Jiisusi Kristusip saqineratut saqiuarit
Jiisusi Kristusip saqineratut saqiuarit
„[Guutimiittuarluni] oqartoq ima saqisariaqarpoq, soorlu [Jiisusi] saqisoq.“ — 1 JOHANNESI 2:6, 1900/1961.
1, 2. Jiisusimik isiginnittuarneq qanoq paasisariaqarpa?
APUSTILI Paulusi ima allappoq: ’Angusassamut siunitsinniittumut arpannitsinni nikallujuitta Jiisusi uppernerup aqqutissiuussisua naammassisitsisualu tunaaralugu [isigiuarlugu, NV].’ (Hebræerit 12:1, 2) Aalajaattuassagutta Jiisusi Kristusi isigiuartariaqarparput.
2 Oqaaseq Kristumiut Allagaataanni Grækerisuuni „tunaaralugu“-mik imaluunniit „isigiuarlugu“-mik nutserneqartoq, isumaqarpoq „allamut saasarneqarumanani aalajangersimasumik sammisaqarneq“, „allamik isigisaqalerniarluni isigisamik aalajangersimasumik alagaqarneq“, „pingaarnerutitsineq“. Qinerlerfissiami ima allassimasoqarpoq: „Arpattup grækerip arpattarfimmi arpalluni isiginnaartut isiginiarlugit arpaffini anguniakkanilu alarunigit, erniinnarluinnaq arriinnerulissaaq. Kristumiunuttaaq taamaappoq.“ Allamut saasarneqartikkutta, tamanna anersaakkut siumukarnissatsinnut akornutaasinnaavoq. Jiisusi Kristusi isigiuartariaqarparput. Aamma uppernerup aqqutissiuussisuani suna maluginiassavarput? Grækerit oqaasiat ’aqqutissiuussisumik’ nutserneqarsimasoq isumaqarpoq „siulersorti, siulersuisuusoq taamaalillunilu maligassiuilluni“. Jiisusimik isiginnittuarneq isumaqarpoq taassuma maligassiaanik malinninneq.
3, 4. (a) Jiisusi Kristusip saqineratut saqissagutta qanoq iliortariaqarpugut? (b) Tamatumunnga atatillugu apeqqutit suut uagutsinnut pingaaruteqarpat?
3 „[Guutimiittuarluni] oqartoq ima saqisariaqarpoq, soorlu [Jiisusi] saqisoq,“ apustili Johannesi taama allappoq. (1 Johannesi 2:6, 1900/1961) Guutimiittuartariaqarpugut Jiisusip inassutaanik maleruaanikkut, soorlu Jiisusi Ataatami inatsisaanik maleruaasoq. — Johannesi 15:10.
4 Jiisusip saqineratut saqissagutta, taanna siulersortitut maluginiaqqissaartariaqarparput taassumalu tumai atuaqqissaarlugit. Taamaammat tamatumunnga atatillugu apeqqutit uagutsinnut pingaaruteqartut makkuupput: Ullumikkut Jiisusi Kristusip qanoq ililluni siulersorpaatigut? Uagut taassuma saqineratut qanoq ililluta saqisinnaavugut? Taassuma maligassiaanik malinninnerput uagut qanoq iluaqutigaarput?
Jiisusip ajoqersukkani qanoq siulersortarai
5. Jiisusip qilaliartinnani ajoqersukkat qanoq neriorsorpai?
5 Jiisusi Kristusi makititaasimasoq qilaliartinnani ajoqersukkaminut saqqummerpoq pingaartumillu suliassillugit. Ima oqarpoq: „Taamaattumik aallaritsi inunnillu inuiannit tamaneersunik ajoqersuganngortitsigitsi.“ (NV) Taamani aamma neriorsuivoq suliassamik tamatuminnga suliaqarneranni najussagini. Ima oqarpoq: „Takuat, ullut tamaasa najorpassi silarsuup naggatissaanut allaat.“ (Matthæusi 28:19, 20) Maanna pissutsit aaqqissuussaanerata matuma naggatissaani Jiisusi Kristusip ajoqersukkani qanoq ililluni najorpai?
6, 7. Jiisusip anersaaq illernartoq atorlugu qanoq siulersortarpaatigut?
6 Jiisusi ima oqarpoq: „Illersuisup [Ikiuisup, NV], Anersaap Illernartup, Ataatap uanga atinni aallartitassaata tamanik ajoqersussavaasi ilissinnullu oqaaserisannik tamanik eqqaasikkumaarlusi.“ (Johannesi 14:26) Anersaap illernartup, Jiisusip aqqani aallartinneqartup, ullumikkut siulersorlutalu nakussatsittarpaatigut. Anersaakkut paasissutissittarpaatigut aamma ’Guutip itissusiinik allaat’ paasisaqartittarluta. (1 Korinthimiut 2:10) Aammattaaq pissutsit „asanninneq, nuannaarneq, eqqissineq, kamajasuunnginneq, inussiarnisaarneq, ajunngitsuuneq, unneqqarissuseq, qanilaarneq imminullu naalakkersinnaaneq“ Guutip anersaavata inerititarai. (Galatiamiut 5:22, 23) Anersaaq illernartoq iluaqutigalugu pissutsit taakku ineriartortissinnaavavut.
7 Biibilimik atuaqqissaartartilluta ilikkakkatsinnillu inuunitsinni maleruaaniarsaritilluta, Jehovap anersaavanit ikiorneqartarpugut ilisimassutsikkut, siuneqassutsikkut, paasisimasaqassutsikkut, ilisimasaqarnikkut, suut eqqortuunerinik paasinnissinnaanikkut eqqarsarsinnaanikkullu siumukarnissatsinnut. (Ussatit 2:1-11) Anersaamit illernartumit ikiorneqarluta ussernartut misilinneqarnerillu naammagalugit atorsinnaavavut. (1 Korinthimiut 10:13; 2 Korinthimiut 4:7; Filippimiut 4:13) Kristumiut kajumissaarneqarput ’imminik minguiaqqullugit, timimi anersaamilu minguk tamaat piiaqqullugu illernartooqqullugillu’. (2 Korinthimiut 7:1) Anersaaq illernartumit ikiorneqarnata Guutip illernartuunissamik, imaluunniit minguitsuunissamik, piumasaqaataa eqqortissinnaanerparput? Ullumikkut Jiisusip ilaatigut anersaaq illernartoq atorlugu siulersortarpaatigut, Jehovap ernini tamatuminnga atuisinnaatimmagu. — Matthæusi 28:18.
8, 9. Jiisusi Kristusip „kiffaq ilumoortoq silatoorlu“ sumut tunngatillugu siulersuisutut atorpaa?
8 Jiisusip ullumikkut ilagiinnik siulersueriaasia alla maluginiaruk. Najuunnissani pissutsillu aaqqissuussaanerata maanna atuuttup naggatissaa eqqarsaatigalugit Jiisusi ima oqarpoq: „Kinaavami kiffaq ilumoortoq silatoorlu naalagaata inoqutiminut nerisassanik tunniussisaqqusaa piffissaq eqqorlugu? Pilluarpoq kiffaq taanna naalagaata taamaaliortillugu tikitaa. Ilumut oqarfigaassi: Pigisaminut tamanut paarsisunngortissavaa.“ — Matthæusi 24:3, 45-47.
9 ’Naalagaq’ tassaavoq Jiisusi Kristusi. „Kiffaq“ tassaavoq kristumiut tanitat eqimattatut isigalugit. Kiffaqatigiit taakku Jiisusip nunarsuarmi soqutigisaanik isumaginnittussanngortitaallutillu piffissaq eqqorlugu anersaakkut inuussutissanik pilersuisuusussanngortitaapput. Angutit nakkutilliisut piukkunnaatillit ikittut kiffaqatigiinneersut Siulersuisoqatigiittut kiffartorput kiffaqatigiinnullu tamanut sinniisuullutik. Taakkua silarsuaq tamakkerlugu Guutip naalagaaffianik oqaluussissutiginninneq siulersorpaat piffissarlu eqqorlugu anersaakkut inuussutissalersuillutik. Tassa Kristusip ilagiit siulersortarpai „kiffaq ilumoortoq silatoorlu“ tanitaasoq taassumalu Siulersuisoqatigiivi atorlugit.
10. Utoqqaanertanut qanoq isiginnittaaseqartariaqarpugut? Akissutit tunngavilersoruk.
10 Kristusip siulersuineranut takussutissaq alla tassaavoq kristumiunik utoqqaanertanik imaluunniit nakkutilliisunik, „inunnik tunissutaasunik“ taaneqartunik (NV), aaqqissuussineq. Taakku tunniunneqarput ’illernartut piukkunnarsarneqarniassammata kiffartortuunissamut Kristusip timaa ineriartortinneqassammat’. (Efesosimiut 4:8, 11, 12) Hebræerinut allakkat 13:7-imi taakku ima allaatigineqarput: „Eqqarsaatiginiarsigit siulersortisi Guutip oqaasiinik ilissinnut oqalussimasut, inuunerisalu naggatissaat eqqarsaatigisiuk uppersuseqarnerisigullu assiginiarlugit.“ Utoqqaanertat ilagiinni siulersuisarput. Taakku Jiisusi Kristusimik ilaarsisarmata uppernerat ilaarneqartariaqarpoq. (1 Korinthimiut 11:1) ’Inunnut tunissutaasunut’ taakkununnga naalannitsigut naalatsigitinnitsigullu utoqqaanertanik aaqqissuussinermik pingaartitsinerput takutissinnaavarput. — Hebræerit 13:17.
11. Ullumikkut Jiisusip ajoqersukkani qanoq siulersortarpai, taassumalu saqineratut saqineq qanoq paasisariaqarpa?
11 Aap, Jiisusi Kristusip ullumikkut ajoqersukkani siulersortarpai anersaaq illernartoq, „kiffaq ilumoortoq silatoorlu“ ilagiinnilu utoqqaanertat atorlugit. Jiisusi Kristusip saqineratut saqissagutta ilagiinnik siulersueriaasia paasisariaqarparput tamatumunngalu naalatsigitittariaqarluta. Tamanna aamma isumaqarpoq saqeriaasia ilaartariaqaripput. Apustili Petrusi ima allappoq: „Tamatumunngami qaaqqusaavusi Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.“ (1 Petrusi 2:21) Jiisusip maligassiaa naammalluinnartoq qanoq ilaarsinnaavarput?
Oqartussaanerit atoraangakku ingasaassinianngitsuusarit
12. Jiisusip maligassiaanik malinninnermut tunngatillugu ilagiinni utoqqaanertat ingammik suna pissuserisariaqarpaat?
12 Jiisusip Ataataminit asseqanngitsumik oqartussaassuseqartitaagaluarluni oqartussaassutsini ingasaassinani atortarpaa. Ilagiinniittut tamarmik — ingammik utoqqaanertat — ’qanilaarsusertik [ingasaassinianngitsuunertik, NV] ilisimaneqalersittariaqarpaat inunnit tamanit’. (Filippimiut 4:5; 1 Timotheusi 3:2, 3) Utoqqaanertat ilagiinni oqartussaassusiligaangamik tamatuminnga atuinerminni Kristusip tumaanik atuaanissaat pingaaruteqarpoq.
13, 14. Utoqqaanertat allanik Guuti kiffartorfigeqqullugu kajumissaarigaangamik qanoq ilillutik Jiisusi Kristusi ilaarsinnaavaat?
13 Jiisusip ajoqersukkami pisinnaasaasa killeqarnerat eqqumaffigaa. Sapigaannik piumasaqarfigineq ajorpai. (Johannesi 16:12) Kimigiiserfiginagit kajumissaartarpai Guutip piumasaatut iliornissaq ’ilungersuutigeqqullugu’. (Lukasi 13:24) Taamaaliorpoq maligassiuinikkut uummataannillu kajumissisitsinikkut. Taamatuttaaq ullumikkut utoqqaanertat kristumiut inuit allat kimigiiserfigisanngilaat kanngusunneq imminulluunniit pisuutinneq pissutigalugu Guutimut kiffartortinniarlugit. Inuit allat kajumissaartarpaat Guutimut, Jiisusi Kristusimut inoqatiminnullu asanninneq pissutigalugu Guuti kiffartorfigeqqullugu. — Matthæusi 22:37-39.
14 Jiisusip oqartussaassutsini allat inuunerannik aqutsiniarnikkut atornerlunneq ajorpaa. Maleruarneqarsinnaanngitsunik najoqqutassiunngilaq maleruagassanillu malittarisassiarpassuaqarnani. Allat kajumissaartarpai uummataat killinniarlugit najoqqutassianillu Mosesip inatsisaanut tunngaviusunik uparuuttarlugit. (Matthæusi 5:27, 28) Utoqqaanertat Jiisusip maligassiaa malissinnaavaat iluarisarsorlutik najoqqutassiornatik namminnerlu isumartik kisimi atorsinnaasutut kimigiisiutiginagu. Atisalersorneq isikkorissarnerlu imaluunniit sukisaarsarneq aliikkusersuinerlu eqqarsaatigalugit utoqqaanertat allat uummataat killinniassavaat najoqqutassiat Guutimeersut, soorlu Mika 6:8-mi, Korinthimiunut allakkat siulliit 10:31-33-mi aamma Timotheusimut allakkat siulliit 2:9, 10-mi allassimasut, innersuussutigalugit.
Misiginneqataasuullutillu isumakkeerfiginnittuugit
15. Ajoqersukkat kukkugaangata Jiisusi qanoq pisarpa?
15 Jiisusi ajoqersukkat kukkugaangata periartarnermigut uagutsinnut maligassiuivoq. Jiisusip nunarsuarmi inuttut inuunermini ajoqersukkat naggammik unnussioqatigimmagit pisimasut marluk tulliuttut maluginiakkit. Naatsiivimmut Getsemanemut apuukkamik Jiisusip „Petrusi Jaakulu Johannesilu qimaguteqatigai“ ’pigaaqqullugillu’. Taava qimaamilaariarlugit nunamut pallorpoq qinulerlunilu. „Uterami tikippai sinittut.“ Jiisusi qanoq piva? Ima oqarpoq: „Anersaaq kajumikkaluarpoq, uinilli qajannarpoq.“ (Markusi 14:32-38) Petrusi, Jaaku Johannesilu naveernagit misiginneqataanini oqaatigaa! Unnuk taanna Petrusip Jiisusi pingasoriarluni miserratigaa. (Markusi 14:66-72) Tamatuma kingorna Jiisusip Petrusi qanoq pivaa? Makitinneqareerami Siimuut-Petrusimut saqqummerpoq. (Lukasi 24:34) Allassimavoq ’Kefasimit kingornalu taakkunannga aqqaneq-marluusunit takuneqartoq’. (1 Korinthimiut 15:5) Jiisusip kamannani pakatsinanilu apustili peqqissimisoq taanna isumakkeerfigaa nakussatsillugulu. Kingusinnerusukkut Jiisusip Petrusi pingaarutilimmik akisussaaffilerpaa. — Apustilit Suliaat 2:14; 8:14-17; 10:44, 45.
16. Uppeqatitta arlaatigut pakatsisikkaangatigut eqqunngitsuliorfigigaangatigulluunniit Jiisusip saqineratut qanoq saqisinnaavugut?
16 Uppeqatitta inuttut naammalluinnanngissusertik pissutigalugu arlaatigut pakatsisikkaangatigut eqqunngitsuliorfigigaangatigulluunniit, uaguttaaq Jiisusitut misiginneqataallutalu isumakkeerfiginnittuusariaqarpugut, ilaa? Petrusip uppeqatini ima kajumissaarpai: „Tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi, nallittuisarlusi qanilaarlusilu, ajortoq ajortoqataanik akilissanngilarsi, oqaasipilulluunniit oqaasipiloqataanik; pilluaqqusisaritsili.“ (1 Petrusi 3:8, 9) Taavami arlaat uagutsinnut Jiisusip iliuuseqarneratut iliuuseqanngippat, tassa misiginneqataanani isumakkeerfiginninnanilu? Taamaakkaluarpalluunniit Jiisusimik malinninniarnissarput taassumatullu pisarnissarput pisussaaffigaarput. — 1 Johannesi 3:16.
Guutip naalagaaffia salliutiguk
17. Jiisusip inuunermini Guutip piumasaanik pingaarnerpaatitsinera sumit erserpa?
17 Aamma allakkut Jiisusi Kristusip saqineratut saqisariaqarpugut. Guutip naalagaaffia pillugu nutaarsiassamik nuannersumik oqaluussissutiginninneq Jiisusip inuunerani pingaarnerpaavoq. Illoqarfimmi Sykarimi Samariamiittumi arnaq Samariamiu oqaluussiffigereerlugu Jiisusip ajoqersukkani ima oqarfigai: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ (Johannesi 4:34) Jiisusip Ataatami piumasaatut iliornini napassutigaa. Tamanna taassumunnga nerisassatut peqqinnartuullunilu nakussatsinnartuuvoq. Guutip piumasaatut iliortuarnikkut Jiisusimik ilaarsineq inuunermik siunertaqarluartumik nalerisimaarnartumillu kinguneqarumaarpoq!
18. Angajoqqaarpassuit qitornaminnik piffissaq tamaat kiffartortutut kiffartulernissamut kajumissaarinertik qanoq pilluaqquneqaatigaat?
18 Angajoqqaat qitornaminnik piffissaq tamaat kiffartortutut kiffartulernissamut kajumissaarigaangamik, namminneq qitornatillu pilluaqquneqangaartarput. Marlulissanut ataataasup marluliaatini mikisuusulli pioneritut kiffartorneq anguniagareqqullugu kajumissaartarpai. Marlulissat ilinniagaqareeramik pionerinngorput. Tamatuma kinguneri nuannersut misigisani pillugit ataataasoq ima allappoq: „Ernitta pakatsisinngilaatigut. Qujamasulluta oqarsinnaavugut ’ernerit tassaasut Jehovap tunissutai’.“ (Tussiaat 127:3) Aamma qitornaasut piffissaq tamaat kiffartorneq qanoq iluaqutigisarpaat? Anaanaasoq tallimanik qitornalik ima oqarpoq: „Pioneritut kiffartorneq iluaqutigalugu meeqqama tamarmik Jehova qanittuararsuarmik attaveqarfigilersimavaat, atuaqqissaartarnertik pitsanngortissimavaat, piffissartik silatuumik atortarpaat anersaakkullu ittut inuunerminni salliutittarlugit. Tamarmik assigiinngitsutigut naleqqussartariaqarsimagaluarlutik arlaannaataluunniit inooriaatsini peqqissimissutiginngilaa.“
19. Inuusuttut silatusaassagunik siunissamut sunik pilersaaruteqarnissaq eqqarsaatigeqqissaartariaqarpaat?
19 Inuusuttuususi siunissamut pilersaarutisi suuppat? Silarsuarmi matumani iluatsinnissaq anguniagarivisiuk? Imaluunniit piffissaq tamaat kiffartornissaq anguniagarivisiuk? Paulusi ima oqaaqqissaarivoq: „Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk, ullut ajortuummata.“ Imalu nangippoq: „Taamaattumik sianiitsutut ilioqinasi, paasiniarsiulli suna [Jehovap] piumasarigaa.“ — Efesosimiut 5:15-17.
Ilumoorfiginnittuugit
20, 21. Jiisusi qanoq ililluni ilumoorfigisassaminut ilumoorfiginnippa, uagullu ilumoorfiginninnera qanoq ilaarsinnaavarput?
20 Jiisusip saqineratut saqissagutta, aamma ilumoorfiginninnera ilaartariaqarparput. Jiisusip ilumoorfiginninnera pillugu Biibilimi ima allassimasoqarpoq: „Ilasi allat pillugit isumaliortaritsi Kristusi-Jiisusimiittutut. Taassuma Guutisut isikkoqartup ujajakkatut naatsorsuutinngilaa Guutip naliginera; iperarpaali kiffap isikkua atillugu inuillu assigilerlugit; saqqummerami inuttut nikanartippoq naalalluni toqumut, sanningasulimmi [nappakkami anniartitaaffimmi, NV] toqumut allaat.“ Jiisusip Jehovap kisimi oqartussaanera ilumoorfiginnilluni tapersersorpaa Guutip imminut tunngatillugu piumasaanut naalatsigitilluni. Nappakkami anniartitaaffimmi toqumut allaat naalappoq. Jiisusitut isiginnittaaseqartuartariaqarpugut ilumoorfiginnillutalu Guutimut naalatsigitilluta taassuma piumasaatut iliorluta. — Filippimiut 2:5-8.
21 Jiisusi aamma apustiliminut aalajaatsunut ilumoorfiginnittuuvoq. Sanngiissuteqarlutillu naammalluinnanngitsuugaluartut „naggatissamut allaat asavai“. (Johannesi 13:1) Uaguttaaq qatanngutitta naammalluinnanngissutaat pissutigalugit taakkuninnga isornartorsiueqqajaalissanngilagut.
Jiisusip maligassiaa malittuaruk
22, 23. Jiisusip maligassiaa malikkutsigu qanoq kinguneqassava?
22 Naammalluinnanngitsuugatta soorunami maligassatta naammalluinnartup tumai eqqorluinnartumik atuarsinnaanngilavut. Kisianni tumai atuaqqissaarniarsarisinnaavavut. Taamaaliussaguttali Kristusip uagutsinnik siulersueriaasia paasisariaqarparput tamatumunngalu naalatsigitittariaqarluta taassumalu maligassiaa malittariaqarlugu.
23 Jiisusi Kristusimik ilaarsineq pilluaqqussuterpassuarnik kinguneqartarpoq. Inuunerput siunertaqarluarnerussallunilu nalerisimaarnarnerussaaq nammineq piumasatsitut iliorneq pinnagu, Guutip piumasaatut iliorneq pingaarnerutikkutsigu. (Johannesi 5:30; 6:38) Ilerasuuteqassanngilagut. Allanut maligassaalluartumik inooriaaseqassaagut. Jiisusip suleruluttut nanertugaasullu tamaasa imminut qaaqquai, tarnimikkut nukissaqaleqqinniassammata. (Matthæusi 11:28-30) Jiisusip maligassiaa malikkutsigu uaguttaaq allanut nakussatsissutaasinnaallutalu qiimmassaataasinnaavugut. Taamaattumik Jiisusip saqineratut saqiuarta. (wE 9/15 05)
Eqqaamavigit?
• Ullumikkut Jiisusip ajoqersukkani qanoq siulersortarpai?
• Utoqqaanertat kristumiut oqartussaassutsiminnik atuinerminni Jiisusip maligassiaa qanoq malissinnaavaat?
• Allat kukkugaangata Jiisusip maligassiaa qanoq malissinnaavarput?
• Inuusuttut qanoq ilillutik Guutip naalagaaffia salliutissinnaavaat?
[Atuaqqissaarnermi apeqqutit]
[Qupp. 29-mi assiliartaq]
Utoqqaanertat kristumiut ikiortarpaatigut Kristusip siulersuineranik malinninnissamut
[Qupp. 30-mi assiliartaq]
Inuusuttuususi kristumiutut nalerisimaarnartumik inuuniarlusi qanoq pilersaarusiorpisi?