Guuti saqeqatigisigu ajunngitsunillu katersuilluta

„Anorissamik siaruarterigamik katersuiffimmi anorersuarmik katersuissapput.“ — HOSEA 8:7.

1. Qanoq ililluta Jehova saqeqatigisinnaavarput?

NAVIANARTUKKUUSSAGALUARUIT misilittagaqarluartumit siulersorneqarnissat toqqissisimanartinnerpaassavat, ilaa? Ilisimasortamik taamaattumik ingiaqateqarnissaq kisimiinnissaminngarnit silatusaarnerussaaq. Tamanna pissutsinut atukkatsinnut ilaatigut assersuunneqarsinnaavoq. Jehovap silarsuakkut ajortukkut maanna atuuttukkut inoqajuitsutut ittukkut siulersuinissamik neqeroorfigaatigullusooq. Alloriarnivut nammineq aqunniarsarinagit taanna saqeqatigigutsigu silatusaassaagut. Qanoq ililluta Guuti saqeqatigisinnaavarput? Taassuma oqaatsimigut siunnersuutaanik malinninnitsigut.

2. Allaaserisami matumani suut sammissavavut?

² Allaaserisap matuma siuliani Hoseap allagaani kapitali 1-5-imi oqaluttuaq pissanganartoq assersuutaasoq sammineqarpoq. Soorlu paasereeripput oqaluttuaq pissanganartoq taanna Guutimik saqeqateqarnissamut iluaqutigisinnaasatsinnik ilinniarfigisinnaavarput. Kapitali 6-9-mi ilinniutigineqartut ilaat misissoriartigit. Kapitalit taakku sisamat pingaarnersioqqaarutsigit iluaqutaassaaq.

Pingaarnersiuineq

3. Hoseap allagaani kapitali 6-9-mi sammineqartut naatsumik oqaluttuarikkit.

³ Jehovap Hosea pingaarnerpaamik naggueqatigiissortat quliusut naalagaaffiannut Israelimut avannarliusumut siulittueqquaa. Inuiaqatigiit taakkua, naalagaaffimmi naggueqatigiit nuimanersaat atsiullugit aamma Efraimimik taaneqartartut, Guuti tunussimavaat. Hoseap allagaani kapitali 6-9-mi ersersinneqarpoq inuiaqatigiit taakku Jehovap angerusianik unioqqutitsinermikkut iluaatsuliornermikkullu ilumoorfiginninngitsuusut. (Hosea 6:7) Israelikkut Jehova uterfiginagu iligisatik silamiuusut tunaaraat. Ajortunik siaruarteriuaramik ajortunik katersuiumaarput. Allatut oqaatigalugu iluarisaanngitsutut eqqartuunneqanngitsoornavianngillat. Hosealli siulittuutaani aamma qiimmaallannartumik tusarliussaqarpoq. Israelikkut neriorsoqqissaarneqarput ilumoorlutik allamik isumataarunik Jehovamut utersinnaasut nallittorneqarsinnaasullu.

4. Hoseap siulittuutaani ilinniutigineqartut atorluarsinnaasut suut misissussavavut?

⁴ Hoseap allagaani kapitalini sisamani taakkunani Guutimik saqeqateqarnissamut iluaqutigisinnaasatsinnik suli allanik siunnersuuteqarpoq. Ilinniutigineqartut sisamat atorluarsinnaasut misissoriartigik: (1) Ilumoorluni allamik isumataarneq iliuutsitigut ersertarpoq, oqaatsitiguinnaanngitsoq; (2) pilliuteqarnerinnatsigut Jehovamit iluarisaalernavianngilagut; (3) pallorfiginnitsimi ilaannit tununneqaraangami Jehovap tamanna aliasuutigisarpaa; aamma (4) ajunngitsunik katersuiumalluta ajunngitsunik siaruarterisariaqarpugut.

Ilumoorluni allamik isumataarsimaneq qanoq ersertartoq

5. Hosea 6:1-3 pingaarnersioruk.

⁵ Hoseap siulittuutaa allamik isumataarneq nallittuinerlu pillugit ilinniarfigingaarsinnaavarput. Hosea 6:1-3-mi ima allassimavoq: „[Jehovamut] uterniarta; alittuisimavoq, ajorunnaarsikkumaarpaatigulli, persuttaasimavoq, katsorsarumaarpaatigulli.  Ullut marluk qaangiuppata uummartissavaatigut, ullut pingajuanni makitissavaatigut, Guutillu kiinaata saani inuussaagut. [Jehovalu] ilisimalerniartigu taassuminnga ilisimannilernissaq noqqaassutiginiartigu. Saqqummernissaa qularnaatsigaaq seqerngup ullaakkut aappilliuttarneratut. Tikissavaatigut sialuttut, upernaap sialuatut nunamik imerterisutut.“

6-8. Israelikkut allamik isumataarnerannut tunngatillugu suna ajornartorsiutaava?

⁶ Versini taakkunani kinaana oqaluttoq? Inuit ilaasa Israelikkut tunussisut taama oqarnerarpaat oqaasiilu inuiaqatigiit naalanngitsut allamik isumataartuusaarlutik Guutip nallittuisuuneranik atornerluiniarnerattut paasillugit. Inuilli allat isumaqarput oqaluttoq tassaasoq pruffiiti Hosea taassumalu inuiaqatigiit ilungersorluni qinnuigigai Jehovamut uteqqullugit. Taamatulli oqaluttoq kinaagaluarpalluunniit apeqqut pingaaruteqarnerpaaq unaavoq: Naggueqatigiissortat quliusut naalagaaffianni Israelimi innuttaasut inuiaqatigiittut isigalugit ilumoorlutik allamik isumataarnermikkut Jehovamut uterpat? Naamik. Jehova Hosea aqqutigalugu ima oqarpoq: „Efraimi, qanoq iliorfigissavakkit? Juda, qanoq iliorfigissavakkit? Ilumoorsusissi assigaa ullaap pujua, kanerneq nungujaartartoq.“ (Hosea 6:4) Guutip innuttaasa anersaakkut qanoq issusiat alianartoq eqqorluartumik taama allaatigineqarpoq! Ullaap pujuata seqineq nuigaangat nunguttarneratut ilumoorsuseqartoqarunnaangajassimavoq, imaluunniit ilumoorfiginnilluni tunniusimasoqarunnaangajassimavoq. Inuiaqatigiit allamik isumataartuusaarput, Jehovali nallittuinissaminut tunngavissaqanngilaq. Sunaana ajornartorsiutaasoq?

⁷ Israelikkut allamik isumataarnerat uummammit pisuunngilaq. Hosea 7:14-imi Jehovap innuttaminik iluarinninnginnera pillugu ima allassimasoqarpoq: „Innanngavimminni nimaaraangamik uanga uummatimikkut torlorfigisarinngilaannga.“ Nanginnerani versi 16-imi ima allassimavoq: „Uannut [Jehovamut] saannianngillat.“ Inuiaqatigiit Jehovamik pallorfiginninneq qutsissisitaasoq uterfigeqqikkumanngilaat taassumunnga attaveqaqqilerniarlutik pisariaqartunik allannguiumanatik. Guutimik saqeqateqarnissaq ilumoorlutik kissaatiginngilaat.

⁸ Israelikkut allamik isumataarnerannut tunngatillugu aamma allamik ajornartorsiuteqarpoq. Israelikkut ajortuliortuartarput — aap, ajortorpassuarnik iliuuseqartarput soorlu peqquserluttarlutik, toqutsisarlutik, tillittarlutik guutipilussiortarlutillu. Allaat ima sianiilliortigisarput inuiaqatigiit allat ililiuttarlugit. Hosea 7:4-mi ’iffiorfimmut kissaqisumut’ assersuunneqarput, kissaatigisatik ajortut iliuusererusuttupilussuugunarmatigit. Inuiaqatigiit anersaakkut qanoq issusiat alianartoq eqqarsaatigigaanni nallittorneqartariaqarpat? Naamerluinnaq! Hoseap inuiaqatigiit naalasseriitsut oqaluttuuppai Jehovap ’eqqaamajumaaraa pisuunerat, pillarumaaraalu ajortuliaat pillugit’. (Hosea 9:9) Taassumannga nallittorneqarnavianngillat!

9. Hoseap oqaasiini allamik isumataarneq nallittuinerlu pillugit suut ilinniarpavut?

⁹ Hoseap oqaasiinik atuarnikkut allamik isumataarneq nallittuinerlu pillugit suut ilinniarpavut? Israelikkut ilumuunngitsut maligassiuinerlunneratigut paasivarput Jehovap nallittuinera iluaqutigissagutsigu ilumoorluta allamik isumataarsimanerput ersersittariaqaripput. Taamatut allamik isumataarneq qanoq ersertarpa? Jehova qullilinernit oqaatsinillu isumaqangaanngitsunit nakutitaaneq ajorpoq. Ilumoorluni allamik isumataarneq iliuutsitigut ersertarpoq. Ajortuliortoq nallittorneqassaguni inooriaatsini ajortoq inooriaaseriunnaarluinnartariaqarpaa Jehovamillu pallorfiginninnermi najoqqutassianut qutsissunut naapertuuttumik inuulertariaqarluni.

Pilliuteqarnerinnaq Jehovap iluarinngilaa

10, 11. Israelikkunnut tunngatillugu erseqqissarneqarneratut, sooq Jehovap pilliuteqarnerinnaq iluarinngilaa?

¹⁰ Ilinniutigineqartoq Jehovamik saqeqateqarnissamut iluaqutigisinnaasarput alla sammeriartigu. Tassa pilliuteqarnerinnatsigut Jehovamit iluarisaalernavianngilagut. Hosea 6:6-imi Jehova ima oqarpoq: „Iluaraara ilumoorluni tunniusimaneq,  pilliutit toqutassat pinnagit, aap iluarineruara Guuti pillugu ilisimasaqarneq pilliutinit ikkikkagassanit.“ (NV) Malugiuk ilumoorfiginnilluni tunniusimaneq — pissuseq uummammit aallaaveqartoq — aamma Guuti pillugu ilisimasaqarneq Jehovap iluarigai. Immaqali ima eqqarsarputit: ’Sooq versimi tamatumani allassimava Jehovap „pilliutit toqutassat“ aamma ’pilliutit ikikkagassat’ iluarinngikkai? Mosesip inatsisaani tamanna peqqussutigineqannginnami?’

¹¹ Inatsisit atuunnerisa nalaani pilliutit toqutassat aamma ikikkagassat pilliutigeqquneqarput, Hosealli nalaani inuusunut tunngatillugu sualuttumik ajornartorsiuteqarpoq. Israelikkut ilaat Guutimik mianerinnittuusaartarsimagunarput pilliuteqartussaanertik malillugu pilliuteqartarnermikkut. Tamannali ilutigalugu ajortuliortarput. Ajortuliortarnermikkut ersersittarpaat uummatimikkut ilumoorfiginnillutik tunniusimaneqanngilluinnarlutik. Aamma ersersippaat Guuti pillugu ilisimasaqarneq ajattorsimallugu, tamannami naapertorlugu inuunngillat. Uummatimikkut eqqortumik pissuseqanngikkunik eqqortumillu inooriaaseqanngikkunik, taava taakkua pilliutaat qanoq naleqartigippat? Jehova Guutip taakkua pilliutaat maajugai.

12. Hosea 6:6 uagutsinnut ullumikkut inuusunut sumik mianersoqqussutissartaqarpa?

¹² Hoseap oqaasii ullumikkut naalagiartartorpassuarnut mianersoqqussutissartaqarput. Upperisarsiornikkut ileqqut peqataaffiginerisigut Guutimut pilliuteqartarput. Pallorfiginninneralli ulluinnarni inuunerannut sunniuteqalaaginnartarpoq, imaluunniit sunniuteqanngilluinnartarpoq. Inuit taamaattut ilumut Guutimit iluarineqarsinnaappat taanna pillugu eqqorluartumik ilisimasaqarnermik pigiliussinissamut aamma ajortuliortarunnaarnermikkut ilisimasaminnik tamatuminnga atuinissamut uummatimikkut killinneqanngikkunik? Isumaqartoqassanngilaq upperisarsiornikkut ileqqulersuutit immini Guutimut iluarisaanartut. Jehovap iluarinngilai inuit taassumannga iluarisaaniarlutik taassuma oqaasii naapertorlugit inuunatik ileqqulersuutaannaasumik pallorfiginnittut. — 2 Timotheusi 3:5.

13. Uagut qanoq ittunik pilliuteqartarpugut, pilliutilli taakkua nalingat eqqarsaatigalugu suna eqqaamasariaqarparput?

¹³ Uagut kristumiutut ilumoortutut eqqaamavarput pilliuteqarnikkuinnaq Jehovamit iluarineqarsinnaanata. Ilumoorpoq uumasunik Jehovamut pilliuteqarneq ajortugut. Guutili ’pilliivigisarparput qujaniutinik, tassa qarlut aqqanik nassuerutiginnittut inerititaannik’. (Hebræerit 13:15) Pingaaruteqarluinnarpoq Hoseap nalaani Israelikkutut ajortuliortartutut ilinnginnissarput, isumaqalerluta eqqunngitsuliornivut taamatut Guutimut anersaakkut ittumik pilliuteqarnikkut soqutaajunnaarsissinnaallugit. Assersuutigalugu eqqarsaatigiuk arnaq inuusuttoq isertorluni kinguaassiuutitigut inuunerluttoq. Kingusinnerusukkut taanna ima nassuerpoq: „Angalaarnerulerpunga, isumaqarama taamaalioruma unioqqutitsinikka soqutaajunnaassasut.“ Tamanna Israelikkut uteriitsut iliuuseriniarsimasaannut assinguvoq. Qujaniutinik pilliuteqarnerput Jehovamit akuerineqarsinnaavoq aatsaat eqqortumik pissutiginiagaqarutta Guutimillu mianerinnilluta inuugutta.

Pallorfiginnitsiminit tununneqaraangami Jehovap tamanna aliasuutigisarpaa

14. Guutip misigissusii pillugit Hoseap siulittuutaani suna ersersinneqarpa?

¹⁴ Hoseap allagaani kapitali 6-9-mi ilinniutigineqartut  pingajuat Jehova pallorfiginnitsimi ilaannit tununneqaraangat taassuma qanoq sunnerneqartarneranut tunngavoq. Guuti sakkortuunik itisuunillu misigissuseqarpoq. Kiffami ajortuliatik peqqissimissutigigaangatigit qamannga pisumik nuannaarutigisarpaa misiginneqatigisarlugillu. Innuttanili allamik isumataanngikkaangata akuliuttarpoq. Guutip qamannga pisumik isumassoramisigut nuannaarutigisarpaa aalajaalluta saqeqatigigaangatsinni. Tussiaat 149:4-mi ima allassimavoq: ’Jehovap innuttani tipaatsuutigai.’ Kiffanili ilumuunngikkaangata Jehova qanoq misigisarpa?

15. Hosea 6:7 naapertorlugu Israelikkut ilaat qanoq pissuseqarpat?

¹⁵ Israelikkut ilumuunngitsut pillugit Jehova ima oqarpoq: „Angeruseq unioqqutippaat . . . tassani uannut ilumuunngitsuliorput.“ (Hosea 6:7) Hebræerit oqaasiat ’ilumuunngitsuliorneq’-mik nutserneqartoq aamma ’killuussineq’-mik isumaqarpoq. Malakia 2:10-16-imi hebræerit oqaasiat taanna Israelikkut angutitaasa ilaasa aapparminnut aalajaannginnerat ilumoorfiginninnginnerallu allaaseriniarlugu atorneqarpoq. Hosea 6:7-imi oqaatsip tamatuma atorneqarnera pillugu qinerlerfissiami allassimasoqarpoq tamanna tassaasoq „assersuusiaq aappariinnermit pisoq inuttut misigissutsinik pineqartunik ersersitsisussaq . . . Qanimut attaveqatigiinnermi asanninnerup ajoquserneqarsimanera pineqarpoq.“

16, 17. (a) Guutip Israelikkunnut angerusianut tunngatillugu inuiaqatigiit taakku qanoq iliorpat? (b) Iliuutsitsinnut tunngatillugu suna eqqaamasariaqarparput?

¹⁶ Jehovap Israeli assersuutaasumik nuliamisut isigaa inuiaqatigiinnut taakkununnga angerutsini pissutigalugu. Taamaattumik innuttai angerutsimi piumasaqaataasunik unioqqutitsigaangamik allasiortarpullusooq. Guuti uitut aalajaatsutut ippoq, taassumali innuttaasa qimappaat!

¹⁷ Uagummi? Guutimut pingaaruteqarpoq saqeqatigineripput saqeqatiginnginnerippulluunniit. Eqqaamasariaqarparput ’Guuti tassaasoq asanninneq’ iliuutsivullu taassumunnga sunniuteqartartut. (1 Johannesi 4:16) Ajortumut ingerlagutta Jehova aliasutsissinnaavarput taassumanngalu iluarineqarnaviarnata. Tamanna eqqaamajuarutsigu ussernartunut nakkaannarnissamut illersuutigilluarsinnaavarput.

Qanoq ililluta ajunngitsunik katersuisinnaasugut

18, 19. Hosea 8:7-imi najoqqutassiaq suua, najoqqutassiarlu tamanna Israelikkunnut tunngatillugu qanoq atuuppa?

¹⁸ Hoseap siulittuutaanit ilinniarfigisinnaasatta sisamaat sammeriartigu, tassa qanoq ililluta ajunngitsunik katersuisinnaanersugut. Israelikkunnut taakkualu ingerlaviannut ilumuunngitsumut sianiilliornerusumut piunngitsorsiornerusumullu tunngatillugu Hosea ima allappoq: „Anorissamik siaruarterigamik katersuiffimmi anorersuarmik katersuissapput.“ (Hosea 8:7) Tassani eqqaamasariaqakkatsinnik najoqqutassiaqarpoq: Maannakkut iliuuserisavut kingusinnerusukkullu qanoq ingerlanissarput imminnut attuumassuteqarluinnarput. Najoqqutassiaq taanna Israelikkunnut ilumuunngitsunut qanoq atuuppa?

¹⁹ Israelikkut taakku ajortuliortarnermikkut ajortunik siaruarteripput. Taamaaliortuarsinnaappat ajortumik kinguneqanngitsumik? Naagga, iluarisaanngitsutut eqqartuussaanngitsoorsinnaanngillat. Hosea 8:13-imi Jehova pillugu allassimavoq taakkua ’pisuunerat eqqaamajumaaraa pillarlugillu ajortuliorneri pillugit’. Aamma Hosea 9:17-imi ima allassimavoq: „Guutima ajattussavai naalanngimmanni. Inissaasuallutik angalaassapput inuiaat akornanni.“ Jehovap Israelikkut ajortuliaat pillugit akisussaatikkumaarpai. Ajortunik siaruarterigamik ajortunik katersuiumaarput. Ukiumi 740-mi u.n.s. Assyriamiut naggueqatigiissortat quliusut naalagaaffiannik Israelimik uppititsimmata tassanilu innuttaasunik aallarussimmata Guutip taakkuninnga eqqartuussinera naammassineqarpoq.

20. Israelikkut misigisimasaat sumik ilinniarfigaarput?

²⁰ Israelikkut taakkua misigisaat ilumoortumik tunngaviusumik ilinniarfigaarput: Inuk siaruartikkani naapertorlugit katersuiumaarpoq. Guutip oqaasiani ima mianersoqquneqarpugut: „Tammaqinasi! Guuti mitaatigeqqunngilaq [salloqittarneqarsinnaanngilaq, NV]. Inuup siaruartikkani aamma katersorumaarpai.“ (Galatiamiut 6:7) Ajortunik siaruarterigutta ajortunik katersuissaagut. Assersuutigalugu kinguaassiuutitigut inuunerlullutik inuusut tamatuma kinguneri nuanniitsut katersussavaat. Ajortuliortumut allamik isumataanngitsumut tamanna naggataatigut alianartumik kinguneqassaaq.

21. Qanoq ililluta ajunngitsunik katersuisinnaavugut?

²¹ Taava qanoq ililluta ajunngitsunik katersuisinnaavugut? Apeqqut tamanna assersuusiaq paasiuminartoq atorlugu akineqarsinnaavoq. Naasorissaasoq qajuusiassanik katersuerusukkuni suaasiassanik siaruarterissava? Soorunami naamik! Katersorumasani siaruartissavai. Uagutsinnut aamma taamaappoq: Ajunngitsunik katersuerusukkutta ajunngitsunik siaruarterisariaqarpugut. Illit ajunngitsunik katersuiuarusuppit — maanna nalerisimaarnartumik inuullutit Guutip silarsuassaani nutaami inuuneq naassaanngitsoq neriuutigalugu? Taamaappat Guutimik saqeqateqarnikkut taassumalu najoqqutassiai naapertuilluartut naapertorlugit inuunikkut ajunngitsunik siaruarteriuartariaqarputit.

22. Hoseap allagaani kapitali 6-9-mi suut uagutsinnut ilinniartitsissutigineqarpat?

²² Hoseap allagaani kapitali 6-9 tunngavigalugu Guutimik saqeqateqarnissamut iluaqutigisinnaasavut sisamat ilikkarpavut: (1) Ilumoorluni allamik isumataarneq iliuutsitigut ersertarpoq; (2) pilliuteqarnerinnatsigut Jehovamit iluarisaalernavianngilagut; (3) pallorfiginnitsimi ilaannit tununneqaraangami Jehovap tamanna aliasuutigisarpaa; aamma (4) ajunngitsunik katersuiumalluta ajunngitsunik siaruarterisariaqarpugut. Hoseap allagaani kapitalit kingulliit tallimat Guutimik saqeqateqarnissamut qanoq ililluta iluaqutigisinnaavavut?

Qanoq akissavit?

• Ilumoorluni allamik isumataarsimaneq qanoq ersertarpa?

• Sooq pilliuteqarnerinnatsigut Ataatatsinnit qilammiusumit iluarineqalersinnaanngilagut?

• Guuti pallorfiginnitsiminit tununneqaraangami qanoq misigisarpa?

• Ajunngitsunik katersuissagutta sunik siaruarterisariaqarpugut?

[Atuaqqissaarnermi apeqqutit]

[Qupp. 25-mi assiliartaq]

Sooq Jehovap innuttami pilliutaat itigartippai?

[Qupp. 26-mi assiliartaq]

Ajunngitsunik katersuisinnaajumalluta ajunngitsunik siaruarterisariaqarpugut