Jiisusi Kristusi kinaava?

TAKORLOORUK juuteq angut inuusuttoq Andreasimik atilik qanoq nuannaartigisimassasoq Jiisusi Nazaretimiu tusarnaaqqaaramiuk. Biibilimi allassimavoq Andreasip qatanngunni ornipallakkaa imalu oqarluni: „Missiarsi [imaluunniit Kristusi] naapipparput.“ (Johannesi 1:41) Oqaatsit hebræerisut grækerisullu „Missiarsi“-mik aamma „Kristusi“-mik“ nutserneqartartut isumaqarput „Tanitaq“. Jiisusi tassaavoq Tanitaq imaluunniit Guutip toqqagaa, siulersuisoq, imaluunniit naalagaq, neriorsuutigisaq. (Esaja 55:4) Allakkat-ni Missiarsi pillugu siulittuuteqarpoq, juutillu taamanikkut Jiisusi ilimasuutigaat. — Lukasi 3:15.

Qanoq nalunngilarput Jiisusi ilumut tassaasoq Guutip toqqagaa? Ukiumi 29-mi Jiisusi 30-nik ukioqartoq qanoq pisoqarnersoq eqqarsaatigeriartigu. Kuussuarmi Jordanimi kuisikkumalluni Johannesi Kuisisoq ornippaa. Biibilimi ima allassimavoq: „Jiisusi kuisereerluni erniinnaq imermit qaqimmat qilaat qulaagut ammarput, takuaalu Guutip anersaavata tuisut illuni aqqarfigigaani quliminut pilluni, nipilu qilannit tutsiuppoq: ’Tassa ernera asasara, nuannarisara.’“ (Matthæusi 3:16, 17) Iluarinnilluni taamatut oqaaseqartoq tusareerlugu Johannesip qularutigisimanavianngilaa Jiisusi tassaasoq Guutip toqqagaa, ilaa? Jiisusi Guutip anersaavanik illernartumik kuineqarnermigut Guutip naalagaaffiani tikiuttussami kunngissatut tanitanngorpoq, imaluunniit toqqaganngorpoq. Taamaalilluni Jiisusi tassaalerpoq Jiisusi Kristusi, imaluunniit Jiisusi Tanitaq. Qanoq oqarsinnaavugut Jiisusi tassaasoq Guutip ernera? Suminngaaneerpa?

Piulerpoq ’ullormik ersitsoqanngikkallarmat’

Jiisusip inuunera immikkoortunut pingasunut avinneqarsinnaavoq. Siulleq nunami inunngornera sioqquterujussuarlugu aallartippoq. Mika 5:1-imi allassimavoq ’taanna killinganit pilereersoq, ullormik ersitsoqanngikkallarmat’ (1900/1961). Jiisusilu imminut pilluni ima oqarpoq: „Uanga pavannga pivunga“ — tassa qilammit. (Johannesi 8:23) Anersaatut pissarsuartut qilammiissimavoq.

Pinngortitat tamarmik aallarnerfeqarput, taamaattumillu Guuti piffissap ilaani kisimiissimavoq. Ukiut kisissaanngitsut matuma siorna Guuti pinngortitsilluni aallartippoq. Kina pinngorteqqaarpaa? Biibilip atuagartaasa kingullersaanni Jiisusi ima taaneqarpoq: „Guutip pinngortitaasa pilerfiat.“ (Saqqummersitat 3:14) Jiisusi tassaavoq „pinngortitaani tamani erniusut siullersaat“. Tassami „taassumuuna suut tamarmik pinngortitaapput qilanni nunamilu, takussaasut takussaanngitsullu“. (Kolossemiut 1:15, 16) Aap, Jiisusi kisimi toqqaannartumik Guutimit pinngortitaavoq. Taamaattumik taaneqartarpoq Guutip ’ernituanik’. (Johannesi 3:16) Angajulliliaq aamma taaneqartarpoq „Oqaaseq“. (Johannesi 1:14) Sooq? Inuttut erniunngikkallarami qilammi Guuti sinnerlugu oqaaseqartartuugami.

’Pileqqaarneranni qilak nunalu’ pinngortitaammata, „Oqaaseq“ Jehova Guutimiippoq. Taannaavoq Guutip ima oqarfigisaa: „Inunnik pinngortitsisa immitsinnik assililluta uatsitut ittussanik!“ (Johannesi 1:1; 1 Mosesi 1:1, 26) Jehovap angajulliliaa Ataatami saavaniippoq uninngaannarnanilu suleqatigalugu. Ilisimassutsitut kinaassusilikkatut Ussatit 8:22-31-mi ima oqarpoq: ’[Pinngortitsisup] sanianiippunga suliortuullunga nuannarisaallungalu ullut tamaasa, saani pinnguartuinnarlunga’ (1900/1961).

Jehova Guuti ernituanilu sanileriillutik suleqatigiitsillutik imminnut ilisarisimallualersimassapput.  Ukiuni millionilinni taamatut suleqatigiilluarneq Guutip erneranut sunniuteqangaarsimassaaq. Erneq naalattoq taanna Ataatamisut Jehovatut ittunngorpoq. Aammami Kolossemiut 1:15-imi allassimavoq Jiisusi tassaasoq „Guutip takussaanngitsup assinga“. Ilaatigut tamanna pissutigalugu anersaakkut pisariaqartitatta matussusernissaannut Guutimillu pissusissamisoortumik ilisarisimannikkusunnitsitut ilisarisimannilernissatsinnut Jiisusi pillugu ilisimanninneq pingaaruteqarpoq. Jiisusi nunamiikkallarami tamatigut iliuuseqartarpoq Jehovap ilimagisarluinnaatut. Taamaattumik Jiisusi ilisarisimalerutsigu aamma Jehova pillugu ilisimasaqarnerulissaagut. (Johannesi 8:28; 14:8-10) Qanorli ililluni Jiisusi nunarsuarmut piva?

Inuttut inuunera

Guutip erni nunamut aallartimmagu Jiisusip inuunerata immikkoortuata aappaa aallartippoq. Tamanna pivoq Jehovap tupinnartuliornikkut qilammi inuunera niviarsiap juutiusup Mariap illiaanut nuummagu. Jiisusi naammalluinnanngissusermik kingornussaqanngilaq, nunamiumimmi ataataqanngilaq. Jehovap anersaavata illernartup, imaluunniit nukingata sulisup, Maria sunnerpaa, nukingatalu ’ulippaa’ tupinnartuliornikkut naartulersillugu. (Lukasi 1:34, 35) Taamaattumik naammalluinnartumik meerartaarpoq. Jiisusi sanasoq Josefi ataatarsiaralugu pilimanianngitsumik angerlarsimaffeqarluni peroriartorpoq, ilaqutariinnilu arlalinnik meerartalinni angajullersaalluni. — Esaja 7:14; Matthæusi 1:22, 23; Markusi 6:3.

Jiisusip meeraanera ilisimasaqarfigivallaanngilarput, pisimasorli ataaseq maluginiarnartuuvoq. Jiisusi 12-inik ukioqartoq angajoqqaavisa ukiumoortumik poorskisioriartornerminni Jerusalemimut ilagaat. Tassaniitillutik piffissap ilarujussua Jiisusi naalaffimmiippoq, ’ajoqersuisut akornanniilluni taakku tusarnaarlugit aperisarlugillu’. Aamma „tusarnaartut tamarmik ilisimassusia akissutaalu ajasoorutigeqaat“. Aap, Jiisusi inuusuttuarannguaq eqqarsarnartunik anersaakkut ittunik apeqquteqaannartanngilaq, aammali silassorilluni tupaallannartunik akissuteqartarpoq. (Lukasi 2:41-50) Illoqarfimmi Nazaretimi peroriartornermini sanasutut ilinniarpoq, qularnanngitsumik ataatarsiaminit Josefimit. — Matthæusi 13:55.

Jiisusi 30-nik ukioqalernissami tungaanut Nazaretimi najugaqarpoq. Taava Johannesi ornippaa kuisinniarluni. Jiisusip kuisinnermi kingorna aallussilluarluni kiffartornini aallartippaa. Ukiut sisamassaat qiteqqullugu nunamini angalavoq Guutip naalagaaffia pillugu nutaarsiassaq nuannersoq oqaluussissutigalugu. Uppernarsarpaa Guutimit aallartitaalluni. Qanoq? Tupinnartuliarpassuaqarnermigut — sunniuteqarluartunik inuup pisinnaasaanik akimuisunik suliaqarnermigut. — Matthæusi 4:17; Lukasi 19:37, 38.

Jiisusi aamma inuuvoq saamasoq asannittorlu itisuunik misigissusilik. Jiisusip saamasuujunera ingammik allanut isiginnittaasiatigut pissusiatigullu ersertarpoq. Jiisusip ilaginera inuit nuannaraat ilakkuminartuullunilu  inussiarnersuummat. Aamma meeqqat ilagigaangamikku iluarusuttarput. (Markusi 10:13-16) Taamanikkut arnat inuit ilaannit nikagineqartaraluartut Jiisusip tamatigut ataqqinnittumik pisarpai. (Johannesi 4:9, 27) Piitsut naqisimaneqartullu ikiortarpai ’tarnimikkut qasuerfissarsisillugit’. (Matthæusi 11:28-30) Ilinniartitseriaasia erseqqissuullunilu ajornaatsuullunilu atoriaannaavoq. Allanullu ilinniartitsissutaata ersersippaa qamuuna kissaatigigaa tusarnaartimi Guuti ilumoortoq, Jehova, ilisarisimalissagaat. — Johannesi 17:6-8.

Jiisusip assigiinngitsunik ajoqutillit misigeqatigingaarlugit tupinnartuliornikkut Guutip anersaava ikiortigalugu ajorunnaarsittarpai. (Matthæusi 15:30, 31) Assersuutigalugu pupissup ornillugu ima oqarfigaa: „Piumaguit mingukkunnaarsissinnaavarma.“ Jiisusi qanoq iliorpa? Assani isatsillugu ima oqarpoq: „Piumavunga, mingukkunnaarit!“ Angullu napparsimasoq ajorunnaarpoq. — Matthæusi 8:2-4.

Ilaanni inuppassuit Jiisusimukarput, ullunilu pingasuni nerinatik najorlugu. Inuppassuit nalligingaalerpai, tupinnartuliornikkullu nerisitai „angutit 4.000-it missaanniipput arnat meeqqallu ilanngunnagit“. (Matthæusi 15:32-38) Piffissami allami Jiisusip anorersuaq ikinngutiminik navianartorsiortitsisoq qatsortippaa. (Markusi 4:37-39) Aamma toqungasut ilai uummarteqqippai. * (Lukasi 7:22; Johannesi 11:43, 44) Allaat Jiisusip nangaanani inuunini naammalluinnartoq pilliutigaa inuiaat naammalluinnanngitsut siunissamut neriuutissaqarniassammata. Jiisusip inunnik asanningaarnini sutigut tamatigut ersersittarpaa!

Ullumikkut Jiisusi sumiippa?

Jiisusi nappakkami anniartitaaffimmi toquvoq 33 1/2-inik ukioqarluni. * Toqunerali inuunerata naggatiginngilaa. Jiisusip inuunerata immikkoortuisa pingajuat aallartippoq ullut pingasut missaat qaangiuttut Jehova Guutip ernini anersaatut toqusunit makitimmagu. Makititaanermi kingorna Jiisusi inunnut hundredelippassuarnut taamanikkut inuusunut takutippoq. (1 Korinthimiut 15:3-8) Kingornalu „Guutip talerpiata tungaani issialerluni“ kunnginngortitaanissanilu utaqqillugu. (Hebræerit 10:12, 13) Piffissanngormat Jiisusi kunngitut naalakkersuilerpoq. Ullumikkut Jiisusi qanoq takorluussavarput? Angutitut naalliulluni toqutaasutut? Imaluunniit pallorfigisassatut isigissavarput? Jiisusi tassaanngilaq inuk, tassaananiluunniit Guuti Ajugaqanngitsoq. Maannali anersaajuvoq pissaanilissuaq kunngitut naalakkersuisoq. Qanittuararsuakkut naalagaassutsi nunarsuatsinni naalliuffiusumi takutissavaa.

Saqqummersitat 19:11-16-imi Jiisusi Kristusi kunngitut hestimi qaqortumi qimusserluni naapertuilluartumik eqqartuussiartorluni sorsukkiartorlunilu aggersutut assersuutaasumik allaatigineqarpoq. Taassuma „qarnanit anillassimavoq pana ipittorsuaq inuiaqatigiinnut panartaatissaa“. Aap, pissaanersuani atorlugu ajortut piuneerutissavai. Jiisusilli nunamiikkallarami maligassiaanik malinninniarsarisut qanoq pineqassappat? (1 Petrusi 2:21) Jiisusimit Ataataanillu ’Guutip Ajugaqanngitsup ullussarsuani sorsunnissamit’ — Harmagedonimik taaneqarajuttumit — aniguisinneqassapput Guutip naalagaaffiani qilammiittumi nunarsuarmi inuttaasutut naassaanngitsumik inuusinnaaqqullugit. — Saqqummersitat 7:9, 14; 16:14, 16; 21:3, 4.

Jiisusip naalagaanerata nalaani eqqissineqassaaq, tupinnartuliortassaarlu inuiannut tamanut iluaqutaasunik. (Esaja 9:6, 7; 11:1-10) Napparsimasut ajorunnaarsissavai toqulu piuneerullugu. Guutip Jiisusi aqqutigalugu toqungasut milliardillit makitissavai nunami naassaanngitsumik inuunissamut periarfissillugit. (Johannesi 5:28, 29) Guutip naalagaaffiata aqutsinerata nalaani inuunerup qanoq nuannertiginissaa takorlooruminarpoq. Taamaattumik Biibilimik ilisimasaqarnikkut ineriartortuarnissarput Jiisusi Kristusimillu ilisarisimanninnerulernissarput pingaaruteqarpoq. (wE 9/15 05)

[Quppernerup ataani ilanngussaq]

 [Qupp. 7-mi ungalusaq]]

JIISUSI GUUTIUA AJUGAQANNGITSOQ?

Inuit upperisarsiortorpassuit oqartarput Jiisusi Guutiusoq. Ilaasa tassaasoraat Guuti ataasiullunilu pingasuusoq. Ataasiullunilu pingasuusumik ajoqersuut naapertorlugu „Ataataq Guutiuvoq, Erneq Guutiuvoq Anersaarlu illernartoq Guutiuvoq, guutilli pingasuunngillat, Guutili ataasiinnaalluni“. Tassaanerarneqartarput „timimit ataatsimeersut, assigimmik pissaaneqarlutillu naassaanngitsuusut“. (Den danske Folkekirkes Bekendelsesskrifter ved Leif Grane, 1981, qupp. 30, 46) Taamatut isumaqarneq eqqortuua?

Jehova Guuti Pinngortitsisuuvoq. (Saqqummersitat 4:11) Aallartiffeqaranilu naaffeqanngilaq, aamma ajugaqanngitsuuvoq. (Tussiaat 90:2) Akerlianilli Jiisusi aallartiffeqarpoq. (Kolossemiut 1:15, 16) Guuti Ataataminik taallugu ima oqarpoq: „Ataataq uannit anneruvoq.“ (Johannesi 14:28) Jiisusi aamma oqarpoq Ataatami kisimi ilisimasaanik, nammineq inngilillu ilisimanngisaqarlutik. — Markusi 13:32.

Aamma Jiisusi Ataataminut ima qinuvoq: „Uanga piumasara pinnani illit piumasat pili.“ (Lukasi 22:42) Jiisusi imminit annerusumut qinunngikkuni kimut allamut taama qinusinnaagami? Aammami Guutip Jiisusi toqusunit makitippaa, Jiisusi imminut makitinngilaq. (Apustilit Suliaat 2:32) Taamaattumik erseqqippoq Jiisusi nunarsuarmut tikiutinngikkallarmat nunarsuarmiinnerataluunniit nalaani Ataataq Ernerlu naligiinngitsut. Taavami Jiisusi qilammut makititaanerata kingorna? Korinthimiunut allakkat siulliit 11:3-mi ima allassimavoq: ’Kristusip niaqua Guutiuvoq.’ Aap, Erneq Guutimut naalatsigitittuassaaq. (1 Korinthimiut 15:28) Taamaattumik Biibilimi ersersinneqarpoq Jiisusi tassaanngitsoq Guuti Ajugaqanngitsoq. Tassaasorli Guutip ernera.

Ataasiullunilu pingasuusumik ajoqersuummi kinaassusillit pingajuannik taaneqartoq — anersaaq illernartoq — kinaassusiliunngilaq. Tussiaasiortoq qinunikkut Guutimut saaffiginnikkami ima oqarpoq: „Anersaat aallartikkaangakku pinngortarpoq inuuneq.“ (Tussiaat 104:30) Anersaaq taanna tassaanngilaq Guuti nammineq; tassaavoq nukik sulisoq aallartittagaa atortagaaluunniit piumasaminik naammassinnittussatut. Taanna atorlugu Guutip qilak takussaasoq, nunarsuaq uumassusillillu tassaniittut tamaasa pinngortippai. (1 Mosesi 1:2; Tussiaat 33:6) Aammattaaq Guutip anersaani illernartoq atorpaa angutinik Biibilimik allattunik isumassarsisitsinerminut. (2 Petrusi 1:20, 21) Tassa ataasiullunilu pingasuussuseq Biibilimi ajoqersuutigineqanngilaq. * „[Jehova] Guuterput, [Jehova] ataasiuvoq,“ Biibilimi allassimavoq. — 5 Mosesi 6:4.

[Quppernerup ataani ilanngussaq]

[Qupp. 5-mi assiliartaq]

Jiisusi kuisinnermigut tassaalerpoq Guutip Tanitaa

[Qupp. 7-mi assiliartaq]

Jiisusip Guutimit suliassiissutigineqartoq naammassiniarlugu nukini atorpai

[Qupp. 7-mi assiliartaq]

Ullumikkut Jiisusi kunngiuvoq pissaanilissuaq