Harmagedoni aallaqqaataajumaartoq nuannersoq

OQAASEQ Harmagedoni hebræerit oqaasiannit „Har-Magedon“-imit, imaluunniit „Megiddop Qaqqaa“-nit, naggueqarpoq. Oqaaseq Saqqummersitat 16:16-imi atuarsinnaavarput, ima allassimavoq: „Katersorpai najukkamut hebræerisut Harmagedonimik taaneqartumut.“ Kikkut Harmagedonimut katersorneqarpat, aamma sooq? Kapitalimi tassanerpiaq versi 14-imi ima allassimavoq: ’Silarsuarmi tamarmi kunngit’ katersorneqarput „Guutip Ajugaqanngitsup ullussarsuani sorsunnissamut.“ Oqaatsit taakku soorunami apeqqutinik pilersitsipput. „Kunngit“ sumi sorsuppat? Suna sorsuutigaat? Kikkut sorsuffigaat? Inuppassuit isumaqarnerattut sakkussiarsuit inunnik amerlasuunik toqutsissutaasinnaasut atorneqassappat? Harmagedonimi aniguisoqassava? Apeqqutit taakku akissutaat Biibilimi paasiniariartigik.

Oqariartaaseq „Megiddop qaqqaa“ isumaqarpa Harmagedoni Kangiani Qiterlermi qaqqami aalajangersimasumi sorsunneq? Naagga. Siullermik, itsaq Megiddop eqqaani qaqqaqanngilaq, taamaallaalli narsaamanermi eqqaaniittumi 20 meterit missaattut portutigisumik qattuneqarpoq. Aappassaanik, „nunarsuarmi kunngit sakkutuuilu“ tamarmik Megiddop eqqaaniissinnaanngillat. (Saqqummersitat 19:19) Kisiannili Kangiata Qiterliup oqaluttuarisaanerani sorsunnerit peqqarniinnerpaat pingaaruteqarnerpaallu Megiddomi pipput. Taamaattumik taaguut Harmagedoni sorsunnermut pingaarutilimmut, ataasiinnarmik qularnaatsumik ajugaasoqartumut, assersuutaavoq. — Takuuk qupperneq 5-imi ungalusaq „Megiddo — assersuut naleqquttoq“.

Harmagedoni tassaannaassagunanngilaq nunarsuarmi naalagaaffiit imminnut sorsuunnerat Saqqummersitat 16:14-imimi allassimavoq ’silarsuarmi tamarmi kunngit’ iligiillutik katersuutissasut „Guutip Ajugaqanngitsup ullussarsuani sorsunnissamut“. Jeremia isumassarsisitaalluni siulittuivoq ’Jehovap toqutitai ullussami tassani uppigarsimassasut nunarsuarmi tamarmi’. ( Jeremia 25:33) Tassa Harmagedoni tassaassanngilaq inuit akornanni Kangiani Qiterlermi sumiiffimmi aalajangersimasumi sorsunneq. Tassaassaaq Jehovap sorsunnera, nunarsuarlu tamakkerlugu sorsunnerussaaq.

Malugisariaqarporli Saqqummersitat 16:16-imi Harmagedonip najukkatut, imaluunniit Biibilimi allassimaqqaarfiit naapertorlugit sumiiffittut, taaneqarnera. Biibilimi sumiiffik pineqaraangat pissutsit qanoq innerinik oqaatiginninnerusinnaavoq — uani pissutsit tassaapput silarsuup tamarmi ataasiussuseqarluni Jehovamut akerlilersuinera. (Saqqummersitat 12:6, 14) Harmagedonimi nunami inuiaqatigiit tamarmik ataatsimoorlutik „qilammiorpassuit“ Kristusi Jiisusimit, ’Kunngit Kunngiannit Naalakkallu Naalagaannit’, siulersorneqartut sorsussavaat. — Saqqummersitat 19:14, 16.

Ilumoorpa, ilaasa oqarnerattut, Harmagedonimi inuppassuit toqussasut — atomimik ajunaarnersuakkut imaluunniit ulloriarsuup apuineratigut? Guutip asannittup akuerisinnaavaa inuit taakkualu angerlarsimaffiaa nunarsuup taama amiilaarnartigisumik naggateqarnissaa? Naamik. Guuti erseqqissumik oqarpoq ’soqanngitsussanngorlugu pinngortinnagu, kisianni najugaqarfissanngortillugu’. (Esaja 45:18; Tussiaat 96:10) Jehovap Harmagedonimi silarsuaq ikuallatsillugu ’aserussavai nunarsuarmik aseruisut’ nunarsuarput aserornagu. — Saqqummersitat 11:18.

Harmagedoni — qaqugu?

Ukiut hundredelikkuutaat ingerlaneranni apeqqut ’Harmagedoni qaqugu nalliutissava? ’ eqqarsaatersuutigineqartarsimaqaaq. Biibilip atuagartaa Saqqummersitat Biibilip sinneranut sanilliuttarneratigut sorsunnissap aalajangiisuulluinnartussap taassuma qaqugu nalliukkumaarnera  paasisinnaavarput. Saqqummersitat 16:15-imi Jiisusip tillinniatut tikiunnissaanut Harmagedoni atassuserneqarpoq. Jiisusip pissutsit aaqqissuussaanerata matuma eqqartuunneqarnera naammassiartorlugu tikiunnissani oqaluttuarigamiuk assingusumik assersuusiorpoq. — Matthæusi 24:43, 44; 1 Thessalonikamiut 5:2.

Biibilimi siulittuutit ilaasa eqquunnerisa ersersippaat 1914-imiilli pissutsit aaqqissuussaanerata matuma ulluini kingullerni inuusugut. * Piffissaq Jiisusip ’naalliunnartoqangaartumik’ taasaa ullut kingulliit taakkua naggataannut nalunaaqutaassaaq. Biibilimi allassimasoqanngilaq taamatut ’naalliunnartoqangaarnera’ qanoq sivisutigissanersoq, piffissamili tassani pisussat amiilaarnartut misigineqarsimasunit tamanit ajornerungaassapput. Naalliunnartoqangaarnera Harmagedonimi sakkortunerpaassaaq. — Matthæusi 24:21, 29.

Harmagedoni tassaammat ’Guutip Ajugaqanngitsup ullussarsuani sorsunneq’ kinguartinniarlugu inuit iliuuseqarsinnaassanngillat. Harmagedonip qaqugu aallartinnissaa Jehovap aalajangereerpaa. ’Ilumut nalliussaaq kingoqqutsissananilu.’ — Habakkuki 2:3 (1900/1961).

Guuti naapertuilluartoq naapertuilluartumik sorsussaaq

Sooruna Guuti nunarsuarmut tamarmut sorsussasoq? Harmagedoni Guutip pissusiisa pingaarnerit ilaannut, tassa naapertuilluassusermut,  atassuteqarluinnarpoq. Biibilimi ima allassimavoq: „ [Jehovap] eqqortoq iluaraa.“ (Tussiaat 37:28) Oqaluttuarisaanerup ingerlanerani inuit naapertuilluanngitsuliortarnerannut isiginnittuusimavoq, soorunalumi tamanna naapertuilluartumik kamalissutigisarsimassavaa. Taamaattumik Guutip erni toqqarpaa naapertuilluartumik sorsuttussatut pissutsit aaqqissuussaanerannik ajortumik matumannga atorunnaarsitsisussamik.

Jehova kisimi naapertuilluaqqissaartumik sorsussinnaavoq eqqorniakkani kisiisa eqqorlugit, eqqortuliorusuttulli nunarsuarmi sumiikkaluarpataluunniit sorsunnermit aniguisillugit. (Matthæusi 24:40, 41; Saqqummersitat 7:9, 10, 13, 14) Nunarsuarmullu kisimi naalakkersuisinnaatitaavoq, taassuminngami pinngortitsisuuvoq. — Saqqummersitat 4:11.

Jehovap nukiit aseruisinnaasut suut akeqqaminut atussavai? Nalulluinnarparput. Nalunngilarpulli inuiaqatigiit ajortut piuneerulluinnarnissaannut atortussaqartoq. ( Jobi 38:22, 23; Sefania 1:15-18) Guutilli kiffai nunamiittut sorsoqataassanngillat. Saqqummersitat kapitali 19-imi takorluukkami ersersinneqarpoq qilammiorpassuit kisimik sorsunnermi Jiisusi Kristusi akiuuteqatigissagaat. Jehovap kiffaanik nunamiittunik sorsoqataasoqassanngilaq. — 2 Nalunaarsuutit 20:15, 17.

Guuti ilisimassusilik mianersoqquseqqaartartoq

Aniguinissamut suut periarfissaappat? Harmagedonimi ajunaartoqartariaqanngilaq. Apustili Petrusi allappoq ’Jehova . . . kimilluunniit tammaqqusinngitsoq, tamaasalu allamik isumataarnissamut periarfissikkumagai’. (2 Petrusi 3:9) Aamma apustili Paulusi oqarpoq Guutip piumasarigaa „inuit tamarmik annaanneqassasut sallusuissummillu ilisarsissallutik“. — 1 Timotheusi 2:4.

Taama pisoqaqqullugu Jehovap ilisimassutsimigut „Naalagaaffimmik iivangkiiliu“ oqaatsit hundredelikkuutaat atorlugit sumi tamaani oqaluussissutigitippaa. Inuit sumi tamaniittut aniguinissaminnut annaanneqarnissaminnullu periarfissaqarput. (Matthæusi 24:14; Tussiaat 37:34; Filippimiut 2:12) Nutaarsiassamik nuannersumik ilassinnittut Harmagedonimi aniguisinnaapput nunarsuarmilu paratiisiusumi naammalluinnartuullutik naassaanngitsumik inuusinnaallutik. (Ezekieli 18:23, 32; Sefania 2:3; Romamiut 10:13) Guuti tassaasoq asanninneq taama ilimasuffigineqarsinnaavoq, ilaa? — 1 Johannesi 4:8.

Guuti asannittoq sorsussinnaava?

Inuppassuilli paasiuminaatsippaat sooq Guutip asannilluinnartuusup inuit taama amerlatigisut toqumik piuneerussaanermillu eqqugaatissagai. Immaqa illu uumasunit ajoqutaasunit uumasunissimasoq assersuutigineqarsinnaavoq. Illumik piginnittup ilaquttami peqqissuunerat ajunngitsunillu atugaqarnerat paarisariaqarpai uumasut ajoqutaasut nungutinnerisigut, ilaa?

Taamatuttaaq Jehovap inunnik asanningaarnini pissutigalugu Harmagedonimi sorsussaaq. Siunertaraa nunarsuup paratiisinngortinnissaa, inuiaat naammalluinnartunngortinnissaat eqqissisimallutillu ’kimilluunniit annilaartinneqaratik’ inuunissaat. (Mika 4:3, 4, 1900/1961; Saqqummersitat 21:4) Inuimmi inoqatimik eqqissisimanerannik isumannaatsuunerannillu navianartorsiortitsisut qanoq pineqassappat? Naapertuilluassuseq pissutigalugu Guutip ’uumasut ajoqutaasut’, inuit ajortut iluarsivissaqanngitsut, taamaattut piuneerutissavai. — 2 Thessalonikamiut 1:8, 9; Saqqummersitat 21:8.

Inuit naammalluinnanngitsut naalakkersuinerat namminissarsiorlutillu inuiattut soqutigisaminnik siuarsaaniarsarinerat ullutsinni akerleriinnerit aammillu kuisinerit ilarpassuinut pissutaapput. (Oqaluussisartup oqaasii 8:9) Nunarsuarmi naalakkersuisut oqartussaanerulerniarsaripput Guutillu naalagaaffia pilersinneqareersoq sumiginnarluinnarlugu. Oqartussaassutsiminnik Guutimut Kristusimullu tunniusserusunnerannik takussutissaqanngilaq. (Tussiaat 2:1-9) Taamaattumik naalakkersuisut taamaattut peertariaqarput Jehovap naalagaaffia Kristusimit naapertuilluartumik aqunneqartoq aqqutissiuunniarlugu. (Danieli 2:44) Harmagedonimi sorsunneq pisariaqarpoq inaarutaasumik aalajangersarniarlugu kina nunarsuarmut inuiannullu naalagaasussaatitaanersoq.

Jehovap Harmagedonimi akuliunnissaa inunnut iluaqutaassaaq. Silarsuarmi pissutsit ajorsigaluttuinnarnerat eqqarsaatigalugu Guutip aqutsinera  naammalluinnartoq kisimi inuit pisariaqartitaannik matussutissiilluinnarsinnaavoq. Guutip naalagaaffiatiguinnaq nunarsuarmi eqqissineqalivittoqarsinnaavoq atugarissaartoqalivittoqarsinnaallunilu. Guuti akuliutinngisaannassappat silarsuarmi pissutsit qanoq ilissappat? Ukiut hundredelikkuutaat qaangiuttut ingerlaneranni inunnik naalakkersuisoqarnerup nalaani uumissuinerit, nakuusernerit sorsunnerillu inuit naalliuutigisimasaat naalliuutaajuassagaluarput, ilaa? Harmagedonimi sorsunneq tassaassaaq pisussanit tamanit uagutsinnut iluaqutaanerpaasussaq. — Lukasi 18:7, 8; 2 Petrusi 3:13.

Sorsunneq sorsunnernik tamanik soraarsitsisoq

Sorsunnerni allani anguneqarsinnaasimanngitsoq Harmagedonimi anguneqassaaq — sorsunnerit tamarmik soraarsinneqassapput. Tamatta sorsunnerit oqaluttuaannanngornissaat erinigaarput, ilaa? Sorsunnernik tamanik unitsitsiniarlutik inuit ilungersuuterpassuaqartaraluarlutik iluatsitsinngisaannarput. Jeremiap oqaasiisa ilumoornerat erseqqissarneqaannarpoq: „Nalunngilara, [Jehova], inuup ingerlavissani nammineq aalajangigassarinngikkaa, angalaartup aalajangigassarinngilaa allorarnermi aalajaatsuutinnissaat.“ ( Jeremia 10:23) Biibilimi ima neriorsuuteqarpoq: „ [Jehovap] nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.“ — Tussiaat 46:9, 10.

Inuiaqatigiit sakkussiaatitik toqoraataasut imminnut atulerpatigik avatangiiserpullu navianartorsiortilerpassuk nunarsuarmik Pinngortitsisoq akuliutissaaq — pissutsillu Biibilimi Harmagedonimik taaneqartut atuutilissapput. (Saqqummersitat 11:18) Taamaattumik sorsunnermi tamatumani oqaluttuarisaanerup ingerlanerani inuit neriuutigiinnartariaqarsimasaat anguneqassaaq. Nunarsuarmik Piginnittup, Jehova Guutip, pinngortitaminut tamanut naalagaasussaatitaanera qutsissisinneqassaaq.

Taamaattumik naapertuilluarnermik nuannarisaqartut Harmagedoni siooragisariaqanngilaat. Akerlianik neriunnissamut tunngavissaqarlualertitsivoq. Tassami ileqqussatigut ajortunngorsimanermit ajussusermillu nunarsuaq Harmagedonimi minguiarneqassaaq Guutillu naalagaaffiata Missiarsikkoortup ataani aaqqissuussineq nutaaq naapertuilluartoq aqqutissiuunneqarluni. (Esaja 11:4, 5) Harmagedoni tassaassanngilaq naggatissaq ajunaarfiusussaq, naapertuilluartunulli nunami naassaanngitsumik inoorusuttunut aallaqqaataajumaarpoq nuannersoq. — Tussiaat 37:29. (wE 12/01 05)

[Quppernerup ataani ilanngussaq]

[Qupp. 5-mi ungalusaq/​assiliartaq]

MEGIDDO — ASSERSUUT NALEQQUTTOQ

Itsaq Megiddop inissisimaffia sorsunnermi pingaaruteqarpoq. Illoqarfimmit tassannga Israelip avannaa tungaani Jizre’elip narsartaata naggorissup kitaa tungaa takuneqarsinnaavoq. Niuffagiat sakkutuullu nunanit tamalaaneersut aqqutigisartagaasa Megiddomi paarlaffii Megiddomiunit nakkutigineqarput. Taamaattumik sorsunnerit pingaarutilippassuit Megiddomi pipput. Professori Graham Davies atuakkiamini Cities of the Biblical World​— Megiddo-​mi ima allappoq: „Illoqarfik Megiddo . . . niuffagianit angallattunillu tamaginneersunit tikikkuminartuuvoq; aammattaarli, pissaaneqarluaruni, [niuffagiat sakkutuullu aqqutigisartagaat] taakku nakkutigilersinnaavai taamaalillunilu niuernermut sorsunnermullu atasumik sunniuteqalerluni. Taamaattumik tupinnanngilaq illoqarfik . . . pissaaneqarnermut uppernarsaatiginiarlugu sorsuutigineqakulammat tiguarneqaraangallu ilungersortumik illersorneqartarmat.“

Megiddop oqaluttuassartaa ukiut 3500-it sinnerlugit matuma siorna aallartippoq, Egyptenip kunngiata Thotmes III-p Kana’animi naalagaasut tassani ajugaaffigimmagit. Sorsunneq maluginiarnartoq alla ukiut hundredelippassuit tamatuma kingorna 1918-imi pivoq, tuluit sakkutuuisa naalagaata Edmund Allenbyp Tyrkiamiut sakkutuui ajorsarterujussuarmagit. Eqqartuussisup Barakip Guutimit ikiorneqarluni Kana’animi kunngi Jabini Megiddomi ajorsarterujussuarpaa. (Eqqartuussisut 4:12-24; 5:19, 20) Tassanngaanniit ungasinngitsumi eqqartuussisup Gideonip Midjanikkut qimaatippai. (Eqqartuussisut 7:1-22) Aamma tassani kunngi Akazja kunngilu Josija toqutaapput. — 2 Kunngit 9:27; 23:29, 30.

Taamaattumik pissusissamisoorpoq Harmagedoni sumiiffimmut tassunga atassuteqartinneqarmat, tassanimi sorsunnerit pingaarutilippassuit pipput. Taanna Guutip akeqqaminut tamanut ajugaalluinnarnissaanut assersuutaavoq naleqquttoq.

[Suminngaanneernera]

Pictorial Archive (Near Eastern History) Est.

[Qupp. 7-mi assiliartat]

Inuit silarsuarmi sumi tamaaniittut mianersoqquneqarput Harmagedonimilu aniguinissaminnut periarfissaqarlutik

[Qupp. 7-mi assiliartaq]

Harmagedoni tassaassaaq aallaqqaataajumaartoq nuannersoq