Biibilimi pisoqqami tyskisuumi Guutip aqqa atorneqartoq
Biibilimi pisoqqami tyskisuumi Guutip aqqa atorneqartoq
GUUTIP nammineq aqqa, Jehova, Ny Verden-Oversættelsen af De Hellige Skrifter-imi, 1971-imi tyskisut saqqummersumi, tusindilikkuutaanik atorneqarpoq. * Taannali Biibilini tyskisuuni Guutip aqqanik atueqqaartuunngilaq. Biibilinit tyskisuunit atermik Jehovamik atueqqaartuugunarpoq ukiut 500-t tamatuma siorna saqqummersoq palasimit katuuliusumit Ruumalerisumit nuimasuumit Johann Eckimit nutsineqartoq.
Johann Eck 1486-imi Tysklandip kujataani inunngorpoq. 24-nik ukioqarluni Ingolstadtimi universitetimi teologiimi professorinngorpoq, taannalu atorfigaa 1543-mi toqussi tikillugu. Johann Eck Martin Lutherip nalaani inuuvoq, kammalaatigiileraluarpullumi aamma. Luther iluarsaaqqinnermi siuttuulersoq Johann Eck ilagiinnik katuullinik illersuivoq.
Bayernimi hertugip Biibilip tyskisuunngortinneqarnissaa Johann Eckimut suliassiissutigaa, nutsigaalu 1537-mi saqqummerpoq. Kirchliches Handlexikon naapertorlugu nutsikkami tassani allanneqaqqaarnerani oqaatsit atorneqartut eqqorluarnerusumik nutserneqarsimapput, taamaattumillu „ulloq manna tikillugu nersorneqarneraniit nersorneqarnerusariaqartoq“. Mosesimik allakkat aappaat 6:3 Johann Eckip ima nutserpaa: „Uanga tassaavunga Naalagaq, Aaperaamut, Iisaamut Jaakumullu Guutitut ajugaqanngitsutut saqqummertartoq: uangalu atera Adonai taakkununnga saqqummiutinngilara.“ Johann Eckip nutsikkamini versi taanna quppernerup sinaani ima nassuiaatitalerpaa: „Ateq Adonai Jehoua.“ Biibilimut tunngasunik oqaaseqartartorpassuit isumaqarput Guutip nammineq aqqa Biibilini tyskisuujusuni siullerpaamik tassani atorneqartoq.
Guutilli nammineq aqqa ukiuni tusindilikkuutaani ilisimaneqarlunilu atorneqartarpoq. Atermik atuineq siusinnerpaaq uppernarsarneqarsinnaasoq hebræerisuujuvoq, tassani „Jehova“ atorneqarpoq Guutip ilumoortutuap kiuneranik paasissutissatut. (5 Mosesi 6:4) Ukiut 2000-ingajaat matuma siorna Jiisusip Guutip aqqanik ilisimannilersitsinini pillugu oqaasii grækerisut allanneqarput. (Johannesi 17:6) Taamanimiilli ateq oqaatsini assigiinngitsorpassuarni atorneqalerpoq, qanittukkullu kikkut tamarmik, Tussiaat 83:19 eqquutitillugu, paasilissavaat Jehovamik atilik tassaasoq nunarsuarmi tamarmi qutsinnerussaartoq. (wE 9/1 05)
[Quppernerup ataani ilanngussaq]
^ imm. 2 Jehovap Nalunaajaasuinit saqqummersinneqartoq. 1961-imi tuluttut saqqummeqqaarpoq. Maanna Biibili taanna tamaat ilaaluunniit oqaatsinut 50-inut nutsigaavoq.
[Qupp. 32-mi assiliartaq]
Johann Eckip 1558-imi Biibilimik nutsigaa Mosesimik allakkat aappaat 6:3-mut quppernerup sinaani atermut Jehovamut nassuiaatitalik