Ulluni makkunani anorersuarsiorfittut ittuni Guuti saqeqatigaarput

„Enokip Guuti ilumoortoq saqeqatigiuarpaa. Taava peeruppoq Guutip tigummani.“ — 1 MOSESI 5:24, NV.

1. Ullutsinni inuunerup artornartuuneranut pissutaasunik eqqaasaqarit.

ULLUT anorersuarsiorfittut ittut! Oqaatsit taakku ukiunut eqqissiviilliorfiusunut nakuuserfiusunullu inuiaat 1914-imi naalagaaffiup Missiarsikkoortup pilersinneqarneraniilli misigisimasaannut naleqqulluarput. Taamanili inuiaat ’ullussat kingulliit’ inuuffigaat. Ajunaarnersuit soorlu kaannersuit, nappaalanersuit, nunap sajuttarneri sorsunnerillu aatsaat taama amerlatigipput. (2 Timotheusi 3:1; Saqqummersitat 6:1-8) Jehovamik pallorfiginnittut aamma eqqorneqartarput. Tamatta annerusumik minnerusumilluunniit nalitsinni ajornartorsiutaasartunik nalorninartunillu akiugaqartariaqarpugut. Aningaasaqarnikkut ajornartorsiutit, politikkikkut eqqissiviilliorneq, pinerluttuliorneq nappaatillu inuunerup artornartorujussuuneranut pissutaasut ilagaat.

2. Jehovap kiffai sunik unamminiagassaqarpat?

² Tamakku tamarmik saniatigut Jehovap kiffaasa ilarpassuisa peqqarniitsumik malersorneqaqattaarnertik naammagalugu atortariaqarpaat, Saatanip „Guutip inassutaanik Jiisusillu nalunaajaataanik aalajangiussisut“ sorsuffigisarmagit. (Saqqummersitat 12:17) Imaanngilaq tamatta toqqaannartumik malersorneqarneq misiginikuugipput, kristumiulli ilumoortut tamarmik Saatani Diaavulu anersaarlu taassuma inuit akornanni siuarsagaa akiorniarlugit ilungersortariaqarput. (Efesosimiut 2:2; 6:12) Anersaamit tamatumannga sunnertissanngikkaanni eqqumaniartuarnissaq pisariaqarpoq, suliffimmi, atuarfimmi sumiiffinnilu allani, inunnik pallorfiginninnermik minguitsumik soqutiginninngitsunik naapitsiffigisartakkatsinni, anersaamit tamatumannga sunnertissinnaagatta.

Inuiaat pinnagit Guuti saqeqatigaarput

3, 4. Kristumiut silamiunit suna allaanerussutigaat?

³ Aamma ukiuni hundredelinni siullerni kristumiut silarsuup matuma anersaava akiorniarlugu ilungersungaarput, tamannalu ilagiit kristumiut avataanniittunit allaanerussutigaat. Paulusip assigiinngissutaat  ima allaatigaa: „Taamaattumik ima oqarniarpunga Naalakkamilu nalunaajaallunga: Guutimik nalusutut inuujunnaarniaritsi, taakku inuummata eqqarsaatimikkut piunngitsorsiortut, isumamikkut taarsiortut nalusuussutsiminnilu uummatimillu manngertissimaneranni Guutimi inuunermut takornartaasut. Misigittaassutsiminnimi inuunerlunnermut tunniussimapput aningaaseritunermit mingunnartunik sunik tamanik iliuuseqartarlutik.“ — Efesosimiut 4:17-19.

⁴ Oqaatsit taakku atorlugit — Paulusip nalaani ullumikkullu — silarsuarmi anersaakkut ileqqussatigullu taggarissumiinneq allaatigineqarluarpoq! Ukiuni hundredelinni siullerni kristumiut pisimanerattut, ullumikkut kristumiut ’Guutimik nalusutut inuujunnaarput’ imaluunniit ’saqiunnaarput’ (1900/1961). Guutimilli saqeqateqarnerup immikkut pisinnaatitaaffiunera asseqanngitsoq nuannaarutigaat. Immaqa inuit ilaat akerliliillutik ima aperiumassapput: ’Inuit sanngiitsut naammalluinnanngitsullu ilumut Jehovamik saqeqateqarsinnaagamik?’ Aap, Biibilimi allassimavoq taamaaliorsinnaasut. Allaat Jehovap taamaaliornissaat piumasaraa. 700-kkunni ukiunik naatsorsuisalerfitta siorna pruffiiti Mika isumassarsisitaalluni ima allappoq: „Ilisimatinneqareerputit . . . [Jehovap] suut ilinnit piumasarigai: Iluartumik iliussasutit, ilumoortumik asannissasutit, misissuilluarlutillu Guutit inooqatigissagit [Guutilu saqeqatigissagit makitanaveersaarlutit, 1900/1961].“ — Mika 6:8.

Qanoq aamma sooq Guutimik saqeqateqassaagut?

5. Inuup naammalluinnanngitsup qanoq ililluni Guuti saqeqatigisinnaavaa?

⁵ Guuti ajugaqanngitsoq takussaanngitsorlu qanoq ililluta saqeqatigisinnaavarput? Soorunami inunnik saqeqateqartarnitsitut saqeqatigisinnaanngilarput. Biibilimi oqaaseq „saqineq“ isumaqarsinnaavoq „aalajangersimasumik inooriaaseqarneq“. * Tamanna eqqarsaatigalugu paasisinnaavarput inuk Guutimik saqeqateqartoq Guutimit akuerisaasumik inooriaaseqartoq, taassuma ilitsersuussutaanik maleruaagami. Taamatut inooriaaseqarneq inunnit amerlanerpaanit allaanerussutigaarput. Kristumiunulli inooriaasiuvoq eqqortutuaq. Sooq? Tamatumunnga pissutissarpassuaqarpoq.

6, 7. Sooq Guutimik saqeqateqarneq inooriaasiua pitsaanerpaaq?

⁶ Siullermik Jehova Pinngortitsisoraarput, inuunerup pilerfigaa, aamma inuuinnarsinnaaniassagatta pisariaqartunik tamanik pilersuisuuvoq. (Saqqummersitat 4:11) Taamaammat taanna kisimi uagut qanoq inuusariaqarnitsinnik ilitsersuisinnaatitaavoq. Aammattaaq Guutimik saqeqateqarneq inooriaasiuvoq pitsaanerpaaq. Jehovap imminik saqeqateqartut ajortiminnik isumakkeerfigineqarnissaannut periarfissippai, aamma inuunermik naassaanngitsumik qularnaatsumik neriuuteqalersippai. Aamma Ataatarput qilammiusoq asannittoq siunnersuutinik silatuunik, imminik saqeqatiginnittut naammalluinnanngikkaluartut silarsuarmilu Saatanip pissaaneqarfigisaani inuugaluartut maanna inuunerminnik pitsaanerpaamik atuinissaminnut iluaqutigisaannik, isumaginnittuuvoq. (Johannesi 3:16; 2 Timotheusi 3:15, 16; 1 Johannesi 1:8; 2:25; 5:19) Guutimik saqeqaterumanerput aamma ilagiinni eqqissisitseqataallunilu ataasiussuseqartitseqataavoq. — Kolossemiut 3:15, 16.

⁷ Kingullertut pingaarnerpaatullu eqqaaneqarsinnaavoq akerleriissummi pingaarutilerujussuarmi Naatsiivimmi Edenimi akerleriissutinngortinneqartumi — qilammi nunamilu kisimi oqartussaaneq pillugu akerleriissummi — sumi inissisimanerluta Guutimik saqeqateqarnikkut ersersittaripput. (1 Mosesi 3:1-6) Inooriaatsitsigut Jehova tapersersorluinnarlutigu ersersittarparput, taassumalu eqqortumik Kisimi Oqartussaanera qunusuilluta oqaluussissutigisarparput. (Tussiaat 83:19) Taamaalilluta Guutip aqqata illernartitaanissaa piumasaatalu pinissaa pillugit qinnuterput naapertorlugu iliuuseqartarpugut. (Matthæusi 6:9, 10) Guuti saqeqatiginiarlugu aalajangertut assut silatusaarput! Taakkua qularissanngilaat eqqortumik iliorlutik, Jehovami Guutiuvoq „ilisimasutuaasoq“. Taanna kukkunngisaannarpoq. — Romamiut 16:27.

8. Enokip Noallu ullut inuuffigisaat ullutsinnut qanoq assinguppat?

⁸ Ullunili makkunani anorersuarsiorfittut ittuni, piffissami inuit amerlanersaasa Jehovamut  kiffartornissamik soqutigisaqanngiffianni, qanoq ililluni kristumiutut inuusoqarsinnaava? Tamatumunnga akissut paasisinnaavarput itsaq angutit aalajaatsut artornaqisunik atugaqarnerminni qanoq ilillutik assuarnaatsuujuarsimanersut misissorlugu. Angutit taakkua ilaat marluk tassaapput Enoki Noalu. Taakkua tamarmik ullut inuuffigisaat ullutsinnut assingupput. Ajussuseq nalinginnaasupilussuuvoq. Aap, Noap nalaani nunarsuaq nakuusernermik kinguaassiuutitigullu inuunerlunnermik ulikkaarpoq. Enokilli Noallu tamarmik itsaq silarsuup anersaava akiorpaat Jehovalu saqeqatigalugu. Qanoq ilillutik taamaaliorsinnaasimappat? Apeqqut tamanna akiniarlugu allaaserisami matumani Enokip maligassiuinera misissussavarput. Allaaserisamilu tulliuttumi Noa sammissavarput.

Enokip ulluni anorersuarsiorfittut ittuni Guuti saqeqatigaa

9. Enok pillugu sunik paasissutissaateqarpugut?

⁹ Enoki Guutimik saqeqateqartutut Biibilimi allaatigineqartut siullersaraat. Biibilimi ima oqaluttuarineqarpoq: „Metusalemimik ernertaarnermi kingornagut Enokip . . . Guuti inooqatigaa [saqeqatigaa, 1900/1961].“ (1 Mosesi 5:22) Enokillu qanoq sivisutigisumik inuusimanera — uagut inuunitsinnut naleqqiullugu sivisugaluarluni taamanili sivikitsuinnaasoq — eqqaaneqareermat nangilluni ima oqaluttuarineqarpoq: „Enokip Guuti ilumoortoq saqeqatigiuarpaa. Taava peeruppoq Guutip tigummani.“ (1 Mosesi 5:24, NV) Enoki akerartortiminit nakuuserfigineqannginnerani Jehovap inuusut nunaannit peerutitissimagunarpaa toqumilu sinitsillugu. (Hebræerit 11:5, 13) Versit naatsunnguit taakku eqqaasanngikkaanni Enoki Biibilimi arlaqanngitsuinnarnik eqqaaneqarpoq. Taamaakkaluartoq paasissutissaativut uppernarsaatissaativullu toqqaannanngikkaluartut allat tunngavigalugit Enokimik ulluni anorersuarsiorfittut ittuni inuusimaneraanissamut pissutissaqarluarpoq.

10, 11. (a) Edenimi pikitsitsinerup kingorna ileqqussatigut ajortunngorsimaneq qanoq siaruaappa? (b) Tusarliussaq siulittuutaasoq suna Enokip oqaluussissutigaa, tamannalu qularnanngitsumik qanoq ilassineqarpa?

¹⁰ Assersuutigalugu Adamip ajortuliornerata kingorna inuit qanoq ajortunngoriartupallatsigisimanerat misissoriartigu. Biibilimi oqaluttuarineqarpoq Adamip angajulliliaa, Kaini, nukkaminik Abelimik toqutsigami inunni inummik toqutseqqaartuunngortoq. (1 Mosesi 4:8-10) Abelip peqqarniitsumik toqutaanerata kingorna Adami Evalu allamik ernertaarput, taannalu Setimik atserpaat. Taanna pillugu ima allassimasoqarpoq: „Aamma Seti ernertaarpoq atserlugulu Enoshimik. Taamani [Jehova] aqqagut torlorfigisalerpaat.“ (1 Mosesi 4:25, 26) Ajoraluartumik Guutimut mitallerpalaartumik  „[Jehova] aqqagut torlorfigisalerpaat“. * Ukiorpassuit Enoship inunngornerata kingorna Kainip kinguaavata Lemekimik atillip nuliaminut marlunnut erinarsuusiamini oqaluttuaraa angut inuusuttoq imminik ikiliisimasoq toqussimallugu. Aamma ima mianersoqqusivoq: „Kaini akiniunneqarmat arfineq-marloriaammik, taava Lemeki akiniunneqassaaq 77-eriaammik.“ — 1 Mosesi 4:10, 19, 23, 24.

¹¹ Pisimasut pillugit paasissutissaalunnguani taakkunani erserpoq ileqqussatigut ajortunngorsimaneq Saatanip Edenimi pilersitaa, Adamip kinguaavisa akornanni ajussutsip siaruaatipallanneranik kinguneqartoq. Silarsuarmi taamaattumi Enoki Jehovamut pruffiitiuvoq, taassumalu mianersoqqussutaa kimittooq isumassarsiarititaasoq suli ullumikkut atuuppoq. Judasi allappoq Enoki ima siulittuisoq: „Takuat, [Jehova] aggerpoq illernartortaminit 10.000-ilippassuarnit iluneqarsimalluni tamanik eqqartuussiartorluni tarnillu tamaasa pillariartorlugit iliorsimaneri iluaatsut tamaasa pillugit iluaatsullu ajortuliortut akerlilersorluni oqaaserisaat soqqusaatsut tamaasa pillugit.“ (Judasi 14, 15) Oqaatsit taakku Harmagedonimi inaarutaasumik eqquutissapput. (Saqqummersitat 16:14, 16) Qularutiginngilluinnarsinnaavarput allaat Enokip nalaani ’iluaatsut ajortuliortut’ Enokip siulittuutaa tusarlugu uumitsaatiginnittut amerlasoorujussuusimassasut. Enoki taakkunannga ajoquserneqarsinnaannginniassammat Jehovap taassuminnga peerutititsinera asannittuliornerungaarami!

Enokip Guutimik saqeqateqarnissamut suna nakussatsissutigaa?

12. Enokip nalimini inuusunit suna allaanerussutigaa?

¹² Naatsiivimmi Edenimi Adamip EvaIlu Saatani naalappaat, Adamilu Jehovamut pikitsitsivoq. (1 Mosesi 3:1-6) Ernerat Abeli allaaneruvoq, Jehovallu taanna iluaraa. (1 Mosesi 4:3, 4) Ajoraluartumik Adamip kinguaavisa amerlanersaat Abelitut inngillat. Enokili, ukiut hundredellit arlallit tamatuma kingorna inunngortoq, Abelitut ippoq. Enokip Adamillu kinguaavisa ilarpassuisa suna assigiinngissutigaat? Tamanna apustili Paulusip ima akivaa: „Uppernikkut Enoki peerutitaavoq toqu misigeqqunagu, peerupporlu Guutip peerutitimmani. Nalunaajaatigineqarpormi Enoki peerutitaatinnani Guutimit iluarisaasimasoq.“ (Hebræerit 11:5) Enoki ’nalunaajaasut [kristumiut sioqqullugit inuusut] amerlasuut’ uppernikkut maligassiuilluartut ilagaat. (Hebræerit 12:1) Enoki uppernini pissutigalugu ukiut 300-t sinnerlugit inuunini naallugu — ullumikkut amerlanersatta ukiut inuuffigisinnaasaasa pingasoriaataat sinnerlugit — pinertusaarsinnaallunilu Guutip iluarisaanik iliortuarsinnaavoq.

13. Enokip uppernera oqaluttuariuk.

¹³ Paulusip Enokip Guutimullu nalunaajaasut allat uppernerat ima allaatigaa: „Upperneq tassaavoq neriugisamik tatiginnilluinnarneq, takunngisamik qularuteqannginneq.“ (Hebræerit 11:1) Aap, upperneq tassaavoq qularuteqarnani neriugisaqarneq, neriugisatta piviusunngorumaarnerannik qularuteqanngilluinnarnermik tunngavilik. Uppernermut ilaavoq neriugisaqarneq ima sakkortutigisoq inuunermi sunik pingaarnerpaatitsinitsinnut sunniuteqarluni. Uppernerup taamaattup Enoki Guutimik saqeqateqarsinnaanngortippaa, silarsuaq avatangiiserisaa taamaanngikkaluartoq.

14. Enokip uppernera eqqorluartumik ilisimasaqarnermik sumik tunngaveqarsimasinnaava?

¹⁴ Upperneq ilumoortoq eqqorluartumik ilisimasaqarnermik tunngaveqarpoq. Enoki sunik ilisimasaqarpa? (Romamiut 10:14, 17; 1 Timotheusi 2:4) Qularnanngitsumik Enokip Edenimi susoqarsimanera ilisimasimassavaa. Ilimanarpoq aamma Naatsiivimmi Edenimi — taamani immaqa suli piusumi, inunnit iserfigineqarsinnaanngitsumi — inuunerup qanoq issimanera pillugu tusagaqarsimassasoq. (1 Mosesi 3:23, 24)  Aamma nalunngilaa Guutip siunertarigaa nunarsuaq Adamip kinguaavinik ulikkaassasoq taakkualu nunarsuaq tamakkerlugu paratiisinngortissagaat. (1 Mosesi 1:28) Aammattaaq qularnanngivippoq Enokip Jehovap kinguaassamik Saatanip niaquanik aseruisussamik taassumalu peqquserlunnerata kingunipiluinik tamanik atuukkunnaarsitsisussamik pilersitsinissamik neriorsuutaa qujamasuutigigaa. (1 Mosesi 3:15) Enokip nammineq siulittuutaa isumassarsiarititaasoq, Judasip allagaani tammatsaalineqartoq, Saatanip kinguaassaasa suujunnaarsinneqarnissaannut tunngassuteqarpoq. Enoki uppertuummat nalunngilarput taassuma Jehova pallorfigigaa ’ujarlersiminik akissarsisitsiumaarnera’ qularutiginagu. (Hebræerit 11:6) Tassa Enoki uagutsitut ilisimasaqartiginngikkaluarluni upperluarnermik ineriartortitsinissamut naammattumik ilisimasaqarpoq. Taamatut uppernini pissutigalugu ulluni anorersuarsiorfittut ittuni assuarnaatsuujuarsinnaavoq.

Enokip maligassiaa maliguk

15, 16. Enokip maligassiaa qanoq ililluta malissinnaavarput?

¹⁵ Ulluni anorersuarsiorfittut ittuni ullumikkut atukkatsinni Enokitut Jehova nuannaartikkusukkatsigu silatusaassaagut Enokip maligassiaa malikkutsigu. Jehova taassumalu siunertaa pillugit eqqorluartumik ilisimasaqarneq pigiliullugulu aalajangiuttariaqarparput. Tamannali naammanngilaq. Aammattaaq eqqorluartumik ilisimasaqarneq tamanna iliuutsitsinni tamani aalajangiisuutittariaqarparput. (Tussiaat 119:101; 2 Petrusi 1:19) Aap, Guutip isiginnittaasianit siulersortittariaqarpugut taannalu eqqarsaatitsigut iliuutsitsigullu tamatigut nuannaartinniartuartariaqarlutigu.

¹⁶ Taamani Enokip saniatigut kikkut allat Jehovamut kiffartorsimanerannik allasimasoqanngilaq, erseqqipporli Enoki kiffartortutuaasimanngikkuni ikinnerussuteqartunut ilaasimassasoq. Aamma uagut silarsuarmi ikinnerussuteqarpugut, tamannali nikallussutiginngilarput. Kimilluunniit akerlilersorneqaraluarutta Jehovap annertoqqusersussavaatigut. (Romamiut 8:31) Enokip guutiitsut suujunnaarsinneqarnissaat sapiilluni mianersoqqussutigaa. Illaruaatigineqaraluarluta, akerlilersorneqaraluarluta malersorneqaraluarlutalu „Naalagaaffimmik nutaarsiassaq nuannersoq tamanna“ oqaluussissutigigaangatsigu uaguttaaq sapiittarpugut. (Matthæusi 24:14, NV) Enoki nalimini inuusut ilarpassuisa inuunerattut sivisutigisumik inuunngilaq, aamma silarsuaq avatangiiserisani isumalluutiginngilaa. Pingaaruteqarnerungaartoq eqqarsaatigiuarpaa. (Hebræerit 11:10, 35) Uaguttaaq Jehovap siunertaata piviusunngornissaa eqqarsaatigiuarparput. Taamaattumik silarsuarmik tamakkiisumik atuinngilagut. (1 Korinthimiut 7:31) Nukivulli periarfissavullu pingaarnerpaamik Jehovamut kiffartornermi atortarpavut.

17. Enokip ilisimanngisaanik sumik ilisimasaqarpugut, taamaammallu qanoq iliortariaqarpugut?

¹⁷ Enokip upperaa kinguaassaq Guutip neriorsuutigisaa piffissaq Jehovap aalajangigaa nalliuppat takkukkumaartoq. Maanna ukiut 2000-ingajaat qaangiupput kinguaassaq taanna — Jiisusi Kristusi — saqqummermat, utertitsissut pilersimmagu aamma uagut itsarlu nalunaajaasut aalajaatsut soorlu Enoki inuunermik naassaanngitsumik kingornussinissatsinnut aqqutissiuimmat. Kinguaassap taassuma, maanna Guutip naalagaaffiani kunnginngortitaasup, Saatani qilammit nunarsuup eqqaanut igippaa, tamatumalu kinguneri pissutsini alianartuni silarsuarmi avatangiisitsinni tamarmi atuuttuni erseqqilluinnarput. (Saqqummersitat 12:12) Aap, Enokimit uagut ilisimasaqarnerungaarsinnaavugut. Taassumatut upperluarnermik ineriartortitsisa. Qanortoq Guutip neriorsuutiminik eqquutititsiumaarneranik qularutiginninnginnerput iliuutsitsinnut tamanut sunniuteqarli. Aamma qanortoq ulluni anorersuarsiorfittut ittuni inuugaluarluta Enokitut Guuti saqeqatigisigu.

[Quppernerup ataani ilanngussat]]

Qanoq akissavit?

• Guutimik saqeqateqarneq qanoq paasisariaqarpa?

• Guutimik saqeqateqarneq sooq inooriaasiua pitsaanerpaaq?

• Sunaana pissutigalugu ulluni anorersuarsiorfittut ittuni Enoki inuugaluarluni Guutimik saqeqateqarsinnaanngortoq?

• Enokip maligassiaa qanoq ililluta malissinnaavarput?

[Atuaqqissaarnermi apeqqutit]

[Qupp. 14-mi assiliartaq]

Upperluni „Enokip Guuti ilumoortoq saqeqatigiuarpaa“

[Qupp. 16-mi assiliartaq]

Upperilluinnarparput Jehovap neriorsuutai piviusunngorumaartut

[Qupp. 12-mi suminngaanneernera]

Assimi talerpillerpaajuvoq, arnaq: FAO-foto/B. Imevbore; illorsuaq uppikalersoq: San Hong R-C Picture Company