Oqaluussisartunngorit siumukartoq naleqqussarsinnaasorlu

„Kikkut tamaasa peqatiginiartarsimavakka ilaannaannilluunniit annaassaqarumagaluarlunga.“ — 1 KORINTHIMIUT 9:22.

1, 2. (a) Sutigut apustili Paulusi sunniuteqarluartumik oqaluussisartuua? (b) Paulusip imminut suliassiissutigineqartumut isiginnittaatsini qanoq allaaseraa?

SILASSORISSUNUT ilisimasaqarluartunut tupiliortunullu maniguuttunut ilakkuminartuuvoq. Akimasut Romamiut nunaannarmiullu Frygiamiut qularunnaarsillugit oqaluussiffigisarpai. Allagai grækerinut isummamikkut avammut ammasunut juutinullu allanngortitsiumanngitsunut kajumissinartuupput. Taassuma tunngavilersuutai akerlilerneqarsinnaanngillat aamma inuit uummataannik killiisarpoq. Oqaluussigaangami tamarmik isumaqatigiissutigisinnaasatik oqaluuseriniartarpai Missiarsimik upperinnilernissamut ikiuisinnaaniassagami. — Apustilit Suliaat 20:21.

² Angut taanna tassaavoq apustili Paulusi. Qularnanngitsumik taanna oqaluussisartuuvoq sunniuteqarluartoq siumukartorlu, naleqqussarnissaminut piumassuseqartoq. (1 Timotheusi 1:12) Jiisusimit Missiarsip ’aqqanik saqqummiusseqquneqarpoq Guutimik nalusunut, kunnginut Israelillu kinguaavinut’. (Apustilit Suliaat 9:15) Suliassamut tamatumunnga qanoq isiginnittaaseqarpa? Ima oqarpoq: „Kikkut tamaasa peqatiginiartarsimavakka ilaannaannilluunniit annaassaqarumagaluarlunga. Tamakkuninngali tamanik iliuuseqarpunga iivangkiiliu pillugu taassuminnga pissarseqataajumallunga.“ (1 Korinthimiut 9:19-23) Paulusip maligassiaa, oqaluussinitsinni ilinniartitsinitsinnilu sunniuteqarluarnerunissamut iluaqutigisinnaasarput, qanoq ilinniarfigisinnaavarput?

Inuttut allanngorpoq unamminiarnartorlu iliuuseqarfigalugu

3. Paulusi kristumiunngunngikkallarami kristumiut qanoq misigissuseqarfigai?

³ Paulusi tassaajuaannarsimava inuk kamagittartoq soqutigittartorlu imminut suliassiissutigineqartumut piukkunnaateqarluartoq? Naamerluinnaq! Upperisarsiornikkut ingasaassiniarneq pissutigalugu Saulusi (Paulusip siornatigut aterisimasaa) Kristusip ajoqersugaanik malersuisunngorsimavoq peqqarniitsoq. Inuusuttuulluni Stefanusip toqutaanera iluaraa. Tamatumalu kingorna Paulusip kristumiut naakkittaalluni malersorpai. (Apustilit Suliaat 7:58; 8:1, 3; 1 Timotheusi 1:13) „Kamattorsuujuarpoq Naalakkallu ajoqersugai sioorasaarlugit toqukkumallugit.“ Jerusalemimiinnaq uppertunik malersuinini naammaginnginnamiuk kristumiut Damaskusitut avannarpasitsigisumiittut allaat malersortalerpai. — Apustilit Suliaat 9:1, 2.

4. Paulusip suliassani naammassiniarlugu qanoq allannguisariaqarpa?

⁴ Paulusip kristumiussutsimik uumissuingaarneranut pissutaasa ilaat tassaagunarpoq eqqarsartaatsinik allanik kissaatigineqanngitsunillu atulersitsinikkut upperisap nutaap tamatuma juutiussutsimik aseruiumaarneranik qularutiginninnginnera. Paulusimi ’farisiiariusimavoq’ oqaaserlu farisiiari nutsiinnavillugu isumaqarpoq ’immikkoortitaq’. (Apustilit Suliaat 23:6) Takorlooriaruk Paulusi qanoq tupaallatsigisimassasoq paasigamiuk Guutimik nalusunorpiaq Missiarsimik oqaluussissutiginnittussatut Guutip qinersimagaani! (Apustilit Suliaat 22:14, 15; 26:16-18) Farisiiarimmi inuit ajortuliortutut isigisatik nereqatigerusuttanngilaalluunniit! (Lukasi 7:36-39) Qularnanngilaq suliniuteqangaatsiarsimassasoq eqqarsartaatsini allanngortinniarlugu Guutillu piumasaanut, tassa inuit tamalaat annaanneqarnissaannut, naapertuuttunngortinniarlugu. — Galatiamiut 1:13-17.

5. Oqaluussinitsinni Paulusi qanoq ilaarsinnaavarput?

⁵ Immaqa aamma uagut taamatut iliortariaqarpugut.  Inuit nunarsuaq tamakkerlugu oqaluussiffigisartakkatsinni oqaatsit assigiinngitsorpassuit atorlugit oqaluffiusumi naapitakkavut amerligaluttuinnartillugit, isiginnittaaserput misissortariaqarparput paqumigineqarsinnaasullu suulluunniit paqumigiunnaartariaqarlugit. (Efesosimiut 4:22-24) Nalunngikkaluarutsigu nalugaluarutsiguluunniit innuttaaqatigiinnikkut ilinniagaqarnikkullu tunuliaquttatsinnit sunnerneqarsimavugut. Tamanna pissutigalugu imaassinnaavoq illuinnarsiortumik, nakerisarsiortumik uteriitsumillu isumaqartugut. Inunnik maniguuttunik naalattunillu ujaasinerput ikiuinerpullu iluatsissappat misigissutsit taamaattut qaangertariaqarpavut. (Romamiut 15:7) Paulusi taama iliorpoq. Unamminiarnartoq iliuuseqarfigaa oqaluussinerulerlunilu. Asanninneq kajumississutigalugu pisinnaasani maligassaalluartut ineriartortippai. Apustili Paulusip, ’Guutimik nalusunut apustiliusup’, oqaluussisimaneranik misissuinerup ersersippaa taanna oqaluussigaangami ilinniartitsigaangamilu soqutiginnittuullunilu naleqqussarsinnaallunilu isumassarseriallaqqissuusoq. * — Romamiut 11:13.

Oqaluussisartoq siumukartoq

6. Paulusip tusarnaartumi tunuliaqutaat qanoq eqqumaffigai, qanorlu kinguneqartumik?

⁶ Paulusip tusarnaartumi upperisaat tunuliaqutaallu eqqumaffigai. Kunngi Agrippa II-t saaffigigamiuk miserratiginngilaa kunngi ’juutit ileqquinik isumaqatigiinngissutaannillu asseqanngitsumik ilisimasaqartuusoq’. Taava Paulusip Agrippap isumai pillugit ilisimasani atorluarpai kunngillu paasisimalluagai oqaloqatigiissutigalugit. Paulusip tunngavilersuutai erseqqillutillu qularunnaarnangaarmata Agrippa ima oqarpoq: „Kristumiunngortingajaveqaarma!“ — Apustilit Suliaat 26:2, 3, 27, 28.

7. Paulusip inuppassuit Lystramiittut oqaluussiffigigamigit qanoq naleqqussarsinnaassuseqarsimava?

⁷ Paulusi aamma naleqqussarsinnaavoq. Maluginiariaruk qanoq allaatigisumik periaaseqartoq inuppassuit  illoqarfimmi Lystrami imminik Barnabamillu guutisut pallorfiginnikkunnaarsinniarsarigamigit. Oqartoqarsimavoq inuit taakku, Lykaoniamiusut oqaasillit, ilinniarluarsimannginnerpaat upperisapalaaqarnerpaallu ilagigaat. Apustilit Suliaat 14:14-18 naapertorlugu Paulusip pinngortitarsuaq pinngortitarsuullu tunissutai naammangaartut Guutip ilumoortup tamanit qutsinnerpaaneranut uppernarsaatitut uparuarpai. Tunngavilersuut paasiuminarpoq ’inunnillu Paulusimut Barnabamullu pilliiumasunik pitsaaliuinnguatsiarluni’.

8. Paulusi ilaannikkut kissaammertaraluarluni qanoq naleqqussarsinnaassuseqarpa?

⁸ Soorunami Paulusi naammalluinnartuunngilaq, ilaannikkullu kissaammertarpoq. Assersuutigalugu ilaanni juuteq Ananiamik atilik, imminik nikanarsaallunilu naapertuilluanngitsuliorfiginnittoq, appisaluuppaa. Paulusilli palasiunerusoq nalullugu ajuallatsillugu paasigamiuk ingerlaannaq utoqqatserfigaa. (Apustilit Suliaat 23:1-5) Athenimut peqqaarami „narrutsaqaaq takugamiuk illoqarfik guutipiluit assinginik ulikkaartoq“. Narrutsanninili Marsip qattorngani oqalugiarnermini malugitinngilaa. Athenimiunulli saaffiginnikkami taakkua „Guutimut nalusamut“ pilliiviat innersuussutigalugu taalliortortaasalu ilaannik issuaalluni tamarmik isumaqatigiissutigisinnaasaminnik eqqartuilerpoq. — Apustilit Suliaat 17:16-28.

9. Paulusip qanoq ililluni ersersippaa inunnut assigiinngitsunut qanoq saaffiginninnissamut maluginnissinnaaneq piginnaaneqarfigalugu?

⁹ Paulusip inunnut assigiinngitsunut qanoq saaffiginninnissamut maluginnissinnaaneq piginnaaneqarfigilluarpaa. Kulturi avatangiisillu tusarnaartuminut sunniuteqartut eqqarsaatigisarpai. Kristumiut Romamiittut allaffigigamigit nalunngilluinnarpaa naalagaaffiup taamani pissaaneqarnerpaap illoqarfiisa pingaarnersaanni najugaqartut. Paulusip kristumiunut Romamiittunut allagaani pingaarneq tassaavoq Adamip ajortuliaata sunniutaanik ajortunngortitsisumik Missiarsip utertitsinissamut pissaaneqarnerata atorunnaarsitsinera. Kristumiut Romamiut illoqarfinnilu allaniittut oqaatsit taakkua uummataannik kajumissisitsisut atorlugit allaffigai. — Romamiut 1:4; 5:14, 15.

10, 11. Paulusip assersuusiani tusarnaartuminut qanoq naleqqussarpai? (Takuuk ilanngussaq).

¹⁰ Paulusip tusarnaartuni sallusuissutit itinerusut Biibilimeersut pillugit nassuiaakkumagaangamigit qanoq iliortarpa? Anersaakkut ittunik paasiuminaatsunik nassuiaanermini nalinginnaasunik paasiuminartunillu assersuusiullaqqippoq. Assersuutigalugu Paulusip nalunngilaa Romami inuit Romamiut naalagaaffianni inussiaateqartarneq ilisimasaqarfigigaat. Allaffigisaasa ilarpassui inussiaataagunarput. Taamaattumik Paulusip inussiatut sulineq assersuutigaa inuup ajortimut naapertuilluarnermulluunniit naalatsigitikkumanerluni nammineq aalajangiisinnaanerminut kiffaanngissuseqarneranik tunngavilersuigami. — Romamiut 6:16-20.

¹¹ Qinerlerfissiami ima allassimasoqarpoq: „Romamiup inussiaatillip inussiaatini inussiaajunnaarseriaannaavaa, imaluunniit inussiaq naalakkaminut akiliilluni inussiaajunnaarsinnaavoq. Inussiaq aamma kiffaanngissuseqalersinnaavoq guutit ilaat taassuminnga piginnittunngortinneqarpat.“ Inussiaq inussiaajunnaarsitaasimasoq naalakkamini suliinnarsinnaavoq akissarsisarluni. Paulusip tamakkununnga tunngasut innersuussutigigunarpai inuit ataasiakkaat naalagaq sorleq — ajorti naapertuilluarnerluunniit — naalassanerlugu aalajangernissamut kiffaanngissuseqarnerat pillugu allakkami. Kristumiut Romamiittut ajortimit aniguisinneqarsimapput maannalu Guutimit pigineqarlutik. Guutimut kiffartornissamut kiffaanngissuseqarput, piumagunilli aalajangersinnaapput ajorti — naalagarisimasartik — kiffartorfiginiarlugu. Assersuusiaq paasiuminartoq taanna pissutsinit tusarnaartut nalunngisaannit assersuusiaasoq kristumiut Romamiittut imminut ima apererusulissutigissavaat: ’Naalagaq sorleq kiffartorfigaara?’ *

Paulusip maligassiaa ilinniarfigisinnaavarput

12, 13. (a) Inuit assigiinngitsut oqaluussiffigisatta uummataat killinniarlugit qanoq iliortariaqarpugut? (b) Inuit allatut tunuliaqutallit oqaluussiffigigaangakkit periaaseq suna illit sunniuteqarluartutut isigaajuk?

¹² Inuit assigiinngitsut oqaluussiffigisatta uummataat killinniarlugit Paulusitut soqutiginnittuusariaqarlutalu  naleqqussarsinnaasariaqarlutalu isumassarseriallaqqissuusariaqarpugut. Tusarnaartuvut nutaarsiassamik nuannersumik paasinninnissaannik ikiussagutsigit qarsupittumik attaveqarfiginissaat, piareersarsimasatsinnik oqaluttuunnissaat, atuagassianik atuakkanillu Biibililersaarutinik tuninissaat naammanngilaq. Sunik pisariaqartitaqarnersut, sunik pingaartitaqarnersut, suut nuannarineraat suullu nuannarinnginneraat, sunik ernumassuteqarnersut sunillu paqumigisaqarnersut paasiniarlugu iliuuseqartarpugut. Tamatumani eqqarsarluaqqaarnissaq suliniuteqangaatsiarnissarlu pisariaqaraluartut nunarsuaq tamakkerlugu oqaluussisartut kajumillutik taamaaliortarput. Assersuutigalugu Ungarnimi Jehovap Nalunaajaasuisa immikkoortortaqarfiat ima nalunaaruteqarpoq: „Qatanngutit inuiaat allat ileqquinik inooriaasiannillu ataqqinnipput, taakkualu naatsorsuutiginngilaat tamaani ileqqorineqartunut naleqqussarnissaat.“ Jehovap Nalunaajaasui allaniittut aamma taamaaliorniartarput.

¹³ Nunami Asiap kujataata kangianiittumi inuit amerlanersaasa peqqinneq, meeqqanik perorsaaneq ilinniagaqarnerlu pingaartitaraat. Oqaluussisartut tamaaniittut tamakkua pingaarnerutillugit oqaloqatigiissutiginiarsaraat silarsuarmi pissutsit ajorsiartuinnartut atugarisatigullu ajornartorsiutit aaqqikkuminaatsut oqaloqatigiissutiginagit. USA-mili illoqarfissuarmi oqaluussisartut maluginiarsimavaat oqaluussiffigisartakkaminni aalajangersimasumi ilaatigut peqquserlunneq, angallannermi tattorliuunneq pinerluttuliornerlu soqutigineqartupilussuusut. Oqaluussisartut tamakkununnga tunngasut aallaavigalugit Biibilimut tunngasunik oqaloqateqalertarput. Sunniuteqarluartumik oqaluussisartut oqaloqatigiissutiginiagartik suugaluarpalluunniit isumalluartuuniartarlutillu qiimmassaaniartarput; najoqqutassiat Biibilimeersut maannakkut iluaqutaasinnaanerat Guutillu nuannersumik neriuutissiinera erseqqissartarpaat. — Esaja 48:17, 18; 52:7.

14. Inuit pisariaqartitaannut pissutsinullu atugaannut assigiinngitsunut qanoq naleqqussarsinnaanersugut oqaluttuariuk.

¹⁴ Inuit kulturikkut, ilinniagaqarnikkut upperisarsiornikkullu tunuliaqutaat assigiinngitsupilussuummata aamma oqaluussinermi periaatsip allanngorartinnissaa iluaqutaassaaq. Pinngortitsisoqarneranik upperinnittunut, Biibilimilli upperinninngitsunut, saqqummiusseriaaserput Guuteqarneranik upperinninngitsunut saqqummiusseriaatsitsinnit aallaanerussaaq. Inummik atuagassianik atuakkanillu upperisarsiornermut tunngasunik sunniiniutitut isiginnittumik naapitaqarutta, inummik Biibilimi ilinniartitsissutigineqartunik akuerinnittumik naapitaqarnitsinnit allaanerusumik saqqummiussissagaluarpugut.  Naleqqussarsinnaanissaq aamma pisariaqarpoq inuit ilinniagaqarnikkut assigiinngitsupilussuarnik tunuliaqutaqarmata. Ilinniartitsisut pikkorissut tunngavilersuutit assersuutillu pisumut naleqquttut atussavaat. — 1 Johannesi 5:20.

Oqaluussisartunngorlaanut iluaqutaasussat

15, 16. Sooq oqaluussisartunngorlaanik ilinniartitsinissaq pisariaqarpa?

¹⁵ Paulusip nammineq ilinniartitsillaqqinnerulernissani kisiat eqqarsaatiginngilaa. Inuusunnerusunik, ilaatigut Timotheusimik Titusimillu, sunniuteqarluartumik oqaluussisartunngornissamut ilinniartitsinissap piareersaanissallu pisariaqassusiat paasivaa. (2 Timotheusi 2:2; 3:10, 14; Titusi 1:4) Ullumikkuttaaq pisariaqartinneqangaarpoq ilinniartitsisoqarnissaq ilinniartinneqarnissarlu.

¹⁶ 1914-imi nunarsuaq tamakkerlugu oqaluussisartut 5000-it missaanniipput; ullumikkut sapaatit-akunneri tamaasa oqaluussisartunngorlaat 5000-it kuisittarput! (Esaja 54:2, 3; Apustilit Suliaat 11:21) Nutaat ilagiinnut kristumiunut ilanngukkaangamik oqaluusseqataarusuleraangamillu ilinniartinneqarnissartik siunnersorneqarnissartillu pisariaqartittarpaat. (Galatiamiut 6:6) Naalakkap, Jiisusip, ajoqersukkaminik ilinniartitseriaasiinik atuinissarput pingaaruteqarluinnarpoq. *

17, 18. Oqaluussisartunngorlaat oqaluussinermi imminut tatiginerulernissaannut qanoq ikiorsinnaavavut?

¹⁷ Jiisusip inuppassuit orneriarlugit apustilini oqarfigiinnanngilai oqaluusseqqullugit. Oqaluussisoqartariaqarnera erseqqissaqqaarpaa apustilinilu kajumissaarlugit oqaluussinermut atatillugu qinunissap qanoq pingaaruteqartiginera eqqaamaqqullugu. Taava pingasunik tunngavissippai: Oqaluusseqatissamik, oqaluussiffissamik tusarliussassamillu. (Matthæusi 9:35-38; 10:5-7; Markusi 6:7; Lukasi 9:2, 6) Uaguttaaq taamatut iliorsinnaavugut. Meerarput Biibilimilluunniit atuaqqissaaqatigisartagarput sivisujaamilluunniit oqaluusseqataasimanngitsoq ikioraluarutsigu ikiugarput taamatut ilinniartinniartariaqarparput.

¹⁸ Oqaluussisartunngorlaat oqariartuummik saqqummiussinissamut imminut tatigilersinnissaat pisariaqarluinnarpoq. Naatsumik kajumissinartumillu saqqummiussinissamut piareersarneranni sungiusarnerannilu ikiorsinnaavigit? Oqaluusseqatigiikkaangassi illit matut siulliit pisakkit, ilinniartitavit takuniassammagu qanoq saqqummiinersutit. Illit Gideonitut iliorsinnaavutit, taassumami sakkutooqatini ima oqarfigai: „Isigisinga issuarlungalu.“ (Eqqartuussisut 7:17) Taava oqaluussisartunngorlaaq peqataanissaanut periarfissiguk. Oqaluussisartunngorlaat sapinngisaminnik iliornerat pillugu nersualaartakkit, piffissaalluariaraangallu pitsanngoriaataasinnaasunik siunnersuuteqalaartarit.

19. ’Kiffartuutinnik naammassinninniartillutit’ illit suna aalajangiusimaviuk?

¹⁹ ’Kiffartuuterput naammassiumavarput’ taamaattumillu periaatsitsigut naleqqussarsinnaanerulernissarput aalajangiusimallutigu. Aamma oqaluussisartunngorlaat naleqqussarsinnaalernissaannik ilinniarterusuppavut. Inunnik allanik inuunermik annaassissutaasumik Guuti pillugu ilisimasaqalersitsinerup qanoq pingaaruteqartiginera eqqarsaatigigaangatsigu, qularutigineq ajorparput ’ilaannaannilluunniit annaassaqarumagaluarluni kikkunnik tamanik peqateqarniartarnerup’ imminut akilersinnaanera. — 2 Timotheusi 4:5; 1 Korinthimiut 9:22.  (wE 12/1 05)

[Quppernerup ataani ilanngussat]

Eqqaamavigit?

• Kiffartornitsinni Paulusi qanoq ilaarsinnaavarput?

• Suut eqqarsaatigalugit uagut eqqarsartaatsitsinnik allannguisariaqarsinnaavugut?

• Tusarliussatta tamatigut nuannersuunissaa qanoq ililluta qulakkeersinnaavarput?

• Oqaluussisartunngorlaat imminut tatigineq ineriartortissagunikku suna pisariaqartippaat?

[Atuaqqissaarnermi apeqqutit]

[Qupp. 14-mi assiliartat]

Paulusip naleqqussarsinnaanermigut tusarnaartut assigiinngitsut killittarpai

[Qupp. 16-mi assiliartaq]

Sunniuteqarluartumik oqaluussisartut tusarnaartumik tunuliaqutaat eqqarsaatigalugit oqaluussisarput

[Qupp. 17-mi assiliartaq]

Oqaluussisartut siumukartut oqaluussisartunngorlaat oqaluussinissamut piareersarneranni ikiortarpaat