Uagut Jehovap Guutitta aqqani saqiumavugut

„Uagut Jehovap Guutitta aqqani soraajuitsumik, aap allaat naassaanngitsumik, saqiumavugut.“ — MIKA 4:5, NV.

1. Noap nalaani ileqqussatigut pissutsit qanoq ippat, aamma Noap nalimini inuusunit suna allaassutigaa?

BIIBILIMI Guutimik saqeqateqartutut eqqaaneqartoq siulleq tassa Enoki. Aappaa tassaavoq Noa. Ima oqaluttuarineqarpoq: „Noa angutaavoq iluartoq naligisami akornanni assuarnaatsumik inuuseqartoq. Noap Guuti inooqatigaa [saqeqatigaa, NV].“ (1 Mosesi 6:9) Noap nalaani inuiaat ataatsimut isigalugit pallorfiginninnermit minguitsumit nigorsimapput. Pissutsit ajortut ajornerulerput inngilit ilumuunngitsut pissusissamisuunngilluinnartumik arnat kinguaassiuutitigut atoqatigimmatigik. Taamaalillutik nefiliminik, ulluni taakkunani ’pissarsuarnik’ imaluunniit ’tusaamasanik’, taaneqartunik kinguaassiorput. Tupinnanngilaq nunarsuaq nakuusernermik ulikkaarmat! (1 Mosesi 6:2, 4, 11) Taamaakkaluartorli Noa assuarnaatsuujuaannarlunilu ’iluarnermik nalunaariartortitaavoq’. (2 Petrusi 2:5) Noa Guutimit inuunermik annaassissutaasussamik umiarsualioqquneqarami naalalluni „Guutip peqqusineratorluinnaq iliorpoq“. (1 Mosesi 6:22) Aap, Noap Guuti ilumut saqeqatigaa.

2, 3. Ullumikkut uagutsinnut Noa qanoq maligassaalluarpa?

² Paulusip nalunaajaasut aalajaatsut eqqartoramigit Noa eqqaavaa ima allakkami: „Uppernikkut Noa ilimasaarneqarpoq suli takussaanngitsumik, Guutimillu mianerinnittuugami umiarsualiorpoq inoqutimi annaffissaannik. Uppernermigut tamatumuuna silarsuaq eqqartuuppaa namminerlu iluarneq uppernikkut kingornussassarilerlugu.“ (Hebræerit 11:7) Uagutsinnut maligassaq asseqanngitsoq! Jehovap oqaasiisa eqquukkumaarnissaat qularutiginagu Noap piffissani, nukini periarfissanilu allat Guutip peqqussutaanik iliornermini atorpai. Tamatumunnga assingusumik ullumikkut inuppassuit silarsuarmi matumani qaffannissamut periarfissatik isumakkeertarpaat. Taakkualu Jehovap peqqussutaanik maleruaanerminni piffissartik, nukitik periarfissatillu allat atortarpaat. Taakku maluginiarnartumik uppissuseqarput namminneq allallu annaanneqarnerannik kinguneqarumaartumik. — Lukasi 16:9; 1 Timotheusi 4:16.

³ Uppertuaannarnissaq soorlu Noap aataqqiianut Enokimut, allaaserisap matuma siuliani eqqartorneqartumut, ilungersunarsimasoq Noamut taassumalu ilaqutaanut taamatulli ilungersunarsimatigisimassaaq. Noap nalaani Enokillu nalaani pallorfiginnittut ilumoortut ikinnerussuteqarput — inuit arfineq-pingasuinnaat Guutimut aalajaattuarput ulersuarmillu aniguillutik. Silarsuarmi nakuuserfiusumi kinguaassiuutitigullu inuunerluffiusumi Noa naapertuilluarnermik oqaluussissutiginnippoq. Aammattaaq Noa taassumalu ilaqutai silarsuaq tamakkerlugu ulersuaqarnissaanut piareersarlutik qisummik umiarsuarsualiorput massa ulersuaqarsimanngisaannaraluartoq. Ilaqutariinnik taakkuninnga isiginnittunut tamanna eqqumiissimassaqaaq.

4. Noap nalaani inuusut kukkussutaat suna Jiisusip pingaartinneruaa?

⁴ Soqutiginarpoq Jiisusip Noap nalaa eqqartoramiuk nakuuserneq, eqqunngitsumik upperisarsiorneq aamma kinguaassiuutitigut inuunerlunneq eqqartunngimmagit — naak pissutsit tamakku ingasattorujussuugaluartut. Jiisusip pingaartinnerusaa tassaavoq inuit mianersoqqussummik tusarliunneqartumik eqqumaffiginnikkumannginnerat. Oqarpoq taakku ’nerillutik imerlutillu  nuliartaarlutillu uinitsitsisartut ulloq Noap umiarsuarmut ikiffia tikillugu’. Nerineq, imerneq, nuliartaarneq uinitsitsinerlu ajortuugamik? Namminnermi isumaqarput nalinginnaasumik inuuginnarlutik. Qanittukkulli ulersuaqartussaavoq, Noallu naapertuilluarneq oqaluussissutigaa. Noap oqaatsimigut iliuutsimigullu mianersoqqummatik iliuuseqartariaqaraluarput. Kisianni „aatsaat paasisaqalerput ulersuaq nalliummat tamaasalu nungutillugit“. — Matthæusi 24:38, 39.

5. Noap taassumalu ilaqutaasa inuttut pissutsit suut pisariaqartippaat?

⁵ Ukiut taakku eqqaagaangatsigit, Noap iliuutsimigut silatusaarsimanera paasisinnaavarput. Ulersuarli sioqqullugu allanit allaanerussagaanni sapiissuseqartariaqarpoq. Noa ilaqutaalu umiarsuarsualiorniarlutik uumasunillu tamalaanik umiarsuarmut ikioraatitsiniarlutik qulanngilluinnartuusariaqarput. Inuit aalajaatsut ikittunnguit taakkua ilaasa ilaannikkut takulertornartuunnginnerunissartik „nalinginnaasumillu“ inuuinnarnissartik kissaatigisarsimassanerpaat? Allaat taamaattunik eqqarsaateqalissagaluarunik assuarnaatsuujuaannarput. Ukiorparpassuit — ukiut arlaannattaluunniit pissutsit aaqqissuussaaneranni matumani pinertusaarfigisariaqagaannit amerlanerusut — qaangiummata Noa uppernini pissutigalugu ulersuarmit aniguisinneqarpoq. Inunnulli „nalinginnaasumik“ inuusunut piffissallu inuuffigisamik pingaaruteqarneranik eqqumaffiginninngitsunut tamanut Jehovap eqqartuussutini naammassivaa.

Inuiaat nakuuserneq naalliuutigeqqilerpaat

6. Pissutsit suut ulersuup kingorna suli atuuppat?

⁶ Ulersuup kingorna imersuaq nunguilluni tissorsimammat inuit aallaqqaataaniit aallarteqqinnissamut periarfissaqalerput. Taakkuli suli naammalluinnanngitsuupput, aamma suli ’inuit inuusunnerminniit ajortuinnarmik eqqarsaateqartarput’. (1 Mosesi 8:21) Aamma anersaapiluit naak inuttut timeqaleqqissinnaajunnaaraluarlutik suli ulapittorujussuupput. Paasinarsipallappoq inuiaat guutiitsut ’Ajortumut naalatsigitittut’, aamma pallorfiginnittut ilumoortut ullumikkutorluinnaq taamani ’Diaavulup qoqassiiniutai’ akiortariaqarpaat. — 1 Johannesi 5:19; Efesosimiut 6:11, 12.

7. Ulersuup kingorna silarsuarmi nakuuserneq qanoq ingasatsikkiartorpa?

⁷ Ingammik Nimrodip nalaaniit nunarsuaq nakuusernermik ulikkaaqqippoq. Piffissap ingerlanerani inuit amerliartornerata kingunerisaanik aamma teknikkikkut ineriartornerup kingunerisaanik nakuuserneq ingasatsikkiartorpoq. Oqaluttuarisaanermi siusissukkut panat, qalugiusat, pisissit qarsullu aamma qamutit sorsuutit atorneqartarput. Kingusinnerusukkut qamutillit atorneqalerput, taavalu aallaasit 1900-ikkunnilu sakkusiarsuit siuarsimasut. Sorsunnersuarmi siullermi sakkusiarsuit suli amiilaarnarnerusut soorlu timmisartut, tankit, umiarsuit aqqartartut gassillu toqunartut atorneqartalerput. Sakkusiarsuit taakku pissutigalugit sorsunnermi tamatumani inuit millionillit toqupput. Tamanna tupaallaatigineqarpa? Naamik.

8. Saqqummersitat 6:1-4 qanoq ililluni eqquuppa?

⁸ 1914-imi Jiisusi Guutip naalagaaffiani qilammiittumi kunnginngortinneqarpoq, aamma ’Naalakkap ullua’ aallartippoq. (Saqqummersitat 1:10) Takorruukkami Saqqummersitani allanneqartumi Jiisusi kunngisut ajugaasutut hestimik qaqortumik hesterpoq. Hestersut allat malippaat, taakkulu inuiaat naalliuutaannut assigiinngitsunut assersuutaapput. Taakkua ilaat hestimik aappallarissumik hesterpoq, taannalu „piginnaatitaavoq nunarsuarmi eqqissineerutitsinissamut inuit imminnut toqoraatilersillugit. Taanna panarsuarmik tunineqarpoq“. (Saqqummersitat 6:1-4) Hesti taanna taassuminngalu hestersoq sorsunnermut assersuutaapput, panarsuarlu nalitsinni sorsunnerit aseruisinnaanerannut aatsaat taama sakkortutigisumut sakkusiarsuarnullu sunniineqqortuunut tamakkunani atorneqartunut assersuutaavoq. Sakkusiarsuarnut tamakkununnga ilaapput atomip nukinganik qaartartuliat, tamarmik immikkut inunnik titusindilikkuutaanik suujunnaarsitsisinnaasut; rakettit qaartartulianik taakkuninnga toraakkanut kilometerinik tusindilikkuutaanik ungasitsigisumiittunut aallartitsisinnaasut; aamma kemii bakterialluunniit atorlugit sakkusiarsuit nutaaliat inunnik amerlasuunik toqutsissutaasinnaasut.

 Jehovap mianersoqqussutai eqqumaffigaavut

9. Pissutsit ullumikkut silarsuarmi atuuttut pissutsinut ulersuup siornagut atuuttunut sanilliullugit qanoq ippat?

⁹ Noap ulluini nakuusernerujussuaq inuit ajortut minnerunngitsumillu nefilimit pisuussutigisaat pissutigalugu Jehovap inuiaat tamangajaasa piuneeruppai. Ullumikkummi? Nunarsuarmi taamanernit nakuusertoqannginnerulersimava? Naamerluinnaq! Noap ulluinisulli inuit ullumikkut ulluinnarni sammisartakkaminnik sammisaqaannarput; „nalinginnaasumik“ inuuniarsaralutillu mianersoqqussutit tusarliunneqartut eqqumaffigiumanngilaat. (Lukasi 17:26, 27) Taamaammat Jehovap inuiannik tamangajannik piuneerusseqqinnissaanik qularnissamut pissutissaqarnerpa? Naamik.

10. (a) Biibilimi siulittuutini suna mianersoqqussutigineqaqattaarpa? (b) Ullumikkut qanoq iliornissaq silatusaarnituaava?

¹⁰ Ulersuaqarnissaa ukiunik hundredelinnik arlalinnik sioqqullugu Enokip piuneerussinissaq nalitsinni nalliuttussaq siulittuutigaa. (Judasi 14, 15) Jiisusip ’naalliunnartoqangaarnissaq’ eqqartorpaa. (Matthæusi 24:21) Aamma pruffiitit allat piffissaq tamanna pillugu mianersoqqusipput. (Ezekieli 38:18-23; Danieli 12:1; Joeli 3:4, 5) Inaarutaasumik piuneerussinissaq Saqqummersitat-ni takorlooruminartumik allaatigineqarpoq. (Saqqummersitat 19:11-21) Uagut inuttut ataasiakkaatut Noa ilaarparput naapertuilluarnermillu oqaluussissutiginneqataalluta. Jehovap mianersoqqussutai eqqumaffigaavut inoqativullu taamatut iliornissaannut asannilluta ikiorlugit. Noatut Guutimik saqeqateqarpugut. Aamma inuuinnarusukkutta taamaaliortuarnissarput pingaaruteqarluinnarpoq. Kisianni ullut tamarluinnaasa tatineqarnerput eqqarsaatigalugu qanoq ililluta Guuti saqeqatigisinnaagatsigu? Guutip siunertaminik piviusunngortitsiumaarneranik upperinnilluinnarnissaq ineriartortittariaqarparput. — Hebræerit 11:6.

Ulluni anorersuarsiorfittut ittuni Guuti saqeqatigiuaruk

11. Ukiuni hundredelinni siullerni kristumiut qanoq ililluta ilaartarpavut?

¹¹ Ukiuni hundredelinni siullerni kristumiut tanitat ’Aqqummik atuaasutut’ eqqartorneqarput. (Apustilit Suliaat 9:2) Taakkua inuunerminni Jehovamut Jiisusi Kristusimullu upperneq pingaarnerpaatippaat. Aqqut Naalakkamik aqqutigisaa malippaat. Ullumikkut kristumiut aalajaatsut aamma taamatut iliortarput.

12. Jiisusip inuppassuit tupinnartuliornikkut nerisereermagit qanoq pisoqarpa?

¹² Uppernerup pingaaruteqassusia Jiisusip kiffartornerata nalaani pisimasumit paasineqarsinnaavoq. Ilaanni inuit 5000-t missaaniittut tupinnartuliornikkut nerisippai. Inuit tupigutsallutillu tipaatsupput. Malugiulli tamatuma kingorna qanoq pisoqarnersoq: „Nalunaaqutiliaa tamanna inuit takugamikku oqarput: ’Ilumut tassa Pruffiiti taanna silarsuarmut tikiuttussaq.’ Jiisusip nalujunnaaramiuk kunnginngortikkumalluni tigujartorniaraanni qaqqamukaqqippoq, kisimiilluni.“ (Johannesi 6:10-15) Unnuk taanna Jiisusi allamukarpoq. Qularnanngitsumik inuppassuit Jiisusip kunnginngorumannginnera pakatsissutigaat. Maannami takutereerpaa kunngiunissamut pisariaqartumik ilisimassuseqarluni inuillu timikkut pisariaqartitaannik matussusiinissamut pissaaneqarluni. Taamanili Jiisusip kunngitut naalakkersuinissaanut Jehovap piffissarititaa suli nalliutinngilaq. Aammattaaq Jiisusip naalagaaffia qilammiittussaavoq, nunarsuarmiinnani.

13, 14. Inuppassuit qanoq eqqarsariaaseqarlutik ersersippaat, uppernerallu qanoq misilinneqarpa?

¹³ Taamaakkaluartorli inuppassuit taakkua Jiisusi  aalajangersimarpalullutik malippaat, aamma tasersuup ’akiani nanivaat’, soorlu Johannesi allattoq. Sooruna malikkaat uffa kunnginngortitsiniaraluarnertik itigartikkaa? Taakkua ilarpassuisa Mosesip nalaani inoqajuitsumi timikkut iluaqutissanik Jehovap pilersitaanik pingaarnerutitsinermikkut ersersippaat uinimmut atasumik eqqarsartaaseqarlutik. Kissaatigaat timikkut pisariaqartitaminnik Jiisusi matussusiiuassasoq. Jiisusip eqqunngitsunik pissuteqarnerat malugigamiuk anersaakkut sallusuissutit eqqarsariaatsiminnik iluarsiinissamut iluaqutigisinnaasaannik ilinniartilerpai. (Johannesi 6:17, 24, 25, 30, 31, 35-40) Tamanna pissutigalugu taakkua ilaasa oqalorujuffigilerpaat, ingammik ima assersuusiormat: „Ilumut, ilumut oqarfigaassi: Inuup Ernerata uinnga nerinngikkussiuk aavalu iminngikkussiuk ilissinni inuuneqassanngilasi. Uanga uininnik nerisoq uangalu aannik imertoq naassaanngitsumik inuuneqarpoq, ullullu naggatissaanni makitikkumaarpara.“ — Johannesi 6:53, 54.

¹⁴ Jiisusip assersuusiai pissutigalugit inuit ersersikkajuttarpaat ilumut Guutimik saqeqateqarusunnerlutik. Assersuusiarlu taanna aamma taamaappoq. Sunniuteqartorujussuuvoq. Ima allassimavoq: „Ajoqersugaasa ilarpassui tamatuminnga tusartut oqarput: ’Oqaasii sakkortoqaat; kikkut taamaattut tusarnaarumasinnaavaat?’“ Jiisusi nangilluni nassuiaavoq oqaatsimi anersaakkut isumaat paasiniartariaqaraat. Ima oqarpoq: „Anersaaq-una inuuneqalersitsisartoq, uinilli iluaqutaanani. Ilissinnut oqaaserisakka tassaapput anersaaq inuussullu.“ Taamaakkaluartorli suli tusarnaarusunngitsorpassuaqarpoq, imalu oqaluttuarineqarpoq: „Tamatuma kingorna ajoqersugaasa ilarpassuisa qimappaat angalaqatigiunnaarlugulu.“ — Johannesi 6:60, 63, 66.

15. Jiisusip ajoqersugaasa ilaat qanoq ajunngitsumik isiginnittaaseqarpat?

¹⁵ Jiisusilli ajoqersugai tamakkeratik taamatut iliorput. Naak paasilluanngikkaluarlugu Jiisusi qanoq isumaqarnersoq ajoqersukkat ilumoorfiginnittut taassuminnga tatiginnilluinnarnertik attattuarpaat. Petrusip, ajoqersukkat ilumoorfiginnittut taakkua ilaata, kinguleruttut qanoq misiginerat ima oqaatigaa: „Naalagaq, kina ornissagatsigu? Illit oqaatsinik naassaanngitsumik inuussutaasunik pigisaqarputit.“ (Johannesi 6:68) Tamanna isiginnittaasiuvoq ajunngitsoq, aamma uagutsinnut maligassaalluarpoq!

16. Uagut qanoq misilinneqarsinnaavugut, aamma isiginnittaaseq qanoq ittoq ineriartortittariaqarparput?

¹⁶ Ullumikkut uagut ajoqersukkat siulliit taakkua misilinneqarnerattut misilinneqarsinnaavugut. Immaqa Jehovap neriorsuutaasa kissaatigisatsitut piviusunngujaartiginnginnerat pakatsissutigilersinnaavarput. Immaqa atuagassiaatitsinni atuagaatitsinnilu Biibililersaarutini Allakkat pillugit nassuiaatit paasiuminaatsippavut. Imaluunniit uppeqatitta ilaata pissusilersornera pakatsissutigilersinnaavarput. Tamakku tamakkununngaluunniit assingusut pissutigalugit Guutimik saqeqateqarunnaarnissaq eqqortuliornerussava? Soorunami naamik! Ajoqersukkat Jiisusimik qimatsisut ersersippaat uinimmut atasumik eqqarsartaaseqarlutik. Uagut taamatut isiginnittaaseqassanngilagut.

 ’Uagut nigortunut ilaanngilagut’

17. Guutimik saqeqateqarnissamut qanoq ikiorneqarsinnaavugut?

¹⁷ Apustili Paulusi ima allappoq: „Allakkat illernartut tamarmik Guutip sunniineratigut isumassarsiarititaapput.“ (2 Timotheusi 3:16, NV) Biibili aqqutigalugu Jehova uagutsinnut erseqqissumik ima oqarpoq: „Aajuna aqqusineq, taanna ingerlavigissavarsi!“ (Esaja 30:21) Guutip oqaasianut naalannerput ’qanoq inuunitsinnik sianiginninnitsinnut’ iluaqutigaarput. (Efesosimiut 5:15) Biibilimik atuaqqissaartarnerput ilikkakkatsinnillu eqqarsaatiginneqqissaartarnerput ’sallusuissummi inuujuarnitsinnut’ iluaqutigaavut. (3 Johannesi 3) Soorlu Jiisusi eqqortumik ima oqartoq: „Anersaaq-una inuuneqalersitsisartoq, uinilli iluaqutaanani“. Siunnersuutit tutsuiginartutuaasut taamaattumillu maleruarneqartariaqartut tassaapput anersaakkut siunnersuutit Jehovap oqaasia, taassuma anersaava taassumalu peqatigiissortai aqqutigalugit tunniunneqartut.

18. (a) Inuit ilaat sianiilliorlutik aqqut suna ingerlaviginiarlugu aalajangerpat? (b) Upperneq qanoq ittoq ineriartortittariaqarparput?

¹⁸ Ullumikkut uinimmut atasumik eqqarsartaaseqarnertik imaluunniit ilimagisamik eqquutinnginnerat pissutigalugu naammagittaalliulersut aalajangerajupput silarsuup neqeroorutigisinnaasai sapinngisaminnik pissarsiffiginiarlugit. Piffissap nukinginnassusia sianigiunnaarpaat taamaattumillu ’eqqumanissamut’ pissutissaqarsorinatik, aalajangerpullu Guutip naalagaaffiata soqutigisai salliutinnagit namminissarsiortumik anguniagaqarniarlutik. (Matthæusi 24:42) Taamatut saqineq sianiilliornerungaarpoq. Apustili Paulusip oqaasii uku maluginiakkit: „Uagut ilaanngilagut tammassutaasumik nigortunut, ilaavugulli tarnitta annaanneqaatissaannik uppertunut.“ (Hebræerit 10:39) Enokitut Noatullu uagut ulluni anorersuarsiorfittut ittuni inuuvugut, aammali uagut taakkunatut Guutimik saqeqateqarsinnaaneq immikkut pisinnaatitaaffigaarput. Taamaaliornitsigut qulariunnaartarparput Jehovap neriorsuutaasa piviusunngornissaat, ajussutsip piiagaanissaa silarsuassallu nutaap naapertuilluassuseqarfiusup atuutilersinneqarnissaa misigiumaarivut. Siunissamut neriuut nuanningaarami!

19. Mikap pallorfiginnittut ilumoortut aqqut ingerlaviat qanoq allaatigaa?

¹⁹ Pruffiiti Mika Guutimit isumassarsisinneqarluni allappoq silarsuarmi matumani inuiaat ’namminneq guutimik aqqanni saqiumaartut’. Nangillunilu imminut pilluni pallorfiginnittullu aalajaatsut allat pillugit ima allappoq: „Uagut Jehovap Guutitta aqqani soraajuitsumik, aap allaat naassaanngitsumik, saqiumavugut.“ (Mika 4:5, NV) Mikatut illit aalajangersimaguit, taava ullut anorersuarsiorfittut ittut qanorluunniit issagaluarpata Jehovamut qanittumik attaveqarit. (Jaaku 4:8) Tamatta Jehovamik Guutitsinnik maanna soraajuitsumillu, aap allaat naassaanngitsumik, saqeqatiginninnissarput uummatikkut kissaatigisigu! (wE 9/1 05)

Qanoq akissavit?

• Noap ulluisa nalittalu suut assigiissutigaat?

• Noap taassumalu ilaqutaasa aqqut suna ingerlavigaat, taakkualu uppernerat qanoq ilaarsinnaavarput?

• Jiisusip ajoqersugaasa ilaasa eqqunngitsumik isiginnittaaseq suna isiginnittaaseraat?

• Kristumiut ilumoortut suna iliuuseriniarlugu aalajangiusimappat?

[Atuaqqissaarnermi apeqqutit]

[Qupp. 21-mi assiliartaq]

Guutip naalagaaffianik oqaluussissutiginnittutut ’uagut nigortunut ilaanngilagut’

[Qupp. 20-mi assiliartaq]

Noap ulluinisulli inuit ullumikkut ulluinnarni sammisartakkatik ulapputigaat