Qamuuna eqqisserusunneq

ALBERT nulianilu pilluarput marlunnillu qitornannguaqarlutik. Albertili inuunermini amigaateqartutut misigisimavoq. Ilaanni ilungersorluni suliffissarsiortariaqartilluni, politikkimut akuliuppoq. Socialistinut ilannguppoq allaallu kommunistit partiianni ilaasortatut suleqataalerluni.

Sivitsunngitsorli Albertip kommunistiussuseq pakatsissutigaa. Politikki tunuppaa ilaquttanilu tunniusimaffigilluinnalerlugit. Ilaquttami ingerlalluarnissaannik isumaginninneq inuunermini siunertarilerpaa. Taamaattoq Albert suli misigivoq inuunini imaqanngitsoq — qamuuna eqqissisinnaanngilaq.

Albertip misigisai qaqutigoortuunngillat. Inuit millionillit isumaliutersuutit upperisarsiornerillu assigiinngitsut aqqutigalugit inuunerup siunertaa paasiniarsimavaat. 1960-ikkunni nunani killerni hippiet ileqqussatigut innuttaaqatigiinnilu najoqqutassianut nalinginnaasunut pikitsitsipput. Ingammik inuusuttut pilluarneq inuunerullu siunertaa paaserusuppaat. Taamaattumik misikkarissinartunik ikiaroornartutortalerput hippiellu anersaakkut siuttuinik taakkualu isumaliutersuutaannik malinnilerlutik. Hippieunerli piviusumik pillualersitsinngilaq. Akerlianik inuusuttut ikiaroornartumik atornerluisut inuunerluttullu amerliinnarput, innuttaaqatigiillu ileqqussat tungaatigut paatsiveerukkiartuinnarput.

Ukiuni hundredelinni inuppassuit pisuussutit, pissaaneq ilinniagartuujunerlu pilluarniutigisarsimavaat. Inuunermi taakku anguniagaappata pakatsissutaaginnassapput. Jiisusi ima oqarpoq: „Inuup inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ (Lukasi 12:15) Aap, pisuunngorniarneq amerlanertigut aliasuutaaginnartarpoq. Biibilimi ima allassimavoq: ’Inuit pisuunngorumasut  usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu. Aningaaserituujunermi ajortunut tamanut sorlaavoq; tamatumannga pileritsatsitaallutik inuit ilaat . . . imminnut amerlasuunik erloqissutissiortarput.’ — 1 Timotheusi 6:9, 10.

Qanoq qamuuna eqqissisoqarsinnaava qanorlu inuuneq siunertaqalersinnaava? Nammineq taamungaannaq misiliisariaqarpugut? Qujanartumik naamik. Qamuuna eqqississagutta pisariaqartitaq pingaarutilerujussuaq inuit kisimik pisariaqartitaat matussusertariaqarparpoq. Allaaserisami tulliuttumi tamanna sammineqarpoq.

[Qupp. 3-mi assiliartaq]

Pisuunngorniarnikkut, pissaaneqarniarnikkut ilinniagartuujuniarnikkullu qamuuna eqqissisoqarsinnaava?