Guutip siunertaata naammassineqariartuaarnissaanut ingerlatsineq

„Guutip suut tamaasa naammassisarpai piumasani pissamaarutit malillugit.“ — EFESOSIMIUT 1:11.

1. Sooq Jehovap Nalunaajaasuisa ilagiivi tamarmik apriilip ulluisa 12-ianni 2006-imi katersuutissappat?

PINGASUNNGORNERMI apriilip ulluisa 12-ianni 2006-imi unnukkut inuit 16 millionit missaat Naalakkap unnukkorsiortitsinera najuuffiginiarlugu katersuutissapput. Katersuuffissaanni tamani nerrivimmiittoqassaaq timiusamik seernarsaateqanngitsumik, Kristusip timaanut assersuutaasumik, viinnimillu aappalaartumik, aavanut kuineqartumut assersuutaasumik. Oqalugiaateqassaaq Jiisusip toquneranik eqqaaniaalluni nalliuttorsiornerup tamatuma pingaaruteqarnera nassuiarlugu, oqalugiaatillu tamatuma naalernerata tungaanut assersuutit taakku — siullermik timiusaq taavalu viinni — najuuttunut tamanut ingerlaartinneqassapput. Jehovap Nalunaajaasuisa ilagiivini ikittuinnarni assersuutinik ilangiisoqassaaq, ilagiit ilaanni immaqa ataasiinnarmik. Ilagiit amerlanersaanni ilangiisoqassanngilaq. Sooruna kristumiut ikittuinnaat, tassa qilaliarnissamik neriugisallit, unnukkorsiornermi assersuutaasumi tamatumani ilangiisartut, kristumiulli amerlanerit, nunarsuarmi naassaanngitsumik inuunissamik neriugisallit, ilangiineq ajortut?

2, 3. (a) Jehovap suut tamaasa pinngortikkamigit qanoq tulleriiaarpai? (b) Nunarsuaq inuillu qanoq siunertaqarfigai?

² Jehova Guutiuvoq siunertalik. Siunertani piviusunngortinniarlugu „suut tamaasa naammassisarpai piumasani pissamaarutit malillugit“. (Efesosimiut 1:11) Siullermik ernituani pinngortippaa. (Johannesi 1:1, 14; Saqqummersitat 3:14) Taava ernini taanna aqqutigalugu ernernik anersaajusunik ilaqutariissuit pinngortippai. Naggataatigullu avataarsuaq nunarsuarlu inuit tassaniittut ilanngullugit pinngortippai. — Jobi 38:4, 7; Tussiaat 103:19-21; Johannesi 1:2, 3; Kolossemiut 1:15, 16.

³ Jehovap nunarsuaq pinngortinngilaa inunnik misiliiffiginiarlugu taakku misilereerunigit qilaliartinnissaat siunertaralugu, soorlu kristumiuuneraqatigiit ilagiivini amerlasuuni ajoqersuutigineqartoq. Aalajangersimasumik siunertaqarluni pinngortippaa, tassa ’najugaqarfissanngortinniarlugu’. (Esaja 45:18) Nunarsuaq inunnut pinngortippaa, inuillu nunarsuarmut pinngortillugit. (Tussiaat 115:16) Nunarsuaq tamarmi paratiisinngortussaavoq inunnik naapertuilluartunik inulik, taakkualu naggorisartussaallugulu paarisussaavaat. Inuit aappariit siulliit qilaliarnissamik neriorsorneqanngisaannarsimapput. — 1 Mosesi 1:26-28; 2:7, 8, 15.

Jehovap siunertaanik akornuseeriaraluarneq

4. Jehovap kisimi oqartussaasutut naalakkersueriaasia qanoq inuiaat oqaluttuarisaanerata aallartinnerani apeqquserneqarpa?

⁴ Piumasamisut iliorsinnaatitaanini Guutimit tunniunneqarsimasoq atornerlullugu Guutip ernerisa anersaajusut ilaat pikitsitsivoq Jehovallu siunertaanik akornusiinissaq aalajangiusimallugu. Asannillutik Jehovap kisimi oqartussaaneranut naalatsigitittut tamarmik eqqissinerat akornuserpaa.  Saatanip inuit aappariit siulliit Guutimit siulersorneqarumajunnaarnissamut tammartippai. (1 Mosesi 3:1-6) Jehovap pissaanera apeqqusinngilaa, taassumali kisimi oqartussaasutut naalakkersueriaasia taamaattumillu aamma naalakkersuisinnaatitaanera apeqquserpai. Taamaalilluni Jehovap kisimi oqartussaanera pillugu akerleriissut tunngaviusoq inuiaat oqaluttuarisaanerata aallartinnerani maani nunarsuarmi pilersinneqarpoq.

5. Akerleriissut pingaannginnerusoq suna pilersinneqarpa, kikkullu tamatumani pineqarpat?

⁵ Jehovap qilammi nunamilu kisimi oqartussaanera pillugu akerleriissummut pingaartumut tamatumunnga attuumassuteqarluinnarpoq akerleriissut pingaannginnerusoq Saatanimittaaq Jobip nalaani pilersinneqartoq. Jehovap pinngortitaasa taassumunnga naalatsigitinnerminnut kiffartornerminnullu pissutiginiagaat Saatanip apeqquserpaa. Oqarpoq namminissarsiortunik pissutiginiagaqarlutik taamaaliortut misilinneqarunillu Guutimik akerlilersuilissasut. (Jobi 1:7-11; 2:4, 5) Naak akerleriissut taanna Jehovap kiffaasa nunamiittut ilaannut inummut ataatsimut tunngatillugu pilersinneqaraluartoq, tamatumani Guutip erneri qilammiittut, allaallu Guutip ernitua, pineqarputtaaq.

6. Jehova qanoq siunertaminut aterminullu naapertuuttumik iliuuseqarpa?

⁶ Siunertaminut atermilu isumaanut naapertuuttumik Jehova imminut pruffiitinngortillunilu annaassisunngortippoq. * Saatani ima oqarfigaa: „Akerariissikkumaarpassi illit arnarlu, illit kinguaassat taassumalu kinguaassaa. Taassuma niaqqut aserortissavaa, illilli kimmiisigut keeriartarumaarpat.“ (1 Mosesi 3:15, NV) ’Arnap’ Guutip piata, peqatigiissortaata ilaanut qilammiittumut assersuutaasup, kinguaassaa aqqutigalugu, Jehovap Saatanip unammillernera iliuuseqarfigiumaarpaa Adamillu kinguaassai inuunissamik aniguinissamillu neriuutissillugit. — Romamiut 5:21; Galatiamiut 4:26, 31.

’Anngigisaq illernartoq piumasaata pia’

7. Jehovap siunertani apustili Paulusi aqqutigalugu paasinarsisitaa suua?

⁷ Kristumiunut Efesosimiittunut allakkaminni apustili Paulusip kusanartumik allaatigaa Jehovap siunertani naammassiniarlugu qanoq ingerlatsisarnersoq. Ima allappoq: „[Ilisimasaqalersippaatigut] ullut aalajangersagaasut naammatsiffissaanni ingerlatsineq eqqarsaatigalugu nammineq siunertarisaanut, naapertuuppoq, tassa sunik tamanik, qilammiittunik nunamiittunillu, Missiarsimi ataatsimut kattutititseqqinnissamut.“ (Efesosimiut 1:9, 10, NV) Jehovap siunertaa nuanningaartoq tassaavoq nunarsuup qilaallu ataasiussuseqalersinneqarnissaat pinngortitanut taassuma kisimi oqartussaaneranut asannillutik naalatsigitittunut najugaqarfiullutik. (Saqqummersitat 4:11) Taamaalilluni atia illernarsisinneqartussaavoq, Saatani sallutuutut qulaarneqartussaavoq, Guutillu piumasaa „qilammisut nunamissaaq“ pisussaavoq. — Matthæusi 6:10.

8. Oqaaseq ’ingerlatsinermik’ nutserneqartoq qanoq isumaqarpa?

⁸ Jehovap siunertaa, ’aalajangigaa’, „ingerlatsineq“ aqqutigalugu naammassineqartussaavoq. Oqaaseq Paulusip atugaa toqqaannartumik  nutserlugu isumaqarpoq ’illumi ingerlatsineq’. Pineqartoq tassaanngilaq naalagaaffik, soorlu assersuutigalugu naalagaaffik Missiarsikkoortoq, tassaallunili ingerlatseriaaseq imaluunniit aqutseriaaseq. * Jehovap siunertani naammassiniarlugu ingerlatseriaasiata nuanningaartup tamatuma ilagaa ’anngigisaq illernartoq’ ukiut hundredelikkuutaat ingerlaneranni saqqummersinneqariartuaartussaq. — Efesosimiut 1:10; 3:9, Ny Verden-Oversættelsen-imi quppernerup ataani ilanngussat.

9. Jehovap anngigisaq illernartoq piumasami pia qanoq saqqummersikkiartuaarsimavaa?

⁹ Angerutsit arlallit atorlugit Jehovap saqqummersikkiartuaarsimavaa kinguaassaq Edenimi neriorsuutigineqartoq pillugu siunertani qanoq piviusunngortinneqarumaartoq. Aaperaamik angerutsimi ersersinneqarpoq kinguaassaq neriorsuutigineqartoq nunarsuarmi Aaperaap kinguaassaatut inunngortussaasoq taannalu aqqutigalugu „nunarsuarmi inuiaat tamarmik“ pilluaqqunarsisussaasut. Tamatumani aamma paasinarsivoq allat kinguaassap ilaa pingaarneq ataasioqatigilissagaat. (1 Mosesi 22:17, 18) Inatsisit tunngavigalugit angerutsimi uinikkut Israelikkunnut angeruserineqartumi ersersinneqarpoq Jehovap ’kunngeqarfimmik palaseqatigiinnik innuttalimmik’ pilersitsinissani siunertarigaa. (2 Mosesi 19:5, 6) Daavimik angerutsimi ersersinneqarpoq kinguaassaq naalagaaffimmik ataavartussamik tunineqartussaasoq. (2 Samueli 7:12, 13; Tussiaat 89:4, 5) Inatsisit tunngavigalugit angeruseq aqqutigalugu juutit Missiarsimut siulersorneqareersimammata Jehovap saqqummersippaa tamatuma saniatigut siunertami qanoq naammassineqariartuaarnissaa. (Galatiamiut 3:19, 24) Inuit kinguaassap ilaanik pingaarnermik ataasioqateqalersussat tassaalersussaapput „kunngeqarfik palaseqatigiinnik innuttalik“ siulittuutigineqartoq, taakkulu ’Israelitut’ nutaatut, Israelikkutut anersaakkut ittutut, ’nutaamik  angerfigeqatigineqartussaapput’. — Jeremia 31:31-34; Hebræerit 8:7-9. *

10, 11. (a) Jehovap qanoq saqqummersippaa kinguaassaq neriorsuutigineqartoq kinaanersoq? (b) Sooq Guutip ernitua nunarsuarmukarpa?

¹⁰ Jehovap siunertaminik naammassinnikkiartuaarnermini ingerlatsinera naapertorlugu kinguaassap siulittuutigisap nunarsuarmi inunngornissaanut piffissanngorpoq. Jehovap inngili Gabrieli Mariamut aallartippaa tusarleqqullugu Jiisusimik taaneqartussamik ernertaassasoq. Inngilip ima oqarfigaa: „Pingaartorsuanngussaaq Qutsinnerussaartullu erneranik taaneqassalluni, Guutillu [Jehovap] tunissavaa ataataata Daavip issiavissaarsuanik; Jaakukkunnut kunngiussaaq naassaanngitsumik, naalagaassusialu atajuaannassaaq.“ (Lukasi 1:32, 33) Taamaalilluni kinguaassaq neriorsuutigineqartoq kinaanersoq paasinarsivoq. — Galatiamiut 3:16; 4:4.

¹¹ Jehovap ernitua nunarsuarmukartussaavoq tamakkiisumik misilinneqarniassagami. Jiisusi aalajangiisuusussaavoq Saatanip unammillernerata naammalluinnartumik akineqarnissaanut. Ataataminut aalajaattuassanerpa? Tamanna anngigisamut illernartumut attuumassuteqarpoq. Kingusinnerusukkut Paulusi Jiisusi pillugu ima allappoq: „Anngigisaq illernartoq tamanna Guutimut tunniusimanerup pia angeqaaq, manna nassuerutigisariaqarpoq: ’Uinikkut ilisaritinneqarpoq, anersaakkut iluartuutinneqarpoq, inngilinit takuneqarpoq, inuiaat akornanni oqaluussissutigineqarpoq, silarsuarmi upperfigineqarpoq, naalannarsilluni pavunnartinneqarpoq.’“ (1 Timotheusi 3:16, NV) Aap, Jiisusi toqussi tikillugu aalajaalluni assuarnaattuarnermigut Saatanip unammillerneranut inaarutaasumik aalajangiisuusumillu akissutaavoq. Anngigisamulli illernartumut atatillugu annikitsualuit allat aamma saqqummersinneqartariaqarput.

Guutip naalagaaffiata anngigisaa illernartoq

12, 13. (a) Guutip naalagaaffiata anngigisaata illernartup suna ilagaa? (b) Jehovap inuit killilimmik amerlassusillit qilaliartussatut toqqarniarmagit suna pisariaqarpa?

¹² Galilæami oqaluussilluni angalaarnermi ilaanni Jiisusip ersersippaa anngigisaq illernartoq naalagaaffimmini Missiarsikkoortumi naalakkersuisunut attuumassuteqarluinnartoq. Ajoqersukkat ima oqarfigai: „Ilissi tunineqarpusi Qilaap Naalagaaffiata [„Guutip naalagaaffiata“, Markusi 4:11] anngigisai ilisimasinnaassallugit.“ (Matthæusi 13:11) Anngigisap tamatuma ilagaa Jehovap ’savarpannguarnik’, inunnik 144.000-inik, ’kinguaassap’ ilaatut ernerminik ataasioqateqalersussanik taassumunnga qilammi naalakkersueqataasussanik toqqaanissaa. — Lukasi 12:32; Saqqummersitat 14:1, 4.

¹³ Inuit nunarsuarmi inuusussatut pinngortitaammata, Jehova „nutaamik“ pinngortitsisariaqarpoq — ’pinngortitaq nutaaq’ pisariaqarpoq — taakkua ilaat qilaliarsinnaaniassammata. (2 Korinthimiut 5:17) Apustili Petrusi, qilaliarnissamik nalissaqanngitsumik neriuuteqartutut toqqarneqartut ilaat, ima allappoq: „Unnersiutigineqarli Guuti Naalakkatta Jiisusi-Kristusip Ataataa, naakkinninnersuani naapertorlugu Jiisusi-Kristusip toqusunit makinneratigut ernioqqissikkamisigut neriugisamut uumasumut — kingornussassamut aserortussaanngitsumut, mingutsinneqartussaanngitsumut toquliortussaanngitsumullu qilanni paarineqartumut pisassarititaalluni ilissinnut.“ — 1 Petrusi 1:3, 4.

14. (a) Juutiunngitsut ilaat qanoq Guutip naalagaaffiata anngigisaanut illernartumut ilanngutitinneqarpat? (b) Suna ikiortigalugu ’Guutip itissusii’ tamakku paasisinnaavavut?

¹⁴ Naalagaaffinngortussammi naalakkersuisut pillugit anngigisap illernartup tamatuma aamma ilagaa Guutip juutiunngitsunik inunnut ikittunnguanut qilammi Kristusimik naalakkersueqateqarnissamut qaaqquneqartussanut ilanngussiumaarnera. Paulusip Jehovap ’ingerlatsinerata’, imaluunniit siunertaminik naammassinneriaasiata, ilaa taanna ima nassuiarpaa: „Siulitsinni tamanna inuit qitornaannut ilisimalersinneqarsimanngilaq maanna saqqummiunneqarneratut apustiliinut pruffiitiinullu illernartunut Anersaakkut: Tassa Guutimik nalusut kingornusseqataasussaasut timimullu ilanngutitaaqataasut Kristusi-Jiisusimillu neriorsuummik pissarseqataatitaasut iivangkiiliukkut.“ (Efesosimiut 3:5, 6) Anngigisap illernartup ilaa tamanna qanoq paasisariaqarnersoq, anersaaq aqqutigalugu ’apustilinut illernartunut’ saqqummersinneqarpoq. Ullumikkut aamma taamaappoq: Anersaamit illernartumit ikiorneqanngikkaluarutta ’Guutip itissusii’ tamakku paasisinnaassanngikkaluarpavut.  — 1 Korinthimiut 2:10; 4:1; Kolossemiut 1:26, 27.

15, 16. Sooq Jehovap Kristusip kingornusseqatissai naalakkersueqatissaalu inuit akornannit toqqarsimavai?

¹⁵ 144.000-it qaqqami Zionimi qilammiittumi ’Savaaraq’ ilagigaat takuneqartut pillugit allassimavoq ’nunamit immikkoortillugit pisiaasut’, ’inunnit immikkoortillugit Guutimut savaaqqamullu [Jiisusi Kristusimut] naaqqaataallutik pisiaasut’. (Saqqummersitat 14:1-4, 1900/1961) Jehovap ernermi qilammiittut siullersaat kinguaassap Edenimi neriorsuutigineqarsimasup ilaatut pingaarnertut toqqarpaa, kisianni sooq Kristusimut kingornusseqataasussat inuit akornannit toqqarsimavai? Apustili Paulusip nassuiarpaa killilimmik amerlassusillit taakku Jehovap ’aalajangiinera malillugu qaaqqusaasut’, ’piumasaa ajunngitsoq malillugu’. — Romamiut 8:17, 28-30; Efesosimiut 1:5, 11; 2 Timotheusi 1:9.

¹⁶ Jehovap aalajangiinera, imaluunniit siunertaa, tassaavoq aterminik angingaartumik illernarsisitsinissaa aamma qilammi nunamilu kisimi oqartussaanerminik akitsisitsinissaa. Asseqanngitsumik silatuumillu ’ingerlatsinermigut’, tassa aqutseriaatsimigut, Jehovap ernituani nunarsuarmut aallartippaa, tassanilu taanna tamakkiisumik misilinneqarpoq. Jehova aamma aalajangerpoq inuit ilaat ernermisut kisimi oqartussaanerminik toqumut allaat tapersersuisut ernermi naalagaaffiani Missiarsikkoortumi naalakkersuisussanut ilaassasut. — Efesosimiut 1:8-12; Saqqummersitat 2:10, 11.

17. Sooq Kristusip taassumalu naalakkersueqataasa inuttut inuusimanerat nuannaarutigisinnaavarput?

¹⁷ Jehovap Adamip kinguaavinut asanningaarnini ersersippaa ernerminik nunarsuarmut maannga aallartitsinermigut naalagaaffinngortussamilu naalakkersueqataasussatut ernermi kingornusseqatissaanik inuit akornannit toqqaanermigut. Inunnut allanut Abelip nalaaniilli Jehovamut aalajaattuarsimasunut tamanna qanoq iluaqutaasinnaava? Ajortimut toqumullu inussiaasut inuit naammalluinnanngitsut Jehovap aallaqqaammut siunertarisaa naapertorlugu anersaakkut timikkullu ajorunnaarsinneqartariaqarlutillu naammalluinnartunngortinneqartariaqarput. (Romamiut 5:12) Nunarsuarmi naassaanngitsumik inuunissamik neriugisallit tamarmik tuppallersaatigingaartarlugulu qiimmassaatigingaartarpaat kunngiminnit Jiisusi Kristusimit asannittuliorfigineqarnissartik, inussiarnisaarfigineqarlutillu paasineqarnissartik, soorlumi nunarsuarmi kiffartorallarami taanna ajoqersukkaminut taamatut iliortarsimasoq. (Matthæusi 11:28, 29; Hebræerit 2:17, 18; 4:15; 7:25, 26) Aamma tupallersaatigingaartarlugulu qiimmassaatigingaartarpaat nalunnginnamikku Kristusi ilagalugu qilammi kunngiullutillu palasiusussat angutaasimallutillu arnaasimasut ilumoorfiginnittut namminneq inuttut sanngiissutiminnik akiugaqartarsimasut inuunerminnilu unamminiagaqartarsimasut. — Romamiut 7:21-25.

Jehovap siunertaa eqquutinngitsoorsinnaanngitsoq

18, 19. Sooq Paulusip oqaasii Efesosimiut 1:8-11-mi allassimasut maanna paasilluarnerusinnaavavut, allaaserisamilu tulliuttumi suna misissussavarput?

¹⁸ Maanna oqaatsit Paulusip kristumiunut tanitanut allassimasai, Efesosimiut 1:8-11-mi allassimasut, paasilluarnerusinnaavavut. Taanna allappoq Jehovap ilisimasaqalersikkai „anngigisamik illernartumik piumasami pianik“ (NV), Kristusi ilagalugu ’kingornusseqataasussanngortitaasut’, aamma ’Guutip aalajangiineragut taamaattussaatitaareersut, Guutimmi suut tamaasa naammassisarai piumasani pissamaarutit malillugit’. Paasivarput tamakku tamarmik Jehovap siunertaminik naammassinnikkiartuaarnermini ’ingerlatsineranut’ alutornangaartumut naapertuuttuusut. Qulaani eqqaaneqartut iluaqutigalugit aamma paasisinnaavarput sooq Naalakkap unnukkorsiortitsineranut najuuttut ilaat ikittuinnaat assersuutinik ilangiisartut.

¹⁹ Allaaserisami tulliuttumi misissussavarput  Kristusip toquneranik eqqaaniaalluni nalliuttorsiorneq qilaliarnissamik neriugisalinnut qanoq isumaqarnersoq. Aamma paasiniassavarput sooq eqqaaniaalluni nalliuttorsiornerup sumut assersuutaanera nunarsuarmi inuunissamik neriugisalinnit millionilinnit soqutigineqartariaqarnersoq.

[Quppernerup ataani ilanngussaq]

Uteqqiineq

• Sooq Jehovap nunarsuaq pinngortippaa inuillu tassunnga inissillugit?

• Sooq Jehovap ernitua nunarsuarmi misilinneqartariaqarpa?

• Sooq Jehovap Kristusip naalakkersueqatissai inuit akornannit toqqarsimavai?

[Atuaqqissaarnermi apeqqutit]