’Inuiannut tamanut nalunaajaat’

„Nalunaajaasigissavassi . . . nunarsuup isua tikillugu allaat.“ — APUSTILIT SULIAAT 1:8.

1. Ajoqersukkat siulittuut Matthæusi 24:14-imi allassimasoq qanga aamma sumi tusaqqaarpaat?

MATTHÆUSI 24:14-imi Jiisusip oqaasii ima ilisimaneqarluartigipput ilarpassuatsinnit alanngaarneqarsinnaallutik. Siulittuutillumi maluginiarnassusia! Takorlooriaruk ajoqersukkat siulittuut taanna tusaqqaaramikku qanoq eqqarsarsimassanersut. Tamanna ukiumi 33-mi pivoq. Ajoqersukkat Jiisusi ukiut pingasut missiliorlugit ilagisimavaat tamatumalu nalaani Jerusalemiliaqatigisimallugu. Tupinnartuliai takusimavaat ajoqersuutigisaalu tusarnaarsimallugit. Sallusuissutit naleqangaartut imminnut ilinniartitsissutigisimasai nuannaarutigigaluarlugit nalunngilluarpaat inuit tamakkeratik immissut nuannaarutiginnittut. Jiisusimut akeraasut pissaaneqartorujussuullutillu sunniuteqarluartuupput.

2. Navianartut unamminiarnartullu suut ajoqersukkat nalaakkumaarpaat?

² Uuliap Qaqqaani ajoqersukkat sisamat Jiisusi issiaqatigaat taassumalu navianartut unamminiarnartullu nalaakkumaakkatik pillugit oqaluttuarnerani tusarnaaqqissaarlugu. Siusinnerusukkut Jiisusip oqaluttuussimavai toqutaajumaarluni. (Matthæusi 16:21) Maanna paasitippai taakkua aamma namminneq peqqarniitsumik malersorneqarumaartut. Ima oqarpoq: „Naalliutsikkumaarpaasi toqukkumaarlusilu, ateralu pillugu inuiannit tamanit uumissorneqassaasi.“ Pisussalli tamakkuinnaanngillat. Inuppassuit pruffiitioqqusersunit tammartinneqarumaarput. Allat tunussiumaarput imminnullu killuutigeqattaallutik uumissoqatigiillutillu. Inuit ilaanni, aap „amerlanerni“, Guutimik taassumalu oqaasianik asanninneq nillertunngorumaarpoq. — Matthæusi 24:9-12.

3. Matthæusi 24:14-imi Jiisusip oqaasii sooq taama tupaallannartigaat?

³ Jiisusi siunissami pisussat avaanngunartut eqqaareerlugit ajoqersukkat tupigusuutigisimassagunagaannik oqaaseqarpoq. Taanna ima oqarpoq: „Naalagaaffimmik nutaarsiassaq nuannersoq tamanna nunarsuarmi inuit najugarisaanni tamarsuarmi oqaluussissutigineqassaaq inuiannut tamanut nalunaajaatitut; taavalu naggatissaq nalliutissaaq.“ (Matthæusi 24:14, NV) Aap, suliaq Jiisusip Israelimi aallartissimasaa — ’sallusuissummik nalunaajaassutiginninneq’ — ingerlateqqinneqassaaq nunarsuarlu tamakkerlugu annertusissalluni. (Johannesi 18:37) Siulittuut alutornangaarami! „Inuiannut tamanut“ sallusuissummik nalunaajaatiginninnissaq tamanna unamminiarnartuussaaq; taamaaliorneq ’inuiannit tamanit uumissorneqaraluarluni’ tupinnartuliaassaaq. Suliassarujussuarmik tamatuminnga naammassinninneq Jehovap angingaassusianik pissaaneqassusianillu naalannarsisitsiinnarnani aamma taassuma asanninneranik, nallittuineranik erinitsajuissusianillu naalannarsisitsissaaq. Aammattaaq tamanna taassuma kiffaasa uppernerminnik tunniusimanerminnillu iliuutsimikkut ersersitsinissaannut periarfissiissaaq.

4. Kikkut oqaluusseqquneqarpat, qanorlu ikiorneqarnissaat Jiisusip neriorsuutigaa?

⁴ Jiisusip ajoqersukkani pingaaruteqartorujussuarmik suliassaqarnerannik paasitilluarpai. Qilaliannginnermini taakkununnga saqqummerpoq imalu oqarluni: „Anersaap Illernartup tikippasi pissatsitaajumaarpusi, nalunaajaasigissavassilu Jerusalemimi Judæamilu tamarmi Samariamilu nunarsuullu isua tikillugu allaat.“ (Apustilit Suliaat 1:8) Soorunami kingusinnerusukkut allat taakkununnga ilaliutissapput. Ajoqersukkalli ikittuararsuupput. Taakkua tuppallersaatigisimassaqaat paasillugu suliassamik Guutimeersumik tamatuminnga Guutip anersaavanit illernartumit pissaaneqangaartumit naammassinnissinnaanngortinneqarnissartik!

5. Oqaluussineq pillugu ajoqersukkat suna ilisimanngilaat?

 ⁵ Ajoqersukkat nalunngilaat nutaarsiassaq nuannersoq oqaluussissutigisussaallugu inunnillu inuiannit tamaneersunik ajoqersuganngortitsiortortussaallutik. (Matthæusi 28:19, 20) Qanorli peqqissaartigisumik nalunaajaasoqassanersoq naluaat, aamma naggatissaq qaqugu nalliutissanersoq naluaat. Aamma uagut naluarput. Jehovap kisimi tamakku isumagiumaarpai. (Matthæusi 24:36) Jehovap kissaatigisaatut annertutigisumik nalunaajaasoqareerpat taassuma pissutsit aaqqissuussaanerat ajortoq maanna atuuttoq atorunnaarsissavaa. Aatsaat taamaalinerani kristumiut paasissavaat Jehovap kissaatigisaatut annertutigisumik oqaluussisoqarsimasoq. Ajoqersukkat siulliit naggatissap nalaani qanoq nalunaajaasoqartiginissaa takorlooruminaatsissimassavaat.

Ukiuni hundredelinni siullerni nalunaajaaneq

6. Ukiumi 33-mi piinsip ulluani tamatumalu kingorna qanoq pisoqarpa?

⁶ Ukiuni hundredelinni siullerni Guutip naalagaaffianik oqaluussissutiginninneq ajoqersuganngortitsiortornerlu tupinnartumik kinguneqarluarpoq. Ukiumi 33-mi piinsip ulluani ajoqersukkat 120-t missaanniittut inimi qullermi Jerusalemimiittumi katersuupput. Guutip anersaava illernartoq taakkununnga kuineqarpoq, apustili Petrusi tupinnartuliamut tamatumunnga nassuiaataasumik tiguartinnartumik oqalugiaateqarpoq, inuillu 3000-it missaanniittut uppertunngorput kuisillutillu. Tamannali aallaqqaataannaavoq. Upperisarsiornikkut siuttut nutaarsiassamik nuannersumik oqaluussissutiginninnermik aalajangersimallutik unitsitsiniaagaluartut Jehovap ajoqersukkat „annaanneqartut ullut tamaasa ilanngutitittarpai“. Sivitsunngitsoq „angutit amerlassusiisa 5.000-it missiliulerpaat“. Tamatuma kingorna „Naalakkamut uppertut ilanngussortuarput, angutit arnallu amerlaqisut“. — Apustilit Suliaat 2:1-4, 8, 14, 41, 47; 4:4; 5:14.

7. Korneliusip Guutimut saannera sooq immikkut maluginiarnarpa?

⁷ Ukiumi 36-mi pingaaruteqaqisumik pisoqarpoq — Korneliusi, Guutimik nalusuusoq, Guutimut saappoq kuisillunilu. Jehovap apustili Paulusi angummut taassumunnga Guutimik mianerinnittumut siulersoramiuk ersersippaa ’inunnik inuiannit tamaneersunik ajoqersuganngortitsiortoqqusineq’ nunani assigiinngitsuni juutinuinnaq tunnganngitsoq. (Apustilit Suliaat 10:44, 45) Oqaluussinermi siuttuusut qanoq periarpat? Judæami apustilit utoqqaanertallu paasigamikku nutaarsiassaq nuannersoq aamma inunnut inuianneersunut, tassa juutiunngitsunut, tusarliunneqassasoq Guuti unnersiutigaat. (Apustilit Suliaat 11:1, 18) Tamatuma nalaani juutinut oqaluussineq suli kinguneqarluartarpoq. Ukiualuit tamatuma kingorna, ukiumi 58-imiugunartoq, kristumiut juutiunngitsut saniatigut ’juutit 1000-illit uppertunngorsimapput’. — Apustilit Suliaat 21:20.

8. Nutaarsiassaq nuannersoq inuit qanoq sunnerneqaatigisarpaat?

⁸ Ukiuni hundredelinni siullerni kristumiut amerliartornerat ajasoornarpoq, inuilli ilanngussortut puiussanngilavut. Tusarliussaq Biibilimeersoq tusagaat sunniuteqarluarpoq. (Hebræerit 4:12) Tamatuminnga ilassinnittut inuunertik allanngortilluinnarpaat. Inuit ileqqussatigut minguitsumik inuulerput, inuttut pissuseq  nutaaq atillugu Guutimullu saammaannartillutik. (Efesosimiut 4:22, 23) Ullumikkut aamma taamatut pisoqartarpoq. Nutaarsiassamillu nuannersumik ilassinnittut tamarmik naassaanngitsumik inuunissamik nuannersumik neriuuteqarput. — Johannesi 3:16.

Guutip suleqatai

9. Kristumiut siulliit suna immikkut pisinnaatitaaffigalugulu akisussaaffigalugu paasivaat?

⁹ Ukiuni hundredelinni siullerni kristumiut taamanikkut suliarineqartut namminneq ataqqinaatissamittut isiginngilaat. Paasivaat ’anersaap illernartup pissaaneratiguinnaq’ oqaluussisinnaallutik. (Romamiut 15:13, 19) Jehova taannaavoq anersaakkut ineriartornermut akisussaasoq. Aammali nalunngilaat ’Guutimut suleqataaneq’ immikkut pisinnaatitaaffigalugulu akisussaaffigalugu. (1 Korinthimiut 3:6-9) Taamaattumik imminnut suliassiissutigineqartoq naammassiniarlugu Jiisusip peqqussutaa malillugu ilungersorput. — Lukasi 13:24.

10. Ukiuni hundredelinni siullerni kristumiut ilaat inuiannut tamanut nalunaajaaniarlutik qanoq iliorpat?

¹⁰ „Guutimik nalusunut apustiliusutut“ Paulusi nunakkut immakkullu kilometerit tusindilippassuit angalavoq Grækerillu Nunaanni Romamiullu pigisaanni Asiami ilagiippassuarnik pilersitsilluni. (Romamiut 11:13) Aamma Romaliarpoq immaqalu allaat Spanialiarluni. Apustili Petrusi, ’kipineqartuni iivangkiiliumik nalunaajaatiginnittussanngortinneqartoq’, killup tungaanukarpoq Babylonimi, taamanikkut juutiussutsimut qitiusumi pingaarutilimmi, oqaluussiniarluni. (Galatiamiut 2:7-9; 1 Petrusi 5:13) Naalakkap sulinerani ilungersorlutik suleqataasorpassuit ilagaat arnat soorlu Tryfæna Tryfosalu. Arnarlu Persisimik atilik pillugu allassimasoqarpoq „Naalakkami sulingaartoq“. — Romamiut 16:12.

11. Ajoqersukkat iliuuseqarnerat Jehovap qanoq pilluaqquaa?

¹¹ Jehovap taakkua oqaluussisartullu aallussilluartut allat iliuuserisimasaat pilluaqqungaarpai. Jiisusip inuiannut tamanut nalunaajaasoqarumaarnera pillugu siulittuineraniit ukiut 30-t qaangiutinngitsut Paulusi allappoq ’iivangkiiliu qilaap ataani pinngortitanut tamanut oqaluussissutigineqarsimasoq’. (Kolossemiut 1:23) Taava naggatissaq nalliuppa? Aap, taamatut oqartoqarsinnaavoq. Ukiumi 70-imi juutit aaqqissuussaanerannut nalliuppoq Romamiut sakkutuuisa Jerusalemi naalaffillu aserormatigik. Jehovali aalajangersimavoq Saatanip nunarsuaq tamakkerlugu pissutsinik aaqqissuussineranik atorunnaarsitsinnginnermini nalunaajaasoqarnerungaarumaartoq.

Ullumikkut nalunaajaaneq

12. Biibilimik atuaqqissaartartut siulliit oqaluusseqqusineq qanoq paasivaat?

¹² 1800-kkut naalerneranni, piffissami sivisoorujussuarmi upperisarsiornikkut tunussinerup malunnarnerunerata kingorna, pallorfiginninneq ilumoortoq pilerseqqinneqarpoq. Biibilimik atuaqqissaartartut, Jehovap Nalunaajaasuisa taamanikkut taaguutaat, nunarsuaq tamakkerlugu ajoqersuganngortitsiortoqqusissut paasivaat. (Matthæusi 28:19, 20) 1914-imi inuit 5100-t missiliorlugit oqaluusseqataapput, nutaarsiassarlu nuannersoq nunani 68-ini oqaluussissutigineqarluni. Biibilimilli atuaqqissaartartut siulliit taakku Matthæusi 24:14-ip isumaa tamakkiisumik paasinngilaat. 1800-kkut naalerneranni Biibili, nutaarsiassamik nuannersumik imaluunniit iivangkiiliumik imaqartoq, Biibililiorniaqatigiiffinnit oqaatsinut assigiinngitsorpassuarnut nutserneqarsimallunilu  naqiterneqarsimavoq agguaanneqarlunilu. Taamaattumik ukiuni qulikkuutaani arlalinni Biibilimik atuaqqissaartartut isumaqarput inuiannut nalunaajaasoqareersoq.

13, 14. Guutip piumasaanik siunertaanillu eqqornerusumik paasinninneq suna The Watch Tower-ip normuani 1928-moortumi allaatigineqarpa?

¹³ Jehovap innuttani piumasaminik siunertaminillu eqqornerusumik paasinnikkiartuaartippai. (Ussatit 4:18) The Watch Tower-imi 1. decembari 1928-moortumi ima allassimavoq: „Oqarsinnaavugut Biibilimik agguaaneq Naalagaaffimmik iivangkiiliup oqaluussissutigineqarnissaanik siulittuutip eqquunnerigaa? Naamerluinnaq! Naak taamatut Biibilimik agguaasoqaraluartoq, Guutip nalunaajaasuisa ikittunnguit atuakkanik atuagassianillu Guutip siunertaanut nassuiaataasunik naqiterisitsinissaat inoqutigiinnullu Biibilimik pisimasunut pulaarnissaat pisariaqarpoq. Taamaaliunngippata inuit naalagaaffiup Missiarsikkoortup ullutsinni pilersinneqarsimanera pillugu ilisimasaqarnavianngillat.“

¹⁴ The Watch Tower-ip normuani tamatumani nangilluni ima allassimavoq: „1920-mi . . . Biibilimik atuaqqissaartartut Naalakkatta Matthæusi 24:14-imi siulittuutaanik eqqortumik paasinnilerput. Paasivaat ’iivangkiiliu tamanna’ Guutimik nalusunut imaluunniit inuiannut tamanut nalunaajaatitut nunarsuaq tamakkerlugu oqaluussissutigineqartussaq naalagaaffimmik takkuttussamik iivangkiiliuunngitsoq, Missiarsitulli kunngiusoq nunarsuarmut naalakkersuilereersoq pillugu iivangkiiliuusoq.“

15. Oqaluussineq 1920-kkunniilli qanoq annertusisimava?

¹⁵ ’Nalunaajaasut ikittunnguit’ taakku 1920-kkunni ikittunnguujuaannanngillat. Ukiuni qulikkuutaani tulliuttuni ’savat allat’ ’amerlangaartut’ katersorneqalersut kikkuunerat paasineqarpoq. (Saqqummersitat 7:9; Johannesi 10:16) Ullumikkut nunarsuaq tamakkerlugu nunani 235-ni nutaarsiassamik nuannersumik oqaluussissutiginnittartut 6.613.950-upput. Siulittuutip eqquunnera tupinnangaarami! „Naalagaaffimmik nutaarsiassaq nuannersoq“ aatsaat taama oqaluussissutigineqartigaaq. Nunarsuarmi Jehovamut kiffartortut aalajaatsut aatsaat taama amerlatigipput.

16. Ukiumi kiffartorfiusumi qaangiuttumi suut suliarineqarpat? (Takuuk nalunaarusiaq Vagttårnet-imi 1. februaari 2006-imoortumi qupp. 27-30-miittoq).

¹⁶ Nalunaajaasut amerlangaartut taakku ukiumi kiffartorfiusumi 2005-imi ulapaarsimapput iliuuseqartorujussuusimallutillu. Akunnerit milliardit sinnerlugit nunani 235-ni nutaarsiassamik nuannersumik oqaluussissutiginninnermut atorneqarsimapput. Pulaaqqiinerit millionilippassuusimapput, aamma millionilippassuit Biibilimik atuaqqissaaqatigineqarsimapput. Tamakku Jehovap Nalunaajaasuinit, akissarsiaqaratik piffissaminnik nukimminnillu Guutip oqaasianik allanut oqaluussissutiginninnermut atuisunit, suliarineqarput. (Matthæusi 10:8) Jehovap anersaani illernartoq pissaaneqangaartoq iluaqutigalugu kiffani piumasaminik naammassinninnissaannut nukissaqalersittuarpai. — Zakaria 4:6.

Nalunaajaaniarluni eqiasuilluni iliuuseqarneq

17. Jiisusip nutaarsiassamik nuannersumik oqaluussissutiginneqqusinera Jehovap innuttaasa qanoq periaaseqarfigaat?

¹⁷ Jiisusip nutaarsiassamik nuannersumik oqaluussissutiginnittoqarnissaanik oqaatiginninneranit  maanna ukiut 2000-ingajaat qaangiutereeraluartut, Guutip innuttai aallussilluartuarput. Nalunngilarput pinertusaarlutalu ajunngitsulioraangatta Jehovap pissusii soorlu asanninneq, nallittuineq erinitsajuinnerlu ersersittarlutigit. Taassumatut kinaluunniit tammaqqunngilarput, kissaatigaarpulli inuit allamik isumataassasut Jehovamullu saammaannartissasut. (2 Korinthimiut 5:18-20; 2 Petrusi 3:9) Jehovap Nalunaajaasuisa anersaakkut tamaviaarlutik aallussilluarlutillu nunarsuup isua tikillugu allaat nutaarsiassaq nuannersoq oqaluussissutigiuarpaat. (Romamiut 12:11) Tamatuma kingunerisaanik inuit tamaginni ittut sallusuissummik ilassinnipput Jehovallu asannilluni siulersuineranik malinnillutik. Assersuutit misissoriartigit.

18, 19. Nutaarsiassamik nuannersumik ilassinnissimasut pillugit misigisat suut oqaluttuarisinnaavigit?

¹⁸ Charles Kenyap kippasissuani naasorissaasuusimavoq. 1998-imi tupa 8 tonsi sinnerlugu tunivaa tupamillu naatitsillammattut nersornaaserneqarluni. Tamatuma nalaani Biibilimik atuaqqissaartalerpoq. Sivitsunngitsoq paasilerpaa tupamik nioqqutissiornermut tunngasumik suliaqarneq Jiisusip tullermik asanninnissamik peqqussutaanik unioqqutitsinerusoq. (Matthæusi 22:39) Charles isummerami ’tupamik naatitsillammak’ ’toqutsillammattut’ iinnartoq, tupap naasortai pigisani toqunartulimmik seqqittarpai. Tunniulluinnarnissamut kuisinnissamullu siumukarpoq, maannalu pioneriuvoq ilagiinnilu kiffartortuulluni.

¹⁹ Qularutissaanngilaq Jehovap nunarsuaq tamakkerlugu nalunaajaatigineqartoq iluaqutigalugu inuiaat sajutsikkai, aamma erlinnartuutit — tassa inuit — katersorneqartut. (Haggaji 2:7) Pedro, Portugalimi najugaqartoq, 13-inik ukioqarluni palasissat ilinniarfianni ilinnialerpoq. Ajoqersuiartortitanngornissani Biibilimillu ilinniartitsissutiginnilernissani anguniagaraa. Sivitsunngitsorli ilinniarnini unitsippaa Biibili pillugu ilinniartitsisoqarpianngimmat. Ukiut arfinillit tamatuma kingorna Lissabonimi universitetimi psykologinngorniarpoq. Ajamini najugaqarpoq, taanna Jehovap Nalunaajaasuisa ilagaat, taassumalu Biibilimik atuaqqissaaqqullugu kajumissaarpaa. Tamatuma nalaani Pedrop Guutip piunera qularaa, aamma aalajangersinnaanngilaq Biibilimik atuaqqissaartalissanerluni atuaqqissaartassannginnerluniluunniit. Universitetimi psykologiimi ilinniartitsisuni aalajangersinnaannginneq pillugu oqaloqatigaa. Ilinniartitsisua oqarpoq psykologii naapertorlugu inuit aalajangersinnaanngitsut imminut aserorsaqqajaasartut. Tamanna pissutigalugu Pedro Biibilimik atuaqqissaartalerniarluni aalajangerpoq. Qanittukkut kuisippoq, maannalu nammineq allat Biibilimik atuaqqissaaqatigisarpai.

20. Inuiannut taama nalunaajaasoqartiginera sooq nuannaarutigisinnaavarput?

²⁰ Inuiannut qanoq nalunaajaasoqartigissanersoq suli naluarput, aamma ulloq nalunaaquttap-akunneraluunniit naggatissap nalliuffissaa naluarput. Taamaallaat nalunngilarput qanittukkut nalliutissasoq. Nuannaarutigaarput nutaarsiassap nuannersup taama oqaluussissutigineqartiginera, Guutip naalagaaffiata inuit naalakkersuisuinik taarsiingajalerneranut uppernarsaatissarpassuit tamanna ilaannarimmassuk. (Danieli 2:44) Ukiut tamarluinnaasa inuit millionillit nutaarsiassamik nuannersumik ilassinninnissamut periarfissinneqartarput, tamannalu Guutitsinnut Jehovamut ataqqinaataavoq. Qanortoq aalajaalluta pinertusaarnissarput nunarsuarlu tamakkerlugu qatanngutivut peqatigalugit inuiannut tamanut nalunaajaanermik ulapputiginninnissarput aalajangiusimalluinnarisigu. Taamaaliornitsigut imminut annaatissaagut tusartivullu annaatissallugit. — 1 Timotheusi 4:16. (wE 2/1 06)

Eqqaamavigit?

• Matthæusi 24:14-imi siulittuut sooq taama maluginiarnartigaa?

• Ukiuni hundredelinni siullerni kristumiut oqaluussiniarlutik suut iliuuseraat, qanorlu kinguneqarpa?

• Biibilimik atuaqqissaartartut inuiannut tamanut nalunaajaasoqartariaqarnera qanoq ilillutik paasivaat?

• Ukiumi kiffartorfiusumi qaangiuttumi Jehovap innuttaasa sulinerat qimerlooraangakku suut tupigusuutigisarpigit?

[Atuaqqissaarnermi apeqqutit]

[Qupp. 14-mi assiliartaq]

Jehovap Petrusi Korneliusimut siulersorpaa taassumunnga ilaqutaanullu oqaluussiniassammat

[Qupp. 15-mi nunap assinga/​assiliartat]

Paulusi nutaarsiassaq nuannersoq oqaluussissutiginiarlugu nunakkut immakkullu kilometerit tusindilippassuit angalavoq