’Asanninnersi anneruleriartuinnarpoq’

JAPANI 2004-mi pinngortitami ajunaarnersuarnit arlalinnit eqqorneqarpoq, soorlu anoraasuarsuarnit, qarsutsinernit nunallu sajunneranit. Inuppassuit eqqugaapput, ilaatigut Jehovap Nalunaajaasui arlallit. (Oqaluussisartup oqaasii 9:11) Ajortunilli tamakkuninnga nalaataqarneq pissutigalugu nalunaajaasut qatanngutigiittut tunniusimanermik ersersitsivigeqatigiinnissamut periarfissaqalerput. — 1 Petrusi 1:22.

Assersuutigalugu juulimi siallerujussuarmat kuuk Japanip qeqqaniittoq qarsutsivoq. Illut 20-nit amerlanerusut Jehovap Nalunaajaasuinit najugarineqartut qarsutsinermit ajoquserneqarput, naalagaaffilersaarfiillu ilaat meteri missiliorlugu immassimavoq. Erniinnaq oqaluussisartut ilagiinni eqqaaniittuneersut ikiuukkiartoqataajartorput. Kajumissutsiminnit ikiuuttut hundredellit illut iluini marulluiaaqataapput. Sapaatit-akunneri marluk qaangiutinngitsulluunniit naalagaaffilersaarfik asanneqareerlunilu iluarsaanneqareerpoq.

Oktobarip 23-ani nuna tamannarpiaq nunap sajunneranit richterskalamik uuttorlugu 6,8-mik sakkortussusilimmit eqqorneqarpoq. Ikinnerpaamik inuit 40-t ajunaarput, 100.000-inillu amerlanerusut angerlarsimaffimminnit qimarngutinneqartariaqarsimapput. Imeqarunnaarlunilu gasseqarunnaarlunilu innaallagiaaruppoq. Nunap sajunnerpaaffigisaa naalagaaffilersaarfimmit iluarsaanneqaqqammersumit 50 kilometeriinnarnik ungasitsigisumiikkaluartoq naalagaaffilersaarfik ajoqusinngilaq. Naalagaaffilersaarfik ingerlaannaq utaqqiisaasumik ikiueqqaarfinngorpoq. Kristumiut nakkutilliisut ingerlaannaq uppeqatitik qanoq innersut paasinialerpaat, eqqissiallappulli paasigamikku taakkua ilaannik ajunaartoqarsimananilu ajoqusertoqarsimanngitsoq. Aqaguani ullaaralaakkut oqaluussisartut juulimi qarsutsinermit eqqugaasimasut ilaat arfinillit nalunaarput uppeqatiminnut eqqugaaffimmiittunut nerisassanik imermillu aggiussiniarlutik. Nunap sajunneranit nalunaaquttap-akunneri arlaqanngitsut qaangiuttut ikiueqqaarnissamut atortussaqalerpoq.

„Qarsutsinermi eqqugaasimasut ajunaarnermi ikiuilluni sulineq namminneq ikiorneqarsimanerminnik qujamasuutiginninnerminnik ersersitsinissamut periarfissatut isigaat,“ nakkutilliisoq oqaluttuarpoq. „Ullaannguamit unnussuarmut ilungersorlutik sulipput. Aamma nuannaarpaseqaat!“

Qarsutsinerup nunalluunniit sajunnerata asaqatigiinnikkut attaveqatigiilluarneq Jehovap Nalunaajaasuisa kristumiut qatanngutigiissuartut ilisarnaataat kipitissinnaanngilaat. Ajunaarnernilli taamaattunik pisoqaraangat apustilip Paulusip Thessalonikami uppeqatiminut oqaasiisa ilumuussusiat kristumiut paasisarpaat: „Asaqatigiinnersi anneruleriartuinnarmat tamarluinnassinni.“ — 2 Thessalonikamiut 1:3. (wE 11/15 05)