Biibili iluaqutigalugu nuannaalersinnaavutit

BIIBILI tassaanngilaq nakorsaatitigut ilisimatusarnikkut ilinniut, taamaattorli misigissutsit — nuannersut nikallornartullu — inuup eqqarsartaatsikkut timikkullu peqqinneranut sunniutaat Biibilimi eqqaaneqarput. „Uummatikkut nuannaarneq peqqinnartuuvoq,“ Biibilimi allassimavoq, „nikallunganerulli saarngit isseerutitittarpai.“ Aamma ima allassimavoq: „Ullormi annikilliorfiusumi sapiissuseerukkuit taava nukitit annikillissapput.“ (Ussatit 17:22; 24:10) Nikallungagutta nukeerulluinnarsinnaavugut, aamma sanngiitsutut qajannartutullu misigilersinnaalluta allannguerusussuseqarata ikiortissarsiorusussuseqaratalu.

Nikallunganeq aamma anersaakkut sunniuteqarsinnaavoq. Naleqanngitsutut misigisut isumaqarajuttarput qaqugumulluunniit Guutimut ajunngitsumik attaveqalersinnaanatik taassumanngalu iluarisaalersinnaanatik. Simonep, allaaserisap matuma siuliani eqqaaneqartup, qularisimavaa „Guutip namminermisut ittoq iluarilersinnaagaa“. Guutip oqaasia, Biibili, atuaraangatsigu paasisarparput piumasaatut sapinngisaminnik iliorniarsarisut Guutip iluarisarai.

Guutip soqutigaatigut

Biibilimi ima allassimavoq: „[Jehovap] qanippai sequmissimasumik uummatillit, annaattarpai aserortersimasumik anersaallit“. Itigartittanngilaa „uummat peqqissimisoq artorsaateqangaartorlu“, neriorsuivorli „inuummarissarumallugu anersaakkut nikallortoq inuummarissarumallugulu uummatimigut neriuutaaruttoq“. — Tussiaat 34:19; 51:19; Esaja 57:15.

Ilaanni Jiisusip pisariaqartissimavaa ajoqersukkami Guutip kiffami pissusiinik ajunngitsunik takunittarnerata ilumoortuuneranik paasitinnissai. Assersuusiorluni oqaluttuaraa qupaloraarsuk nunamut nakkaraangat — inuit amerlanerit soqutaanngitsutut isigisaat — Guutip  malugisaraa. Erseqqissarpaattaaq Guutip inuit ataasiakkaat, sukutsitannguilu tamaasa, allaat nujaasa qassiussusii, ilanngullugit ilisarisimagai. Jiisusip assersuusiani ima naggaserpaa: „Taamaattumik erseqinasi, ilissi qupaloraarsuppassuarnit pingaarneruvusi.“ (Mattæusi 10:29-31) * Taama oqarluni Jiisusip ersersippaa inuit ataasiakkaat imminut qanorluunniit isumaqarfigigaluarpata inuit uppertut Guutip isaani pingaartuusut. Apustili Petrusip eqqaasippaatigut „Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq“. — Apustilit Suliaat 10:34, 35.

Imminut oqimaaqatigiissumik isiginnittaaseqarit

Guutip oqaasiani kajumissaarneqarpugut imminut oqimaaqatigiissumik isigineq ineriartortissagipput. Apustili Paulusi isumassarsisitaalluni ima allappoq: „Saammaanneq uannut tunniussaq tunngavigalugu tamassi immikkut ima oqarfiginiarpassi: Immissinnik pingaarteqinasi pisariaqartumit annerusumik, silaqassusersili sianisuumik atorsiuk upperneq Guutip tamassinnut immikkut agguutisiarititaa najoqqutaralugu.“ — Romamiut 12:3.

Soorunami kissaatiginngilarput imminut pingaartingaaratta pingaakujulernissarput. Aammattaarli kissaatiginngilarput akerlerluinnaanik naleqanngitsutut imminut isigilernissarput. Imminulli oqimaaqatigiissumik isiginnittaaseqalernissaq sulissutigisariaqarparput nukittuffigisatta pisinnaasattalu killeqarnerat eqqarsaatigalugit. Kristumiup arnap ima oqaatigaa: „Misigivunga allanit ajornerunangalu pitsaanerunanga. Allatulli nukittuffeqarlungalu sanngiiffeqarpunga.“

Taamatut oqimaaqatigiissumik isiginnittaaseqalernissaq soorunami imaaliallaannaq anguneqarsinnaanngilaq. Ingasattumik imminut ajortumik isigineq, immaqa ukiorpassuarni ingasatsikkiartuaarsimasoq, allanngortissagaanni tamaviaangaartariaqarpoq. Taamaakkaluartoq Guutip ikiuineratigut pissusitoqqavut pissuseriunnaarsinnaavavut inuunermullu isiginnittaaserput allanngortissinnaallugu. Taamaalioqqullutami Guutip oqaasiani kajumissaarneqarpugut. Ima allassimavoq: „Inutoqaq manna tikillugu inuuserisassinniittoq pileritsannernillu nakutitsissutaasunit aserorneqartoq iperassagissi, isumassigullu anersaassigullu nutaanngortissasusi atillugulu inuk nutaaq Guuti assilillugu pinngortitaq iluarsuseqarlusi upperluarlusilu sallusuissutsip piinik.“ — Efesosimiut 4:22-24.

’Isumarput anersaarpullu’, tassa isumaliortaaserput saqqumilaarnerpaaq, nutaanngortinniarlugu tamaviaarutta, inuttut allanngorsinnaavugut ingasattumik imminut ajortumik isigiunnaarluta isumalluartunngorluta. Lenap, allaaserisap matuma siuliani eqqaaneqartup, paasilerpaa naleqarpianngitsutut misiginini allanngorsinnaasoq aatsaat asaneqarsinnaalluni ikiorneqarsinnaalluniluunniit misigileruni. Biibilimi siunnersuutit atoriaannaasut suut Lenap, Simonep allallu taama allannguinissaminnut iluaqutigaat?

 Biibilimi najoqqutassiat nuannaarnerulersitsisartut

„Nanertuutigisat [Jehovamut] tunniuguk, taava isumagiumaarpaatit.“ (Tussiaat 55:23) Nuannaarnerup piviusup angunissaanut iluaqutiginerpaasinnaasarput tassaavoq qinuneq. Simone ima oqarpoq: „Nikallungagaangama tamatigut ikioqqullunga Jehova saaffigisarpara. Qanorluunniit atugaqaraluaraangama siulersuinera nakussatsitsineralu misigiuaannarpakka.“ Tussiaasiortup kajumissaaramisigut nanertuutigisarput Jehovamut tunniuteqqullugu, eqqaasitsissutigiitigaa Jehovap isumassuunnarnata, aammattaarli taassumannga inuttut ataasiakkaatut ikiorneqarnissamut tapersersorneqarnissamullu qinngaqqunnanngitsutut isigigaatigut. Ukiumi 33-mi Jiisusip ajoqersukkani poorskisioqatigitillugit qanittukkut qimattariaqarlugit oqarmat ajoqersukkat aliasoqaat. Ilungersorluni siunnersorpai Ataataminnut qilammiusumut qinoqqullugit, imalu nangippoq: „Qinugitsi, taava tunineqassaasi, tipaatsunnersi naammalluinnaqqullugu.“ — Johannesi 16:23, 24.

„Tunisineq pilluarnarneruvoq tigusinermit.“ (Apustilit Suliaat 20:35) Jiisusip ajoqersuineratut inuunermi nuannaarnermut piviusumut ilasaataasinnaasoq tassaavoq tunisineq. Sallusuissut Biibilimeersoq taanna maleruarutsigu, nammineq sanngiissutiut pinnagit allat pisariaqartitaat pingaarnerutissavavut. Allat ikioraangatsigit qujamasunnerallu malugigaangatsigu, nalerisimaarnerulertarpugut. Lenap malugisinnaavaa nutaarsiassap nuannersup Biibilimeersup aalajangersimasumik oqaluussissutigisarnera marlutsigut iluaqutigisarlugu. Ima oqarpoq: „Siullermik, nuannaarneq nalerisimaarnerlu Jiisusip eqqartugaatut ittut misigisarpakka. Aappassaanik, iluarinnittorpassuaqarpoq, tamannalu aamma nuannaarutigisarpara.“ Tukkorluta iliuuseqartarutta Ussatit 11:25-mi allassimasup uuma ilumuussusia misigissavarput: „Allanik imeruersaasoq nammineq imeruersarneqarumaarpoq.“

„Ikiortarialimmut ullut atoruminaatsuusarput, qiimasaarnerup ullut tamaasa nalliussivinngortittarpai.“ (Ussatit 15:15) Imminut isiginnittaasitsinnut pissutsinullu atukkatsinnut tunngatillugu tamatta qinigassaqarpugut. Sunik tamanik ajorinnittutut atugarliungaartutut misigisutut inuusinnaavugut, imaluunniit aalajangersinnaavugut isumalluartuuniarluta, ’qiimasaarluta’ nalliuttorsiortutullusooq nuannaarluta. Simone ima oqarpoq: „Sapinngisamik isumalluartuuniartuaannarpunga. Nammineerlunga Biibilimik atuaqqissaartarneq oqaluussinerlu ulapputigaakka, qinukulasarpungalu. Aammattaaq inuit isumalluartuusut nuannaartuusullu ilaginiartarpakka, sapinngisannillu allanut ikiuiniartarlunga.“ Biibilimi allassimavoq taamatut pissuseqarneq nuannaarnermik piviusumik nuannaalersitsisartoq: „[Jehova] tipaatsuutigisiuk, nuannaarnermit suaaritsi iluartut ilissi. Assuarnaatsusi tamassi qiimmattarlusi nilleritsi!“ — Tussiaat 32:11.

„Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.“ (Ussatit 17:17) Qanigisarput uummammiugisatsinnik oqaluttuukkaangatsigu, tatigisatsinnilluunniit siunnersortissarsioraangatta, misigissutsit nuanniitsut artorsiinnginneranni iliuuseqarfigisinnaasarpavut.  Allanik oqaloqateqarneq oqimaaqatigiissumik isumalluartumillu isiginnittaaseqalernissatsinnut iluaqutigisinnaavarput. „Misigissutsinik oqaatiginninneq assut iluaqutaasarpoq,“ Simone nassuerpoq. „Qanoq misiginerluni allanut oqaluttuarnissaq pisariaqartinnartarpoq. Amerlanertigut anninnissaat taamaallaat pisariaqartarpoq.“ Ussatini oqaatigineqartoq una eqqorpoq: „Isumakuluuteqarnerup inuup uummataa artorsaatissittarpaa, qiimmassaallunili oqaaserisat nuannaalersittarpaat.“ — Ussatit 12:25.

Qanoq iliorsinnaanersutit

Biibilimi najoqqutassiarpassuit pitsaasut atoriaannaasullu ilamininngui misigissutsit nuanniitsut ajugaaffiginiarneranni nuannaarnerullu piviusup angunissaanut iluaqutigisinnaasavut uani misissorpavut. Naleqanngitsutut misigisut ilagippatsit kajumissaarusuppatsigit Guutip oqaasia, Biibili, misissorneroqqullugu. Piviusorsiortumik oqimaaqatigiissumillu imminut isiginissavit sulissutiginissaa ilinniaruk, paasiullu Guutip isaani naleqartuusutit. Qamannga pisumik neriuppugut siunnersuutit Guutip oqaasianeersut iluaqutigalugit iliuuserisanni tamani nuannaarneq piviusoq angujumaarit. (wE 8/1 05)

[Quppernerup ataani ilanngussaq]

[Qupp. 7-mi assiliartaq]

Biibilimi najoqqutassianik maleruaaneq nuannaalissutaasarpoq