Jehovap ’ujarlersini akissarsisittarpai’

„Guutimut pisup upperisariaqarpaa taanna tassaareersoq ujarlersinilu akissarsisissagai.“ — HEBRÆERIT 11:6.

1, 2. Sooq Jehovap kiffaasa ilaat imminut ajortumik isigisarpat?

„UKIUNI 30-ngajanni Jehovamut nalunaajaasuuvunga, nalunaajaasuunissamulli naleqquttutut misiginikuunngisaannarpunga.“ Barbaramik atilik * taama oqarpoq imalu nangilluni: „Pioneriunikuugaluarlunga allarpassuarnillu immikkut pisinnaatitaaffeqarnikuugaluarlunga tamakku tamaasa qinngaqqunnanngitsutut misigilivissutiginikuunngilakka.“ Keith oqaluttuarpoq taamatupajaaq misigisarluni. „Ilaannikkut qinngaqquttarpunga, Jehovap kiffai nuannaarnissaminnut pissutissarpassuaqaraluartut uanga nuannaarneq ajorama. Taamaammat pisuusutut misigilerpunga, taamatullu misiginera sunik tamanik ajornerulersitsiinnarpoq.“

² Itsaq aamma ullumikkut Jehovap kiffaasa aalajaatsut ilarpassuisa misigissutsit taamaattut akiortariaqartarsimavaat. Illimmi? Uppeqatitit nuannaarpasillutillu isumakuluuteqarpasigatik inuunerminnik ilorrisimaarutiginnippasissut immaqa illit misigivutit ajornartorsiuteqartuaannarlutit. Taamaattumik immaqa Jehovamit iluarineqanngitsutut taassumanngalu soqutigineqarnissannut naleqqutinngitsutut misigivutit. Taamatulli isummipallaqinak. Biibilimi ima neriorsoqqissaarneqarpugut: „[Jehovap] asiginnanngimmagu suusupaginagulu ikiortariallip annikilliuutaa; kiinni taassumunnga isertunngilaa, tusarpaali ikioqqulluni torlulanera.“  (Tussiaat 22:25) Missiarsi pillugu siulittuummi tamatumani paasinarsivoq Jehovap kiffani aalajaatsut tusaaginnartanngikkai, aammali akissarsisittarai.

3. Sooq pissutsit aaqqissuussaanerata matuma tatisineranit sunnertinngitsoorsinnaanngilagut?

³ Kikkulluunniit — aamma Jehovap kiffai — pissutsit aaqqissuussaanerata matuma tatisineranit sunnertinngitsoorsinnaanngillat. Silarsuaq Jehovamut akeraanerpaamit, Saatani Diaavulumit, aqunneqartoq inuuffigaarput. (2 Korinthimiut 4:4; 1 Johannesi 5:19) Taassuma pingaartumik Jehovap kiffai saassutarisarpai, aamma tupinnartuliornikkut illersorneqarneq ajorpugut. (Jobi 1:7-12; Saqqummersitat 2:10) Taamaattumik piffissaq Guutip aalajangigaa nalliutserlugu ’naalliunnitsinni nikallujuittariaqarlutalu qinunitsinni qasusuittariaqarpugut’, Jehovamit isumassorneqarnissarput qularinagu. (Romamiut 12:12) Silarsuup matuma tatisinera nakkaannarfigissanngilarput isumaqalerluta Jehova Guutip asanngikkaatigut!

Pinertusaarnikkut maligassiuisut

4. Jehovamut kiffaasut aalajaatsut pissutsini ilungersunartuni pinertusaarsimasut ilaannik eqqaasaqarit.

⁴ Itsaq Jehovap kiffaasa ilarpassui pissutsit ilungersunartut naammagalugit atortariaqartarsimavaat. Assersuutigalugu Hanna qitornaatsuunini — Guutimit puigorneqarsimanerminut ersiutaasorisani — pissutigalugu ’isumatsassimaqaaq’. (1 Samueli 1:9-11) Elia dronningimit Jesabelimit toqutserusuttumit malersorneqarami siooralerpoq Jehovalu ima qinnuigalugu: „[Jehova], naammalerpoq! Toqutiinnannga siuaasannit pitsaanerunnginnama.“ (1 Kunngit 19:4) Aamma apustili Paulusip naammalluinnanngitsuunini nanertuutigisimassavaa ima allakkami: „Ajunngitsumik iliorumagaluarlunga ajortumik iliortartunga. . . . Uangannguakkuluk!“ — Romamiut 7:21-24.

5. (a) Hanna, Elia Paulusilu sumik akissarsisinneqarpat? (b) Nikallungallutalu nanertisimagutta Guutip oqaasianiittut suut tuppallersaatigisinnaavavut?

⁵ Nalunngilarput Hanna, Elia Paulusilu Jehovamut kiffartornerminni pinertusaartut, taassumalu pilluaqqungaarpai. (1 Samueli 1:20; 2:21; 1 Kunngit 19:5-18; 2 Timotheusi 4:8) Taamaattorli taakku inuttut misigissutsinik assigiinngitsorpassuarnik ilaatigut aliasunnermik, isumatsassimanermik siooranermillu akiugaqartariaqarput. Taamaammat uagut ilaannikkut nikallungasarlutalu nanertisimasarutta tamanna tupigusuutigissanngilarput. Inuunermili isumakuluutit pissutigalugit ilumut Jehovamit asaneqarnerluta eqqarsaatigilerutsigu qanoq iliorsinnaavugut? Guutip oqaasianiittunik tuppallersaatissaqarpugut. Allaaserisap matuma siuliani ilaatigut Jehovap nujatsinnik tamanik kisitsisimanera pillugu Jiisusip oqaasii sammivavut. (Matthæusi 10:30) Oqaatsini qiimmassaataasuni taakkunani ersersinneqarpoq Jehovap kiffani tamaviisa soqutigingaarai. Aamma Jiisusip qupaloraarsuit pillugit assersuusiaa eqqarsaatigisinnaavarput. Timmiaaqqat taakkua ilaat ataaserluunniit nunamut Jehovamit malugineqarnani nakkarnavianngippat, taava sooq taassuma annikilliuutivut sumiginnassavai?

6. Misigissutsinik ajortunik akiugaqartunut Biibili qanoq ililluni tuppallersaataasinnaava?

⁶ Uagulli inuit naammalluinnanngitsut Pinngortitsisup ajugaqanngitsup, Jehova Guutip, isaani ilumut naleqangaarsinnaavugut? Aap, taassuma isaani naleqangaarsinnaavugut! Biibilimi allassimaffinni arlalinni tamanna uagutsinnut uppernarsarneqarpoq. Allassimaffiit tamakku eqqarsaatigeqqissaarutsigik tussiaasiortutut ima oqarsinnaassaagut: „Eqqarsaatima eqqissiviilliortileraangannga tuppallersaanerpit nuannaalersittarpaanga.“ (Tussiaat 94:19) Oqaatsit tuppallersaataasut Biibilimeersut taakkua ilaat misissoriartigik. Taamaalilluta paasilluarnerusinnaassavarput Jehovap uagutsinnik pingaartitsisuunera piumasaatullu iliortuarutta akissarsisitsiumaarnera.

Jehovap ’erligisamisut pigisai’

7. Jehovap Malaki aqqutigalugu juutinut ajortunngorsimasunut siulittuut qiimmaallannartoq suna oqaatigaa?

⁷ Ukiuni 400-kkunni ukiunik naatsorsuisalerfitta siorna juutit ajortumik pissuseqarput. Palasit uumasut naleqqutinngitsut tunniunneqartut akuerisarpaat Jehovallu pilliivianni pilliutigisarlugit.  Eqqartuussisut kinaassusersiortarput. Nunami angakkuarneq, salluliorneq, peqquserlunneq allasiornerlu nalinginnaaqaat. (Malaki 1:8; 2:9; 3:5) Inuiaqatigiinnut ajortunngorsimaqisunut taakkununnga Malakip siulittuut tupaallaannartoq oqaatigaa. Piffissap ingerlanerani Jehovap innuttani utertikkumaarpai imminullu ajunngitsumik attaveqalerseqqikkumaarlugit. Siulittuut imaappoq: „Ima oqarpoq katersaarsuit [Jehovaat]: Ullormi qanoq iliuuseqarfissanni taakku erligisattut pigissavakka. Qajassuutissavakka, soorlu ataatap ernini kiffartortini qajassuuttaraa.“ — Malaki 3:17, 1990.

8. Sooq Malaki 3:17 aamma amerlangaartunut tunngatinneqarsinnaava?

⁸ Ullumikkut Malakip siulittuutaa tanitanut, inuiaqatigiinnut anersaakkut ittunut 144.000-iusunut, tunngatillugu eqquuppoq. Taakku Jehovap isaani ilumut tassaapput ’pigisat erligisat’, „inuiaat erligisatut pigineqartussat“. (1 Petrusi 2:9, NV) Malakip siulittuutaa aamma qiimmassaataavoq ’amerlangaartunut qaqortunik atisaqarlutik issiavissaarsuup sioraani Savaaqqallu saavani qeqartunut’. (Saqqummersitat 7:4, 9) Taakku tanitat peqatigalugit savaataalertarput katersat ataatsit paarsisumit ataatsimit, Jiisusi Kristusimit, paarineqartut. — Johannesi 10:16.

9. Sooq Jehovap kiffani ’pigisatut erligisatut’ isigai?

⁹ Jehovap imminut kiffartorniarlutik aalajangertut qanoq isigai? Malaki 3:17-imi eqqaaneqartutut ataataasup asannittup ernerminik isiginninneratut taakku isigai. Oqariartaaseq innuttani pillugit atugaa una malugiuk: ’Erligisattut pigisakka.’ Nutsikkani allani oqariartaaseq taanna ima nutserneqarsimavoq: „Pigisama naleqarnerpaartaat“ (The New Jerusalem Bible) aamma „ujaraatikka erlinnartut“ (The Webster Bible). Jehovamut kiffartortut sooq taassuma isaani taama naleqartigippat? Ilaatigut Guutiugami qujamasuttoq. (Hebræerit 6:10) Uummammit pisumik imminut kiffartortut qanillisarpai immikkullu ittutut isigisarlugit.

10. Jehovap innuttani qanoq illersortarpai?

¹⁰ Naleqangaartumik, pigisatut erligisatut isigisannik, pigisaqarpit? Taamaappat qularnanngitsumik paarilluarniartarpat. Jehovap ’pigisani erligisani’ taamatulli paarilluarniartarpai. Ilumoorpoq taassuma kiffani aalajaatsut inuunermi misilinneqarnernut aliasuutinullu tamanut illersorneq ajorai. (Oqaluussisartup oqaasii 9:11, 1900/1961) Anersaakkulli illersorsinnaallugillu illersorumaarpai. Pisariaqartumik nakussatsittarpai misilinneqarnerit qanorluunniit ittut naammagalugit atorsinnaaniassammatigit. (1 Korinthimiut 10:13) Assersuutigalugu Mosesip Israelikkut ima oqarfigai: „Sapiitsuugit nakuullutillu! . . . [Jehovammi] Guutivit nammineq ingerlaqatigiumaarpaatit. Iperassanngilaatit imminiiginnassanallu.“ (5 Mosesi 31:6) Aap, Jehovap innuttani isumassortarpai. Taassumunnga taakku ’pigisaapput erligisat’.

Jehovap kiffani akissarsisittarpai

11, 12. Jehovap uagutsinnik akissarsisitsiumaarnera Guutip uagutsinnik qanoq isiginninneranut atatillugu qularnitta qanorluunniit ittup akiornissaanut qanoq iluaqutigisinnaavarput?

¹¹ Jehovap kiffaminik pingaartitsingaarneranut ersiutaasoq alla tassaavoq taakkuninnga akissarsisitsisarnera. Israelikkut ima oqarfigai: „Taamaalillusi misilinniarsinga qilaap igalaavi ammassanerikka ilissinnut pilluaatissanillu killeqanngitsunik kueraaffigalusi, oqarpoq Katersaarsuit [Jehovaat].“ (Malaki 3:10) Naggataatigut Jehovap kiffani inuunermik naassaanngitsumik akissarsisissavai. (Johannesi 5:24; Saqqummersitat 21:4) Akissarsiaq nalissaqanngitsoq taanna Jehovap asanningaarneranut tukkungaarneranullu ersiutaavoq. Aamma imminut kiffartorniarlutik aalajangersimasunik ilumut iluarinninneranut ersiutaavoq. Paasigutsigu Jehova Guutiusoq  uagutsinnik tukkorluni akissarsisitsisartoq, tamanna Guutip uagutsinnik qanoq isiginninneranut atatillugu qularnitta qanorluunniit ittup akiornissaanut iluaqutigisinnaavarput. Jehovap kajumissaarpaatigut uagutsinnik akissarsisitsinissani uppereqqullugu. Paulusi ima allappoq: „Guutimut pisup upperisariaqarpaa taanna tassaareersoq ujarlersinilu akissarsisissagai.“ — Hebræerit 11:6.

¹² Soorunami Jehova asagatsigu kiffartorfigaarput — uagutsinnik akissarsisitsiniarluni neriorsuinera pissutigiinnarnagu. Akissarsinissalli qilanaaralugu eqqarsaatigisarnissaa ajortuunanilu namminissarsiornerunngilaq. (Kolossemiut 3:23, 24) Ujarlersini asagamigit aamma assut pingaartikkamigit, Jehova siulliulluni iliuuseqarpoq akissarsisillugillu.

13. Sooq utertitsissut Jehovap uagutsinnik asanninneranut ersiutaava pingaarnerpaaq?

¹³ Jehovap inunnik qanoq pingaartitsitigineranut ersiutaasoq pingaarnerpaaq tassaavoq utertitsissut. Apustili Johannesi ima allappoq: „Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ (Johannesi 3:16) Jehovap Jiisusi Kristusi inuuneranik utertitsissutitut pilliuteqartippaa, tamanna uppernarsaataavoq Jehovap uagutsinnik naleqanngitsutut isiginninneranik asanninnginneranillu isumap eqqunngitsuuneranut. Jehova uagut pilluta taamarsuaq akiliuteqarsimagami — ernituani pilliutigisimagamiuk — asasimassaqaatigut.

14. Paulusip utertitsissut qanoq isigaa?

¹⁴ Suunngitsutut misigilissagaluaruit, taava utertitsissut eqqarsaatigiuk. Jehovap ilinnut tunissutaatut isigiuk. Apustili Paulusip taamatut isigaa. Eqqaamajuk ima allammat: „Uangannguakkuluk!“ Nangillunili ima allappoq: „Guuti qujanarsili Jiisusi-Kristusikkut Naalakkatsigut“, taassuma „ernera uannik asannittoq uangalu pillunga imminut tunniuttoq“. (Romamiut 7:24, 25; Galatiamiut 2:20) Imaanngilaq Paulusi imminut sorsuartut isigigami taama oqartoq. Qularinngilaali Jehovap inuttut pingaartikkaani. Illittaaq Paulusitut utertitsissut Guutip ilinnut tunissutaatut isigisariaqarpat. Aap, Jehova Guutiuvoq pissaaneqangaartoq asannittorlu, kiffaminik akissarsisitsisarlunilu annaassisartoq.

Saatanip ’qoqassiiniutai’ mianersorfigikkit

15-17. (a) Inuup Guutip isaani suunngitsutut misigisimanera Diaavulup qanoq atornerlussinnaavaa? (b) Jobip misigisai uagutsinnut qanoq qiimmassaataasinnaappat?

¹⁵ Taamaakkaluartorli immaqa oqaatsit tuppallersaataasut Guutip oqaasiani isumassarsiarititaallutik allanneqarsimasut ilinnut ilumut tunngatinneqarnerat upperiuminaatsippat. Immaqa misigivutit Guutip silarsuassaani nutaami inuuneq naassaanngitsoq allat akissarsiarisinnaagaat, illilli tamatumunnga naleqqutinngilluinnarlutit. Taama misigiguit qanoq iliorsinnaavit?

¹⁶ Qularnanngitsumik Paulusip Efesosimiunut kajumissaarutaa manna nalunngilat: „Guutip sakkutuussutai tamarmiusut atiniarsigit atasinnaaqqullusi Diaavulup qoqassiniaraangasi.“ (Efesosimiut 6:11) Saatanip periaasii eqqarsaatigigaangatsigik napiarniutit soorlu pigisanik pingaartitsivallaarneq kinguaassiuutitigullu inuunerlunneq ingerlaannaq eqqaasarunarpavut, taamaaliornerpullu eqqorpoq. Ussernartut tamakku Guutip innuttaasa ilarpassuisa itsaq ullumikkullu napitiffigisarpaat. Taamaakkaluartoq Saatanip qoqassiiniutigisartagaa alla arajutsissanngilarput — inunnik isumaqalersitsiniartarnera Jehova Guutimit asaneqanngitsut.

¹⁷ Inuit Guutimit qimagutitinniarlugit Saatani Diaavulu misigissutsinik taamaattunik atornerluillaqqinnerpaavoq. Eqqaamajuk Bildadi Jobimut qanoq oqarsimanersoq: „Inuk Guutip takkuani iluassuseqarsinnaanerpa, arnamit erniusoq minguitsuusinnaanerpa? Allaat qaammat qaammarinngimmat ullorissallu minguitsuunatik taassuma isaani, qanormitaavami minnerutigissava inuk, taanna quperloq, inuup qitornaa, taanna qullugiaq.“ (Jobi 25:4-6; Johannesi 8:44) Illit takorloorsinnaaviuk oqaatsit taakku Jobimut qanoq nikallornartigisimassasut? Taamaattumik illit Saatanimit nikallortitaaqinak.  Taassumali pilersaarutai eqqumaffigikkit eqqortuliorniarlutit ilungersortuarnissamut sapiissuseqarlutillu nukissaqarsinnaaniassagavit. (2 Korinthimiut 2:11) Jobi naveersittariaqarsimavoq, Jehovalli Jobi akissarsisippaa pinertusaarnera pillugu annaasaasa marloriaataannik tunillugu. — Jobi 42:10.

Jehova „uummatitsinnit anneruvoq“

18, 19. Guutip ’uummatitsinnit annerunera’ qanoq paasisariaqarpa, aamma ’sunik tamanik ilisimasaqarnera’ qanoq paasisariaqarpa?

¹⁸ Nikallungaannalersimaneq akioruminaassinnaagaluarpoq. Jehovalli anersaava iluaqutigalugu ’pallittaalisaliat Guutimik ilisimasaqarnermut assortuisut’ aserorterusaarsinnaavatit. (2 Korinthimiut 10:4, 5) Nikallornartunik eqqarsaateqarpallaaleraangavit apustili Johannesip oqaasii uku eqqarsaatigisakkit: „Tamatumuuna ilisimasinnaavarput sallusuissummit pisuunerput, taassumalu saani uummativut eqqissisissinnaavavut uummatitta qanoq-ittumilluunniit pillagassaatikkaluarpatigut; Guutimi uummatitsinnit anneruvoq suullu tamaasa ilisimallugit.“ — 1 Johannesi 3:19, 20.

¹⁹ ’Guutip uummatitsinnit annerunera’ qanoq paasisariaqarpa? Ilaannikkut uummatitta pillagassaatissinnaavaatigut, ingammik naammalluinnanngissutivut susinnaanngisavullu eqqummaariffigigaangatsigit. Aamma imaassinnaavoq tunuliaqutarput pissutigalugu ingasattajaarluta ajortumik imminut eqqarsaatigeqqajaasartugut, soorlulusooq iliuutsivut tamarmik Jehovamit akuerineqarsinnaanngitsut. Johannesip oqaasiini uppernarsaavigineqarpugut Jehova taama isiginnittaaseqanngitsoq. Kukkunivut maluginiarnerunagit qanoq uummammioqarnersugut, tamatta immikkut qanoq periarfissaqarnersugut, maluginiarnerusarpaa. Aamma pissutiginiakkavut siunertarisavullu nalunngilai. Daavi ima allappoq: „Nalunngilaa pinngortitaasugut, eqqaamavaa pujualaasugut.“ (Tussiaat 103:14) Aap, Jehovap uagutsinnit nalunnginneruaatigut!

’Niaqorut kusanangaartoq’ aamma ’kunngip nasartaataasaa’

20. Esajap pilersitseqqinnissamik siulittuutaani Jehovap kiffaminut isiginnittaasia pillugu suna paasinarsiva?

²⁰ Itsaq Jehovap pruffiiti Esaja aqqutigalugu innuttani nunaminnut uternissaannik neriuuteqalersippai. Juutit Babylonimut aallarunneqarunik taamatorpiaq tuppallersarneqarnissaq qiimmassarneqarnissarlu pisariaqartissavaat. Jehovap uternissaat ima oqaatigaa: „Niaqorutinngussaatit kusanangaartoq [Jehovap] assaani, tassaalerlutit kunngip nasartaataasaa Guutivit tigumiaa.“ (Esaja 62:3) Taama oqarluni Jehovap innuttani ataqqinaaserlugillu alutornassusilerpai. Ullumikkut anersaakkut Israelikkut taamatuttaaq iliorfigisimavai. Kiffani qutsissisissimavaalusooq tamanit nersorneqarsinnaaniassammata.

21. Sooq qularutigissanngilarput Jehovamit aalajaalluta pinertusaarnerput pillugu akissarsisinneqarnissarput?

²¹ Siulittuut tamanna pingaarnerpaamik tanitanut tunngatillugu eqquuppoq, aammattaarli tamatumani ersersinneqarpoq Jehova imminut kiffartortunik tamanik qanoq ataqqinaasiisarnersoq. Taamaattumik ilaannikkut suunngitsutut misigileraangatta, eqqaamasariaqarparput naammalluinnanngitsuugaluarluta Jehovap isaani ’niaqorutitut kusanangaartutut’ aamma ’kunngip nasartaataasaatut’ naleqartigaluta imaluunniit pingaaruteqartigaluta. Taamaattumik kajumilluta Jehovap piumasaatut iliorniartuarnitsigut taanna nuannaartittuartigu. (Ussatit 27:11) Taamaaliorutta qularutigissanngilarput Jehovamit aalajaalluta pinertusaartuarnerput pillugu akissarsisinneqarnissarput. (wE 8/1 05)

[Quppernerup ataani ilanngussaq]

Eqqaamavigit?

• Jehovamit ’pigisatut erligisatut’ isigineqarnerput qanoq paasisariaqarpa?

• Sooq pingaaruteqarpa Jehovap uagutsinnik akissarsisitsisutut isiginissaa?

• Saatanip ’qoqassiiniutai’ suut mianersorfigisariaqarpavut?

• Guutip ’uummatitsinnit annerunera’ qanoq paasisariaqarpa?

[Atuaqqissaarnermi apeqqutit]

[Qupp. 13-mi assiliartaq]

Paulusi

[Qupp. 13-mi assiliartaq]

Elia

[Qupp. 13-mi assiliartaq]

Hanna

[Qupp. 15-mi assiliartaq]

Guutip oqaasiani tuppallersaatissarpassuaqarpoq