Ilumoorfiginninneq iluaqutaava?
Ilumoorfiginninneq iluaqutaava?
„NAPPARSIMALERSINNAANERMUT sillimmasiissummut akiliivallaartarputit,“ Karl sillimmasiisarfimmi atorfilik oqarpoq. * „Sillimmasiissutitit uagutsinnut nuukkukkit qaammammut 100 koruunit sinnerlugit sipaassavatit, aningaasarpaaluupput.“
„Taamaassinnaavoq,“ Jens akivoq. „Sillimmasiisarfimmili tassani ukiorpassuarni sillimmasiisarpunga. Tassani sulisut ikiuiumatoorujussuupput, taakkununngalu ilumoorfiginnikkusuppunga.“
„Ilumoorfiginninneq pissusiuvoq ajunngitsoq,“ Karl akivoq. „Ilumoorfiginninnerilli akisunaarpat!“
Karl ilumoorpoq. Arlaannut ilumoorfiginninneq, imaluunniit aalajaanneq, aningaasanik naleqarajuppoq. * Ilumoorfiginninniaraanni aamma piffissamik nukinnillu atuisariaqarpoq pisussaaffeqalernissamullu piumassuseqartariaqarluni. Ilumoorfiginninneq iluaqutaasinnaava?
Ilumoorfiginninneq pingaartinneqaraluarluni qaqutiguinnaq pissuserineqartarpoq
Tysklandimi Allensbach-institutimit isumasiuisitsinerup takutippaa apersorneqartut 96 procentiisa aalajaatsumik pissuseqarneq kissaatiginartutut isigigaat. Institutimit tassannga isumasiuinermi allami 18-init 24-nik ukiullit apersorneqarput, misissuinerullu takutippaa apersorneqartut pingasuugaangata marluk isumaqartut ilumoorfiginninneq nuannaartunartuusoq pingaaruteqartuusorlu.
Ilumoorfiginninneq, imaluunniit aalajaanneq, inuppassuarnit pingaartinneqaraluarluni allaanerulluinnarpoq ilumoorfiginninnermik aalajaannermilluunniit pissuseqarneq. Assersuutigalugu Europami nunani amerlasuuni aappariit ilaqutariilluunniit ilumoorfigeqatigiippallaanngillat. Ikinngutigiit ilumoorfigeqatigiittuaannanngillat. Sulisitsisut sulisullu niuertulluunniit niuerniallu akunnerminni ilumoorfigeqatigiinnerat qangatut ikkunnaarsimavoq. Sooq?
Ulluinnarni ulapinneq pissutigalugu ilaanni ilumoorfiginninnissamut piffissaqarpallaarneq nukissaqarpallaarnerlu ajorpugut. Inuit pakatsisimasut qanigisaminnilluunniit sumiginnagaasutut misigisimasut, immaqa kimulluunniit aalajaannissaminnut tunuarsimaalertarput. Allat sivikitsumik aappaqartarneq ilumoorfiginninnertaqanngitsoq immaqa inooriaasererusunnerusarpaat.
Taamatut isiginnittaaseqarnermut sunaluunniit pissutaagaluarpat inuppassuit ilumoorfiginninneq pingaartingaarpaat, pissuseriuaannarnaguli. Taamaattumik ima aperisoqarsinnaavoq: Ilumoorfiginninneq iluaqutaava? Taamaappat, kina ilumoorfigisariaqarparput, qanorlu? Sooq ilumoorfiginnissaagut?
[Quppernerup ataani ilanngussaq]
^ imm. 2 Allaaserisami uani tullianilu atit ilaat allanngortitaapput.
^ imm. 5 „Ilumoorfiginninneq“ aamma „aalajaanneq“ assigiimmik atorneqartuaannanngimmata, allaaserisani ukunani oqaatsit nikittaallugit atorneqarput.
[Qupp. 3-mi issuagaq]
Ilumoorfiginninneq pingaartinneqaraluarluni qaqutiguinnaq pissuserineqartarpoq