Jehova paarsisigaarput

„[Jehova] paarsisigaara, sumik ajorsaateqanngilanga.“ — TUSSIAAT 23:1.

1-3. Sooq tupinnanngila Daavip Jehova savanik paarsisumut assersuummagu?

JEHOVAP innuttaminik isumaginneriaasia pillugu oqaluttuaqquneqaraluaruit qanoq oqassagaluarpit? Kiffaminik aalajaatsunik isumassuingaarnera sumut assersuussinnaaviuk? Ukiut 3000-it sinnerlugit matuma siorna kunngi Daavip tussiaasiamini Jehova kusanartumik allaatigaa. Inuusuttuulluni suliarisimasani assersuutitut atorpaa.

² Daavi savanik paarsisuusimavoq, taamaammat savanik paarsineq ilisimasaqarfigaa. Nalunngilaa savat imminiikkat tammariaannaasut ujajaasunillu tillinneqariaannaasut uumasunilluunniit qaasuttunit pisarineqariaannaasut. (1 Samueli 17:34-36) Isumassuisumik paarsisoqanngikkunik immaqa ivigartorfissartik nanisinnaanavianngilaat. Kingusinnerusukkut Daavip nalunaaquttap-akunnerpassui savanik siulersuinermut, illersuinermut ivigartorfissarsiuussinermullu atortarsimasani qularnanngitsumik nuannersumik eqqaamasimassavai.

³ Tupinnanngilaq Daavip Jehovap innuttaminik isumassuinera isumassarsisitaalluni allaatigileramiuk savanik paarsineq eqqaammagu. Tussiaat 23 Daavimit allanneqarsimasoq ima aallartippoq: „[Jehova] paarsisigaara, sumik ajorsaateqanngilanga.“ Misissoriartigu sooq tamanna assersuussilluarnerunersoq. Tamatuma kingorna Tussiaat 23 tunngavigalugu misissussavarput paarsisup savaatiminik isumaginnittarneratut Jehova kiffaminik qanoq isumaginnittarnersoq. — 1 Petrusi 2:25.

Assersuussilluarneq

4, 5. Biibilimi savat qanoq allaatigineqartarpat?

⁴ Biibilimi Jehova assigiinngitsorpassuarnik taaguuteqartinneqarpoq, isumassuisuunerali taaguutaani ’paarsisoq’-mi erseqqinnerpaavoq. (Tussiaat 80:2) Jehovap paarsisutut taaneqartarnera sooq naleqqulluartuunersoq paasilluarsinnaanerussagutsigu, makkua ilisimanissaat iluaqutaassaaq: siullermik savat suut ilisarnaatigineraat, aappassaanillu paarsisuulluartoq sunik pisussaaffeqarnersoq qanorlu pissuseqarnersoq.

⁵ Biibilimi savat uumasutut paarsisumik asannittumik isumassuineranik kajumillutik ilassinnittartutut (2 Samueli 12:3), eqqissisimasutut (Esaja 53:7) aamma imminut illersorsinnaanngitsutut allaatigineqartarput. (Mika 5:7) Atuakkiortoq ukiorpassuarni savanik kinguaassiortitsisarsimasoq ima allappoq: „Inuit ilaat immaqa isumaqartarput savat ’immineerneqaannarsinnaasut’, taamaanngilarli. Savat nakkutigineqaannavinnissartik paarilluarneqarnissartillu nersutaatinit allanit tamanit pisariaqartinnerungaartarpaat.“ Uumasut susinnaanngitsut taakku  uumaannassagunik asannittumik paarsisoqarnissartik pisariaqartippaat. — Ezekieli 34:5.

6. Itsaq savanik paarsisup ulluata ingerlasarnera Biibili pillugu qinerlerfissiami qanoq allaatigineqarpa?

⁶ Itsaq savanik paarsisup ullua qanoq ingerlasarpa? Biibili pillugu qinerlerfissiami ima allassimavoq: „Ullaaralaakkut savaatit ungalusamit siornanni pisulluni ivigartorfissaannut siulersortarpai. Tassani ulloq naallugu savat nakkutigisarpai tammartoqannginniassammat, savallu ilaat malugineqanngitsoorluni ilaminit qimagussimappat naninissaata tungaanut ujartarpaa oqqullugulu. . . . Unnukkut savaatit ungalusamukaateqqittarpai, savallu ungalusamut isaaneranni tamarmiunerat qulakkeerniarlugu ajaappissaminik kisittarpai. . . . Unnuakkut savat inaanni nakkutilliisariaqartarpoq savaatit uumasunit qaasuttunit saassunneqartarnerannut tillinnianulluunniit angalaannartunut illersorniarlugit.“ *

7. Sooq savanik paarsisoq ilaannikkut immikkut erinitsajuiffiginnittariaqarlunilu isumassuisariaqarpa?

⁷ Ilaannikkut savat ilaasa, ingammik savat naartusut savaaqqallu, paarsisumit immikkut erinitsajuiffigineqarnissartik isumassorneqarnissartillu pisariaqartittarpaat. (1 Mosesi 33:13) Biibili pillugu qinerlerfissiami ima allassimasoqarpoq: „Savaatit arnaviartaat amerlanertigut qaqqap sivingarnani ungasissumiittumi piaqqisarput. Savanik paarsisup sava piaqqisoq susinnaanngitsillugu nakkutigeqqissaartarpaa, taava savaaraq tigusarpaa kissumissiullugulu ungalusamukaattarlugu. Ullualunni, savaaqqap pisussinnaalernissaata tungaanut, immaqa kissumiartarpaa qallersaatimiluunniit qullunneraniitittarlugu.“ (Esaja 40:10, 11) Erseqqippoq savanik paarsisuulluartoq nukittuujusariaqarlunilu qajassuartuusariaqartoq.

8. Daavip Jehovamik tatiginninnerminut pissutaasut suut eqqaavai?

⁸ „[Jehova] paarsisigaara“ — Ataatatta qilammiusup taamatut allaatigineqarnera naleqqutingaarami, ilaa? Tussiaat 23 misissortillugu paasissavarput Guutip paarsisutut nukittuutut qajassuartutullu qanoq isumassortaraatigut. Tuss 23 Versi 1-imi Daavip Guutip savaatini ’sumik ajorsaateqannginniassammata’ pisariaqartunik tamanik iliuuseqarumaarneranik qularutiginninnginnini ersersippaa. Versini tulliuttuni Daavip qulannginnerminut pissutaasut pingasut uku eqqaavai: Jehovap savaatini siulersortarpai, illersortarpai aamma nerlersortarpai. Pissutaasut taakku ataasiakkaarlugit misissoriartigik.

„Siulersortaraanga“

9. Pissutsit eqqissinartut suut Daavip allaatigai, savallu qanoq ilillutik taamaattumik ivigartorfissarsisinnaappat?

⁹ Siullermik, Jehovap innuttani siulersortarpai. Daavi ima allappoq: „Uninngaartittaraanga narsani qorsuusuni, tasissersuuttaraanga [siulersortaraanga, NV] imermut eqqissisimanartumut. Kingumut nakussatsittaraanga, ingerlatittaraanga aqqutaalluartut atuartillugit pissutigalugu aqqi.“ (Tussiaat 23:2, 3) Daavip tassani allaatigai savaatit eqqissillutik narsani naggorissuni aqupisut — nalerisimaarnermut toqqissisimanermullu assersuutitut. Oqaaseq hebræerisooq ’narsat qorsuusut’-mik nutserneqartartoq isumaqaraluarpoq ’sumiiffiit alianaatsut’. Ilimananngilaq savat namminneq eqqissillutik aqupiffigisinnaasaminnik pitsaasumik ivigartorfissarsisinnaanerat. ’Sumiiffimmut alianaatsumut’ taamaattumut paarsisuata siulersortariaqarpai.

10. Guutip uagutsinnik tatiginninnini qanoq ersersippaa?

¹⁰ Ullumikkut Jehovap qanoq siulersortarpaatigut? Ilaatigut maligassiuinermigut taamaaliortarpoq. Oqaasiani kajumissaarneqarpugut ’Guuti maligassareqqullugu’. (Efesosimiut 5:1) Versini tamatuma ataqatigisaani nallittuineq, isumakkeerfiginninneq asanninnerlu eqqaaneqarput. (Efesosimiut 4:32; 5:2) Pissutsinik pitsaasunik tamakkuninnga ersersitsineq eqqarsaatigalugu Jehova ilumut maligassiuilluarnerpaavoq. Imminut ilaaqqunera piviusorsiunnginnerua? Naamik. Siunnersuut isumassarsiarititaasoq taanna Guutip uagutsinnik tatiginninneranut ersiutaalluarpoq. Qanoq? Guuti assilillugu pinngortitaavugut, taava imaappoq ileqqussatigut pissusilerneqarnikuullutalu anersaakkut ittunik paasinnissinnaassuseqartugut. (1 Mosesi 1:26) Taamaattumik Jehovap nalunngilaa naammalluinnanngitsuugaluarluta  taassuma pissusiisa assinginik ineriartortitsisinnaasugut. Eqqarsaatigeriaruk — Guutitta asannittup qularinngilaa ilaarsinnaagitsinni. Taamaaliorutta ’eqqissinartumut’ alianaatsumut siulersussavaatigullusooq. Silarsuarmi nakuuserfiusumi matumani inuugaluarluta ’eqqissinartumik qasuersaassaagut’ misigissallutigulu eqqissineq Guutimit akuerisaanitsinnik ilisimaarinninnitsinnik pissuteqartoq. — Tussiaat 4:9; 29:11.

11. Jehova savaatiminik siulersuigaangami suut eqqarsaatigalugit siulersuisarpa, tamannalu uagutsinnut piumasaqaataani qanoq erserpa?

¹¹ Jehovap qajassuarluni erinitsajuillunilu siulersortarpaatigut. Savanik paarsisup savaatimi pisinnaasaasa killeqarnerat eqqarsaatigisarpaa ’ingerlasinnaanerannullu naleqquttumik’ siulersortarlugit. (1 Mosesi 33:14) Aamma Jehovap savaatini siulersortarpai taakkununnga naleqquttumik sukkassuseqarluni. Piginnaanivut pissutsillu atukkavut eqqarsaatigalugit siulersortarpaatigut. Sukkassutsini uagutsinnut naleqqussartarpaalusooq sapikkatsinnillu piumaffiginngisaannarluta. Piumasaraali tarnikkut iluunngarluta kiffartorfigissagitsinni. (Kolossemiut 3:23) Taavami utoqqalisimagaanni siornatigutullu iliuuseqartigisinnaajunnaarluni? Pisinnaasalluunniit killeqalernerannik kinguneqartumik perulunnartumik nappaateqaraanni? Ingammik pissutsinik taamaattunik atugaqarluni tarnikkut iluunngarluni kiffartoqquneqarneq assut kajumissinarpoq. Tarneqanngilaq assigiilluinnartunik. Tarnikkut iluunngarluni kiffartorneq tassaavoq nukiit tamaasa atorlugit nammineq sapinngisaq naapertorlugu Guutimut kiffartorneq. Sukataarsinnaanitsinnik killiliisunik sanngiissuteqaraluarluta, uummatikkut iluunngarluta pallorfiginninnerput Jehovap pingaartippaa. — Markusi 12:29, 30.

12. Mosesip inatsisaani allassimasup suup ersersippaa Jehova savaatimi ’ingerlasinnaanerannut naapertuuttumik’ siulersuisartoq?

¹² Jehovap savaatimi ’ingerlasinnaanerannut naleqquttumik’ siulersuisarnera erseqqissarniarlugu Mosesip inatsisaani pilliutit taarsiissutit ilaat pillugit qanoq allassimasoqarnersoq misissorsinnaavarput. Jehovap piumasaraa qujamasungaarluni pitsaasunik pilliuteqartoqartarnissaa. Aammattaaq pissutsit atukkat naapertorlugit assigiinngitsunik pilliuteqartoqarsinnaavoq. Inatsisini ima allassimasoqarpoq: „[Angut] savamik pilliuteqassalluni akissaqanngikkuni . . . sassaatissavai tuit quluartartut marluk imaluunniit tuit piaqqat marluk“. Tuinummi marlunnut akissaqanngikkuni? Taava „qajuusat aseqqorissut“ pilliutigisinnaavai. (3 Mosesi 5:7, 11) Paasinarsivoq Guutip kiffani sapigaannik piumaffigineq ajorai. Guutilu allanngorneq ajormat, uagutsinnut ingasattajaartunik piumasaqanngisaannarnera tunniussinnaasatsinnillu nuannaarutiginnittarnera tuppallersaatigisinnaavarput. (Malaki 3:6) Paarsisumit taama paasinnitsigisumit siulersorneqarluni nuanningaarami!

„Siooragisaqanngilanga najoramma“

13. Tussiaat 23:4-mi Jehova qanitarerpalunnerullugu Daavi qanoq oqaluppa, tamannalu sooq tupinnanngila?

¹³ Daavip Jehovamik tatiginninnerminut pissutaasoq aamma alla eqqaavaa: Jehovap savaatini illersortarpai. Ima allassimavoq: „Ingerlagaluarumaluunniit qooqqukkut toqup taartitaatigut siooragisaqanngilanga najoramma, ungoorissutit ajaappissallu tuppallersaatigigakkit.“ (Tussiaat 23:4) Maanna Daavip Jehova qanitarerpalunnerullugu toqqaannartumik oqaluuppaa kinaassusersiut ’illit’ atorlugu. Tamanna tupinnanngilaq,  Daavimmi eqqartorpaa akerlilersorneqarnermi naammagalugu atornissaanut Guutimit qanoq ikiorneqarsimalluni. Daavip arlaleriarluni qooqqut taartut aqqutigisarsimavai — inuunera navianartorsiortarsimavoq. Annilaanganiinnartanngilarli, malugisimagamiuk Guutip — ungoorissutini ajaappissanilu atorlugit — najoraani. Illersorneqarnerminik ilisimaarinninnini Daavip tuppallersaatigaa qularnanngitsumillu tamanna Jehovamut qaninnerulissutigalugu. *

14. Jehovap illersuisarnera pillugu Biibilimi qanoq qularunnaarsinneqarpugut, tamannali qanoq isumaqanngila?

¹⁴ Ullumikkut Jehovap savaatini qanoq illersortarpai? Biibilimi qularunnaarsinneqarpugut akerlilersuisut, anersaapiluit inuillu, taassuma savaatai nungutissinnaanngisaannassagaat. Jehovap nungutinneqarnissaat akuerinngisaannassavaa. (Esaja 54:17; 2 Petrusi 2:9) Imaanngilarli Paarsisitta ajunaarnernut tamanut illersussagaatigut. Inuttut allatulli ajornartorsiuteqartarpugut, aamma kristumiut ilumoortut tamarmik misigisartagaat akerlilersorneqarneq misigisarparput. (2 Timotheusi 3:12; Jaaku 1:2) Ilaannikkut misigisinnaavugut ’qooqqukkut toqup taartitaatigut ingerlalluta’. Assersuutigalugu immaqa malersorneqarneq napparsimanerluunniit pissutigalugu toqungajappugut, qanigisattaluunniit ilaat perululluni napparsimalerpoq toqulluniluunniit. Inuunitsinni nikallunganerpaasutut misigiffitsinni Paarsisitta najorumaarpaatigut illersorumaarlutalu. Qanoq?

15, 16. (a) Ajornartorsiutitta anigornissaannut Jehovap qanoq ikiortarpaatigut? (b) Pissutsini erloqinartuni Jehovap uagutsinnik qanoq ikiuisarnera oqaluttuariuk.

¹⁵ Jehova neriorsuinikuunngilaq tupinnartuliornikkut akuliutissalluni. * Mannali qularisariaqanngilarput: Jehovap ajornartorsiutitta anigornissaannut ikiussavaatigut. Ilisimassusermik tunisinnaavaatigut ’tamalaanik misilinneqartarnitta’ naammagalugit atornissaannut. (Jaaku 1:2-5) Savanik paarsisup ajaappissani uumasunik qaasuttunik qanillinaveersaartitsinerinnarmut atortanngilaa, aammali savanut qajassuartumik tinnersaatigisarpaa eqqortukkut ingerlaniassammata. Jehovap aamma immaqa uppeqatitta ilaat atorlugu „tinnersarsinnaavaatigut“, Biibilimi siunnersuut pissutsini uagut atukkatsinnerpiaq iluaqutigingaarsinnaasarput inuunitsinni atulerniassagatsigu. Aammattaaq Jehovap pinertusaarnissamut nakussatsissinnaavaatigut. (Filippimiut 4:13) Anersaani illernartoq atorlugu ’pissaanermik pissusissamik akimuisumik’ tunisinnaavaatigut. (2 Korinthimiut 4:7, NV) Guutip anersaava iluaqutigalugu misilinneqarnerit suulluunniit Saatanimeersut naammagalugit atorsinnaavavut. (1 Korinthimiut 10:13) Jehovap uagutsinnik ikiueriaannaajuaannarnera nalunagu tuppallernangaarami, ilaa?

¹⁶ Aap, qooroq taartoq sunaluunniit ingerlavigigaluarutsigu kisimiinnavianngilagut. Paarsisitta najorumaarpaatigut ikiorumaarlutalu, immaqa periaatsit aallaqqaammut paasilluanngisavut atorlugit. Maluginiariaruk kristumiup utoqqaanertap qaratsamigut kræfteqalersimasup oqaluttuaa: „Miserratigisinnaanngilara aallaqqaammut Jehovap kamaanneraanga imaluunniit ilumut asaneraanga eqqarsaatigigakku. Aalajangiusimavarali Jehova qimanniarnagu. Isumakuluutinnilli oqaluttuuppara. Jehovallu ikiorpaanga. Arlaleriaqaluni anersaakkut qatanngutikka aqqutigalugit tuppallersartarpaanga. Amerlasuut namminneq perulullutik napparsimasimanerminnik oqaluttuuppaannga. Eqqarsaatigilluakkanik oqaaseqarnerisa eqqaasippaannga misigisakka immikkut ittuunngitsut. Inussiarnerlutik pisariaqartitannik ikiuiumanerat killitsinnartoq pissutigalugu qulariunnaarpara Jehovamit suli iluarineqarlunga. Soorunalimi suli nappaatiga akiortariaqarpara, naluaralu tamanna qanoq kinguneqassanersoq. Qularinngilluinnarparali Jehovap najoraanga, misilinneqarninnilu tamatumani ikiortuarumaaraanga.“

„Nerriviliuupparma“

17. Tussiaat 23:5-imi Daavip Jehova qanoq allaatigaa, aamma sooq tamanna savanik paarsisumik assersuummut naleqquppa?

¹⁷ Maanna Daavip Paarsisiminik tatiginninnerminut  pissutaasut pingajuat eqqaavaa: Jehovap savaatini naammangaartunik nerisittarpai. Daavi ima allappoq: „Nerriviliuupparma akeqqama takkuanni. Niaqora uuliamik tanippat, ermusera ulikkaavissimavoq.“ (Tussiaat 23:5) Versimi tamatumani Daavip Paarsisini qaaqqusisutut tukkortutut naammangaartunik nerisassiisutut imigassiisutullu allaatigaa. Assersuutit taakku marluk — savanik paarsisoq isumassuisoq qaaqqusisorlu tukkortoq — isumaat assigiipput. Savanimmi paarsisuulluartup ilisimasariaqarpaa sumi ivigartorfissaqqissoqarnersoq sumilu imeqarluarnersoq savaatit ’ajorsaateqaqqunagit’. — Tussiaat 23:1, 2.

18. Jehovap qaaqqusisutut tukkortuunera qanoq erserpa?

¹⁸ Aamma uagut Paarsiserput qaaqqusisutut tukkortuua? Aap, taamaappoq! Eqqarsaatigikkit anersaakkut inuussutissat pisakkatta pitsaassusiat, amerlassusiat tamalaajunerallu. Inussiaqatigiit ilumoortut silatuullu aqqutigalugit Jehovap ataatsimiinnerni ataatsimeersuarnernilu atuakkat atuagassiallu atoriannaasut saqqummiussassallu imaqarluartut uagutsinnut tunniuttarpai. Tamakku tamarmik anersaakkut pisariaqartitatsinnut matussutaapput. (Matthæusi 24:45-47) Anersaakkut inuussutissanik amigaateqanngilluinnarpugut. „Kiffaq ilumoortoq silatoorlu“ Biibilinik Biibililersaarutinillu millionilinnik maanna oqaatsinut 413-inut nutserneqarsimasunik saqqummersitsisimavoq. Jehovap anersaakkut inuussutissanik assigiinngitsorpassuarnik pilersorpaatigut — ilaat ’immummik’ taaneqartut, tassa ajoqersuutit tunngaviusut Biibilimeersut, ilaat ’tamuasarissanik’ taaneqartut, paasissutissat anersaakkut ittut itinerusut. (Hebræerit 5:11-14) Taamaattumik ajornartorsiuteqaleraangatta aalajangeruminaatsitaqaleraangattaluunniit, paasissutissat pisariaqartitarpiavut amerlanertigut pissarsiarisinnaasarpavut. Anersaakkut inuussutissat taakku piginagit qanoq iliussagaluarpugut? Tassami, Paarsiserput pilersuisuuvoq tukkortorujussuaq! — Esaja 25:6; 65:13.

„[Jehovap] illuani ineqassaanga“

19, 20. (a) Tussiaat 23:6-imi Daavip suna qularutiginagu oqaatigaa, uaguttaaq qanoq taassumatut qulanngissinnaavugut? (b) Allaaserisami tulliuttumi suna sammissavarput?

¹⁹ Paarsisimi Pilersuisimilu aqqutigisai eqqarsaatigeqqissaareerlugit Daavi ima isummerpoq: „Ajunngissutsip ilumoorsutsillu malittarissavaannga inuunera tamaat, [Jehovallu] illuani ineqassaanga ullussanni tamani.“ (Tussiaat 23:6) Daavip uummataa qujamasunnermik uppernermillu utsersortutut ippoq — pisimasut qujamasulluni eqqarsaatigai siunissarlu upperluarluni qilanaaralugu. Siornatigut savanik paarsisuusimasoq taanna toqqissisimavoq, nalunnginnamiuk Paarsisiminut qilammiusumut qanittuartilluni, soorlulusooq taassuma illuani najugaqarluni, Jehovap asannilluni isumassuinera misigiuassallugu.

²⁰ Tussiaat 23-mi oqaatsit nuannersut qujamasuutigingaarsinnaavavut! Daavip Jehovap savaatiminik siulersuisarnera, illersuisarnera nerisitsisarneralu pillugit allaaserinninnera kusanaqqeriarfissaqanngilaq. Daavip oqaasii qamannga pisut uagut pilluta tammatsaalineqarsimapput uaguttaaq Jehovamik paarsisitsitut isiginnissinnaanerput upperiniassagatsigu. Jehovamut qanittuartilluta, taassuma paarsisutut asannittutut isumassussavaatigut „ullussani tamani“, aap, naassaanngitsumik. Taassumunngali savaataasutut Paarsisersuatta, Jehovap, saqeqatiginissaa akisussaaffigaarput. Tamanna qanoq nassataqarnersoq allaaserisami tulliuttumi sammissavarput.

[Quppernerup ataani ilanngussaq]

Eqqaamavigit?

• Sooq Daavip Jehovamik savanik paarsisumut assersuussinera assersuussilluarnerua?

• Jehovap siulersoraangamisigut atukkatsinnik paasinnilluni qanoq ersersittarpaa?

• Jehovap ajornartorsiutit naammagalugit atornissaannut qanoq ikiortarpaatigut?

• Jehovap qaaqqusisutut tukkortuunera qanoq erserpa?

[Atuaqqissaarnermi apeqqutit]

[Qupp. 5-mi assiliartaq]

Itsaq Israelimi savanik paarsisup siulersuisarneratut Jehovap savaatini siulersortarpai