Kristumiut Jehovap naalannassusia ersersittarpaat
Kristumiut Jehovap naalannassusia ersersittarpaat
„Ilissi isisi pilluarput takunnittaramik siutisilu tusaasaramik.“ — MATTHÆUSI 13:16.
1. Israelikkut Qaqqap Sinajip eqqaani Mosesimik ersiginnilernerannut tunngatillugu suna apeqqutaalerpa?
ISRAELIKKUT Qaqqap Sinajip eqqaani katersorsimasut Jehovamut qanillinissaminnut pissutissaqarluarput. Taassuma taakku assamminik pissaasumik Egyptenimit aniguisippai. Pisariaqartitaat isumagai inoqajuitsumiinneranni nerisassaqartillugillu imigassaqartillugit. Aamma Amalekikkut sakkutuuinut saassussisunut ajugaatippai. (2 Mosesi 14:26-31; 16:2–17:13) Israelikkut inoqajuitsumi Qaqqap Sinajip eqqaani tammaarsimatillutik kallerneranit innaallattarneranillu ima tupatsinneqartigipput sajulerlutik. Kingusinnerusukkut inuit taakkua Mosesi Qaqqamit Sinajimit atertoq takuaat, Jehovallu naalannassusia Mosesip kiinaatigut ersersinneqarpoq. Tamanna tupigusuutigisariaqaraluarpaat Jehovallu naalannassusia akuerisariaqaraluarlugu, tunuarterpulli. Mosesip „pallinnissaa ersigilerpaat“. (2 Mosesi 19:10-19; 34:30) Jehovap, taakkuninnga ikiuingaarsimasup, naalannassusiata ersersinneqarnerata takunissaa sooq ersigaat?
2. Israelikkut Guutip naalannassusianik Mosesip ersersitaanik takunninnissaminnik ersiginninnerannut suna pissutaasimasinnaava?
2 Pisimasumi tamatumani Israelikkut ersiornerat siornatigut pisimasumik pissuteqarnerugunarpoq. Taakku kuultiusumik nersuteeraasaliornermikkut piaaralutik Jehovamut naalanngimmata taassuma pillarpai. (2 Mosesi 32:4, 35) Jehovap pillaanera ilinniarfigaat aamma qujamasuutigaat? Naamik, amerlanerit taamaaliunngillat. Mosesip toqungajalerluni Israelikkut kuultimik nersuteeraasaliornerat pisimasunilu allani naalannginnerat eqqaallugit ima oqarfigai: „[Jehovap] Guutissi peqqussutaa unioqqutipparsi. Upperfiginngilarsi naalannagulu. Ilissinnik ilisarisimannileqqaarninniit manna tikillugu [Jehovap] peqqusaanut akerliusumik iliortarpusi.“ — 5 Mosesi 9:15-24.
3. Qaqugukkut Mosesip kiinnani assertarpaa?
3 Misissoriartigu Israelikkut ersilermata Mosesi qanoq iliorsimanersoq. Tamanna ima oqaluttuarineqarpoq: „Mosesip Israelikkut oqaluffigereeramigit kiinnani saaguaa. Kisianni [tupermut naapeqatigiittarfimmut] [Jehovap] kiinaata saani [Jehova] oqaloqatigiartoraangamiuk kiinnami assiaqutaa peertarpaa peersimasarlugulu aninissami tungaanut, anigaangamilu Israelikkut imminut peqqussutigineqartunik ilisimatittarpai; Israelikkullu takusarpaat Mosesip kiinaata amia qinngorneqartoq. Taava Mosesip kiinnani saagusarpaa saagusimasarlugulu [Jehovap] oqaloqatigiartoqqinnissaata tungaanut.“ (2 Mosesi 34:33-35) Sooq Mosesip kiinnani ilaannikkut assertarpaa? Tamanna qanoq ilinniarfigisinnaavarput? Apeqqutinut taakkununnga akissutit iluaqutigalugit paasisinnaavarput uagut nammineq Jehovamut attaveqarnerput qanoq innersoq.
Periarfissat maangaannartinneqartut
4. Apustili Paulusi naapertorlugu sooq Mosesip kiinnani assertarpaa?
4 Apustili Paulusi nassuiaavoq Israelikkut isumaliortaasiat uummammiugisaallu pissutigalugit Mosesip kiinnani assertaraa. Paulusi allappoq ’Israelip qitornaasa Mosesip kiinaa isigisinnaajunnaaraat qaamaneq niaqorutaasoq pissutaalluni. Isumaat manngertitaapput’. (2 Korinthimiut 3:7, 14) Ila alianassusia! Jehovap Israelikkut toqqakkamisut innuttarai, imminullu qanillinissaat kissaatigaa. (2 Mosesi 19:4-6) Taamaakkaluartoq Guutip naalannassusia ersersinneqartoq isigiinnaavikkumanngilaat. Taakkua uummatimikkut isummamikkullu asannittumik tunniusimallutik Jehovamut saattariaqaraluarlutik taassumannga qimagupput.
5, 6. (a) Ukiuni hundredelinni siullerni juutit Mosesillu nalaani taakkua siuaasaat qanoq assigiissuteqarpat? (b) Jiisusimik tusarnaartut taassuminngalu tusarnaanngitsut suna assigiinngissutigaat?
5 Ukiuni hundredelinni siullerni tamatumunnga assingusumik pisoqarpoq. Paulusip kristumiunngornerata nalaani Inatsisit tunngavigalugit angeruseq angerutsimik nutaamik, Jiisusip Kristusip, Mosesip annerup, akunnermiliuttuuffigisaanik, taarserneqareersimavoq. Jiisusip oqaatsimigut iliuutsimigullu Jehovap naalannassusia naammalluinnartumik ersersippaa. Paulusi Jiisusi makititaasimasoq pillugu ima allappoq: „Taanna Guutip naalannassusiata akisunneraa, pissusiatalu asserluinnaraa.“ (Hebræerit 1:3) Juutit periarfissarissaangaaramik! Guutip nammineq ernera inuuneq naassaanngitsoq pillugu oqaluttuartoq tusarnaarsinnaavaat! Ajoraluartumilli Jiisusip oqaluussiffigisaasa amerlanersaat tusarnaanngillat. Jiisusip Jehovap Esaja aqqutigalugu siulittuutaa taakkununnga tunngatillugu issuarpaa ima oqarluni: „Inuiaat taakkua uummataat orsumik qallersimapput, siutaat tusassarlersimapput, isaallu mamissimallutik, iseqaraluarlutik takunnissinnaajunnaarsillugit, siuteqaraluarlutik tusaasinnaajunnaarsillugit uummatimikkullu paasinnissinnaajunnaarsillugit, saanniaqqunagillu uannit ajorunnaarsinneqartariaqalerlutik.“ — Matthæusi 13:15; Esaja 6:9, 10.
6 Juutit taakku Jiisusillu ajoqersugai, Jiisusimit ima oqaatigineqartut, assigiinngilluinnarput: „Ilissi isisi pilluarput takunnittaramik siutisilu tusaasaramik.“ (Matthæusi 13:16) Kristumiut ilumoortut Jehova ilisarisimalerusullugulu kiffartorfigerusuppaat. Taakkua taassuma piumasaatut Biibilimi saqqummersinneqartutut iliortarnertik nuannaarutigaat. Taamaalillutik kristumiut tanitat angerutsimut nutaamut kiffartortutut Jehovap naalannassusianik ersersitsisarput, aamma savat allat taamatut iliortarput. — 2 Korinthimiut 3:6, 18.
Nutaarsiassaq nuannersoq sooq ulissimanersoq
7. Inuit amerlanersaasa nutaarsiassamik nuannersumik itigartitsisarnerat sooq tupinnanngila?
7 Soorlu paasereeripput Jiisusip nalaani Mosesillu nalaani Israelikkut amerlanersaasa periarfissartik asseqanngitsoq itigartippaat. Ullumikkut tamatumunnga assingusumik pisoqartarpoq. Nutaarsiassaq nuannersoq oqaluussissutigisarput inuit amerlanersaasa itigartittarpaat. Tamannali tupaallaatiginngilarput. Paulusi ima allappoq: „Iivangkiiliu 2 Korinthimiut 4:3, 4) Saatanip nutaarsiassaq nuannersoq isertorniarlugu sapinngisaminik iliuuseqarnerata saniatigut inuppassuaqarpoq namminneq kiinnaminnik ulissisimasunik takusaqarusunnginnamik, imaluunniit paasisaqarusunnginnamik.
tusarliussarput ulissimaguni taamaappoq tammarsimasuinnarnut, uppinngitsunut; silarsuummi matuma guutiata taakkua eqqarsaataat tappiillisippai.“ (8. Inuppassuit ilisimaatsuunertik pissutigalugu qanoq tappiilleqqappat, uagullu qanoq tappiillinaveersaarsinnaavugut?
8 Inuppassuit ilisimaatsuunertik pissutigalugu tappiilleqqapput. Biibilimi inuiaat pillugit allassimavoq „isumamikkut taarsiortut nalusuussutsiminni . . . Guutimi inuunermut takornartaasut“. (Efesosimiut 4:18) Kristumiunngunngikkallarami Paulusip Inatsisit ilisimalluaraluarlugit ilisimaatsuunini pissutigalugu ima tappiilleqqatigaaq Guutip ilagiissaanik malersuisarluni. (1 Korinthimiut 15:9) Taamaakkaluartorli Jehovap sallusuissut taassumunnga saqqummersippaa. Paulusi ima nassuiaavoq: „Tamannarpiaq pissutigalugu nallittorneqarpunga Kristusi-Jiisusip kamajuissuserminik takutitsiffigisaani siullersaasinnaaqqullunga, uppertunngorumaartunut inuunermillu naassaanngitsumik pissarsisussanut maligassatut.“ (1 Timotheusi 1:16) Aamma ullumikkut inuppassuit Paulusitut sallusuissummik akerlilersuisuusimasut maanna Jehovamut kiffartorput. Tamanna uagutsinnik akerlilersuisunut allaat nalunaajaajuarnissamut pissutissaalluarpoq. Aammattaaq Guutip oqaasia aalajangersimasumik atuaqqissaartarutsigu isumaalu paasigutsigu Jehovap iluarinngisaanik ilisimaatsuliornissamut illersorneqassaagut.
9, 10. (a) Ukiuni hundredelinni siullerni juutit qanoq ersersippaat uteriitsuullutik ilinniarusussuseqarnatillu? (b) Ullumikkut kristumiuuneraqatigiinni aamma taamaattoqarpa? Nassuiaruk.
9 Inuppassuit uteriitsuugamik ilinniarususseqannginnamillu anersaakkut takunnissinnaarpiarunnaartarput. Juuterpassuit Jiisusi akuerinngilaat taassumalu ajoqersuutaa itigartillugu Mosesip inatsisai uteriillutik aalajangiusimagamikkik. Soorunalimi juutit ilaat taamaanngillat. Assersuutigalugu Jiisusip makititaanerata kingorna „palasit amerlaqisut uppernermut naalattunngorput“. (Apustilit Suliaat 6:7) Juutilli amerlanersaat pillugit Paulusi ima allappoq: „Ullumimut uummataat ulimmik matusimasarpoq Mosesip allagai atuffassissutigineqaraangata.“ (2 Korinthimiut 3:15) Paulusip nalusimagunanngilaa siornatigut Jiisusip upperisarsiornikkut siuttunut ima oqarsimanera: „Allakkat isumasiortarpasi ilissi isumaqarassi tamakku naassaanngitsumik inuuneqaatigalugit; taakkorpiaallu uanga nalunaajaatigaannga.“ (Johannesi 5:39) Allakkat misissorluaqqissaartakkatik iluaqutigalugit paasisariaqaraluarpaat Jiisusi Missiarsiusoq. Juutilli allatut isumaqarput, Guutilluunniit ernera tupinnartuliortoq takugaluaramikku isumartik allanngortikkusunngilaat.
10 Ullumikkut kristumiuunerartorpassuit aamma taamaapput. Ukiuni hundredelinni siullerni juutisut ipput, taakkua ’Guuti ilungersuutigaat, kisianni silaqassuseqarnatik [eqqorluartumilli ilisimassuseqarnatik, NV]’. (Romamiut 10:2) Inuit ilaat Biibilimik misissueqqissaartarput, tassanili allassimasut upperiumanngilaat. Taakkua Jehovap inussiaq aalajaallunilu silatooq, tassa kristumiut tanitat, aqqutigalugu innuttaminik ilinniartitsinera akueriumanngilaat. (Matthæusi 24:45) Uagulli paasivarput Jehovap innuttaminik ilinniartitsisuunera sallusuissummillu Guutimeersumik paasinninnerujartuinnartitsisuunera. (Ussatit 4:18) Jehovamit ilinniartinneqartikkaangatta taassuma piumasaanik siunertaanillu ilisimasaqarneq pilluaqquneqaatigisarparput.
11. Inunnut namminneq uppererusutaannarminnik upperisalinnut sallusuissut qanoq ililluni isertorneqarpa?
11 Inuit allat tappiilleqqapput nammineq uppererusutatik kisiisa upperigamikkik. Inuit ilaasa Guutip innuttaanik taakkualu Jiisusip najuunnera pillugu tusarliussamik oqaluussissutigisaannik illaruaatiginninnissaat siulittuutigineqarpoq. Apustili Petrusi ima allappoq: ’Manna arajutsisuusaarpaat,’ tassa Guutip Noap nalaani ulersuarmik silarsuarmut nalliutititsinera. (2 Petrusi 3:3-6, 1900/1961) Kristumiuunerartorpassuittaaq Jehovap nallittuisuunera, ajunngitsuunera isumakkeerfiginnittuuneralu akuereriaannaasarpaat; pillaanngitsoortannginnerali sianiginngitsuusaartarpaat imaluunniit akueriumasanngilaat. (2 Mosesi 34:6, 7) Kristumiut ilumoortut sorpiaat Biibilimi ajoqersuutigineqarnersut ilumoorlutik paasiniarsarisarpaat.
12. Inuit ileqqutoqqanit qanoq tappiillisinneqarsimappat?
12 Naalagiartartorpassuit ileqqutoqqanit kingornussarsiarisaminnit tappiillisinneqarsimapput. Jiisusip nalimini upperisarsiornikkut siuttut ima oqarfigai: „Guutip oqaasii atorunnaarsippasi kingornussarsiasi pillugit.“ (Matthæusi 15:6) Juutit Babylonimi aallarussaaqqareerlutik uteramik aallussilluarlutik pallorfiginninneq ilumoortoq pilerseqqippaat, palasilli makitasuunngorlutillu imminnut iluartuutilerput. Upperisarsiornikkut nalliuttorsiortarnerit qalliinnarsiortunngorput Guutimullu ilumoortumik tunniusimanertaarutivillutik. (Malaki 1:6-8) Allakkanik ilisimasut farisiiarillu Mosesip inatsisai ileqqutoqqanik ilaartorsimavaat, Jiisusillu nalaani tamakku amerlasoorpassuanngorsimapput. Jiisusip angutit taakku ilumoortuusaartutut qulaarpai najoqqutassiat naapertuilluartut Inatsisit tunngavigisaat puiorsimammatigik. (Matthæusi 23:23, 24) Kristumiut ilumoortut upperisarsiornikkut ileqqutoqqat inuit pilersissimasaat pallorfiginninnermit ilumoortumit allamut saassutiginaveersaartariaqarpaat.
„Takussaanngitsumik isigisaqarlunilusooq“
13. Mosesip takunneriaatsit assigiinngitsut marluk atorlugit Guutip naalannassusiata ilaa qanoq takuaa?
13 Mosesip qaqqami Guutip naalannassusia takujumavaa, Jehovallu naalannassusiata akisunneranik takusaqartinneqarpoq. Tupermut naapeqatigiittarfimmut iseraangami kiinnani ulissimaneq ajorpaa. Mosesi upperluarpoq qamanngalu pisumik Guutip piumasaatut iliorusulluni. Takorruukkami Jehovap naalannassusiata ilaanik takusaqarnini pilluaqquneqaatigaa, oqartoqarsinnaavorli Guuti uppernerup isaanik takoreersimagaa. Biibilimi allassimavoq Mosesi ’takussaanngitsumik isigisaqarlunilusooq pinertusaartoq’. (Hebræerit 11:27; 2 Mosesi 34:5-7) Aamma Guutip naalannassusia ersersippaa kiinnami qinngorneqarallarneratiguinnaanngitsoq, aammali Israelikkut Jehovamik ilisarisimannilernissaannik kiffartorfiginninnissaannillu ikiorniarlugit iliuuseqarnermigut.
14. Jiisusip qanoq ililluni Guutip naalannassusia takuaa, sunalu nuannaarutigaa?
14 Qilammi Jiisusip Guutip naalannassusia ukiuni kisissaanngitsuni, allaat silarsuup pinngortinneqannginneraniilli, toqqaannartumik isigaa. (Ussatit 8:22, 30) Piffissap sivisoqisup tamatuma ingerlanerani Jehova Jiisusilu nukittuumik asannittumillu attaveqaleriartorput. Jehovap pinngortitani tamani erniusut siullersaat asanninnermik tunniusimanermillu qamannga pisumik ersersitsivigaa. Jiisusi Guutiminit inuunerminillu Tunisisumit asanningaarnermik tunniusimangaarnermillu ersersitsivigineqarnini akillugu iliuuseqarpoq. (Johannesi 14:31; 17:24) Taakkua asaqatigiinnerat Ataatap ernerullu asaqatigiinneraat naammalluinnartoq. Jiisusip allanik ilinniartitsinermigut Jehovap naalannassusianik ersersitsinini Mosesitut nuannaarutigisarpaa.
15. Kristumiut qanoq ilillutik Guutip naalannassusia takusarpaat?
15 Ullumikkut Guutip nalunaajaasuisa Jehovap naalannassusia isigerusungaarpaat, soorlu Mosesi Jiisusilu taamaassimasut. Taakkua nutaarsiassaq nuannersoq alutornartorlu tununngilaat. Apustili Paulusi ima allappoq: „[Jehovamut] [taassuma piumasaatut iliorniarluni] saattoqaraangat ulik peerneqartarpoq.“ (2 Korinthimiut 3:16) Guutip piumasaatut iliorusukkatta Allakkat atuaqqissaartarpavut. Naalannassuseq Jiisusi Kristusimit, Jehovap erneranit kunnginngortitaanillu, ersersinneqartoq alutoraarput, taassumalu maligassiaa malipparput. Mosesitut Jiisusitullu kiffartorneq, Guuti naalannartoq pallorfigisarput pillugu allanik ilinniartitsineq, pilluaqquneqaatigaarput.
16. Sooq sallusuissummik ilisimanninneq pilluaqqussutaava?
16 Jiisusi Jehovamut qinunermini ima oqarpoq: „Unnersiutigaakkit Ataataq, . . . ilisimasunut sianisuunullu tamanna isertorakku saqqummersilluguli meerannguanut.“ (Matthæusi 11:25) Jehovap uummatimikkut ilumoortunut maniguuttunullu siunertani kinaaninilu paasitittarpai. (1 Korinthimiut 1:26-28) Taassumannga illersuutaasumik isumassorneqarpugut, taassumalu ilinniartippaatigut imminut qanoq iluaqusersinnaanersugut inuunerlu qanoq pitsaanerpaamik pissarsiffigisinnaaneripput. Jehovamut qanilliniarluta periarfissat tamaasa atorluartigit, qujamasuutigalutigulu taassuma imminik ilisarisimanninnerulernissamut periarfissarpassuaqartimmatigut.
17. Jehovap pissusii pillugit qanoq ililluta ilisimasaqarnerulersinnaavugut?
17 Paulusi kristumiunut tanitanut ima allappoq: „Uagut . . . kiinnatsigut uleqarnata tarrarsuummi [Jehovap] naalannassusianik isiginnaartugut [Jehovap naalannassusianik ersersitsisugut, NV] asseq isiginnaagarput assigilerlugu allanngortitaavugut, naalannarsiartuinnarluta.“ (2 Korinthimiut 3:18) Qilaliarnissamik neriugisaqaraluarutta nunarsuarmiluunniit inuunissamik neriugisaqaraluarutta Jehova ilisarisimanerujartortillugu — taassuma pissusii kinaassusialu Biibilimi saqqummersinneqartut pillugit ilisimasaqarnerujartortilluta — taanna assiginerujartuinnassavarput. Jiisusip inuunera, kiffartornera ilinniartitsineralu qujamasulluta eqqarsaatigeqqissaartarutsigik Jehovap pissusii ersersilluarnerusinnaassavavut. Guutitta naalannassusia ersersinniaatigalugu taassuminnga ataqqinartitsilluta nalunagu nuanningaarami!
Eqqaamavigit?
• Sooq Israelikkut Guutip naalannassusiata Mosesip ersersitaata takunissaa ersigaat?
• Ukiuni hundredelinni siullerni nutaarsiassaq nuannersoq sooq ’ulissimasutut’ oqaatigineqarsinnaava? Ullumikkummi?
• Guutip naalannassusia qanoq ililluta ersersittarparput?
[Atuaqqissaarnermi apeqqutit]
[Qupp. 23-mi assiliartaq]
Israelikkut Mosesip kiinaa isigisinnaanngilaat
[Qupp. 25-mi assiliartat]
Ullumikkut inuppassuit Paulusitut sallusuissummik akerlilersuisuusimasut maanna Jehovamut kiffartorput
[Qupp. 27-mi assiliartat]
Jehovap kiffaasa Guutip naalannassusianik ersersitsinertik nuannaarutigaat