Maniguunneq ilumoortoq ineriartortiguk
Maniguunneq ilumoortoq ineriartortiguk
„Ikiortariallit annaffissittarpatit makitasaarnialli nikanarsisittarlugit.“ — 2 SAMUELI 22:28.
1, 2. Silarsuarmi naalakkat ilarpassuisa suna ilisarnaatigaat?
EGYPTENIMI pyramidet itsaq nunami tamatumani naalagaasimasunut eqqaassutissiaapput. Naalakkat allat oqaluttuarisaanermut sunniuteqangaarsimasut tassaapput Assyriamiut kunngiat Sankeribi, grækerit kunngiat Alexanderersuaq aamma Romamiut kaasariat Julius Cæsar. Taakkua tamarmik pissuseq aalajangersimasoq amigaatigaat: maniguunneq ilumoortoq. — Matthæusi 20:25, 26.
2 Takorloorsinnaavarput angutit taakkua ilaata innuttani tuppallersarneqartariaqartunik maniguuttortaqarnersut paasiniarlugu naalagaaffini tamaat ujarlerfigisaraa? Soorunami naamik! Takorloorsinnaanngilarputtaaq taakkua inoqatitik nikallungasut illunnguanni pulaartaraat qiimmassarniarlugit. Taakkua annikilliortunut isiginnittaasiat qilammi nunamilu kisimi oqartussaalluni Naalagaasup, Jehova Guutip, annikilliortunut isiginnittaasianit allaanerulluinnarpoq.
Maniguunneq eqqarsaatigalugu maligassiuilluarnerpaaq
3. Kisimi oqartussaalluni Naalagaasup nunarsuarmi innuttani qanoq pisarpai?
3 Jehovap angingaassusia qutsinnerussaarneralu killisissaanngillat, taamaattorli taassuma „nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit“. (2 Nalunaarsuutit 16:9) Pallorfiginnittut maniguuttut misilinneqarnerit assigiinngitsut pissutigalugit sequmissimasutut misigisut takugaangamigit Jehova qanoq iliortarpa? Anersaani illernartoq aqqutigalugu taakkunani ’ineqarporlusooq’, „inuummarissarumallugu anersaakkut nikallortoq inuummarissarumallugulu uummatimigut neriuutaaruttoq“. (Esaja 57:15) Taassuma ikiuinera iluaqutigalugu pallorfiginnittaasa inuummarissisimasut kiffartornertik nuannaarlutik ingerlateqqissinnaavaat. Jehovap maniguutingaassusia!
4, 5. (a) Tussiaasiortup Guutip naalakkersueriaasia qanoq isumaqarfigaa? (b) Guutip „nikanartoq“ ikiorniarlugu imminut ’atsissisinnera’ qanoq paasisariaqarpa?
4 Inunnik ajortiliusunik ikiuiniarluni Naalakkatut kisimi oqartussaasutut, Jehovatut, qilammi nunamiluunniit maniguutsigisimasoqanngisaannarpoq. Tussiaasiortoq ima allassinnaasimavoq: „Inuiaat tamarmik qulaanni [Jehova] qutsippoq, qilammit qutsinneruvoq naalannassusia. Kina ippa [Jehovatut] Guutitsitut qilammi nunamilu, pavanersuaq issialluni samungarsuarli isigaluni [Kia assigaa [Jehova] Guuterput, qutsissisittoq issiaffimmini, atsissisittoq takuniaanermini qilammilu nunamilu, 1900/1961]? Makitippai nikanartoq pujualannit, piitsorlu sanikunit.“ — Tussiaat 113:4-7.
5 Malugiuk oqaaseq ’atsissisittoq’. Atsissisinneq isumaqarsinnaavoq namminermit appasinnerusumik inissisimaffilimmik peqateqaraanni nammineq inissisimaffimmik ataqqinassusermilluunniit pingaartitsinnginneq. Taamaattumik Tussiaat 113:6-imi allassimasoq Guutip inuit sammigaangamigit maniguulluni nammineq inissisimaffimminik ataqqissuserminillu pingaartitsinani taamaaliortarneratut paasisariaqarpoq. Guuterput maniguuttoq asannilluni maani nunarsuarmi pallorfiginnitsiminik naammalluinnanngitsunik soqutiginnittoq takorlooruminartumik taamatut allaatigineqarpoq. — 2 Samueli 22:36.
Sooq Jiisusi maniguuttoq
6. Jehovap maniguunnerminut ersiutaasoq pingaarnerpaaq suna iliuuserisimavaa?
6 Guutip maniguunneranut asanninneranullu ersiutaasoq pingaarnerpaaq tassaavoq angajulliliaminik asasaminik aallartitsinera, taanna nunarsuarmi inunngorniassammat, inuttut alliartorniassammat inuiannillu annaassisunngorniassammat. (Johannesi 3:16) Jiisusip Ataatani qilammiusoq pillugu sallusuissut oqaluussissutigaa, tamatumalu kingorna ’silarsuup ajortaa’ peerniarlugu inuttut naammalluinnartutut inuunini tunniuppaa. (Johannesi 1:29; 18:37) Jiisusip Ataatani Jehova assigilluinnarpaa, ilaatigut maniguunnermigut, taamaattumillu Guutip imminut iliuusereqqusai tamaasa kajumilluni iliuuserisarpai. Taamaammat taanna Guutip pinngortitaanit allanit tamanit maniguunneq asanninnerlu eqqarsaatigalugu maligassiuilluarnerpaavoq. Inuilli tamakkeratik Jiisusi maniguunnera pillugu ataqqivaat. Taassumunnga akeraasut taanna ’inuit nikanarnersaattut’ allaat isigaat. (Danieli 4:14) Paulusip uppeqatimi imminnut maniguuffigeqatigiinnermikkut Jiisusimik ilaarsinissaat qanoq pingaaruteqartigisoq nalunngilaa. — 1 Korinthimiut 11:1; Filippimiut 2:3, 4.
7, 8. (a) Jiisusip maniguunneq qanoq ilinniarpaa? (b) Jiisusip imminut ajoqersuganngorusussinnaasut qanoq kajumissaarsinnaasimavai?
7 Paulusip Jiisusip maligassiuilluarnera ima erseqqissarpaa: „Ilasi allat pillugit isumaliortaritsi Kristusi-Jiisusimiittutut. Taassuma Guutisut isikkoqartup ujajakkatut naatsorsuutinngilaa Guutip naliginera; iperarpaali kiffap isikkua atillugu inuillu assigilerlugit; saqqummerami inuttut nikanartippoq naalalluni toqumut, sanningasulimmi [nappakkami anniartitaaffimmi, NV] toqumut allaat.“ — Filippimiut 2:5-8.
8 Inuit ilaat immaqa ima aperiumassapput: ’Jiisusip maniguunneq qanoq ilinniarpaa?’ Tamanna ilinniarpaa ukiorparpassuarni amerlassusii ilisimaneqanngitsuni, suullu tamarmik pinngortinneqarmata Guutip ’suliortuatut’ kiffartornermini, Ataataminut qilammiusumut qanittumik attaveqarnermigut. (Ussatit 8:30, 1900/1961) Edenimi pikitsitsinerup kingorna Guutip angajulliliaata Ataatami inunnut ajortuliortunut maniguulluni iliorfiginninnera takuaa. Taamaattumik Jiisusip Ataatami maniguunnera ilaarpaa inuillu ima kajumissaarsinnaasimallugit: „Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut.“ — Matthæusi 11:29; Johannesi 14:9.
9. (a) Meeqqat pissuserisartagaat suut Jiisusip nuannarai? (b) Meeraaraq iluaqutigalugu Jiisusip ajoqersukkani sumik ilinniartippai?
9 Jiisusi ilumoorluni maniguummat meeraaqqat taanna ersiginngilaat. Paarlattuanik kajungerfigaat. Jiisusip meeqqat nuannarai sammisarlugillu. (Markusi 10:13-16) Meeqqat pissuserisartagaat suut Jiisusip nuannarai? Tassaapput pissutsit kissaatiginartut taassuma ajoqersugaasa inersimasut pissuseriuaannanngisaat. Ilisimaneqarluarpoq meeraaqqat inersimasut qummut isigisaraat, tamannalu ilaatigut ersersittarpaat inersimasut apereqattaartuarnerisigut. Aap, meeqqat inersimasunut naleqqiullugit ilinniarusussuseqarnerusarlutillu pingaarniaqqajaannginnerusarput. Ilaanni Jiisusip meeraaraq maluginiaqqullugu ajoqersukkani ima oqarfigai: „Kingumut meerannguatut ilinngikkussi Qilaap Naalagaaffianut isissanngilluinnarpusi.“ Imalu nangippoq: „Imminut nikanartittoq meeqqatullu uumatut ilisoq taanna Qilaap Naalagaaffiani annerpaavoq.“ (Matthæusi 18:3, 4) Jiisusi ima najoqqutassiorpoq: „Akitsiniartoq nikanarsisitaassaaq nikanartittorlu akitsisitaassalluni.“ — Lukasi 14:11; 18:14; Matthæusi 23:12.
10. Apeqqutit suut sammissavavut?
10 Jiisusip taamatut oqarnera pingaarutilinnik apeqqutissaqalersitsivoq. Nalunngilarput ilumoorluni maniguunneq naassaanngitsumik inuusinnaalernissatsinnut piumasaqaatinut ilaasoq, taamaakkaluartoq sooq kristumiut ilaannikkut maniguunnissartik artornartittarpaat? Misilinneqaraangatta sooq ilaannikkut pingaarniannginnissarput maniguunnissarpullu ilungersuutigisariaqartarparput? Aamma qanoq ililluta maniguunneq ilumoortoq ineriartortissinnaavarput? — Jaaku 4:6, 10.
Sooq maniguunnissaq imaannaanngitsoq
11. Sooq tupinnanngila maniguunniarluta ilungersortariaqartugut?
11 Paasisimagukku maniguunniarlutit ilungersortariaqarlutit, kisimiinngilatit. Maniguunnerup pingaaruteqassusianik siunnersuut Biibilimiittoq 1920-mi atuagassiami matumani ima allaatigineqarpoq: „Tassa paasivarput Naalakkap maniguunneq qanoq pingaartitsigigaa, ajoqersukkallu ilumoortut tamarmik tamanna ullut tamaasa pissutsimik tamatuminnga ineriartortitsinissamut kajumississutigisariaqarpaat.“ Ilumoorluni allaaserinninneq ima nangippoq: „Naak Biibilimi taamatut oqaaqqissaaruterpassuaqaraluartoq inuit inunnguutsiminnik ima naammalluinnanngitsigigunarput Naalakkamut kiffanngortut taassumalu aqqutaasigut ingerlaniarlutik aalajangertut, maniguunnermut tunngatillugu allanit tamanit ajornartorsiuteqarnerusarunarlutillu akiugassaqarnerusarunarlutik.“ Tassani kristumiut ilumoortut maniguunniarlutik ilungersortariaqarnerannut pissutaasut ilaat una erseqqissarneqarpoq: Inunnguuserisatsinnik ajortiliugatta naleqqutinngitsumik ataqqineqarusuttarpugut. Taamaappugut aappariit ajortiliusut, Adami Evalu, namminissarsiornermut nakkaannarsimasut, siuaasarigatsigik. — Romamiut 5:12.
12, 13. (a) Silarsuaq kristumiutut maniguunnermut qanoq akornutaasarpa? (b) Kia maniguunnermik ersersitsiniarnerput imaannaannginnerulersippaa?
12 Maniguunnissap imaannaanngitsuusinnaaneranut pissutaasoq alla tassaavoq silarsuarmi allanit angusaqarneruniarnissamut kaammattuiffiusumi inuugatta. Kajungerisanik ajortunik iliuuseqarniartarneq — ’uinngup pilerigisaanik isillu pilerigisaannik’ naammassinninniartarneq — „nunallu piinik usorsisimaaruteqarneq“ nalinginnaavoq. (1 Johannesi 2:16) Jiisusip ajoqersugaasa silarsuarmiut pilerigisaat tamakku nakkaannarfigisussaanngilaat, tappissumilli iseqartuartariaqarput Guutillu piumasaatut iliornissaq pingaarnerutittariaqarlugu. — Matthæusi 6:22-24, 31-33; 1 Johannesi 2:17.
13 Maniguunnermik ineriartortitsinerup maniguunnermillu ersersitsinerup imaannaanngitsuunerannut pissutaasut pingajuat tassaavoq makitanerup pilerfia, Saatani Diaavulu, silarsuup matuma naalagarimmagu. (2 Korinthimiut 4:4; 1 Timotheusi 3:6) Saatanip pinngortitat allat immisut ajortunngortinniarsarisarpai. Assersuutigalugu taassuma „silarsuarmi naalagaaffiit tamaasa taakkualu alutornassusiat“ Jiisusimut neqeroorutigalugit taanna imminik pallorfiginnitseriaraluarpaa. Jiisusilli maniguuttuartuusup Diaavulup neqeroorutaa itigartilluinnarpaa. (Matthæusi 4:8, 10) Saatanip aamma kristumiut usserniartarpai nammineq ataqqineqarusulersinniarlugit. Kristumiulli maniguuttut Jiisusi ilaarniartarpaat nersornaat ataqqinaallu tamaat Guutimut tutsittarlugu. — Markusi 10:17, 18.
Maniguunneq ilumoortoq qanoq ililluta ineriartortillugulu ersersissinnaagipput
14. ’Nikanarniartuusaarneq’ qanoq paasisariaqarpa?
14 Paulusi Kolossemiunut allakkamini allanut iluareqqusaarluni maniguuttuusaarnissamut mianersoqqusivoq. ’Nikanarniartuusaarnermik’ taavaa. Inuk maniguuttuusaartoq anersaakkut ittunik pingaartitsilluinnanngilaq, ’imminulli angisuutinniartuunerminik’ qulaarisarpoq. (Kolossemiut 2:18, 23) Jiisusip maniguuttuusaartut qulaartarpai. Farisæerit avoqqaarai malugeqqusaarlutik qinusarmata aamma taaqqunganermikkut kiinnamikkullu iisinnginniarnertik malugitinniartaramikku. Uagulli maniguulluta qinusariaqarpugut nammineq qinnutivut Guutip isaani naleqassappata. — Matthæusi 6:5, 6, 16.
15. (a) Maniguuttuarniarluta qanoq iliorsinnaavugut? (b) Maniguunneq eqqarsaatigalugu maligassiuilluartunik eqqaasaqarit.
15 Kristumiutut maniguunnerput nakussatsissinnaavarput tamatumani maligassiuilluarnerpaat, Jehova Guuti Jiisusi Kristusilu, eqqarsaatigisarlugit. Taamaaliortarsinnaavugut aalajangersimasumik Biibilimik atuagassianillu ’kiffap ilumoortup silatuullu’ Biibilimik paasinninnissamut iluaqutissatut pilersitaanik atuartarnitsigut. (Matthæusi 24:45) Tamanna ingammik nakkutilliisunut pingaaruteqarpoq taakkua ’makitasaarlutik nunaqqatitik anneruniarfiginnginniassammatigit’. (5 Mosesi 17:19, 20; 1 Petrusi 5:1-3) Arnarpassuit Biibilimi eqqaaneqartut maniguunnertik pillugu pilluaqquneqartut, soorlu Ruthi, Hanna, Elisabethi allarpassuillu pillugit oqaluttuanik eqqarsaatiginneqqissaarnerput iluaqutigissavarput. (Ruthi 1:16, 17; 1 Samueli 1:11, 20; Lukasi 1:41-43) Aamma eqqarsaatigikkit angutit nuimagaluarlutik Jehovamut kiffartornerminni maniguuttuartut — angutit maligassiuilluartut soorlu Daavi, Josija, Johannesi Kuisisoq Paulusilu. (2 Nalunaarsuutit 34:1, 2, 19, 26-28; Tussiaat 131:1; Johannesi 1:26, 27; 3:26-30; Apustilit Suliaat 21:20-26; 1 Korinthimiut 15:9) Aamma uagut nammineq kristumiorpassuarnik maniguunneq eqqarsaatigalugu maligassiuilluartunik ilisarisimasaqarpugut, ilaa? Maligassiuilluartunik taakkuninnga eqqarsaatiginneqqissaartarutta ’immitsinnut qanilaarfigeqatigiinnissarput’, imaluunniit maniguuffigeqatigiinnissarput, ajornannginnerutissavarput. — 1 Petrusi 5:5.
16. Kristumiutut oqaluussineq maniguunnissamut qanoq iluaqutigaarput?
16 Aamma aalajangersimasumik oqaluusseqataasarneq maniguunnissamut iluaqutigisinnaavarput. Maniguunneq iluaqutigingaartarparput inuit nalusavut Guutip naalagaaffianik tusarliussamik oqaluussiffiginiarlugit angerlarsimaffianni allamiluunniit saaffigigaangatsigit. Ingammik iluaqutigisarparput inuit soqutiginninngikkaangata sorraakkaangataluunniit. Upperisarput apeqquserneqakulavoq, maniguunnerlu iluaqutigisinnaavarput apeqqutigineqartunik ’saamalluta ataqqinnilluinnarlutalu’ akisinissatsinnut. (1 Petrusi 3:15, NV) Jehovamut kiffaasut maniguuttut ilaat oqaluussiffigisartakkanut allanut nuussimapput tassanilu inuit allamik tunuliaqutallit pissakinnerusullu oqaluussiffigisarlugit. Oqaluussisartut taakku amerlanertigut allamiut oqaasiinik ilinniarniarlutik maniguullutik ilungersortariaqarsimapput inunnut najugarilikkaminniittunut nutaarsiassaq nuannersoq oqaluussissutigilluarnerusinnaajumallugu. Tamanna nersornaqaaq! — Matthæusi 28:19, 20.
17. Pisussaaffiit suut isumagitillugit kristumiut maniguuttariaqarpat?
17 Kristumiorpassuit pisussaaffimminnik isumaginninnerminnut atatillugu, ilaatigut allat soqutigisaannik namminneq soqutigisaminnit pingaarnerutitsinermikkut maniguunnermik ersersitsinertik iluaqutigisimavaat. Assersuutigalugu ataataasoq kristumiu sulinngiffimmini meeqqami Biibilimik pissarsiaqarnartumik atuaqqissaaqatiginissaannut piareersarniarluni aamma taakkuninnga Biibilimik pissarsiaqarnartumik atuaqqissaaqateqarniarluni maniguuttariaqarpoq. Aamma meeqqat maniguunneq angajoqqaamik naammalluinnanngitsut ataqqinissaannut naalannissaannullu iluaqutigisarpaat. (Efesosimiut 6:1-4) Nuliaasut allamik upperisalinnik ueqartut ilarpassui pisuni assigiinngitsuni maniguuttariaqartarput ’mianerinnillutik inuunermikkut minguitsukkut’ uitik ilataariniarlugit. (1 Petrusi 3:1, 2) Angajoqqaavut napparsimasut utoqqalisimasullu isumagigaangatsigik maniguunneq imminullu pilliutigeriaannaalluni asanninneq aamma pingaaruteqartorujussuusarput. — 1 Timotheusi 5:4.
Maniguunneq ajornartorsiutinut aaqqiissutaasarpoq
18. Ajornartorsiutinik aaqqiiniarnitsinni maniguunneq qanoq iluaqutigisinnaavarput?
18 Guutip kiffai nunarsuarmiittut tamarmik naammalluinnanngitsuupput. (Jaaku 3:2) Ilaannikkut kristumiut marluk isumaqatigiinngissuteqalertarlutilluunniit paatsooqatigiittarput. Taakkua arlaat immaqa assuarliutissaqarluarpoq. Amerlanertigulli aaqqiagiinngittoqarunnaarsinnaavoq siunnersuut una maleruarneqarpat: „Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi.“ (Kolossemiut 3:13) Siunnersuut tamanna maleruaruminaakkaluarpoq, maniguukkuttali maleruassavarput.
19. Ajuallatsitsiserput oqaloqatiginialerutsigu suna eqqaamasariaqarparput?
19 Imaassinnaavorli kristumiu misigisoq assuarliutissani ima sualutsigisoq puiuinnarsinnaanagu. Maniguukkunili nammineq isumani naapertorlugu namminerminut ajortumik pinnittoq eqqisseqatigeqqinniarlugu saaffigissavaa. (Matthæusi 18:15) Kristumiut marluk aaqqiagiinngissutiminnik aaqqiisinnaanngikkaangata, taakkua arlaata imaluunniit tamarmik kukkunermik nassuerutiginissaanut pingaarniarpallaarnerat imaluunniit aappaata imminut iluartuutilluni isornartorsiuerpalullunilu aapparminut saaffiginninnera pissutaagajuttarpoq. Kristumiut isumaqatigiileqqissappata maniguunneq ilumoortoq iluaqutaasorujussuussaaq.
20, 21. Ingammik suut maniguunnissamut iluaqutigisinnaavavut?
20 Maniguunneq ineriartortissinnaavarput aatsaat Guuti qinnuigigutsigu ikioqqulluta anersaaminillu tuneqqulluta. Eqqaamajuk ’Guutip maniguuttut ajunngissusermik pisassarinngisaraluamik tunisarai’, ilaatigut anersaamik illernartumik tuninerisigut. (Jaaku 4:6, NV) Uppeqativit ilaat isumaqatigiinngissuteqarfigigukku, taava Jehova qinnuigiuk maniguullutit nammineq kukkussutinnik suugaluartunilluunniit nassuerutiginninnissannut ikioqqullutit. Ajuallatsinneqarsimaguit ajuallatsitsisorlu ilumoorluni utoqqatserpat, taava maniguullutit isumakkeerfigiuk. Tamanna artornartikkukku, taava Jehova qamannga pisumik qinnuigiuk uummatinnik makitassuseqarunnaarsitsinissannut ikioqqullutit.
21 Maniguunnerup qanoq iluaqutaatigineranik paasinninnerput pissutsip erlinnartup tamatuma ineriartortinnissaanut maniguuttuarnissamullu kajumississutigisariaqarparput. Maniguunnermik ineriartortitsisinnaallutalu maniguuttuarsinnaavugut Jehovap Jiisusillu maligassiaannik nuanningaartunik malinninnitsigut. Guutip neriorsuutaa una puigunngisaannaruk: „Qanilaarnerup [Maniguunnerup, NV] Guutimillu mianerinninnerup akissarsiarititaat tassaapput pisuussutit ataqqinaallu inuunerlu.“ — Ussatit 22:4. (wE 10/15 05)
Eqqarsaatigisassat
• Maniguunneq eqqarsaatigalugu maligassiuilluarnerpaat kikkuuppat?
• Sooq maniguunnermik ineriartortitsinissaq imaannaanngila?
• Maniguunnissamut suut iluaqutigisinnaavavut?
• Sooq maniguuttuarnissaq taama pingaaruteqartigaa?
[Atuaqqissaarnermi apeqqutit]
[Qupp. 26-mi assiliartaq]
Jiisusi ilumoorluni maniguuppoq
[Qupp. 28-mi assiliartaq]
Allanit angusaqarneruniarnissaq silarsuarmi kaammattuutigineqartarpoq
[Suminngaanneernera]
WHO photo: L. Almasi/K. Hemzǒ
[Qupp. 29-mi assiliartaq]
Nalusavut saaffigigaangatsigit maniguunneq iluaqutigisarparput
[Qupp. 30-mi assiliartat]
Aaqqiagiinnginnerit aaqqinneqarsinnaasarput maniguulluta asanninneq ajornartorsiummut matoorutigigutsigu
[Qupp. 31-mi assiliartat]
Kristumiut assigiinngitsorpassuartigut maniguunnermik ersersitsisarput