Guutip naalagaaffianik oqaluussissutiginninnermit nutaarsiassat

Peqqusersuinneq Jehovamut ataqqinaataasoq

NUNARSUARMI sumi tamaani Jehovap Nalunaajaasui, inuusuttut utoqqaallu, peqqusersuitsutut ilisimaneqarput. Nunavissuarnit pingasuneersunit assersuuteqariarta.

Olusola, 17-inik ukiulik Nigeriami najugalik, ullut ilaanni atuarfimmiit angerlartilluni aningaasivimmik nassaarpoq. Nassaani atuarfiup pisortaanut tunniuppaa, taassuma aningaasat kisikkamigit 6200 naira-sut (225 koruunit missarigaat) paasivaa. Atuarfiup pisortaata aningaasivik ilinniartitsisumut katatsisimasumut tunniuppaa. Taanna qujamasulluni Olusola 1000 naira-nik (35 koruunit missaannik) akilerpaa, siunnersorlugulu atuarnerminut akiligassaminut akiliutigissagai. Atuartut ilaasa susoqartoq tusaramikku Olusola illaruaatigaat. Sapaatip-akunnialui qaangiuttut atuartut ilaat aningaasanik tilliffigitippoq, ilinniartitsisullu peqqusipput atuartut tamarmik misissuiffigineqassasut. Ilinniartitsisut ilaata Olusola ima oqarfigaa: „Uani nikorfaannarit. Nalunngilara illit Jehovap Nalunaajaasuisa ilaattut tillinneq ajortutit.“ Aningaasat nukappiaqqat Olusolamik illaruaatiginnittut ilaanni marlunni nassaarineqarput, sukannersumillu pillarneqarput. Olusola ima allappoq: „Jehovap Nalunaajaasuisa ilaattut, tillinngisaannartutut, ilisimaneqarnera taamaalillungalu Jehovamik ataqqinartitsinera nuannaarutigaara.“

Marcelo Argentinamiu illumik tunuanni qanittumi mappemik nassaarpoq. Marcelop illuminnut eqqullugu nulianilu mianersortunnguamik ammarpaat. Tupaallaatigeqisaminnik mappep imarai aningaasarpassuit, kreditkortit checkillu atsiornikut arlallit, ataaseq 1 million pesos-inik (1.875.000 koruuninik) nalilik. Pappiaqqat ilaanni telefonip normua nassaaraat. Piginnittua sianerfigaat isumaqatigiippullu Marcelop suliffianut mappe imai ilanngullugit aassagaa. Piginnittoq annilaangarpasilluni takkuppoq. Sulisitsisulli oqarfigaa annilaangasariaqanngitsoq Marcelo Jehovap Nalunaajaasuisa ilagimmassuk. Piginnittup Marcelo mappemik nassaartoq 20 pesos-iinnarnik (30 koruunit missaannaanik) akilerpaa. Tamanna sulisitsisup annikigalu kamaatigaa. Marcelommi peqqusersuitsuunera assut killitsissutigigamiuk. Marcelo periarfissaqalerpoq Jehovap Nalunaajaasuisa ilaattut peqqusersuitsuujuaannarnissaminik kissaateqarnerminik nassuiaanissaminut.

Misigisaq tulliuttoq Kirgisistanimeersuuvoq. Rinatip, nukappiaqqap arfinilinnik ukiullip, arnap eqqaamiumik pooqattaa mikisoq nassaaraa. Imarai 1100 som-it (120 koruunit missaat). Rinatip arnaatalu pooqattaq arnamut utertimmassuk arnap aningaasat kisikkamigit 200 som-inik amigarnerarpai. Rinatip tigusimannginnerarpai. Pingasuullutik aningaasat ujariartorpaat pooqattamillu nassaarfiata eqqaani nassaaralugit. Arnaq tupaallaqaaq. Rinatimut aningaasanik utertitsisumut arnaanullu kristumiutut perorsaasumut qujamasoqaaq. (wE 6/1 05)