Guuti saqeqatigerusuppiuk?

’Jehovap ilinnit piumasaraa: Misissuilluarlutit Guutit inooqatigissagit [Guutit saqeqatigissagit makitanaveersaarlutit, 1900/1961].’ — MIKA 6:8.

1, 2. Jehovap uagutsinnut misigissusii angajoqqaat qitornaminnik pisunnermik ilinniartitsigaangamik misigissusiinut qanoq assersuunneqarsinnaappat?

MEERAARAQ orloqqajaalluni ataatami anaanamiluunniit talii siaaqqasut isattorlugit alloriaqqaarpoq. Pisoq tamanna allanut soqutaarpasigunanngikkaluarpoq, angajoqqaajusunulli pingaaruteqangaarpoq, siunissamut neriuuteqalersitsingaarpoq. Qaammatini ukiunilu tulliuttuni qitornamik tasiorlugu ingerlaqatigisarnissaa qilanaaraat. Neriupput ukiorpassuarni meeraq assigiinngitsorpassuartigut tapersersorsinnaallugulu siunnersorsinnaassallugu.

² Jehova Guutip qitornani nunamiut tamatumunnga assingusumik misigissuseqarfigai. Ilaanni innuttani Israelikkut, imaluunniit Efraimikkut, pillugit ima oqarpoq: „Tassaana uanga Efraimi pisunnermut sungiusariga kissumiartarlugillu . . . Uannut atatippakka inunnut qilerummi, asanninnerup supissaataani.“ (Hosea 11:3, 4) Tassani Jehova imminut oqaluttuarivoq ataatatut asannittutut naammagittarluni meeqqamik pisunnermik ilinniartitsisutut, orluppallu immaqa pakkussisutut. Jehovap, ataataalluarnerpaajusup, pisunnermik ilinniartikkusuttupilussuuaatigut. Aamma siumukarnitsinni uagutsinnik ingerlaqateqarnini nuannaarutigaa. Soorlu allassimaffimmi najoqqutarineqartumi ersertoq Guuti saqeqatigisinnaavarput! (Mika 6:8) Guutimilli saqeqateqarneq qanoq paasisariaqarpa? Sooq taanna saqeqatigissavarput? Qanoq ililluni taamaaliortoqarsinnaava? Aamma Guutimik saqeqateqarneq sunik pilluaqqussutissartaqarpa? Apeqqutit sisamat taakku ataasiakkaarlugit akissutissarsioriartigik.

Guutimik saqeqateqarneq qanoq paasisariaqarpa?

3, 4. (a) Inuup Guutimik saqeqateqarneranik assersuut sooq assersuutitsialaava? (b) Guutimik saqeqateqarneq qanoq paasisariaqarpa?

³ Soorunami inuup uinillip aallillu Jehova anersaajusoq ilumoortumik saqeqatigisinnaanngilaa. (2 Mosesi 33:20; Johannesi 4:24) Taamaattumik inuit Guutimik saqeqateqartut Biibilimi eqqaaneqaraangata assersuutaasarpoq. Assersuutitsialaavoq inuiannit tamanit kulturinilu tamani paasineqarsinnaasoq, qaqugukkulluunniillu atorsinnaasoq. Nunaqarnerpa piffissaqarnerpaluunniit inuup inummik allamik ingerlaqateqarnera pillugu eqqarsaammik paasiuminaatsitsiffiusumik? Allaatigineqarnera nuannersuullunilu inuppalaartuuvoq, ilaa? Misigissutsit taamaattut iluaqutigalugit Guutimik saqeqateqarnerup qanoq paasisariaqarnera ilaatigut paasivarput. Assersuulli taanna sukumiinerusumik misissoriartigu.

⁴ Angutit aalajaatsut Enoki Noalu eqqarsaatigeriakkit. Sooq taakku pillugit allassimasoqarpa Guuti saqeqatigigaat? (1 Mosesi 5:24; 6:9) Biibilimi oqariaaseq ’inuuvoq’ imaluunniit ’saqivoq’ periaatsimik  aalajangersimasumik malitaqarnermik isumaqartinneqarajuppoq. Enokip Noallu inooriaaseq Jehova Guutip piumasaanut naapertuuttoq toqqarsimavaat. Silarsuartut avatangiisiminniittutut innatik Jehovamit siulersortipput siunnersuutaalu maleruarlugit. Jehova tatigaat. Imaappa Jehovap taakku sunik tamanik aalajangiissuttarai? Naamik. Jehovap inuit piumasaminnik iliorsinnaatippai, kissaatigaalu tunissut tamanna nammineq siuneqassuserput imaluunniit silatussuserput atorlugu atussagipput. (Romamiut 12:1) Aalajangigassaqaraangattali maniguulluta siuneqassuserput Jehovap eqqarsaataanit qutsinnerungaartunit siulersortittarparput. (Ussatit 3:5, 6; Esaja 55:8, 9) Taamaattumik oqartoqarsinnaavoq Jehova inuunitsinni tasiorlugulusooq saqeqatigigipput.

5. Sooq Jiisusip ullut inuuffigisassat alenimik ilaneqarsinnaanerat eqqartorpaa?

⁵ Biibilimi inuuneq angalanermut angalaarnermulluunniit assersuunneqakulavoq. Ilaannikkut taamatut assersuussineq toqqaannartuusarpoq, ilaannikkulli toqqaannartuuneq ajorpoq. Assersuutigalugu Jiisusi ima oqarpoq: „Kia arlassi isumakuluuteqarnermigut ullut inuuffigisassani ataasiinnarmilluunniit [alenimik ataatsimik, NV] ilasinnaanerpai?“ (Matthæusi 6:27) Sooq Jiisusip ’ullut’ inuup ’inuuffigisassaasa’, piffissaq naapertorlugu naatsorsorneqartartut, „alenimik ataatsimik“, takissutsimut uuttuutaasumik, ilanissaat eqqartorpaa? * Jiisusip inuuneq angalanermut assersuutinnguatsiarpaa. Oqarporlusooq isumakuluutit inuunerup allorialaaginnarnermik ilanissaanut iluaqutaasinnaanngitsut. Imaappa inuunerup tamatuma sivisussusianut sunniuteqarsinnaanngitsugut? Naamik, taamaanngivippoq! Taamaattumik apeqqutit aappaat una sammissavarput: Sooq Guuti saqeqatigisariaqarparput?

Sooq Guuti saqeqatigisariaqarparput?

6, 7. Inuit naammalluinnanngitsut suna pisariaqartippaat, aamma sooq silatusaassaagut pisariaqartitaq tamanna Jehovamut matussusertikkutsigu?

⁶ Jehova Guutimik saqeqateqartariaqarnitsinnut pissutaasut ilaat Jeremia 10:23-mi ima eqqaaneqarpoq: „Nalunngilara, Jehova, inuup ingerlavissi oqartussaaffiginngikkaa. Ingerlasup alloriartarnini aqussinnaanngilai.“ (NV) Uagut inuit inuunitta nammineq aqunnissaanut piginnaaneqarnatalu pisinnaatitaanngilagut. Siunnersorneqarnissarput pisariaqartilluinnarparput. Guutimut atanatik namminneerumasut, Adamip Evallu kukkusimanerattut kukkupput. Inuit siulliit marluk imminnut suup ajunngitsuuneranik suullu ajortuuneranik aalajangiisinnaanngortipput. (1 Mosesi 3:1-6) Tamakkuninngali uagut aalajangiisinnaatitaanngilagut.

⁷ Illit aamma inuuninni siunnersorneqarnissat pisariaqartittarpaat, ilaa? Ullut tamaasa pingaarutilinnik pingaaruteqannginnerusunillu aalajangigassaqartarpugut. Aalajangigassat ilaat aalajangeruminaatsuusarput siunissatsinnullu — aamma qanigisatta siunissaannut — sunniuteqarsinnaallutik. Eqqarsaatigeriarulli uagutsinnit utoqqaanerungaarlunilu silatunerungaartup nuannaarluni asannillunilu aalajangigassanik tamakkuninnga aalajangiiniarnitsinni ikiorumagaatigut! Ajoraluartumilli ullumikkut inuit amerlanerpaartaasa namminneq naliliisinnaassusertik tatigerusunneruaat allorarnitillu namminneq aqukkusunnerullugit. Oqaatsit ilumoortut Ussatit 28:26-mi allassimasut uku sianiginngitsuusaarpaat: „Silaqassutsiminik [Uummatiminik, NV] tatiginnittoq sianiitsuuvoq, ilisimassusermilli pigisaqarluni inuusoq annaanneqartussaavoq.“ Jehovap kissaatigaa uummammik tatigisassaanngitsumik tatiginninnerup kingunerisaanik ajunaarutaasartunik ajunaaruteqannginnissarput. (Jeremia 17:9) Kissaatigaa ilisimassuseqarluta inuunissarput aamma Siulersuisutsitut Ajoqersuisutsitullu silatuutut tatigissagitsinni. Taamaaliorutta inuunerput toqqissisimanarlunilu nalerisimaarnarlunilu siunertaqarluassaaq.

8. Ajortiliunerput naammalluinnanngissuserpullu pissutigalugit suna ornigaraarput, Jehovalli qanoq kissaappaatigut?

⁸ Guutimik saqeqateqartariaqarnitsinnut pissutaasoq alla inuunitta sivisussusianut tunngavoq. Biibilimi ajoqersuut ilumoortoq annilaarnartoq eqqaaneqarpoq. Oqartoqarsinnaavoq inuit naammalluinnanngitsut tamarmik assigiimmik  ornigaqarlutik inuusut. Utoqqalinerup erloqinartortai Oqaluussisartup oqaasii 12:5-imi ima allaatigineqarput: ’Inuk soraajuitsumik inigiligassaminut iseriartussaaq, upputiginnittullu aqqusinertigut ingerlaarlutik.’ ’Soraajuitsumik inigiligassaq’ suugami? Tamanna tassaavoq iliveq, ajortiliunerput naammalluinnanngissuserpullu pissutigalugit ornigarput. (Romamiut 6:23) Jehovalli kissaatiginngilaa inunngornitsinnit toqunissatta tungaanut inuunitta sivikitsuinnaanissaa ajornartorsiorfiunissaalu. (Jobi 14:1) Aatsaat Guutimik saqeqateqarutta siunertaatut sivisutigisumik inuunissarput — naassaanngitsumik inuunissarput — neriuutigisinnaavarput. Tamanna aamma illit kissaatiginartippat, ilaa? Taamaappat Ataatat saqeqatigisariaqarpat.

Qanoq ililluta Guuti saqeqatigisinnaavarput?

9. Sooq Jehova innuttaminut ilaannikkut isertortarsimava, Esaja 30:20-mili qanoq neriorsueqqissaarpa?

⁹ Apeqqutit pingajuat eqqarsaatigilluarneqartariaqarpoq. Imaapporlu: Qanoq ililluta Guuti saqeqatigisinnaavarput? Tamatumunnga akissut Esaja 30:20, 21-miippoq: „Ajoqersortit [Ajoqersuisorsuit, NV] isertorunnaassaaq, nammineq isinnik ilitsersortit [ajoqersuisorsuit, NV] takussavat. Nammineq siutinnik tusassavat tununnit oqaaseq: ’Aajuna aqqusineq, taanna ingerlavigissavarsi!’ Talerpimmukarumavusimi saamimmukarumallusilu.“ Versini taakkunani qiimmaallannartuni versi 20-mi Jehovap oqaasiinit kiffai taassumunnga pikitsitsigaangamik taassuma taakkununnga isertortutut ittarneranik eqqaasinneqartarsimasinnaapput. (Esaja 1:15; 59:2) Matumanili Jehova isertortutut allaatigineqanngilaq; innuttami aalajaatsut saavanni qeqarpoq. Ilinniartitsisoq atuartitami saavanni qeqartoq ilinniartitsissutigerusutaminillu saqqummiussisoq immaqa eqqarsaatigilerparput.

10. ’Tunutsinnit oqaaseq’ Ajoqersuisorsuatsinneersoq qanoq ililluta tusaasinnaavarput?

¹⁰ Esaja 30 Versi 21-mi assersuut alla atorneqarpoq. Matumani Jehova innuttami tunuanni pisulluni aqqutikkut eqqortukkoornissaannik ilitsersuussisutut allaatigineqarpoq. Biibilimik misissueqqissaartartut assersuut tamanna savanik paarsisup ilaannikkut savaatimi tunuanni pisulluni aqqutikkut eqqunngitsukkuunnginniassammata suaartarluni aqqutissiuussisarneraneersuusoraat. Assersuusiaq tamanna qanoq ililluni uagutsinnut tunngatinneqarsinnaagami? Tassa Guutip oqaasiani siunnersuutaasinnaasunik misissuigaangatta ukiut tusindillit matuma siorna allanneqarsimasunik atuartarpugut. Soorlulusooq tunutsinnit oqartoqartoq, itsarsuarmeersumik. Ullormili allanneqarfimminnisulli atorsinnaatigipput. Ulluinnarni aalajangigassaqaraangatta Biibilimi siunnersuutinit siulersortissinnaavugut, tamannalu inuunitta siunissami qanoq ingerlanissaanik pilersaarusiornitsinnut iluaqutigisinnaavarput. (Tussiaat 119:105) Ilumoorluta siunnersuutit tamakku misissorlugillu maleruaaraangatsigit Jehova ilisimasortarisutut ittarparput. Guuti saqeqatigisarparput.

11. Jeremia 6:16 naapertorlugu Jehovap kiffani kissalaartumik qanoq oqaluuppai, taakkuali qanoq pippat?

¹¹ Guutip oqaasianit ilumut taama peqqissaartigisumik siulersortippugut? Ilaanneeriarluni ilumoorluni imminut misissortarneq isumatusaarneruvoq.  Versi una taamaaliornissamut iluaqutigisinnaavarput: „Ima oqarpoq [Jehova]: ’Aqqusernit sinaanni qeqqigitsi qinerlusilu, apeqqutigisigit aqqusininnguatoqqat, pilluarnissamut aqqutaasut ingerlavigisigit, taava qasuerfissarsiumaarpusi tarnissinnut!’“ (Jeremia 6:16) Oqaatsit taakku atuaratsigit immaqa angalasoq aqquserngit paarlaffianni sukkuussanerluni aperiniarluni unittoq eqqaavarput. Israelimi Jehovap innuttaasa pikitsitsiumatuut anersaakkut ittumik tamatumunnga assingusumik iliuuseqartariaqarput. „Aqqusininnguatoqqat“ uterfigeqqittariaqarpaat. ’Pilluarnissamut aqqut’ aqqutaavoq taakkua siuaasaasa aalajaatsut ingerlavigisimasaat, aqqut inuiaqatigiit sianiilliorlutik qimassimasaat. Ajoraluartumik Israelikkut uteriippallaarput Jehovap asannittumik eqqaasitsissutaanik tusarnaarnissaamut. Versi ima nangippoq: „Akippulli: ’Taamaaliornianngilagut.’“ Nalitsinnili Guutip innuttai taassuma siunnersuutaanut allatut periarput.

12, 13. (a) Kristusip ajoqersugaasa tanitat Jeremia 6:16-imi siunnersuutigineqartoq qanoq periaaseqarfigaat? (b) Sumut ingerlanerluta paasiniarlugu qanoq imminut misissorsinnaavugut?

¹² 1800-kkut naalerneranniilli Kristusip ajoqersugaasa tanitat Jeremia 6:16-imi siunnersuut maleruarpaat. Eqimattatut uummatikkut iluunngarluni ’aqqusininnguatoqqanut’ uternermi siuttuusimapput. Kristumiuuneraqatigiit tunussisut pisimanerattut pinnatik „oqaatsinut peqqissinartunut najoqqutassiaq“, Jiisusi Kristusimit aalajangerneqartoq ukiunilu hundredelinni siullerni taassuma ajoqersugaanit aalajaatsunit ingerlateqqinneqartoq, aalajaallutik malippaat. (2 Timotheusi 1:13, NV) Ullumikkut tanitat inooriaatsip tamatuma peqqinnarlunilu pilluarnartup, kristumiuuneraqatigiinnit qimanneqarsimasup, maleruarniarnerani ikioqatigiittuarput suleqatitillu ’savanut allanut’ ilaasut maleruaaniarneranni ikiortuarlugit. — Johannesi 10:16.

¹³ Inussiaqatigiit aalajaatsut „piffissaq eqqorlugu“ anersaakkut nerisassanik tunniussisarnermikkut inuit millionillit ’aqqusininnguatoqqanik’ nanisinissaannut Guutimillu saqeqateqarnissaannut ikiorsimavaat. (Matthæusi 24:45-47) Illit millionilinnut taakkununnga ilaavit? Taamaappat, taava illit aqqummit nigornaveersaarniarlutit namminerlu ingerlanialernissat pinaveersaarniarlugu qanoq iliorsinnaavit? Silatusaassaatit inuuninni sumut ingerlanerlutit eqqarsaatiginiarlugu ilaanneeriarlutit unikaallattaruit. Aalajaallutit Biibilimik atuagassianillu atuakkanillu Biibililersaarutinik atuartaruit ataatsimiinnerillu ilinniarnartut ullumikkut tanitanit piareersarneqartartut peqataaffigisarukkit, Guutimik saqeqateqarnissamik ilinniartinneqarputit. Ilinnullu siunnersuutigineqartut maniguullutit malittarukkit ’aqqusininnguatoqqatigoorninni’ Jehova saqeqatigissavat.

’Takussaanngitsoq isigalugulusooq’ saqisariaqarpugut

14. Jehova piviusutut isigigutsigu, tamanna inuttut nammineq aalajangiinitsinni qanoq takuneqarsinnaassava?

¹⁴ Jehova saqeqatigisinnaassagutsigu piviusutut isigisariaqarparput. Eqqaamajuk Jehovap itsaq Israelimi aalajaatsut taakkununnga isertunnginnerminik qularunnaarsikkai. Ullumikkuttaaq innuttaminut Ajoqersuisorsuartut imminut saqqummiuppoq. Jehova ima piviusutut isigitigaajuk soorlu illit siuninni qeqartoq ilinniartinniarlutit? Guutimik saqeqateqassagutta taama uppertigisariaqarpugut. Mosesi taama uppertigaaq, „takussaanngitsumimmi isigisaqarlunilusooq pinertusaarpoq“. (Hebræerit 11:27) Jehova piviusutut isigigutsigu aalajangiigaangatta misigissusii eqqarsaatigisassavavut. Assersuutigalugu ajortuliornissarput tamatumalu kingorna ajortuliatta utoqqaanertanut kristumiunut ilaquttatsinnulluunniit isertorniarnissaa eqqarsaatiginavianngilarpulluunniit. Inuilluunniilli allat takusinnaanngikkaluaraangatigut Guuti sapinngisatsinnik saqeqatiginiartarparput. Kunngi Daavitut ima  aalajangersimarpalutsigaagut: „Uummatikkut assuarnaallunga inuujumavunga uanga illunni.“ — Tussiaat 101:2.

15. Qatanngutinik kristumiunik peqateqartarneq Jehovap piviusutut isiginissaanut qanoq iluaqutigissavarput?

¹⁵ Jehovap nalunngilaa pinngortitaasugut nunamiusut naammalluinnanngitsut ilaannikkullu takusinnaanngisatsinnik upperiuminaatsitsisartugut. (Tussiaat 103:14) Sanngiissutip tamatuma ajugaaffiginiarnerani ikiorniarluta iliuuseqangaartarpoq. Assersuutigalugu nunarsuarmi tamarmit inuiaqatigiinnit tamaneersunik ’aterminut innuttassarsereersimavoq’. (Apustilit Suliaat 15:14) Ataasiussuseqarluta kiffartoraangatta nakussatseqatigiittarpugut. Guuti piviusutut isiginerulertarparput tusaraangatsigu Jehovap anersaakkut qatanngut sanngiissummik ajugaaffiginninniarnerani misilinneqangaarnermillu qaangiiniarnerani qanoq ikiorsimaneraa. — 1 Petrusi 5:9.

16. Jiisusip maligassiaa Guutimik saqeqateqarnissamut qanoq iluaqutigisinnaavarput?

¹⁶ Pingaarnerpaamik Jehovap Ernini uagutsinnut maligassiuisissimavaa. Jiisusi ima oqarpoq: „Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.“ (Johannesi 14:6) Jiisusip nunarsuarmi maani inuuneranik misissuineq Jehova piviusutut isiginerulerniarlugu iliuuserisinnaasatta pitsaanersaraat. Jiisusip oqaasii iliuusiilu tamarmik Ataataata pissusiinik aqqutaanillu naammalluinnartumik ersersitsipput. (Johannesi 14:9) Aalajangigassaqalernerit tamaasa Jiisusi qanoq iliorsimassagaluarnersoq eqqarsaatigeqqissaartariaqarparput. Aalajangikkavut qinunikkut eqqarsaatiginneqqissaarsimanitsinnut ersiutaappata Kristusip tumai atuarsimassavavut. (1 Petrusi 2:21) Taava Guuti saqeqatigissavarput.

Tamanna sunik pilluaqqussutissartaqarpa?

17. Jehovap aqqutigeqqusaasigut saqigutta tarnitsinnut ’qasuerfissarsineq’ suna angusinnaavarput?

¹⁷ Jehova Guutimik saqeqateqarneq pilluaqqutissartarpassuaqarpoq. Eqqaamajuk Jehovap „pilluarnissamut aqqutaasut“ Israelikkunnut ujaqqugamigit taakku qanoq neriorsornerai. Ima oqarpoq: „Ingerlavigisigit, taava qasuerfissarsiumaarpusi tarnissinnut.“ (Jeremia 6:16) Versimi matumani ’qasuerfissaq’ qanoq paasisariaqarami? Ilorrisimaarluni inuuneq nuannaarniutinik inuulluarniutinillu ulikkaartoq pineqarpa? Naamik. Jehovap pitsaanerujussuarmik, inunnit pisuujunerpaagaluartunilluunniit qaqutigut nanineqartartumik, tunisarpaatigut. Tarnimut qasuerfissarsineq tassaavoq qamuuna eqqissineq, nuannaarneq, nalerisimaarneq anersaakkullu pisariaqartitanik matussusiineq. Taamatut qasuerfissarsigaanni, taava inuunermi aqqut pitsaanerpaaq toqqarsimallugu qularutigisariaqanngilaq. Taamatut qamuuna eqqissineq silarsuarmi matumani ajornartorsiorfiusumi qaqutigoortuuvoq!

18. Jehovap suna uagutsinnut pilluaqqussutitut tunniukkusuppaa, aamma illit qanoq aalajangerpit?

¹⁸ Soorunami inuuneq immini pilluaqqussutaavoq angisooq. Inuunikinneq inuunngivinnermit pitsaaneruvoq. Sivikitsuinnarmilli — inuusuttutut nukittuujusinnarluta utoqqalilluta anniaateqalerluta — inuunissarput Jehovap siunertarisimanngisaannarpaa. Jehovap kissaatigaa annerpaamik pilluaqqusaanissarput. Kissaatigaa naassaanngitsumik saqeqatigissagitsinni! Tamanna Mika 4:5-imi ersersinneqarluarpoq: „Inuiaat allat tamarmik inuupput namminneq guutimik aqqanni; uagulli inuujumavugut [Jehovami] Guutitta aqqani naassaanngilluinnartumik.“ Pilluaqqusaaneq tamanna ilangeeqataaffigerusuppiuk? Jehovap nuannerunarpaluttumik ’inuunivimmik’ taasaatut illit inoorusuppit? (1 Timotheusi 6:19) Taava aalajangertariaqarputit Jehova saqeqatiginiarlugu ullumi, aqagu ullullu tamaviisa tamatumalu kingorna naassaanngilluinnartumik! (wE 11/1 05)

[Quppernerup ataani ilanngussaq]

Qanoq akissavit?

• Guutimik saqeqateqarneq qanoq paasisariaqarpa?

• Guutimik saqeqateqarnissaq sooq pisariaqartipparput?

• Guutimik saqeqateqarnissamut suna iluaqutigisinnaavarput?

• Guutimik saqeqateqartut pilluaqqussutissat suut ilangiiffigissavaat?

[Atuaqqissaarnermi apeqqutit]

[Qupp. 10-mi assiliartaq]

Biibili aqqutigalugu Jehovap nipaa ’tusaavarput’ ima oqartoq: „Aajuna aqqusineq“

[Qupp. 12-mi assiliartaq]

Ataatsimiinnerni anersaakkut nerisassat piffissaq eqqorlugu pisarpavut