Angajoqqaat — siunissamik qanoq ittumik meeqqasi kissaappisigit?

„Nukappiaqqat niviarsiaqqallu . . . [Jehovap] aqqa unnersiutigissavaat.“ — TUSSIAAT 148:12, 13.

1. Angajoqqaat meeqqatik pillugit sunik isumakuluuteqartarpat?

ANGAJOQQAAT tamarmik meeqqamik siunissaat isumakuluutigisarpaat, ilaa? Meeqqap inunngorneraniilli — imaluunniit allaat suli inunngunnginneraniilli — angajoqqaavisa taassuma inuunermini qanoq atugaqarumaarnera eqqarsaatigisarpaat. Peqqissuussava? Pissusissamisoortumik ineriartussava? Meeqqap peroriartornerani allanik isumakuluutissaqalertarpoq. Angajoqqaammi meeqqatik pitsaanerpaamik kissaappaat. — 1 Samueli 1:11, 27, 28; Tussiaat 127:3-5.

2. Sooq angajoqqaarpassuit meeqqatik inersimasunngorunik inuunerminni iluatsilluarnissaat pingaartippaat?

² Ullumikkulli silarsuatsinni qitornat pitsaanerpaamik isumaginissaat angajoqqaajusunut unamminiarnarpoq. Angajoqqaarpassuit sorsunneq, politikkikkut allanngorartoqarnera,  piitsuuneq ajoqusigaasimanermillu timikkut eqqarsartaatsikkulluunniit kingunerlutsitsineq misigisimavaat. Soorunami meeqqatik tamakkuninnga misigisaqartikkusunngilaat. Nunani pigissaarfiusuni angajoqqaajusut immaqa malugaat ikinngutimik ilaquttamillu meeraat angusaqarluarlutik atorfeqartut inuunerminnilu iluatsilluarpasissut. Tamanna pissutigalugu aamma namminneq meeqqatik inersimasunngorunik toqqissisimanissaat inuulluataarnissaallu — inuppassuit oqartarnerattut inuunerminni iluatsilluarnissaat — pisussaafimmittut isigigajuttarpaat. — Oqaluussisartup oqaasii 3:13.

Qanoq ililluni iluatsilluartoqarsinnaava?

3. Kristumiut qanoq aalajangersimappat?

³ Kristumiut Jiisusip ajoqersugarai, taamaammallu Jehovamut tunniulluinnarniarlutik aalajangersimapput. Jiisusip oqaasii uku malinniarpaat: „Uannik malinnikkumasoq imminut isumakkiissaaq, ullullu tamaasa sanningasulini [nappagaq anniartitaaffini, NV] ersullugu malissavaanga.“ (Lukasi 9:23; 14:27) Aap, imminut pilliutigeriaannaaneq kristumiutut inuunerup ilagaa. Taamatulli inuuneq erloqinartuunanilu nuanniitsuunngilaq. Inooriaasiuvorli pilluarnartoq nalerisimaarnartorlu, imaluunniit iluatsilluarluni inuuneruvoq, tunisineq inuunerup tamatuma ilagimmagu Jiisusillu oqaasii naapertorlugit ’tunisineq pilluarnarnerummat tigusinermit’. — Apustilit Suliaat 20:35.

4. Jiisusip ajoqersukkani suna ujaqqaaqqullugu kajumissaarpai?

⁴ Jiisusip nalaani inuinnaat atugarisaat imaannaanngitsupilussuupput. Ullormut pissaqarumallutik aningaasarsiornermik saniatigut aamma Romamiut sukannersumik naalakkersuinerat upperisarsiornikkullu siuttut qalliinnarsiortut inassutaat artornartut naammagalugit atortariaqarpaat. (Matthæusi 23:2-4) Jiisusilli tusarliussaanik tusartut ilarpassuisa taanna malinniarlugu nuannaarlutik nammineq soqutigisatik ilaasalu allaat atorfitsik isumakkeerpaat. (Matthæusi 4:18-22; 9:9; Kolossemiut 4:14) Siunissaq isumannartoq qinerpaat? Jiisusi ima oqarpoq: „Kinaluunniit illuminik, qatanngutiminik angutinik arnanillu, ataataminik anaanaminillu, qitornaminik narsaamminilluunniit atera pillugu qimatsisimasoq pissarseqqissaaq 100-riaammik inuunerlu naassaanngitsoq kingornutissallugu.“ (Matthæusi 19:29) Ajoqersukkat uppernarsaavigereerlugit Ataatamik qilammiittup pisariaqartitaat nalunngikkai Jiisusip taakku ima kajumissaarpai: „Guutip naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput.“ — Matthæusi 6:31-33.

5. Jiisusip Guutip kiffaminik isumaginnikkumaarneranik neriorsueqqissaarnera angajoqqaat ilaasa qanoq marloqiusamik isumaqarfigaat?

⁵ Ullumikkut aamma taamaappoq. Jehovap pisariaqartitavut nalunngilai, Guutillu naalagaaffiata soqutigisaanik inuunerminni salliutitsisut, ingammik piffissaq tamaat kiffartortut, pisariaqartitamik taassumannga isumagineqarumaarnerannik aamma uppernarsaavigineqarput. (Malakia 3:6, 16; 1 Petrusi 5:7) Angajoqqaalli ilaat tamatumunnga tunngatillugu imminnut akerleriissunik misigissuseqarput. Aappaatigut meeqqamik Jehovamut kiffartornerminni siumukarnissaat immaqalu piffissaq tamaat kiffartortunngornissaat kissaatigaat. Aappaatigut aningaasaqarneq suliffissaaruteriataarsinnaanerlu eqqarsaatigalugu isumaqarput meeqqat ilinniarluaqqaassasut suliffimmut pitsaasumut piukkunnarsiniassammata isumalluutissaqarniassammataluunniit pisariaqalissagaluarpat. Angajoqqaallu ilarpassuisa ilinniagaqarluarneq qaffasissumillu ilinniagaqarneq naligiissittarpaat.

Siunissamut qanoq piareersartoqartartoq

6. Allaaserisami matumani „qaffasinnerusumik ilinniagaqarneq“ eqqartorneqaraangat suna pineqartarpa?

⁶ Ilinniartitaanermik aaqqissuussinerit nunamit nunamut assigiinngillat. Kalaallit Nunaanni ukiuni 11-12-ini meeqqat atuarfianneereerluni tamatumalu kingorna ilinniarnertuunngoreerluni universitetimi ilinniarfimmiluunniit qaffasinnerusumi allami nangitsilluni ilinniartoqarsinnaavoq. Tamakkunani ilinniartitaaneq ukiut pingasut arfineq-pingasullu akornanni  sivisussuseqartarpoq. Allaaserisami matumani „qaffasinnerusumik ilinniagaqarneq“ eqqartorneqaraangat nangitsilluni ilinniarnerit taamaattut pineqartarput. Periarfissat allat tassaapput ilinniarnerit sivikinnerusut suliassanut aalajangersimasunut piukkunnarsarfiusut.

7. Ilinniarnertuunngorniat qanoq kimigiiserfigineqarajuppat?

⁷ Atuarfiit atuartuutitik ilinniartuutitillu qaffasinnerusumik ilinniagaqarnissaannut upalungaarsarniartarpaat. Taamaattumik fagit atuartut ilinniartullu universitetimi ilinnialissutigisinnaasaat sammineqarnerusarput, fagit allamik ilinniagaqaqqaarnatik suliffissarsinissamut piukkunnarsaatigisinnaasaat sammineqarpiaratik. Ilinniarnertuunngorniat neriunaateqartumik akissarsiarissaarnartumillu suliffittaassutigisinnaasaminnik angusaqarluarnissaat neriuutigalugu universitetini pitsaanerpaani ilinnialerniarnissamut ilinniartitsisuminnit, siunnersortiminnit atuaqatiminnillu kimigiiserfigineqarajupput.

8. Angajoqqaat kristumiut sunik aalajangigassaqarpat?

⁸ Taava angajoqqaat kristumiut qanoq iliortariaqarpat? Soorunami kissaatigaat meeqqatik atuarfimmi angusaqarluassasut imminullu pilersorsinnaanngussasut. (Ussatit 22:29) Angajoqqaalli meeqqatik silarsuarmi matumani angusarissaarniuttunut peqataatiinnassavaat? Oqaatsimikkut iliuutsimikkullu meeqqatik sunik anguniagaqaqqullugit kajumissaartarpaat? Angajoqqaat ilaat suleruloortarput meeqqamik piffissanngorpat ilinniarfinni qaffasinnerusuni ilinnialernissaat akissaqarfiginiassagamikku. Allat akissaqarumallutik akiitsoqalerumasarput. Taamaaliorniarlunili aalajangeraanni aningaasartuutaannanngitsut aammali allat akigineqartariaqarput. Ullumikkut qaffasinnerusumik ilinniagaqarnermut tunngatillugu suut akigineqartariaqarpat? — Lukasi 14:28-33.

Qaffasinnerusumik ilinniagaqarnermut tunngatillugu akigineqartariaqartut

9. Ullumikkut qaffasinnerusumik ilinniagaqarnermut tunngatillugu akigineqartariaqartut pillugit qanoq oqartoqarsinnaava?

⁹ Akigineqartariaqartut eqqaaneqaraangata aningaasartuutit eqqarsaatigineqarnerusarput. Nunat ilaanni qaffasinnerusumik ilinniagaqarneq naalakkersuisunit akilerneqartarpoq. Nunanili amerlanerpaani qaffasinnerusumik ilinniagaqarneq akisullunilu akitsoraluttuinnarpoq. The New York Times-imi ima allassimavoq: „Isumaqartoqarsimavoq qaffasinnerusumik ilinniagaqarneq periarfissarpassuarnut ammaassisuusoq. Maanna pisuut pissakinnerusullu akornanni assigiinngissuteqarnerulersitsivoq.“ Pisuut pissaanillillu qaffasinnerusumik ilinniagaqarnissamut pitsaviusumut periarfissaqartutuaajartorput. Meeqqatik qaffasinnerusumik ilinniagaqartittarpaat taakkuattaaq pisuujunissaat inuiaqatigiinnilu pissaaneqarnissaat qulakkeerniarlugu. Angajoqqaat kristumiut meeqqatik taamatut anguniagassissavaat? — Filippimiut 3:7, 8; Jaaku 4:4.

10. Qaffasinnerusumik ilinniagaqarneq pissutsit aaqqissuussaanerannik maanna atuuttumik siuarsaanermut qanoq attuumassuteqarajuppa?

¹⁰ Qaffasinnerusumik ilinniagaqarneq akeqanngikkaluaraangalluunniit piumasaqaatinik naammassisariaqakkanik ilaqarsinnaavoq. Assersuutigalugu The Wall Street Journal-imi allassimavoq nunami Asiap kujataani-kangisissuaniittumi „atuarfiit aaqqissuussaanerat iluaqutigalugu ilinniartut pikkorinnerpaat qaffatsinneqartarnerat erseqqissoq“. Ilinniartut pikkorinnerpaat  qaffatsinniarlugit silarsuarmi ilinniarfinni pitsaanerpaani, soorlu Tuluit Nunaanni Oxfordimi Cambridgemilu USA-milu universitetini ilinniarfigiumaneqarnerpaani, ilinnialersinneqartarput. Sooruna naalakkersuisut ilinniagaqarniartut taama ikiortigigaat? Allaaserisami ima allassimavoq: „Naalagaaffiup aningaasaqarniarnera ineriartortinniarlugu.“ Imaassinnaavoq ilinniagaq nammineq akeqanngitsoq, ilinniartulli inuunertik, pissutsit aaqqissuussaanerannik maanna atuuttumik siuarsaaniarsuataarnermuinnaq atugartik, akiliutigisarpaat. Silarsuarmi taamaaliornissaq kajungerineqartarpoq, angajoqqaalli kristumiut meeqqatik taamatut inuunissaannik kissaappaat? — Johannesi 15:19; 1 Johannesi 2:15-17.

11. Misissuinerit naapertorlugit universitetini ilinniartut imigassaq atoqateqartarnerlu pillugit qanoq isumaqartarpat?

¹¹ Aamma avatangiisiusartut eqqarsaatigineqartariaqarput. Naluneqanngilaq universitetini atuartitsiffiusunilu taamaaqataanni inuunerlunneq nalinginnaasoq, soorlu ikiaroornartumik imigassamillu atornerluineq, kinguaassiuutitigut inuunerlunneq, peqquserlunneq, ilinniartut nutaat allanit akuerineqassutigisinnaasaannik misiliutit ingasattajaartut allarpassuillu. Imigassamik atornerluineq assersuutigeriartigu. Killeqanngitsumik imigassartorneq pillugu New Scientist-imi ima allassimasoqarpoq: „[USA-mi ilinniartut] 44 procentii missiliorlugit sapaatit-akunneri marluk ingerlaneranni minnerpaamik ataasiarlutik silaarutiivillutik imertarput.“ Australiami, Tuluit Nunaanni, Ruslandimi, Qallunaat Nunaanni nunanilu allarpassuarni inuusuttut akornanni aamma taamaappoq. Ileqqorineqartut eqqarsaatigalugit ilinniartut akornanni ileqqussatigut najoqqutaqartoqannginneq nalinginnaavoq. Newsweek naapertorlugu amerlanertigut kinguaassiuutitigut pilerissutsinik naammassinninniaannarluni kinguaassiuutitigut tamalikanneq nalinginnaavoq. Misissueqqissaarnerit naapertorlugit ilinniartut 60-80 procentii taamatut inuupput. Misissueqqissaartartoq ima oqarpoq: „Tamanna ilinniartuunerup ilagiinnarpaa.“ — 1 Korinthimiut 5:11; 6:9, 10.

12. Ilinniartut qanoq iliornissamut usserneqariaannaappat?

¹² Sunniutipiluit saniatigut ilinniartitaanermi malinnaaniarnerup misilitseqattaarnerullu qanoq ilungersunartiginerat eqqarsaatigineqartariaqarpoq. Soorunami ilinniartut angusissagunik malinnaalluartariaqarlutillu piareersarluartariaqarput. Ilinniartut ilaat ilinniarnermik saniatigut sulisariaqartarput. Tamakkununnga tamanut piffissarujussuaq nukippassuillu atortariaqarput. Taava anersaakkut sammisassanut qanoq piffissaqartigalunilu nukissaqartigisoqassava? Ilungersunarneruleraangat suut sumiginnarneqartarpat? Guutip naalagaaffiata soqutigisai salliutinneqartuartarpat imaluunniit tunulliunneqalertarpat? (Matthæusi 6:33) Biibilimi kristumiut ima kajumissaarneqarput: „Sianiginiarsiuk qanoq inuunersusi, siuneqanngitsutut pinnasi, siuneqartutulli iliorlusi. Piffissaqqissoq atorniarsiuk, ullut ajortuummata.“ (Efesosimiut 5:15, 16) Ajoraluartumik ilinniartut ilaat upperunnaarsimapput piffissartik tamaat nukitillu tamaasa ilinniarnerminnut atorsimagamikkit imaluunniit avatangiisitik Biibilimut naapertuutinngitsumik pissusilersornissamut usserneqaatigisimagamikkit.

13. Angajoqqaat kristumiut apeqqutit suut eqqarsaatigisariaqarpaat?

¹³ Soorunalimi ilinniartut akornanniinnaanngitsoq kinguaassiuutitigut inuunerluttoqartarlunilu allatigut kristumiorpalunngitsumik pissusilersortoqartarlunilu tatisisoqartarpoq. Inuusuttorpassuilli ukiut ilinniartuuffiit killeqarnani inuunermut attuumassuteqartittarpaat. Angajoqqaatut kristumiutut qitornat perulersut ukiuni arlalinni arlaqanngitsuniluunniit taamatut sunnertinneqarnissaat akuerissallugu silatusaarnerussava? (Ussatit 22:3; 2 Timotheusi 2:22) Iluaqutaasinnaasut navianaatinit pingaaruteqarneruppat? Pingaarnerpaamillu: Ilinniarfinni inuusuttunut suut inuunermi salliutinneqartariaqartutut ilinniartitsissutigineqartarpat? * (Filippimiut  1:10; 1 Thessalonikamiut 5:21) Angajoqqaat apeqqutit taakku qinunikkut eqqarsaatigeqqissaartariaqarpaat. Aamma meeqqatik illoqarfimmut nunamulluunniit allamut ilinniariassappata taamaaliortariaqarput.

Allanik sunik periarfissaqarpa?

14, 15. (a) Inuit amerlanerit isumaat malinnagu Biibilimi siunnersuutigineqartoq suna malittariaqarparput? (b) Inuusuttut imminut qanoq aperisinnaappat?

¹⁴ Ullumikkut inuppassuit isumaqarput inuusuttut iluatsilluassagunik universitetimi ilinniagaqartariaqartut. Kristumiulli inuit amerlanerit isumaat malinnagu Biibilimi kajumissaarutigineqartoq una malippaat: „Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.“ (Romamiut 12:2) Maanna naggatissap nalaata naalernerani Guutip kiffaminut, inuusuttunut utoqqarnullu, tunngatillugu piumasaa suua? Paulusip Timotheusi ilungersorluni ima kajumissaarpaa: „Pututitaanaveersaarniarit, naalliussinnaat, iivangkiiliulersaartutut suliat ingerlanniaruk kiffartuutillu naammassillugu.“ Oqaatsit taakku ullumikkut tamatsinnut atuulluinnarput. — 2 Timotheusi 4:5.

¹⁵ Silarsuup anersaava pigisanik pingaartitsisoq tiguartisimaffiginagu ’pututitaanaveersaartariaqarpugut’ — anersaakkut eqqarsarluarsinnaasariaqarlutalu aalajangersimasumik anguniagaqartariaqarpugut. Inuusuttuuguit imminut ima aperigit: ’’Kiffartuutigisara naammassiumallugu’ oqaluussillaqqissunngorniarnikkut sapinngisara tamaat iliuuseqartarpunga? Isumaqarluartumik kiffartoqataanissaq eqqarsaatigalugu qanoq pilersaaruteqarpunga? Piffissaq tamaat kiffartortunngorsinnaanerlunga eqqarsaatiginikuuara?’ Apeqqutit taakku eqqarsarnartupilussuupput, ingammik inuusuttut allat nammineq soqutigisaminnik salliutitsigaangata ’ujarleraangatalu angisuunik’ namminneq isumaat naapertorlugit siunissamut isumannarunnaarsitsisunik. (Jeremia 45:5) Taamaattumik angajoqqaat kristumiut meeqqat mikisunnguuneranniilli anersaakkut pitsaasunik avatangiiseqarnissaat aamma anersaakkut pitsaasumik ilinniartinneqarnissaat isumagigunikku silatusaassapput. — Ussatit 22:6; Oqaluussisartup oqaasii 12:1; 2 Timotheusi 3:14, 15.

16. Angajoqqaat kristumiut silatuut meeqqamik anersaakkut pitsaasunik avatangiiseqarnissaat qanoq isumagisinnaavaat?

¹⁶ Ernerit pingasut, ukiorpassuarni piffissaq tamaat kiffartortuusimasumik anaanaqartut, angajullersaat ima oqaluttuarpoq: „Anaanap kikkut ilagisarnerivut eqqumaffigisupilussuuaa. Atuaqativut ilaginagit ilagiinniittut anersaakkut pitsaasunik ileqqullit kisiisa ilagisarpavut. Aamma piffissaq tamaat kiffartortunik — ajoqersuiartortitanik, nakkutilliisunik angalasartunik, Betelimi suleqataasunik pionerinillu — uagutsinnut qaaqqusigajuppoq. Misigisimasatik pillugit oqaluttuartut tusarnaaraangatsigit qanorlu nuannaartiginerat malugigaangatsigu suli piffissaq tamaat kiffartortunngorusunnerulertarpugut.“ Ernerit taakkua pingasut tamarmik ullumikkut piffissaq tamaat kiffartortuummata nuanneqaaq. Taakkua ilaat Betelimiippoq, alla Kiffartortut Toqqakkat Atuarfiat-ni atuarsimavoq pingajuallu pioneriulluni.

17. Angajoqqaat faginik qinersinermut tunngatillugu inuusuttut qanoq siunnersorsinnaavaat?

¹⁷ Anersaakkut peqqissumik sunnerneqarnissaq pingaaruteqartupilussuuvoq. Tamatuma saniatigut meeqqat suut ilinniarniarnerlugit aamma sunngorniarnerlutik aalajangissappata angajoqqaat meeqqatik piaarnerpaamik eqqortumik siunnersortariaqarpaat. Angut inuusuttoq alla maanna Betelimiittoq ima oqaluttuarpoq: „Angajoqqaakka katinnginnerminni aamma katereerlutik marluullutik pioneriusimapput, sapinngisartillu tamaat pionerisut anersaaqarneq meeqqaminnut ingerlateqqinniarsimallugu. Atuarfimmi faginik qinigassaqaleraangatta siunissatsinnulluunniit attuumassuteqartumik aalajangigassaqaleraangatta ullup ilaannaa sulinissamut pioneriunissamullu periarfissaqarlualersitsisumik aalajangiinissamut kajumissaartuaannarpaatigut.“  Fagit universitetimi ilinniarnissamuinnaq tikkuussisut qinernagit, angajoqqaat inuusuttullu fagit teokratiimut tunngasumik anguniagaqarluni atorluarsinnaasut qinissanerlugit eqqarsaatigeqqissaartariaqarpaat. *

18. Inuusuttut suut suliffigissanerlugit eqqarsaatigeqqissaarsinnaavaat?

¹⁸ Misissuinerit naapertorlugit nunarpassuarni ilinniagartuut pinnatik, inuit assassorissanik suliallit kiffartuussinermillu suliallit pisariaqartinneqartupilussuupput. Aviisimi USA Today-imi allassimavoq ukiuni qulikkuutaani tulliuttuni sulisussat 70 procentii ukiunik sisamanik sivisussusilimmik universitetimi ilinniagaqartariaqanngitsut, immikkulli suliamut ilinniartariaqartut. Sivisuallaanngitsumik ilinniartoqarsinnaavoq, soorlu allaffimmiutut, biililerisutut, computerteknikeritut, ruujorilerisutut, nujalerisutut allatulluunniit. Suliffissaalluaramik? Aap, ilumut! Immaqa pilerinarpallaanngikkaluarput, naammattumilli isertitaqartarnissamut suliffiullu sivisussusianik naleqqussaanissamut, inuunerminni Jehovamut kiffartornermik pingaarnerpaatitsisunut pisariaqartumut, periarfissiipput. — 2 Thessalonikamiut 3:8.

19. Inooriaaseq suna nuannaarnarnerpaallunilu nalerisimaarnarnerpaava?

¹⁹ Biibilimi „nukappiaqqat niviarsiaqqallu“ kajumissaarneqarput ’Jehovap aqqa unnersiutigeqqullugu aqqa kisimi pissarsuummat, naalannassusia nunamut qilammullu anngussimammat’. (Tussiaat 148:12, 13) Inuiaqatigiinni inissisimaffinnut iluaqutinullu silarsuup neqeroorutigisaanut sanilliullugu inuunermi Jehovamut piffissaq tamaat kiffartornermik pingaarnerpaatitsineq qularnanngitsumik inooriaasiuvoq nuannaarnarnerpaaq nalerisimaarnarnerpaarlu. Biibilimi neriorsuutigineqartoq una eqqaamajuaruk: ’Jehovap pilluaqqusinera pisuunngortitsisaraaq, erloqinartumillu ilasarinngilaa.’ — Ussatit 10:22, 1900/1961.  (wE 10/1 05)

[Quppernerup ataani ilanngussaq]

Uku nassuiarsinnaavigit?

• Siunissamut toqqissisimanartumut tunngatillugu kristumiut suna qularinngilaat?

• Angajoqqaat kristumiut meeqqatik inuunermi anguniagassat pillugit siunnersorniaraangamikkit sunik unamminiagassaqartarpat?

• Qaffasinnerusumik ilinniagaqarnermi akigineqartariaqartunik naatsorsuinermi suut eqqarsaatigineqartariaqarpat?

• Angajoqqaat meeqqamik inuunerminni Jehovamut kiffartornermik pingaarnerpaatitsilernissaannik qanoq ikiorsinnaavaat?

[Atuaqqissaarnermi apeqqutit]

[Qupp. 14-mi assiliartaq]

Nammineq soqutigisatik isumakkeerpaat Jiisusilu malillugu

[Qupp. 19-mi assiliartaq]

Angajoqqaat kristumiut meeqqamik mikisunnguuneranniilli anersaakkut pitsaasunik avatangiiseqarnissaat isumagigunikku silatusaassapput