„Eqqumagitsi“ — eqqartuussiffik aallartereerpoq!
„Eqqumagitsi“ — eqqartuussiffik aallartereerpoq!
Allaaserisami atuaqqissaaqatigiissutissami matumani paasissutissat atuagassiaaraq Eqqumagitsi!, 2004/05-imi silarsuarmi tamarmi ataatsimeersuarnerni saqqummersinneqartoq, tunngavigaat.
„Taamaattumik eqqumagitsi, naluarsimi ulloq Naalakkassi tikiuffissaa.“ — MATTHÆUSI 24:42.
1, 2. Jiisusip tikiunnissani naleqqulluartumik sumut assersuuppaa?
ILLIT qanoq iliussagaluarpit nalunngitsuugukku tillinniaq malunnaarsaarluni illit najugaqarfinni tillinniartartoq? Ilaquttatit pigisatillu paarilluarniarlugit eqqumassagaluarputit. Tillinniammi qaqugu tillinniarniarnini allakkatigut nalunaarutigineq ajorpaa. Malugineqaranili ilimagineqaranilu tillinniartarpoq.
2 Jiisusip ataasiaannarnani tillinniap periaasia assersuutigaa. (Lukasi 10:30; Johannesi 10:10) Naggatissap nalaani Jiisusillu eqqartuussut naammassiartorlugu tikiunnissaa sioqqullugu pisussat pillugit Jiisusi ima mianersoqqusivoq: „Taamaattumik eqqumagitsi, naluarsimi ulloq Naalakkassi tikiuffissaa. Imaattorli ilisimavarsi: Illumi ittuusup nalunngikkaluaruniuk tillinniaq pigaarfimmi sorlermi takkutissasoq eqqumassagaluarpoq illuminut isertoqarnissaa pinaveersaartinniarlugu.“ (Matthæusi 24:42, 43) Tassa Jiisusip tikiunnissani tillinniap periaasianut assersuuppaa. Tillinniaq ilimagineqarani takkuttarpoq.
3, 4. (a) Jiisusip tikiunnissani pillugu mianersoqqussutaanik eqqumaffiginninneq qanoq paasisariaqarpa? (b) Apeqqutit suut pilerpat?
3 Assersuusiaq torrappoq, qaqugorpiarmi Jiisusi tikiutissanersoq ilisimaneqanngilaq. Jiisusip siulittuutimini tamatumani qulaanisut mianersoqqusinnginnermini ima oqarpoq: „Ulloq taanna nalunaaquttap-akunneraluunniit kimilluunniit ilisimaneqanngillat, inngililluunniit qilanniittut Ernerulluunniit ilisimanngilaat, Ataatalli kisimi.“ (Matthæusi 24:36) Taamaattumik Jiisusip tusarnaartini kajumissaarpai ’piareersimaqqullugit’. (Matthæusi 24:44) Jiisusip mianersoqqussutaanik eqqumaffiginnittut taassuma Jehovap eqqartuussutaanik naammassinnittutut qaqugu tikiunnissaa apeqqutaatinnagu piareersimallutillu ileqqorissaartuassapput.
4 Tamatumunnga atatillugu apeqqutit pingaarutillit makku pilerput: Jiisusip mianersoqqussutaa silamiunuinnaq atuuppa, imaluunniit aamma kristumiut ilumoortut ’eqqumasariaqarpat’? Sooq eqqumanissaq pingaaruteqarpa, aamma eqqumaneq qanoq paasisariaqarpa?
Mianersoqqussut kikkunnut atuuppa?
5. Qanoq ililluta nalunngilarput ’eqqumanissamik’ mianersoqqussut kristumiunut ilumoortunut atuuttoq?
5 Naalakkap tikiunnissaa qularnanngitsumik silamiunut tillinniap tillinniarneratut tupannartigiumaarpoq. Navianartup nalliulluinnalerneranik mianersoqqussut sumiginnarpaat. (2 Petrusi 3:3-7) Kristumiummi ilumoortut? Apustili Paulusip uppeqatini ima allaffigai: „Nammineq ilisimalluarparsi [Jehovap] ullussaa nalliukkumaartoq unnuami tillinniatut.“ (1 Thessalonikamiut 5:2) Uagut qularinngilluinnarparput „[Jehovap] ullussaa nalliukkumaartoq“. Tamannali pissutigalugu eqqumanissaq pingaaruteqannginnerulinngilaq. Malugiuk Jiisusip ajoqersukkani oqaluullugit ima oqartoq: „Inuup Ernera [tikiutissaaq] nalunaaquttap-akunnerani ilimasuffiginngisassinni.“ (Matthæusi 24:44) Siusinnerusukkut Jiisusip ajoqersukkani Guutip naalagaaffia ujaqqaartuaqqullugu kajumissaaramigit ima mianersoqquai: „Ilississaaq piareersimassaasi, Inuup Ernera piffissakkut ilimaginngisassigut tikiutissammat.“ (Lukasi 12:31, 40) Erseqqilluinnarpoq Jiisusi ajoqersukkani eqqarsaatigalugit ima oqartoq: „Eqqumagitsi.“
6. Sooq eqqumanissarput pingaaruteqarpa?
6 Sooruna ’eqqumanissaq’ aamma ’piareersimanissaq’ pingaaruteqartoq? Jiisusi ima oqarpoq: „Angutit marluk narsaammiittut arlaat ilaliunneqassaaq aappaalu qimanneqassalluni. Arnat marluk aserorterivimmi ataatsimi aserorterisut arlaat ilaliunneqassaaq aappaalu qimanneqassalluni.“ (Matthæusi 24:40, 41) Silarsuaq guutiitsoq suujunnaarsinneqarpat ’piareersimasut’ ’ilaliunneqassapput’, imaluunniit annaanneqassapput. Allat ’qimanneqassapput’, imaluunniit piuneerussaassapput, namminneq soqutigisaminnik salliutitsigamik. Imaalluarsinnaavoq sallusuissummik ilikkarsimasut eqqumanngitsoorsimasulli taakkununnga ilaasut.
7. Naggatissap qaqugu nalliunnissaa nalugatsigu suup ersersinnissaanut periarfissaqarpugut?
7 Pissutsinik aaqqissuussaanitoqqap matuma qaqugorpiaq naggaserneqarnissaa ilisimannginnatsigu minguitsumik pissuteqarluta Guutimut kiffartornitta ersersinnissaanut periarfissaqarpugut. Sooq taama oqarsinnaavugut? Naggatissaq nalliunniaasaarpasissinnaavoq, tamannalu pissutigalugu kristumiut ilaat ajoraluartumik Jehovamut kiffartornerminni aallussilluarpiarunnaarsimapput. Tunniulluinnarnitsinnili Jehova kiffartorfiginiarlugu nangaassuteqarata tunniulluinnarsimavugut. Jehovamik ilisarisimannittut nalunngilaat piffissaq kingullerpaaq atorlugu aallussillualerneq Jehovap iluarinngikkaa. Taassuma inuup uummataa isigisarpaa. — 1 Samueli 16:7.
8. Jehovamut asanninneq eqqumanissamut qanoq kajumississutigaarput?
8 Jehova asagatsigu taassuma piumasaatut iliorneq nuannaarutiginerpaasarparput. (Tussiaat 40:9; Matthæusi 26:39) Aamma Jehova naassaanngitsumik kiffartorfigerusupparput. Ilimagisatsinnit sivisunerulaartumik utaqqisariaqarnerput pissutigalugu siunissamut neriuut tamanna pingaaruteqannginnerulinngilaq. Pingaarnerpaamik eqqumavugut Jehovap siunertaata naammassineqarnissaanut tunngatillugu taassuma ullussaata kinguneri qilanaarigatsigit. Ilumoorluta Guutimit iluarisaarusuppugut, taamaattumillu taassuma oqaasiani siunnersuutit maleruartarpavut Guutillu naalagaaffia inuunitsinni ujaqqaartarlutigu. (Matthæusi 6:33; 1 Johannesi 5:3) Maanna misissoriartigu eqqumanerput aalajangikkatsinnut ulluinnarnilu inuunitsinnut qanoq sunniuteqartarnersoq.
Inuunerit sumut ingerlava?
9. Silamiut ullumikkut pisartut qanoq isumaqarnerannik paasinnilernissaat sooq pingaaruteqarpa?
9 Ullumikkut inuppassuit ajornartorsiutit sualuttut pisartullu aalassannartut ulluinnarsiutaalersimanerat takusinnaavaat, immaqa aamma inuunermik ingerlaviat naammaginngilaat. Pisartulli qanoq isumaqarnerat nalunngilaat? Paasivaat ’pissutsit aaqqissuussaanerata naggatissaata’ nalaani inuusugut? (Matthæusi 24:3, NV) Nakuusernerup, namminissarsiornerup guutiitsuunerullu nalinginnaanerat ’ulluni kingullerni’ inuunitsinnut ersiutaanerat nalunngilaat? (2 Timotheusi 3:1-5) Tamakkua tamarmik qanoq isumaqarnerannik paasinnilernissaat inuunermillu ingerlaviannik eqqumaffiginninnissaat pingaaruteqarpoq.
10. Eqqumanissarput qulakkeerniarlugu qanoq iliortariaqarpugut?
10 Uagummi? Ullut tamarluinnaasa suliffitsinnut, peqqissutsitsinnut, ilaquttatsinnut Guutimullu attaveqarnitsinnut attuumassuteqartunik aalajangigassaqalertarpugut. Biibilimi qanoq allassimasoqarnersoq nalunngilarput tassanilu najoqqutassiat maleruarniartarlugit. Taamaattumik imminut ima aperisariaqarpugut: Inuunermi isumakuluutit ingerlavimmut eqqunngitsumut saassutigaakka? Silarsuarmi matumani eqqarsariaaseq inuuninni aalajangikkannut aalajangiisuutippara? (Lukasi 21:34-36; Kolossemiut 2:8) Nammineq paasisimasaqassuserput tatiginagu uummatitsigulli iluunngarluta Jehova tatigalutigu ersersittuartariaqarparput. (Ussatit 3:5) Taamaalilluta „inuunivik“ — Guutip silarsuassaani nutaami inuuneq naassaanngitsoq — aalajangiusimajuarsinnaavarput. — 1 Timotheusi 6:12, 19.
11-13. Qanoq ilinniutigisinnaavavut (a) Noap nalaani pisut? (b) Lotip nalaani pisut?
11 Eqqumanissamut iluaqutigisinnaasatsinnik Biibilimi mianersoqqussutaasunik oqaluttuarpassuaqarpoq. Noap nalaani qanoq pisoqarsimanera eqqarsaatigeriaruk. Pisussat sioqquterujussuarlugit Guutip inuit mianersoqquneqarnissaat isumagaa. Noalli taassumalu ilaqutaasa kisimik mianersoqqussut ilumooruppaat. (2 Petrusi 2:5) Tamanna pillugu Jiisusi ima oqarpoq: „Soorlu Noap ulluini ittoq, taamatuttaaq Inuup Ernerata tikiuffissaa ikkumaarpoq. Ullunimi taakkunani ulersuaq sioqqullugu nerillutik imerlutillu nuliartaarlutillu uinitsitsisarput ulloq Noap umiarsuarmut ikiffia tikillugu; aatsaallu paasisaqalerput ulersuaq nalliummat tamaasalu nungutillugit. Taamatuttaaq aamma Inuup Ernerata tikiuffissaani ikkumaarpoq.“ (Matthæusi 24:37-39) Tamanna qanoq ilinniutigisinnaavarput? Arlarput ulluinnarni isumakuluutit — ulluinnarni sammisartakkavut allaat — pissutigalugit anersaakkut sammisassanik Guutip pingaarnerpaateqqullugit uagutsinnut kajumissaarutigisaanik pingaarnerpaatitsiunnaaruni, taava qanoq inuunerluni eqqarsaatigeqqissaartariaqalissavaa. — Romamiut 14:17.
12 Aamma Lotip nalaani qanoq pisoqarsimanersoq eqqarsaatigeriaruk. Illoqarfik Sodoma, Lotip taassumalu ilaqutaasa najugarisimasaat, pigissaarfiusimavoq ileqqorluffioqalunili. Jehovap inngilini aallartippai illoqarfik taanna suujunnaarseqqullugu. Inngilit Loti taassumalu ilaqutai Sodomamit qimaaqqullugit ilungersorlutik kajumissaarpaat kingumullu qiviaqqunagit. Inngilinit kajumissisitaallutik illoqarfik qimappaat. Lotilli nuliata Sodomami angerlarsimaffini eqqarsaatigiunnaarneq ajulersimagunarpaa. Naalanngilluni tunummut qiviarpoq, taamaattumillu toqulluni. (1 Mosesi 19:15-26) Jiisusi pisussat pillugit ima mianersoqqusivoq: „Lotip nulia eqqaamasiuk!“ Taamatut mianersoqquneqarnerput naapertorlugu iliuuseqarpugut? — Lukasi 17:32.
13 Itsaq mianersoqqussutinik Guutimeersunik eqqumaffiginnittut aniguipput. Noamut taassumalu ilaqutaanut aamma Lotimut taassumalu paniinut taamaappoq. (2 Petrusi 2:9) Oqaluttuatigut taakkunuunatigut mianersoqquneqarnerput iliuuseqarfigiitigalugu oqaluttuani taakkunani naapertuilluarnermik nuannarisaqartunut annaanneqarnissamik tusarliussaq nuannaarutigaarput. Guutip „qilaat nutaat nunalu nutaaq naapertuilluassuseqarfiusut“ pillugit neriorsuutiminik eqquutitsiumaarnera qularinngilluinnarlutigulu qilanaareqaarput. — 2 Petrusi 3:13, NV.
’Eqqartuussiffik aallartereerpoq’
14, 15. (a) ’Eqqartuussiffimmi’ susoqassava? (b) ’Guutimik mianerinninneq taassuminngalu naalannartitsineq’ qanoq paasisariaqarpa?
14 Aamma susoqarnissaa ilimagisinnaavarput? Saqqummersitat-ni eqqaaneqarput pisussat tulleriiaat Guutip siunertaata piviusunngortinneqarneranut atatillugu pisussat. Piareersimanerput ersersissagutsigu tassani allassimasut naapertorlugit iliuuseqarnissarput pingaaruteqarpoq. ’Naalakkap ulluani’, 1914-imi Kristusip qilammi kunnginngortinneqarmat aallartittumi, pisussat takorlooruminartumik siulittuummi allaatigineqarput. (Saqqummersitat 1:10) Saqqummersitani inngili ’nutaarsiassamik nuannersumik atajuartussamik’ oqaluussissutiginnittussanngortitaasoq uparuunneqarpoq. Inngili nipitoqisumik ima oqarpoq: „Guuti mianerisiuk taannalu naalannartissiuk, eqqartuussiffia aallartereermat.“ (Saqqummersitat 14:6, 7, NV) Eqqartuussiffik taanna piffissaavoq sivikitsoq; piffissami tamatumani eqqartuussutit siulittuummi eqqartorneqartut nalunaarutigineqarlutillu naammassineqarumaarput. Maanna piffissami tamatumani inuuvugut.
15 Maanna, eqqartuussiffik taanna naammassitinnagu, ima kajumissaarneqarpugut: „Guuti mianerisiuk taannalu naalannartissiuk.“ Taamaaliorneq qanoq paasisariaqarpa? Guutimik mianerinnivinneq kajumississutigalugu ajortut suulluunniit alassavavut. (Ussatit 8:13) Guutimik mianerinnittuugutta taanna ataqqingaarlugu tusarnaartassavarput. Aalajangersimasumik taassuma oqaasiani, Biibilimi, atuartarnissamut ulapippallaarnavianngilagut. Ataatsimiigiartarnissamut siunnersuummik malinninnissaq pingaaruteqarpianngitsutut isiginavianngilarput. (Hebræerit 10:24, 25) Guutip naalagaaffia Missiarsikkoortoq pillugu nutaarsiassamik nuannersumik aallussilluarluni oqaluussissutiginninnerup immikkut pisinnaatitaaffiunera pingaartissavarput. Jehova tamatigut uummatikkullu iluunngarluta tatigissavarput. (Tussiaat 62:9) Nalunnginnatsigu Jehova qilammi nunamilu kisimi oqartussaalluni Naalagaasoq taanna ataqqivarput inuunitsinni oqartussaasumut qutsinnerpaamut taassumunnga kajumilluta naalatsigitilluta. Illit taakkuninnga tamanik iliuuseqarnikkut Guuti mianeralugulu naalannartippiuk?
16. Sooq oqarsinnaavugut Babylonersuarmut eqqartuussut Saqqummersitat 14:8-mi eqqaaneqartoq naammassineqareersoq?
16 Saqqummersitat kapitali 14-imi eqqartuussiffimmi pisussat allat nangilluni allaaserineqarput. Siullermik Babylonersuup, eqqunngitsumik upperisarsiornerup silarsuarmi tamarmi naalagaaffissuata, qanoq pineqarumaarnera ima eqqaaneqarpoq: „Inngilip allap malippaa oqarlunilu: Uppikaavoq, uppikaavoq Babylonersuaq.“ (Saqqummersitat 14:8) Aap, Guutip isaani Babylonersuaq uppereerpoq. 1919-imi Jehovap kiffai tanitat ajoqersuutinut ileqqunullu Babylonimit aallaaveqartunut, inuiannut inuiaqatigiinnullu ukiuni tusindilinni sunniuteqangaarsimasunut, inussiaajunnaarsinneqarput. (Saqqummersitat 17:1, 15) Taamanimiilli pallorfiginninnermik ilumoortumik siuarsaaneq aallulluarsinnaalerpaat. Tamatuma kingorna Guutip naalagaaffia pillugu nutaarsiassaq nuannersoq silarsuaq tamakkerlugu oqaluussissutigineqarpoq. — Matthæusi 24:14.
17. Babylonersuarmit anissagutta qanoq iliortariaqarpugut?
17 Guutilli Babylonersuarmut eqqartuussutaa taannaannaanngilaq. Inaarutaasumik piuneerunneqarnissaa qanillivoq. (Saqqummersitat 18:21) Biibilimi inuit tamarmik ima eqqortumik mianersoqquneqarput: „[Babylonersuaq] qimallugu anigitsi . . . ajortuliornerini peqataaqqunasi.“ (Saqqummersitat 18:4, 5) Qanoq ililluni Babylonersuarmit anisoqarsinnaava? Upperisarsiornermut eqqunngitsumut attaveqarunnaarneq naammanngilaq. Babylonersuup sunniinera ileqqorpassuartigut nalliuttorpassuartigullu nuannarineqartutigut, silarsuarmi kinguaassiuutitigut atoqatigiinnermut maleruutiavallaartumik isiginnittaaseqartoqarneratigut, aliikkutassiatigut anersaarsiortorpalaartortaqartutigut allarpassuartigullu sunniuteqartarpoq. Eqqumassagutta iliuutsitsigut uummatikkullu iluunngarluta Babylonersuarmit immikkoornitsinnik ersersitsinissarput pingaaruteqarpoq.
18. Kristumiut eqqumasut Saqqummersitat 14:9, 10-mi allassimasoq eqqarsaatigalugu sunaveersaarpat?
18 Eqqartuussiffissaq pillugu Saqqummersitat 14:9, 10-mi suli allamik paasisaqarpugut. Inngilit pingajuat ima oqarpoq: „Nersummik taassumalu assinganik pallorfiginnittup kialuunniit qaamigut assammigulluunniit nalunaaqutsersimasup imissavaattaaq Guutip uumitsannerata viinnia.“ Sooq? ’Nersut taassumalu assinga’ inuit naalakkersuinerannut assersuutaammata, naalakkersuisullu taakkua Jehovap kisimi oqartussaanera akuerinngilaat. Kristumiut eqqumasut isiginnittaatsiminnut iliuutsiminullu tunngatillugu sunnertinnaveersaarput imaluunniit ’nalunaaqutserneqarnaveersaarput’ Guutip ilumoortup kisimi oqartussaaneranik akuerinnikkumanngitsunut inussiaataalerumanatik. Kristumiut nalunngilaat Guutip naalagaaffia qilammi pilersinneqareersoq naalagaaffiullu tamatuma naalakkersuisut inuit pilersitaat suujunnaarsissagai namminerlu naassaanngitsumik atassasoq. — Danieli 2:44.
Piffissap nukinginnassusia sianigiunnaassanngilarput!
19, 20. (a) Ullut kingulliit naggatissaat qanilliartortillutigu Saatanip qanoq iliorumaarnera qularinngissinnaavarput? (b) Suna aalajangiusimasariaqarparput?
19 Ullut kingulliit naggatissaat qanilliartortillutigu tatisineq ussernartullu ingasatsikkaluttuinnassapput. Silarsuatoqqami matumani inuujuartilluta namminerlu naammalluinnanngissuserput akiortuartillugu peqqiilliornermit, utoqqalinermit, toqumit, Guutip oqaasianik oqaluussissutiginninnitsinni soqutigisaqannginnermik pakatsissuteqarnermit allarpassuarnillu sunnerneqartarpugut. Puiunngisaannartariaqarparput Saatanip tunniutiinnartinniarluta tatineqarnerput atornerlunniarsuataaraa nutaarsiassamik nuannersumik oqaluussissutiginnikkunnaarniassagatta Guutilluunniit najoqqutassiai malillugit inuujunnaarniassagatta. (Efesosimiut 6:11-13) Piffissap inuuffigisatta nukinginnassusiata sianigiunnaarnissaanut maannakkut piffissaanngilaq!
20 Jiisusip nalunngilaa tunniutiinnassutigisinnaasatsinnik tatineqangaarumaartugut, taamaammat ima kajumissaarpaatigut: „Taamaattumik eqqumagitsi, naluarsimi ulloq Naalakkassi tikiuffissaa.“ (Matthæusi 24:42) Taamaammat piffissap qanoq ilinerani inuunerluta eqqumaffigiuartigu. Saatanip qoqassiiniutai unikaallassutigisinnaasavut Guutimulluunniit kiffartorunnaassutigisinnaasavut mianersorfigitigik. Aallussilluarnerujartuinnarluta aalajangiusimanninnerujartuinnarlutalu Guutip naalagaaffia pillugu nutaarsiassaq nuannersoq oqaluussissutigisigu. Pingaarnerpaamillu piffissap nukinginnassusia misigiuartigu Jiisusip mianersoqqussutaa una malillugu: „Eqqumagitsi.“ Taamaaliornikkut Jehova ataqqisarparput, taassumalu pilluaqqussutaanik naassaanngitsumik nuannaarutiginnittussanut ilaassaagut.
Qanoq akissavit?
• Qanoq ililluta nalunngilarput Jiisusip eqqumaqqusinera kristumiunut ilumoortunut atuuttoq?
• Oqaluttuat mianersoqqussutaasut Biibilimiittut suut eqqumanissamut iluaqutigisinnaavavut?
• Eqqartuussiffik suua, eqqartuussiffillu naammassitinnagu qanoq iliornissamut kajumissaarneqarpugut?
[Atuaqqissaarnermi apeqqutit]
[Qupp. 11-mi assiliartaq]
Jiisusip tikiunnissani tillinniap periaasianut assersuuppaa
[Qupp. 12-mi assiliartaq]
Babylonersuup piuneerunneqarnissaa qanillivoq
[Qupp. 13-mi assiliartat]
Aallussilluarnerujartuinnarluta aalajangiusimanninnerujartuinnarlutalu nutaarsiassaq nuannersoq oqaluussissutigisigu