigisariaqarpaa ’kapinartoq timimut kapputtoq’ taanna naammagalugu atorsinnaaniassagamiuk Guutip nakussatsikkumaaraani. * (2 Korinthimiut 12:7-9) Immaqa Paulusitut aalajangersimasoq misilinneqaatigiuarpat. Immaqa ima eqqarsarputit: ’Jehovap misilinneqarninnik oqilisaaviginiarpasinngippanga, taava imaappa qanoq atugaqarnera soqutiginngikkaa isumassunngikkaangaluunniit?’ Tamatumunnga akissut imaappoq:  Naamerluinnaq! Jehovap kiffaminik aalajaatsunik tamanik soqutiginningaarnera Jiisusip apustiliminik toqqaanerata kingunitsianngua taakkununnga oqaasiinit erseqqissarneqarpoq. Paasiniariartigu oqaasii ullumikkut qanoq qiimmassaatigisinnaanerlutigik.

Sooq annilaangassanngitsugut

5, 6. (a) Jiisusip apustilit pisussanut ersinnginnissaannik qanoq ikiorsimavai? (b) Paulusip Jehovamit isumassorneqarnerminik qularuteqannginnini qanoq ersersippaa?

⁵ Apustilit Jiisusimit tupinnartuliorsinnaanermik tunineqarput, ilaatigut ’anersaanut minguttuunut naalagaassusilerneqarput taakkuninnga anisitsisinnaanngorlutik aamma nappaatinik anniaatinillu tamanik ajorunnaarsitsisinnaanngorlutik’. Imaanngilarli misilinneqarnatillu annikilliussanngitsut. Jiisusip taakkua misigiumaagassaasa ilaat oqaatigai. Tamannali ilutigalugu ima kajumissaarpai: „Ersigeqinasigit timimik toqutsisut tarnimilli toqutsisinnaanatik.“ — Matthæusi 10:1, 16-22, 28.

⁶ Apustilini sooq annilaangasariaqannginnerannik paasitinniarlugit Jiisusi marlunnik assersuusiorpoq. Ima oqarfigai: „Qupaloraarsuit marluk skillingimik akilersillugit tunineqartannginnerpat? Taakkua ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput. Taamaattumik erseqinasi, ilissi qupaloraarsuppassuarnit pingaarneruvusi.“ (Matthæusi 10:29-31) Malugiuk Jiisusip akerlilersorneqarnermi ersinnginneq Jehovallu uagutsinnik inuttut ataasiakkaatut isumassuineranik qularuteqannginneq imminnut atassuserai. Ersarippoq apustili Paulusi tamatuminnga qularuteqanngitsoq. Taanna ima allappoq: „Guutip illersorpatigut kia assortussavaatigut? Taassuma allaat ernini erliginagu tamatta pilluta tunniussimagamiuk, taava taassumunnga ilanngullugu tamanik tunissannginnerpaatigut?“ (Romamiut 8:31, 32) Sunaluunniit ajornartorsiutigilissagaluarukku illittaaq qularinngissinnaavat Jehovap isumagissagaatit taanna ilumoorfigiuarukku. Jiisusip apustilinut kajumissaarutaa misissorluarnerugutsigu tamanna suli paasinarnerulissaaq.

Qupaloraarsuup nalinga

7, 8. (a) Jiisusip nalaani qupaloraarsuit qanoq isigineqartarpat? (b) Matthæusi 10:29-mi ’qupaloraarsuit’ pillugit grækerit oqaasiata mikisorsiutip atorneqarneranut suna pissutaagunarpa?

⁷ Jiisusip assersuusiaani sunniuteqarluartumik ersersinneqarpoq Jehovap kiffani tamaviisa isumassortarai. Qupaloraarsunnik assersuusiaq misissoqqaariartigu. Jiisusip nalaani qupaloraarsuit nerineqartarput, naatitanulli ajoqutaagamik uumasutut ajoqutaasutut isigineqarnerusarput. Ima amerlatigisimapput imalu akikitsigisimallutik qupaloraarsuit marluk ullumikkut aningaasat nalinginut sanilliutissagaanni 30 øret inorlugit akilerlugit pisiarineqartarlutik. Marloriaataanik akiliigaanni qupaloraarsuit sisamaannaanatik tallimaasarput — timmiaaraq ataaseq ilanngunneqartarpoq, soorlulusooq naleqanngilluinnartoq! — Lukasi 12:6.

 ⁸ Eqqarsaatigiuttaaq timmiaaqqap nalinginnaasup tamatuma angissusia. Timmissanut allarpassuarnut naleqqiullugu allaat qupaloraarsuk inivissimasoq mikisuararsuuvoq. Taamaattorli grækerit oqaasiat Matthæusi 10:29-mi ’qupaloraarsunnik’ nutserneqartoq, pingaartumik qupaloraarsuaqqanut atorneqartarpoq. Erseqqippoq Jiisusip kissaatigigaa apustilimi timmissat mikinerpaartaat eqqarsaatigissagaat. Qinerlerfissiami ima allassimasoqarpoq: „Jiisusip timmiaaraarannguaq eqqartorpaa, allaat oqaaseq mikisorsiut atorlugu!“

9. Jiisusip qupaloraarsuit pillugit assersuusiaani pingaartoq suna erseqqissarneqarpa?

⁹ Jiisusip qupaloraarsuit pillugit assersuusiaani pingaartoq manna erseqqissarneqarpoq: Inuit naleqanngitsutut isigisaat Jehova Guutimut pingaaruteqarpoq. Ilumoortoq tamanna Jiisusip erseqqissaqqippaa oqarami qupaloraarsuaraq ’nunamut nakkarnavianngitsoq’ Jehovamit malugineqarnani. * Ilinniutissaq tamanna paasiuminarpoq. Jehova Guutip allaat timmissat mikinerpaartaat malugisaruniuk, soorunalimi inuk imminut kiffartorniarluni aalajangersimasoq soqutiginerungaassavaa!

10. Oqaatsit „nutsasiluunniit tamarmik kisissimapput“ qanoq paasisariaqarpat?

¹⁰ Qupaloraarsuit pillugit assersuusioreerluni Jiisusi ima oqarpoq: „Ilissimi nutsasiluunniit tamarmik kisissimapput.“ (Matthæusi 10:30) Oqaasialunnguit taakku ilumuuissortaqarput Jiisusip qupaloraarsuit pillugit assersuusiaata pingaarnerusortaanik erseqqissaasumik. Eqqarsaatigeriaruk: Inuk agguaqatigiissillugu 100.000-inik nujaqartarpoq; nutsat tamarmik assigiippasipput, nujarlu ataaseq nutsanit allanit soqutiginerusanngilarput. Taamaakkaluartorli Jehova Guutip nutsat tamaasa immikkut malugisarpai, nalunngilaalu qassiunersut. Taamaammat, inuunitsinnut atatillugu Jehova ilisimanngisaqarsinnaanerpa? Erseqqippoq Jehovap kiffani tamaasa immikkut nalunngikkai tamarmillu immikkut qanoq kinaassuseqarnerat paasigaa. Aap, taassuma „inuup uummataa isigisarpaa“. — 1 Samueli 16:7.

11. Daavip Jehovap imminik isumassuineranik qularutiginninnginnini qanoq oqaatigaa?

¹¹ Daavip, atugarliortarsimaqisup, Jehovap imminik arajutsisimanninnginnera qularinngilaa. Taanna ima allappoq: „[Jehova], illit misissuiffigisimavarma, nalunangalu. Nalunngilarma issiagaluaruma nikorfagaluarumaluunniit, ungasissumit allaat paasereertarpat qanoq eqqarsartunga.“ (Tussiaat 139:1, 2) Illittaaq qularissanngilat Jehovap inuttut ilisarisimagaatit. (Jeremia 17:10) Ima isumaqaliaarpallaassanngilatit Jehovamit tamanik takunnissinnaasumit malugineqarnissamut pingaaruteqanngippallaarlutit!

„Qullikka toqqortaraatit illit imiisivinni amiusumi“

12. Qanoq ililluta nalunngilarput Jehovap nalunngilluinnaraa innuttami ajornartorsiutit suut naammagalugit atortariaqarneraat?

¹² Jehovap kiffani tamaasa immikkut ilisarisimaannanngilai, aammali tamarmik immikkut sunik ajornartorsiuteqartarnerat nalunngilluinnarpaa. Assersuutigalugu Israelikkut inussiatut naqisimaneqarmata Jehovap Mosesi ima oqarfigaa: „Innuttama Egyptenimi naalliunnerat takusimavara, inussianillu sulisitsisut pillugit nimaarlutik nillianerat tusarpara. Erloqissutaat nalunngilakka.“ (2 Mosesi 3:7) Misilinneqaraangatta Jehovap qanoq pisoqartarnera takusaraa nillianivullu tusartarai nalunagu tuppallernartaqaaq! Naalliuutivut eqqarsaatigalugit soqutigittaatsuunngilluinnarlunilu  misigittaatsuunngilluinnarpoq.

13. Sumit paasineqarsinnaava Jehova kiffaminik ilumut misigeqatiginnittartoq?

¹³ Jehovap imminut kiffartulersimasunut isumassuinera aamma Israelikkunnut misigissusiinit paasineqarsinnaavoq. Namminneq uteriitsuunertik pissutigalugu naalliuttarput, taamaattorli Esaja Jehova pillugu ima allappoq: ’Erloqissutaat tamaasa erloqissutigai.’ (Esaja 63:9, 1900/1961) Taamaattumik Jehovamut aalajaallutit kiffaagavit qularissanngilat illit anniaateqaraangavit Jehovattaaq tamanna anniaatigisaraa. Tamanna akerlilersorneqaraangavit qunusuitsuunissamut taassumunngalu kiffartorninni sapinngisat tamaat iliuuseqartuarnissamut nakussatsissutigisarpat, ilaa? — 1 Petrusi 5:6, 7.

14. Tussiaat 56 allanneqarmat pissutsit qanoq ippat?

¹⁴ Tussiaat 56-imit, Daavip kunngimit Saulimit toqutserusuttumit qimaalluni allassimasaanit, paasineqarluarsinnaavoq Daavip Jehovap imminik isumassuinera misigeqatiginninneralu qularinngilluinnaraa. Daavi Gatimut qimaavoq, filisterinilli ilisarineqarami taakkunannga tigusarineqarnissani siooragaa. Ima allappoq: „Akeqqama ulloq tamaat [qinugaannga]. Amerlaqaat assoroorlutik uannut sorsuttut.“ Navianartorsiorami Daavi Jehovamut saaffiginnippoq. Ima oqarpoq: „Ulloq tamaat oqaatsikka unioqqutittarpaat, ajortuinnarmik pilersaarfigaannga.“ — Tussiaat 56:3, 6.

15. (a) Daavip Jehova qinnuigigamiuk qullini imiisivimmi amiusumi toqqoqqullugit mappersakkamiluunniit allattortaqqullugit, suna pivaa? (b) Uppernikkut misilinneqarnermi pinertusaarutta suna qularutigissanngilarput?

¹⁵ Daavi nangilluni Tussiaat 56:9-mi allassimasutut soqutiginartumik ima oqaaseqarpoq: „Naalliullunga inuunera naatsorsugaraat, qullikka toqqortaraatit illit imiisivinni amiusumi, mappersakkanni nalunaarsorsimapput.“ Jehovap isumassuingaarnerata allaatigineqarnera killitsinnangaarami! Tatineqaraangatta immaqa qialluta Jehova ikioqqulluta qinnuigisarparput. Allaat inuk naammalluinnartoq Jiisusi taamaaliortarpoq. (Hebræerit 5:7) Daavip qularutiginngilaa Jehova imminik arajutsisimanninngitsoq erloqissutiminillu eqqaamannikkumaartoq, soorlulusooq Daavip qullii imiisivimmi amiusumi toqqortarai mappersakkaniluunniit allattortarlugit. * Immaqa isumaqarputit illit qullitit imiisivimmi mappersakkamiluunniit taama ittumi initussagaluaqisut. Taamaappat tuppallersaatissaqarputit. Biibilimi ima neriorsoqqissaarneqarpugut: „[Jehovap] qanippai sequmissimasumik uummatillit, annaattarpai aserortersimasumik anersaallit.“ — Tussiaat 34:19.

Guutimik qanimut ikinnguteqarneq

16, 17. (a) Qanoq ililluta nalunngilarput Jehovap ajornartorsiutit innuttami atortariaqagaat suusupaginngikkai? (b) Jehovap innuttani allanut isertukkaminik oqaluttuunneqarniassammata qanoq iliortarpa?

¹⁶ Jehovap ’nutsavut tamaasa kisissimammagit’ takorloorsinnaavarput Guuti pallorfigisarput qanoq soqutiginnitsigalunilu isumassuitigisoq. Anniaatit naalliuutillu tamarmik aatsaat silarsuassami nutaami neriorsuutigineqartumi peerneqartussaagaluartut, maannakkut Jehova innuttaminut asseqanngilluinnartumik iliuuseqartalereerpoq. Daavi ima allappoq: „Jehovamik mianerinnittut taassuma allanut isertukkaminik oqaluttuuttarpai angerutsinilu taakkununnga ilisimatitsissutigisarlugu.“ — Tussiaat 25:14, NV.

¹⁷ ’Jehovamit isertukkanik oqaluttuunneqarnermik’ eqqarsaat inunnut naammalluinnanngitsunut paasiuminaatsorujussuusinnaavoq! Taamaattorli Jehovap imminik mianerinnittut tuperminut qaaqquai. (Tussiaat 15:1-5) Jehovallu pulaartuni qanoq iliorfigisarpai? Daavip oqaasii naapertorlugit angerutsini taakkununnga ilisimatitsissutigisarpaa. Jehovap taakku tatigai pruffiitillu aqqutigalugit ’pilersaarutini’ taakkununnga saqqummersittarlugit, siunertani ilisimasinnaaniassammassuk tamatumunngalu naapertuuttumik inuuniarlutik qanoq iliortariaqarnertik paasisinnaaniassammassuk. — Amosi 3:7.

18. Qanoq ililluta nalunngilarput Jehovap kissaatigigaa qanittumik attaveqarfigissagitsinni?

¹⁸ Inuttut naammalluinnanngitsutut Qutsinnerpaamik,  Jehova Guutimik, ikinnguteqalersinnaanerput paasillugu killitsinnartorujussuuvoq. Aap, taamaalioqqullutalu allaat kajumissaarpaatigut. Biibilimi ima allassimavoq: „Guuti qaninniarsiuk, taava taanna ilissinnut qanillissaaq.“ (Jaaku 4:8) Jehovap kissaatigaa qanittumik attaveqarfigissagitsinni, taamaaliorsinnaaqqullutalu allaat iliuuseqareersimavoq. Jiisusip utertitsissutitut pilliutaa aqqutigalugu Guutimik ajugaqanngitsumik ikinnguteqalernissamut periarfissinneqarpugut. Biibilimi ima allassimavoq: „Uagut asannippugut taassuma asaqqaarmatigut.“ — 1 Johannesi 4:19.

19. Jehovamut attaveqarnerput pinertusaarnikkut qanoq nakussatsinneqarsinnaava?

¹⁹ Artornartunik atugaqartilluta pinertusaaraangatta qanittumik attaveqarneq tamanna nakussatsinneqartarpoq. Ajoqersugaq Jaaku ima allappoq: „Nikallujuinneq suliamik naammassisitsilluassaaq tassaaqqullusi naammalluinnartut pissuserilluartullu sumik inorsarfeqanngitsut.“ (Jaaku 1:4) Artornartunik atugaqartilluta nikallujuikkaangatta imaluunniit pinertusaaraangatta ’suliaq’ suna naammassineqarluartarpa? Tamatumunnga tunngatillugu ’kapinartoq’ Paulusip ’timaanut kapputtoq’ eqqarsaatigeqqilaariaruk. Paulusip pinertusaarnera qanoq kinguneqarpa? Nammineq ima allappoq: „Tassami sanngiissusera usorsisimaarutigiumanerugaluarpara Kristusip pissaaneranut inigeqqullunga. Taamaattumik tulluusimaartaqaanga sanngiittaraangama, naalliutsinneqartaraangama, atugarliuuteqartaraangama Kristusilu pillugu qinugineqartaraangama ajornartorsiortitaasaraangamalu. Sanngiittaraangamami pissatsittarpunga.“ (2 Korinthimiut 12:9, 10) Paulusip misiginikuuaa Jehovap pisariaqartitaminik nakussatsittaraani — aap, pisariaqaraangat ’pissaanermik asseqanngitsumik’ tunisaraani. Aamma tamatuma kingunerisaanik Kristusimut Jehova Guutimullu qaninnerusumik attaveqalerpoq. — 2 Korinthimiut 4:7; Filippimiut 4:11-13.

20. Sooq qularissanngilarput akerlilersorneqaraangatta Jehovap annertoqqusersussallutalu tuppallersassagaatigut?

²⁰ Immaqa Jehovap misilinneqaannarnissat akuerisimavaa. Taamaappat imminik mianerinnittunut neriorsuutaa una eqqaamajuk: „Iperassanngilakkit imminiiginnassanallu.“ (Hebræerit 13:5) Taamatut annertoqqusersorneqarlutillu tuppallersarneqarsinnaavutit. Jehovap ’nutsatilluunniit tamaasa kisissimavai’. Pinertusaarnerit takusarpaa. Anniarnerit misigisarpaa. Ilinnik ilumoortumik isumassuisuuvoq. Aamma ’puiunngisaannassavai suliatit asanninnerillu aqqanut takutissimasatit’. — Hebræerit 6:10.

[Quppernerup ataani ilanngussat]

Eqqaamavigit?

• Suut pissutigalugit Guutimit qimanneqarsimasutut misigisoqarsinnaava?

• Jiisusip qupaloraarsuit pillugit assersuusiaa nutsattalu kisinneqarsimanerat pillugu oqaasii sumik ilinniarfigisinnaavavut?

• Qullitta Jehovap ’imiisivianut amiusumut’ ikineqarnerat ’mappersagaanilu’ nalunaarsorneqarnerat qanoq paasisariaqarpa?

• Qanoq ililluta Jehovap ’allanut isertugaanik’ oqaluttuunneqarsinnaanngortarpugut?

[Atuaqqissaarnermi apeqqutit]

[Qupp. 9-mi assiliartaq]

Sooq Jehovap ’kapinartoq’ Paulusip ’timaanut kapputtoq’ piinngilaa?

[Qupp. 10-mi assiliartaq]

Jiisusip qupaloraarsuit pillugit assersuusiaa sumik ilinniarfigisinnaavarput?

[Suminngaanneernera]

© J. Heidecker/VIREO

[Qupp. 12-mi assiliartaq]

Biibilimik aalajangersimasumik atuartarnitsigut Guutip uagutsinnik inuttut ataasiakkaatut isumassuinera qularutigiunnaartarparput