Naapertuilluassuseq ujaruk illersuutigalugulu

’Taamaattumik naapertuilluassuseq Guutip pia ujaqqaartuarsiuk.’ — MATTHÆUSI 6:33, NV.

1, 2. Arnaq inuusuttoq kristumiu qanoq aalajangerpa, aamma sooq?

A SIAMI arnaq inuusuttoq kristumiu pisortaqarfimmi allatsitut sulivoq. Peqqissaarluni sulisarpoq, suliartujaartarpoq naammassisaqarniartarlunilu. Tassanili atorfeqarallaannarmat atorfinitsivinneqassanersoq aalajangerneqartussaavoq. Naalagaata atorfinitsikkumallugu qaffatsikkumallugulu neriorsorpaa atoqatigiumappani. Tamanna itigartilluinnarpaa taamaalioruni suliffini annaasussaagaluarlugu.

² Arnaq inuusuttoq kristumiu taanna taamaaliorami sianiilliorpa? Naamik, Jiisusip kajumissaarutaa una maleqqissaarpaa: ’Taamaattumik naapertuilluassuseq Guutip pia ujaqqaartuarsiuk.’ (Matthæusi 6:33, NV) Arnamut taassumunnga najoqqutassiat naapertuilluartut malillugit inuunissaq kinguaassiuutitigut inuunerlunnikkut iluanaaruteqarnissamit pingaaruteqarnerungaarpoq. — 1 Korinthimiut 6:18.

Naapertuilluassutsip pingaaruteqassusia

3. Naapertuilluassuseq suugami?

³ „Naapertuilluassuseq“-mut ilaapput ileqqussatigut assuarnaassuseq ilumoornerlu. Oqaatsit grækerisuut hebræerisuullu Biibilimi „naapertuilluassuseq“-mik nutserneqartut „unneqqarissuseq“-mik aamma „peqqusersuinneq“-mik isumaqarput. Naapertuilluassuseq tassaanngilaq nammineq najoqqutassiat aallaavigalugit imminut nalilerneq. (Lukasi 16:15) Naapertuilluassuseq tassaavoq Jehovap najoqqutassiaanut tunngatillugu peqqusersuinneq. Tamanna tassaavoq naapertuilluassuseq Guutip pia. — Romamiut 1:17; 3:21.

4. Sooq naapertuilluassuseq kristumiumut pingaaruteqartorujussuua?

⁴ Sooq naapertuilluassuseq taama pingaaruteqartigaa? Jehovap, ’Guutip naapertuilluartup’, kiffani naapertuilluartulioraangata ikiortarmagit. (Tussiaat 4:2, NV; Ussatit 2:20-22; Habakkuki 1:13) Naapertuilluanngitsumik iliortut taassumunnga qanittumik attaveqarsinnaanngillat. (Ussatit 15:8) Taamaattuminguna apustili Paulusip Timotheusi ima kajumissaaraa: „Inuusuttut kajungerisaat qimarratigikkit, noqqaassutigikkillu naapertuilluassuseq“ pissuserineqartussallu pingaarutillit allat. (2 Timotheusi 2:22, NV) Taamaattumilluuna Paulusip, anersaakkut sakkutuussutit assigiinngitsut eqqartoramigit, „iluarneq [naapertuilluassuseq, NV] saattuaasatut“ eqqaagaa. — Efesosimiut 6:14.

5. Inuit naammalluinnanngitsut qanoq ilillutik naapertuilluassuseq ujarsinnaavaat?

⁵ Soorunami inoqanngilaq naapertuilluarluinnartumik. Tamatta naammalluinnanngissuseq Adamimit kingornupparput, aamma tamatta inunnguutsitsinnit ajortiliuvugut, naapertuilluanngitsuuvugut. Taamaakkaluartorli Jiisusip naapertuilluassuseq ujaqquaa. Qanoq taamaaliortoqarsinnaagami? Taamaaliortoqarsinnaavoq Jiisusip inuunini naammalluinnartoq uagut pilluta utertitsissutitut pilliutigimmagu, pilliullu tamanna upperigutsigu Jehovap ajortitsinnik isumakkeerfigiumavaatigut. (Matthæusi 20:28; Johannesi 3:16; Romamiut 5:8, 9, 12, 18) Tamanna tunngavigalugu — Jehovap najoqqutassiai naapertuilluartut ilinniaraangatsigit, taakkua malinniarlugit sapinngisarput tamaat ilioraangatta sanngiissutittalu ajugaaffiginissaannut ikioqqulluta qinugaangatta — pallorfiginninnerput Jehovamit akuerineqarsinnaavoq. (Tussiaat 1:6; Romamiut 7:19-25; Saqqummersitat 7:9, 14) Tamanna tuppallernangaarami!

Silarsuarmi naapertuilluanngitsumi naapertuilluassuseq

6. Sooq kristumiunut siullernut silarsuarmiinneq navianarpa?

⁶ Jiisusip ajoqersugai taanna pillugu „nunarsuup isua tikillugu“ nalunaajaanissamut piginnaatinneqaramik imaannaanngitsumik suliassinneqarput. (Apustilit Suliaat 1:8) Taakkununnga oqaluussiffigeqquneqartoq tamakkerluni ’Ajortumut naalatsigitippoq’. (1 Johannesi 5:19) Silarsuaq  anersaamit guutiitsumit Saatanip siuarsagaanit ’tunillanneqarsimavoq’, kristumiullu tamatumannga ajortumik sunnerneqassapput. (Efesosimiut 2:2) Taakkununnga silarsuarmiinneq navianarpoq. Taamaallaat naapertuilluassutsip Guutip piata ujaqqaarneratigut pinertusaarsinnaallutillu assuarnaattuarsinnaapput. Amerlanerpaat pinertusaarput, ikittunnguilli ’iluarnerup [naapertuilluassutsip, NV] aqqutaanit’ nigorput. — Ussatit 12:28; 2 Timotheusi 4:10.

7. Pisussaaffiit suut pissutigalugit kristumiut silarsuup sunniinera akiortariaqarpaat?

⁷ Ullumikkut silarsuarmiinneq kristumiunut isumannaannerua? Naamerluinnaq! Ukiuni hundredelinni siullerninngarnit suli ajortunngornerusimavoq. Aamma Saatani nunarsuup eqqaanut igitaasimavoq kristumiullu tanitat „[arnap] qitornai allat Guutip inassutaanik Jiisusillu nalunaajaataanik aalajangiussisut“ sorsuffigalugit. (Saqqummersitat 12:12, 17) Saatanip aamma ’arnap qitornaanik’ taakkuninnga, imaluunniit kinguaassamik tamatuminnga, tapersersuisut tamaasa saassuttarpai. Kristumiulli silarsuarmit qimaasinnaanngillat. Silarsuarmut ilaanngillat, tassanili inuusariaqarput. (Johannesi 17:15, 16) Aamma tassani oqaluussisariaqarput eqqortuliorusuttut naniniarlugit Kristusimullu ajoqersuganngornissaannut ilinniartinniarlugit. (Matthæusi 24:14; 28:19, 20) Kristumiut silarsuup matuma ajortumik sunniinera ingalalluinnarsinnaannginnamikku tamanna akiortariaqarpaat. Akiorneqartariaqartut sisamat misissoriartigik.

Kinguaassiuutitigut inuunerlunnerup napiaaniutaa

8. Sooq Israelikkut Moabikkut guutiinik pallorfiginnittalerpat?

⁸ Israelikkut ukiuni 40-ni inoqajuitsumi angalaarnerata naalernerani taakkua ilarpassui naapertuilluassutsip aqqutaanit nigorput. Jehovap innuttaminik aniguisitsisarnera arlaleriarlutik takusimavaat, ungasinngitsukkullu nunamut neriorsuutigisamut isertussaapput. Piffissamili ajornartorsiorfiusumi tamatumani Moabikkut guutii kiffartorfigisalerpaat. Sooq? „Uinngup pilerigisai“ nakkaannarfigigamikkit. (1 Johannesi 2:16) Ima oqaluttuarineqarpoq: „Inuit Moabikkut arnartaat arneriffigalugit kanngunartuliortalerput.“ — 4 Mosesi 25:1.

9, 10. Sooq pingaartumik ullutsinni ajortumik uinikkut pilerissuseqarnerup ajortunngortitsisinnaanera ilisimaarisariaqarparput?

⁹ Pisimasumi tamatumani erserpoq eqqumanianngitsut ajortumik uinikkut pilerissuseqarnermit qanoq ajortunngortinneqarsinnaanersut. Silatusaassaagut tamanna ilinniutigigutsigu, ingammik kinguaassiuutitigut inuunerlunnerup inooriaatsitut nalinginnaasutut isigineqaleriartuinnarnera pissutigalugu. (1 Korinthimiut 10:6, 8) Nalunaarusiaq USA-meersoq imaappoq: „1970-ip missaata tungaanut USA-mi tamarmi katissimanani inooqatigiinneq inerteqqutaavoq. Maannakkut tamanna nalinginnaasupilussuuvoq. Siullermeerlutik katittut affaannit amerlanerusut katinnginnerminni najugaqatigiittarsimapput.“ * Kinguaassiuutitigut inuunerlunneq nunarpaaluinnarni nalinginnaasutut oqaatigineqarsinnaanngilaq; nunarsuaq tamakkerlugu nalinginnaavoq. Ajoraluartumillu kristumiut ilaasa pissutsit atuuttut maleruutiinnarfigaat — ilagiinnullu kristumiunut attaveqarluarunnaarlutik. — 1 Korinthimiut 5:11.

¹⁰ Aammattaaq kinguaassiuutitigut inuunerlunneq sumiluunniit nuannaartunartutut isigineqalersinniarneqartarpoq.  Filmini tv-milu aallakaatitani inuusuttut katissimanatik atoqatigiittarnerat ajunngitsutut nittarsaanneqartarpoq. Anguteqatinoortarneq arnaqatinoortarnerlu nalinginnaasutut saqqummiunneqartarput. Aamma aallakaatitarpassuit atoqatigiinnertallit atoqatigiinnermut tunngasortaat erseqqarinneruleraluttuinnarlutillu annikitsualuttortaat ilanngussorneqaleraluttuinnarput. Assit pornomut tunngasut aamma internetimi nanisariaannaapput. Assersuutigalugu tusagassiortoq allappoq ernermi arfineq-marlunnik ukiullip atuareernermi kingorna oqaluttuukkaani atuaqatimi internetimi nittartagaq arnanik atisaqanngitsunik atoqatigiittunik assiliartalik nassaarisimagaa. Ataataasoq annilaarpoq, ilumoortorli unaavoq meerarpassuit nittartakkat taamaattut siumortaraat angajoqqaatillu tamanna pillugu oqaluttuunneq ajoraat. Aamma angajoqqaat qanormita amerlatigisut meeqqamik qarasaasiami pinnguaatigisartagaat sumut tunnganersut nalunngilaat? Pinnguaatit nuannarineqarnerit ilarpassui, anersaapilussiornertaqarnermik nakuusernertaqarnermillu saniatigut, maajunnartunik kinguaassiuutitigut inuunerluttuliornertaqartarput.

11. Silarsuarmi kinguaassiuutitigut inuunerlunnermut ilaqutariit imminnut qanoq ilillutik illersorsinnaappat?

¹¹ Ilaqutariit „aliikkutassiat“ aserornartut tamakku qanoq akiorsinnaavaat? Naapertuilluassutsip Guutip piata ujaqqaarneratigut kinguaassiuutitigullu inuunerlunnermut tunngasunik sunilluunniit sammisaqarumanani. (2 Korinthimiut 6:14; Efesosimiut 5:3) Angajoqqaat meeqqamik sammisartagaannik nakkutiginneqqissaartut meeqqaminnullu Jehovamut asanninnermik taassumalu inatsisaanik naapertuilluartunik pigiliussisitsisut pornografiimik, qarasaasiami pinnguaatinik tiingasulersaarutinik, filminik kinguaassiuutitigut inuunerlunnertalinnik ussernartunillu allanik naapertuilluanngitsutut oqaatigineqarsinnaasunik akiuinissamut taakkua nakussatsittarpaat. — 5 Mosesi 6:4-9. *

Avatangiisinit tatineqarneq navianartorsiortitsivoq

12. Ukiuni hundredelinni siullerni suna ajornartorsiutaalerpa?

¹² Paulusip Asiaaqqamiittumi Lystramiitilluni angut tupinnartuliornikkut ajorunnaarsippaa. Ima oqaluttuarineqarpoq: „Inuit Paulusi qanoq iliortoq takuleramikku Lykaoniamiutut suaartarput: ’Guutit inuttut isikkoqarlutik aqqarfigisimavaatigut!’ Barnaba Zeusimik taavaat Paulusilu Hermesimik, taanna oqaluttuummat.“ (Apustilit Suliaat 14:11, 12) Kingusinnerusukkut inuit taakkua Paulusi Barnabalu toqoriaraluarpaat. (Apustilit Suliaat 14:19) Inuit taakkua avatangiisiminnit sunnertiasuararsuusimannguatsiarput. Aamma tamaanimiut ilaat kristumiunngoramik suli upperisapalaaqaqqajaasimagunarput. Paulusip Kolossemi kristumiunut allakkamini ’inngilisiorneq’ mianersoqqussutigaa. — Kolossemiut 2:18.

13. Ileqqut suut kristumiut ileqqorinaveersaartariaqarpaat, taamaaliornissamullu qanoq ilillutik nukissaqalersinnaappat?

¹³ Ullumikkuttaaq kristumiut ilumoortut inunnit amerlanerusunit ileqqorineqartut, upperisarsiornikkut  paasinnittaatsinik eqqunngitsunik kristumiunut najoqqutassianik narrunarsaataasunik aallaaveqartut, ileqqorinaveersaartariaqarpaat. Assersuutigalugu nunat ilaanni meerartaarnermut toqumullu tunngatillugu ileqqorpassuaqarpoq inuup toqoreernerup kingorna ingerlaqqittartumik anersaaqarneranik salluliuummik tunngaveqartunik. (Oqaluussisartup oqaasii 9:5, 10) Nunat ilaanni niviarsiaqqat kipineqartarnerat ileqquuvoq ajoqutaasoq. Iliuusiuvoq peqqarniitsoq aamma iliuuserineqartariaqanngitsoq angajoqqaat kristumiut meeqqaminnik asannittumik isumassuinissaannut naapertuutinngilluinnartoq. (5 Mosesi 6:6, 7; Efesosimiut 6:4) Kristumiut avatangiisinit tatineqarneq qanoq ilillutik akiorsinnaavaat ileqqullu tamakku akuerinagit? Taamaaliorsinnaapput Jehovamik tatiginnilluinnarnermikkut. (Tussiaat 31:7) Guutip naapertuilluartup uummammit pisumik imminut ima oqartut nakussatsillugillu isumassussavai: „Qimarnguffiga pallittaalisaralu, Guutiga tatigisara.“ — Tussiaat 91:2; Ussatit 29:25.

Jehova puioqinagu

14. Israelikkut nunamut neriorsuutigisamut isinngitsiarneranni Jehovap qanoq mianersoqquai?

¹⁴ Israelikkut nunamut neriorsuutigisamut isinngitsiarneranni Jehovap puiorneqannginnissani taakkununnga mianersoqqussutigaa. Ima oqarpoq: „[Jehova] Guutit puiorniaqinagu, peqqussutai malittarisassiaalu inatsisaalu ullumi ilinnut tunniussakka maleruarunnaarniaqinagit. Qaarsillarlutit nerisinnaagaangavit kusanartunillu illulioraangavit najugarisassannik, ussiutitit savaatitillu amerliartoraangata, kuultimik sølvimillu naammattumik pissarsigaangavit pigisatillu tamarmik amerliartortaraangata, taava tamakku anneruniartunnguutigissanngilatit allaat [Jehova] Guutit . . . isumakkeerlugu [puiorlugu, NV].“ — 5 Mosesi 8:11-14.

15. Uagut Jehovap puiuinnginnissaa qanoq ililluta qulakkeersinnaavarput?

¹⁵ Ullumikkut taamatut pisoqarsinnaava? Aap, kukkusumik pingaarnersiuigutta. Guutilli naapertuilluassusia ujaqqaarutsigu pallorfiginninneq minguitsoq inuunitsinni pingaarnerpaajussaaq. Paulusip uagutsinnik kajumissaarineratut ’piffissaqqissoq atortassavarput’ kiffartornitsinnilu piffissakinnitsinnik ilisimaarinnilluta. (Kolossemiut 4:5; 2 Timotheusi 4:2) Qasuersaarnerli aliikkusersornerlu ataatsimeeqataanermit oqaluussinermillu pingaarnerutikkutsigit Jehova puiorsinnaavarput, tassa inuunitsinni tunulliutilersinnaavarput. Paulusi oqarpoq ullussani kingullerni inuit ’inuulluarniutinik Guutimit pingaarnerutitsiumaartut’. (2 Timotheusi 3:4) Kristumiut eqqortuliorusuttut imminut misissortarput eqqarsartaatsimit tamatumannga sunnertinnginnissartik qulakkeerniarlugu. — 2 Korinthimiut 13:5.

Siulersorneqarumanngissutsip anersaava mianersorfigiuk

16. Eva inuillu Paulusip nalaani inuusut ilaat qanoq kukkusumik isiginnittaaseqarpat?

¹⁶ Naatsiivimmi Edenimi Saatani Evamik namminissarsiortumik siulersorneqarusukkunnaarsitsiniarnermini iluatsitsivoq. Evap nammineq aalajangerusuppaa suut eqqortuunersut suullu eqqunngitsuunersut. (1 Mosesi 3:1-6) Ukiuni hundredelinni siullerni Korinthimi ilagiinniittut ilaat tamatumunnga assingusumik siulersorneqarumanngissutsip anersaavanik anersaaqarsimapput. Taakku Paulusimit ilisimasaqarnerusoripput, taassumalu taakku mitallerpalulluni „apustilissaarsuarnik“ taavai. — 2 Korinthimiut 11:3-5; 1 Timotheusi 6:3-5.

17. Qanoq ililluta siulersorneqarumanngitsunngor- naveersaarsinnaavugut?

¹⁷ Ullumikkut silarsuarmi inuppassuit ’namminiinnaq  isummaminnik atuiumasuullutillu pingaakujuttuupput’, kristumiullu ilaat taakkunannga sunnertissimapput. Allaat inuit ataasiakkaat sallusuissummik akerlilersuilersimapput. (2 Timotheusi 3:4, NV; Filippimiut 3:18) Pallorfiginninnermut ilumoortumut tunngatillugu Jehovamit siulersortinnissarput aamma ’kiffamik ilumoortumik silatuumillu’ ilagiinnilu utoqqaanertanik suleqateqarnissarput pingaaruteqarluinnarpoq. Tamanna naapertuilluassusermik ujaaseriaasiuvoq, siulersorneqarumanngitsunngunnginnissamullu iluaqutigaarput. (Matthæusi 24:45-47; Tussiaat 25:9, 10; Esaja 30:21) Tanitat ilagiissaat ’sallusuissutsip sukaralugulu tunngavigaa’. Jehovap ilagiit taakkua illersorniarluta siulersorniarlutalu pilersippai. (1 Timotheusi 3:15) Taakkua suliaannik pingaarutilimmik akuerinninneq ’imminut angisuutinneq tunngavigalugu iliuuseqannginnissamut’ maniguullutalu Jehovap piumasaanut naapertuilluartumut naalatsigitinnissamut iluaqutigissavarput. — Filippimiut 2:2-4; Ussatit 3:4-6.

Jiisusi ilaaruk

18. Jiisusi sutigut ilaaqqullugu kajumissaarneqarpugut?

¹⁸ Jiisusi pillugu Biibilimi imaattumik siulittuuteqarpoq: „Eqqortumik iliorneq nuannaraat eqqunngitsuliornerlu uumigalugu.“ (Tussiaat 45:8; Hebræerit 1:9) Isiginnittaaseq ilaagassaqqingaarami! (1 Korinthimiut 11:1) Jiisusip Jehovap najoqqutassiai naapertuilluartut ilisimaannarnagit nuannarai. Taamaammat Saatanip inoqajuitsumi ussermani nangaanani itigartippaa ’naapertuilluassutsillu aqqusernanit’ nigunnginnissani aalajangiusimallugu. — Ussatit 8:20, NV; Matthæusi 4:3-11.

19, 20. Naapertuilluassusermik ujaasineq qanoq kinguneqarluartarpa?

¹⁹ Nassuerutigisariaqarpoq uinikkut eqqunngitsumik pilerissuseqarneq sakkortusinnaasoq. (Romamiut 7:19, 20) Naapertuilluassuserli uagutsinnut erlinnartuuppat tamanna guutiitsuussusermik akiuinissamut nakussatsissutigissavarput. (Tussiaat 119:165) Ajortunik siumugaqaraangatta qamannga pisumik naapertuilluassusermik nuannarinninneq illersuutigissavarput. (Ussatit 4:4-6) Eqqaamajuk ussernartumut nakkaannarnivut tamaasa Saatani ajugaatittarlutigu. Pitsaanerungaarpoq taanna akiorutsigu Jehovalu ajugaatillugu! — Ussatit 27:11; Jaaku 4:7, 8.

²⁰ Kristumiut ilumoortut naapertuilluassuseq ujaramikku ’inerititanik iluartunik [naapertuilluartunik, NV] Jiisusi-Kristusikkut inerittartunik ilumioqangaarput Guutip ataqqinaatissaanik unnersiutigineqaatissaanillu’. (Filippimiut 1:10, 11) „Inuttut pissuseq nutaaq Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitaq“ ativaat. (Efesosimiut 4:24, NV) Jehovamit pigineqarput taassumunngalu kiffartorneq inuunerminni pingaarnerpaatillugu, namminneq iliuusererusutatik pingaarnerpaatinnagit. (Romamiut 14:8; 1 Petrusi 4:2) Eqqarsaataat iliuusiilu tamakkunannga aqunneqartarput. Taakkua Ataatartik qilammiusoq qanoq nuannaartitsigaat! — Ussatit 23:24. (wE 1/1 06)

[Quppernerup ataani ilanngussaq]

Uteqqiinermi apeqqutit

• Naapertuilluassutsip ujarnissaa sooq taama pingaaruteqartigaa?

• Kristumiut naammalluinnanngitsut naapertuilluassuseq qanoq ujarsinnaavaat?

• Silarsuarmiittut suut kristumiut ingalassimasariaqarpaat?

• Naapertuilluassutsimik ujaasineq qanoq illersuutigissavarput?

[Atuaqqissaarnermi apeqqutit]

[Qupp. 18-mi assiliartaq]

Silarsuarmiinneq Jiisusip ajoqersugaanut navianarpoq

[Qupp. 19-mi assiliartaq]

Meeqqat Jehovamik asanninnermik ilinniartut kinguaassiuutitigut inuunerlunnerup akiornissaanut nakussatsinneqartarput

[Qupp. 20-mi assiliartaq]

Israelikkut ilaasa nunamut neriorsuutigisamut isereerlutik pigissaartunngoramik Jehova puiorpaat

[Qupp. 21-mi assiliartaq]]

Kristumiut Jiisusi assigalugu naapertuilluanngissuseq uumigaat