Guuti imaluunniit inuk?

„UANGA silarsuarmut qaammaqqutaavunga. Uannik malinnittoq taarsiunngisaannassaaq, qaammaqqulli inuuneqartitsisoq pigissavaa.“ (Johannesi 8:12) Taamatut oqaaseqartoq tassaavoq Jiisusi Kristusi. Angutip ilinniagartuup ukiuni hundredelinni siullerni inuusup Jiisusi tassaanerarpaa „ilisimassutsikkut paasinninnikkullu pisuussutit tamarmik isertugaaffigisaat“. (Kolossemiut 2:3) Aammattaaq Biibilimi ima allassimavoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Anersaakkut pisariaqartitavut matussusissagutsigik Jiisusi Kristusi pillugu eqqorluartumik ilisimasaqarneq pisariaqarpoq.

Nunarsuarmi sumi tamaani inuppassuit Jiisusi Kristusi pillugu tusarsimapput. Qularutissaanngilaq inuiaat oqaluttuarisaaneranni sunniuteqangaarsimanera. Silarsuarmi sumiiffinni amerlanerni qaammatisiutit ukioq Jiisusimut inunngorfiusorineqartoq aallaavigaat. The World Book Encyclopedia-mi ima allassimavoq: „Inuppassuit ukioq ukiup tamatuma siorna taaniaraangamikku oqartarput Kr.s., imaluunniit Kristusip siorna. Ukioq ukiup tamatuma kingorna taasarpaat A.D., imaluunniit anno Domini (Naalakkap ukiua).“

Jiisusilli kinaassusia pillugu isummat imminnut akerleriittut amerlapput. Inuit ilaat isumaqarput tassaaginnartoq inuk maluginiarnartoq oqaluttuarisaanermi sunniutilik. Allat Guutitut Ajugaqanngitsutut pallorfigaat. Hindut ilaat isumaqarput Jiisusi Kristusi hindullu guutiat arnaq Krishna, inuppassuit isumaat malillugu tassaasoq guuti inuttut timeqalersimasoq, naligiittut. Jiisusi tassaaginnarsimava inuk, imaluunniit pallorfigisassaasimava? Kinaasimava? Suminngaaneersimava? Qanoq ittuusimava? Massakkullu sumiippa? Atuakkami Jiisusi pillugu paasissutissiilluartumi apeqqutit taakku akineqarput. Taakku allaaserisami tulliuttumi sammineqassapput.