Misigissutsitta aqunnissaannut iluaqutissaq

ILAANNIKKUT misigisarpit inuunerit eqqarsaatinit ajortunit aqunneqartoq? Kamajavit, pakatsiavit imaluunniit eqqissiveerutiavit? Ulluinnarni inuunermi isumakuluutit aliasuutigeqqajaasarpigit? Taamatut misigisaraanni ikiortissarsiorfissaqarpa?

Misigissutsit aallaavigalugit periartarneq inuunerup ilagiinnarpaa. Inuuneq soqutiginarneruliinnassaaq taakku aqunneqarsinnaatillugit. Biibilimili ima allassimavoq: „Innarliinerit ilisimatooq pillingaartittarpaat.“ (Oqaluussisartup oqaasii 7:7, 1900/1961) Kia avatangiisimini pisut, silarsuarmi ajutoornerit peqqarniisaarnerillu ulluinnarsiutaasut, sunnertissutigineq ajorpai? Biibilimili aamma eqqaaneqarpoq „inummut pitsaanerpaajusoq sulinermini nuannaaruteqarnissaa“. (Oqaluussisartup oqaasii 3:22) Inuuneq ilorrisimaarnarnerulersinniarlugu misigissutsinik nuannersunik ineriartortitsisariaqarpugut nuannaarnerlu ilinniarlutigu. Qanoq ililluta misigissutsikkut nuannaarnerulersinnaavugut aamma qanoq ililluta misigissutsit ajortut killilersinnaavavut?

Atoriaannaasunik imminut najoqqutassinneq misigissutsitsinnik nuanniitsunik akiuinissamut iluaqutaagajuttarpoq. Nammineq iliuuseqarfigisinnaanngisatsinnik ernumassuteqaraangatta ernumaannaavinnissaminngarnit allamik suliassarsiortarnissarput pitsaanerussannginnerpa? Eqqissilluni pisuttuarnikkut, nipilersukkanik eqqissisimaarnartunik tusarnaarnikkut, assoroornartumik timersornikkut allamilluunniit ikiortarialimmik ajunngitsuliorfiginninnikkut nuanniitsunik eqqarsaatersornissaraluaq pinngitsoortinneqarsinnaavoq nuannaalertoqarsinnaallunilu. — Apustilit Suliaat 20:35.

Nuanniitsunik eqqarsaateqarnaveersaariaaseq pitsaanerpaaq tassaavoq Pinngortitsisumik tunaarinninneq. Eqqarsaatit nuanniitsut eqqarsaatigiunnaarneq ajulerutsigit Guutimut qinunikkut ’isumakuluutivut tamaasa taassumunnga pisittariaqarpavut’. (1 Petrusi 5:6, 7) Biibilimi ima neriorsoqqissaarneqarpugut: „[Jehovap] qanippai sequmissimasumik uummatillit. . . . Iluartoq ajunaarnernik amerlasuunik eqqorneqartarpoq, [Jehovalli] tamakkunannga tamanit annaattarpaa.“ (Tussiaat 34:19, 20) Qanoq ililluta Guuti ’ikiortigalugulu aniguisitsisigigipput’ qulariunnaarsinnaavarput? (Tussiaat 40:18) Biibilimik atuaqqissaarnitsigut tassanilu Guutip kiffami ataasiakkaat atugarisaannik soqutiginnittuuneranik assersuuterpassuarnik eqqarsaatiginninnitsigut. (wE 9/15 05)