Inuiaat ’immikkut oqaasillit tamalaat’ nutaarsiassaq nuannersoq tusarpaat
Inuiaat ’immikkut oqaasillit tamalaat’ nutaarsiassaq nuannersoq tusarpaat
„Inuiaat assigiinngitsut tamarmik [Immikkut oqaasillit tamalaat, 1900/1961] angutitaasa ilaasa quliullutik . . . oqarumaarput: ’Ingerlaqatigissavassi tusaratsigu Guutip najoraasi.’“ — ZAKARIA 8:23.
1. Jehovap oqaatsit assigiinngitsorpassuit atorlugit kristumiussutsimik oqaluussissutiginninnerup pitsaanerpaamik aallartinnissaa qanoq isumagaa?
SUMIIFFIK piffissarlu pitsaaneroqqissinnaasimanngilaq. Ukiumi 33-mi piinsip ulloraa. Sapaatit-akunnialui tamatuma siorna juutit ilannguttullu juutiunngitsut Romamiut naalagaaffissuanni minnerpaamik sumiiffinnit 15-ineersut nunanillu allaneersut Jerusalemimukaasimapput poorskisioriartorlutik. Ulloq taanna taakkua ilaasa tusindillit tusarnaarpaat inuinnaat anersaaq illernartumik ilumioqangaartut oqaatsit Romamiut naalagaaffianni oqaaserineqartut ilarpassui atorlugit nutaarsiassamik nuannersumik oqaluussissutiginnittut. Maanna inuit itsaq Babelimi pisoqarsimaneratut pinnatik, inuit tamarmik immikkut namminneq oqaatsitik atorlugit oqaatigineqartut paasivaat. (Apustilit Suliaat 2:1-12) Pisimasoq tamanna ilagiit kristumiut pilersinneqarnerannut nunarsuarlu tamakkerlugu oqaatsit assigiinngitsorpassuit atorlugit ilinniartitsinerup ullumikkumut suli ingerlanneqartup aallartinneranut ersiutaavoq.
2. Jiisusip ajoqersugaasa ukiumi 33-mi piinsip ulluani tusarnaartutik inuiannit assigiinngitsuneersut qanoq ilillutik tupigusutsippaat?
2 Jiisusip ajoqersugai grækerisut, oqaatsit taamanikkut atorneqarnerusut atorlugit, oqalussinnaasimagunarput. Aamma hebræerisut, oqaatsit naalaffimmi atorneqartartut atorlugit, oqaluttarput. Piinsilli ulluani katersorsimasut tamarmik immikkut oqaasii atorlugit oqalupput, tamanillu tamanna tupigusuutigineqarpoq. Tamanna qanoq kinguneqarpa? Tusarnaartut ilumoortut pingaarutillit tusakkatik namminneq oqaatsitik atorlugit oqaatigineqartut qamuuna attortissutigaat. Ullup naalernerani ajoqersukkat amerlanngitsut 3000-it sinnerlugit amerlassuseqalersimapput! — Apustilit Suliaat 2:37-42.
3, 4. Ajoqersukkat Jerusalemimit, Judæamit Galilæamillu noorartillugit oqaluussineq qanoq siaruaappa?
3 Pisimasup pingaarutillip tamatuma kinguninngua Jerusalemimi malersuisoqangaalerpoq, ’siammartitaasimasullu angalaartalerput oqaaserlu nalunaajaatigisalerlugu’. (Apustilit Suliaat 8:1-4) Assersuutigalugu Apustilit Suliaat-ni kapitali 8-mi Filipi, oqaluussisartoq grækerisut oqaasiliugunartoq, allaatigineqarpoq. Filipip Samariamiut oqaluussiffigai. Aammattaaq kunngip atorfilittaa Etiopiamiu Kristusi pillugu tusarliussamik ilassinnittoq oqaluussiffigaa. — Apustilit Suliaat 6:1-5; 8:5-13, 26-40; 21:8, 9.
4 Kristumiut Jerusalemip, Judæap Galilæallu killeqarfiisa avataannut noorartillutik najugassarsiortillutillu inuiaqatigiissutsikkut oqaatsitigullu nutaanik unamminiagassaqalerput. Kristumiut taakkua ilaasa immaqa juutit kisiisa oqaluussiffigisarsimavaat. Ajoqersugarli Lukasi ima allappoq: „Taakkua ilaasa Cypernimiut Kyrenemiullu Antiokiamut pisut Naalakkamik Jiisusimik iivangkiiliu grækerinuttaaq nalunaajaatigaat.“ — Apustilit Suliaat 11:19-21.
Guuti kinaassusersiortuunngitsoq tamanut tusarliussassaqartoq
5. Nutaarsiassamut nuannersumut tunngatillugu Jehovap kinaassusersiortuunnginnera qanoq takuneqarsinnaava?
5 Siuariartorneq taamaattoq Guutip periaasianut naapertuuppoq; taannami kinaassusersiortuunngilaq. Apustili Petrusi inuiannut allanut isiginnittaatsimi allanngortinnissaanut Jehovamit ikiorneqareerluni qujamasungaarluni ima oqarpoq: „Ilumut paasilerpara Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.“ (Apustilit Suliaat 10:34, 35; Tussiaat 145:9) Apustili Paulusi, kristumiunik malersuisuusimasoq, oqarami ’inuit tamalaat annaanneqarnissaat Guutip piumasarigaa’, taassumattaaq uppernarsarpaa Guuti kinaassusersiortuunngitsoq. (1 Timotheusi 2:4, NV) Pinngortitsisup kinaassusersiortuunnginnera takuneqarsinnaavoq Guutip naalagaaffianik neriuut kikkunnut tamanut ammammat, angutaaneq arnaanerluunniit, nagguik, inuiaassuseq qanorlu oqaaseqarneq apeqqutaatinnagu.
6, 7. Nutaarsiassap nuannersup nunarsuaq tamakkerlugu oqaatsit assigiinngitsorpassuit atorlugit siammarterneqarnissaa Biibilimi siulittuutini sorlerni siulittuutigineqarpa?
6 Nunarsuaq tamakkerlugu oqaluussinermik annertusisitsineq tamanna ukiut hundredellit arlallit tamatuma siorna siulittuutigineqarpoq. Danielip siulittuutaa naapertorlugu Jiisusi „naalagaassusermik naalannaammillu kunngiussusermillu tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat“. (Danieli 7:14) Atuagassiap matuma oqaatsinut 151-inut saqqummersinneqartarnera aamma inuit Jehovap naalagaaffia pillugu atuarsinnaaniassammata nunarsuaq tamakkerlugu agguaanneqartarnera Biibilimi siulittuutip tamatuma eqquunneranut uppernarsaataavoq.
7 Biibilimi siulittuutigineqarpoq inuit assigiinngitsorpassuarnik oqaasillit Biibilimi tusarliussamik inuunartumik tusarumaarfissaat. Zakariap pallorfiginninnerup ilumoortup inuppassuarnut kajungernartuujumaarnera siulittuutigaa: „Taamaalisukkut inuiaat assigiinngitsut tamarmik [Immikkut oqaasillit tamalaat, 1900/1961] angutitaasa ilaasa quliullutik angut Judakkuusoq ataaseq [kristumiu anersaamit kinguaassiarineqartoq, ’Israelimut Guutip pigisaanut’ ilaasoq] atisaata nuuagut tigullugu oqarumaarput: ’Ingerlaqatigissavassi tusaratsigu Guutip najoraasi.’“ (Zakaria 8:23; Galatiamiut 6:16) Aamma apustili Johannesip takorruukkamini takusani ima oqaluttuarai: „Takuat, inuppassuit amerlangaaramik kisinneqarsinnaanngitsut, inuiaqatigiinnit naggueqatigiinnillu inuiannillu immikkullu oqaasilinnit tamanit pisut, issiavissaarsuup sioraani Savaaqqallu saavani qeqarput.“ (Saqqummersitat 7:9) Siulittuutit taakkua eqquunnerat takoreerparput!
Inuit tamalaat nutaarsiassamik nuannersumik tusarlerneqarput
8. Pissutsit qanoq ittut pissutigalugit oqaluussinitsinni naleqqussaanissaq pisariaqarsimava?
8 Ullumikkut inuit amerligaluttuinnartut nunagisartik qimattarpaat. Nunarsuarmut siaruarneq inuit noorarnerujussuannik pilersitseqqippoq. Inuppassuit sorsuffiusuneersut aningaasatigullu pissakilliorfiusuneersut nunanut eqqissisimaffiunerusunut noorarsimapput, pigisatigut toqqissisimalernissartik neriuutigalugu. Nunarpassuarni nunasisorpassuaqalernerata qimaasorpassuaqalerneratalu kingunerisaanik inunnik allamiutut oqaasilippassuaqalersimavoq. Assersuutigalugu Finlandimi oqaatsit assigiinngitsut 120-nit amerlanerusut oqaaserineqarput, Australiamilu oqaatsit assigiinngitsut 200-nit amerlanerusut oqaaserineqarlutik. USA-mi illoqarfimmi ataasiinnarmi — San Diego-mi — oqaatsit assigiinngitsut 100-nit amerlanerusut tusaaneqarsinnaapput!
9. Oqaluussiffigisartakkatsinni allamiutut oqaasilinnik najugaqartoqarnera qanoq isigissavarput?
9 Najukkatsinni allatut oqaasilinnik najugaqartoqarnera oqaluussinitsinnut akornutaasutut isigaarput? Naamerluinnaq! Qujarupparpulli oqaluussiffigisartakkatsinnik — ’narsaatinik qaqortissimasunik katersuiffigeriaannanngorsimasunik’ — annertusisitsinertut. (Johannesi 4:35) Inuit anersaakkut pisariaqartitaqarnerminnik miserratiginninngitsut isumassorniarlugit sapinngisatsinnik iliorpugut, oqaatsit inuiaassuserlu apeqqutaatinnagit. (Matthæusi 5:3) Tamatuma kingunerisaanik inuit ’immikkut oqaasillit’ amerliartuinnartut ukiut tamaasa Kristusimut ajoqersuganngortarput. (Saqqummersitat 14:6) Assersuutigalugu Tysklandimi aggustimi 2004-mi oqaatsit 40-t missaat atorlugit oqaluussisoqarpoq. Tamatuma nalaani Australiami oqaatsit 30-ngajaat atorlugit nutaarsiassaq nuannersoq oqaluussissutigineqarpoq, ukiut quliinnaat matuma siorna oqaatsit 18-it atorlugit oqaluussissutigineqartoq. Grækerit Nunaanni Jehovap Nalunaajaasui oqaatsit assigiinngitsut 20-ngajaat atorlugit inuit oqaluussiffigisarpaat. Nunarsuaq tamakkerlugu Jehovap Nalunaajaasuisa 80 procentii missiliorlugit tuluttut, oqaatsit nunarsuaq tamakkerlugu oqaaserineqartut siammarsimanerpaat atorlugit, oqalunneq ajorput.
10. Inunnik ’inuiannit tamaneersunik’ ajoqersuganngortitsiortornermut tunngatillugu oqaluussisartut tamarmik immikkut qanoq iliortussaappat?
10 Erseqqippoq Jiisusip ’inunnik inuiannit tamaneersunik ajoqersuganngortitsinissamik’ peqqussutaa suliarineqartoq! (Matthæusi 28:19, NV) Jehovap Nalunaajaasuisa suliassaq tamanna nunani 235-ni, atuakkanik atuagassianillu oqaatsinut 400-nit amerlanerusunut nutserneqarsimasunik agguaavigisartakkaminni, kajumillutik aallussilluarlutillu suliaraat. Jehovap peqatigiissortaasa inuit tusarlerniarlugit pisariaqartunik atortussaqarnissaq isumagisarpaat, oqaluussisartulli tamarmik immikkut tusarliussaq Biibilimeersoq ’kikkunnut tamanut’ oqaatsit paasilluarnerusinnaasaat atorlugit tusarliunniarlugu namminneq iliuuseqartariaqarput. (Johannesi 1:7) Ataasiussuseqarluni iliuuseqartoqarnera tamanna pissutigalugu inuit millionillit assigiinngitsorpassuarnik oqaasillit nutaarsiassaq nuannersoq iluaqutigisinnaanngorpaat. (Romamiut 10:14, 15) Aap, tamatta immikkut suliniuteqarnerput pingaaruteqarpoq!
Unamminiarnartoq iliuuseqarfigineqarpoq
11, 12. (a) Unamminiarnartut suut iliuuseqarfigisariaqarpavut, anersaarlu illernartoq qanoq ikiuisarpa? (b) Inuit ilitsoqqussaralugit oqaasii atorlugit oqaluussiffiginissaat sooq amerlanertigut pitsaanerusarpa?
11 Ullumikkut oqaluussisartorpassuit allamiut oqaasiinik ilinniarusupput, naatsorsuutigissanngilaalli Guutip anersaavata tunissutaanit tupinnartuliornikkut allamiutut oqalussinnaalersinneqarnissartik. (1 Korinthimiut 13:8) Allamiut oqaasiinik ilinniarneq imaannaanngitsorujussuuvoq. Allamiutut oqalussinnaareersut allaat immaqa eqqarsartaasertik periaasertillu allanngortittariaqarpaat tusarliussaq Biibilimeersoq inunnut allamiutut oqaasilinnut, allamik tunuliaqutalinnut kulturilinnullu, kajungernartunngortinniarlugu. Aamma nunaseqqammersut ittoortuugajullutillu tunuarsimaartuugajuttarput, taakkualu eqqarsartaasiat paasiniarlugu ilungersuussisoqartariaqarpoq.
12 Taamaattorli anersaaq illernartoq suli Jehovap kiffaanik sunniisarpoq allamiutullu oqaasilinnut oqaluussiniarneranni ikiortarlugit. (Lukasi 11:13) Anersaap tupinnartuliornikkut oqaatsitigut piginnaaneqalersinnata, inunnik uagut oqaatsitsinnik oqalunngitsunik oqaloqatiginnerusunnerulersissinnaavaatigut. (Tussiaat 143:10) Inuit oqaatsit sungiusimalluanngisaat atorlugit oqaluussiffigigaangatsigit tusarliussarlu Biibilimeersoq pillugu ilinniartikkaangatsigit imaassinnaavoq killikkivut. Uagutsinnulli tusarnaartut uummataat killinniarlugit ilitsoqqussaralugit oqaasiisa — tassa oqaatsit misigissusiinik, pissutaannik neriugisaannillu ilorlerpaanik attuisut — atornissaat amerlanertigut pitsaanerusarpoq. — Lukasi 24:32.
13, 14. (a) Inuit ilaasa allamiutut oqaluussinissamut suna kajumississutigisarpaat? (b) Imminut pilliutigeriaannaanerup anersaava qanoq ersersinneqartarpa?
13 Oqaluussisartorpassuit oqaluussiffigisartakkani allamiutut oqaluffiusuni kiffartulertarput takugaangamikku sallusuissut Biibilimeersoq ilassilluarneqartoq. Allat misigipput oqaluussinermi unamminiarnartoqarnerugaangat tamanna nakussatsissutigisarlugu. Europami kujasinnerusumi Jehovap Nalunaajaasuisa immikkoortortaqarfiisa ilaannit ima nalunaartoqarpoq: „Europap Kangisissuaneersorpassuit sallusuissummut qiisapput.“ Inunnik tusaarusuttunik ikiuineq nalerisimaarnangaarpoq. — Esaja 55:1, 2.
14 Suliassamili tamatumani isumaqarluartumik suleqataassagutta aalajangersimalluinnartariaqarlutalu imminut pilliutigeriaannaasariaqarpugut. (Tussiaat 110:3) Assersuutigalugu eqqaaneqarsinnaavoq Nalunaajaasorpassuit Japanimiut illoqarfissuarni najukkatik ilorrisimaarnartut qimallugit avinngarussimasunut nuussimasut Kinamiut nunasisut eqimattakkuutaat Biibilimik paasinninnissaannik ikiorniarlugit. Oqaluussisartut Amerikap kimmut sineriaani nalunaaquttap akunnera ataaseq akunnerilluunniit marluk biilerlutik Filippinerimiut najugaqarfiannut Biibilimik atuaqqissaaqateqariartortuartarput. Norgemi aappariit ilaqutariit Afghanistanimiut atuaqqissaaqatigisarpaat. Oqaluussisartut atuagassiaaraq Guutip sumik piumaffigaatigut? * tuluttooq norskisoorlu atortarpaat. Ilaqutariit Afghanistanimiut immikkoortut Persiamiutut, oqaatsit ilitsoqqussaralugit oqaatsiminnut darimut assingusut atorlugit, atuartarpaat. Tuluttut norskisullu oqaloqatigiittarput. Nunami allamiut nutaarsiassamik nuannersumik ilassinnikkaangata taamatut imminut pilliutigeriaannaasumik anersaaqarneq naleqqussarsinnaanerlu akissarsissutaangaartarpoq. *
15. Oqaatsit assigiinngitsorpassuit atorlugit oqaluussinermut tamatta qanoq peqataasinnaavugut?
15 Oqaatsit assigiinngitsorpassuit atorlugit sulinermut tamatumunnga illit peqataasinnaavit? Soormi illit oqaluussiffigisartakkanni allamiut oqaasii sorliit atorneqartarnersut maluginiartalerukku? Maluginiareerukku naqitaaqqanik atuagassiaaqqanillu oqaatsinut taakkununnga nutsikkanik nassarsinnaavutit. Atuagassiaaraq Godt nyt til folk af alle nationer, 2004-mi saqqummersinneqartoq, tassanilu tusarliunneqartoq paasiuminartoq nuannersorlu oqaatsinut assigiinngitsorpassuarnut nutserneqarsimasoq, Guutip naalagaaffianik neriuummik siaruarterinermi atortorineqarlualereerpoq.
’Takornartanik asannittariaqarpugut’
16. Qatanngutit angutit akisussaasut allamiutut oqaasillit ikiorniarlugit namminissarsiunngitsumik soqutiginninnertik qanoq ersersissinnaavaat?
16 Allamiut oqaasiinik ilinniaraluarutta ilinnianngikkaluaruttaluunniit tamatta nunami allamiunik najukkatsinni najugaqartunik anersaakkut ilinniartitseqataasinnaavugut. Jehovap innuttani ’takornartanik asanneqquai’. (5 Mosesi 10:18, 19) Illoqarfissuarmi Amerikami avannarlermiittumi ilagiit tallimat naalagaaffilersaarfik ataaseq ataatsimiiffigisarpaat. Naalagaaffilersaarfinni allarpassuarnisut ilagiit ukiumut ataasiarlutik qassinut ataatsimiittassanerlutik allanngortittarpaat, tamannalu pissutigalugu Kinamiut ataatsimiiffissaat sapaatikkut kingusinnerusumut nuunneqartussanngorpoq. Tamannali nunasisut ilarpassuisa neriniartarfinni sulisut takkussinnaannginnerannik kinguneqassaaq. Utoqqaanertat ilagiinni allaniittut soqutigittarlutik ataatsimiiffissatik naleqqussarpaat Kinamiut sapaatikkut siusinnerusukkut ataatsimiissinnaaniassammata.
17. Allamiutut oqaasillit ikiorniarlugit nuunniarlutik aalajangertut qanoq isigissavavut?
17 Nakkutilliisut asannittut qatanngutit angutit arnallu piukkunnarlutillu pikkorissut allamiutut oqaasillit ikiorniarlugit noorusuttut nersualaassavaat. Oqaluussisartut misilittagallit immaqa ilagiimminni maqaasineqassapput, nakkutilliisulli Lystrami Ikonionimilu utoqqaanertat misigisimanerattut misigipput. Utoqqaanertat taakku Timotheusi ilagiiminni iluaqutaalluaraluartoq taassuma Paulusi aallaqatiginialermagu noqinngilaat. (Apustilit Suliaat 16:1-4) Oqaluussinermi siuttuusut aporfigisanngilaattaaq nunami allamiut eqqarsartaasiat, inooriaasiat ileqquilu allaanerusut. Assigiinngissutilli ajunngitsumik isigisarpaat, nutaarsiassarlu nuannersoq pillugu pulaartakkatik attaveqarfigillualerniartarlugit. — 1 Korinthimiut 9:22, 23.
18. „Sulinissamut matu angisooq“ suna tamanut ammava?
18 Siulittuutigineqartutut nutaarsiassaq nuannersoq oqaluussissutigineqarpoq ’inuiaat immikkut oqaasillit tamalaat’ oqaasii atorlugit. Oqaluussiffigisartakkani allamiutut oqaluffiusuni amerliartornissamut suli periarfissaqarluarpoq. Oqaluussisartut eqeersimaartut tusindillit „sulinissamut matu angisooq“ taanna iserfigereerpaat. (1 Korinthimiut 16:9, NV) Oqaluussiffigisartakkanili taamaattuni soqutiginninnermik ineriartortitsissagaanni allattaaq pisariaqarput, tamannalu allaaserisami tulliuttumi sammineqassaaq.
[Quppernerup ataani ilanngussat]
^ imm. 14 Jehovap Nalunaajaasuinit saqqummersinneqartoq.
^ imm. 14 Allaaserisami „Små ofre bragte os store velsignelser“-mi Vagttårnet 1. apriili 2004-moortumi, qupp. 24-28-mi suli allanik assersuutissaqarpoq.
Uku nassuiarsinnaavigit?
• Tamanut kinaassusersiortuunnginneq eqqarsaatigalugu Jehova qanoq ilaarsinnaavarput?
• Oqaluussiffigisartakkatsinni inuit allamiutut oqaasillit qanoq isumaqarfigissavavut?
• Inuit ilitsoqqussaralugu oqaasii atorlugit oqaluussiffigisarnissaat sooq iluaqutaassava?
• Nunami allamiortavut qanoq isumassorsinnaavavut?
[Atuaqqissaarnermi apeqqutit]
[Qupp. 9-mi ungalusaq/nunap assinga]
(Allassimasut qanoq inissisimanersut naqitami takuneqarsinnaavoq)
Roma
KRETA
ASIA
FRYGIA
PAMFYLIA
PONTUSI
KAPPADOKIA
MESOPOTAMIA
MEDIA
PARTHIA
ELAMI
ARABIA
LIBYA
EGYPTENI
JUDÆA
Jerusalemi
[Immat tatsillu]
Imaq Akullersuaq
Sortehavi
Imaq Aappalaartoq
Persiap Kangerliumanersua
[Assiliartaq]
Ukiumi 33-mi piinsip ulluani inuit Romamiut naalagaaffianni sumiiffinnit 15-ineersut nunanillu allaneersut nutaarsiassap nuannersup oqaluussissutigineqarnera ilitsoqqussaralugit oqaatsiminnik tusarpaat
[Qupp. 10-mi assiliartat]
Nunami allamiorpassuit sallusuissut Biibilimeersoq ilassilluartarpaat
[Qupp. 11-mi assiliartaq]
Naalagaaffilersaarfiup allagartaa oqaatsit tallimat atorlugit allanneqarsimasoq